Pembalesannja Kawanan Liangsan/Bagian ka ampat/Bab 14
XIV
KIONG, TO BERHIANAT BOEAT RAMPAS
KARADJAHAN. — HOA HOEMA
BALIK KA KIMGO MINTA
PERTOELOENGAN.
Sadari meninggalnja Sitjoe, dalem bebrapa hari itoe baginda djadi amat berdoeka dan djarang sekali doedoek bermoesjawarat. Kokbo dan Kiong-tjoe laloe menghiboerken, maski hati sendiri sabenernja moesti dapet hiboeran dari laen orang.
Pada itoe pagi, salagi baginda mengoetjoerken aer mata, pengawal kraton dateng melapoer, bahoewa di loear ada dateng Sinsiang Kiong To jang minta bertemoe. Tapi radja gojang kapala dan berkata:
„Kasi taoe sadja jang kami lagi amat berdoeka dan dalem bebrapa hari ini tida bisa mengoeroes perkara negri."
„Hamba poen soeda membri taoe begitoe," kata itoe pengawal: „tapi Sinsiang bilang: datengnja boekan boeat oeroesan negri, hanja hendak menjenangken hati baginda jang lagi sedang masgoel."
Mendenger begitoe, Ma Kok-tjoe laloe titahken masoek, jang satelah sampe di hadepan radja, Kiong To laloe membri hormat dan kata: lantaran liat baginda ada diterdjang satoe kadoekahan besar, maka ia soeda adaken satoe perdjamoean boeat oendang baginda makan minoem sambil meliat boenga-boenga, dari perdjamoean mana diharep itoe kadoekahan bisa terhiboer.
„Kaloe begitoe, baeklah kami menoeroet," kata radja jang lantas berbangkit.
Koetika baginda masoek ka dalem kamar boeat toekar pakean, Kokbo dan Kiongtjoe lantas mentjega, soepaja baginda tida toeroet pergi ka itoe pesta. Tapi radja tida maoe denger hanja berlaloe djoega, dengen adjak doea panglima dan di-iringken oleh soldadoe Gilimkoen.
Koetika sampe di gedongnja itoe mantri besar, radja dipersilaken toeroen dari kretanja dan diadjak masoek. Laen-laen mantri jang mendjadi kambratnja Kiong To laloe bangoen membri hormat, sedeng tetaboean laloe diboenjiken sabagi menjamboet datengnja itoe orang jang dipertoean. Prampoean-prampoean eilok toekang menari, jang memang telah disediaken, laloe berloetoet.
Ma Kok-tjoe liat itoe karamean djadi amat girang, maka Kiong To dipoedji sabagi mantri jang toeloes hati dan salaloe bekerdja boeat goenanja radja. Kiong To oetjapken trima kasi boeat itoe poedjian, ka moedian ia panggil Hoan Tjeng boeat diperkenalken pada baginda.
„Lantaran Soehoe Hoan Tjeng belon dapet pangkat, maka hamba tida brani adjak ia mengadep pada toeankoe," kata Kiong To: „maka di sinilah hamba perkenalken ini orang berilmoe pada baginda."
Sat Tauw-to laloe membri hormat dengen angkat kadoea tangan, jang oleh baginda lantas ditanja kapannja sampe di ini negri, dateng dari mana dan mempoenjai kapandean apa.
Kiong To laloe kasi katerangan tentang kapandeannja itoe Hosiang, dan baginda jang pertjaja itoe, djadi amat girang.
Sigra djoega orang moelai makan minoem dengen soeka hati.
Tenga-tenga perdjamoean, Kiong To poedjiken Sat Tauw-to poenja obat wasiat jang bisa membikin orang djadi berpikiran senang, sehat dan waras. Kamoedian tanja: apa radja soeka boeat tjoba djoega itoe pil jang amat adjaib.
„Pil jang bisa membikin orang djadi berpikiran senang?, — itoelah bener heran sekali," kata Ma Kok-tjoe dengen heran: „apa ada pil jang begitoe?"
„Ja, mielinken orang-orang pertapahan dan berilmoe jang ada mempoenjai pil begitoe, toeankoe," kata Kiong To: „baginda tentoe ingin tjobaken, boekan ?"
Sabelonnja radja bilang maoe atawa tida, itoe mantri doerhaka laloe minta Sat Tauw-to lekas ambil itoe pil adjaib boeat disoegoeken pada baginda. Prenta ini dilakoeken dengen sigra, tida lama Sat Tauw-to dengen membawa satjawan arak jang soeda ditjampoerken itoe obat menjenangken pikiran.
