Pembalesannja Kawanan Liangsan/Bagian ka ampat/Bab 19
DENGEN KEANGKERANNJA LIE TJHOEN
BIKIN TALOEK KOMBALI SEMOEA
POELO-POELO TALOEKAN.
Tentang binasanja itoe angkatan perang dari bangsa kate, lantas dapet dikatahoei oleh radjanja tida lama kamoedian. Bagimana doeka hatinja itoe radja jang temaha, inilah tida perloe diterangken lagi, sebab boekan sadja hasil jang diharep itoe tida dapet, hanja djadi roegi oewang, ilang kapal-kapal dan rahajat djoega.
Meliat kagagahannja Lie Tjhoen, maka radja Djitpoen poenja mantri mantri semoea kasi pikiran, baek itoe perkara dibikin abis sadja, soepaja Djitpoen dan Siamlo tida terbit paperangan teroes meneroes.
Ini pikiran ditrima baek, maka djoega itoe perkara dibikin abis sampe di sitoe sadja.
Samantara itoe Tjoe Boe dan laen-laen djoeroe pemikir, membri advies pada Lie Tjhoen boeat lantas geraken tentara aken kasi labrakan pada itoe tiga poelo poenja pembesar, jang baroe ini telah berontak dan bikin persariketan pada Khik Ping.
Ja, itoe Tiat Lo-han memang moesti dikasi hadjaran, sebab lantaran dia djoega, maka terbit ini paperangan jang ampir sadja menjilakai kadoedoekannja Siamlo," kata Lie Tjhoen: „tapi boeat sekarang djangan doeloe, kerna boekan sadja semoea soldadoe jang baroe abis digoenaken tenaganja, masi tjape; hanja semoea Tjiongtjiang poen belon mengaso boeat ilangken tjape lelahnja.„
„Ini ada waktoe jang baek sekali," kata Tjoe Boe: „kerna kita poenja tentara lagi sedeng goembira, sedeng moesoe ada dalem kalemahan. Waktoe jang begini soenggoe djarang bisa didapetken kombali."
Laen-laen mantri jang ada satoedjoe. dengen adviesnja itoe djoeroe pemikir, lantas toendjang voorstelnja Tjoe Boe dan benerken apa jang dibilang baroesan. Kerna semoea poenja advies ada satoe roepa, Hoen-kang-liong djadi menoeroet dan lantas kaloearken sariboe tentara jang dimoeat dalem doeapoeloe kapal perang. Pasoekan ini dipimpin oleh Loan Teng-giok, Houw Seng dan Tong Wie boeat pergi poekoel poelo Djinggi.
Tiga panglima itoe trima prenta, lantas berlaloe.
Kamoedian dikaloearken poela satoe pasoekan jang terdiri sabegitoe djoega besarnja dan dipimpin oleh Kwan Seng, Jo Liem dan Tong Beng, pergi poekoel poelo Peksik. Boeat serang poelo Tiauwhi diserahken pada Tjioe Thong, Oei Sin dan Bok Tjoen, djoega dengen pasoekan jang sabegitoe besarnja.
Tiga pasoekan itoe lantas berangkat, menoeroet masing-masing poenja toedjoean.
Sabelon pasoekan ini sampe, mari kita meliat pada Tiat Lo-han, jang soeda abis-abisan dan lari poelang ka tempatnja sendiri.
Koetika sampe, orang-orangnja lantas sambuet dan dengen doeka ia tjeritaken satoe persatoe tentang itoe paperangan, bagimana pasoekannja sama sekali telah djadi moesna, djiwanja djoega tentoe binasa, kaloe tida kaboeroe lari.
Boeat geraken poela tentara aken bikin pembalesan, itoelah soeda tida ada harepan, kerna laskar jang sekarang masi ada, semoea soldadoe toea dan koerang bergoena, sedeng jang moeda-moeda dan gaga, semoea telah djadi korban di laoetan Siamlo.
Tiat Lo-han taoe djoega, bahoewa tida lama Lie Tjoen poenja angkatan perang tentoe nanti dateng menjerang. Oh, tentoe binasalah dirinja, sebab siapatah bisa menangkis datengnja itoe moesoe jang gaga.
Itoe waktoe pikirannja djadi bingoeng dan tida taoe bagimana moesti lindoengken ini poelo jang bagoes dan soeboer. Ini poelo Djinggi sasoenggoenja ada satoe poelo jang mengaloearken hasil besar, kerna salaen terdapet roepa-roepa polowidjo, djoega di sitoe ada terdapet tana lempoeng boeat membikin besi, jang kaloe djadi sendjata ada amat oelet dan koeat sekali.
Kerna bagoesnja ini temat, maka pikirannja boeat tinggalken sadja Djinggi aken boeron ka laen poelo, djadi oeroeng.
Sasoeda berdami pada orang-orang sabawahannja, ia lantas kaloearken prenta boeat tegoeken sadja pendjagahan, sebab lagi sedikit hari angkatan perang dari Siamlo tentoe aken dateng. Kamoedian kaloearken prenta boeat tjari rahajat negri jang soeka masoek djadi soldadoe, aken tambain soldadoe jang tinggal tida sabrapa banjak.
Tapi maski disertaken boedjoekan manis. toch pendoedoek si sitoe tida soeka djadi soldadoe boeat belaken kadoedoekannja itoe pembesar, jang terkenal kedjem dan tida adil. Maka dalem brapa hari itoe, soldadoe baroe jang didapet tjoema sedikit djoemblanja.
Djoestroe itoe waktoe Tiat Lo-han baroe lengkepin angkatan perangnja jang roesak, mendadak pasoekannja Loan Teng-giok telah sampe dan lantas tjari satoe tempat boeat brenti.
Kerna Loan Teng-giok tida kenal selak-seloeknja djalanan di ini poelo, maka ia tida brani lantas menjerang ka dalem, sabelon ditjari taoe keadahannja tempat-tempat jang mana berbahaja atawa tida. Pasoekannja itoe brenti djoestroe deket Kobakan Beratjoen jang aernja ada mengandoeng toebah. Soldadoe-soldadoe jang tida taoe bagimana berbahajanja itoe aer dan lantaran liat aer itoe amat bening, lantas sadja sendok bocat masak dan minoem.
Itoe sore sambil minoem arak Loan Teng- giok berdami pada doea Tjoetjiang kawannja boeatmenjerang ini poelo, sedeng soldadoe-soldadoe sabagian lagi makan.
Koenjoeng-koenjoeng orang jang dahar doeloean itoe, rasaken peroetnja djadi sakit, sedeng orang jang telah minoem itoe aer, sakitnja ada lebi berat lagi.
Loan Teng-giok heran betoel mendenger ini kabar; waktoe ditanja apa lantarannja tentara itoe poenja sakit, orang jang melapoer membri taoe sabagimana adanja.
,,Sabelonnja makan nasi, semoeanja ada baek dan seger boeger," kata orang itoe lebi djaoe: ,,tjoema orang-orang jang telah dahar sadja, jang dapet itoe penjakit; semoea rasaken penjakitnja satoe roepa, jaitoe di peroet,"
,,Kaloe begitoe, pastilah iaorang soeda kasalahan makan aer jang beratjoen," kata Loan Teng-giok, jang lantas titahken tahan itoe makanan dan djangan dibagiken doeloe, sabelon dipreksa lebi djaoe. Kanoedian ini tiga panglima lantas bikin papreksahan dalem itoe makanan. Nasi dan sajoer-sajoernja, semoea ada seperti biasa. Sedeng itoe aer jang terpake poen kaliatannja bening sekali.
