Pembalesan Kedji/Bab 7
VII.
TIGA PERSEROH.
„Hai, sampe begini hari loe masi maoe koetjak-koetjak mata, Loei! Betoel terlaloe sekali loe djadi anak orang. Samantar didepan tauwkeh loe begitoe, boleh la ada jang alem.“
„Boekan begitoe, tjek Tjong-tit. Samalem sampe poekoel doewa liwat owee baroe tidoer. Tetangga si sakit paja, masa kita engga toeloengin !“
Itoe orang jang diseboetken namanja Tjong-tit, ada satoe laki-laki jang beroesia koerang-lebi ampat poeloe tahon. Ia itoe bersenjoem, kamoedian laloe berkata lagi, sasoeda kisarken sisiknja ka samping:
„Sek-loei, Loei! apa boekan loe inget-ingetan jang kamaren, itoe empo jang pinggangnja tjeking, sampe djadi engga bisa tidoer ?“
„Betoel, tjek Tjong-tit! Sek-loei dari kamaren owee liatin laganja ada laen sekali. Boleh djadi samalem ia soeda mati-matian pergi samperin; di mana katanja roemahnja itoe empo?“
„Ia mondok di Djembatan-Lima, betoel dekat dengen roemahnja Sek-loei,“ djawab Tjong-tit.
„Tapi loe djoega goea engga bisa pertjaja, Peng-tin.“
„Betoel, tjek Tjong-tit," kata Sek-loei sekarang dengen tertawa, „si Pengtin dari kamaren kaliatannja soeda tergeteh-geteh sadja. Siapa jang mentar-mentar berkokok tentoe ia jang bertelor.“ „Goea tinggal di Angkee, ada djaoe dari Djembatan-Lima, tapi loe jang dekat; betoel engga, ja, tjek Tjong-tit?“
„Mana goea bisa taoe terang loe poenja perkara berdoewa?" kata itoe laki-laki satengah toewa seraja boewang ia poenja sisik. „Tjoba loe berdoewa adoeh kapelan: siapa jang menang, dia jang goea pertjaja.“
Sek-loei dan Peng-tin tinggal berdiam, kamoedian Tjong-tit laloe berkata lagi dengen pasang moeka soenggoe-soenggoe:
„Tadi loe pergi taukeh soeda bangoen belon, Peng-tin? Lagi kamaren loe disoeroe bagimana oeroesannja ? Apa soeda beres samoea? Inget, samentar itoe samoea prahoe poenja moeatan misti dibongkar dan moeat ka dalem goedang. Masa bodoh loe, samentar taukeh dateng belon oeroes, habis loe dimaki-maki.“
„Soeda, samoea soeda beres. Eh ija, tadi tjek Hoaij-wan pesan soeroe tjek Tjong-tit lantas preksa bocat bongkar itoe samoea moeatan.“
„Eh-eh, eh-eh, kaloe goea engga tegorin lebi doeloe tentoe loe loepa," kata Tjong-tit sembari sembeweken moeloetnja. „Apa sadja jang loe inget, goea djoega djadi heran. Kaloe ngeram di blakang, toenggoein empo-empo mandi ko loe salamanja engga bisa loepa ? Hajo, lekas panggil koeli !“
„Ja, ini anak bagimana ni !“ berseroe Sek-loei boeat bantoe menggoda pada Peng-tin. „Engga laen goenanja dari ngintip dia ni, tjek Tjong-tit!“
„Si Tek-koei, si Kong-koen kamana? — goea belon dapet liat mataidoengnja. Djangan belon dateng djoega, engga ?“
„Dia berdoewa lagi njapoe di blakang," kata Pengtin. „Engga keh tjek Tjong tit, engga laen doega orang belon dateng; tjek Tjong-tit sendiri asalnja baroe sadja njedok.“
„Koerang adjar! Dari pagi-pagi tadi goea soeda bangoen, habis goea pergi mandi doeloe dan bawa poelang pasaran.“
„Nah, orang laen apa engga bisa mandi, apa engga bisa bawa poelang pasaran ?“ kata lagi Peng-tin.
Tjong-tit kaliatannja seperti tida denger itoe bitjara jang kataken padanja. Laloe ia masoek ka dalem, seraja berseroe :
„Sekarang soeda ampir poekoel delapan! Lekasan panggil koeli !“
„Gi, Peng-tin !" kata Sek-loei, „mentar kasiangan nanti soesa dapet koeli.“
„Loe adja pergi," djawab anak moeda itoe, „goea poenja peroet lagi moeles.“
Sek-loei sigra maoe brangkat, tapi baroe sadja ia bertindak, Hoaij-wan soeda dateng, dan lantas menanja padanja :
„Loe maoe ka mana?“ „Maoe pergi tjari koeli, tjek.“
„Ja, lekasan.“
Sambil kata begitoe, soedagar itoe masoek kadalem, dimana ia dapet bertemoe pada Tjong-tit, Tek-koei dan Kong-koen.