Dengen tida merasa tjoeriga, Kok-tjoe laloe samboeti dengen girang dan lantas minoem kering. Perdjamoean dilandjoetken lebi djaoe. Tapi itoe waktoe radja rasaken badannja djadi tida karoean rasa, kamoedian di peroet merasa amat sakit, dengen moeka poetjet dan sambil menekan-nekan peroet, radja mengawasi itoe Hosiang kaparat
Kamoedian, dengen kaloearken satoe treakan, radja lantas djato dari atas korsi ka djoebin, sedeng moeloetnja djadi berboesa dan matanja mendelik-delik.
Itoe doea panglima jang melindoengi baginda, djadi amat kaget meliat itoe kadjadian dan dengen tjaboet golok, panglima itoe berkata:
„Tangkeplah itoe Hosiang jang soeda ratjoenin baginda!"
Tapi Hoan Tjeng mana maoe kasi tempo sampe itoe doea panglima dateng menjerang. Baroe sadja denger itoe perkatahan, ia lantas tjaboet pedangnja dan tabas orang poenja leher, hingga koetoeng.
Taykam jang meliat begitoe lantas boeroe-boeroe kaloear dan prenta soldadoe Gilimkoen tangkep itoe orang-orang kambratnja Kiong To, tapi Sat Tauw-to soeda lebi siang kaloearken ilmoenja, hingga dari atas lantas toeroen beriboe-riboe soldadoe iblis jang mengamoek kalangkaboet, dan orang jang terboenoe tida teritoeng banjaknja.
Itoe Taijkam dan soldadoe jang masi idoep lantas lari ka kraton dan bertaoeken itoe katjilakahan pada Kokbo kadoea Kiongtjoe, jang satelah denger ini warta, djadi amat kaget dan lantas djato pangsan.
Hoa Kiongdjin dan Tjin Kiongdjin jang ada di astananja Hoema, satelah dengen itoe kadjadian, djoega djadi amat kaget hingga bergoemeter sakoedjoer badan. Tapi tida oeroeng marika berangkat ka kraton boeat toeloengi itoe permisoeri dan mantoe jang pangsan.
Kamoedian sasoedanja tersedar Kokbo dan Kiong tjoe menangis sesambatan dan koetoek itoe penghianat jang soeda memboenoe radja.
„Dengen memboenoe baginda, njatalah itoe mantri hianat maoe rampas karadjahan," kota Hoa Kiongdjin: „maka sekarang lebi baek Kokbo lantas atoer prenta-prenta jang perloe boeat mendjaga ini kraton, menoenggoe sampe poelangnja Hoema."
Kiongtjoe benerken perkatahan mertoeanja, maka prenta-prenta jang perloe laloe dikaloearken, kamoedian prenta Taijkam jang baroesan dateng melapoer itoe kadjadian di gedongnja Kiongto, boeroe-boeroe pergi ka Kimgo aken kasi taoe pada Hoema atas ini katjilakahan heibat, soepaja Hoema minta bantoeannja Lie Taijtjiangkoen bawa bala-tentara tangkep ini kawanan penghianat,
Soeroehan itoe lantas berlaloe.
Samantara itoe Kiong To lantas prenta orang laloeken maiTnja Ma Kok-tjoe, kamoedian siarken soerat plekat angkat dirinja djadi radja dan anak negri boleh tinggal sabagimana biasa. Sedeng ambtenaar-ambtenaar ketjil jang djadi kawannja atawa jang takoet dengen kakoeasahannja, soeda tida brani berboeat soeatoe apa, salaen menoeroet kahendaknja itoe penghianat.
Itoe waktoe orang soeroehannja Kiong To jang diprenta menjerepin kabar, dateng membri taoe: bahoewa Kokbo soeda keloearken prenta-prenta jang penting boeat mendjaga astana. Tapi dengen sombong Kiong To berkata.
„Biarkenlah iaorang mendjaga, kerna masatah brapa besarnja marika poenja tenaga. Sabelon itoe astana djato dalem tangankoe, biarlah di sini sadja boeat kraton sama antara waktoe dan ambtenaar-ambtenaar boleh dateng mengadep di sini sadja.
„Kamoedian,“ kata poela ia lebi djaoe: „lagi satoe-doea hari kita boleh geraken tentara boeat labrak pintoe astana.“
Sat Tauw-to poen kaloearken perkatahan-perkatahan jang sombong, jang katanja: biar didjaga bagimana keras djoega, troesa koeatir itoe astana tida dapet. Kerna brapatah koeatnja soldadoe manoesia, masa bisa lebi menang dengen soldadoe jang dikaloearken dengen ilmoenja. Kiong To jang denger ini djadi amat girang dan berkata:
„Sasoenggoenja djoega dalem ini oeroesan memang ada mengandel Soehoe poenja tenaga dan kasaktian.”