„Apa boleh. djadi ini aer jang djerni ada mengandoeng ratjoen?’” kata Tong We: „tapi kaloe boekan begitoe, dari manatah djoega datengnja ratjoen itoe ?”
Kamoedian ia prenta orang pergi tari saorang toea pendoedoek di ini poelo. Tida lama kamoedian orang jang ditjari itoe dapet, maka Loan Teng-giok lantas tanja: apa di sini aer beratjoen.
„Harep kaoe soeka tjerita biar terang," kata Tong Wie jang berdiri di sampingnja Loan Teng giok: „bagimana bahajanja itoe aer?”
Itoe orang lantas menjaoet: bahoewa benerlah di ini poelo ada terdapet satoe kobakan jang aernja mengandoeng dzat besi dan beratjoen, hingga manoesia atawa binatang jang kena makan itoe aer, pasti aken binasa.
Roepanja itoe aer ada sama sadja seperti aer-aer jang biasa, malah lebi bening dan sedjoek, Kaloe aer itoe dipake boeat masak makanan atawa nasi, tatjoenja tida nanti djadi koerang.
Boleh djadi itoe soldadoe-soldadoe jang baroe dateng telah kasalahan soeda ambil aer dari sitoe boeat masak nasi. Oleh kerna aer itoe ada amat berbahaja, maka Tiat Lo-han soeda goenaken boeat menghoekoem pada pendoedaek ini poelo jang persala. Siapa-siapa jang melanggar prentanja boekan dihoekoem atawa dipendjara, sabagimana biasa digeenaken. sabagi hoekoeman oleh laen-laen negri; hanja Tiat Lo-han kasi orang jang bergala itoe minoem aer terseboet.
Lantaran perboeatannja jang begitoe kedjem, maka pendoedoek poelo Djinggi tida ada jang brani fawan kahendaknja itoe pembesar, maski pelatoeran adil atawa tida adil.
Begitoelah adanja aer bertoeba dari kobakan terseboet.
„Kaoe tentoe taoe djoega obatnja itoe aer beratjoen, boekan?” tanja Loan Teng-giok dengen berkoeatir.
„Obatuja itoe, tida saorang jang taoe,“ saoet itoe pendoedoek: „inilah ada dengen sabenernja.“
Kerna tida bisa didapetken laen-laen katerangan jang penting, salaennja bener jang itoe balatentara soeda makan aer bertoeba dari masakan, maka ini pembesar lantas kasi sedikit persen, kamoedian ia berdami pada Tong Wie, carci baeknja moesti diatoer sekarang.
„Kaloe moesoe dapet taoce jang kita poenja soldadoe soeda kasalahan minoem itoe aer jang meniwasken djiwa,“ kata Tong Wie: „pastilah sabelonnja kita bisa geraken tentara poekoel masoek, Tiat Lo-han nanti dateng menjerang. Maka meroeroet pikrankoe, ini perkara baek lantas wartaken ka Siamlo dan minta An To-tjwan Sian-seng poenja pertoeloengan, jang tentoe ia bisa kasi obat, sedeng ini katjilakahan. kita djangan oewarken.”
Loan Teng-giok toeroet itoe pikiran, maka sigra djoega ia prenta sala satoe orangnja balik ka Siamlo membawa itoe kabar.
Tapi Tong Wie rasa ada lebi baek, kaloe ia sendiri jang pergi, boeat sakalian ambil tentara boeat pembantoe jang sakit, Loan Teng-giok pikir betoel djoega, maka orang jang pertama oeroeng berangkat dan diganti oleh ini panglima.
Sasoeda membri pesenan pada Teng-giok dan Houw Seng, Tong Wie lantas berlaloe.
Maleninja dari itoe hari, salagi orang kesel memikiri, koenjoeng-koenjoeng kadengeran soeara tamboer perang jang diboenjiken rioe sekali. Loan Teng-giok dan Houw Seng laloe atoer tentaranja jang masi baek boeat mendjaga, sedeng jang sakit sasoeda dikoempoelken bebrapa kapal, lantas dimoendoerken lebi doeloe.
Tiat Lo-han roepanja soeda denger ini katjilakahan jang terdjadi pada tentara moesoe. Sebab kira antero pasoekan. bersama sakalian panglimanja soeda diserang penjakit beratjoen, maka dengen amat girang dan brani, ia lantas madjoeken satoe pasoekan jang terdiri dari laskar-laskar reslan. Pada itoe laskar-laskar ia goembiraken hatinja dengen bilang: bahoewa pasoekan Siamlo semoea soeda seperti bangke sadja.
Lantaran kira bitjaranja ia poenja pembesar ada bener, maka itoe tentara petjoendang poen djadi brani.
Begitoelah waktoe kapal-kapalnja sampe, iaorang lantas menjerang dengen sengit. Tapi Loan Teng-giok dan Houw Seng, maski sabagian soldadoe masi segar dan koeat melawan, toch datengnja itoe moesoe ia tjoema menangkis sadja. Sembari menangkis sambil moendoer ka blakang.
Sedeng tentaranja poen soeda koerang goembira, tambahan iaorang rame-rame belon bersantap, maka dalem ini paperangan fihak siamlo dapet kakalahkan.
Tiat Lo-han jang itoe waktoe baroe dapet taoe, bahoewa pasoekan moesoe boekan semoeanja dapet penjakit moeles, tambahan pembesamja masi bisa melawan, soeda merasa poewas kaloe bisa moendoerken moesoenja itce. Kamoedian dengin kamenangan iaorang balik ka tempat sendiri sambil bersoerak-soerak.
Loan Teng-giok barsama Houw Seng Soeda moendoer sampe di loear wates.
Besoknja di waktoe lohor Tong Wie soeda kombali dengen bawa timaratoes soldadoe pembantoe. Sasoeda rangkep soldadoenja, ia lantas kasi taoe: bahoewa menoeroet katanja An To-tjwan, tatjoen itoe bisa dipoenaken dengen obat Kamtjouw, jang sekarang ia ada bawa kira-kira satoe pikoel. Obat ini sasoeda dimasak moesti lantas dibagi-bagi pada soldadoe jang masi sakit percet, begitoe moenta, penjakitnja lantas djadi baek.
Loan Teng-giok djadi amat girang, maka itoe Soldadoe-soldadoe jang baroe dateng lanias masak obat terseboet dan kamoedian bawaken pada kawan-kawannja jang sakit dan dikasi minoem sabagi thee saorang samangkok, jang betoel sadja. pada sahabisnja minoem marika itoe pada moenta oeger.
Doea-tiga soldadee jang soeda ada omoer dan koerang koeat, lantaran telah menanggoeng sakit dari kamaren dan badannja poen telah lemas, tida dapet ditoeloeng lagi djiwanja, sedeng jan laen semoea waras kombali.
Tong Wie laloe tanjaken bagimana soeda terdjadi, waktoe ia balik ka Siamto.
