Pembalesannja Kawanan Liangsan/Bagian ka ampat/Bab 6
VI
Sabelonnja Andjin dan Siotjia
dapet ditoeloeng, ada lagi
satoe sobat jang haroes
ditoeloeng.
Sakaloearnja dari Jahouwpoh, katiga orang itoe
berdjalan dengen tjepet, maka waktoe sore marika telah sampe dalem kota jang ditoedjoe.
Tatkala itoe, Tee Tjong memang soeda sampe sadari kamaren dan ada brenti dalem satoe waroeng. Satelah liat itoe doea orang hatinja djadi girang dan boeroe-boeroe adjak ka itoe roema makan tempat dimana ia menginep.
Jan Tjeng dan Jo Liem lantas tanja: apa ito oewang jang dibawa soeda sadia.
Tee Tjong memanggoet dan bilang djoega, bahoewa sasoeda toeloengi Andjin berdoea Siotjia, oleh Lie Eng marika diprenta lekas balik ka lemmatjwan.
,Itoelah tentoe," saoet Jan Tjeng. Sasoeda menoeloengi Andjin dan Siotjia, akoe tentoe moes-... ti dateng di sana." Esoknja pagi, kerna Tee Tjong merasa masi tjape, maka Jan Tjeng sadja berdoea Jo Liem jang masoek ka dalem kota, dengen bawa itoe oewang teboesan.
Thaysioe di kota Taybenghoe ada bernama Lauw le, saorang jang berperangi renda dan kedjem. Koetika liat djatonja kota Piankeng, pembesar itoe laloe menaloek pada orang Kim, jang oleh Kan Lie-poet lantas diangkat djadi Tje-tee dan berkoeasa di tana daera Hopak.
Kan Lie-poet ada satoe panglima perang jang pinter dan bisa meliat gelagat. Kerna taoe jang Khong Ong ada ditjinta oleh rahajat, maka djoega ia laloe angkat Thio Pang-tjiang mendjadi Tjouw-tee di Holam dan Lauw le djadi Tjee-tee di Hopak, dengen maksoed: kaloe marika itoe soeda saling mereboet kabesaran dan Khong Ong poenja pengaroe moelai koerang, itoe waktoe jang baek marika nanti goenaken.
Satelah dapet itoe kabesaran Lauw le djadi semingkin sombong, kerna sigra djoega ia diriken astana, anaknja diangkat djadi Taytjoe dan istrinja djadi Honghouw, membri pangkat panglima dan mantri pada orang-orang sabawahannja.
Sala satoe panglima jang berpangkat Tjongkoan dan bernama Kwan Siang, djadi amat mendongkol liat kalakoeannja Lauw le dan tida soeka boeat bekerdja lebi lama di bawah prentanja. Kwan Siang ada satoe panglima jang gaga perkasa dan berhati djoedjoer. Ia inget boedinja negri dan karadjahan Song, maski kadoea baginda soeda tertawan, tapi hatinja masi tinggal satia.
Ini niatan telah tetep, maka pada soeatoe hari ia dateng di hadepannja Lauw le boeat minta lepas.
„Lantaran apatah Tjiangkoen maoe letaken djabatan, sedeng akoe baroe dapet ini kabesaran?" menanja Lauw le dengen heran.
„Lantarannja poen boekan laen, “menjaoet Kwan Siang dengen teroes terang: „kerna boattjiang poenja laloehoer di djaman Hantiauw ada satoe panglima jang termashoer gaga perkasa, berhati soetji dan djoedjoer. Maka itoe nama jang soeda tersohor boattjiang tida brani nodaken, dan inilah lantarannja.”
„Tapi, dengen memangkoe djabatan Tjiapengma Tjongkoan, apatah jang djadi menodaken namanja laloehoermoe?" menanja Lauw le dengen tertjenggang.
„Bagimanatah tida djadi menodaken namanja aki-mojang, kaloe sekarang boattjiang moesti berhamba pada mantri jang meloepaken Keizer?" begitoe Kwan Siang balik menanja.
Lauw le djadi amat moerka denger itoe penjaoetan hingga paras moekanja djadi beroba dan sambil tepok medja ia berkata: „Kaloe kaoe ada mempoenjai batin jang moelia, soetji dan berboedi, ja, baeklah! Tapi mengapa kaoe masoek dalem kawanan Liangsan, koempoelannja itoe penjamoen dan begal-begal? Apa itoe namanja soetji dan tida nodaken namanja laloehoermoe?"
