Pembalesannja Kawanan Liangsan/Bagian ka ampat/Bab 15

by Tong Th. Fuctriorider

XV.
DOEA FIHAK MALOEMKEN PERANG, SAT
TAUW-TO KALOEARKEN ILMOE KA-
LAKEN PASOEKAN KIMGO.

_______

Kiong To jang itoe waktoe soeda diangkat djadi radja, kaliatan ada girang sekali. Satiap hari doedoek minoem-minoem bersama Sat Tauw-to sembari bikin moefakatan boeat menjerangKimgo.

,,Maski sekarang kami soeda doedoek mendjadi radja, tapi rasa koeatir masi belon linjap dari hati, kaloe sabegitoe lama Lie Tjhoen jang terkanal gaga, belon dibasmi," kata ini radja tetiron: ,,maka boeat bikin binasa itoe semoea orang jang mendjadi kita poenja halangan, Koksoe ada mempoenjai daja apatah jang baek?"

,,ltoelah Taij-ong troesa boeat koeatir," saoet Sat Tauw-to: „kerna kaloe Lie Tjhoen brani dateng ka mari, dengen kaloearken sedikit ilmoe Pinto bikin marika tida bisa balik kombali kapoelonja."

Kiong To djadi amat girang dan lantas soeroe orang sediaken lagi satoe kambing moeda jang dipanggang satenga mateng. Hoan Tjeng djadi soeka hati meliat kadojanannja itoe ditamba lagi, maka sigra djoega ia tamba kombali arak ka dalem gelas dan minoem dengen sagala soeka hati. Koenjoeng-koenjoeng pengawal pintoe dateng membri taoe, jang di loear ada orang soeroehannja Khik Ping Tjiangkoen membawa warta tenteng kadatengannja pasoekan Kimgo, dan diharep radja soeka lantas kaloearken prenta.

,,Hahaha! Lie Tjhoen itoe bener tida kenal pada kamatian," kata Sat Tauw-to sambit tertawa bergelak-gelak: kita menang soeda bersedia boeat serang poelonja, tida kira ini hari ia sendiri dateng boeat tjari mampoes, inilah lebi baek lagi, soepaja kita poenja laskar tida memboewang tempo pergi ka tempatnja."

Sahabisnja berkata, ia lantas berpamitan pada Kiong To, kamoedian pergi ka pasanggrahan aer, dimana ia lantas prenta Khik Ping djalanken tipoenja, sedeng rahajat Biauw jang mendjaga itoe tempat, dititahken djangan bergerak.

Khik Ping trima prenta, lantas berlaloe. Hoan Tjeng poenja atoeran tida dikatahoei oleh Lie Tjhoen, jang sadari dateng sampe di ini hari saielah liat di fihak moesoe masi tinggal tida bergerak, apapoela meliat di sakiternja pasang- grahan aer masi tinggal soenji sadja, dalem hatinja djadi gemes dan mendongkol, maka ia lantas ambil poetoesan boeat menjerang.

,,Kaloe sateroesnja moesoe tinggal berdiam dan kita tida maoe bergerak, lama-lama kita poenja ramsoem boleh djadi abis," kata Lie Tjhoen: ,,maka tida boleh tida, kita moesti menjerang padanja."

,,Oh, itoelah tida boleh," kata Gak Ho: „pertjajalah di fikah moesoe tentoe ada atoer tipoe maoe pikat pada kita."

,,Abis kaloe moesoe tinggal diam dan kita djoega berdiam sadja, salama-lamanja tentoe tida bisa madjoe?"

,,Ini bangsa Biauw poenja derdiam boekannja lantaran takoet atawa bodo, hanja ada mengatoer satoe tipoe. Bermoela akoe soeda doega, pasoekan moesoe tentoe lantas menjerang dengen tjerobo, begitoe lakas marika dapet liat kita poenja pasoekan. Tapi sekarang, semoea bendera direbahken, tamboer dan gembreng tida diboenjiken, keadahan di loear pasanggrahannja kaliatan soenji, itoelah hendak pantjing pada kita. Ini keadahan moesti lebi dikoeatiri dari pada jang berlakoe sembrono."

Kerna sabegitoe djaoe Gak Ho poenja pengliatan dan doegahan, djarang taoe meleset, maka Lie Tjhoen poen tida maoe membanta. Tapi itoe waktoe Hoa Hong-tjoen jang kabetoelan ada di sitoe dan denger sikep apa jang Gak Ho maoe ambil, ia lantas madjoe dan berkata:

,,Kok-tjoe soeda lama terbinasa dan kota poen telah djato dalem tangannja itoe penghianat. Sedeng Pehoe dan sakalian Siokhoe poenja kadatengan ini, hendak membales itoe sakit hati dan rampas kombali tempat-tempat jang soeda dipoenjaken oleh Kiong To. Tapi sekarang, kaloe kita tinggal berdiam sadja, sabaliknja kaloe di fihak moesoe djoega begitoe, bagimana kasoedahannja dengen ini angkatan perang poenja persediahan ramsoem? Laen dari begitoe, dalem kraton poenja keadahan belon kataoean bagimana, tjilaka atawa slamat. Maka sekarang, biarlah Pehoe idjinken Siauwtit menjerang moesoe poenja pasanggrahan aer. Djika beroentoeng ja baek, tapi kaloe djadi sabaliknja dari apa jang diharep, ja apa-boleh-boeat! ...

Lie Tjhoen tida bisa berkata soeatoe apa. Maoe loeloesken permintahannja Hoema, djadi bertentangan dengen pikirannja Gok Ho; sabaliknja kaloe tida loeloesken, bitjaranja Hong-tjoen dirasa ada bener, lantaran itoe djadi ia berdiam sadja. Gak Ho taoe pikirannja Hoen-kang-liong, maka ia berkata:

,,Dalem oeroesan madjoe dan moendoer, orang moesti liat gelagat, djangan sekali menoeroeti napsoe, jang satoe tempo bisa terbitken rasa menjesel, Boekan sadja kita moesti taoe keadahan sendiri, tapi haroes mengatahoei djoega kaadahan di fihak moesoe, begitoe baroelah bisa dapetken kemenangan jang sampoerna. Tapi kaloe lantaran koerang teliti sampe dapet katjilakahan, bagimana?" ,,Siauwtit soeka hati, maski djoega boleh korbanken djiwa, asal sadja bisa lakoeken kawadjiban."

,,Kliroe, Hiantit, kliroe soenggoe! Binasa dalem paperangan memang orang troesa takoet, kerna kamatian begitoe poen saharoesnja moesti terpoedji. Tapi kaloe lantaran kakliroean dan paksa madjoe dalem perdjalanan jang sala, hingga kaoe djadi moesti korbanken djiwa, itoe boekan namanja lakoeken kawadjinan, hanja dirimoe djadi melanggar tiga kadosahan besar, mengarti?"

Hoa Hong-tjoen tida mengarti bagimana kaloe ia korbanken djiwa, djadi melanggar tiga kadosahan. Gak Ho lantas berkata lagi:

,,Sebab sabagi anak kaoe soe da tinggalken orang toea, sebagi soeami kaoe telah tinggal istri jang tida mempoenjai pelindoeng, sabagi mantoe atawa mantri, kaoe tida lakoeken kawadjiban moe dengen betoel, kaloe kaoe binasa lantaran kliroe sendiri. Inilah jang dibilang melanggar tiga kadosahan."