Loan Teng-giok dan Houw Seng taloe tjeritaken satoe persatoe, bagimana bener sadja Tiat Lo-han telah dapet taoe tentang katjilakahan atas balatentaranja, maka malem-malem pembesar itoe dateng menjerang. Baek djoega lebi doeloe soeda diatoer pendjagahan, hingga tida dapet karoesakan begitoe besar, sabagimana jang moesoenja hatep. „Sekarang baeklah kita bikin pembalesan aken menjerang padanja,’ kata Tong Wie, sasoeda dengerkawannja kata begitoe: „maka itoe soldadoe- soldadoe jang baroe baek biarken iaorang tinggal di dalem kapal; sedeng itoe jang sahagian dan bersama ini soldadoe jang baroe, soeda tjoekoep boeat kita-orang bikin penjerangan.”
Sigra djoega pasoekan-pasoekan itoe diatoer, Kamoedian iaorang berangkat poela ka poelo terseboet.
Koetika itoe Tiat Lo-han boekan sadja soeda atoer barisannja boeat menjamboet datengnja moesoe, hanja telah bikin djoega lobang-lobang pikatan. Satelah djoeroe kabarnja dateng membri warta jang kapal-kapalnja moesoe lagi mendatengi, ini pembesar poelo Djinggi lantas siapken tentaranja aken menoenggoe.
Moesoe itoe telah berhadepan satoe pada laen.
Sasoedanja saliig memaki, Tiat Lo-han laloe angkat sendjatanja aken menjerang pada Loan Teng-giok, jang lantas. didjaga dan bales menikem. Kadoeanja itoe bertempoer sengit dari atas praoe sampe ka darat, satelah liat moesoenja soeda berada di tepi rawa, Tiat Lo-han lantas lari ka satoe djoeroesan.
Loan Teng-giok lantas mengedier.
Tapi baroe sadja bebrapa raioes langka ini panglima terdjeblos ka satoe lobang jang memang telah disediaken: hingga kawanan Banpeng laloe dateng memboeroe boeat menangkep, ada jang bawa tjagak, gaetan dan roepa-roepa sendjata. Tapi Loan Teng-giok dengen gaga laloe tjaboet goloknja dan menabas kalangkaboet, hingga laskar itoe tida brani mendeketi.
Tiat Lo-han lantas balik mendatengi, tapi orang jang terdjeblos itoe soeda berlontjat naek dan menjerang kombali.
Kadoeanja itoe laloe serang menjerang poela. Tapi baroe doea-tiga djoeroes Tong Wie bersama Houw Seng telah sampe dan lantas keroeboeti itoe Tiat Lo-han, jang lantaran tida tahan lantas melariken dirt, sedeng laskarnja laloe dibasmi dengen sapoewas hati.
Satoe soldadoe jang lagi maoe ditabas lantas berloetoet sambil mendjerit, bahoewa ia boekannja Banpeng, hanja ada rahajat biasa jang dipaksa boeat djadi soldadoe, dan minta Loan Teng-giok kasi ampoen.
„Siapatah adanja kaoe, kaloe boekannja “Banpeng?” menjentak Houw Seng.
„Hamba berame ada petidoedoek di ini poelo,’”
saoetnja itoe laskar: „jang baroe bebrapa hari ini telah dipaksa oleh Tiat Lo-han boéat masoek djadi soldadoe. Maski bermoela kita-orang tida soeka, tapi lantaran takoet nanti dihoekoem dan dikasi minoem aer beratjoen, maka apa-boleh boeat toeroet djoega.” Mendenger ini penjaoetan, Loan Teng-giok laloe bikin bebrapa pertanjahan, dengen bilang: kaloe ini rahajat jang didjadiken soldadoe soeka mengakoe teroes terang dan kasi taoe sagala tempat-tempat dan gowa-gowa di ini poelo, boekan sadja marika aken dapet ampoen, hanja aken dapet djoega persen.
Rahajat itoe berdjandji nanti kasi taoe Sagala apa jang marika taoe.
Begitoelah ia kasi taoe, bahoewa di ini poelo ada Satoe gowa jang diseboet Ouw-liong-tong, jang maski moeloetnja gowa itoe ada ketjil, tapi dalemnja sanget besar dan bisa moeat banjak orang. Di dalem itoe Tiat Lo-han goenaken sabagi kamar harta, sedeng laen bagian jang lebi loewas ada diboeat tempatnja pembesar itoe poenja familie. Pintoenja itoe gowa ada dari batoe keéras. jang soeda terdjadi boekan dengen tangan manoesia, hingga djadi begitoe tegoe.
Sasoeda berdami pada doea kawannja Loan Teng-giok laloe pergi ka itoe gowa dengen teranter oleh itoe laskar tawanan. Kamoedian ia prenta taroken oempan api dan bakar itoe gowa, hingga anak istrinja Tiat Lo-han jang ada didalamnya, semoea mati kapanasan.
Tiat Lo-han sendiri sahabisnja kala perang tida katoean ka miana perginja. Kamoedian Loan Teng-giok pergi ka kantoornja itoe pembesar dan kaloearken soerat salebaran boeat menetepken hatinja anak negri.
Goedang ramsoem semoea ada penoeh dengen padi dan beras, maka itoe semoea dipreksa laloe dikoentji kombali.
Kamoedian Loan Teng-Giok dapet inget itoe soember beratjoen, maka mata aer ini lantas di prenta orang oeroek.
Selang tiga hari baroelah itoe gowa jang di bakar moelai djadi dingin kombali dan orang brain masoek aken preksa. Di sitoe ada kadapetan, salaen, orang-orang prampoean, djoega maitnja itoe pembesar jang telah berontak, Njatalah di wektoe sahabisnja kala perang Tat Lo-han itoe soeda masoek ka gowa aken semboeni, dan di sitoelah ja telah binasa.
Loan Teng-giok prenta orang panggal kapalanja dan pantjer di satoe tiang, Rahajat poelo Djinggi jang meliat kamatiannja itoe pembesar, djadi girang dan soeka hati, sebab Tiat Lo-han jang berhati kedjem dan soeka mameres, memang tida disoeka oleh rahajatnja.
Sasoeda semoea oeroesan di itoe poelo djadi beres, Loan Teng-giok laloe kirim kabar pada Taygwanswe Lie Tjhoen, dalem mana ditjeritaken satoe persatoe tentang itoe: paperangan dari bermoela sampe achirnja, dan sampe didapetken maitnja Tiat Lo-han, hingga keadahannja itoe poelo telah djadi aman kombali.
Soeerat ini dibawa oleh Tong Wie.
Satelah menerima itoe warta, Hoen-kang-liong djadi amat girang dan sigra djoega tetepken jang Loan Teng-Giok berdoca, Houw Seng boleh dijaga itoe poelo.
Sekarang mari kita tengok pada Tjioe Thong. Oei Sin dan Bok Tjoen, jang djoega ada bawa satoe pasoekan boeat taloeki poelo Tiauwhi.
Poelo ini maski, tida sabrapa besar, tapi bagoes djoega. Kiri kanannja terdapet doea goenoeng jang mengapit dan di depannja ada satoe pintoe aer boeat djalannja kapal atawa praoe-praoe. Djika pintoe aet itoe ditoetoep, kandaran aer dari loear tida bisa masoek dan jang di dalem tida bisa kaloear. Djoega di depannia bentengan jang terbikin sabagi kota, ada berdiri satoe loteng dari batoe, dimana le Lauw- tian bisa doedoek berdjaga-djaga.