„Kaloe itoe waktoe boattjiang soeda masoek dalem kawanan Liangsan; boekan laen dari sebab gara-garanja dorna, “saoet Kwan Siang: „tapi kendati di loear koempoelan itoe ada kaliatan sabagi begal atawa penjamoen, toch masing-masing Hohan jang mendjadi soedara angkat, ada mempoenjai priboedi dan batin jang sapoeloe kali lebi baek dari pada mantri-mantri iang meloepaken boedinja negri dan Keizer.“
„Hal ini semoea orang ada taoe, “kata poela Kwan Siang dengen brani: „jang dalem brapa taon kawanan Liangsan ada bertaroken djiwanja di medan boeat membela negri, achirnja bisa diriken pahala. Tapi lantaran toesoekannja mantri-mantri dorna, hingga kaoem Liangsan diperlakoeken dengen tjara jang menjakiti hati. Tapi maski begitoe toch boattjiang tinggal satia dan tida maoe berhamba pada laen madjikan.“
Lauw le djadi amat moerka dan lantas sadja prenta orang-orang jang berdiri di kiri kanannja tangkep ini panglima, boeat dikasi hoekoeman tabas. Kwan Siang tida djadi takoet, malah samingkin memaki dan mengoetoek.
Sala satoe mantri lantas madjoe ka hadepan dan berkata pada Lauw le, jang kalantjangannja Kwan Siang itoe memang haroes didjatoken hoekoeman. Tapi sebab inget ia ada saorang djoedjoer, satia hati dan gaga perkasa, harep dikasi ampoen sadja. Sebab tida baek kaloe saorang jang begitoe gaga dan baek hati, sampe terboenoe. Apapoela Kwan Siang masi bisa diriken pahala besar jang boleh teboes dosanja.
Laen dari begitoe, kata poela itoe mantri jang memintaken ampoen, tida baek boeat Lauw le jang baroe trima kabesaran, memboenoe panglima sendiri.
Lauw le toeroet itoe permintahan dan lantas titahken algodjo tahan sadja Kwan Siang di dalem pendjara.
Waktoe Kwan Siang lagi digiring ka lapangan, Jo Liem dan Jan Tjeng jang lagi tari pasanggrahan orang Kim, djadi amat kaget waktoe kenalin jang persakitan itoe ada marika poenja soedara angkat.
Kadoeanja itoe djadi amat kaget dan berkata:
„Boekantah ia ada memangkoe djabatan Tjiapengma Tjongkoan di ini kota, tapi kasalahan apatah jang membikin ia dapet ini hoekoeman?" Sebab itoe waktoe di sakiternja persakitan ada banjak soldadoe, Jan Tjeng djadi tida bisa madjoe ka depan boeat tanja pada orang jang poenja diri. Rahajat negri jang ditanja poen tida taoe, hingga Jan Tjeng berdoea djadi terpaksa mengikoeti itoe orang banjak ka tana lapang, dengen maksoed boeat mereboet persakitan.
„Kita tida bisa berboeat laen dari pada reboet ia dari tangannja algodjo," kata Jo Liem.
„Ja, akoe poen pikir begitoe, saoet Jan Tjeng: „sebab boeat minta toeloengan ka lemmeatjwan ada terlaloe djaoe dan tida ada tempo.”
Kadoeanja itoe soeda berdami tetep, dan lantas mendesak ka kalangannja orang banjak, boeat hamperi itoe persakiten jang hendak direboet.
Itoe waktoe kaliatan algodjo kibarken bendera mera, sambil minta Kwan Siang mengadep kadjoeroesan Oetara.
Tapi ini orang gaga jang maoe dihoekoem, djadi goesar dan berkata: „Akoe ini ada rahajat Taysong, jang sadari idoep sampe mati akoe maoe tinggal sata pada djoengdjoengan sendiri. Akoe poenja djoengdjoengan ada di Selatan, maka, akoe tida maoe mengadep ka Oetara.”
Orang-orang jang mendenger semoea pada poedji kasatiahannja itoe Tjongkoan. Itoe waktoe Jan Tjeng dan Jo Liem soeda ampir sampe di deketnja Tjongkoan jang maoe diboenoe. Kadoeanja itoe liat sana sini boeat tjari djalanan lolos, ka mana marika aken lari kaloe soeda dapet rampas orang jang hendak ditoeloengi.
Di sana sini ada banjak orang dan sabelonnja marika dapetken tempat boeat memboeka djalan, ada kaliatan saorang jang toenggang koeda melariken binatangnja dengen tjepet, jang sasampenja di sitoe laloe bertreak-treak sambil angkat sebla tanganja:
„Tahan! tahan! djangan diboenoe!“„“
Semoea orang pada menengok, sedeng Jan Tjeng dan Jo Liem menapas legah.
