Pembalesan Kedji/Bab 8
VIII.
IBOENJA HOAIJ-WAN.
„Dari tengari goea liat loe poenja roepa boleh koesoet sekali, Hoaij-wan; apa kongsie dapet roegi besar?“
„Kaloe owee tjeritain tentoe 'na toeroet-toeroetan djengkel; habis 'na tentoe engga bisa bantoe satoe apa; djadi engga goena, boekan? Sekarang kita lagi adepin nasi, biar kita makan dengen senang, trima redjeki jang Toean Allah kasi sama kita. "Na pendeknja traoesa djengkel; segala berat-enteng owee nanti pikoel sendiri.“
„Ija loe kata begitoe, tapi goea jang djadi orang toewa mana boleh enak, kaloe liat anak masoek-kaloear moekanja letjak. Nanti kaloe loe soeda lebi toewa, loe djoega nanti rasain, bagimana engga enaknja orang djadi orang toewa.“
„Na bolehnja soeka bikin kesal diri sendiri. Pendeknja inget begini sadja: kaloe ada perkara jang boleh djadi tjilaka, masa owee nanti tinggal diam, engga tjeritain sama 'na dan minta 'na bantoe pikiran. Kaloe perkara jang owee engga seboet-seboet na boleh pikir sadja, itoe perkara tentoe ketjil, jang owee koewat tanggoeng sendiri.“
„Apa loe dapet tjektjok sama orang?“
„Ah, engga.“
„Engga habis loe kanapa ini satoe hari bolehnja letjak sekali kaliatannja ?“ „Ah, perkara ketjil sekali, kongsie perloe pakeh itoe oewang, habis Kek-Hoaij boleh kalahken maen. Owee djadi djengkel liat orang poenja tingka begitoe.“
„Sampe brapa banjak ia soeda kalah maen ?“
Sabelas riboe lebi. Kongsie kabetoelan lagi perloe pakeh itoe oewang. Owee djadi djengkel liat orang engga poenja pikiran begitoe.“
„Soeroe ia toeroenin bininja poenja barang-barang, djangan ia kaenakan sadja. Soeda loe sendiri jang berkerdja mati-matian, habis ia soeda engga bantoe satoe apa maen pakehin oewang sadja; enak amat !“
„Pantesnja memang begitoe, sebab kongsie kliwat perloe pakeh itoe oewang; tapi mana ia brani sama bininja !“
„Barang jang misti, mana boleh ia maen enak-enakan sadja bilang engga brani; habis apa boleh soeda ?“
„Ah, dari begitoenja si perkara ketjil; owee tjoema djengkel liat ia poenja tingka-lakoe jang begitoe engga poenja pikiran, sedengan ia taoe itoe oewang ada kliwat perloe dipakeh.“
„Habis loe maoe pakeh oewang di loearan; nah, kaloe begitoe soeroe ia jang bajar boenganja; enak amat kaloe misti kongsie jang pikoel.“
„Ah, begitoenja si perkara ketjil. Owee pikiran maoe toeroenin kita poenja barang-barang; boengahnja biar kongsie jang pikoel.“ „Kanapa loe maoe begitoe bodoh, orang jang enak-enakan misti loe jang djadi kaberatan ? Mistinja dia toh jang toeroenin bininja poenja barang-barang; kaloe ia takoet, soeroe ia jang pakeh oewang di loearan dan biar dia jang bajar boengahnja dari kantong sendiri.“
„Hala maoe apa kabanjakan tjerewet begitoe, boeat segala perkara ketjil? Biar kita poenja barang-barang djoega jang ditaroh gade, dalem satoe boelan owee brani tanggoeng nanti soeda bisa diteboes, sebab itoe waktoe kita soeda bisa dapet laen-laen oewang.“