Hoema lantas sodja pada Gak Ho, dengen perkatahannja ini djoeroe pemikir jang blakangan, baroelah ia mengarti kasalahannja. Kamoedian lantas moendoer, dengen tida brani membanta lebi djaoe.

Selang anam hari, satelah liat moesoe masi djoega tida bergerak, koenjoeng-koenjoeng Gak Ho djadi terkedjoet.

,,Ah, tjilakalah ini sekali!" bertreak Gak Mo dengen roepa poetjet, hingga semoea orang djadi kaget dan tanja: kenapa?

,,Kita terdjebak oleh tipoenja moesoe," saoet ia: ,,inilah jang dinamaken tipoe Hoan Keh Wie Tjoe, atawa membalik tetamoe djadi toean roema."

,,Tipoe apa begitoe dan bahaja apa boeat kita poenja fihak?" tanja Lie Tjhoen.

Dengen hati memoekoel keras Gak Ho lantas toetoerken pendapetannja: bahoewa kaloe ia bisa bilang moesoe goenaken ini tipoe, kerna soeda kaliatan jang moesoe poenja laskar ada lebi banjak; tapi kaloe sabegitoe lama Khik Ping tida bergerak, boekan sekali marika takoet atawa djeri, hanja laen fihak moesoe tentoe soeda bagi barisannja boeat menjerang Kimgo.

,Sekarang tida boleh tida," kata poela Gak Ho jang teroesken bitjaranja:,,kita moesti tarik poe- lang ini semoea barisan, sebab kaloe sampe kailangan Kimgo, pasti aken djadi tjilaka sekali."

Mendenger ini perkatahan, baroelah Lie Tjhoen djadi tersedar dan lantas prenta semoea Hengtenja tarik antero pasoekan balik poelang.

Anak-anak praoe lantas djadi repot, kerna prenta ini moesti didjalanken dengen lekas. Maka dalem samantara sadja, lajar-lajar telah dipasang dan antero kapal soeda berdjalan kombali, meliwati Bengtjoe.

Bengtjoe ada namanja satoe moeara jang terkenal, kadoedoekannja ada sabagi Siamlo poenja pintoe perhoeboengan laoet. Di tenga-tenga laoe- tan jang besar itoe ada kaloear doea goenoeng jang mirip seperti naga, jang berhadep-hadepan satoe pada laen terpisa kira-kira satoe li djaoenja. Di tenga-tenga ada itoe doea goenoeng, ada berdiri satoe goenoeng ketjil jang berwarna poeti bersi dan bangoennja poen boelat seperti moeteara, dimana tida ada satoe papoehoenan jang toemboe di sitoe.

Aer jang meliwati di Bengtjoe ada deres dan boekan sedikit kapal-kapal jang mendjadi korban waktoe meliwat ini tempat.

Di poentjaknja itoe goenoeng jang kiri ada tertampak satoe klenteng jang diseboet Liong Ong Bio, samantara di goenoeng jang sebla kanan ada berdiri satoe mertjoe jang bertingkat toedjoe, dan menoeroet katanja orang jang taoe: mertjoe itoe ada boeat mendjinekin setan-setan aer jang berdiam di itoe laoetan.

Tapi blakangan orang pake itoe mertjoe boeat mendjaga perhoeboengan kaloear dan masoek.

Keadahannja Bengtjoe, kaloe baroe sekarang ditoetoerken, kerna lebi doeloe dari ini tida ada terdjadi apa-apa jang berhoeboeng boeat diseboet satoe persatoe.

Begitoelah koetika Lie Tjhoen poenja pasoekan jang berlajar balik ka Kimgo, sampe di itoe tempat, djaoe-djaoe lantas kaliatan tigapoeloe praoe jang moeat laskar Biauw, ada mendjaga ito e tempat, sedeng Khik Khoen dengen pegang sendjata lagi berdiri di satoe praoe jang paling depan.

Waktoe meliat pasoekan Kimgo jang maoe poelang, Khik Khoen lantas madjoeken kandarannja sambil bertreak keras:

He. orang-orang Kimgo jang soeda terdjebak dalem tipoenja akoe poenja Koksoe, ka manatah kaoe maoe pergi? Kaoe tentoe maoe poelang kombali, itoelah pertjoema sadja, kerna kaoe poenja sarang soeda akoe petjaken! Maka djalanan satoe-satoenja boeat kaoe berame bisa lolosken diri dari kamatian, tida ada laen djalan dari pada menaloek!"

Hoen-kang-liong denger itoe perkatahan, djadi amat goesar dan prenta rahajatnja madjoeken itoe antero praoe-praoe, dimana sasoedanja deket ia lantas angkat toembaknja dan toesoek di moekanja Khik Khoen. Tapi ini moesoe jang memang soeda bersedia, lantas angkat kampaknja aken menangkis.

Di sitoe lantas terbit satoe paperangan jang sengit.

Hoa Hong-tjoe jang liat itoe paperangan tida betah boeat tinggal diam sadja, lantas madjoeken kandarannja hendak membantoe. Tapi sabelon praoenja berdeketan, dari praoenja moesoe kaliatan kaloear satoe iman jang pegang golok pendek sembari kemak-kemik membatja dowa.

Orang itoe boekan laen dari Sat Tauw-to.

Lie Tjhoen tida merasa takoet pada itoe Hoan Tjeng. Tapi sabelon paperangan sampe di achir, oedara lantas djadi gelap dan angin poen berkesioer-kesioer, hingga aer laoet sampe berombak.

Ampir berbareng itoe dari oedara kaliatan banjak soldadoe iblis, jang lantas menjerang rahajat Kimgo, dan di mana sampe, itoe tentara iblis menerbitken banjak karoesakan, kerna moesoenja tida sanggoep melawan.

Hoen-kang-liong liat banjak tentaranja djadi binasa, lantas moendoer dan sambil berdongek ka langit ia berkata.

,Oh, Allah!......di sini brangkali akoe moesti binasa! .......

"Sabelonnja perkatahan itoe dioetjapken abis, di oedara kadengeran soeara gledek dan kilat bersledat-sledet, dan berbareng itoe soldadoe-soldadoe setan jang lagi mengamoek di praoenja pasoekan Kimgo, djadi linjap.

,,Allah membri toeloengan!" kata Lie Tjhoen pada sakalian soedara-soedaranja: „hajoelah madjde, djangan siasiaken tempo! ......

Sambil kata begitoe ia lantas menerdjang dengen nekat, jang lantas di-ikoet oleh laen-laen pasoekan. Khik Khoen roepanja tida sanggoep boeat tahan madjoenja moesoe, maka pasoekan Kimgo bisa meneblos dan menoedjoe ka djoeroesan Kimgo.

Di sapandjang djalan Lie Tjhoen lantas itoeng karoesakan jang terdapet. Njatalah lebi doeapoeloe praoe soeda tenggelam dan ampatratoes rahajat telah binasa di tangannja itoe tentara iblis. Beroentoeng di antara panglima tida ada jang dapet tjilaka.

