Pembalesan Kedji/Penutup
PENOETOEP
Sabelon kita prenta orang-orang dalem ini tjerita membri selamat tinggal boeat salamanja pada pembatja, lebi doeloe kita maoe adjak pembatja pergi koendjoengin pada bebrapa antaranja, jang kita rasa pembatja tentoe ingin dapet sedikit katrangan, apa jang telah terdjadi dengen marika poenja peng-hidoepan jang paling blakang.
Paling pertama biarlah kita adjak pembatja pergi katemoein pada Hoel-djin dan Bong-loan.
Delapan boelan berselang dari apa jang ditjeri-ken dalem fatsal di atas ini. Koetika itoe doewa orang moeda itoe soeda hidoep seperti soeami dan istri. Kira-kira doewa boelan lamamja marika soe-da tersemboeng dengen tali nikahan. Rasanja ma-doe penghidopean jang manis dan sedap dapet dirasaken oleh arika sampe pada watasnja jang paling pengabisan, kerna iaorang poen ada menjinta betoel satoe sama laen. Samantara Bong-loan poenja broentoeng teroetama soeda terdiri dari pengrasahan trima kasi lantaran sang soeami sanantiasa ada oeroeki ia dengen kabaekan, adalah Hoei-djin poenja broentoeng terdiri dari pengarasa-han senang jang amat kekal. Sabenarnja siapatah djoega nanti tida rasaken dirinja seperti ada di da-lem sorga, apabilah orang broentoeng bisa alamken penghidoepan seperti jang ada didapet oleh itoe anak moeda? Ia poenja batin soetji, jang disalipoeti dengen pengrasahan haloes, membikin lekas sekali timboel ia poenja rasa kasian, dan achirnja soeda memimpin ia begitoe djaoe, hingga ia djato tjinta pada satoe nona dengen saantero ia poenja djiwa. Nona itoe sekarang soeda mendjadi ia poenja istri, dan apa jang ia harep dari itoe istri salagi mendjadi toendangan, samoea ada terkaboel lama ia soeda impiken dan bajangke dengen pikirannja. Habis apatah lagi jang misti dimaoein oleh satoe orang boeat djadi satoe manoesia jang paling broentoeng di ini doenia?
Loembranja orang menganggap benar: terdjebloes dalem kasoekran artinja alamken kadoeka-han, dan kadoekahan itoe adalah jang paling hei-bat mengoerangken penhidoepan broentoengnja pasangan soeami dan istri, tapi bagi Hoei-djin dan Bong-loan hal itoe adalah laen sekali! Sadari ia-orang terangkep dengen tali nikah, belon pernah iaorang mengal apa namanja kadoekahan hati. Bong-loan ada disajang oleh samoea orang dalem roemah martoewanja, ia poenja tali persobatan sama Sioe-kioe samingkin lama ada djadi samingkin kekal, dan laen dari itoe ia poenja entjim djoega sekarang ada berlakoe manis sekali padanja. Hoel-djin!-ja, anak moeda itoe bebrapa kali ada me-rasa dirinja terdjebloes dalem kasoekeran boeat oeroesan dagang, jang Hoay-wan samingkin lama samingkin menjerahkan sadja atas ia poenja tang-goeangan, tapi kasoekeran iteo bagia ia tidalah berarti kadoekahan. Bilah habis kerddja tjapeh ia poelang ka roemah dan dapet bertemoe pada Bong-loan, lantas djoega hatinja mendapet obat, saroepa obat jang membikin ia djadi dapet pengra-sahan anteng dan senang, saroepa obat jang memkin ia poenja soemangat djadi koewat dan sabat! Ja, apabilah lagi ada di dampingnja Bong-loan, anak moeda itoe lantas djoega dapet soeatoe pengrasahan seperti ia nanti bisa bantrasi segala kasoekeran doenia dengen bersenjoem dan memaen!