„Kasi begitoe djoega maoe kanapahan ? Bagoes betoel, dia jang enak-enakan makan nangkanja loe jang misti kenah getanja. Kaloe goea poenja liatan, itoe si Kek-soen sama si Kek-hoaij engga boleh ditjampoer lebi lama lagi. Salah-salah dia jang maen gila-gilahan, loe jang nanti mendapet soesa. Bikin oetang apa samoea loe poenja nama, habis dia pakeh oewang engga bisa kenal watas. Segala maen itoe toh segala perkara jang engga misti; masa bisa kalah sampe sabelas riboe ? Goea kira, engga sama loe petja sadja serohan sama dia berdoewa.“
„Engga baek begitoe, 'na, orang nanti katain owee engga inget orang poenja boedi, sebab kita bisa hidoep seperti sekarang itoe samoea ada dia berdoewa jang poenja lantaran.“ „Ija, kaloe dia betoel-betoel, memang djoega engga baek kita bikin begitoe, tapi ini dia poenja tingka-lakoe nanti boleh bikin loe djadi tjilaka. Saban tahon di'itoengnja ada oentoeng, tapi djangan kata pegang, liat goea belon taoe. Dari bermoelah dia berdoewa tjoema taroh oewang lima belas riboe ta brapa, tapi kaloe maoe di'itoeng ia poenja pakeh oewang soeda lebi dari sagitoe. Boleh dibilang loe sendiri sadja poenja kringet jang piara dia berdoewa poenja roemah tangga. Tjoba kasi dia itoe oewang lima belas riboe, sampe sekarang tentoe soeda kaga katinggalan sapeser.“
Hoaij-wan tinggal berdiam sadja mendengeri iboenja poenja bitjara.
Tida sabrapa lama lagi orang toewa itoe soeda habis bersantap. la tjoetji tangan, kamoedian pindah ka laen krosi, doedoek menampin, dan sembari menoemboek siri ia berkata poelah :
„Goea kira lebi baek loe petja serohan, Hoaij-wan. Loe misti inget, loe ada poenja anak. Bagimana nanti djadinja kaloe loe satoe hari satoe malem engga ada oemoer? Ja, harepin si loe bisa toenggoe anak-anak sampe djadi orang dan bisa toenggoe sampe goea djalan lebi doeloe, tapi kaloe kadjadian loe engga ada oemoer, bagimana nanti djadinja sama loe poenja anak-anak ?“
„Ah, 'na salah. Ini waktoe boekan kita jang misti katakoetan, tapi dia jang misti djaga owee poenja djiwa lebi-lebi dari dirinja sendiri. Sekarang owee poenja nama samoea; kaloe owee mati apa jang ada samoea nanti masoek di kamar boedel. Pendeknja perkara begitoe 'na boleh traoesa pikirin. Kaloe owee mati sekarang, 'na dan samoea djoega traoesa djadi soesa.“
„Eh, goea boekan soeka loe mati, Hoaij-wan; goea tjoema pikirin loe poenja anak-anak sama loe poenja bini; kaloe keh goea orang soeda toewa, masa makan oemoer brapa lagi? Loe poenja serohan samoenja begitoe gila-gila; mana boleh diharep ia nanti bisa toentoen loe atoer dagang sendiri. Loe misti inget, Hoei-djin soeda boleh dikawinin. Kaloe loe ada dagangan sendiri kan loe boleh toentoen adjarin dia dagang, soepaja blakang kali dia bisa ganti'in loe poenja kerdjahan?“
Sambil kata begitoe, orang toewa itoe djalanken sisiknja moendar-mandir, hingga bebrapa djarinja djadi memblepot mera.