,,Beroentoeng Allah lantas menoeloeng, hingga kita-orang tida dapet karoesakan jang lebi besar," kata Hoen-kang-liong, jang lantas titahken anak-anak praoe djalanken kandarannja lebi tjepet.

Satelah sampe, djaoe-djaoe bener kaliatan di moeloet moeara soeda terkoeroeng oleh kapal perangnja moesoe, sedeng di sebla dalem kadengeran soeara rlboet, seperti ada dimaloemken paperangan.

Koetika soeda deket baroelah Lie Tjhoen dapet liat, bahoeha Ko Tjeng dan Lie Hoen lagi perang pada Khik Ping, tapi sebab moesoenja ada gaga, maka itoe doea panglima belon bisa kalaken. Sedeng Khik Ping maski dikeroeboeti doea, sedikit poen tida merasa djeri.

Lie Tjhoen dan Hoei Po lantas menerdjang aken bantoei kawannja, satelah liat moesoe poe- nja bala benoeloeng dateng, Khik Ping jang gaga tida sanggoep ladeni moesoenja, apapoela badannja soeda moelai lelah. Itoe waktoe Khik Ping lantas baliki kapalnja boeat merat, tapi koenjoeng-koenjoeng Hoa Hong-tjoen poenja pana jang dilepas diam-diam mengenaken lengannja jang kanan, hingga goloknja jang dipegang terlepas dan Khik Ping sendiri lantas bertreak. Beroentoeg itoe waktoe kapalnja Khik Khoen jang ada moeat Sat Tauw-to, telah sampe dan lantas menoeloeng pada ini soedara.

Hoa Hong-tjoen dan jang laen-laen tida brani mengedjer, hanja lantas rangkep soldadoenja pada Lie Hoen, dimana iaorang, lantas berkoempoel.

Ini doea soedara jang mendjaga Kimgo menjataken soekoernja hati atas kadatengannja Hoen- kang-liong dan laen-laen soedara, kerna katanja: kaloe lambatan sedikit sadja, pasti moesoe soeda menjerang masoek ka dalem poelonja. Sabaliknja Lie Tjhoen laloe toetoerken bagimana dirinja dengen antero pasoekan kena tipoenja moesoe, jang kaloe tida ada Gak Ho, tida saorang jang taoe dirinja kena didjebak.

Djoega peperangan jang terdjadi di moeara Bengtjoe, satoe persatoe ditjeritaken terang.

Lie Hoen dan Ko Tjeng djadi girang, sasoeda denger penoetoerannja itoe Twako, jang soeda terindar dari sagala bahaja jang kaloear dari ilmoenja Sat Tauw-to. Kamoedian marika tanja: abis sekarang bagimana oeroesan boeat menoeloeng negri Siamlo. „Boeat sekarang, djangan kata boeat menoeloeng Siamlo. sedeng tempat sendiri belon tentoe kita-orang sanggoep lindoengken,” saoet Lie Tjhoen: „maka boeat toeloeng itoe negri jang soeda dirampas oleh penghianat Kiong To, biarlah kita-orang pikir sadja blakangan, sampe kita orang-poenja tenaga soeda koeat betoel”

„Sabetoelnja, kaloe paperangan jang dilakoeken tjoe na menggoenaken sadja ilnroe silat dan kapandean mengatoer tentara, kita-orang masi troesa koeatir,” kata poela Hoen-kang-liong: „tapi dalem paperangan jang sekarang kita moesti melawan ilmoenja itoe Hoan Tjeng jang djahat, maka tida gampang bisa didapetken kamenangan.”

Semoea soedara-soedaranja djadi berdoeka dan tida taoe bagimana moesti berboeat. Achirnja ada djoega jang inget kadjadian doeloe, waktoe Song Kang poekoel kota Ko-tong-tjioe, jang lantaran moesti lawan ilmoe siloeman, sampe doea kali Song Kong-beng dapet kakalahan. Tapi blakangan satelah dioendang Kong-soen Sin, sigra djoega moesoe poenja ilmoe dapet dibikin petja. Maka sekarang di mana orang moesti tjari Kong-soen Sin, boeat minta itoe soedara jang berilmoe poenja toeloengan.

„Ja, melinken soedara Kong-soen Sin jang bisa bikin poena Sat Tauw-to poenja ilmoe,” kata Lie Tjhoen: tapi boeat tjari padanja, itoelah tida gampang, boekan seperti di waktoe doeloe, dimana saban waktoe kita-orang ada berkoempoel sama-sama.”

Tida saloe orang jang bisa kasi pikiran bagimana baeknja, hingga, Hoen-kang-liong djadi amat masgoel. Gak Ho jang liat begitoe lantas menghiboeri, dengen berkata:

„Ilmoe siloeman tjoema bisa digoenaken bocat samantara waktoe. Djika digoenaken terlaloe sering, apapoela bocat membelaken fihak jang berdosa, pastilah gampang poena, kerna Allah poen tida soekai. Hal ini sakalian Hengtiang bisa liat itoe kadjadian di moeara Bengtjoe, maka itoe, djanganlah lantas poetoes harepan.”

Lebi djaoe Gak Ho kata: kita poenja angkatan ada di fihak jang bener, maka troesa takoet boeat bertempoer pada angkatan moesoe jang mengambil djalanan kliroe dan membikin dosa pada Allah; sakarang sabelon dapet orang pande jang bisa poenaken ilmoenja Sat Tauw-to, baek disediaken dara andjing dan babi jang kotor-kotor, kerna. ilmoe siloeman memang takoet pada barang-barang kotor.

Lie Tjhoen toeroet ini advies dan lantas prenta rahajatnja sediaken binatang-binatang jang terseboet, soepaja kaloe perloe boleh lantas dipotong dan diambil daranja. Djoega diprenta bikin sedia beratoes pompa bamboe, soepaja dalem paperangan kaloe liat soldadoe-soldadoe setan, moesti lantas goenaken itoe pompa boeat mengetjeot.

Sasoeda itoe laloe dibikin pendjagahan jang tegoe, sebab dikoeatir satoe tempo moesoe dateng kombali.

Sat Tauw-to satelah liat di fihak Kimgo tida jang brani kaloear, lantas prenta soldadoenja sediaken makanan dan minoeman, dimana dengen sadereknja iaorang makan minoem dengen segala soeka, hati.

Doea ekor kambing jang masi moeda lantas didjograkin di atas medja dengen bebrapa gendoel arak jang baroe dipanasin, sambil dahar itoe, sabentar-bentar kadengeran soearanja soerak dan tepok tangan jang amat rioeh.

Besoknja, noesa dan begitoe poen sateroesnja, plesiran itoe dilandjoetken dari siang sampe malem, seperti djoega plesiran itoe ada pakerdjahan jang paling oetama dalem kawadjibannja.