Orang jang bertreak itoe ada soeroehannja Lauw le, jang lantas serahken satoe Lengtjiam pertandahan bahoewa ia dateng ada dengen prentanja itoe Tje-tee, jang soeda batalken itoe hoekoeman dan titah bawa sadja doeloe ka dalem pendjara.
Pren a itoe ditoeroet dan Jan Tjeng berdoea poen mengikoeti dari blakang, boeat tjari taoe apa masalahannja Kwan Siang.
Dari itoe orang jang tadi, Jo Liem soeda bisa dapet taoe apa jang mendjadi sebab. Maka ia laloe kasi taoe pada Jan Tjeng dan berkata:
„Kiranja tjoema begitoe sadja. Sekarang bagaimana kita moesti berboeat aken menoeloeng itoe soedara, jang maski soeda terbebas dari hoekoeman mati, hoekoeman idoep tentoe tida terloepoet. Apa baek kita bongkar pendlara sadja ?“
„Kita tida boleh berlakoe tjerobo, “kata jan jeng sambil gojang kepala: „kaloe masi bisa apet laen djalan, kita haroes ambil djalan jang loes dan hati-hati.“
Sembari berkata-kata marika hamperi satoe roema makan, sedeng hatinja ada lebi banjak pikiri Kwan Siang, dari pada Andjin berdoea Sio-hia. Sebab itoe njonja bersama gadisnja tida aken binasa, maka begitoe dibawaken oewang teboesan, tentoe lantas beres.
Koetika marika sampe di dalem itoe roema akan, djongos silaken ia naek ka atas loteng, di tempat mana soeda ada tiga orang, satoe antaranja lagi sedeng minoem.
Jan Tjeng berdoea Jo Liem tinggal mendengeri sadja. Kerna itoe waktoe makanan-makanan jang diminta, belon sadia.
Dan pembitjarahan antara itoe tiga orang, nja-lah jang satoe ada panglima Kim dan jang doea ada oppasnja kantoor Kayhonghoe. Itoe panglima kasiken satoe papan dari gading, jang ada banjak soeratnja.
Tapi koenjoeng-koenjoeng sala satoe dari itoe oppas jang baroesan trima itoe papan, satelah meliat pada Jan Tjeng, lantas berkata:
„He, apatah toean ini boekan di Tangkhi loear pintoe Jongkioeboen, waroeng benang poen nja Bisiauwsi ?“
„Benerlah,“ saoet Jan Tjeng, jang dari sataoe memang ada pikir apa-apa boeat bisa bersobatan pada itoe oppas:„akoe poen lagi liat dan pikiri rasanja Tjiokhe akoe kenal, tapi loepa di mana pernah liat.“
„Tjayhe orang she Lioe, jang tinggal di kampoeng Tanggoebwe dan bekerdja pada kantoor Kayhonghoe.“
Jan Tjeng manggoet-manggoet, seperti orang jang baroe inget Padahal hatinja lagi memikiri itoe papan pertandahan jang tadi itoe penggawe Kim kasiken pada si oppas. Di sitoe Jan Tjeng lantas menanja kombali halnja itoe papan, apa samoea penggawe Kim ada pake papan pertandah begitoe, tapi kenapa dikasiken pada itoe oppa
„Itoe papan ada boeat djadi gantinja Len tjiam,“ saoet si oppas:,,kaloe orang membay itoe membilang apa-apa, tentoe lantas dipertj ta. Kerna di itoe papan poen ada terseboet ,,boleh lakoeken sabagimana orang jang membawa papan ini prenta.“
Mendenger itoe perkatahan, Jan Tjeng djadi kepingin dapetken itoe papan pertandahan. Sebab kaloe ada itoe, tida soesa boeat menoeloeng Kwan Siang jang sekarang ada tertahan dalem pendjara. Tapi bagimana akal, kerna itoe oppas masa maoe kasi ia pindjem?
Sabelon dapet pikiran jang baek, itoe oppas jang roepanja maoe membanggaken kadjoedjoerannja, lantas tjerita lebi djaoe bahoewa datengnja ka mari ada boeat menoeloengi satoe sobat jang kena ditahan dalem boei. Kerna pada orang jang tertahan itoe ia amat baek, saboleh-boleh ia maoe menoeloeng dan sasoedanja berdaja sahabisnja tenaga, baroe beroentoeng dapet ini papan Lengtjiam.