Sioi-kioe sampe sabegitoe djaoe belon djoega mendapet toendangan, kerna Hoay-wan tida maoe kasi anaknja kaloear pintoe mengikoet soeaminja, tapi ingetan maoe ambilin satoe mantoe jang bisa tinggal bersama-sama.
Mah toewanja Hoei-djin dalem waktoe-waktoe jang paling blakang ada djadi samingkin tjerewet dari biasanja, tapi toch ia ada sajang sekali pada Bong-loan, jang sanantiasa belin pernah alpa merawatken padanja.
Njonja Hoay-wan, jang sekarang ini soeda djadi mertoewa tapi sabaliknja masi tinggal djoega men-djadi mantoe orang, ada hidoep teroes satjara amat sederhana seperti jang soeda-soeda. Oleh kerna njonja itoe memang ada poenja perangei jang haoes, maka dalem segala apa ia bisa berlakoe dengen patoet sekali. Ia poenja katjintahan jang dioeroekin pada Sioe-kioe dan Bong-loan ampir tida bisa ditimbang jang mana ada lebi berat, dan laen dari itoe ia bisa djoega menjinta pada mertoewanja seperti pada mahnja sendiri.
Hoay-wan sendiri soeda ampir satoe tahon la-manja, malaenkan pergi kadang-kadang sadja ka tokonja. Plahan-plahan ia soeda tjoba serahken antero kerdjahannja pada ia poenja anak. Sadari Hoei-djin baroe terlahir ia memang soeda simpan satoe harepan, achirnja nanti bisa toentoet peng-hidoepan satjara orang-toewa jang merdikah, jang malaenkan djalan moendar-mandir sadja seperti mandor, dan sekarang njatalah jang harepannja itoe ada terkaboel.
Njonja Boen-hoel ada dapet tempat kadiaman di roemahnja Hoay-wan. Mah-toewanja Sioe-kioe ada merasa kasian atas nasib jang soeda menimpa ka-palanja itoe orang toewa, dan lantaran itoe laloe ia mengoendang mahnja Bok-hiang itoe boeat ting-gal bersama-sama, temanin ia djadi orang toewa-toewa di dalem roemah.
Pada njonja Boen-hoei itoe dibri satoe kamar, samantara deradjatnja dalem roemah itoe adalah ampir sabanding sadja dengen iboenja Hoay-wan. Boedjang-boedjang dan samoea anggota dari koelawarga Souw, ada berlakoe padanja dengen kehormatan sabagimana biasanja digoenaken pada saorang toewa.
Njatalah, sekali poen di hari toewa mendjadi sa-batang karang, toch bagi njonja Boen-hoei masi ada berkahnja Alah, jang mendjagahi ia dari ka-melaratan doenia, tapi maski ada begitoe, troe-roeng orang toewa itoe sering dikoendjoengin oleh pengrasahan sedih. Kaloe ia liat Bong-loan, Sioe-kioe dan Hoei-djin, jang sanantiasa ada hidoep amat roekoen, lantas djoega hatinja djadi mengi-nget pada Bok-hiang, dan pengrasahan jang ter-dapet di itoe waktoe kadang-kadang ada begitoe gerakin ia poenja hati, hingga bebrapa kali ia soeda djadi menepas aer mata.
Bong-loan, jang satoe doewa kali dapet njata-ken itoe kadoekahan dari jonja Boen-hoei, lantas dapet pengrasahan amat kasian. Bebrapa kali nona itoe soeda mendengerken dengen toendoek, tjerita-nja itoe orang toewa jang menoetoerken ia poenja peroentoengan tjilaka. Apa artinja kadoekahan, sabagi nona Bong-loan jang dimoesoein oleh iboe tiri, istrinja Hoei-djin itoe ada sampe kenal, hingga tidalah heran kaloe achirnja ia djadi merasa be-gitoe lengket sama itoe orang toewa, dan anggap seperti ada iboenja sendiri. Satoe pengrasahan lantas bersemi dalem hatinja, satoe pengrasahan jang ada sapoeloe kali lebi moeliah dari adanja ia poenja pengrasahan sekarang bagi ia poenja entjim.