Boeat tambaken kasenangan hatinja, dalem itoe diadaken bebrapa orang prampoean jang soldadoe Biauw dapet tjari di desa-desa sakiternja sitoe. Ini perboeatan biadab dapet dikatahoei oleh Lie Tjhoen, jang djadi amat goesar dan berkata:

„Njatalah itoe Hosiang kaparat soeda djadi boeto, maka dalem waktoe begini baeklah kita madjoeken tentara boeat serang padanja. Tambahan sekarang persediaḥan boeat meloemahken ilmoenja soeda sedia, maka apatah lagi jang moesti ditakoeti ? -- Belon taoe bagimana Hengte sakalian poenja pikiran?“

„Apa jang sekarang dilakoeken oleh Sat Tauw-to, tida lebi dari satoe tipoe belakah,“ kata Gak Ho: „itoe Hosiang kaparat ada sampe tjerdik dan satelah liat di fihak kita tinggal mendjaga sadja, maka itoe plesiran boeat membikin kita djadi timboel napsoe aken kaloear.“

Lie Tjhoen tida maoe mengarti itoe nasehat, hanja titaken soedara-soedaranja moesti lantas bersiap, maka Gak Ho jang liat begitoe, lantas berkata poela:

„Kaloe maoe djoega menjerang Sat Tauw-to, baeklah, tapi kita-orang haroes goenaken satoe tipoe soepaja boleh dapet kamenangan dan djanganlah disiapken sekarang djoega.“

Kamoedian ia toetoerken tipoenja itoe, jang ditoeroet oleh Lie Tjhoen dan lantas prenta Tong Wie berdoea Tong Beng, dengen lima boea kapal pimpin limaratoes soldadoe boeat semboeni di pinggir telaga jang teraling dengen alang-alang. Ko Tjeng dan Lie Hoen djoega pimpin sakean pasoekan menoenggoe tanda sampe hari telah djadi malem. Sedeng ia sendiri bersama Hoa Hong-tjoen nanti dateng menjerang di waktoe moesoe soeda poesing.

Orang-orang jang dapet prenta lantas bersiap dan itoe sore balatentara lantas bersantap boeat menoenggoe sama datengnja waktoe malem. Pada djam tiga, orang ronda jang diprenta meliat-liat keadahannja moesoe, dateng membri taoe: sadari hari moelai menggerip di kapalnja moesoe ada kadengeran rame soearanja soerak dan tepok tangan. Tapi waktoe meliat tengamalem, soeara itoe lantas djadi soenji dan boleh djadi marika sveda pada tidoer lantaran mabok.

Lie Tjhoen djadi soeka hati dan berkata sendirinja:

„Itoe Hosiang kaparat ini malem telah dateng adjalnja, hahaha..................”

Kamoedian bersama Hoema ia siapken sariboe soldadoe berangkat ka tempat moesoe. Satelah ampir sampe, lantas sadja Hong-tjoen menjerang dengen sengit, sedeng Hoen-kang-liong jang kira bener-bener moesoe soeda tidoer njenjap, laloe titahken soldadoe-soldadoenja madjoe teroes.

Meliat kadatengannja tida ada jang lawan, Lie Tjhoen bersama-sama itoe kaponakan djadi samingkin brani. praoe-praoe dimadjoeken lebi keras, sedeng beriboe bintang ada membri sedikit penerangan.

Sasoedanja madjoe sampe ka dalem teloek, belon djoega katemoe satoe saldadoe Biauw. Sabelon dapet perasahan tjoeriga, langit jang tadinja terang dan bintang bintang jang mementjarken tjahajanja, lantas tertoetoep dengen mega-meġa item, sabagimana biasa terdjadi di laoetan kaloe maoe toeroen oedjan atawa toefan. Lie Tjhoen masi belon mendoega, kaloe ini semoea ada ilmoenja Sat Tauw-to; kerna dalem hati poenja kira: itoe Hosiang lagi sedeng mabok.

Apa jang dibilang oleh Gak Ho, itoelah bener sekali. Kerna sadari lakoeken paperangan jang doeloean dan liat moesoe tida kaloear-kaloear lagi, Sat Tauw-to lanias goenaken itoe tipoe makan minoem, soepaja moesoenja boleh kira: bahoewa ia tida inget kawadjiban dan moesoe maoe kaloear melawan.

Tapi satelah Lie Tjhoen masi tinggal mendjaga sadja dan tida maoe ladeni tantangannja, baroelah ia prenta soldadoe Biauw pergi ka desa-desa tjari orang doesoen poenja anak istri boeat diadjak plesir, sebab kaloe Lie Tjhoen dapet taoe ini perkara, tida boleh tida hatinja tentoe amat moerka.

Doegahannja ini njata ada betoel.

Tapi Hoen-kang-liong tida taoe, bahoewa itoe semoea ada pemantjingan sadja.

Demikianlah pada maleman dimana soldadoe Kim go mendatengi, Sat Tauw-to tida alpa bikin per ediahan dan sasoedanja pesta brenti, ia boekannja pergi tidoer, hanja tinggal menoenggoe dengen pedang di tangan.

Begitoelah waktoe denger soeara riboet-riboet, sambil mesem Hosiang ini bangoen dari tempatnja dan lantas mamereksa dengen telitie. Salelah dapet kanjatahan jang Lie Tjhoen soeda termasoek dalem tipoenja, lantas ia batja dowa, hingga samantara itoe langit djadi gelap goelita, sabagimana baroesan kita telah liat.

Hoen-kang-liong jang masi belon doega soeatoe apa, lantas prenta pasang pertandahan kembang api, hingga Tong Wie dan Tong Beng jang liat begitoe, lantas siapken kapal-kapalnja dateng memboeroe.

Koetika barisan ini sampe, langit soeda djadi gelap dan satoe pada laen tida bisa meliat moesoe atawa boekan. Kadatengannja Tong Wie dan Tong Beng lantas disamboet oleh Lie Tjhoen berdoea Hoa Hong-tjoen, jang kira ada berhadepan pala Biauwpeng Kadoea fihak itoe lantas berantem sengit.

Sasoedanja bertempoer hrapa djoeroes, dari treakan-treakan jang kadengeran baroelah itoe doea soedara Tong mengarti kakliroeannja dan lantas seroehken siapa adanja orang jang djadi lawanannja. Ini seroehan membikin Lie Tjhoen djadi kaget dan sigra djoega kadoea barisan itoe lantas dirangkep djadi satoe.

Kerna sampe di itoe waktoe tida djoega kaliatan barisan Biauwpeng, maka Hoen-Kang-liong laloe tarik antero pasoekannja balik kombali ka Kimgo, dengen dapet banjak karoesakan, beroentoeng panglima-panglima tida ada jang binasa.

Koetika pasoekan itoe ampir sampe di moeloet moeara, baroe kataoean jang ini tempat telah didoedoeki moesoe, waktoe angkatan perangnja pergi menjerang.

Orang jang reboet itoe tempat jalah Khik Ping. dan Khik Khoen, samantara Gak Ho dengen barisannja jang mendjaga di sitoe, lantaran tida tahan boeat melawan lebi lama, lantas moendoer boeat djaga benteng Kimgo.

Katerangan-katerangan jang didapet ini membikin Hoen-kang-liong djadi amat sengit. Maka dengen itoe sakalian laskar jang dapet karoesakan dari kawan sendiri, laritas dimadjoeken boeat serang doea soedara Khik aken reboet kombali itoe tempat jang telah dirampas.