„Itoe panglima Kim djadi apatah ?“ tanja Jan Tjeng.
„Ia ada berkoewasa dalem oeroesan pendjara,“ saoetnja itoe oppas: „kerna oeroesan pendjara poen sekarang termasoek dalem kakoeasahannja orang Kim.“
Jan Tjeng menengok ka medja tempat dimana itoe panglima Kim baroesan doedoek minoem.
Itoe panglima roepanja speda poesing. Sasoedanja membriken itoe papan pertandahan pada oppashja Kaijhonghoe, ia preksa lagi papan-papannja jang masi ada, jang semoea ada terbikin dari gading dan ditoelisken banjak perkatahan, dengen terboeboeh djoega tanda tangannja orang jang paling besar.
Sasoeda itoeng betoel, ja laloe masoeki kombali papan itoe ka dalem sakoe, kamoedian berbangkit. Sedeng satoe papan jang belon masoek betoel lantas djato ka bawah korsi dengen tida kataoean olehnja:
Itoe oppas jang lagi mengomong, salelah meliat panglima Kim itoe bangoen, lantas memanggoet pada Jan Tjeng, kamoedian toeroen dari itoe loteng aken mengikoeti. Sedeng Jan Tjeng jang dari satadi ada meliati sadja, djadi amat girang waktoe liat papan pertandahan itoe djato, maka dengen kasebetan loear biasa ia laloe menghamperi dan poenggoet.
Sigra djoega ia bajar oewang makannja dan toeroen dari itoe loteng.
Jo Liem jang di waktoe minoem, ada doedoek tida sebrapa djaoe, tapi tida begitoe perdata mendengeri orang poenja perkataan, kerna hatinja poen itoe waktoe lagi sedeng iboek memikiri halnja Kwan Siang, dengen djalan bagimana jang bisa ditoeloeng. Satelah liat Jan Tjeng poengoet itoe papan dengen roepa begitoe kagirangan, ia lantas menanja
„Boeat apatah sagala papan begitoean ? hingga....“
„Ssst!...“ kata Jan Tjeng sembari membri tanda, soepaja ini soedara tida banjak omong: „liat sadja nanti, sekarang djangan tanja apa-apa.“ Tida lama kamoedian masika itoe telah sampe di roema makan tempatnja menginep, dimana Tee Tjong ada menoenggoe. Tapi satelah liat itoe doea soedara poelang kombali begitoe tjepet, lantas menanja: apa ia soeda taoe di mana le taknja itoe pasanggrahan tempat Andjin dan Sio tjia ada tertahan.
„Ah, itoe gampang kita oeroes lagi besok, “‘saoet Jan Tjeng.
„He, kaloe begitoe baroesan Janheng pergi ka manatah ? “tanja Tee Tjong dengen heran.
Jan Tjeng dan Jo Liem lantas tjeritaken, ba gimana tadi waktoe maoe tjari itoe pasanggrahan, ia soeda katemoe pada Kwan Siang, jang maoe dibawa katempat hoekdeman. Jang mendjadi lan taran mendapetnja itoe hoekoeman tabas poen ia toetoerken satoe persatoe, menoeroet kate rangan jang ia dapet denger dari laen orang.
„Di ini kota Kwan Siang ada memangkoe dja batan Tjiapengma Tjongkoan, “kata poela Jan Tjeng lebi djaoe: „tapi sebab Lauw le jang telah diangkat djadi Tjee-ong, telah baliki blakang pada Sri Djoengdjoengan dan loepaken boedinja negri, maka kita poenja Giheng jang berhati djoedjoer dan berboedi, soeda kasi denger per katahan-perkatahan keras, inilah sebabnja jan membikin ia terhoekoem. Tapi atas permintahan nja sala satoe mantri, maka hoekoeman tabas itoe ditoenda atawa dioeroengken, kerna sekarang akoe taoe pasti ia ada tertahan dalem pendjara.“
„Kaloe begitoe, kita poen tida boleh tinggal diam, “kata Tee Tjong: „kerna ia poen ada sala satoe dari kita poenja soedara angkat jang lama dan satia.“
„Djoestroe lantaran itoe, maka akoe boeroe-boeroe balik ka mari, “saoet Jan Tjeng.
Tee Tjong lantas maoe pergi tengoki, tapi Jan Tjeng tida satoedjoe, kerna kaloe tjoema menengoki, tida membawa faedah satoe apa.
