Pembalesannja Kawanan Liangsan/Bagian ka ampat/Bab 16
XVI
DENGEN TIDA TERDOEGA, DOEA FIHAK
KAWAN JANG TERPISA LAMA BERTE-
MOE KOMBALI DI LAOETAN.
Sabagimana pembatja telah taoe, bahoewa poelo Tjingsoei ada didjaga oleh Tek Seng dengen sadjoembla laskar jang tida sabrapa tegoe. Tapi boeat lindoengi itoe poelo dari pembadjak atawa orang-orang djahat, laskar sabegitoe ada tjoekoep djoega.
Blakangan satelah dapet kabar jang Kimgo lagi maloemken perang pada Sat Tauw-to dan brapa kati Lie Tjhoen dapet kakalahan, hatinja djadi berkoeatir. Lebi lagi terkabar jang di negri Siamlo djoega ada terbit kariboetan.
Tek Seng lantas prenta orang-orangnja jang paling boleh dipertjaja aken pergi serepin kabar, tida lama kamoedian orang itoe balik membri taoe, bahoewa Khik Ping pegat moeloet moeara di wales Kimgo, sedeng Tong Wie dan Tong Beng telah pergi ka Siamlo.
Kaloe laskarnja ada banjak dan tjoekoep, lebi siang tentoe Tek Seng soeda bergerak boeat dateng menoeloeng. Tapi menginget keadahan sendiri tida tjoekoep tenaga dan kaloe madjoe bakal mendapet sadja karoesakan, hatinja djadi amat berdoeka.
Pada soeatoe hari ia prenta laskarnja ronda di sapoeter itoe telaga, sebab dikoeatir moesoe nanti dateng menjerang.
Itoe hari koenjoeng koenjoeng di pelaboean ada kaliatan banjak kapal-kapal perang besar jang lagi mendatengi, sedeng benderanja jang berkibar-kibar ada kaliatan angker, tapi toelisannja tida begitoe ternjata.
„Ah, tjilakalah kaloe begitoe,“ kata ia dalem hati dengen katakoetan, kerna doega kapal-kapal jang kaliatan itoe tentoe ada kapoenjahannja Sat Tauw-to: „itoe Hosiang djahanam soeda madjoeken antero pasoekannja poekoel ini poelo.“
Sigra djoega ia prenta laskarnja jang sedikit lekas bersedia-sedia boeat menangkis kaloe moesoe itoe soeda dateng menjerang. Rahajat itoe trima prenta lantas lakoeken apa jang dititah.
Maski hati ada merasa koeatir, tida oeroeng Tek Seng masi mengawasi teroes pada itoe kapal-kapal. Ia djalan pelahan-pelahan menghamperi, tapi heran djoega itoe soldadoe-soldadoe tida sekali mirip dengen gerakannja Biauwpeng.
„He, marika itoe poenja dandanan boekannja bangsa biadab,“ kata Tek Seng dengen penoeḥ rasa heran: „malah ada mirip dengen kita poenja Hengte dari Kimgo, tapi datengnja itoe pasoekan boekan dari sana.“
Boeat dapet kanjatahan kapal-kapal siapa adanja itoe, ia lantas adjak ampat soldadoe dan toeroen ka dalem satoe praoe dengen pegang sendjata, jang diprenta menghamperi pada itoe kapal-kapal.
Praoe itoe digajoe dengen ladjoe, dari atas kapal poen kaliatan banjak orang jang pada mengawasi datengnja.
Kapal dari manatah itoe?
Pembatja tentoe belon loepa, bahoewa praoe-praoe perang ini ada kapoenjahannja Lie Eng.
Tatkala itoe Lie Eng dan Jan Tjeng jang memang maoe pergi ka Kimgo, tapi tida taoe di mana djalannja, saban-saban memandang kasana kamari. Itoe hari salagi marika memandang di sapoeternja laoet, kaliatan ada satoe praoe lagi mendatengi.
„Orang jang berdiri di kapala praoe, dandanannja ada seperti bangsa Tionghoa,“ kata Jan Tjeng sambil menoendjoek pada praoenja Tek Seng.
„Ja, malah seperti panglima dari karadjahan Tay Song,“ menjamboeng Lie Eng.
