Pembalesannja Kawanan Liangsan/Bagian ka ampat/Bab 18
DENGEN BIKIN PERSARIKETAN, KHIK PING
BERONTAK KOMBALI.— DENGEN ILMOENJA,
KONG SOEN SIN BINASAKEN
RAHAJAT KATE.
Kerna esoknja ada hari jang baek, maka boeat angkat Hoen-kang-liong djādi radja di Siamlo, tida ditoenggoe lebi lama lagi.
Begitoelah hari terseboet di waktoe masi pagi soeda banjak orang berkoempoel, boeat lakoeken itoe oepatjara pernobatan. Tapi maski soeda djadi radja, atas maoenja sendiri Lie Tjhoen diseboet sadja Tjengtang Taytjiangkoen, atawa Panglima Besar boeat poekoel tempat-tempat di sebla Timoer.
Kokbo sendiri membri hormat pada itoe radja baroe, kamoedian baroe mantri-mantri dan soedara-soedaranja. Sasoeatoe kahormatan jang orang briken, dibales sabagimana pantes.
Sasoeda semoea oepatjara dan peradatan besar selesih dilakoeken, baroelah diangkat masing-masing poenja djabatan, seperti Tja Tjin djadi Sinsiang dan Pwe Swan djadi Kamtja Gisoe Marika ini poenja gelaran, jang pertama diseboet Siauw-soan- hong dan jang blakangan Thiat-bin Gong-bak.
Jang laen-laen ada seperti berikoet: Djip-hoen-liong Kong-soen Sin djadi Koksoe;
Sin-kie Koen-soe Tjoe Boe djadi Koensoe Tjamtjan Wie-ok;
Hoeg-si Mo-ong Oan Swie djadi Tjioesia Pengkau Tjindjin;
Long-tjoe Jan Tjeng djadi Siangtjoekok Tjanhwait Ingkibit;
Pok-thian-tauw Lie Eng djadi Touwkisay;
Sin soan-tjoe Tjio Keng djadi Hoetauw Kisay
Thiat-pang Loan Teng-giok djadi Tjoebitsay;
Houw Seng djadi Hoetjoe Bitsay;
Thiat-kiauw-tjoe Gak Ho djadi Tjamtitjeng merangkep Taytjiangkoen Tiangsoe;
Ong Tjin djadi Touwte Pengmasay;
Twa-to Kwan Seng djadi Tjiangkoen Touwtok;
Siang-pian Houw-jan Tjiak djadi Houwkoen Touwtok;
Peng-oet-ti Soen Liep djadi Tjokoen Touwtek;
Tin-sam-san Oei Sin djadi Joekoen Touwtok;
Bie-tjiam-kong Tjioe Thong djadi Tiongkoen Touwtok;
Boen Hwan-tjiang djadi Koktjoe Kamtjong Lihakhauw;
Seng-tjioe Soe-seng Siauw Djin djadi Tionghantjiang Lipiauwboen;
Giok-pie-tjiang Kiem Tay-kian djadi Siangtotjiang Lie-in Hoetjiat;
Sin-ie An To-tjwan djadi Thay-iewan;
Tji-tjiam-pek Hong Hoe-twan djadi Giemakam; Thiat sian-tjoe Song Tjeng djadi Kongloksi;
Oa-giam ong Wie Siauw-tjhit djadi Tjoeipeng Touwtjongkoan;
Tjoet-tong ko Tong Wie djadi Tjoeikoen Tjo- tjeng Tjongkoan;
Hoan-kang-sin Tong Beng djadi Tjoeikoen Joe- tjeng Tjongkoan;
Tjee sie liong Hoei Po djadi Honggisay merangkep djaga Kimgo;
Thay-ouw-kau Ko Tjeng djadi Honggisay merangkap djaga Kimgo;
Koan-mo-houw Lie Hoen djadi Tin-atsay merangkap djaga Tjengsoei; Sioe-liam-biong Tek Seng djadi Tin-atsarj merangkap djaga Tjengsoei;
Hoa Hong- tjoen djadi Hoema Touwwie;
Song An-peng djadi Hanlim Haksoe;
Houw-jan-Giok djadi Tjotji Hwisay;
Tjhie Seng djadi Joetji Hwisay;
Hong-thian-loei Leng Tjin djadi Hwoe Jok Kiok Tongkoan;
Sin-heng Thay-po Tee Tjong djadi Tongtjengsar dan Koanhong Hengijin;
Tjoet-lim-liong Tjo Loen djadi Kengsiakoan Tjasay;
Kim-pah-tjoe Jo Liem djadi Ngosia Pengmasoe:
Koei-liam-dji Touw Hin djadi Jamthiatsay;
Siauw-ijia-lan Bok Tjoen djadi Toentiansay;
Siauw-oet-ti Soen Sin djadi Sianglimwan Kiam- te:ok;
Boh-tay-tiorg Kouw Tay-so djadi Taykoen Hoe- djin Kiamhong Liokkwa;
It-ki-hoa Tjoa Ging djadi Kim-ie Witjiang It-eng Hengmia; Sedeng mantri-mantri lama, semoea dinaeki pangkatnja, dengen tetepken masing-masing poenja kawadjiban.
Semoea mengatoerken trima kasi, kamoedian moendoer,
Pada Tee Tjong diprenta bawa soerat salebaran boeat membri taoe pada semoea poelo-poelo jang lama telah bertaloek, atas terdjadinja itoe perobahan dimana Hoen-kang-liong ada doedoek mamerenta djadi gantinja radja.