Begitoelah di hari esok, semoea ambtenaar jang djadi kambratnja laloe dateng katemoei ini penghianat, jang sekarang angkat dirinja djadi radja. Itoe waktoe hatinja inget pada Gioktji Kiongtjoe jang sakean lama memang soeda diarah-arah.
Koenjoeng-koenjoeng ia inget djoega: bahoewa Hoa Hoema ada mempoenjai satoe familie prampoean jang diseboet Tjin Kiongdjin, satoe njonja djanda jang amat tjantik. Parasnja itoe njonja Kiong To soeda pernah liat, waktoe kadoea Kiongdjin dateng ka ini negri, sebab ia sendiri jang pergi menjamboet.
„Ah, kaloe akoe bisa dapet itoe doea orang, poewaslah idoep dalem ini doenia,” pikir ini mantri hianat jang barhati binatang.
Menginget itoe perkara, sigra djoega ia geraken tentara boeat serang kratonnja Kok-tjoe, dengen tida menoenggoe lagi itoe tiga soedara Khik jang lagi dioendang dari laen poelo. Sebab pikirannja, Sat Tauw-to sendiri toch ada sampe sakti, maski zonder ada panglima, masatah itoe maksoek tida kasampean.
Sigra djoega ia kasi taoe niatnja itoe, kamoedian geraken tentara pergi ka tempatnja radja.
Tapi pendjaga pintoe dan orang-orang jang masi bersetia, mendjaga dengen keras. Dari atas kota lantas ditoeroenken batoe dan anak pana, jang membikin Kiong To dan Hoan Tjeng djadi amat joesar dan berkata:
„He, angkaoe lebi baek lekas boeka ini pintoe, soepaja djiwamoe tinggal slamat, Djika kaoe tida maoe toeroet prenta dan tinggal mendjaga sadja, pastilah kaloe kota ini petja, akoe tida nanti membri ampoen.”
Tapi jang djaga tida maoe saoetin, hanja soldadoe-soldadoe jang masi ada diprenta ronda lebi hati-hati soepaja moesoe tida bisa mandjat ka atas. Dengen membesarken hatinja itoe soldadoe-soldadoe, panglima jang kapalaken itoe pendjagahan bilang: djika bisa tahan dalem ini bebrapa hari sampe dateng pertoeloengan dari Kimgo dan datengnja Hoema, tentoe slamat.
Itoe waktoe Kiong To jang ada di loear dan liat orang-orangnja Kok-tjoe masi teroes sadja mendjaga, djadi amat goesar dan lantas minta Sat Tauw-to kaloearken ilmoenja. Tapi baroe sadja ini Hoan Tjeng maoe bergerak, koenjoeng-koenjoeng di atas oedara kaliatan sinar mera jang memoekoel itoe kadoea orang, hingga djadi pangsan.
Soldadoe-soldadoe jang liat begitoe djadi amat kaget dan boeroe-boeroe dateng toeloengi soepaja tida mendapet laen katjilakahan.
Sasoedanja sampe di tempat sendiri kadoea penghianat itoe djadi tersedar, tapi tida taoe lantaran apa marika djadi pangsan.
Itoe hari Kiong To laloe berdami pada Hoan Tjeng, bagimana itoe astana moesti dirampas.
„Sabenernja dalem ini oeroesan, semoea ada mengandel Soehoe poenja kasaktian,” kata Kiong To: „binasanja radja poen ada dengen Soehoe poenja akal; sasoeda Ma Kok-tjoe jang begitoe lembek dan tida berdaja, menoetoep mata, dikira ini negri dengen gampang bisa terdjato dalem kita poenja tangan. Siapa taoe hatinja rahajat masi belon maoe taloek, sabagian ambtenaar dan soldadoe ada tentangin kita poenja maksoed. Maka sekarang bagimana Soehoe poenja pikiran sabelonnja Hoa Hoema dapet taoe ini perkara ?”
„Itoe poen troesa diboeat koeatir,” saoet Sat Tauw-to: „seande bener Lie Tjhoen dan Hoa Hong-tjoen tida djadi binasa lantaran diteloeh, kita boleh lantas bergerak menjerang Kimgo, kaloe itoe tiga soedara Khik soeda sampe di sini.”
„Djika ini kadoedoekan besar bisa terdjato dalem tangankoe, boekan laen orang jang dapet itoe gandjaran besar, hanja Soehoe djoega saorang dan kita nanti merasaken kasenangan bersama-sama.”