Memang, ia poenja entjim sekarang ada berlakoe manis sekali padanja, ja, manis jang barangkali soesa ditjari watasnja. Ia sekarang malaenkan perloe memboekah soera, dan sigra djoega ia poenja perkatahan nanti dapet satoedjoe, ja, ia sekarang malaenken perloe njataken, kamoedian lantas djoega samoea nanti terdjadi menoeroet ia poenja maoe, tapi itoe samoea dari entjimnja, Bong-loan ada sampe taoe apa artinja, ia taoe bahoewa itor samoea tjoema soeda terdjadi lan-taran ia sekarang ada mendjadi Bong-loan jang broentoeng, ada djadi istrinja Hoei-djin jang har-tawan!
Memang, Bong-loan lantas dapet rasa kasiana tatkalah meliat entjimnja poenja kakoean djadi berobah begitoe matjem, tapi kasihan itoe malaen-kan adalah seperti satoe hadiah, jang saoeatoe nona jang berperangei haloes nanti koerniaken pada saoeatoe orang toewa jang berlakoe begitoe padanja, bedah amat djaoe dengen itoe pengrasa-han jang soeda bersemi dalem hatinja bagi njonja Boen-hoei, jaitoe jang boleh dinamaken pengrasa-han lengket dan saling pertjaja dari satoe anak pada iboe sendiri.
Barangkali masi ada Alah!-begitoe boleh djadi orang nanti berkata dalem hati tatkalah membatja ini tjerita sampe di sni. Ja, barangkali masi ada Alah! Bong-loan tida pernah berboeat kasalahan, ia kenah teroembang-ambing dalem boesanja doe-nia jang pait, tapi Alah adaken Hoei-djin boeat menoeloeng. Njonja [Boen-hoei dirampas moesti-kanja jang penghabisan, ia poenja pengharepan di bikin djadi terpoetoes sama sekali, tapi Alah ada-ken iboenja Hoay-wan boeat melindoengken ia soepaja djangan djadi terdjebloes dalem satoe ka-melaratan jang kliwat heibat dan Alah adaken Bong-loan djadi gantinja ia poenja Bok-hiang.
Sekarang marilah kita pergi tengokin orang-orang dari laen fihak jang djoega ada tersangkoet dalem in tjerita.
Sabagimana pembatja soeda taoe, lantaran tida bisa tjokjok achirnja Kek-Hoay telah ambil poe-toesan, boeat tida ambil perdoeli lagi sama ia poe-nja tjoetjoe-tjoetjoe, tapi sabaliknja djoega ia soeda tida bisa djalanken penghidoepan dengen beres. Ia poenja ada pemaentopan ia tida bisa boewang, lantaran apa achirnja ia djoega djadi terdjebloes dalem kasoekeran. Aken goenanja ia soeda oetang orang dan djoega aken goenanja ia poenja dagangan ia soeda kasi orang oetang, tapi di loear dari itoe ia telah bikin djoega oeroesan dalem perkara djoedi. Kaloe ia menang maentop, ia djadi kapingin maentop teroes boeat dapet kantongin orewang jang lebi banjak; djika ia kalah djoega membikin ia tida soedi meninggal-ken medja djoedi lantaran kapingin poelangin ia poenja doeit jang soeda digaroek. Lantaran itoe ie poenja dagangan sama sekali djadi tida karoean oeroes: ia poenja oetang ia tida bisa bajar, sa-mantara orang oetang ia tida bisa tagi; begitoe poenja begitoe pengabisannja ia djadi dikrojok orang dari sana-sini, satoe hal jang berachir: roe-mahnja kenah terdjoewal, tokonya kenah tertoetoep, dan teroesannja membikin ia misti hidoep dalem kamelaratan.