Sedeng soldadoe semoea dikasi persen, kamoedian diboeka perdjamoean besar tanda kagirangan hati.
Pendoedoek di itoe tempat, ketjil dan besar rata-rata ada merasa girang, sebab marika memang telah denger bagimana adil pamerentahan di Kimgo, jang sekarang djadi kapala pamerenta di sini, tentoe keadahan djadi santausa.
Kagirangan itoe tida perloe ditjeritaken lebi djaoe.
Sekarang mari kita balik meliat pada Tee Tjong jang pergi bawa soerat salebaran sampe ka poelo Djinggi, dimana Tiat Lo-han djadi amat goesar satelah membatja itoe warta.
Tiat Lo-han ada pembesar di poelo terseboet. Sadari masi ada Ma Koktjoe djoega memang ia telah oendjoek kapala besar dan bebrapa taon blakangan soeda tida bajar-bajar lagi oepeti, sedeng radja Siamlo jang bertabeat lembek dan sabar, tinggal diam sadja itoe keadahan sampe sakean taon lamanja.
Pada Kiong To pembesar ini ada bikin perhoeboengan, lantaran itoe djoega maka seringkali itoe mantri besar penghianat, membri perlindoengan, hingga Kok-tjoe tida bisa berboeat satoe apa.
„Oh, baek baek bagoes koerang adjar!“ berkata Tiat Lo-han, sasoeda dapet taoe apa maksoednja itoe pembrian taoe: „ja, pada Ma Say-tin iaorang boleh berlakoe begitoe roepa, sebab radja itoe tida poenja kamampoean dan menjera sadja apa jang orang bikin padanja; tapi akoe tida nanti toeroet kahendaknja.“
Kamoedian ia prenta orang pergi oendang pembesar-pembesar di poelo Peksi dan Tiauwhi, boeat diadjak bermoefakatan.
Pembesar di poelo pertama bernam Touw Gong dan jang blakangan Ie Lauw-tian, satelah trima itoe panggilan, dengen tida berajal lagi lantas pergi ka Djinggi, dan kadatengannja ini lantas disamboet oleh Tiat-Lo han.
Sasoedanja pada berdoedoek, kadoea pembesar itoe menanja: ada oeroesan apa jang begitoe penting boeat diberdamiken.
„Boekan laen, hanja lantaran perboeatannja Lie Tjhoen djoega,“ kata Tiat Lo-han: „sabagimana kaoe berdoea tentoe taoe, Lie Tjhoen itoe ada amat djahat, jang sahabisnja memboenoe Swa Liong merampas Kimgo, kamoedian serang Siamlo boeat loewasken pegangannja. Tapi Ma Say-tjin orang jang amat tida bergoena, boekannja lawan dengen soenggoe hati aken toelak itoe bahaja, hanja lantas minta berdami dan serahken poetrinja dikasi pada moesoe."
„Perboeatannja Ma Say-tjin jang begitoe lembek, soeda membikin banjak mantri-mantri tida senang hati," begitoe Tiat Lo-han teroesken bitjaranja: blakangan Kiong To jang sakean lama memang ada niatan boeat roeboeken itoe radja, dengen bantoean Sat Tauw-to soeda bisa binasaken Ma Say-tjin; tapi menoeroet soerat salebaran jang akoe baroe trima, njatalah Kiong To dan Sat Tauw-to telah binasa, maka pamerentahan di Siamlo sekarang terdjato ka dalem tangannja Lie Tjhoen, dimana ada dikaloearken prenta, jang semoea poelo-poelo taloekan moesti inget bajar oepeti.”
„He, sadari kapantah terdjadinja itoe perobahan?” menanja itoe doea pembesar dengen heran: „di kita-orang poenja tempat belon sampe itoe pembritahan?”
„Baroe liwat bebrapa hari sadja,” saoetnja Tiat Lo-han: lantaran itoe djoega maka akoe tida ajal boeat lantas mengoendang Djiwi dateng ka mari goena berempoek, apakah kita-orang bisa merasa senang boeat berhamba padanja? Oh, kaloe menoeroet akoe poenja pikiran, kita moesti lantas geraken tentara boeat kasi labrakan pada itoe Lie Tjhoen jang sekarang telah angkat dirinja djadi Tjengtang Taygwanswe, dan kasi hadjaran djoega pada sakalian kawan-kawannja,"
„Apa jang Totiang bilang, itoelah ada satoedjoe dengen kita-orang poenja maksoed,” saoet Touw Gong: „sebab masatah kita maoe berhamba pada itoe kawanan perampas.”
Mendenger ini djawaban, Tiat Lo-han djadi amat girang, maka sigra djoega ia prenta orang sediaken makanan dan arak, sambil minoem marika bitjaraken boeat pergi menjerang.
Tenga-tenga perdjamoean, orangnja dateng membri taoe, bahoewa di loear ada dateng Khik Ping jang minta bertemoe.
Tiat Lo-han djadi amat girang dan lantas kaloear menjamboet, dengen di-ikoet djoega oleh Touw Gong dan le Lauw-tian.
„Inilah kabetoelan sekali,” kata Tiat Lo-han pada itoe doea kawan sarikat, sambil berdjalan kaloear: „datengnja Khik Ping kita-orang djadi dapet satoe tenaga boeat membantoe.”
Satelah bertemoe, satoe pada laen lantas membri hormat dan tetamoe jang dateng ini lantas disilaken masoek, dengen ditanjaken djoega maksoed kadatengannja.