Kadoea fihak lantas berperang dengen sengit. Paperangan jang dilakoeken dari fadjar sampe pagi, belon djoega kaliatan fihak mana jang bakal menang. Tapi koenjoeng-koenjoeng dateng Sat Tauw-to dengen membawa parisan binatang liar.

Laskar Kimgo jang liat begitoe djadi amat takoet, maka marika djadi kalangkaboet dan sabelon diterkam oleh itoe heiwan-heiwan djedjadian, masing-masing lantas melariken diri dengen tinggalken praoe-praoe dan sendjatanja.

Lie Tjhoen berdoea Hoema dengen mati-matian lantas menjerang masoek, jang achirnja beroentoeng djoega bisa menerobos di djagahannja moesoe dan sampe di Kimgo. Tapi Tong Beng dan Tong Wie dengen Lie Hoen dan Ko Tjeng tida kataoean ka mana perginja.

Satelah katemoe pada Gak Ho, baroe Hoen- kang-liong menjataken menjeselnja jang soeda tida maoe toeroet itoe nasehat. Tjoba kaloe bermoela ditoeroet sadja, tentoe tida dapet karoesakan seperti sekarang.

,,Ini semoea ada akoe poenja sala," kata poela Lie Tjhoen dengen amat doeka:,,belon taoe ba- gimana djadinja dengen kita poenja ampat Hengte, sataoe mati atawa idoep ....................."

Sahabisnja vetjapken itoe perkatahan Lie Tjhoen soesoet aer matanja jang mengalir. Hatinja djadi amat doeka dan sedi, menginget nasibnja itoe ampat soedara jang soeda banjak boewang tenaga goena dirinja, tapi sekarang terlinjap.

Gak Ho lantas menghiboeri dengen bilang: dalem paperangan djika tida menang tentoe kala, maka itoe soeda djamaknja dan tida oesah diboeat kesel, hati. Djika satoe kali dapet kakalahan lantas djadi poetoes harepan, hatinja laskar perang poen bisa djadi ketjil.

,,Tong Wie dengen tiga Hengte toch belon tentoe binasa di tangan moesoe," kata poela Gak Ho:

,,bila meliat kagagahan dan tjerdiknja itoe ampat soedara angkat, teroetama doea soedara Tong jang begitoe pande' maen di aer, didoega marika tida koerang soeatoe apa dan nanti poen dateng kom kombali. Boeat sekarang baek kita djaga sadja benteng Kimgo biar hati-hati, soepaja moesoe tida bisa menjerang masoek, dalem sapandjang itoe kita-orang boleh berdaja boeat tegoeken poela tentara dan serep-serepin ka mana perginja itoe ampat soedara jang terlinjap.”

Lie Tjhoen tida membanta lagi dan lantas bikin poela pendjagahan bersama-sama Hoa Hong- tjoen, Hoei Po dan Gak Ho.

Samantara Sat Tauw-to jang dalem brapa kali soeda bisa kalaken moesoenja, djadi amat girang dan lantas kirim kabar pada Kiong To di Siamlo, kamoedian dengen bawa barisan Biauw, ia dateng ka bawah benteng sambil oendjoek laganja jang kotjak.

Khik Ping dan Khik Khoen diprenta menjerang, tapi lantaran pendjagahan diatoer begitoe tegoe, maka penjerangan itoe tida dapetken maksoednja.

Basoknja Sat Tauw-to dateng kombali sambil bertreak-treak soeroe Lie Tjhoen dan sadereknja lekas boeka pintoe boeat menaloek, kaloe tida maoe sampe djadi binasa. Tapi satelah Gak Ho dan jang laen-laen tida ladenin, lantas sadja ia kaloearken ilmoenja boeat membakar benteng Kimgo.

„He, djanganlah kaoe berame djadi menjesel!” kata itoe Hoan Tjeng sambil menoeding ka atas benteng, „lantaran kaoe tida maoe menaloek, terpaksa akoe moesti bakar bentengmoe dan kaoe masing-masing tentoe bakal djadi aboe!” Kamoedian ia batja djampenja sambil mamegang pokiam, jang dalem saät itoe lantas berboenji goentoer dan kaliatan api berkobar-kobar toeroen dari oedara menoedjoe ka benteng Kimgo; hingga rahajat dalem itoe benteng djadi amat katakoetan.

Gak Ho jang koeatir hatinja laskar djadi kalangkaboet, boeroe-boeroe berkata:

„Lekaslah sediaken itoe pompa-pompa bamboe jang berisi dara binatang dan ketjrotken itoe api jang lagi mendatengi, troesa takoet jang ilmoe itoe tida djadi poenah.”

Laskar Kimbo lantas ambil masing-masing poenja ketjrotan boeat toenggoe datengnja itoe api jang lagi berkobar-kobar. Sedeng Gak Ho sahabisnja kata begitoe laloe pergi ka blakang goenoeng, boeat bikin pendjagahan di itoe tempat jang sabagian telah djadi goegoer. Samantara Hoa Hong-tjoen diprenta pergi ka poentjak Pek-hoen-hong bersama sadjoembla tentara jang masi gaga.

Itoe bagian jang goegoer, ka mana sekarang Gak Ho dengen bebrapa ratoes soldadoe datang bikin pendjagahan, letaknja di bagian sebla blakang dan goegoernja itoe ada dari lantaan toan jang laloe ada kaloear oeler laoet. Ini binatang adjaib boleh djadi lantaran tenaganja jang besar, maka sakali berlegot aer laoet djadi berombak keras dan naek sampe bebrapa toembak tingginja, sedeng boentoetnja jang memoekoel itoe tempat telah bikin roeboeh banjak batoe-batoe dan karang.

Samantara poentjak Pek-hoen-hong ada. satoe boekit jang tinggi dan kaloe dipandang dari tempat djaoe, orang bisa kira jang oedjoengnja ada bersamboengan dengen awan. Kaloe orang berdiri sitoe bisa lantas keliatan koeliling tempat, begitoe poen negri Siamlo, kaloe di waktoe oedara terang, dari itoe boekit bisa kaliatan teges sekali.

Di waktoe pagi poen orang bisa memandang keadahannja itoe tempat dengen dapet banjak hiboeran. Aer laoet jang tersorot dengen sinarnja matahari pagi, berkredep seperti naga mas.

Tatkala itoe masing-masing soeda sampe ka tempat djagahannja. Gak Ho dengen soldadoenja baroe sadja maoe betoelken itoe bagian-bagian jang goegoer, koenjoeng-koenjoeng dari kadjapean terdenger so zara orang riboet-riboet, maka ia lantas prenta laskar diam dan djangan bersoeara.

Dengen hati-hati Gak Ho lantas mamereksa, siapa adanja itoe orang jang mengomong. Achirnja kataoean, bahoewa soeara itoe ada soldadoe Biauw jang lagi maoe naek ka atas, dan djoemblanja marika itoe ada kira-kira tigapoeloe orang lebi.

„Ah, baek djoega kita-orang lekas dapet keadahannja ini tempat,” kata Gak Ho dengen soeara pelahan: „tjobalah kaloe tida, pasti soeda didoeloein moesoe.” Kamoedian ia prenta soldadoenja ambil meriam dan seret ka itoe tempat jang barisan Biauw lagi berkoempoel.