Berhoeboeng dengen itoe kasoesahan djadi habis djoega harepannja Loan-tjin boeat mendjadi satoe anak moeda jang hartawan.
Njonja Kek-soen, lantaran soeda alamken apa jang telah kadjadian dengen Ban-tjoan dan Koei-tjoan, djadi boeat kablkangan maoe berlakoe se-dikit lebi hati-hati. Ia tida maoe terboeroe-boeroe kawinin ia poenja anak-anak jang lebih ketjil, kerna boelak-balik ia merasa kwatir, jang anak-anak itoe djoega achirnja nanti menoeroet toeladan doewa enkonja, jang dalem sakedjap sadja soeda meleboer masing-masing poenja harta mendjadi aboe. Tapi sabagimana sasoeatoe orang bisa mengarti sendiri, daja begitoe boekanlah ada daja jang pandjang, kerna bilah anak-anak itoe satoe kali soeda sampe dalem oemoer dewasa, pendjagahan itoe nanti djadi moesna sendirinja, dan laen dari itoe, daja itoe tida nanti bisa menoeloeng soeatoe apa memper-baekin kaadaban roemah-tangga jang soeda dibi-kin djadi amat koesoet oleh Ban-tjoan dan Koel-tjoan. Sabagimana pembatja soeda taoe, Ban-tjoan telah terpetjat oleh Soan-nio, ia poenja katjintahan jang boleh dapet dirampas dari tangan ajahnja, saman-tara Koei-tjoan soeda terpetjat oleh istrinja. Lebi djaoe pembatja soeda liat bagimana Koei-tjoan soeda dibalikin blakang djoega oleh temannja: Boen-san, dan sabagi aken menimpalken itoe ka-adahan, dengen terbitnja sedikit lantaran Isa laloe ambil selamat tinggal dari ia poenja baba Ban-tjoan.
Soeda begitoe masi belon samoea. Persatorian antara Koei-tjoan dan Boean-san tida bisa djadi habis dengen tjara begitoe sadja. Di tempat ra-meh orang soeda pisahken pada marika, tapi Boen-san masi teroes mendendam sakit hati. Dja-di permoesoean itoe masi tinggal teroes, saman-tara Koei-tjoan tida ada simpan tjoeriga soeatoe apa, dan itoe tida tjoeriga achirnja membikin pada soeatoe malem Koei-tjoan misti poelang dengen kepala berloemoeran dara. Boen-san soeda bikin pembalesan boeat ia poenja bangkitan, dan ka-moedian soeda lari melinjapken diri, hingga per-kara itoe misti tinggal gelap boeat salamanja.
Dan sabagi djoega soeda ditakdirken boeat me-nerima nasib jang sama beratnja dengen ia poenja adeh, pada soeatoe malem Ban-tjoan djoega soeda misti alamken lagi satoe perkara jang sanget tida enak. Waktoe dirajaken pesta kawin dari Han-lang, ia soeda pergi kondangan. Di sitoe samoea anggota dari roemah pelesiran di Djembatan Doewa ada doedoek berkoempoel di satoe medja. Ban-tjoan, jang anggap dirinja masi teritoeng pada itoe kaoem, soeda toeroet doedoek bersama-sama. Mira soeda pegang kerdjahan seperti wajang tjokek.
Sabagimana biasanja, Ban-tjoan ada berlakoe kotjak sekali dalem itoe perdjamoean. Sigra djoega dateng waktoe, dimana wajang-wajang diwadjibken menoewang arak bagi sakalain tetamoe. Mira, jang memang boleh teritoeng djoega ada djadi anggota dari roemah pelesiran Djembatan Doewa, laloe me-wadjibken diri boeat melajanin sadja ia poenja baba-baba jang doedoek berkoempoel di sato medja. Ia moelahi toewangin arak di gelasnja Kai-slok, jang doedoek di tangan kirinja Ban-tjoan, dan tatkalah soeda mengider sampe di gelasnja it-ban, jang doedoek di tangan kanannja anak moeda itoe, lantas ia berlaloe. Gelasnja Ban-tjoan tinggal kosong.