Khik Ping bilang, datengnja ka mari ada boeat sampeken warta pada Tiat Lo-han, jang Kiong To telah binasa dan Siamlo soeda djato ka dalem tangannja Li Tjhoen, sedeng doea soedaranja telah binasa.
Sekarang, boeat sakalian pergi ka Djitpoen aken pindjem tentara, ia dateng ka mari boeat kasi taoe ini perkara, kerna ia doega Tial Lo-han brangkali belon dapet taoe.
„Djoestroe akoe di sini barce dapet soerat salebarannja Lie Tjhoen," saoet,Tiat Lo-han, jang lantas tjeritaken satoe persatoe, bagimana satrimanja itoe kabar, ia djadi amat goesar dan laloe oendang ini doea tetangga boeat diadjak berempoek, dan bagimana achirnja marika telah ambil poetoesa.
„Oh, itoelah baek sekali," kata Khik Ping dengen girang: „kaloe begitoe kita poenja maksoed nanti kasampean."
„Tapi, apa Djitpoen nanti soeka loeloesken permoehoenanmoe boeat kasi pindjem tentara?" tanja Tiat Lo-han dengen sangsi.
„Tentoe, itoelah troesa koeatir,"kata Khik Ping, jang lantas tjeritaken bagimana radja di itoe poelo memang soeda lama ada niatan boeat ambil Siamlo; ini sakali perginja ka itoe poelo ia maoe djandjiken: kaloe beroentoeng bisa kalaken Lie Tjhoen, Siamlo nanti dikasiken Djitpoen, sedeng ia sendiri nanti merasa senang boeat doedoeki Kimgo. Sedeng Tiat Lo-han dengen itoe doea pembesar iaorang djandjiken nanti dibri djoega hadia apa-apa dan kalonggaran, sabagi membales atas marika poenja bantoean.
Begitoelah permoefakatan soeda lantas djadi beres dengen gampang.
Kamoedian ampat pembesar itoe lantas berminoem kombali.
Tapi Tiat Lo-han jang dapet pikir perdjandjian itoe nanti mëndjadi kapiran, maka sambil minoem ia berkata:
„Soepaja kita-orang satoe pada laen bisa bersoenggoe hati aken membela, maka apa tida lebi baek kaloe sekarang kita berampat angkat soedara?”
„Itoe poen baek sekali,” djawab Khik Ping dengen girang.
Sigra djoega medja sembajang lantas disediaken dan ampat orang itoe lantas potong djeridji tangannja aken dikaloearken daranja jang ditjampoer ka dalem arak. Sasoedanja sembajang pada Allah jang marika telah djadi soedara dan satoe pada laen moesti membela dengen soenggoe hati, arak jang tertjampoer dara itoe lantas diminoem.
Esoknja Khik Ping lantas membri slamat tinggal pada itoe tiga soedara dan landjoetken perdjalanannja ka poelo Djitpoen.
Radja Djitpoen jang pertama ada bernama Tjhi Hok, jang ada mendjadi mantri dari Tjin Si Ong, dan riwajatnja itoe radja ada begini:
Kerna Tjin Si Ong kapingin salama-lamanja tinggal moeda dan tida bisa mati, soepaja salama-lamanja djoega bisa djadi Keizer di Tiongkok, pada soeatoe hari Tjin Si Ong prenta bebrapa mantrinja boeat menjebrang laoet aken tjari itoe obat, jang kaloe belon dapet tida boleh poelang.
Tjhi Hok trima itoe prenta lantas berangkat dengen mengadjak brapa riboe orang jang terdiri dari toekang-toekang, kaoem pertanian dan orang-orang jang pande mengobatin, meneken dan sabaginja, dengen membekal djoega ramsoem dan barang pakean jang dikira tjoekoep boeat brapa taon lamanja.
Dari Tiongkok Tjhi Hok itoe menjebrang laoetan besar, dengen tida kataoean ka mana jang ditoedjoe.
Di mana-mana tempat dan negri jang dipergiken, itoe obat jang ditjari tida ada, hingga kakoeatirannja djadi samingkin besar, kerna sabagimana telah dibilang, djika brani poelang sabelonnja obat itoe terdapet, dirinja boleh terhoekoem.
Dengen apa-boleh-boeat perdjalanan itoe diteroesken lebi djaoe, achirnja sampelah ka ini poelo jang belon dikoendjoengken, dimana ia laloe adjak semoea pengikoet dan orang-orangnja mendarat dan rampas ini tempat, boeat tempat semboeni.
Dengen katjerdikannja, Tjhi Hok bisa berkoeasa dan pegang pamerentahan dalem doeabelas kota. Poelo ini memang lebar dan pengasilannja poen banjak, hingga tjoekoep dipake boeat pendoedoek di sakiternja sitoe. Kerna bisa berlakoe adil dan tjinta pada rahajat, maka semoea pendoedoeknja poen soeka taloek di bawa prentanja.
Begitoelah Tjhi Hok bisa pegang pamerentahan dengen toeroen menoeroen dan orang-orangnja poen djadi beroepa satoe kabangsaän laen, maski miripnja ada mirip dengen orang-orang Tionghoa, tapi omongan dan lagoe soearanja djadi beroba.
Koetika pemerentahan ini poelo soeda toeroen pada Tjhi Hok poenja tjoetjoe atawa boejoet, keadahan negri itoe telah djadi koeat, kerna radjanja saban-saban membesarken pasoekan perang.