„Liatlah, ia dateng ka mari.“
„Itoelah baek sekali, kita boleh tanja padanja.“
Kadoeanja itoe memandang teroes.
Tida lama praoe itoe sampe di pinggirannja itoe praoe besar, jang lantas minta katerangan pada anak-anak praoenja, kapal dari mana ini jang berlaboe di sini.
Orang jang ditanja lantas membri taoe, bahogwa ini ada kapal perangnja Tay Song jang maoe pergi ka Kimgo, boeat tjari pada Lie Taijtjiangkoen.
Mendenger itoe katerangan Tek Seng djadi terlebi heran dan lantas menanja lebi djaoe, ada perboeboengan apatah antara ini angkatan perang dengen Lie Tjhoen di Kimgo. Sabelon pertanjahan ini didjawab, Lie Eng dan Jan Tjeng jang lagi mengawasi dari laen praoe, lantns dateng dan waktoe denger orangnja kasi taoe begitoe, ia lantas kasi taoe:
„Pada Lie Taijtjiangkoen kita-orang ada Hengte, datengnja ini pasoekan ka loear laoetan memang perloe maoe tjari padanja, boeat bantoe maksoednja diriken satoe peroesaban besar jang kita-orang soeda denger!
„Tapi siapatah adanja Tjiangkoen ini?” menanja Tek Seng dengen girang.
Sasoedanja dikasi taoe, Tek Seng djadi amat girang dan lantas naek ka itoe kapal perang, sambil berseroeh:
„Oh, soenggoa beroentoenglah kita-orang ini, hingga dalem waktoe jang begini penting dan tida terdoega, bisa bertemoe pada Liatwie Hengte. Boleh bilang Allah jang telah kirim sakalian soedara-soedara dateng ka mari.” Di fihaknja Lie Eng satelah dapet tace siapa adanja Tek Seng, djoega djadi amat girang dan berkata dengen keras:
„Oh, kiranja Hohan ini ada kita poenja Hengte, jang diseboet Sioe-liam-hiong Tek Seng di Taijouw, Twako Lie Tjhoen poenja Siauw-kiat-gie? Soenggoe beroentoenglah kita-orang bisa lantas katemoe di ini tempat!“
Kamoedian Lie Eng panggil semoea Hengtenja aken dioendjoeki pada Tek Seng dan satoe pada laen saling oendjoek namanja dan berkenalan, dimana masing-masing ada kaliatan girang sekali.
Sasoeda itoe baroe Lie Eng menanja: bagimana keadahannja Twako Lie Tjhoen di Kimgo, dan kenapa Tek Seng boleh ada di ini poelo, tida sama laen-laen Hengte.
Tek Seng lantas tjeritaken dengen ringkes tentang keadahannja Lie Tjhoen jang sekarang lagi berperang pada Sat Tauw-to dan Kimgo kaliatannja ada dalem bahaja. Sedeng ia jang diwadjibken djaga poelo Tjingsoei, maski soeda denger itoe kabar, tapi tida brani sembarangan pergi membantoe, kerna boekan sadja di ini poelo djadi kosong, hanja rahajat jang ada di bawah pimpinannja poen tjoema bebrapa ratoes orang sadja.
Sasoeda tjeritaken itoe dengen ringkes ia berkata: „Dengen dateng soedara-soedara sakalian, njatalah di fihak kita ada beroentoeng sekali. Harep Hengtiang sakalian soeka lantas madjoe ka Kimgo boeat membri toeloengan dan moendoerken kawanannja itoe Hosiang jang amat djahat."
„Oh, itoelah tentoe sekali,“ kata Lie Eng: „kita poenja dateng ka mari memang maoe tjari Lie Twako, maka kaloe sekarang Lie Twako ada dalem kasoesahan, maski bagimana djoega pasti kita orang moesti kaloearkan tenaga.“
Perkara siapken pasoekan lantas didamikan, Jan Tjeng kata: sekarang ternjata jang ini semoea kapal-kapal tida bisa lantas dimadjoeken ka Kim-go, kerna ada moeat barang dan orang-orang prampoean.