Koetika pasoekam Siamlo dateng, ini pembesar jang lebi siang memang telah doega jang Lie Tjhoen bakal dateng menjerang, laloe kaloearken prenta boeat dibikin pendjagahan lebi tegoe dan pintoe aer tida boleh diboeka, sedeng datengnja moesoe jang minta perang, tida sekali diladeni.
Maski satiap hari Tjioe Thong dateng menangtangi berganti-ganti, tapi le Lauw-tian tida maoe perdoeliken dan prenta sadja rahajatnja mendjaga biar lebi hati-hati. Begito¢lah sampe hari katiga, belon djoega dibikin pertempoeran.
Kaloe Bok Tjoen dateng menghamperi ka pintoe aer, dari atas tembok lantas melesat banjak batoe-batoe jang sabesar boea kalapa atawa madja, jang dilepas dengen menggoenaken pekakas poeter, hingga batoe jang mengenaken orang, bisa membikin kapala djadi petja atawa pangsan.
Lantaran itoe maka Bok Tjoen tida dateng berdeketan, dan terpaksa moendoer kombali dengen tangan kosong.
Meliat moesoe poenja kabandelan, jang salaloe mendjaga sadja tempat sendiri, ini tiga panglima djadi kawalahan dan berkata :
„Kaloe sateroesnja le Lauw-tian mendjaga dengen keras, sampe kapantah kita bisa selesihken ini paperangan ? Sekarang, salagi marika bikin djagahan dengen tida maoe kaloear bertempoer, baeklah kita preksa keadahannja ini poelo, kaloe-kaloe bisa didapetken satoe tempat atawa daja boeat kita bikin penjerangan jang bagoes.”
Oei Sin dan Bok Tjoen njataken moefakat. Sedeng rahajatnja diprenta menangtang dari djaoe, Tjioe Thong bersama doea kawannja itoe laloe preksa keadahan di sapoeternja poelo Tiauwhi, sasoedanja berdjalan dengen praoe kira kira satenga hari, marika. telah sampe di bagian blakang jang tida terdjaga.
Meliat itoe tempat, Bok Tjoen lantas berkata: „Ini tempat tida terdjaga, maka baek sekali kaloe kita menjerang dari sini.”
Tjioe Thong dan Oei Sin memandang tempat itoe sakoetika lamanja, sedeng Bok Tjhoen berkata lebi djaoe:
„Boeat menjerang ini tempat, kita moesti “goenaken sedikit tipoe, jang akoe kira bakal berhasil:”
Atas pertanjahannja itoe doea kawan, Bok Tjoen laloe njataken pikirannja, tipoe itoe jalah: pada waktoe ia berdoea Oei Sin menjerang dari sini, Tjioe Thong moesti bawa sadjoembla tentara belaga menjerang dari sebla depan, soepaja le Lauw tian koempoelken antero tenaganja djadi satoe di itoe tempat dan tida perhatiken kalemahan di blakang itoe poelo. Dengen begitoe, sakali gebrak sadja ia berdoea bisa dapet naek dari ini tempat jang kosong.
Tjioe Thong njataken moefaket, begitoelah ia orang lantas balik kombali dan atoer persadiahan. Sadjoembla tentara jang dilengkapi sendjata pendek laloe berprace pergi ka itoe tempat jang pernahnja di sebla blakang, kamoedian naek pelahan-pelahan sambil tabas sagala ojot-ojot dan poehoen-poehoen jang mengalangi perdjalanannja. Sedeng wake begitoe, Tjioe Thong telah madjoeken pasoekannja sambil boenjiken tamboer perang.
Ie Lauw-tian betoel ada saorang gaga, tapi koerang pinter dan tida sekali ada doega jang moesoe nanti dateng dari blakang. Koetika liat Tjioe Thong menjerang kombali begitoe keras, ia prenta rahajatnja lepasken, batoe-batoe biar lebi banjak berikoet anak pana. Tapi itoe barang keras dan tadjem tida mengenai satoe apa, sebab praoe itoe ada djaoe dan djoega tjoema mengaga sadja.
Koetika hari samingkin sore, Tjioe Thong mengantjem terlebi heibat, hingga Ie Liauw-tian djadi tambaken semoea laskarnja ka ini tempat sadja. Tapi waktoe soeda malem, koenjoeng-koenjoeng di blakang itoe poelo kaliatan. sinar terang seperti oetan terbakar. Tapi kendati begitoe Lauw-tian tida terlaloe koeatirken boeat pergi menoeloeng itoe tempat jang kabakaran. Sebab: kaloe ia tarik tentaranja dari sini, disalempang moesoe jang lagi menjerang lida dapet katangkis.
Orang-orang jang di sebla bawahannja laloe membri taoe: bahoewa api itoe kaliatannja djadi lebi besar dan harep lekas dibriken toeloengan. Mendenger ini warta jang blakangan baroe Ie Liauw-tian djadi sedikit goegoep dan lantas prentaken saratoes orangnja pergi menoeloeng itoe bahaja jang boleh meroegiken anak negri. Baroe sadja prenta itoe dikaloearken, dari itoe djoeroesan lantas terdenger soeara riboet-riboet, jaitoe barisannja Oei Sin dan Bok Tjoenjang menjerang dengen semboeni telah sampe dan sambil membasmi Banpeng jang dikatemoeken, marika bersoerak-soerak.
,,Tjilakalah! akoe kena moesoe poenja tipoe!” kata itoe pembesar dengen moeka poetjet, jang sekarang djadi tersedar dari lelapnja.
Dengen kalakoean bingoeng ia toeroen dari loteng djagahan dan salagi maoe prenta orang sediaken koeda dan sendjata, doea panglima moesoe soeda kaliatan di hadepannja, jang lantas menoesoek dengen sendjatanja.
Kerna tida bersendjata, Lauw-tian tida bisa menangkis lagi orang poenja serangan, hanja begitoe kena ia lantas terdjoengkel ka tana dan linjap njawanja.
Banpeng jang lagi mendjaga itoe tempat, satelah liat kapalanja soeda binasa, tida ada taksiran lagi boeat melawan, hanja lantas lepasken sendjata samvil berloetoet boeat menaloek.
Oei Sin dan Bok Tjoen berpaling pada laskarnja aken membri tanda, bahoewa orang-orang jang telah menaloek djangan dibinasaken.
Kamoedian doea panglima ini lantas prenta boeka pintoe aer boeat samboet datengnja Tjioe Thong, pentang djoega pintoe benteng dan tida lama tiga panglima itoe soeda berada dalem gedoengnja itoe pembesar poelo.
Baroe sadja iaorang berkoempoel, soldadoenja dateng anterin kaloewarganja Ie Lauw-tian jang satoe persatoe telah diboenoe mati, djoembla sama sekali ada ampatpoeloe orang lebi bersama boedak lelaki dan prampoean. Kamoedian Tjioe Thong preksa boekoe-boekoe dan goedang ramsoem, jang semoea ada berisi penoeh.
Laskar jang masi ada di sitoe lantas diprenta pergi pademken api, kamoedian disalebarken soerat plekat boeat menetepken hatinja pendoedoek, dalem mana diprenta: masing-masing boleh lakoeken poela pakerdjahannja sabagimana biasa. Sedeng orang-orang jang roemanja soeda terbakar atawa, dapet karoegian lantaran ini paperangan, bole berkoempoel di depan kantoornja pembesar pada hari jang katiga.