Bangsa-bangsa kate itoe soeka sekali menjakinken ilmoe pengatahoean, dojan membatja boekoe atawa sair dan omongan ada begitoe tjepet, sampe kadengerannja tida laen dari tjeratjas-tjeritjis sadja. Maski bermoela di waktoe Tjhi Hok doedoek mamerenta, ada kaloearken boekoe-boekoe dan siarken omongan Tionghoa boeat digoenaken, tapi sabagian besar dari itoe pendoedoek tida soeka toeroet dan maoe goenaken sadja bahasanja sendiri, sedeng tabeat soeka ngebohong dan rakoes, tida bisa linjap dari sabagimana adanja. Waktoe ini tjerita terdjadi, radjanja soeda liat keadahan poelo Siamlo dan ingin rampas kaduedoekannja Ma Kok-tjoe, tapi sabegitoe lama belon ada djalan jang baek boeat sampeken maksoednja.
Pada soatoe hari salagi radja itoe doedoek bermoesjawarat, pengawal kraton masoek membri taoe: bahoewa di loear ada dateng Khik Ping jang ingin berdjoempa.
Radja titahken masoek dan tanja apa hadjatnja. Dengen teroes terang Khik Ping lantas njataken maksoednja, bahoewa ia maoe minta pindjem soldadoe boeat poekoel Siamlo, jang sekarang didoedoeki oleh Lie Tjhoen.
Atas pertanjahannja radja, Khik Ping kasi taoe asal oesoelnja dan bagimana maka Stamlo boleh terdjato ka dalem tangannja Hoen-kang-liong, kamoedian njataken lebi djaoe bagimana itoe poelo nanti dibriken pada ini radja. sedeng ia nanti ambil sadja Kimgo, sabagimana baroe ini dibitjaraken pada Tiat Lo-han.
Radja dari ini bangsa kate djadi girang dan sigra djoega trima permoehoenannja Khik Ping, kamoedian titahken Kay Pek bawa sapoeloe riboe tentara pergi menjerang Siamlo.
Kay Pek boekan namanja itoe panglima, hanja ada nama pangkat. Tapi sebab dalem boekoe Tionghoanja tjoema diseboet Kay Pek sadja, maka di sini poen diseboet demikian djoega. Khik Ping djadi girang dan lantas oendoerken diri sambil mengoetjap trima kasi, kamoedian balik ka tempatnja bermalem.
Itoe waktoe ada moesin Tjhioe dan menioepnja angin poen ada bagoes, maka tigaratoes boei kapal-kapal perang jang moeat itoe sapoeloe riboe soldadoe, bersama Khik Ping lantas berangkat djalan pada hari jang ditetepken, dan sabelonnja sampe di Siamlo pasoekan ini mampir di poelo Djinggi.
Tiat Lo-han jang dibri kabar datengnja ini pasoekan Djitpoen, djadi amat girang dan lantas kaloear menjamboet bersama-sama Touw Gong dan le Lauw-tian, jang memang soeda menoenggoe bersama laskarnja.
Koetika soeda masoek dalem gedong, Tiat Lohan lantas prenta sediaken makanan dan minoeman boeat membri slamat dateng, sambil minoem ia- orang bitjaraken bagimana tjaranja Siamlo moesti diserang.
..................................................................
Pada soeatoe hari koetika Hoen-kang-liong lagi doedoek bermoesjawarat, satoe djoeroekabar dateng membri tape, bahoewa tiga poelo taloekan soeda bikin persariketan boeat dateng menjerang ka mari.
Lebi djaoe itoe djoeroekabar kata: sekarang toe tiga poelo poenj pasoekan soeda berkoempoel, dan tida lama tentoe aken bersiap. Lie Tjhoen gemes betoel pada itoe tiga pembesar dari poelo terseboet, maka ia tanja pada orang-orang jang hadlir, sabelonnja moesoe dateng, bagimana haroes berlakoe.
Tjoe Boe kasi pikiran, kaloe bener ada kadjadian begitoe roepa, baek sabelonnja marika bergerak dari sini dikirim angkatan perang boeat kasi labrakan, soepaja pembesar-pembesar dari itoe tiga poelo taloękan bisa mengatahoei bagimana angkernja Siamlo di bawah kakoeasahannja Tjengtang Taygwanswe.
Ini pikiran disatoedjoe, maka satoe angkatan perang besar laloe disiapken.
Tapi sabelon ini tentara berangkat, laen djoeroekabar dateng membri taoe, boekan sadja Tiat Lo-han dengen doea kawannja jang bergerak, hanja Khik Ping soeda pergi ka Djitpoen boeat pindjem soldadoe dan telah dapet sapoeloe riboe laskar perang jang dimoeatken dalem tigaratoes boea kapal perang, telah berkoempoel di poelo Djinggi, boleh djadi marika lagi bikin perempoekan lebi djaoe
Lie Tjhoen djadi terkedjoet, satelah menerima itoe warta jang blakangan, ia kata: Siamlo poenja laskar sama sekali belon ada sadjoembla lima riboe orang, bagimana bisa lawan tentara moesoe jang begitoe besar djoemblanja.
„Kaloe begitoe, bagimanatah kita moesti atoer, soepaja bisa tjega datengnja moesoe?”, kata Lie Tjhoen dengen berkoeatir.
„Perkara banjaknja moesoe poenja laskar, itoelah tida tjoekoep boeat dikoeatirken,” kata poela Tjoe Boe: „sebab banjak soldadoe kaloe pemimpinnja bodo, toch tida bergoena; sabaliknja maski laskar sedikit, tapi kaloe panglima perangnja tjerdik dan bisa atoer tipoe, tentoe jang terseboet lakangan bisa kalaken moesoenja.”