„Ah, sagala kasenangan dan kamoeliahan, begitoe poen pangkat besar atawa kekajahan, Pinto tida ada pikir barang saramboet. Tjoema djika ini oeroesan soeda mendjadi beres, ada satoe apa jang hendak diminta, belon taoe nanti dikaboelken atawa tida?“
„Oh, tentoe sekali. Djangan kata baroe satoe, maski sapoeloe djoega tentoe diloeloesken. Bilanglah apa itoe jang Soehoe kahendaki ?“
„Kaloe begitoe, biarlah Pinto oetjapken sadja trima kasi lebi doeloe. Tapi boeat itoe belon perloe dibilang sekarang, hanja baroe diterangken djika Sinsiang poenja maksoed soeda kasampean.“
Kiong To djadi girang, dan sekali-kali ia tida doega, kaloe itoe Hosiang kaparat maoein gadisnja, jang baroe ini Sat Tauw-to talah liat koetika ini penghianat hadepken anak istrinja boeat diliat marika poenja roman dan peroentoengan.
Berhoeboeng katjilakahan jang terbit dengen koenjoeng-koenjoeng waktoe iaorang menjerang pintoe astana, maka Kiong To dan Hoan Tjeng tida brani madjoeken poela tentaranja ka itoe tempat, hanja satiap hari tinggal makan minoem sadja, sambil menoenggoe datengnja itoe tiga panglima jang lagi dioendang.
Pada soeatoe hari, salagi marika doedoek himpoen, djoeroe kabar dateng membri taoe, bahoewa di laoet ada kaliatan banjak praoe-praoe jang lagi mendatengi. Dari benderanja ada tertoelis hoeroef Khik.
Ini kabar menggirangken sanget hatinja Kiong To dan Sat Tauw-to, jang lantas adjak kambratnja pergi ka tepi laoet boeat toenggoe datengnja itoe tiga panglima. Tida lama kamoedian pasoekan aer jang dipimpin oleh itoe tiga soedara telah sampe, jang lantas disamboet dengen kahormatan besar.
Marika itoe ada membawa banjak praoe-praoe jang moeat tentara bangsa Biauw. Roepanja amat djahat, ramboetnja riap-riap dan sendjatanja golok pendek. Khik Ping, Khik Tiauw dan Khik Khoen, pengawakannja ada sedikit tinggi, dadanja lebar dan matanja besar, bera nboet koening, hingga kaliatannja bengis betoel.
Hoan Tjeng lantas perkenalken ini tiga soedara angkatnja pada Kiong To, maka satoe pada laen lantas membri hormat dan diadjak ka gedongnja.
Boeat tentaranja jang ada bebrapa riboe orang, Khik Khoen laloe diriken tenda, sasoedanja selesih lantas balik kombali.
Kiong To lantas prenta orang sediaken arak dan makanan, dimana ia oendang itoe tiga soedaranja Hoan Tjeng doedoek berdjamoe. Boeat itoe soldadoe-soldadoe Biauw poen ada dibriken kanan, jang membikin marika djadi soeka hatl. Sambil minoem marika beromong-omong, Hoan Tjeng tjeritaken maksoednja Kiong To jang terkandoeng dalem hati, maka diminta ini tiga soedara angkat poenja bantoean.
Katiga soedara itoe berdjandji nanti bantoe dengen sagenepnja hati.
Kiong To djadi girang dan oetjapken banjak trima kasi. Ia kata: kaloe Lie Tjhoen dan kawankawannja di Kimgo telah binasa, ini semoea ada mengandel kagagahannja Khik Ping dengen soedaranja.
Menoeroet perdamian jang dibikin sembari minoem, besok Kiong To boleh doedoek djadi radja, mengaloearken prenta-prenta jang perloe. Betoel astananja Ma Kok-tjoe belon dapet, tapt toeh tida halangan boeat angkat diri djadi radja, sebab sekarang toeh soeda tida ada radjanja ini poelo.
Begitoelah besoknja Kiong To bikin oepatjara boeat doedoek di atas karadjahan. Sat Tauw-to diangkat djadi Houw-kok Tay-kok-soe, tiga soedara Khik dikasi pangkat Taytjiangkoen, anak istrinja diangkat djadi Hongho, Sitjoe dan Kiongtjoe; sedeng mantri-mantri jang djadi kambratnja, semoea dinaekin pangkatnja satoe tingkat lebi tinggi, dengen didjandji, kaloe soeda bisa kalaken Lie Tjhoen dan dapetken poelo Kimgo, pangkat itoe nanti dinaekin kombali. Semoea kambrat-kambratnja pada mengoetjap trima kasi.