Kamoedian tiga orang itoe lantas berdami boeat menoeloeng Kwan Siang, dan poetoesan jang diambil jalah: kaloe sasoeda toeloeng kaloearken Andjin berdoea Siotjia, baroe toeloeng itoe soedara.
Satoe malem tiga orang itoe doedoek berdami, Jan Tjeng tjeritaken djoega tentang ia dapet poengoet itoe papan Lengtjiam, sataoe boleh digoenaken atawa tida, kerna ia belon sempet menanja lebi djaoe, itoe oppas soeda berlaloe.
Esoknja pagi Jan Tjeng prenta Louw Seng panggoel itoe oewang jang berdjoembla anamratoes tail perak, kamoedian ka loear dari roema makan, tjari pasanggrahannja orang Kim jang ada menahan orang-orang teboesan. Atas oendjoekannja satoe pendoedoek di sitoe, pasanggrahan terseboet sigra djoega didapetken tida dengen banjak soesa.
Ini kali peneboesan itoe tida banjak soesa, kerna begitoe oewang dibajar dan orang jang menerima soeda itoeng betoel, Andjin bersama Siotjia lantas dikaloearken, dimana satoe pada laen lantas bertemoe dengen girang.
Jo Liem lantas panggilken satoe kandaran sewahan, kamoedian Jan Tjeng anteri naek aken poelang ka tempat menginep.
Kandaran itoe dianter oleh Jo Liem sedeng Jan Tjeng bersama pengikoetnja laloe pergi beli brapa stel pakean boeat Andjin dan Siotjia, jang kamoedian balik kombali dan kasiken barang-barang terseboet pada itoe njonja bangsawan.
„Kaloe ini hari kita-orang masi bisa idoep itoelah ada dari lantaran pertoeloenganmoe, Siauw it-ko,“ kata Andjin dengen merasa soekoer dan penerima jang amat besar: „boedimoe ini soenggoe ada sabagi laoetan ampoenja besar,“
„Ah, djanganlah Andjin kata begitoe,“ menjaoet Jan Tjeng: „dirikoe ada teroeroek dengen boedinja Djihoangwe jang seperti goenoeng, hingga maski dengen korbanken djiwa sekali poen akoe rasa belon bisa membales itoe. ― Tapi apa jang sekarang dilakoeken olehkoe, ada terlaloe ketjil boeat dioetjapken trima kasi. Laen dari begitoe, boeat penoehken ini kawadjiban akoe ada mendapet bantoeannja sakalian Tjiongwi Hengte di lemmatjwan. teroetama ini kadoea Hengtiang maka baroelah bisa djadi beres.“
Andjin dan Siotjia laloe mengoetjap trima kasi pada Tee Tjong dan Jo Liem.
Sasoedanja masoek di dalem kamar, Andjin ada inget soeaminja poenja maksoed, jang di waktoe Jan Tjeng masi berdiam di roemanja, brapa kali Louw Djihoangwe maoe ambil itoe sastrawan diboeat mantoe. Tapi lantaran ini waktoe negri lagi kaloet dan itoe orang-orang gaga ada di dalem karepotan dalem perkara ini dan itoe, maka hal perdjodoan tida dibatjaraken.
Louw Seng djadi amat girang, waktoe Jan Tjeng prenta melajani ia poenja njonja madjikan, sedeng Andjin dan Siotjia poen djadi girang bisa berkoempoel kombali pada ini boedjang jang satia.
Itoe hari Jan Tjeng tjari katerangan dalem perkara-perkara jang berhoeboeng boeat menoeloeng Kwan Siang. Katerangan jang didapet ialah: maski Lauw le ada salakoe radja, tapi sagala kakoeasahan masi dipegang oleh Kan Liepoet, sedeng perkara besar atawa ketjil, moesti dipoetoesken oleh That Lay, itoe panglima besar poenja generaal.
Boeat menggampangken pakerdjahannja, dalem itoe kota ada dibikin satoe kantoor perhoeboengan, jang diseboet Thongsoehoe dan dioeroes oleh satoe pembesar Kim. Dan ini pembesar nanti lakoeken sagala prrentanja itoe generaal, dan sasoeatoe prenta ada diberikoeti dengen itoe papan gading jang mendjadi pertandahan.
Orang-orang Song jang menaloek dan bekerdja dalem kantoor-kantoornja pembesar Kim, memake pakeannja itoe bangsa. Di kantoornja generaal That Lay ada djoega orang Song jang bekerdja, maka ini katerangan membikin Jan Tjeng djadi girang dan lantas balik ka tempatnja menginep dan tjeritaken itoe pada kadoea kawannja.