Hoaij-wan berdiam samantara lamanja. Ia soewap doewa tiga kali, bikin habis nasinja. Sasoeda tjoetji tangan dan isep tjeroetoe, ia doedoek dekat pada iboenja di medja ketjil, dimana ada tersediah makanan thee dan boewa-boewa. Kamoedian laloe ia berkata:
„Owe djoega ada ingetan: asal sadja si Hoeidjin soeda masoek oemoer delapan belas tahon, lantas dikawinin, soepaja 'na bisa ngalamin ada poenja tjoetjoe mantoe. Tapi owee kapinginnja tjari besan orang jang bisa bantoe toentoen sama itoe anak, soepaja kaloe satoe hari satoe malem owee engga ada oemoer, ada orang jang bisa gantihin djadi bapanja.“
„Goea poenja kapingin djoega begitoe. Dari ketjil goea tjapehin, goea gadangin, goea kapingin la liat ia ada poenja bini, jang nanti bales rawatin sama goea. Perkara berbesan si engga perloe sama orang jang kajah, asal sadja jang pantes-pantes dan toeroenan baek baek boeat kita poengoet bibitnja. Baroe ini goea pergi kondangan dapet liat anaknja njonja Boen-hoei; eh, goea boleh soeka betoel sama itoe anak; tjoema sajang oemoernja ada toewahan dari si Hoei-djin. Baek ia poenja dandanan keh, baek ia poenja roepa, baek ia poenja omong keh, samoeanja engga ada jang boleh ditjelah.“
„Soeda brapa ia poenja oemoer ini tahon?“
„Delapan belas."
„Ah, terlaloe toewa, Hoei-djin baroe lima belas ini tahon.“
„Goea djoega kata begitoe. Kita poenja toeroenan salamanja kaloe kawin, jang lelaki misti toewahin jang prampoean.“
„Owee ada ingetan sama anaknja Ek-tjong; apa 'na soeda taoe liat?“ „Siapa itoe Ek-tjong ? Goea belon taoe denger itoe nama.“
„Dia berdagang kaen dan tjita-tjita; kaloe owee liat orangnja si boleh diboeat djadi orang toewa-toewa. Dia ada poenja satoe anak proempan jang sekarang masi kaloear-kaloear. Tjoba iseng-iseng tjari lantaran boeat berkenalan sama bininja. Owee si kira 'na tentoe soeka itoe anak.“
„Dimana ia tinggal ?“
„Di Gang Motjoei. la poenja waroeng boleh dibilang ada di tengah-tengah itoe gang dan mengadep koelon; betoel di sebrangnja ia poenja roemah tinggal. Anaknja ada doewa, jang lebi besar lelaki.“
„Kaloe bisa djadi baek sekali : kita poenja anak kapala, ia anak bontot. Orang doeloe poenja kata, kaloe kapala dirangkep sama boentoet djadinja satoe badan, dan itoe ada jang paling baek boeat orang kawin. Tjoema belon taoe brapa oemoernja itoe anak.“
Owee belon tanja, sebab owee pikir masi banjak tempo; kita toh tentoe kaga maoe kawinin si Hoei-djin kaloe ia belon oemoer delapan belas.“
„Eh, habis kaloe jang proempan terlaloe moeda djoega engga boleh djadi. Kaloe sepertinja ia sekarang baroe oemoer sabelas, matjan si Hoei-djin oemoer delapan belas ia baroe ampat belas; itoe terlaloe moeda, dan djarang lagi ada orang jang maoe kawinin anaknja oemoer ampat belas.“ „Nah, kaloe begitoe tjoba 'na pergi tjoba-tjoba tanja, dan sakalian liat itoe anak; kaloe rasanja soeka, plahan-plahan owee nanti bitjara sama Ektjong. Kaloe owee jang minta si rasanja tentoe ia kasi.“
Koetika itoe istrinja Hoaij-wan kabetoelan djalan meliwat, maoe pergi kaloear, hingga lantas sadja ia ini ditanjaken oleh mertoewanja :
„Eh, na mantoe, apa loe kenal sama njonja Ek- tjong ?:
„Kenal, kanapa ?“
„Jang mana toe, ha ?“
„Jang dagang kaen di Gang Motjoei. kapan nio djoega kenal sama dia.“
„Engga, goea engga ada kenal njonja Ek-tjong, Kaloe njonja Doeit goea kenal; ia djoega lakinja dagang kaen.“
„Nah ja, njonja Doeit itoe la njonja Ek-tjong. Ada jang panggil njonja Doeit ada djoega jang panggil njonja Ek-tjong.“