Itoe hari dikaloearken poela soerat salebaran jang membri taoe naeknja Kiong To di atas karadjahan.
Djoega dibri prenta orang-orangnja pergi djalan ka koeliling tempat, boeat liat dan denger-denger apa jang diomongin oleh pendoedoek negri. Bila ada jang omongin djelek dan njata tida maoe taloek pada radja jang baroe, moesti lantas diboenoe dan kapalanja dipantjer di tenga-tenga gang atawa pasar, soepaja orang djadi takoet.
Pendoedoek negri banjak jang lari lantaran katakoetan.
,,Kaoe orang troesa djadi takoet," treak ambtenaar-ambtenaar kaparat jang djadi kawannja itoe penghianat: „orang jang diboenoe tjoema jang tida maoe menaloek, sedeng jang maoe bersetia dan tida bikin kariboetan, tida mendjadi sala." Soepaja tida dibikin soesa, terpaksa rahajat Siamlo belaga taloek, maski hatinja amat bentji dan tida soeka dengen perboeatannja itoe penghianat, jang soeda begitoe kedjem aniaja djiwanja radja.
Selang tiga hari itoe soldadoe-soldadoe Biauw jang dibri perkenan boeat djalan-djalan, lantas berboeat perkara-perkara jang tida patoet, seperti ambil orang poenja barang, ganggoe orang-orang kampoeng dan sabaginja, jang membikin kariboetan djadi terbit kombali.
Kasian betoel itoe anak-anak negri, jang dalem keadahan begini tida ada jang lindoengi.
Kokbo dan laen-laen orang di dalem kraton, satiap hari menanggoeng kakoeatiran. Sebab kaloe kaoem penghianat dateng menjerang, tentoe tida ada jang menangkis, sedeng Hoema jang boleh diharep tenaganja, belon taoe kapan bakal sampe
Pada soeatoe hari pengawal kota dateng membri taoe, bahoewa kamaren Kiong To dengen Hoan Tjeng soeda dateng menerdjang, tapi koenjoengkoenjoeng dari oedara kaliatan sorot mera jang satelah mendjoedjoe di kapalanja itoe doea penghianat, lantas djato pangsan dan soldadoe-soldadoenja pocn telah moendoer kombali.
Mendenger itoe lapoeran baroelah hatinja Kokbo merasa sedikit legah, dengen mengangkat doea tangan ia bersoekoer pada Toehan Jang Maha Koeasa, jang telah lindoengken djiwanja orang-orang dalem ini kraton.
Tapi berbareng itoe dateng poela laen warta, jang membri taoe bahoewa ini pagi Kiong To telah angkat dirinja djadi radja, kerna penghianat itoe dapet bantoean dari tiga soedara Khik jang dateng dari poelo Hong-bouw. Oh, itoe penghianat jang terkoetoek!" bertreak Kokbo satelah denger itoe warta:,,tida doega ini poesaka peninggalan laloehoer Ma, bakal moesna sampe di sini dan djato di tangannja itoe bangsat!"
Kiongtjoe jang ada bersama-sama di sitoe laloe membri hiboeran, jang katanja: maski Kiong To soeda angkat dirinja djadi radja, tapi belon tentoe itoe penghianat bisa doedoek teroes di atas kadoedoekannja, djika meliat bagimana itoe tjahaja terang jang telah bikin marika djadi pangsan, waktoe barisannja maoe masoek ka dalem kota. Djika Allah masi membri perlindoengan, brangkali karadjahan ini bisa poelang kombali, dan ini poen masi belon boleh taoe, maka djanganlah terlaloe berdoeka.
Perkatahannja Kiongtjoe dipikir ada betoel djoega, maka permisoeri lantas brenti menangis dan bersama-sama Giok-tjie laloe diriken satoe medja sembajang jang ditaroken Sintji dan tertoelis Ma Kok-tjoe poenja nama.
Malemnja dari itoe hari Kokbo dapet mengimpi liat radja Siamlo pake djoeba poeti seperti orang pertapahan, sabelonnja ditanja, rohnja baginda laloe berkata:
,,Sagala apa jang terdjadi, itoe semoea memang telah ditakdirken, maka djanganlah terlaloe diboeat pikiran. Sekarang kami poenja aloes soeda ikoet Tan He Soehoe pergi ka tempat jang soetji, kerna begitoe memang djalannja kami poenja peroentoengan dan sekarang moesti lantas poelang kombali. Hiantje troesa takeet, Kim-kah Sek-djin ada membantoe dan djaga orang-orang dalem kraton, sampe datengnja Hoema dan Lie Taytjiangkoen jang nanti bales ini semoea sakit hati."