„Sekarang,” begitoe Tjoe Boe teroesken perkaiahannja: „lekaslah di fihak kita diriken pasanggrahan aer di deket pelaboean, boeat tjega mendaratnja moesoe, sedeng di ampat pendjoerue dari itoe tempat, semboeniken sadjoembla soldadoe, boeat toenggoe datengnja itoe waktoe aken kaloear melabrak moesoe.”
Bagimana akal ini moesti diatoer, Tjoe Boe terangken satoe persatoe, hingga Lie Tjhoen djadi girang dan lantas prenta Houw-jan Tjiak, Loan Ten-giok, Kwan Sing dan Lie Eng, sabagi panglima besar, sedeng Oan Swie, Jo Lim, Soen Sin dan Bok Tjoen djadi Hoetjiang, bawa doeariboe soldadoe dengen saratoes kapal perang djaga di pasanggrahan aer.
Wie Siauw-tjhit, Tong Beng, Tjioe Thong Oei Sin, Soen Liep, Houw Seng dan Tjo Loen, bawa tentara boeat baijhok di ampat pendjoeroe, prenta mana lantas dilakoeken dan masing-masing laloe pergi ka tempat djagahannja.
Kamoedian dengen mengadjak Kong soen Sin, Tjoe Boe, Jan Tjeng, Houw-jan Giok; Tjhie Seng dan Leng Tjin, jang masing-masing sabagi Tiongkoen, Lie Tjhoen berdiam di pasanggrahan darat loear tembok kota; sedeng Ong Tjin bersama Hoa Hong-tjoen mendjaga kota, sasoeda itoe semoea diatoer beres, barne diprenta orang pergi ka Kimgo dan Tjengsoei, boeat soeroe panglima jang djaga di doea poelo terseboet berhati-hati atas datengnja moesoe.
Tida lama kamoedian kaliatan di tenga laoet ada banjak kapal-kapal perangnja moesoe jang lagi mendatengi, jang masing-masing kapal ada dibikin beroepa pasanggrahan aer dan brenti kira-kira lima li djaoenja dari Siamlo poenja wates.
Sebab soeda dipesen, maka dari fihak Siamlo tida ada jang kaloear menjerang, hanja djaga sadja masing-masing poenja tempat. Prenta mana ditoeroet dengen betoel.
Lima hari telah berlaloe, tapi di laoet tida ada pertempoeran apa-apa.
Moesoe djoega roepanja tinggal diam sadja, kerna tida ada gerak-gerakannja boeat madjoe atawa menjerang.
Tapi pada malemnja dari hari terseboet, sakira ampir pagi, anak-anak kapal pada riboet sebab dasarnja kapal djadi belobang dan botjor. Boekan satoe atawa doea, hanja semoea kapal pada masoek aer.
Kwan Seng jang liat begitoe, lantas prenta soldadoe tambel itoe lobang-lobang jang botjor, sembari menambel kapal-kapal dipinggirken ka darat. Lie Tjhoen djoega merasa heran, bagimana boleh djadi begitoe roepa, sedeng lebi doeloe soeda dipreksa jang kapal-kapal itoe tida ada jang roesak.
Kwan Seng laloe diriken poela satoe pasanggrahan laen goena tentaranja. Djadi letaknja berdeketan pada laen pasanggrahan. Sampe di itoe waktoe poen belon ada gerakan apa-apa, baek dari fihak moesoe atawa Siamlo.
Semoea panglima bikin pendjagahan lebi hati-hati, sekali-kali marika tida doega, kaloe itoe kapal jang botjor ada perboeatannja laskar kate, jang di dalem itoe sapoeloe riboe orang, ada brapa ratoes tentara toekang silem jang dibri nama „setan itam,” bisa menjilem di aer jang paling dalem sampe bebrapa hari lamanja. (Kenapa diseboet „setan itam” boekannja „setan aer”?, boekantah ini nama jang blakangan ada lebi soeroep?? (Letterzetter).
Atas prentanja Kay Pek, itoe kawanan setan itam pada toeroen ka dalem aer sambil membawa bor, pahat dan sabaginja goena lobangin praoenja moesoe, sabagimana soeda kadjadian.
Kay Pek satelah liat Kwan Seng soeda mondoer, laloe madjoeken pasoekannja ka sebla Lor dan naek ka darat aken menjerang kota. Lie Tjhoen jang denger ini kabar laloe balikin tentaranja aken menoeloeng.
Sabelonnja Lie Tjhoen dan sadereknja sampe, Ong Tjin prenta lepasken pana, batoe dan kapoer boeat menimpoek. Kay Pek poenja barisan jang diserang begitoe roepa, lantas boeka lajar koelit kerbo boeat mendjaga, sembari moendoer pelahan-pelahan.
Tida lama Hoen-kang-liong telah sampe dan masoek ka dalem, dimana Ong Tjin laloe tjeritaken bagimana barisan kate baroe dimoendoerken, tapi boleh djadi nanti menjerang kombali.
Itoe malem orang lantas berdami, soepaja esok bisa dibikin satoe pertempoeran di darat, kamoedian kasi kabar pada moesoe, soepaja marika kaloear maloemken perang.
Kay Pek trima itoe tantangan dan lantas atoer barisannja, sedeng pada Khik Ping diprenta poekoel pintoe kota Timoer, di waktoe ia maloemken perang.