„O, dia toe ? Tapi goea belon taoe denger orang panggil dia njonja Ek-tjong. Kaloe dia goea kenal, Hoaij-wan. Ija, goea bolehnja keh orang ngigo denger loe poenja omong; betoel da dia poenja roemah memang ada sebrang-menjebrang sama waroengnja; betoel, dia memang ada poenja anak : satoe lelaki, satoe proempan.“
Habis kata begitoe orang toewa itoe djalanken lagi sisiknja boelak-balik, kamoedian laloe menanja poelah pada mantoenja :
„Brapa ha, oemoernja ia poenja anak jang proempan ? — eh, goea boleh loepa lagi siapa namanja.“
„Namanja Sek-lian; oemoernja tiga belas mengkali, taoehlaih saia soeda inget-inget loepa; satoe kali nja Doeit soeda taoe omong-omong.“
„Nah, kaloe ini tahon oemoernja tiga belas sedengnja, Hoaij-wan: matjan si Hoei-djin poenja oemoer delapan belas ia soeda anam belas. — Bagimana loe poenja liatan anaknja njonja Doeit itoe kaloe saändenja dikawinin sama Hoei-djin ?“
„Kaloe nio soeka tentoe saia djoega soeka, tapinja itoe anak masi terlaloe keh anak-anak; sampe sekarang ia masi belon ditoetoep.“
„Nah ja, orang oemoer tiga belas memangnja djoega masi anak-anak. Lagi perkara toetoep si itoe memangnja kaga tentoe. Ada jang toetoep anaknja dari oemoer doewa belas, ada jang tiga belas dan ada djoega jang baroe toetoep anaknja soeda oemoer ampat belas. Kaloe begitoe itoe anak tentoe sampe laen tahon baroe ditoetoep, tapi itoe si engga ada halangan; kita tok maoe minta dikawinin oemoer anam belas. — Ija, itoe anak djoega, Hoaij-wan, goea boleh merasa soeka liatnja ia poenja dandanan.“
„Ja, dari roepanja dan dandanannja sama sekali engga boleh ditjelah,“ kata iboenja Hoei-djin, „tapinja ia poenja moeloet ada lemmes sekali, nio.“ „Hala anak-anak habis loe maoe bagimana ? Perkara adat si goea kata gampang dirobah; apa lagi kaloe ia soeda ada di sini kita bisa kasi adjaran.“
Istrinja tinggal berdiam, tapi Hoaij-wan lantas berkata :
„Dan goea inget begini: Ek-tjong boleh dibilang ada pinter djoega, banjak tjampoeran dan tingka-lakoenja djoega baek. Kaloe kita berbesan sama dia, kasi goea satoe hari satoe malem engga ada oemoer, kita poenja anak-anak ada jang toentoen, djadi engga kwatir; apa lagi kaloe anaknja engga djelek, itoe ada lebi baek lagi. Bagimana loe poenja pikiran ?“
„Itoe perkara masi lama boeat apa direktjokin dari sekarang," djawab sang istri. „Hoei-djin sekarang baroe lima belas; sampe Hoei-djin oemoer delapan belas masi ada tiga tahon; nanti sadja kita bitjarain lagi kaloe soeda sampe temponja, sekarang masi terlaloe tangeh.“
„Eh, loe boleh keh koetjing engga ngarti orang poenja omong," kata Hoaij-wan dengen sedikit sengit. „Loe masi engga ngarti ? — dibitjarain sekarang djoega boekan lantas maoe dilamar dan dikawinin, tapi apa namanja tjoema berdami sadja di satoeroe kita. 'Na soeda soeka dan kaloe loe soeka djoega, nanti soeda sampe waktoenja jang baek baroe kita lamar. Kaloe sampe itoe waktoe a soeda bertoendangan sama laen orang, soeda, kita nanti tjari jang laen; sekarang pendeknja kita tjoema omong-omong sadja di sini. Kan begitoe orang bitjara ?“
„Perkara begitoe goea si toeroet sadja," kata poelah sang istri. „Loe jang djadi orang laki tentoe ada lebi taoe perkara di loearan.“
„Eh, lagi-lagi loe begitoe. Kanapa loe boleh salah mengarti sampe begitoe djaoe ? Goea tjoema maoe tanja : loe soeka atawa kaga, kaloe anaknja njonja Ek-tjong itoe djadi loe poenja mantoe ? — nah, begitoe pendeknja.“
„Orang kata goea menoeroet sadja," kata sang istri sekarang dengen sedikit sengit, kamoedian lantas ia berdjalan kaloear.