Dengen girang Kokbo hamperi dengen maksoed maoe tanja lebi djane, tapi rohnja baginda toelak itoe permisoeri, jang lantas tersedar dan kiranja ada dalem impian.
Esoknja pagi Kokbo tjeritaken impiannja ini pada Kiongtjoe, jang lantas berkata: ,,Kaloe begitoe, biarlah kita-orang bersabar sa- dja dan prenta orang djaga hati-hati pintoe kraton, menoenggoe sampe datengnja toeloengannja."
. . . . . . . . . . . . . . . . .
Sekarang mari kita liat Hoa Hong-tjoen, jang itoe waktoe soeda berlajar dari Kimgo dan sapan- djang hari hatinja merasa tida enak. Ia tida taoe kenapa saban-saban hatinja kakedoetan dan merasa bingoeng-bingoeng.
Ini perasahan jang tida enak ia lantas tjeritaken pada Taykam, Lie Hoen dan Ko Tjeng. Tapi ini tiga orang tida bisa membri katerangan apa jang mendjadi lantaran, katjoeali bilang: brangkali lantaran sakean lama baroe bertemoe kombali pada Lie Tjiangkoen dan sekerang hendak berpisa kombali, maka pikiran djadi berat dan tida enak.
Hong-tjoen rasa boekan begitoe, tapi toch ia ida bilang soeatoe apa. Tapi pada soeatoe hari, sasoeda kapalnja masoek di wates negri Siamlo, dari djaoe kaliatan ada banjak praoe-praoe jang lagi mendatengi dan dari bendera jang kamoedian, dikiberken, njata dalem itoe kandaran aer ada berdoedoek Taykam.
Hoema dan jang laen-laen djadi heran sekali dan tida taoe apa perloenja Taykam dateng menjoesoel.
Sigra djoega kapalnja Taykam jang kaliatan dari djaoe lantas dateng menghamperi dan sasoedanja itoe doea kapal djadi berendeng, Taykam itoe naek di kapalnja Hoema dan tjeritaken satoe persatoe apa jang telah terdjadi salagi Hoema tida ada di Siamlo.
Hoa Hong-tjoen djadi amat kaget dan ampir sadja ia djato, kaloe tida kaboeroe orang pegangin. Kamoedian ia menangis dan menjatji pada Kiong To, jang dikataken penghianat dan djahanam besar.
,,Itoe djahanam! Oh, kaloe akoe belon gerogot tengkoraknja, akoe belon merasa poewas!" kata poela Hong-tjoen sambil menangis teroes, tapi Ko Tjeng dan Lie Hoen lantas menghiboeri. ,,Sekarang perkara soeda kadjadian begitoe roepa, nangis poen pertjoema," kata Ko Tjeng:,,tapi dalem ini katjilakahan haroes dibilang masi beroentoeng djoega, kerna Kokbo dan Kiongtjoe dengen kadoea Kiongdjin, tida koerang soeatoe apa; sedeng keadahan dalem kraton masi belon terganggoe. Sekarang baeklah di-ichtiarken lebi djaoe, tjara bagimana kita bisa bikin pembalesan pada itoe penghianat."
Laen-laen orang poen bilang begitoe djoega. maka Hoema lantas brenti menangis dan prenta djoeroemoedi madjoeken teroes prentanja ka pelaboean, kerna ia maoe liat keadahan dalem kraton.
,Oh, itoelah tida baek sekali," kata Lie Hoen jang menjega:,,boekantah baroesan Taykam soeda kasi taoe, bahoewa Kokbo, Kiongtjioe dan kadoea Kiongdjin ada dalem slamat dan dalem kraton tida koerang sotatoe apa? Maka kaloe sekarang sabelonnja ada persediahan jang lengkap kita mendarat ka Siamlo, pastilah kawannja itoe penghianat lantas menjerang."
Taykam jang dateng menjoesoel benerken perkatahannja Lie Hoen, dengen bilang djoega: itoe tiga soedara Khik jang dateng dari poelo Hong- bouw ada kaliatan amat djahat dan gaga perkasa, dengen banjak mempoenjai rahajat jang tentoe tida bisa dilawan, kaloe zonder ada tentara jang lengkap.
,,Abis bagimana kita moesti berboeat?" tanja Hoa Hong-tjoen.
Paling baek kita balik kombali ka Kimgo," djawab Lie Hoen:,,kasi taoe ini perkara dan berempoek tjara bagimana haroes berlakoe." ,,Perkatahannja Lie Tjiangkoen bener sekali," kata itoe kadoea Taykam: „sampe di sana kita boleh minta djoega pertoeloengannja Lie Taijtjiangkoen dan laen-laen Hohan."