Itoe waktoe kaliatan laskarnja Sat Tauw-to lagi lemparken tangga rotan dan sasoeda tangga itoe tersangket, marika. laloe berglantoengan. Tapi baroe sadja iaorang berada di tenga-tenga, meriam jang disoeloet lantas berboenji dan orang-orang Biauw jang maoe naek lantas pada terpental-pental.

Semoea telah binasa.

Sasoeda dapet kanjatahan jang antero laskar Biauw itoe telah binasa anteronja, baroe Gak Ho prenta lakoeken masing-masing poenja kerdjahan dan ia sendiri lantas balik dan tjeritaken pada Lie Tjhoen itoe kadjadian jang baroesan.

„Njatalah Hiante poenja doegahan ada djitoe sekali,“ kata Hoen-kang-liong, pada sasoedanja denger itoe tjerita: „kaloe Hiante tida dapet ingetan boeat memperbaeki itoe tempat, pastilah kita-orang ada dalem keadahan jang soeker.“

Salagi beromong-omong, Hoa Hong tjoen djoega telah dateng membri taoe, bahoewa dari atas itoe boekit jang tinggi ia telah preksa, tapi tida kaliatan di mana adanja itoe ampat panglima jang ilang.

Mendenger ini warta, Lie Tjhoen djadi amat berdoeka. Kerna kaloe begitoe, tentoelah Tong Wie dengen itoe tiga soedara telah binasa. Tapi Gak Ho kata: boeat mendoega itoe ampat soedara soeda mati, itóelah belon boleh dipastiken, djika belon terdapet maitnja. Apapoela Tong Wie dan Tong Beng pande maen di aer.

„Tapi Siauwtit soeda preksa di antero te npat, tida kadapetan soeatoe apa,” kata Hoema: „Bagimana se arang moesti dialoer?”

„Tjari-tjari sadja, brangkali masi bisa katemoe,” kata Gak Ho: „boleh djadi djoega marika berlaloe. ka poelo Tjingsoei, ini poen masi belon boleh taoe. Dan salama tjari itoe ampat Hengte, kita djangan loepa atoer pendjagahan jang tegoe.”

Lie Tjhoen menjataken moefakat dan lantas toeroet nasehatnja itoe soedara jang pande. Tapi samantara itoe tida diloepaken pada orang jang telah linjap dan prenta tjari di sana sini dengen praoe ronda.

Tapi sabenernja apa itoe ampat orang masi idoep? Boeat dapet taoe ini, baeklah kita moendoer sedikit salama terdjadinja itoe paperangan jang paling blakang.

Sabagimana di sebla atas kita telah liat, lantaran gelap goelita Tong Wie dan Tong Beng djadi tida taoe jang barisannja lagi bertempoer pada pasoekan sendiri. Dan tentoe djoega sala satoe antaranja ada jang binasa, kaloe tida kaboeroe kataoean.

Tapi salagi ini ampat soedara maoe moendoer, koenjoeng-koenjoeng barisannja Sat Tauw-to dateng menjerang, jang membikin Tong Wie dengen sadereknja terpisa dari Lie Tjhoen, sedeng Hoen-kang-long dengen Hoa Hong-tjoen soeda moendoerken praoe-praoenja, Tong Wie masi terkoeroeng.

Paperangan dilakoeken amat sengit dan sampe fadjar marika belon djoega bisa kaloear dari kepoengannja Khik Ping.

Achirnja, dengen memboeka djalanan dara marika bisa djoega kaloear dari koeroengan, tapi belon bisa masoek ka dalem moeara sendiri. Sasoeda koempoelken semoea laskar-laskar jang masi idoep, Lie Hoen dapet kanjatahan: bahoewa di fihaknja dapet banjak karoegian.

„Kita poenja serangan tida berhasil,“ kata Lie Hoen: „moeloet moeara masi terpepat oleh barisan moesoe dan kita tida bisa dapet masoek. Kaloe sekarang kita menjerang teroes, pasti bakal tjape pertjoema, belon taoe bagimana soedara-soedara poenja pikiran?“

„Kaloe kita-orang tida bisa masoek, Lie Twako dengen laen-laen Hengte tentoe djadi boeat pikiran,“ begitoe Lie Hoen teroesken bitjaranja: „tapi keadahan di Kimgo kita-orang troesa terlaloe boeat koeatir, sebab Lie Twako tentoe bikin pendjagahan tegoe di benteng batoe dan Biauw-peng tida nanti bisa dapet masoek.“

„Kaloe begitoe,“ kata Ko Tjeng, jang sekarang dapet satoe pikiran: „apa tida baek kaloe kita pergi ka poelo Tjingsoei? Di sana Tek Seng ada mempoenja tigaratoes tentara boeat dan kita boleh ambil boeat pembantoe?“

„Benerlah, soepaja kita boleh madjoeken kombali ini barisan boeat tempoer pada moesoe,“ kata Lie Hoen.

Tong Wie menjataken koerang satoedjoe, kamoedian ia njataken pikiranja, salagi Sat Tauw-to dan Khik Ping mengoeroeng di sini, ada lebi baek kaloe marika berampat pergi ka Siamlo, kerna disana tentoe tida ada jang djaga.

„Betoel ada Khik Khoen doea soedara,“ kata poela ia lebi djaoe: „tapi kita tida takoet marika poenja kagagahan, dan apa jang membikin kita di sini dapet kakalahan boekan laen dari itve Hosiang poenja ilmoe iblis, Kaloe kita menjerang ka Siamlo, bisa diharep ini tempat djadi terlepas dari bahaja.“

Mendenger ini katerangan, semoea orang djadi moefakat dan lantas prenta anak-anak praoe pasang lajar aken berangkat ka Siamlo, satelah sampe di watesnja itoe tempat, dari djaoe ada kaliatan sapoeloe kapal perang jang djaga-djaga dengen moeat kira-kira doearatoes soldadoe Biauwpeng.

Ini pasoekan ada dipimpin oleh Khik Tiauw, tapi ia itoe tida ada kaliatan mata idoegnja, sataoe ka mana.

Tong Wie sasoedanja bikin papreksalian dan tjari taoe, bahoewa itoe ada waktoe jang baek, lantas madjoeken barisannja menjerang itoe kapal djaga-djaga, hingga Biauwpeng jang tida ada kapalanja, lantas merat kalangkaboet.

Lantaran begitoe, maka dengen gampang Tong Wie dan sadereknja dapetken kamenangan. Laskar Biauw jang diboenoe maitnja pada djato kalaoet dan jang masi idoep melariken diri boeat semboeni.

Satelah dapet kanjatahan tida ada satoe moesoe jang menghalangi djalannja, pasoekan Kimgo lantas naek ka darat dan menoedjoe ka pintoe kota.

Itoe waktoe Khik Tiauw djoestroe ada di dalem kota, maka hatinja amat kaget satelah denger pasoekan Kimgo dateng menjerang. Sabelonnja Tong Wie menantangi perang, ia lantas kaloear dan begitoelah terdjadi poela satoe pertempoeran jang amat sengit.