„Apa soeda moelahi bongkar?" tanja ia poelah.
„Lantas,“ djawab Tjong-tit.
„Apa Kek-hoaij dan Kek-soen belon dateng?“
„Belon,“ djawab lagi Tjong-tit. ,Hala lin taoein lebi baek; ini baroe poekoel brapa?"
Hoaij-wan tinggal diam. Ia berdjalan teroes ka blakang, preksa ini-itoe, kamoedian balik kombali, dan doedoek hadepken medja toelis,
Tida berselang sabrapa lama lagi Sek-loei soeda balik dengen membawa anam koeli, dan sigra djoega orang moelahi kerdja, bongkar moeatan prahoe. Samantara itoe Hoaij-wan kaliatannja seperti orang kalelap pikiran memereksain boekoe-boekoe. Sabentar ia toendjang kapalanja dengen kadoewa tangan, sabentar ia doedoek bersender dengen berdongak.
Lontjeng mengoetaraken poekoel sambilan, tapi baek Kek-soen, baek poen Kek-Hoaij, sama sekali belon kaliatan mata-idoengnja.
„Taoeh sampe poekoel brapa ia baroe poelang samalem,“ kata Hoaij-wan pada diri sendiri dengen soeara menggrendeng. „Engga poenja pikiran! Soeda dikata ini hari ada banjak perkara jang misti dioeroes.“ Kamoedian ia berbangkit, dan pergi ka blakang, meliati orang bongkar moeatan.
Betoel pada poekoel sambilan satengah Kek-hoaij dateng, dan laloe ia ini menanja pada Peng-tin jang sedeng doedoek menongkrong di loear:
„Apa Kek-soen dan Hoaij-wan soeda dateng ?“
„Entjek Hoaij-wan ada di blakang; tjek Kek-soen belon.“
Kek-hoaij lantas berdjalan masoek, katemoeken pada Hoaij-wan, jang tatkalah dapet liat ia poenja perseroh, lantas menanja dengen bersenjoem:
„Poekoel brapa baroe habisan samalem ?“
„Ah, engga laat," djawab Kek-hoaij. „Poekoel sapoeloe soeda brenti.“
„Habis siapa jang menang paling banjak?“
„Goea jang djato kalah paling banjak.“
„Brapa banjak?“
„Tjap-goa-tjing."“
„Hai,“ kata Hoaij-wan jang lantas djoega djadi berobah aer moekanja. „Sampe djadi soe-ijah begitoe besar?“
„Ija, maen-maen lantas djadi kapanasan.“
Hoaij-wan balik ka pertengahan, dan laloe ambil tempat kombali didepan medja toelis, samantara Kek-hoaij memboentoeti ia dari blakang.
„Bagimana boleh djadi kalah sampe begitoe banjak?“
„Orang bilang goea soeda djadi panasan,“ kata Kek-hoaij. „Goea kapingin kedoek habisin doeitnja Dian-hoei, tapi berbalik goea jang kenah kapatik. Sekarang apa maoe dikata. Itoe oewang dari Gan Keng-tjoei djadi boleh dibilang soeda habis goea kalahken maen. Masoekin boekoe sadja goea ambil oewang doewa belas riboe, jang salebinja tiga ratoes lebi goea nanti kasi oewangnja.“
„Kan kamaren doeloe loe soeda pergi ka Bogor?“ tanja Hoaij-wan.