„Paling baek madjoeken sadja doeloe bebrapa pasoekan, soepaja bisa lantas membri toeloengan," kata poela Jan Tjeng:,,sedeng orang prampoean tinggalken sadja blakangan. Kaloe pasoekannja Sat Tauw-to jang mamegat moeloet moeara soeda berlaloe, baroe kita. berame menjoesoel.“
Begitoelah sapoeloe Hohan lantas berangkat dengen sadjoembla tentara aken pergi menoeloeng, sedeng jang laen lantas singga di poelo Tjingsoei. Dalem ini perdjalanan Tek Seng djadi pengoendjoek djalan,
Sapoeloe Hohan jang berangkat itoe jalah: Lie Eng, Loan Teng-giok, Ong Tjin, Kwani Sing, Houw-jan Tjiak, Hauw-jan Giok, Jan Tjeng, Djie Seng, Leng Tjin dan Kong-soen Sin, sedeng Tek Seng jang djalan di moeka ada merasa amat girang, maka praoe-praoe dimadjoeken dengen tjepet.
Tatkala itoe Sat Tauw-to lagi bikin kepoengan sanget heibat, tapi sebab Gak. Ho atcer pendjagahan begitoe keras dan hati-hati, maka moesoe tida djoega bisa dapetken maksoednja. Pada soeatoe hari koenjoeng-koenjoeng Sat Tauw-to dapet soeratnja Kiong To, jang membri taoe, bahoewa Siamlo lagi dikepoeng oleh ampat panglimanja Kimgo, maka keadahannja amat berbahaja, sebab Khik Tiauw bebrapa kali maloemken perang, salaloe tida beroentoeng.
Mendenger itoe warta, Khik Ping djadi terkedjoet.
„Kaloe begitoe, terpaksa kita moesti tarik ini tentara dan pergi menoeloeng Siamlo,“ kata Khik Ping: „sebab di sana tida ada panglima jang menangkis serangannja itoe ampat moesoe.“
Sat Tauw-to menjataken tida moefakat, sebab katanja: petjanja Kimgo tjoema menoenggoe pagi dan sore sadja, djika kamenangan soeda ternjata bakal ada di fihaknja, mengapatah djoega moesti ditinggalken. Kaloe sekarang ini pakerdjahan jang digoenaken. tempo sakean lama, tida ditoenggoe hasilnja, boekan sadja djadi roegi dan boewang tempo pertjoema, malah moesoe ada dapet tempo jang baek boeat tegoeken keadahannja jang soeda moelai lemah.
„Nah, lantaran ini djoega, maka kita tida boleh mengiser dari sini,“ begitoe Sat Tauw-to toetoep bitjaranja: „tentang keadahannja Siamlo troesa dikoeatir, maski diserang lagi seboelan, belon tentoe kotanja jang tegoe bisa djadi petja.“
Khik Ping rasa bitjara itoe ada dengen alesan pantes, maka ia poen tida tjoba membanta, tjoema kata:
„Kaloe begitoe, kita moesti serang lebi keras, soepaja Kimgo lekas petja.“
„Itoelah bener sekali,“ saoet Sat Tauw-to, jang lanlas prenta rahajatnja madjoeken praoe-prave boeat bikin serangan-serangan jang lebi seroeh, sedeng pada rahajat bangsa Biauw jang pande mandjat, lantas disoeroe tjari rotan dan ojot-ojot goena bikin tangga tali, jang dioedjoengnja ditaroken besi tadjem dan bengkok, jang matiemnja seperti besi gaetan datjin.
Ampat-lima orang rahajat Biauw bawa satoe tangga demikian, sasampenja di bawa benteng lantas lemparken oedjoengnja ka atas dan kaloe besinja soeda tergaet di tembok dan menjangkel, lantas djadi satoe tangga jang tegoe dan marika lantas naek dengen bereboet.
Gak Ho dan Lie Tjhoen jang memang atoer pendjagahan dengen keras dan siang malem prenta orang ronda dengen tida brentinja, satelah liat itoe Biauwpeng goenaken kombali tangga demikian boeat mandjat, lantas sadja potong oedjoengnja itoe tali, hingga orang-orang jang bergelantoengan lantas djato dan mati.