Begitoelah pada esok paginja, dengen toenggang gadja poeti Kay Pek kaloear membawa toeja, dimana Houw-jan Tjiak dengen pegang sapasang pian soeda bernanti datengaja moesoe. Dengen zonder tanja menanja lagi doea fihak laloe serang menjerang. Kay Pek itoe ada teramat gaga, kerna baroe sadja bebrapa djoeroes ia soeda bisa mendesak hingga lawannja djadi samingkin moendoer. Tapi berbareng itoe, Lie Tjhoen dikasi taoe oleh djoeroekabar, jang Khik Ping lagi poekoel pintoe kota Timoer.
Lie Tjhoen djadi kaget dan boeroe-boeroe pergi ka itoe tempat aken menoeloeng.
Di ini pintoe sabenernja Houw-jan Giok dan Tjhie Seng poenja djagahan, tapi berhoeboeng dengen itoe pertempoeran jang dimaloemken oleh ajahnja, kadoea anak moeda ini pergi mengikoet, djadi pintoe itoe tinggal kosong dan enak sadja Khik Ping dengen tentaranja poekoel petja.
Sigra djoega tentara kate jang dipimpin olehnja soeda masoek, hingga Tjoa Ging berdoea Jan Tjeng jang denger itoe kabar, djadi kaget dan boeroe-boeroe pergi menoeloengi. Djoestroe ia sampe waktoe Khik Ping barge masoek.
Tjoa Ging lantas menahan madjoenja moesoe, tapi Khik Ping ada terlaloe gaga dan baroe sadja bertempoer brapa djoeroes, balatentaranja telah dioendoerken dan Tjoa Ging berdoea Jan Tjeng terpaksa lariken koedanja.
Beroentoeng katemoe Hoa Hong-tjoen ja gdjoestroe lagi maoe dateng menoeloengi, maka Khik Ping poenja perdjalanan telah kapegat dan kadoeanja itoe lantas berantam sengit. Tapi sabe sabelonnja ada jang kala atawa menang, Houw-jan Giok dan Tjhie Seng jang dibri taoe itoe kadjadian oleh orangnja, lantas dateng dan satelah liat Hoema lagi bertempoer, kadoea orang moeda itoe laloe madjoeken koedanja aken membantoe.
Khik Ping dikeroeboeti tiga, sedeng Jan Tjeng jang liat begitoe, diam-diam lantas lepasken satoe anak pana, hingga panglima moesoe jang gaga ini djadi salojongan dan ampir djato dari atas koeda.
Hoa Hong-tjoen tida kasi liwat itoe waktoe jang baek. Sigra djoega ia angkat keknja dan sodok tenggorokannja itoe moesoe jang lagi limbang-limboeng, hingga Khik Ping tida kaboeroe tangkis dan lantas djato mati.
Laskar Siamlo laloe madjoe dan koetoengken kapalanja Khik Ping, soldadoenja jang meliat kapala perangnja soeda binasa, lantas lari saraboetan dan sabagian telah dibasmi oleh tentaranja Jan Tjeng dan Tjoa Ging jang memang soeda pegat djalannja.
Waktoe Lie Tjhoen sampe di sitoe, paperangan soeda brenti dan satelah liat Khik Ping telah binasa, baroelah hatinja moelai senangan.
Sigra djoega marika bikin pendjagahan jang tegoe di itoe pintoe, sambil mengelah napas Lie Tjhoen berkata:
„Kendati Khik Ping soeda mati, tapi Kay Pek belon djoega moendoer, bagimana sekarang kita mesti berlakoe?” „Kay Pek itoe ada bangsa jang bandel sekali,” kata Tjoe Boe: „maka kaloe tida diserang dengen kakerasan, pasti ia tida nanti moendoer. Sekarang baeklah prenta orang tjegat perdjalanandjalanannja, sedeng dari depan kita hantem dengen sengit. Djika ini sakali ia dapet kakalahan dan lari ka itoe djalanan, tentoe bisa dipegat aken dibinasaken.”
Semoea orang njataken moefakat dengen pikirannja Tjoe Boe, maka Lie Tjhoen laloe kaloearken prenta soepaja Kwan Seng pergi menjerang moesoe poenja pasanggrahan aer, tapi Kwan Seng kasi voorstel, moesoe poenja pasanggrahan jang tegoe ada lebi baek kaloe diserang dengen api, dan orang jang bisa lakoeken itoe penjerangan jalah Leng Tjin.
Atas ini voorstel, Leng Tjin laloe dipanggil dari tempat djagahannja, jang satelah sampe, Lie Tjhoem laloe kasi taoe satoe persatoe niatnja.
Begitoelah sasoedanja berempoek, Leng Tjin tetepken jang sabentar malem ia nanti moelai menjerang bersama bebrapa pang lima pembantoe.
Laen-laen pintoe kota poenja pendjagahan poen diatoer lebi tegoe, soepaja tida kena dibokong oleh moesoe sabagimana telah diperboeat oleh Khik Ping.
Tatkala itoe di fihaknja Tiat Lo-han poen lagi sedeng membitjaraken perkara perang dan tentang kamatiannja Khik Ping.
„Sadari dateng sampe ini hari. belon didapetken hasil soeatoe apa,” kata Tiat Lo-han: „malah kamatiannja Khik Ping ada mendjadi satoe karoegian di fihak kita. Djika sateroesnja kita mendjaga sadja di laoetan, sampe kapan ini maksoed bisa terkaboel?”
„Benerlah.” saoet Touw Gong: „kita-orang tida boleh maen ajal-ajalan begini, sebab itoe djadi roegi ongkos pertjoema. Apa tida baek kaloe besok kita madjoeken ini semoea kapal-kapal dan menjerang dengen sengit, soepaja menang atawa kala biar ada katentoeannja?”