Maski tida taoe goena apa disoeroe berkoempoel, toch itoe orang-orang ketjil semoea pada dateng, kerna marika doega, tentoe ini pembesar jang baroe hendak berboeat baek. Lantaran doegahannja itoe, jang sasoenggoenja ada bener, maka pada hari jang ditetepken semoea pendoedoek, jang miliknja terbakar atawa tida, rata-rata pada dateng dan berdiri di kadoea baris pinggiran: sebla kanan jaitoe orang-orang jang dapet karoegian lantaran roemanja terbakar dan dapet ke roegian lantaran ini paperangan; jang di sebla kiri toekang-toekang tangkep ikan, orang-orang miskin dan toea jang tida mampoe.
Sasoedanja dipreksa beres, orang-orang jang dapet karoegian laloe diganti dengen dibriken oewang, sedeng itoe koempoelan orang-orang mismin dikasiken gandoem atawa padi boeat marika bawa poelang.
Dengen amat girang rahajat poeld Tiauwhi mengoetjap trima kasi dan masing-masing laloe balik ka tempat sendiri.
Hartanja Ie Lauw-tian lantas dibagi-bagiken pada soldadoe sabagi persen, hingga balatentara itoe djadi amat girang.
Sasoeda itoe semoea djadi beres, Tjioe Thong laloe kirim kabar pada Taygwanswe Lie Tjhoen di Siamlo.
Dalem itoe sapandjang hari jang berikoet, Tjioe Thong masi teroes boeka goedang padi boeat dibagi-bagiken pada rahajat jang miskin, sedeng toekang-tvekang tangkep ikan jang tida poenja modal boeat bekerdja, dikasi oewang jang tjoekoep goena membeli barang-barang kaperloeannja.
Lantaran kabaekannja Tjioe Thong, maka rata-rata pendoedoek itoe poelo merasa soekoer dan sabagi mengoendjoek rasa trima. kasi, pada soeatoe hari sahabisnja atoer pembagian beras, saorang toea jang mendjadi wakilnja rahajat madjoe ka depan sambil berloetoet, membri taoe maksoed kedatengannja jang terseboet di atas.
,,Bingkisan apakah itoe?” kata Tjioe Thong jang lantas prenta orang preksa.
,,Oh, satoe bingkisan loear biasa,‘’ kata Bok Tjoen jang sasoedanja pergi liat: ,,batang jang dipersembaken itoe ada saekor oeler besar.”
,,Oeler besar?” mengoelangi Tjioe Thong dengen heran: ,,oeler besar? ..... he!"
Sigra djoega pembesar ini pergi meliat jang satelah sampe ia djadi moendoer kombali dengen kaget.
Oeler itoe besarnja seperti poehoen pinang, pandjangnia ada kira-kira sapoeloe toembak dan kapalanja ada sabesar gantang tengahan. Tapi itoe binatang kaliatannja saperti soeda pajah, sebab kaloe oeler jang segar pastilah angkat-angkat kapala dengen agak seperti hendak menggigit pada orang jang deketi padanja.
Atas pertanjahannja Tjioe Thong, perloe apa ini oeler dianteri padanja; orang itoe menjaoet: oeler ini pendoedoek di sini seboet Pasi, dagingnja ada begitoe enak, wangi dan empoek. Boekan sadja dagingnja oeler Pasi ada djadi satoe santapan jang lesat boeat djadi temennja arak, hanja oran-orang jang tjoba dahar ini makanan loear biasa, beroleh seger waras dan djaoe penjakit.
Sedeng djantoeng dan hatinia boleh digoenaken boeat djadi obat jang amat moestadjeb boeat pe njakit napas, sesak dan terkena angin djahat. Njalinja poen ada djadi obat jang nomor satoe boeat penjakit loeka atawa penjakit-penjakit di koelit.
Lebi djaoe itoe wakil rahajat membri katerangan: ini oeler ada amat djahat dan berbahaja. Orang jang kena digigit olehnja pasti aken binasa dengen tida ada obatnja lagi. Boeat tangkep ini binatang moesti goenaken djebakan. Doea hari sasoedanja Ie Lauw-tian terbinasa pendoedoek dapet pikat ini oeler, tapi kaloe baroe sekarang dipersembahken, adalah dalem sapandjang hari jang laloe, satiap hari oeler Pasi ini ditjekok dengen arak obat boeat ilangken bisanja jang djahat. Sekarang ini binatang soeda mabok, maka kapalanja tinggal tekklok dan matanja bersorot mera.
Sadari Ie Lauw-tian doedoek mamerenta di ini poelo, pembesar itoe Soeda dapet tangkep tiga atawa ampat kali oeler jang samatjem ini, tjoema lebi ketjil dan moeda. Boleh djadi itoe binatang-binatang jang ditangkep doeloean ada ini oeler poenja anak atawa tjoetjoe, didoega ini ada biangnja jang betoel.
Tjioe Thong djadi heran denger itoe katerangan. Maski dalem hati tida pertjaja jang dagingnja ini oeler ada enak, toch ia prenta orang potong dan kaloearken hati, djantoeng dan njalinja, jang lantas dikering n boeat obat, sedeng dagingnja diprenta masak dan lebi doeloe dikasi tjoba pada itoe orang jang menganterin, jang lantas sadja ditrima dengen girang dan didahar dengen enak.
Maski Tjioe Thong tida mendoega jang orang hendak ratjoeni, toch hatinja tida bisa pertjaja bagimana daging oeler boleh dikata lesat, lebi poela binatang ini ada oeler djahat jang amat berbisa. Kaloe hati, njali dan djantoengnja dikata boleh boeat obat, itoelah ia pertjaja djoega. Tapi satelah dapet kanjatahan dengen itoe pertjobahan. jang diliat oleh matanja sendiri, baroelah ia tjoba dan berboekti dari itoe omongan.
Orang jang persembaken itoe lantas dikasi p persen oewang. Kamoedian itoe. sabagian: daging oeler ia prenta orang bawa djoega ka Siamlo pada Lie Tjhoen,
Taygwanswe satelah liat soeratnia Tjioe Thong jang blakangan, dalem mana ada ditoetoerken tentang halnja itoe daging oeler, djadi girang dan lantas bikin mateng, dimana iaorang lantas dahar bersama-sama sakalian Hengtenja, begitoe poen orang-olang prampoean jang teritoeng koelawarga dari sakalian orang-orang gaga, dapet bagian dari itoe hidangan loear biasa.
Kamoedian Taygwanswe tetepken jang Tjioe Thong bersama Oei Sin djaga itoe poelo, sedeng Bok Tjoen balik ka Siamlo.
Begitoelah, kadjadiannja itoe doea poelo jang soeda dapet ditaloekin, sekarang mari kita meliat pada poelo jang katiga.
Ini poelo Peksik ada berbedah dari laen-laen poelo tetangganja. Antero pinggirannja ada dipasangken tembok jang tinggi kaliatannja djadi seperti satoe kota jang tegoe. Di dalem itoe poelo ada satoe soengei jang bisa meneroesken ka laoet, lebarnja ini poelo ada bebrapa ratoes paal dan tananja jang gemoek ada mengaloearken banjak hasil boemi, teroetama Hiangdjino (saroepa ketan), jang kaloe dimasak dengen aer dari soember Kimswan-tjwan, bisa mengaloearken arak jang daling baek.