Tapi laskar biauw boekan djadi takoet atawa djeri, hanja bebalik djadi lebi nekat. Satoe rombongan djato, laen rombongan madjoe poela sambil bertreak-treak, hingga orang djadi merasa kawalahan boeat potongi itoe tangga-tangga tali.
Lie Tjhoen meliat kabandelannja itoe bangsa biadab, djandi amat kesel dan dapet pikiran pendek boeat abisken sadja djiwa, sebab pikirannja, kaloe sampe binasa di tangan moesoe, tentoe namanja djadi djelek dan sampe mati poen menanggoeng maloe.
Beroentoeng Gak Ho kaboeroe tjega dan berkata:
„Oh, itoelah pikiran kliroe sekali. Mengapatah djoega Twako moesti ambil pikiran begitoe pendek? Djangan poela sekarang sabelonnja bangsa- bangsa biadab itoe bisa masoek, hanja seande kata benteng ini telah petja, kita masi tida boleh berlakoe begitoe, hanja moesti dilawan sakeras-kerasnja tenaga.
„Boekantah kita poenja rahajat semoea tinggal setia dan aken mendjaga dengen soenggoe hati? Perkara perang menang dan kala, itoelah memang djamaknja, maka dalem satoe kekalahan tidalah boleh diboeat seselan, Betoel sekarang kaliatannja Kimgo ada dalem bahaja, tapi siapa taoe kaloe kita bisa dapetken laen daja boeat moendoerken moesoe. „Twako poenja niatan jang nekat ito- djangan dioendjoek, sebab perboeatan demikian bisa membikin hatinja rahajat djadi ketjil. - Djoega mengapatah kita moesti takoet atawa tida ada harepan? - Boekantah ramsoem masi bisa tahan dan kita poenja soedara-soedara djoega ada berlakoe soenggoe hati?
„Tjobalah Twako pikir!......”
Lie Tjhoen tinggal berdiam sadja, kerna perkatahannja Gak Ho dipikir ada bener sekali.
Kamoedian Gak Ho dapet satoe ingetan, ada lebi baek toe laskar-laskar Biauw jang lagi naek disiremken sadja kapoer aloes dari atas benteng, dengen begitoe ada lebi gampang dari pada kaloe talinja dibatjok-batjokin.
Ini pikiran laloe dinjataken pada laen-laen panglima, jang lantas prenta sasoeatoe rahajat moesti bawa kantong kapoer tembok boeat awoerin matanja moesoe. Ini daja jang blakangan njatalah ada lebi bagoes dan banjak sekali Biauwpeng jang djadi terpelanting-planting, satelah matanja kena itoe barang aloes.
Itoe waktoe Sat Tauw-to soeda kena pananja Hoa Hong-tjoen, maka dengen treakan keras ia boeroe-boeroe moendoer kombali. Beroentoeng pana itoe tjoema menantjep di paha, hingga djiwanja tida ada dalem bahaja.
Tapi, maski Hosiang itoe soeda moendoer, toch keadahannja Kimgo tida diadi lebi baek; sebab Khik Ping masi menjerang teroes siang dan malem.
Koenjoeng-koenjoeng di djoeroesan fihak 1 jingsoei ada kadengeran soeara letoesan bom jang dibarengi dengen soeara gempar-gempar; berbareng itoe ada kaliatan banjak kapal-kapal perang jang lagi mendatengi, djika diliat benderanja jang berkibar-kibar, njatalah itoe ada bala penoeloeng.
Tapi penoeloeng dari mana?
Inilah tida saorang bisa mendoega.
Sat Tauw-to jang lagi diobati loekanja, djadi amat terkedjoet satelah denger itoe lapoer. la tida bisa mendoega pasoekan dari mana itoe jang dateng menoeloeng. Kamoedian dateng poela laen orang jang mewartaken: baho wa pas ekan jang lagi mendatengi itoe ada kira-kira limapoeloe boea kapal perang besar dan sekarang lagi sedeng menjerang.
„Pasoekan penoeloeng itoe boekan sadja ada besar,“ kata poela orangnja lebi djaoe: „hanja panglimanja jang mengapalaken poen ada gaga sekali.“
„He, he, apa bener a la begitoe roepa?“ tanja ini Hosiang jang djadi bingoeng.
„Bener sekali, silakenlah Koksoe preksa“ saoet orangnja sambil moendoer.