Dalem ini paperangan Khik Tiauw tida tahan dikeroeboeti begitoe seroeh. Maka sasoedanja bertempoer brapa djoeroes ia lantas lari dan diboeroe oleh Tong Wie.

Ko Tjeng lantas ambil gandewa dan boesoer, itoe barang tadjem satelah dilepas mengenaken tangannja moesoe, hingga Khik Tiauw djadi bertreak dan ampir terdjoengkel dari atas koeda, kaloe tida kaboeroe ditoeloeng oleh laskarnja. Sasoeda dapet itoe kakalahan, pintoe kota lantas ditoetoep kombali. Kiong To liat pasoekae Kimgo dateng menjerang dan Khik Tiauw dapet loeka, hatinja djadi amat koeatir dan berkata:

„Koksoe pergi poekoel Kimgo, sampe sekarang belon ada kabar-kabarnja menang atawa kala. Sekarang pasoekan Kimgo dateng ka mari, bagimana kita bisa melawan dan moendoerken kapadanja?”

„Tapi pasoekan jang dateng ini maski betoel dari Kimgo, boekannja dipimpin oleh Lie Thjoen dan Hoa Hoema,” kata Khik Tiauw: „hanja oleh ampat panglima laen. Maka sekarang baeklah Tay-ong kaloearken prenta pada rahajat Siamlo jang ada dalem ini kota, masing-masing moesti bantoe kaloearken tenaga boeat mendjaga, kerna dalem pertempoeran jang baroesan kita poenja laskar banjak jang binasa dan tida tjoekoep tegoe kaloe diprenta marika sadja jang mendjaga. Sedeng akoe nanti prenta orang pergi ka Kimgo boeat kasi taoe pada Koksoe, soepaja pasoekan di sana ditarik poelang aken bantoe mendjaga di sini.” Kiong To njataken moefakat dan lantas kaloearken prenta jang sakalian rahajat moesti kena kawadjiban mendjaga kota.

Sakaloearnja ini atoeran, kabentjiannja rahajat djadi bertamba-tamba besar pada Kiong To; marika harep ini kota lekas-lekas dapet dipoekoel petja. Tapi sebab Khik Tiauw jang mengepalaken itoe pendjagahan salaloe berlakoe keras dan bengis, maka tida satoe jang brani njataken rasa koerang senangnja, kendati dalem hati amat gondok.

Tong Wie dan Tong Beng jang satiap hari poekoel itoe kota, satelah dapet liat pendjagatian diatoer lebi tegoe dengen bantoeannja rahajat, lantas balik kombali.ka pasanggrahan sendiri boeat berdami.

„Skarang pendjagahan diatoer lebi keras dan hati-hati,“ kata Tong Wie: „maka harepan boeat bisa poekoel petja, itoelah sedikit sekali. Ada satoe daja, jaitoe kita moesti serang dari ampat pendjoeroe, tapi ini djoega tida bisa dilakoeken, sebab kita poenja tentara tjoema sedikit dan tida bisa digeraken boeat itoe maksoed.“

„Djika menoeroet akoe poenja pengliatan,” kata Ko Tjeng: „kaloe Kiong To soeda kaloearken atoeran boeat minta bantoeannja rahajat, njatalah di dalem kota ada kakoerangan soldadoe. — Oh, bagimana gemesnja hatinja rahajat negri jang dikenaken itoe kawadjiban, inilah tida oesah diseboet lagi. Marika tentoe harap-harap Soepaja kota itoe lekas petja,sebab kalakoeannja Kiong To jang berhianat, memang tida disoeka oleh rahajat Siaml., — Ah, kaloe kita bisa dapet bantoean dari dalem, tida soesa boeat poekoel ini kota.”

„Ja, kaloe kita bisa dapet bantoean dari dalem,” kata Tong Wie: „tapi bagimana Kita bisa dapetken itoe, sedeng di dalem kota tida ada satoe sobat atawa kenalan jang boleh diadjak berdami ”

"Inileh soesa sekali,” saoet Lie Hoen dan Tong Beng.

Kamoedian Ko Tjeng dapet satoe pikiran dan berkata:

"Biarlah iti malem akoe tjoba mecees kaloe kaloe kita nanti bisa dapeteken satoe djalan jang baek, ini djoega belon tentoe.”

Begitoelah sahabisnja berdami, Ko Tieng lantas pergi tliat temboknja itoe kota dari oedjoeng sini sampe di oedjoeng sana. Sasoeda mamereksa abis, ia dapetken jang di oedjoeng Barat tembok itoe ada didjaga oleh rahajat negri jang roemanja ada berdeketan pada Hoa Hoema, dan pada orang orang itoe Ko Tjeng ada kenal, sebab doeloean ia poen memang tinggal di ini negri aken djadi pelindoengnja Hoa Hong-tjoen bersama-sama Lie Hoen.

Hatinja orang gaga ini djadi amat girang, sigra djoega ia deketi orang itoe sambil membri tanda dengen mata.

Orang itoe ada bernama Ho Hap-dji, jang memang telah kena! dan sering djoega bertemoe pada Ko Tjeng.— Kerna salama Hoa Hong-tjoen dipoengoet mantoe oleh radja Siamlo, itoe Hoema dan doea panglima pelindoengnja ada berlakoe baek hati pada rahajat-rahajat di sini, maka rahajat ada mengindaken sanget.

Begitoelah waktoe Ho Hap-dji liat panglima jang dateng itoe ada Ko Tjeng, hatinja djadi ka kaget Tapi sigra djoega ia liat Ko Tjeng membri tanda-tanda, maka sasoeda membales itoe dengen kedipan mata, Hap-dji lantas berlaloe dari kawannja jang laen dan pergi ka djoeroesan tempat di mana Ko Tjeng menoedjoe.

Sasampenja di tempat soenji, Ko Tjeng lantas njataken maksoednja boeat minta orang ini ampoenja toeloengan. Ho Hap-dji njataken soeka sekali boeat membantoe, tapi dengen djalan bagimana.

Itoelah gampang sekali, saoet Ko Tjeng jang lantas membri pesanan begini dan begitoe.

„Oh, kaloe begitoe, boleh sekali,“ kata Hap-dji: „akoe nanti toereet Tjiangkoen poenja pesenan, troesa: koeatir. Malah akoe maoe bilang djoega, bahoewa semoea rahajat negri memang ada bentji sekali pada itoe penghianat jang soeda reboet karadjahannja Ma Kok-tjoe dan ada sedia boeat membantoe pada. Hoa Heema, kaloe sadja jang bisa dilakoeken.“

Ko Tjeng hatoerken trima kasi dan njataken girangnja. Kamoedian ia lantas berlaloe ka pasanggrahan sendiri.

Sasampenja dalem tangsi, ia lantas tjeritaken pada sakalian soedaranja apa jang baroesan ja soeda bitjara pada Ho Hap-dji dan bagimana itoe orang soeda sanggoepin, djoega boeat membantoe dari dalem.

„Kaloe bisa kadjadian itoelah bagoes sekali,“ kata soedara-soedaranja: „tapi maski bagimana djoega harep moesti berlakoe hati-hati.“

Ko Tjeng memanggoet, soeatoe tanda ia telah mengarti.