Hoaij-wan tinggal berdiam sampe sakean lama. la empos tjeroetoenja seraja mengelah napas sampe bebrapa kali. Iboenja poen tida oetjapken satoe perkatahan lagi. Boleh dibilang itoe pembitjarahan soeda djadi mandek lantaran Hoaij-wan dan istrinja sama-sama soeda djadi sengitan.
Dan laen dari itoe boleh djoega dibilang jang itoe orang-orang toewa ada terlaloe tjerobo, lantaran marika soeda bitjaraken itoe perkara nikah dengen tjara begitoe terlepas, kerna djoestroe dari sebab iaorang berlakoe begitoe, mendjadi sekarang Hoei-djin djoega ada dapet denger itoe samoea omongan.
Samantara ajah dan mah-toewanja lagi bitjara, anak itoe kabetoelan soeda masoek kadalem kamar depan, boeat ambil perabot peranti menggambar, jang ia simpan dalem latji dari satoe lemari, tapi di itoe waktoe, dengen koenjoeng-koenjoeng ia dapet denger namanja diseboet-seboet dalem omongan. Oleh kerna itoe, boekan ia lantas kaloear kombali, tapi laloe pasang koeping dengen terliti, mendengerken orang poenja bitjara.
Kamoedian Hoei-djin dapet kanjatahan djoega jang iboenja ada toeroet tjampoer dalem itoe pembitjarahan, dan koetika njonja Hoaij-wan itoe menjataken dengen sengit jang ia malaenken maoe menoeroet sadja sabagimana adanja orang poenja poetoesan, anak itoe laloe berkata pada diri sendiri dengen soeara menggrendeng :
„Eh, eh, kanapa boleh begitoe ? Dia sendiri jang kata, habis sekarang bolehnja ia ngomong begitoe; bagimana si dia poenja pikiran ?“
Kamoedian Hoei-djin djatoken dirinja diatas satoe bipan jang ada di itoe kamar, dan rebahken dirinja dengen moeka menghadep tembok. Ia poenja kaadahan di itoe waktoe boleh dioepamaken seperti orang mengimpi: pikirannja melajang, menarik sasoeatoe perkara jang ia pernah ngalamin, dan koempoelken itoe mendjadi satoe dalem otaknja. Segala penghidoepannja jang soeda-soeda berbajang kombali didepan matanja seperti itoe samoea baroe kadjadian selang bebrapa saät sadja. Tapi toch sama sekali ia boekan ada didalem poeles. Sasoeda teroembang-ambing sakean lama dalem ka'adahan jang adjaib itoe, Hoei-djin laloe berkata dengen soeara seperti berbisik dan tida lampias kaloearnja dari tenggorokan:
„Goea merasa soeka sekali sama si Bong-loan, habis orang maoe kawinin goea sama laen orang; engga boleh djadi goea nanti maoe menoeroet! Soesa betoel kaloe orang toewa samoeanja maoe maen gampangin sadja begitoe. Dia engga laen maen soeka sadja; ada lagi jang engga laen maen menoeroet, tjilaka betoel !“
Habis menggrendeng begitoe, Hoei-djin bangoen berdoedoek, kamoedian laloe kaloear dari itoe kamar dengen moeka amat lesoe, Sasampenja di pertengahan, Sioe-kioe, jang soeda merasa amat djengkel menoenggoe di sitoe, lantas menanja :
„Nioe soeda kakesalan maoe pergi samperin. Apa tidoer ?“
Hoei-djin tida menjaoet, tapi lantas doedoek meloekis dengen hati amat tertindih. la sekarang sama sekali tida ada poenja napsoe boeat menggambar.