Dengen berpake pakean orang Kim, katiganja itoe lantas pergi ka kantoor Thongsoehoe dengen membawa itoe papan pertandahan. Tee Tjong dan Jo Liem memake tjara oppas, ikoet dari blakang.
Satelah sampe Jan Tjeng lantas serahken itoe papan, seperti orang soeroehannja generaal That Lay boeat mengambil Kwan Siang aken dibawa ka sana.
Pembesar Thongsoehoe tida brani berlakoe ajal, satelah liat itoe papan pertandahan dan denger perkatahannja ini orang soeroehan, ia laloe sampeken pada Lauw Ie, jang lantas sadja prenta orang kaloearken pada Kwan Siang.
Ini panglima jang gaga satelah sampe di depan itoe kantoor, tinggal berdiri dengen mengangkat dada. Itoe pembesar kasi taoe, bahoewa generaal prenta orang ambil padanja, kerna dirinja maoe dipake di sana.
„Apa, orang Kim maoe pake padakoe?" menanja Kwan Siang dengen goesar: „akoe ada satoe laki-laki jang tida soedi boeat berhamba pada doea toean. Djangan kata pada laen bangsa, sedeng pada bangsa sendiri, kaloe orang jang memblakangi pada djoengdjoengan dan loepaken boedinja negri, akoe tida kapingin."
Itoe pembesar tjoba memboedjoek dan kata, djangan ia berlakoe begitoe berangasan.
Kwan Siang maoe menjatji lagi, tapi Jan Tjeng dengen kawannja, jang koeatir rasia djadi terboeka, dengen kalakoean kasar lantas tarik tangannja Kwan Siang, dibawa ka loear.
Kwan Siang satelah liat itoe tiga orang, djadi terkedjoet. Ia memandang dengen roepa kagoem dan hatinja ada berkata:
„Hei, apatah ini orang boekan Jan Tjeng dan Jo Liem?......."
Itoe tiga orang tida kaloearken satoe perkatahan, hanja lantas bawa dengen tjepet dengen tida maoe kasi liat moekanja lebi tedas. Maski sabenernja oleh Kwan Siang soeda dikenalin.
Kwan Siang tida pertjaja matanja, hanja memandang itoe tiga orang ganti berganti.
Tida sala, djalannja, dedak sikapnja dan romannja semoea ada itoe orang-orang gaga jang mendjadi soedara angkatnja. Tapi.... tapi..... hatinja tida bisa pertjaja kaloe itoe soedara-soedara jang ia taoe kasatiahannja dan priboedinja, maoe taloek pada orang Kim dan pegang kerdjahannja itoe bangsa, sabagi oppas dan orang soeroehan.
Apalah laen orang brangkali, jang bersamahan roepa?
Tapi kaloe laen orang, masatah tiga-tiganja ada sama? Kaloe saorang sadja brangkali ia maoe pertjaja matanja telah kliroe meliat. Tapi ini.....
Begitoe pikir Kwan Siang dalem sapandjang djalan, hingga ia tida taoe dirinja dibawa ka mana.
Sigra djoega marika telah sampe di itoe roema makan tempat pembrentian, dimana Jan Tjeng lantas bawa masoek ka dalem
„He, ia bawa akoe ka manatah ?” tanja Kwan Siang dalem hati sendiri.
Salagi kabingoengan dan maoe pandang lagi taoe tiga penggawa Kim, katiganja itoe lantas membri hormat sambil berkata:
„Soenggoe akoe merasa beroentoeng sekali bisa bertemoe Kwanheng, dalem waktoe jang tida terdoega.”
Tee Tjong dan Jo Liem djoega oetjapken perkatahan-perkatahan menanja.
Kwan Siang tjepet bales membri hormat, dan sekarang baroe ia taoe, bahoewa ini tiga soedara angkat soeda samarken diri boeat menoeloeng padanja. Maka dengen perkatahan-perkatahan jang menjataken rasa soekoer dan herannja, baroe ia menanja: bagimana ini soedara-soedara bisa taoe dirinja dapet tjilaka dan lantas dateng menoeloeng.
Jan Tjeng lantas tjeritaken satoe persatoe dari awal sampe di achir.
Kwan Siang djadi amat girang. Kamoedian ampat orang gaga itoe doedoek hadepi medja jang telah penoeh dengen roepa-roepa barang hidangan.