Sat Tauw-to lantas kalwear liat. Bener sadja itoe berpoeloe kapal lagi menjerang praoe praoenja dengen sengit. Kerna liat datengnja moesoe ada begitoe besar dan boekan tandingan pada angkatan perangnja, maka ia lantas batja djampenja, tida lama langit djadi gelap dan di oedarą ada kaliatan banjak soldadoe djadi-djadian.
Tapi sigra djoega awan-awan itam itoe boejar kombali dan soldadoe setan jang baroesan kaliatan maoe menjerang itoe barisan penoeloeng, djadi linjap tida karoean.
Sat Tauw-to djadi kaget dan tida taoe siapa jang soeda poenain ilmoenja.
„He, siapatah jang telah poenaken akoe poenja ilmoe?” ia bertreak sambil memandang ka f haknja itoe bala penoeloeng jang lagi mendatengi. Dengen amat goesar ia lantas batja poela djampenja sambil menoendjoek ka atas oedara, jang tida lama kamoedian lantas terdenger soeara meledakan amat keras, berbareng itoe dari langit ada kal atan bergoeloeng-goeloeng api lagi mendatengi.
Sat Tauw-to batja teroes djampenja, hingga api itoe samingkin lama djadi samingkin besar dan berada di atasnja itoe kapal-kapal.
Lie Tjhoen dan laen-laen Hohan, jang memang salaloe moendar-mandir di atas benteng, satelah liat di oedara ada api berkobar-kobar, djadi amat kaget, kerna dikira api itoe bakal dateng ka benteng Kimgo.
Gak Ho jang djarang taoe goegoep laloe prenta semoea laskar moesti pegang ketjrotan jang diisiken dara binatang. Tapi itoe api tida dateng kamari, hanja sabelonnja toeroen membakar kapal, lantas kadengeran soeara goentoer dan petir, jang berbareng itoe laloe toeroen oedjan besar.
Tida lama kamoedian api itoe djadi padem sendirinja,
Meliat doea-doea kali ilmoenja telah dipoenaken, baroelah Sat Tauw-to djadi merasa keder dan di kapal penoeloeng ada kaliatan satoe iman lagi membatja dowa, tapi ia tida kenal siapa adanja iman itoe.
Sat Tauw-to lantas prenta Khik Ping dan Khik Khoen lekas-lekas tarik moendoer itoe pasoekan jang mengoeroeng, kaloear dari moeara. Prenta mana dilakoeken dengen sigra.
Sabegitoe djaoe Lie Tjhoen masi belon faoe ada dateng penoeloeng, kerna kapal-kapalnja Lie Eng masi belon kaliatan. Tentang ilmoenja Sat Tauw-to betoel ia dapet liat, koetika api itoe bergoeloeng goeloeng di atas oedara, tapi doega api ifoe bakal toeroen membakar rahajat di Kimgo, maka djoega Gak Ho lantas prenta laskarnja sediaken itoe pompa-pompa.
Tapi waktoe orang membri taoe jang moesoe soeda tarik pasoekannja ka loear dari moeara, sedeng api jang besar itoe tida kaliatan toeroen, rasa herannja djadi besar sekali, maka ia berkata pada Gak Ho:
„He, apa maksoednja itoe Hosiang tarik barisannja jang mengoeroeng Kimgo dalem waktoe jang koenjoeng-koenjoeng? ― Apa boleh djadi itoe tjoema satoe akal sadja?”
„Itoelah tida bisa djadi,“ saoet Gak Ho: „djoega tida ada satoe sebab boeat ia menggoenaken akal demikian.“
„Djoega itoe api jang berkobar-kobar ka manatah perginja?“
„Ja, inilah jang mengheranken sanget. ― Tapi baeklah kita-orang kaloear aken meliat, di siloe baroe bisa taoe sebab-sebabnja.“
Lie Tjhoen njataken moefakat, sigra djoega ia siapken rahajatnja jang ada di sitoe bersama-sama Gak Ho, Hoei Po dan Hoa Hong-tjoen, iaorang pada kaloear aken menilik itoe kadjadian aneh.