„Ja, tapi baroe kamaren soreh goea poelang.“
„Lagi kamaren soreh, didepan laen-laen orang, goea merasa engga enak tanja begini-begitoe, perkara kita poenja kerdjahan. — Bagimana, apa loe soeda dapet katemoeken pada Keng-tjoei?“
„Katemoe, tapi ia kabetoelan lagi engga ada sediah oewang; sebab goea bilang kliwat perloe, djadi ia toelisin soerat boeat goea trima doeloe dari Phoei Som-jam. Tjap-dji-tjing-sha-peh-koei-toen, itoe goea soeda engga inget lagi.“
„Habis Som-jam maoe talangin itoe oewang boeat Keng-tjoei?“
„Keng-tjoei tentoe seboet dalem soeratnja jang kita ada kliwat perloe pakeh itoe oewang, maka sasoeda habis batja, Som-jam lantas kasi.“
„Sabetoelnja djoega memang kita ada amat perloe sama itoe oewang. Loe tentoe taoe: kita misti bajar oetang dan pandjerin sama bebrapa orang boeat ia kasi masoek beras pada kita.“ „Apa kita sekarang engga bisa tarik laen oewang? Habis goea soeda kalain maen, bagimana?“
„Apa boleh boeat, sekarang kita misti tjari laen akal, tapi goea heran sekali bagimana loe kaloe soeda doedoek maen salamanja boleh engga inget daratan ! Loe kan djoega soeda sampe tjoekoep oemoer? Kaloe loe engga bisa boewang itoe adat, satoe kali kita nanti boleh dapet soesa. Inget toh, loe poenja tjilaka doeloe samoeanja ada lantaran boewang oewang engga bisa dengen kira.“
Kek-hoaij tida berkata soeatoe apa, tapi dari aer moekanja njata sekali jang ia ada merasa tida senang.
Meliat begitoe Hoaij-wan poen tida maoe madjoe lebi djaoe dengen ia poenja tjomelan. Laloe ia treaki panggil Tjong-tit, dan koetika pengawe itoe soeda dateng, ia berkata dengen soeara sabar:
„Tjoba liat kita poenja peritoengan sama Gan Keng-tjoei di Bogor.“
Tjong-tit sigra membalik-balik lembarannja boekoe, ketak-ketek mengitoeng dengen bidji-itoengan, kamoedian laloe berkata :
„Kita poenja oewang masi ada doewa belas riboe tiga ratoes doewa poeloe tiga roepiah delapan poeloe tiga cent.“
„Masoekin boekoe owee ambil oewang doewa belas riboe," kata Kek-hoaij, ,itoe tiga ratoes lebi owee nanti kasi oewangnja." Habis kata begitoe Kek-hoaij laloe kaloearken oewang dari sakoenja, mengitoeng diatas medja, kamoedian kasi itoe oewang f 323,83 pada Tjong-tit.
Hoaij-wan berbangkit boeat kasi pengawenja itoe berdoedoek.
Tjong-tit lantas gosok bak, pegang pit, dan masoekin itoe peritoengan dalem boekoe, menoeroet sabagimana jang dikata oleh Kek-hoaij, kamoedian ia trima itoe oewang salebinja, masoekin kadalem latji, dan sasoeda tjaboet koentjinja, laloe ia pergi kombali ka blakang.
Hoaij-wan ambil tempat kombali didepan medja toelis, samantara Kek-hoaij tinggal berdoedoek di sampingnja.
„Tjoba loe pikir sekarang, Hoaij," kata ia sasoeda berdiam samantara lamanja, ,bagimana sekarang kita bisa dapet itoe oewang jang kita perloe pake?“
Kek-hoaij tinggal berdiam dengen toendjang kapala.
„Kita poenja kerdjahan sekarang lagi berdjalan bagoes betoel," kata lagi Hoaij-wan. Makanja goea heran sekali, loe jang taoe itoe samoea perkara, bisa berboeat begitoe engga poenja pikiran.“
„Ja, goea salah: habis sekarang soeda djadi begitoe, loe maoe bagimana? Goea djoega apa kiranja engga menjesal? Betoel itoe oewang goea pakeh, tapi habis tahon tentoe goea poenja bagian jang dipotong.“ „Goea engga maoe bitjaraken perkara itoe, Hoaij, ah-ah, kanapa loe boleh salah ngarti?“ kata Hoaij-wan dengen sedikit sengit. „Goea sama sekali engga pikir sama itoe perkara ! Kaloe goea salamanja inget begitoe, masa goea maoe mengalah goea poenja bagian soeda begitoe banjak kapendam di sini dan loe berdoewa saban tahon tarik oewang begitoe banjak? Loe toh taoe, goea boekan orang jang terlaloe bodoh! Goea tinggal diam boekan goea engga taoe jang goea djadi kaberatan; goea kamgoan kasi loe poenja kasenangan lebi. Goea heran sekali kanapa ini hari loe boleh kaloearin itoe segala perkatahan anak ketjil !“
Kek-hoaij tarik moeka koerang senang, tapi ia tinggal berdiam.