Sembari minoem Jan Tjeng tjeritaken bagimana ia soeda koendjoengi baginda di pasanggrahannja orang Kim, dengen membawa boea-boea. Sapoelangnja dari sitoe ia ketemoe sarombongan orang tawanan, antara mana ada Louw Andjin bersama Siotjia. Bagimana kamoedian Thaubak jang mengoeroes oewang teboesan minta ditamba lagi djoemblanja oewang itoe, dan kamoedian dateng ka ini kota boeat oeroes peneboesannja itoe njonja bangsawan.
„Kaloe inget perboeatannja itoe Thaubak jang tida patoet soenggoe kita-orang tida djadi menjesel, kata Jan Tjeng kamoedian: „kerna kaloe ia tida minta ditamba lagi djoemblanja, masatah ini hari kita orang bisa bertemoe pada heng?"
Kwan Siang djoega tjeritaken riwajatnja, bagimana lantaran amat bentji pada Lauw Ie, sampe ia kaloearken itoe perkatahan-perkatahan, jang achirnja membikin ini tiga Hengtiang djadi banjak soesa.
Begitoelah sambil minoem iaorang tjerita-tjerita lebi djaoe. Tee Tjong kata: perkara mengambil Kwan Siang dari pendjara, tentoe tida bisa tinggal rasia. Menoeroet doegahannja dalem sedikit hari tentoe bakal lantas kataoean.
„Lantaran itoe, maka lebi baek kita lekas-lekas berangkat, "kata poela ia: „sebab sekarang toeh semoea oeroesan soeda beres."
„Ja, besok kita-orang boleh berangkat, "menjaoet Jan Tjeng.
„Tapi ka manatah kita moesti pergi?" tanja Kwan Siang.
„Kita nanti poelang ka lemmatjwan, "saoet Jo Liem, jang lantas tjeritaken tentang perkoempoelannja di itoe goenoeng, dimana Lie Eng ada mendjadi Twako, dengen ada banjak lagi laen-laen soedara.
Kwan Siang djadi girang dan menjalaken ada sadia boeat toeroet.
Jan Tjeng lantas tanja: apa ini soedara ada mempoenjai istri, anak dan familie di dalem kota.
Kaloe ada, lekaslah toelis soerat soepaja esok pagi ia boleh pergi ambil.
„Ja, ada," saoet Kwan Siang: „waktoe berada dalem pendjara, istrikoe membri kabar, bahoewa ia hendak abisken djiwa, kaloe akoe şampe terhoekoem boenoe. Tapi boeat kaoe pergi lagi ka kota mengambil familiekoe, itoelah bener-bener akoe tida moefakat, soedara."
„Troesa koeatir," saoet Jan Tjeng .,akoe masi ada mempoenjai tipoe boeat kaloearken Soso dengen sakalian koelawarganja, asal sadja Kwan-heng lekas sadiaken itoe soerat, soepaja dateng koe tida diboeat tjoeriga "
Menginget jang perboeatan begitoe ada sanget berbahaja, maka Kwan Siang tetep menampik dan hatoerken sadja trima kasi atas katjintahannja itoe soedara. Tapi sebab Jan Tjeng memaksa dengen sanget dan kata: kaloe sang istri soeda begitoe satia, tida pantes moesti ditinggalken, hanja biar bagimana djoega moesti dibawa bersama-sama, soepaja hati merasa senang.
Kerna jang laen djoega kata begitoe, terpaksa Kwan Siang toelis itoe soerat dan briken pada Jan Tjeng, jang esoknja pagi laloe masoek kombali ka dalem kota, dengen penjamaran seperti kamaren.
Pada pembesar di kantoor Thongsoehoe ia kata: Kwan Siang soeda soeka bekerdja di bawah prentanja generaal That Laij, maka datengnja kamari ada boeat ambil panglima itoe poenja koelawarga saroema tangga. Itoe pembesar tida merasa tjoeriga, sebab itoe papan jang kamaren Jan Tjeng oendjoeki padanja, ini hari poen dioendjoeki kombali.
Pembesar ini lantas kasi taoe pada Louw le, jang lantas toeroet sadja dan soeroe bawa familienja Kwan Siang.
Ini njonja satelah denger soeaminja soeda menaloek pada panglima Kim, djadi amat moerka dan laloe menjatji. Tapi sebab tida ada djalan boeat ibisken djiwa, terpaksa ia ikoet djoega dengen penoeh rasa goesar. Hatinja soeda berpikir tetep, kaloe ia telah katemoe itoe soeami, ia maoe maki dan kata-katain.
Sasoedanja barang-Larang diboengkoes, sigra djoega itoe sakalian familie dinaeki kandaran menoedjoe ka loear kota, jang djoemblanja ada doea kreta.