Tida lama Hoen-kang-liong dengen sadereknja soeda berada dalem praoe jang dimadjoeken ka moeloet moeara. Dari sitoe kaliatan pasoekannja Sat Tauw-to lagi menoedjoe ka Wetan, sedeng di djoeroesan Koelon ada bebrapa poeloe kapal perang jang lagi mendatengi.
„He, liatlah !....” kata Lie Tjhoen sambil menoėndjoek itoe kapal-kapal perang jang kaliatan: „pasoekan dari manatah datengnja itoe?“
„Itoelah seperti pasoekan kita sendiri,” saoet Gak Ho: „tapi... tapi..... ja, maoe dikata pasoekan Kimgo, kita sendiri tida aja poenja kapal-kapal perang jang begitoe banjak?”
Hong-tjoen djoega merasa heran. Kamoedian samingkin lama kaliatan panglima-panglima jang berdiri di itoé kapal, semoea ada mirip dengen orang-orang Tionghoa, di sala satoe kapal perang jang sebla tenga ada kaliatan satoe iman jang pake djoeba pertapahan dan pegang pedang pendek, di sampingnja ada berdiri satoe panglima toea jang kaliatan gaga dan pegang sapasang pian.
„He, tjohalah Hiante liat, apa itoe boekannja Kong-soen Sin dan Houw-jan Tj ak?” kata Lie Tjhoen sambil menoendjoek
Gak Ho poen djoestroe itoe waktoe lagi maoe bilang begitoe djoega, maka waktoe denger ini Twako poenja perkatahan, ia manggoet-manggoet dengen heran Kadoeanja ini merasa dırınja apa lagi mengimpi, atawakah memang sabenernja ada liat itoe kadjadian.
Tatkala itoe Lie Eng jang berdiri di kapala kapal soeda dapet liat pada Lie Tjhoen, maka dengen soeara girang ia seroehken itoe soedara. Tek Seng jang djalan di depan poen lantas madjoeken praoenja dan kasi taoe pada Hoen-kang-liong, baho wa kapal-kapal jang lagi mendatengi itoe ada Hengte dari Liangsan.
„Oh, kaloe begitoe kita orang boekan mengimpi?” kata Lie Tjhoen dengen treakan jang menjataken girangnja hati: „ah! ah! bagimanatah boleh djadi begini?”
Tek Seng tjeritaken dengen ringkes, bahoewa L'e Eng dan sadereknja memang maoe dateng ka Kimgo dan sabentar lagi tentoe kapal-kapal itoe aken masoek ka dalem moeara, djika soeda kedjer praoenja Sat Tauw-to.
Bener sadja tida lama kamoedian praoenja Khik Ping dan Khik Khoen soeda kasoesoel. Sebab rasa tida bisa lolosken diri dari pengoeberannja itoe pasoekan penoeloeng, maka Sat Tauw-to lantas titahken itoe doea soedara balik melawan sadja. Prenta ini ditoeroet dan begitoelah Biauwpeng jang soeda merat balik kombali aken menjerang.
Maski bagimana gaga dan bandel djoega itoe tentara Biauw, toeh marika tida bisa lawan dengen tenaganja meriam. Begitoelah kapalnja Khik Ping lantas madjoe dengen nekat, serangan ini ditangkis oleh Leng Tjin, tapi diam-diam orangnja pasang meriam jang memang ada dalem itoe kapal
Sakali meriam itoe berdjedoer, moesoe poenja doea kapal lantas antjoer dan tenggelem ka dasarnja laoet.
Di fihaknja Lie Eng kadengeran soeara bersoerak dan tepok tangan jang amat rioeh. Sat Tauw-to liat begitoe djadi moerka dan lantas tjoba lagi sakali ilmoenja, dengen membatja djampe lantas menoeding ka oedara, jang sigra djoega toeroen barisan heiwan-heiwan galak, seperti matjan, badak, singa, andjing oetan dan sabaginja, beriboe-riboe mane menerdjang ka praoenja pasoekan Lie Eng.
Tapi sabagimana bermoela, ini kali ilmoe itoe tida dapetken hasilnja, kerna Kong- soen Sin jang liat begitoe, soeda lantas batja dowa dan menoendjoek ka satoe djoeroesan dan barisan heiwan itoe lantas linjap.