Tiat Lo-han njataken moefakat, maka ia lantas kasi taoe pada semoea laskarnja soepaja bikin persediahan,
Sahabisnja kaloearken prenta, ia bertiga laloe doedoek minoem sambil beromong-omong lebi djaoe
„Biarlah ini malem kita-orang bersoeka-soeka hati,” kata Tiat Lo-han: „soepaja besok kita boleh adjoe lebi goembira.”
Begitoelah iaorang pada makan minoem dengen. sagala soeka hati, sambil njataken djoega doegahannja, bahoewa di fihaknja maski soeda kailangan Khik Ping, toch ada tjoekoep boeat membikin orang-orang di Siamlo djadi kaget atas kabraninja marika poenja kawan. Sekarang marika tentoe lagi pikirken tjara bagimana moesti diatoer pendjagahan.
Sampe malem baroe perdjamoean itoe brenti, dengen kapala berat masing-masing laloe masoek ka kamar sendiri.
Itoe waktoe hari soeda djaoe malem.
Baroe sadja itoe tiga pembesar jang bersarikat moelai poeles, koenjoeng-koenjoeng terdenger soeara meriam dan orang bertreak-treak, anak praoe poen berlari kalangkaboet sambil membangoenken laskar-laskar jang soeda tidoer.
Tiat Lo-han berdoea Touw Gong djadi kaget dan lantas tersedar, dengen goegoep marika kaloear dan dapet liat di sakiternja kapal ada banjak kapal-kapal moesoe jang melepasken oempan api.
„Tjilakalah kita-orang ini sakali!" treak doea pembesar itoe dengen bingoeng dan lantas prenta djoeroemoedi djalanken kapal itoe ka tempat kosong. Lauw Ie-tian jang djoega soeda bangoen lantaran kaget dan satelah liat kawannja melariken diri, djadi amat takoet dan lantas lari dengen kapal jang ditoempangken.
Kwan Seng dengen bebrapa panglima kawannja lantas menjerang teroes, tida lama kapal-kapalnja moesoe telah djadi oempannja api dan ada djoega jang tida kabakar, tapi lantas dirampas. Laskar dari itoe tiga poelo jang binasa boekan sedikit djoemblanja, tapi itoe tiga pembesar jang berontak roepanja tida kataoean. Kay Pek jang denger kawannja diserang, lantas prenta laskarnja bersedia boeat menangkis. Tapi sampe hari mendjadi pagi, moesoe jang soeda menjerang kawannja, tida dateng ka tempatnja, maka hatinja djadi sedikit legah.
Kwan Seng dengen kawan-kawannja lantas balik ka kota dengen bawa banjak kapal-kapal rampasan, alat sendjata dan sabaginja, hingga Taygwanswe Lie Tjhoen jang liat djadi soeka hati.
„Ini kamenangan tjoekoep membikin moesoe poenja njali djadi tjopot,” kata Hoen-kang-liong: „maka Kay Pek jang denger ini kabar, tentoe tida brani dateng lagi menjerang diam-diam.”
„Oh, itoe bangsa ada teramat bandel,” kata Tjoe Boe: „maski bener kawannja soeda dioebrak-abrik, toch sampe sekarang ia boleh tarik pasoekannja, hanja masi menoenggoe sadja tempo jang baek.”
„Ja, itoe kawanan bangsa kate ada bandel sekali,” kata poela Lie Tjhoen: „dengen apa kita moesti moendoerken padanja, kerna ia itoe ada lebi teliti dan berhati-hati dari kawan persarikatannja, jang tida bisa kena dibokong?”
Satoe pada laen lantas njataken pendapetannja, ada jang kata baek diserang dengen berterang, tapi laen orang bilang baek diserang kombali dengen api, sedeng sabagian lagi rasa ada lebi baek kaloe dikoeroeng, jang tentoe bisa katangkep idoep. Dalem itoe permoefakatan belon bisa diambil satoe poetoesan jang pasti. Sebab boeat koeroeng Kay Pek jang mempoenjai laskar lebi banjak dari tentara Siamlo, itoelah boekannja gampang. Kaloe maoe pegat djalanannja, moesti diatoer satoe tipoe, dan tipoe inilah jang lagi dibitjaraken.
Tapi satoe orang jang dapet taoe keadahannja itoe bangsa, lantas membri taoe: bahoewa orang dari Djitpoen salamanja takoet pada moesin dingin, terlebi poela kaloe toeroen saldjoe, lantas sadja marika djadi males.
„Kaloe begitoe, apa tida baek minta Koksoe kaloearken sedikit kasaktian boeat toeroenken saldjoe ?” kata orang-orang jang hadlir sambil memandang pada Kong-soen Sin: „kapan maoe tentoe bisa ditoeroenken?”
„Bener sekali,” kata Lie Tjhoen, jang kamoedian lantas tanja, apa Kong-soen Sin boleh kaloearken itoe ilmoe.
„Boleh sekali,” saoet Kong-soen Sin: „tjoema ilmoe itoe boekannja permaenan jang dikaloearken zonder ada kapentingannja. Satoe kali saldjoe ditoeroenken, hawa dingin nanti meresep sampe ka toelang-toelang dan dara poen boleh mendjadi bekoeh, dan boleh djadi djoega djiwanja bangsa itoe aken binasa. Djika tida terlaloe perloe, baek goenaken sadja laen tipoe, soepaja tida berdosa.”