Lantaran ini djoega, maka arak bikinan ini poelo ada dapet nama nomor satoe. Boeat membajar oepeti arak ini ada jang paling dioetamaken.
Rahajat ini poelo ada orang-orang jang radjin, tapi lantaran Touw Gong poenja atoeran jang boeroek, maka pendoedoek itoe tempat tida bisa merasaken kasenangan dan kaberoentoengan. Kerna djahatnja itoe pembesar, jang saban kali soeka ambil sadja rahajatnja poenja anak-anak gadis dan istri-istri jang tjantik, banjak orang jang bentji, tapi boeat membales tida bisa.
Pada soeatoe hari salagi Touw Gong doedoek di kantoornja, pengawal poelo membri taoe kadatengannja Kwan Siang poenja angkatan perang. Tapi ini warta ditrima sadja dengan adem sambil berkata:
,,Atoer sadja pendjagahan jang tegoe troesa koeatir datengnja moesoe. Kaloe semoea pintoe-pintoe ditoetoep, biar bagimana djoega moesoe tida nanti mampoe poekoel petja.”
Perkatahan ini poen ada dengen sabenernja, Tambahan ramsoem di ini poelo ada sampe tjoekoep dan sagala barang tida bergantoeng dari loear, maka Touw Gong tida koeatir kaloe moesoe koerang atawa menjerang poelonja.
Begitoelah sadari harian dateng sampe saminggoe lamanja Kwan Seng belon bisa lakoeken pertempoeran, sebab Touw Gong tjoema mendjaga sadja dengen tida maoe ladenin orang poenja tantangan atawa makian.
Boeat petjaken moesoe poenja pintoe, tida saorang bisa dapetken akal jang baek, hingga Kwan Seng djadi kesel. Apapoela poelo Djinggi dan Tiauwhi soeda petja, maka kaloe ia tida bisa dapetken Peksik, dirinja tentoe djadi maloe.
Pada soeatoe hari waktoe pergi selidiki pinggir-pinggirnja itoe poelo jang tegoe, salagi maoe balik ia katemoe satoe praoe jang didoedoeki oleh bebrapa orang. Ini praoe lantas ditahan dan orangnja; laloe ditanja, dari djawabannja ada seperti berikoet:
Orang itoe bernama Poei Beng, asal dari Jang-tjioe. Pada sapoeloe taon jang laloe waktoe bikin pelajaran bersama anak istrinja, kapalnja karem : dan beroentoeng koelawarganja soeda katoeloengan, hingga bisa berdiam di satoe poelo jang deket dengen poelo Peksik.
Di ini tempat, boeat meliwati hari Poei Beng berdagang obat-obatan dan sala satoe anak prampoeannja diboeat goendik oleh Touw Gong, jang sabetoelnja ia tida soeka kasiken lantaran pembesar itoe berhati djahat dan kedjem. Djoestroe lantaran takoet pengaroenja jang besar, maka ia kasiken djoega dan sekarang ia maoe pergi tengoki anak itoe, jang ia koeatir nanti dianiaja oleh Touw Gong poenja istri pertama. Tapi lantaran tida dapet taoe keadahannja Kwan Seng, maka ia tida kaboeroe menjingkir dan minta diampoenin.
Lebi djaoe Poei Beng membri taoe apa jang memang ia ada taoe tentang kapandean dan kategoehannja ini poelo. Betoel antero pinggirannja Peksik ada terpager dengen tembok batoe, tapi dari dalem orang bisa meliat ka loear dengen keker jang dimasoeki dalem satoe lobang ketjil sabesar gobangan. Achirnja, lantaran bentji pada itoe mantoe dan kapingin soepaja anak prampoeannja bisa poelang kombali, maka ia kasi pikiran: bagimana ini panglima moesti berlakoe.
Kwan Seng djadi amat girang dan berkata:
„Kaloe Peksik bisa djato dalem tangankoe, ini semoea ada kaoe poenja gandjaran dan akoe nanti kasi taoe pada Taygwanswe soepaja kaoe boleh memangkoe satoe djabatan di Siamlo, sedeng Sioe-kouw, kaoe poenja anak prampoean, troesa koeatir tida aken dapet kombali."
Poei Beng mengoetjap trima kasi dan berlaloe. Daja bagimanatah jang ditoetoerken oleh Poei Beng?, inilah tida perloe diterangken, kerna sigra djoega aken ternjata di bawah ini.
| · | · | · | · | · |
Itoe hari djoega, sasoedanja berpisa pada Poei Beng, Kwan Seng laloe moendoerken antero pasoekannja, seperti orang jang maoe berangkat poelang ka Siamlo, sedeng praoenja itoe toekang obat, dimana ada toeroet djoega Jo Liem dan Tong Beng, lantas menoedjoe ka itoe poelo dan berlaboe di deket pintoe aer, sambil minta pendjaganja boekai pintoe, boeat ia masoek.
Orang-orang Touw Gong jang liat begitoe, tida brani lantas boekai pintoe, hanja pergi melapoer pada Touw Gong tentang kadatengannja Poei Beng; dengen sakalian membri taoe: bahoewa pasoekan Siamlo jang menjerang soeda moendoer kombali.
„Toch achir-achir ia moendoer djoega,“ kata ini pembesar dengen soeara bangga: „manatah ia mampoe poekoel kita poenja tempat, hahaha!....“
Kamoedian ia preksa lebi djaoe dari bolongannja lobang tembok, dimana kanjatahan jang Kwan Sing soeda moendoer dan satelah pasoekan moesoe soeda tida kaliatan, baroelah ini pembesar boekaken pintoe boeat mertoeanja masoek. Kamoedian ia sendiri poelang ka gedong.
Anak-anak praoe mendajoeng teroes meliwati itoe pintoe aer. Jo Liem memandang kiri kanan, dimana ia dapetken: maski aernja dalem, tapi batoe-batoe jang besar dan bagoes bisa kaliatan dengen njata, sebab aernja amat bening.
Dari pintoe aer di sebla loear itoe praoe berdjalan teroes dan pada besokannja pagi baroelah praoe ini sampe ka wates kota, jang dari loear ka dalem ada saperdjalanan ampir toedjoe li.
Touw Gong soeda sampe lebi doeloe ka gedongnja, kerna pembesar ini poen menoenggang koeda. Sedeng Poei Beng jang berkandaran praoe baroe sampe di hari esoknja dan lantas naek menoedjoe ka gedong.
Tapi pendjaga-pendjaga di ini tempat, jang memang telah kenal bahoewa toekang obat ini ada mertoeanja ia poenja pembesar, lantas berkata:
„Ja ja poenja kadatengan boekan waktoe jang bagoes, maka akoe rasa lebi baek djangan masoek doeloe.”
„Kenapa?"
„Sebab Touw Loya lagi beriboetan pada Hoe djinnja."
„He, sadari kapantah?" „Baroe sadari ini pagi sadja jang kita-orang taoe, tapi boleh djadi djoega dari sa nalem.”
Tapi lantaran apatah?”
„Ah, masa lantaran apa lagi, tentoe lantaran Touw Hoedjin poenja tjemboeroehan.”