Sorenja ia lantas toekar pakean dan bawa sendjata tadjem, pergi ka itoe tembok bagian sebla Barat bersama jang laen-laen, semoea poen telah berdandan rapi.

Koetika marika sampe, djaoe-djaoe kaliatan jang di atas tembok ada terpasang banjak lentera dan apinja terang betoel. Samantara Ho Hap-dji, jang sasoedanja bermoefakatan pada Ko Tjeng laloe alik ka tempat djagahannja dan kasi taoe pada bebrapa kawannja jang djoega ada merasa bentji dengen kadjahatannja Kiong To. Pada itoe kawan-kawan ia tjeritaken bagimana baroesan ia soeda katemoe pada Ko Tjiangkoen dan perdjandjian apa marika telah bikin boeat bantoe dari dalem.

Itoe semoea rahajat jang mendjadi kawan mendjaga dan ada bersatoe haloean padanja, menjataken satoedjoe. Bagitoelah di waktoe sore ia- orang lantas naek poela ka atas tembok boeat lakoeken kawadjibannja.

Sasoeda satoe pada laen membri tanda, Ko Tjeng jang ada di bawa kota laloe naek ka atas kota. Tapi berbareng itoe kaliatan barisan ronda jang dikapalaken oleh Khik Tiauw telah sampe, dalem rombongan mana Kiong To ada toeroet mamereksa. Khik Tiauw jang liat di loear kota ada soldadoe moesoe, lantas prenta laskarnja djaga teroes itoe tempat, sedeng pada Kiong To ia minta pergi preksa ka laen tempat, kaloe ada dapetken soldadoe jang semboeni, haroes didjaga hati-hati. Sedeng masoeknja Ko Tjeng, sedikit poen ia tida laoe.

Meliat pendjagahan diatoer lebi keras, Ko Tjeng tida brani sembarangan gerakin tangan, kerna koeatir maksoednja nanti djadi gagal. Pada Hap-dji ia berdami teroes, dan sasoedanja bertoekar pikiran, achirnja diambil poetoesan jang esok pagi sasoeda abis dienstnja pergi ngadep pada Kokbo.

Ko Tjeng njataken moefakat.

Begitoelah esok paginja Ho Hap-dji bersama Ko Tjeng lantas berangkat ka kraton, dan pengawal pintoe jang kenali padanja, djadi amat terkedjoet dan berkata:

„He, bagimanatala Tjiangkoen bisa masoek ka dalem kota jang didjaga begitoe keras?”

Ko Tjeng dan Ho Hap-dji tjoema gojangken tangan dan soeree pendjaga itoe lekas boekai pintoe, kerna ia maoe mengadep pada permisoeri.

Sigra djoega pintoe itoe diboeka, dimana kadoea orang ini lantas masoek.

Satelah marika soeda masoek pintoe lantas ditoetoep kombali dan satoe Taijkam lantas anteri ka dalem. Kok Bo satelah dikasi taoe kadatengannja Ko Tjeng, lantas titahken panglima itoe mengadep. Köetika bertemoe Ko Tjeng lantas membri hormat dan Kok Bo lantas menanja:

„He, bagimanatah Tjiangkoen bisa masoek dalem ini kota, dan mengapa Hoema sampe sekarang masi belon poelang?“

Ko Tjeng lantas djawab itoe pertanjahan dan tjeritaken satoe persatoe apa jang telah terdjadi dengen pasoekannja, dari bermoela sampe achirnja ja toetoerken itoe satoe persatoe dengen terang.

Sasoeda menoetoerken itoe, ia balik menanja tentang kamatiannja radja Siamlo dan bagimana Kiong To lakoeken perboeatannja, jang dengen begitoe gampang bisa rampas tachta karadjahan. Kok Bo djawab ini dengen terang sambil mengoetjoerken aer mata. Kamoedian berkata:

„Sadari matinja Kok-tjoe, siang hari malem kami mengharep pertoeloengannja Lie Taytjiangkoen dari Kimgo, jang salaen bisa ambil kombali ini kadoedoekan dari tangannja itoe penghianat, aken bales djoega kami anak dan iboe poenja sakit hati. Tapi, ja Allah! sapandjang kabar jang dateng ada mewartaken ada bilang, pasoekan Kimgo salaloe terpoekoel moendoer dan dapet kakalahan, hingga kami soeda tida ada harepan dan telah ambil poetoesan boeat binasaken djiwa sendiri.“

Tapi maksoed itoe dapet tjegahan dari Kiong tjoe,“ kata poela itoe permisoeri sambil menangis tersedoe-sedoe: „jang terpaksa djadi sabarken hati sampe dapet laen kabar jang lebi baek. Sekarang dengen Tjiangkoen poenja dateng, bagimana kabar dan bagimana sekarang keadahannja Lie Taytjiang-koen di Kimgo?“

Ko Tjeng toetoerken satoe persatoe bagimana sadari kalōear dari Ciamlo ikoet Hoema, sampe didapetnja itoe kabar djelek tentang binasanja Ma Kok-tjoe, achirnja sampe Lie Tjhoen geraken tentara dan dapet kakalahan, hingga ia dengen ampat soedara terpentjar dari Hoen-kang-liong dan kamoedian dateng ka mari.

Mendenger ini tjerita jang ditoetoerken blakangan, Kok Bo djadi lebi berdoeka dan berkata:

„Kaloe Sat Tauw-to sampe begitoe djahat, bagimana tentara Kimgo nanti bisa dapet kamenangan? Oh, njatalah peroentoengan kami soeda tjoekoep boeat sampeken adjalnja.“

Ko Tjeng lantas membri hiboeran, jang katanja: maski dalem paperangan jang beroentoen-roentoen fihak Kimgo dapet karoesakan, tapi djangan permisoeri djadi koeatir, sebab dengen tipoenja jang soeda bisa masoek ka dalem ini kota, ada harepan aken membikin ini kota djadi petja dan menoeloeng Kok Bo dengen sakalian rahajat.

Apalagi rahajat negri memang teramat bentji pada Kiong To, maka dengen bersariket pada barisan particulier, troesa koeatir jang ini maksoed tida kasampean. Seande Sat Tauw-to jang dikasi kabar dateng bawa barisan membri pertoeloengan, dari fihak Kimgo nanti dateng mengedjer dan membri labrakan.

Dengen ini hiboeran, Kok Bo djadi dapet kombali harepannja jang soeda tinggal sedikit, kamoedian Ko Tjeng kasi taoe maksoednja, boeat samantara waktoe ini, ia minta tinggal di kraton boeat semboeniken diri, sebab kaloe di loearan salempang Khik Tiauw poenja orang nanti kenalin dan rasianja jang belon didjalanken djadi terboeka.

Permintahan ini diloeloesken oleh permisoeri, jang lantas prenta Taijkam anter Ko Tjeng ka satoe tempat dan pada Ho Hap-dji dipesen bagimana moesti berlakoe.

„Teroetama haroes berhati-hati,” kata Kok Bo: djika penghianat itoe dapet dibasmi, kaoe poenja gandjaran ada besar sekali.”

„Ho Hap-dji hatoerken trima kari, lantas berlaloe.

---