Bitjara ini dirasa ada bener, maka praoe-praoe itoe lantas dibaliki kombali ka Kimgo.
Pengawal soengei jang liat kapalnja Hoema balik kombali, lantas prenta orang kasi taoe ini hal pada Hoen-kang-liong, jang itoe waktoe djoestroe lagi berkoempoel pada soedara-soedara angkatnja.
Lie Tjhoen dan Gak Ho djadi kaget, kerna tida mengarti kenapa Hong-tjoen tida teroes poelang.
,,Tentoe moesti ada satoe sebab," kata sala satoe dari itoe soedara-soedara angkat: „maka biarlah kita menoenggoe kabar dari Hoema sendiri."
Tida lama, Hoa Hong-tjoen soeda mengadep di hadepannja Lie Tjhoen dan toetoerken satoe persatoe tentang itoe kabar tjilaka jang dibawa oleh Taykamnja radja Siamlo. Semoea orang djadi terkedjoet dan amat gemes pada Kiong To.
Sadari bermoela kali meliat itoe orang, akoe poen soeda doega bahoewa satoe tempo Kiong To bakal berhianat," kata Gak Ho, jang sasoeda denger itoe tjerita: „maka djoega waktoe Hoa Hiantit ada di sini, akoe soeda kasi pikiran pada Lie Twako soepaja lekas disoeroe kombali sadja, sebab koeatir terbit onar. Doegahan itoe njatalah telah berboekti." Kamoedian Gak Ho menjataken menjeselnja, kenapa tida lebi siang ia soeroe Hoa Hong-tjoen balik poelang. Tapi Lie Hoen dan Ko Tjeng lanlas berkata: maski lebi siang poen tentoe tida kaboeroe, sebab itoe penghianat lakoeken kerdjahannja djoestroe satoe hari di moeka sadari berangkatnja Hoema. Maka hal jang soeda kadjadian itoe roepanja oleh Kiong To memang soeda lama ada diniat.
Lebi djaoe Ko Tjeng tjeritaken apa jang di perdjalanan Taykam soeda kasi taoe, jaitoe: Kiong To ada terbantoe oleh satoe iman, jang blakangan dapet bantoeannja Khik Ping dengen doea soedaranja dari poelo Hongbouw. Itoe tiga soedara Khik ada mempoenjai limariboe tentara bangsa Biauw, jang sekarang lagi sedeng mengadoek di sakiternja poelo Siamlo, hingga anak negri dapet banjak soesa.
Kamoedian lantas dibikin permoefakatan, tjara bagimana moesti menoeloeng Hoa Hong-tjoen dan sakalian familienja jang masi ada dalem kraton. Menginget jang tentaranja Kiamgo tjoema ada kira-kira tigariboe djiwa, dan boeat djaga poelo sendiri poen masi kakoerangan, maka dikoeatir tida bisa tempoer Kiong To poenja Biauwpeng jang berdjoembla lebi besar.
Tapi Lie Tjhoen tida bisa tinggal diam itoe perkara, kerna salaennja Ma Kok-tjoe sendiri ada
Pembalesan Kawanan Liangsan21
pamerentahan Kimgo, djoega Hoa Hong-tjoen jang ada mendjadi sala satoe di antara tjoetjoe-tjoetjoenja, ada djadi Hoema di itoe negri. Maka moesoenja Hoa Hoema ada seperti djoega moesoenja sendiri.
,,Betoel kita poenja tentara tjoema sedikit, tapi kita toeh tida boleh tinggal diam sadja bahaja jang menimpa pada Siamlo dan Hoa Hiantit," kata Hoen-kang-líong kamoedian:,,maka sekarang kita moesti lekas siapken angkatan perang boeat kasi labrakan pada itoe kaoem penghianat, bagimana Liaowie Hengte poenja pikiran ?"
,,Itoelah bener sekali," menjaoet itoe semoea soedara-soedara, jang menjataken moefakat.
Sabagi toeroet berdoeka atas wafatnja Ma Koktjoe, Lie Tjhoen prenta orang naekin bendera poeti dan siapken doeariboe balatentara jang dimoeatken dalem tigapoeloe boea kapal perang.
Ko Tjeng bersama Lie Hoen dititahken mendjaga Kimgo, sedeng Gak Ho, Hoei Po, Tong Wie dan Tong Beng bersama Lie Tjhoen lantas berangkat ka Siamlo, bersama-sama Hoa Hongtjoen jang berdjalan di moeka.