Puei Beng menengok pada Jo Liem, seperti hendak berkata: „Nah, apa akoe bilang, bener tida istrina Touw Gong itoe ada amat tjemboeroean, dan lantaran begitoe djoega, maka hatikoe merasa koerang senang jang anak prampoeankoe djadi istri jang moeda dan tentoe djoega aken trima reepa-roepa hinaän dari madoanja.”-Perkatahan ini Poel Beng telah njataken djoega kamaren di praoenja Tjioe Thong, kerna kapingin sang anak tida djadi goendiknja itoe pembesar, maka ia lantas kasi pikiran boeat djatoken ini poelo dengen mengadjak Jo Liem dan Tong Beng masoek ka mari. sabagi orangnja.
Jo Liem tida menjaoet, sedeng Poei Beng salagi maoe menanja poela, dari dalem gedong kadengeran soeara riboet-riboet, kamoedian kaliatan Touw Gong jang berlari-lari, dengen dioeber oleh saorang prampoean jang ditangannja ada mamegang sapasang golok.
Prampoean itoe roepanja gaga dan bengis, dari perkatahan-perkatahannja jang memaki pandjang pendek, ada menjataken bahoewa dia ini ada istrinja itoe pembesar, jang lagi sedeng moerka. Banpeng jang djaga itoe gedong bersama Poei Beng dan laen-laen orang, tjoema mengawasi dengen tida kaloearken satoe perkatahan.
Itoe pembesar jang takoet pada istri lari teroes, sedeng istrinja jang sanget goesar tida brenti mengoeber sambil mendjerit djerit. Beroentoeng djoega itoe njonja jang galak tida taoe kaloe Poei Beng ini ada madoenja poenja ajah, tjoba kaloe ia taoe, belom taoe apa djadinja.
Koetika Touw Gong jang dioedak soeda djaoe, baroe Poei Beng moelai menanja: apa lantarannja itoe kariboetan.
Itoe soldadoe lantas membri taoe, lantaran Touw. Gong terlaloe tjinta pada istrinja jang moeda dan telah bikini satoe gedong ketjil jang indah, membikin itoe bini toea jang baroe dapet taoe kamaren lohor, djadi amat goesar. Atas permintahannja Poei Beng, itoe soldadoe djaga-djaga tida kaberatan boeat anterin ini orang toea ka roemanja Sioe-kouw jang baroe.
„Marilah ikoet padakoe,“ kata itoe soldadoe: „salagi njonja tida liat, tapi kaloe ia ada akoe tentoe tida brani.“
Selang kira-kira satoe djam marika telah sampe di itoe roema, dimana Touw Gong djoestroe baroe sampe tida la.na. Satelah liat itoe pembesar, Poei Beng lantas membri hormat, jang lantas dibales dan disilaken masoek. Kamoedian Poei Beng perkenalken Jo Liem dan Tong Beng sahagi sanaknja, pada itoe mantoe. Touw Gong jang tida tjoeriga, kira sabenernja dan lantas samboeti hormatnja itoe doea orang dan silaken doedoek.
Sioe kouw jang dibertaoeken lantas dateng membri hormat pada itoe orang toea, begitoe djoega pada Tong Beng dan Jo Liem jang ajahnja adjak.
Sabelonnja ditanja, Touw Gong lantas tjeritaken bagimana ia soeda riboet pada istrinja. Lantaran baroesan Poei Beng telah menjaksiken jang ia telah diojok-ojok, maka ia soeda lantas toetoerken sadja perkara jang sabenernja. Dalem ini penoetoeran ia salaken istrinja jang toea, jang begitoe galak tida kaoeroesan. Tapi kendati bagimana djoega, kata Touw Gong lebi djaoe, troesa koeatir boeat dirinja Sioe-kouw jang ia tjinta sagenepnja hati.
Sambil beromong-omong oeroesan roema tangga, masing-masing minoem thee dan makan bapauw jang disediaken. Kamoedian baroe Sioe-kouw tanjaken kawarasan dan keadahannja ini orang toea, jang semoea didjawab dengen baek.
Touw Gong lantas prenta orang potong gangsa, kambing dan 'babi boeat bikin perdjamoean aken menghormati kadatengannja ini mertoea. Kamoedian iaorang makan minoem dengen senang hati hingga sampe malem baroe brenti dan Touw Gong jang mabok lantas dibawa ka kamarnja.
Tapi Poei Beng dan jang laen-laen, lantaran ada mempoenjai satoe maksoed, maski dahar tapi tida minoem banjak. Koetika itoe pembesar jang mabok soeda dibawa ka dalem kamar, orang toea ini laloe menanja pada anaknja, bagimana pengidoepannja dalem sapandjang waktoe ini.
Dengen sedi Sioe-kouw laloe tjeritaken satoe persatoe, bagimana istrinja Touw Gong jang toea ada terlaloe tjemboeroenan dan dengki, sedeng Touw Gong sendiri tida brani pada itoe istri. Lantaran ini, maka hatinja saban-saban djadi takoet dan kapingin bisa berlaloe dari ini tempat.
Mendenger anaknja kata begitoe, Poei Beng merasa kasian dan sigra djoega ia bisiki koepingnja sang anak, sambil menoendjoek pada Tong Beng dan Jo Liem.
„Oh," kata Sioe-kouw sambil memandang Jo Liem dan Tong Beng: „itoe baek sekali; di mana ajahkoe telah berkenalan pada ini doea Tjiang-koen?"
„Boeat menoetoerken itoe hal, ada amat pandjang," saoet Poei Beng dengen soeara pelahan: „sampe di laen waktoe masi ada tempo boeat kaoe dapet taoe; tapi sekarang baeklah kita oeroes dengen sigra ini perkara. Bagimana kaoe poenja pikiran?" „Baek sekali," saoetnja itoe njonja moeda, jang lantas bengong sakoetika lama dan tjelingoekan kasana sini.
Liwat sasaät ia berkata poela:
„Kaloe begitoe, baeklah kita toeroen tangan sekarang sadja, salagi ia mabok dan tida bisa bergerak."
Kamoedian Sioe-kouw tjeritaken lebi djaoe bagimana keadahan dalem ini roema dan kamar, jang tida ada didjaga oleh banjak orang, maka ini malem boleh lantas dikerdjaken, sebab tida ada waktoe jang begitoe bagoes seperti sekarang.
„Boeat toeroen tangan, saorang poen akoe rasa tjoekoep,” kata Tong Beng pada Jo Liem': „sebab Touw Gong itoe poen lagi mabok, jang belon tentoe aken tersedar di esok pagi. Maka sekarang baek akoe balik membri kabar pada Kwan Tetok jang lagi menoenggoe.”
Jo Liem njataken moefakat dan sigra djoega ia selaken koeda aken kaloear dari itoe gedong.
Dengen praoe órang moesti melaloei tempo satoe malem baroe sampe ka pinggir laoet jang bertembok tegoe, tapi dengen menoenggang koeda, troesa doea djam soeda lantas sampe Djaga-djaga jang memang telah liat Tong Beng dateng bersama-sama Poei Beng di dalem praoe, dan soeda denger djoega bahoewa ia ini ada sanaknja, maka dengen tida banjak soesa si pendjaga itoe dapet diakalin dengen sedikit perkatahan.