„He, siapatah itoe iman jang brani poenaken akoe poenja ilmoe?” kata Sat Tauw-to dengen goesar.
Tapi perkatahannja ini tida ada jang saoetin. Kerna tida pertjaja kasaktiannja ada lebi di bawah, Hosiang ini lantas batja poela djampenja panggil balatentara setan, sedeng tangannja merogo sakoe dan lempar banjak bidji katjang, jang lantas toeroen soldadoe-soldadoe setan, ada jang bertoenggang koeda dan ada jang tida bertoenggang kueda.
Tapi ini ilmoe poen achirnja dapet dipoenaken lagi oleh Kong-soen Sin, tapi boekan dengen djalan seperti tadi, hanja dipanggilken doea panglima langit, jang lantas sapoe soldadoe setan itoe dan dalem sakedjeb sadja telah abis.
Sekarang Sat Tauw-to djadi kawalahan betoel. Sedeng lawanannja satelah liat moesoe soeda kala, lantas mengedjer. Loan Teng-giok madjoeken kapalnja menjerang Khik Khoen, sedeng Jan Tjeng dan Kwan Sing lepas pana api boeat soesoel larinja Khik Ping.
Sat Tauw-to rasa sabelonnja djadi binasa, baek melarikan diri boeat tjari idoep. Khik Ping rasa ingetan begitoe ada betoel, maka kadoeanja itoe laloe sipat koeping. Tapi Khik Khoen lantaran tida kaboeroe melinjapken diri, kena difabas oleh Kwan Sing dan binasa di sitoe djoega.
Biauwpeng jang binasa tida teritoeng banjaknja Praoe-praoe jang tenggelem poen boekan sedikit.
„Sekarang itoe kawanan terkoetoek soeda pada merat, baeklah Tjiongwi Hengte tahan sadja semoea pasoekan,” kata Hoen-kang-liong:, „kerna restannja itoe raroentoek manoesia jang sisa mati tentoe tida bisa terloepoet dari kita poenja tawanan; hanja brentiken sadja doeloe ini pengedjeran.”
Lie Eng dan jang laen-laen njataken moefakat. Sigra djoega kapal-kapal itoe balik ka moeloet moeara, dalem perdjalanan poelang Lie Tjhoen naek ka kapalnja Lie Eng, dimana iaorang katemoe itoe soedara-soedara dari Liangsan.
Ini pertemoean ada menggirai gken sanget marika poenja hati.
Sahagimana biasanja orang jang soeda lama tida bertemoe, kaloe bertemoe tentoe banjak menanjaken ini itoe, demikian djoega terdjadi dengen itoe doea fihak poenja masing-masing soedara angkat.
Bagimana besar Lie Tjhoen poenja kagirangan dan taro hormat pada soedara-soedaranja jang dateng itoe, inilah tida perloe ditoetoerken lagi, sebab pembatja tentoe bisa bajangken sendiri dalem pikiran.
Hoa Hong-tjoen djoega laloe naek ka itoe kapal jang baroe dateng dan djadi amat girang satelah liat Tjhie Seng dan Houw-jag Giok, jang memang ada djadi temennja sadari ketjil dan satoe pada laen amat baek.
Tida lama kamoedian kapal-kapal itoe telah masoek ka moeloet moeara dan semoea Hohan laloe berlaboeken kapaluja, tapi diatoer begitoe roepa, soepaja bisa djaga laen penjerangan jang bakal dateng.
Kamoedian Lie Tjhoen adjak soedara-soedara itoe dateng ka astana Kimgo.
Sasampenja di roewangan besar, satoe pada laen laloe djalanken kahormatan sabagimana pantesnja, kamoedian baroe pada berdoedoek dan menanjaken ini itoe, teroetama keadahan di Tiauw-teng, jang sakean lama iaorang di sini tida dapet taoe atawa denger kabar.
„Oh, itoelah ada terlaloe pandjang,“ kata Lie Eng:„maka tida bisa ditoetoerken dengen sedikit perkatahan.“
Jang laen-laen lantas berdoedoek menoeroet tempatnja, sedeng Hoen-kang-liong lantas prenta orang bikin makanan, boeka satoe perdjamoean besar bagi kahormatan dan sekalian membri slamat dateng pada ini sakalian Hengte.