„Goea maoe kata, loe soeda pakeh itoe oewang, apa engga bisa loe tjari'in laen boeat ganti'in?“ kata poelah Hoaij-wan dengen lebi sabar, sasoeda berdiam sabentaran. „Kaloe goea pikir, toh engga halangan kaloe loe gadeh doeloe barang-barangnja loe poenja tjabohlang.“
„Loe soeda bertjampoeran begitoe lama sama goea, tentoe djoega loe taoe adatnja goea poenja bini,“ kata Kek-hoaij. „Boleh djadi riboet seperti amoek kaloe goea minta begitoe. Dari itoe lebi baek loe tjari akal boeat pindjam samentaran dari kita poenja kenalan dagang. Itoe oewang toh kita bisa lantas ganti kaloe kita soeda dapet laen oewang. Lagi masa orang gitoe engga pertjaja sama kita boeat oewang sagitoe ?“
„Ah, kaga boleh djadi," kata Hoaij-wan dengen bersenjoem, „lebi banjak lagi djoega kaloe kita maoe boeka moeloet pindjam, lantas bisa dapet. Tapi loe toh misti ada poenja otak. Kaloe kita pindjam orang poenja oewang, orang nanti djadi kapingin taoe apa kita maoe berboeat; orang nanti intip kita poenja perdjalanan, dan dalem ini perkara jang sekarang kita maoe djalanin, ada perloe sekali orang tinggal boeta.“
„Habis bagimana?“
Hoaij-wan berdiam samantara lamanja dengen berpikir, kamoedian laloe ia berkata dengen sabar:
„Nah soeda, goea nanti taroh bini goea poenjá barang-barang, tapi loe misti berdjandji, djangan berboeat lagi sakali begitoe. Loe boleh soempa djangan maen saoemoer hidoep. Engga ada lebi djahat lagi dari maen, itoe tentoe loe soeda sampe taoe. Kaloe orang bisa tjari oentoeng dari maen, samoea orang tentoe kaga maoe kerdja. Kita poenja kerdjahan sekarang ada sampe bagoes, kaloe kita bertiga engga maen, pendeknja engga maoe kenal maen sama sekali. Boeat hidoep bagimana senang kita ada sampe tjoekoep; pendeknja loe boleh piara sapoeloe bini, asal sadja djangan maen.“
Kek-hoaij tida oetjapken soeatoe perkatahan, tapi dari moekanja ada kentara sekali jang hatinja sedikit poen tida soedi menaloek dibawah Hoaij-wan poenja nasehat. Dalem hati ia berkata:
„Hm ! kaloe kaga ada goea berdoewa, masa loe bisa djadi seperti sekarang ? Soeda begitoe sekarang maoe banjak tingka lagi !“
Hoaij-wan poenja mata jang tadjem poen lantas dapet njataken, jang ia poenja perseroh ada merasa koerang senang. Oleh kerna itoe sigra ia poeter haloeannja omong dan bitjaraken laen-laen perkara oeroesan dagang.
Lontjeng mengoetaraken poekoel sabelas, dan sasoeda lama lagi berselang, baroe kaliatan Kek-soen dateng dengen amat lesoe, tapi Hoaij-wan dan Kek-hoaij sama sekali tida ambil perdoeli padanja.
Sembari mengoewap soeaminja Soan-nio itoe ambil tempat di satoe krosi, dan tinggal bertjokol dengen tida tjampoer moeloet sampe sakean lama. Kamoedian dengen koenjoeng-koenjoeng ia menanja:
„Habis bagimana kasoedahannja itoe maen, Hoaij?“
„Orang kata goea djadi kalah tjap-goa-tjing.“
„Ei, sampe begitoe banjak ?
Kek-hoaij tinggal tida menjaoet, tapi Hoaij-wan lantas berkata:
„Kanapa sampe begini hari roepanja masi lesoe amat, Kek-soen?“
„Orang goea engga dapet tidoer sampe pagi.“
„Kanapa?" tanja Kek-hoaij dan Hoaij-wan dengen berbareng. „Ah, engga, tapi bagimana itoe samoea oeroesan Wan, apa soeda djadi beres?“
„Belon, tapi goea nanti oeroes sampe beres, itoe traoesa pikirin.“
Kamoedian tiga orang itoe laloe doedoek omong-omong, tapi oleh kerna Kek-soen roepanja ada amat katarik pikiran dengen soeatoe perkara, mendjadi sekarang marika poenja bitjara tida berdjalan dalem satoe haloean. Hoaij-wan ada amat getol tjeritaken perkara dagang, tapi omongan itoe sabentar-bentar ditarik oleh Kek-soen ka laen tempat, samantara Kek-hoaij boleh dibilang ada mendjadi gongnja sadja.
Begitoe poenja begitoe achirnja soeda djadi poekoel doewa belas satengah tengahari. Hoaij-wan kasi taoe pada doewa perserohnja jang ia maoe poelang makan sabentaran, dan sigra aken balik kombali. Kamoedian ia ambil topi, laloe brangkat dengen doedoek kandaran.