Satelah sampe di itoe roema makan tempat pembrentian, baroelah njonja itoe dapet taoe, bahoewa ini semoea ada tipoenja itoe orang-orang gaga jang telah menoeloeng soeaminja dengen sakalian familie, hingga hatinja djadi amat girang dan bersoekoer tida soedanja.
„Sekarang semoea soeda beres, "kata Tee Tjong: „maka esok pagi soeda boleh berangkat djalan."
„Tapi menoerot pikirankoe,“ kata Jan Tjeng: „baek ini sore Tee Wantiang bersama Kwanheng berangkat sadja lebih doeloe, boeat membri taoe pada Koko Lie Eng atas kita-orang poenja kadatengan, sedeng akoe bersama Joheng berangkat besok dengen menganter kreta-kreta jang moeat Andjin dan Soso.“
Tee Tjong njataken moefakat dan lantas bersadia. Sedeng Kwan Siang laloe pesen apa-apa pada sang istri.
Itoe sore Tee Tjong laloe berangkat bersama-sama Kwan Siang, menoedjoe ka lemmatjwan.
Malemnja dari itoe hari Andjin dan jang laen-aen pada berkoempoel dengen familie Kwan. Barang-barang soeda ditaro dalem kreta dan esok pagi, sasoedanja membajar oewang makan dan menginep, Jan Tjeng lantas seroe koesir berangkat djalan.
Sasoedanja berdjalan satoe, hari lamanja, kandaran-kandaran itoe telah sampe di doesoen Jahouwpoh, tapi sabegitoe djaoe Jan Tjeng tida dapet liat pasanggrahannja Ong Tjin. Hanja apa: jang kaliatan jalah mait-mait orang pada menggeletak bersoesoen tindi.
Itoe pemandangan sedi jang mengenasken hati, ada membri satoe kenjatahan, bahoewa di ini tempat baroe terdjadi satoe pertempoeran heibat
„Boekan sadja tida ada ka iatan sabidji orang, hanja roema-roema poen tida ada, soenggoe heran sekali ?" kata Jan Tjeng.
„Apatah soeda terdjadi dengen Ong Tjin dan Leng Tjin ?“ kata Jo Liem, jang djoega merasa heran: „apatah marika telah bertempoer pada barisan Kim brangkali, hingga dapetken kakalahan dan lantas melariken diri, maka pasanggrahannja tida kaliatan ?“
„Boleh djadi begitoe. Sebab di bawah prentanja itoe doea panglima, tjoema katinggalan soldadoe jang tida lebi dari lima atawa anamratoes orang.“
„Sekarang baeklah berdjalan lebi djaoe, sebab hari soeda ampir sore dan langit kaliatan mendoeng.“
Jan Tjeng satoedjoe dan prenta koesir djalanken poela kandarannja.
Samingkin lama oedara djadi gelap, kerna awan itam ada melajang-lajang di atas oedara. Tida lama kamoedian oedjan toeroen seperti ditoewang-toewang, hingga djalan djadi betjek dan litjin.
„Tapi sebab masi belon dapetken roema orang, maka terpaksa itoe kandaran jang moeat njonja-njonja dan nona Louw, diprenta djalan teroes di dalem oedjan riboet, sedeng Jan Tjeng bersama Jo Liem tinggal mendjaga di kiri kanan.
Hari telah moelai malem, hingga djalanan djadi gelap sekali. Tapi toeroennja oedjan soeda moelai koerangan.
„Hajoe berdjalan teroes,“ kata Jan Tjeng dengen soeara memerenta: „soepaja kita-orang tida kamaleman di djalan. Di sebla depan brangkali bisa dapet roema boeat brenti.“
Betoel sadja sasoedanja berdjalan poela kira-kira doeapoeloe li, di sebla depan ada kaliatan satoe gredja, maka koesir kandaran lantas djalanken koedanja lebi kentjang, soepaja bisa lekas sampe, kerna koesir itoe poen soeda kadinginan.
Waktoe sampe di depan itoe roema berhala, kreta jang moeat orang prampoean lantas dibrentiken, tapi depan itoe gredja ada gelap dan tida saorang ada kaliatan.
„He, manatah hweshionja jang djaga ini gredja ?“ menggerendang Jo Liem sembari toelak daonnja pintoe.
Tapi di roewang pertengahan djoega tida ada kaliatan satoe orang.
Kaoem prampoean lantas toeroen dan koeda-koeda toenggang laloe di-iket di bawah poehoen, sedeng Jo Liem masoek teroes ka dalem.
―