„Inilah ada perloe sekali,” saoet Lie Tjhoen dan jang laen-laen: „kerna sabagimana Koksoe soeda liat, jang Kay Pek ada terlaloe bandel dan sampe begitoe djaoe masi belon maoe menjingkir dari kita poenja tempat. Laskarnja ada begitoe besar dan satoe kali ia dapet petjaken ini kota, djiwanja pendoedoek Siamlo ada terantjem bahaja kamatian. Dengen mengaloearken itoe ilmoe, tida bedah sabagi toeloengi djiwanja rahajat, maka perboeatan itoe apa boleh termasoek itoengan berdosa?”
Kong-soen Sin tida brani membanta, kerna sasoenggoenja ada penting ia kaloearken itoe ilmoe.
Sasampenja di tempat sendiri, malemnja ia lantas batja djampe dan bakar tiga lembar djimat isim, kamoedian semboer ampat pendjoeroe dengen aer sambil boelang-balingken pedangnja, Sasoeda kaloearken itoe ilmoe, ia lantas simpen kombali barang-barang jang baroesan dipake dan laloe masoek tidoer.
Itoe malem djoega tjoewatja djadi gelap seperti maoe toeroen oedjan besar. Angin Barat poen ada menioep keras sekali.
Samingkin lama angin jang sedjoek djadi samingkin dirasaken betoel-betoel, hingga orang-orangnja Kay Pek jang merasaken itoe djadi meroengkoet. Kamoedian dari oedara kaliatan toeroen saldjoe jang seperti tepoeng dan menoetoepi semoea dedaonan, itoe waktoe rasa dingin djadi samingkin menjerep ka toelang.
Hawa begitoe bisa membikin dara poen djadi bekoeh.
Maski hawa itoe ada amat dingin, tapi oleh rahajat Siamlo tjoema dirasaken sabagian sadja, kerna waktoe membatja djampenja Kong-soen Sin telah seboet dan minta biar kadinginan itoe dirasaken sadja oleh rahajatnja Kay Pek.
Esoknja pagi saldjoe itoe soeda terletak di sana sini dan antero tempat soeda kaliatan poeti seperti perak.
Pendoedoek negri jang belon pernah alamken ini kadjadian, djadi amat heran.
Baroe sadja satoe hari, itoe rahajat kate soeda djadi kadinginan satenga mati. Satoe pada laen tida inget laen dari pada bikin api boeat angeti. Ada djoega jang tida bisa dapetken hawa anget dan lantas mati tida lama kamoedian.
„Oh, Allah, mengapatah dengen mendadak hawa boemi boleh beroba begini roepa ?” mengeloe Kay Pek dengen soeara sedi: „kaloe begitoe, njatalah ini semoea ada kahendaknja Allah, jang tida berkahken boeat kita poenja radja dapetken ini poelo Siamlo, maka mendadak hawa djadi tertoekar begini roepa.”
Besoknja aer laoet tempat dimana kapal-kapalnja ada berlaboe dan bikin pendjagahan, soeda beroba djadi bekoeh. Sampe itoe waktoe baroe Kay Pek merasa menjesel, kenapa kamaren sabelonnja terdjadi begini roepa, ia tida ada ingetan boeat soeroe kapalnja moendoer atawa berangkat poelang.
„Sekarang soeda tida bisa," kata ia sambil menggetget lantaran kadinginan: „oh, kabinasaän pada kita-orang! Ah, ini semoea ada salanja kita poenja radja, jang dengerken sadja bitjaranja Khik Ping dengen tida pikir lebi djaoe.“
Itoe, waktoe sabagian laskarnja soeda banjak jang mati. Dengen paksakan diri Kay Pek pergi bikin papreksahan ka laen-laen kapal, dimana sampe ia dapetken rahajat kate lagi meringkoek, djika boekan soeda djadi mait, sedikitnja soeda ampir seperti bangke idoep jang menoenggoe adjalnja.
Hatinja ini panglima Djitpoen djadi amat koeatir, pada waktoe menginget: bagimanatah nanti djadinja, kalo moesoe poenja laskar dateng ka mari dan menjerang rahajatnja jang ada dalem keadahan begini roepa. Siapatah bisa menangkis serangannja orang Siamlo.
Kay Pek tetep mendoega, jang sekarang di ini tempat ada moesin saldjoe. Bagi orang-orang di ini poelo jang biasa dengen keadahan begini, tentoe bisa tahan dinginnja. Samingkin inget ini perkara, hatinja djadi tamba koeatir. Baroe sadja abis berpikir, betoel sadja kaliatan bebrapa panglima dengen sadjoembla tentara moesoe lagi djalan mendatengi di atas saldjoe. Marika itoe semoea ada dikasi pake hoe Kong-soen Sin, maka iaorang tida rasaken soeatoe apa.
Soepaja tida djadi moesoe poenja orang tawanan, Kay Pek laloe tjaboet goloknja dan gorok leher sendiri, hingga binasa di sitoe djoega. Tida lama datenglah Tong Wie dan Tong Beng dengen laen-laen panglima jang diprenta oleh Lie Tjhoen, telah sampe di toe tempat dan lantas naek di kapalnja moesoe.
Itoe rahajat kate soeda tida oesah diboenoe lagi, aken mati sendirinja, Satoe persatoe dilemparken ka aer bekoeh dan lantas mati tida lama kamoedian.
Sorenja dari itoe hari, bekoeh itoe djadi loemer kombali dan kapal-kapalnja Kay Pek lantas dibawa ka pinggir pelaboean Siamlo, sedeng Tong Wie dan Tong Beng laloe mengadep pada Taygwanswe aken membri lapoeran, jang pasoekan angkatan perang rahajat kate telah moesna anteronja.
———