„Hei, Mira, mari!“ berseroe It-ban.
Boengah raja itoe dateng mengamperi.
„Gelasnja ba Ban-tjoan loe belon toewangin,“ kata poelah itoe anak moeda.
„Saia engga ada poenja arak boeat dia,“ dja-wabnja Mira.
„Engga ada pergi toh ambilin lagi,“ kata Kai-siok.
„Saia engga bisa ambilin boeat dia.“
„Do, baroe sekarang loe bisa kata begitoe,“ kata Ban-tjoan. „Baroe sekarang apa ?" kata lagi Mira. „Ba Ban-tjoan ma betoel baroe sekarang soedi kasi liat lagi mata-idoengnja, sebab sekarang soeda engga kapakeh si sama nona Soan jang boto, soeda ditinggal sama si Isa jang manis. . . . . ."
„Soeda baekan loe djangan banjak moeloet, Mira !" kata Ban-tjoan.
Tapi boengah-raja itoe tida maoe ambil perdoeli. Ia merasa amat sakit hati sama Ban-tjoan, jang doeloe soeda baekin sama ia, tapi kamoedian dengen tida mengabarken soeatoe apa lagi, lantas tinggalken ia satengah djalan, dan sakit hati itoe achirnja soeda membikin ia brani oengkat-oengkat segala apa jang ia dapet taoe dari resia kaboesoekannja Ban-tjoan, jang sabetoelnja ia tida boleh oereiken di depan orang banjak. Hal itoe soeda tentoe sadja membikin Ban-tjoan samingkin lama djadi samingkin sengit, hingga kaloe tida ada orang banjak. . . . . . . . . . . . . . . . . . . . .
Tapi soedalah ! Sekarang kita maoe achirken sadja ini tjerita. Kita tida maoe bikin pembatja djadi terlaloe djemoe dengen menoetoerken lebi djaoe lagi tentang itoe samoea, jang biasa diseboetken : kaboesoekan doenia.
Satoe doewa orang dalem ini tjerita, jang kita soeda tinggalken tida adjak pembatja pergi katemoeken, biarlah kita tinggalken sadja boeat salamanja. Sabagi penoetoep kita rasa soeda sampe tjoekoep dengen mengabarken sadja tentang orang-orang dalem ini tjerita, sabagimana jang kita telah berboeat, dan sekarang kita pertjaja kabanjakan pembatja nanti moefakat, kaloe kita mengoentji ini karangan dengen membilang:[1]
O, Kaoe boleh berdaja, Alah ! tapi nanti siasia,
Bikin sampe soetji betoel Kaoe tentoe tidabisa,
Tjoema hoekoem dan baekin sedikit Kaoe ada kwasa,
Sebab di doenia soeda terlaloe banjak manoesia!
TAMAT.
- ↑ Oleh kerna beroelang-oelang kasehatan kita ada terganggoe samantara kita misti bikin perdjalanan djaoe ka sana-sini, mendjadi—sabagimana pembatja bisa njataken—tjerita ini bebrapa kali terpoetoes moeatnja dalem Sin Po. Lantaran kwatir bikin pembatja djadi djemoe, achirnja kita ambil poetoesan, tamatken sadja ini karangan dengen jalan jang banjak lebi pendek. Laen dari itoe—
sabagimana sekarang "kita dapet kanjatahan—bebrapa kasalahan ada terselip dalem ini tjerita, jang terdjadi lantaran alpanja letterzetter atawa corrector, hareplah pembatja soeka merobahken sadja sendiri!
Satoe kapastian kita maoe briken pada pembatja, jaitoe jang tjerita ini ada dikarang oleh kita dengen terpetik pada bagiannja di sana-sini dari apa jang sabenarnja soeda kadjadian!