Pasoekan itoe sigra djoega soeda sedia dan begitoe beres lantas berangkat dengen keang kerannja.
Tapi baroe sadja pasoekan itoe berdjalan satoe hari, koenjoeng-koenjoeng tiang bendera di bagian Tiongkoen djadi pata doea, hingga Lie Tjhoen dan laen-laen orang jang dibri taoe ini perkara, djadi amat kaget.
Tida ada angin, bagimanatah tiang bendera boleh djadi pata?" berkata Lie Tjhoen dengen heran. Kamoedian ditanja pada itoe orang jang membri taoe, bagimana maka itoe tiang bendera boleh djadi pata. Orang jang ditanja menjaoet: tjoema kadengeran sadja satoe soeara, lantas berkrekek dan pata doea.
,,Tiang bendera pata, itoelah boekan alamat baek," kata Lie Tjhoen dengen doeka: „maka sakalian Hengte dan rahajat moesti berlakoe hati- hati. Tapi bagimana kita moesti atoer boeat mendjadi baeknja?"
,,Itoe barisan Biauwpeng ada tegoe," kata Gak Ho: Sat Tauw-to salaennja ada mempoenji ilmoe, ada terbantoe oleh tiga soedara Khik jang amat kosen, maka padanja itoe kita tida boleh pandang ringan. Sekarang baeklah kita poenja pasoekan atoer djadi tiga barisan, jaitoe kapala, tenga dan blakang, soepaja satoe pada laen bisa saling membantoe dan menoeloeng di waktoe jang perloe."
Lie Tjhoen moefakat dengen itoe voorstel, maka itoe waktoe djoega pasoekan jang berkoem- poel dipetja djadi tiga, Hoei Po bersama Hoa Hong-tjoen diprenta mengapalaken barisan kapala; Tong Wie dan Tong Beng diprenta pimpin barisan blakang, sedeng Hoen-kang-liong bersama Gak Ho kapalaken barisan tenga.
Sasoedanja mengatoer beres, praoe-praoe didjalanken kombali lebi tjepet menoedjoe ka poelo Siamle.
Selang satoe hari pasoekan itoe katemoe doea praoe ronda jang didoedoeki oleh tigapoeloe laskar Biauwpeng, jang satelah liat ada kapal-kapal perang lagi mendatengi, laloe gajoe praoenja begitoe tjepet, hingga kaliatannja seperti gangsa laoet jang lagi terbang.
Hoa Hong-tjoen di kapala praoe, satelah liat begitoe lantas angkat boesoernja dan lepasken satoe anak pana, jang satelah kena, pemimpin dari itoe praoe ronda lantas terdjoengkel ka dalem aer, hingga praoe jang laen lantas balik kombali dengen tjepet, kerna marika rasa tida boleh gegaba.
Tida lama kamoedian praoe ronda laskar Biauwpeng terlinjap dari pemandangan.
Hoa Hoema madjoeken teroes kapal perangnja dan waktoe ampir sampe di pelaboean, kaliatan ada banjak kapal-kapal perang moesoe jang soeda menoenggoe, maka hal ini laloe dibertaoeken pada Lie Tjhoen.
Hoen-kang-liong tanja pikirannja Gak Ho, jang lantas menjaoet: ,,Kaloe moesoe soeda menanti kita poenja kadatengan, baeklah kita tjari tempat laen sadja boeat djadi pangkalan. Kerna marika tentoe soeda bersedia, maka dalem pertempoeran dari fihak Kimgo tida boleh berlakoe tjerobo."
Kamoedian kapal-kapal perang itoe lantas berlindoeng di pinggir goenoeng.
Lebi djaoe Gak Ho kata: menoeroet pengliatannja, moesoe itoe amat sanget tjerdik. Sebab kaloe boekan orang jang pinter, tentoe tida bisa diriken pasanggrahan aer, sabagimana jang baroesan ada terliat. Boeat katjerdikannja moesoe, haroes dilawan dengen tjara aloes.
Lie Tjhoen moefakat dan sigra prenta rahajatnja poekoel tetaboean perang, dengen maksoed soepaja laskarnja Kiong To jang ada di bawah pimpinannja itoe tiga soedara Khik, lekas dateng menjerang. Tapi harepannja itoe tida terkaboel, kerna moesoe boekannja madjoe, hanja tinggal menoenggoe sadja serangan dari fihak Kimgo.
Khik Peng jang memang telah dipesen oleh Sat Tauw-to, moesti lantas membri kabar kaloe moesoe dateng, lantas kirim orangnja boeat melapoer.