Sigra djoega pendjaga itoe boekain pintoe dan sediaken satoe praoe boeat Tong Beng kaloear aken oeroes kaperloeannja.
Itoe waktoe belon sampe tengamalem.
Dengen praoe jang didajoeng keras, tida lama Tong Beng soeda sampe ka tempat dimana Kwan Sing ada menoenggoe. Maka sasoedanja kasi taoe satoe persatoe, Tetok itoe djadi amat girang dan berkata:
„Ini semoea ada dengen bantoeannja Allah, maka maksoed ini bisa kasampean lebi gampang dari sabagimana jang kita harep,"
Kerna lebi doeloe satoe pada laen soeda berdjandji maka dengen tida boewang sedikit tempo, Kwan Seng lantas siapken semoea pasoekannja menoedjoe ka itoe poelo, jang satelah sampe, disemboeniken doeloe di samping dan Tong Beng lantas masoek bersama bebrapa pengikoet.
Koetika itoe hari ampir mendjadi fadjar. Touw Gong poen soeda dibinasaken dan Jo Liem tjoema menoenggoe datengnja kawan sadja, baroe lantas bergerak lebi djaoe.
Waktoe Tong Beng sampe dan dapet taoe jang pembesarnja ini poelo soeda dibinasaken, sigra djoega ia prenta itoe pengikoet balik pada Kwan Sing boeat naekin semoea tentara. Soldadoe itoe lantas masoek memberobosan, ada jang ambil djalan dari itoe pintoe dan ada jang ambil djalan dari pintoe aer jang diboeka oleh orang-orangnja Tong Beng.
Koetika hari moelai pagi, terbitlah satoe kakaloetan dan istrinja Touw Gong jag toea satelah liat begitoe, lantas bawa sapasang golok pergi. ka kantoran tempat dimana soeaminja biasa berdoedoek. Tapi soeda lantas ditabas oleh Jo Liem dan binasa dalem saät itoe djoega.
Kwan Seng dan Tong Beng lantas pergi ka itoe kantoran dan kasi taoe pada semoea Banpeng jang ada di sitoe, bahoewa Touw Gong soeda binasa, dan kaloe marika tida maoe menaloek, djiwanja aken dibinasaken.
Berbareng itoe Jo Liem dateng sambil bawa kapalanja itoe pembesar. Semoea rahajat satelah liat kapalanja soeda tida ada, marika laloe menaloek dengen gampang.
Begitoelah ada terdjadi dengen kasoedahannja ini poelo, jang djato ka dalem tangannja Kwan Seng dengen zonder menoempaken banjak dara manoesia, katjoeali Touw Gong dengen istrinja.
Maitnja ini soeami istri lantas dikoeboerken dengen baek. Kamoedian Kwan Seng kaloearken soerat plekat boeat tetepken hatinja pendoedoek dan laskar-laskar jang masi ada.
Anak negri jang denger kabar kamatiannja Touw Gong, djadi girang sakali. Sebab ini pembesar memang koerang disoeka, terlebi poela oleh orang-orang jang ada mempoenjai anak prampoean dan bagimana anaknja diperlakoeken tida patoet,
Soldadoenja poen jang memang tida sabrapa banjak, djika boekan rahajat di ini poelo djoega, siang-siang tentoe soeda lari dan tinggalken. kawadjibannja.
Kwan Seng laloe bikin papreksahan pada goedang-goedang, jang semoea njata ada penoeh, tjoema kakoerangan officier dan laskar perang. Sambil gojang kapala Kwan Seng berkata:
„Keadahannja ini poelo sabenernja ada sampe bagoes, sajang sakali diperenta oleh pembesar jang seperti Touw Gong, hingga tempat jang soeboer ini tida mengaloearken asil sabagimana jang diharep.“
Kamoedian sambil memandang pada Poei Beng, ini pembesar balatentara oetjapken trima kasinja dan rasa soekoer jang besar, sebab kaloe tida dapet pikirannja jang membri itoe akal, nistjaja sampe sekarang poen ia belon dapetken maksoednja. Boeat ini pahala jang besar, haroeslah dapet gandjaran jang satlimpal betoel.
Tapi Poei Beng menampik itoe sambil rendaken diri, Kerna ia kata: djika ia soeda dapet ingetan demikian, itoelah lantaran tjinta pada anak senditi, dan boekan sekali-kali hendak berhianat pada pembesar di ini poelo boeat dapetken gandjaran dari pamerenta Siamlo.
„Kaloe Touw Gong ambil anakkoe dengen baek dan atoeran pantes, pastilah akoe tida nanti djadi sakit hati dan njataken itoe pikiran pada Tetok," kata poela itoe orang toea: „malah akoe meresa soekoer sekali, jang dengen Tetok dan doea Tjiangkoen poenja pertoeloengan, sekarang akoe bisa dapetken poela anak sendiri. Bila akoe poenja perboeatan ini soeka diampoenken dan dikasi idjin membawa poelang Sioe-kouw, akoe nanti merasa soekoer tida soedanja.”
Kwan Sing oetjapken lagi bebrapa perkatahan, kamoedian prenta orang ambil barang-barang berharga kapoenjahannja Touw Gong poenja istri dengen beserta oewang, boeat dikasiken pada Sioe-kouw, jang ada toeroet ambil djoega dalem ini pakerdjahan besar. Kamoedian boeka perdjamoean dan makan minoem dengen senang hati.
Esoknja Kwan Sing lantas toelis soerat lapoeran pada Taygwanswe, Tong Beng jang bawa itoe.
Lie Tjhoen satelah dapet itoe kabar, djadi amat girang. Maka sigra djoega ia kaloearken prenta: Kwan Sing berdoea Jo Liem tinggal tetep di itoe poelo dan Poei Beng diangkat mendjadi Sioepi, dengen kasi satoe tempat jang santausa boeat anak istrinja.
Ini keangkatan diprenta orang bawa, jang satelah sampe disamboet oleh Kwan Seng dan laenlaen, sedeng Poei Beng jang denger ia diangkat djadi Sioepi, djadi girang dan mengatoerken trima kasi.
Dari ini orang jang bawa soerat keangkatan Kwan Seng dapet taoe, bahoewa Loan Teng-giok dan Tjioe Thong ada kirimi ka Siamlo barang-barang jang terdapet dari itoe doea poelo taloekan. Soepaja dari Tiauwhi djoega bisa mengirim itoe, Sigra djoega diprenta kaloearken barang permata.
Tapi Poei Beng lantas membri taoe, bahoewa batang permata maski bener harganja mahal tapi ada sampe banjak dan boekan perkara jang terlaloe menggirangken boeat didjadiken bingkisan. Menoeroet anaknja poenja kata, di ini poelo ada kaloear arak Hiang-swat-tjioe, maka kaloe minoeman ini dikirim ka Siamlo, boleh dipastiken Hoen-kang-liong aken djadi girang.
„Bener sekali,” kata Kwan Seng dan jang laen-laen: „bagimanatah rasanja arak itoe?
„Enak sekali,” saoetnja: „manis, haroem dan aloes.”
Koetika barang itoe ditjobain dan ternjata jang rasanja bener ada begitoe, sigra djoega Kwan Seng prenta orang anterken sapoeloe goetji pada Taygwanswe, sedeng jang salaennja biarken tinggal di sini.
Orang itoe trima prenta lantas berlaloe.