Kek-soen dan Kek-hoaij pergi ka blakang, dimana iaorang dapetken Tjong-tit sedeng asik djadi mandor dari orang-orang jang bongkar moeatan prahoe. Tida berselang lama lagi doewa soedara itoe laloe ambil masing-masing poenja djalan meninggalken itoe toko, hingga koetika Hoaij-wan balik pada poekoel satoe satengah tida ia dapetken lagi pada perserohnja.
„Apa ia kata maoe balik kombali, ko Tjong-tit?“ tanja ia pada itoe pengawe jang sekarang ini sedeng menoelis boekoe.
„Ia engga ada bilang satoe apa. Hala lin taoein lebi baek. Mana dia berdoewa taoe doedoek di sini dari pagi sampe soreh?“
„Owee soeda bilang tadi, ada satoe perkara jang perloe didamiken," kata lagi Hoaij-wan. „Soedalah, kaloe ia engga dateng lagi owee nanti poetoesin sendiri, sebab ini perkara engga boleh toenggoe-menoenggoe.“
„Lin berdami sama dia djoega pertjoema, pengabisannja tentoe dia soeroe lin djoega jang oeroes samoeanja. Orang samoea djoega taoe, kaloe boekan lin ada di sini, masa bisa ada seperti sekarang? Dan lagi. . . . . . . . . ..“
„Hala soedalah ko Tjong-tit, boeat apa bitjara begitoe. Bolehnja heran soeka banjak moeloet; owee toh engga tanja lebi dari Kek-soen dan Kek-hoaij maoe dateng lagi atawa kaga.“
Pengawe itoe tarik moeka djengah lantaran omongannja soeda tida ditrima baek, tapi dengen tida menjaoet barang sapata ia toendoek menoelis seperti tida ada kadjadian soeatoe apa.
Meliat jang dampratannja ada ditrima oleh Tjong-tit dengen tida sedikit dilawan, Hoaij-wan lantas balik merasa, jang ia ada berlakoe meliwatken watas. Laloe ia tjari satoe lantaran boeat bitjara, kamoedian ia berkata : „Bagimana ko Tjong-tit poenja pengliatan; sampe brapa banjak kita boleh pertjaja sama Gan Kengtjoei ?“
„Begitoelah sampe dji-sha-tjap-tjing. Tempo goan pergi di Bogor, goan soeda perloein tjari taoe. Samoea orang kata ia sekarang ada sedeng djaja.“
Hoaij-wan bersenjoem, kamoedian laloe berkata lagi :
„Sekarang kita poenja oewang samoea soeda habis ditagi, ja?“
„Ja, samoeanja; lin boleh traoesa salempang boeat kasi lagi sama dia.
„Prahoe soeda habis dibongkar samoea, ja ?“
„O, dari tadi.“
„Kamaren poekoel brapa itoe orang-orang berdjandji maoe dateng ka mari, ha, ko Tjong-tit? Kira-kira poekoel tiga, ja?“
Betoel, lebi baek lin sekarang djangan pergi ka mana-mana lagi. Engga, samentar ia dateng nanti kaga ada orang jang poetoesin.
„Ah, engga, ini hari owee engga ada laen oeroesan.“
Kamoedian Hoaij-wan laloe berdjalan masoek-kaloear di tokonja, menanjaken ini-itoe atawa kasi prenta apa jang ia rasa perloe. Oleh kerna itoe, baek Tjong-tit, baek poen samoea anak-anak jang berkerdja di sitoe, tida ada jang brani maen gila-gila atawa bertjanda segala tida karoeanan.
Antara perserohnja, memang adalah Hoaij-wan jang paling terindah, kerna boekan sadja salamanja ia jang poetoesken segala oeroesan, tapi djoega dari roepanja, dari tingka lakoenja, ada paksa boeat orang pandang tinggi padanja. la poenja moeloet tida begitoe terlepas seperti Kek-soen dan Kek-hoaij, tapi djoestroe itoe jang membikin ia djadi lebi ditakoeti.
Itoe satoe hari Hoaij-wan tinggal teroes dalem tokonja, dan oleh kerna Kek-soen dan Kek-hoaij betoel-betoel sadja tida dateng kombali, sabagimana biasanja, mendjadi ia sendiri sadja jang poetoesken itoe perkara, jang tadinja ia anggap ada lebi baek kaloe bisa dimoefakatin sakalian sama doewa perserohnja.
Oleh kerna ada amat banjak oeroesan jang lantas misti dibikin beres, mendjadi sampe poekoel anam Hoaij-wan masi berkoetet-koetetan sama sakalian pengawenja.