Pembalesannja Kawanan Liangsan/Bagian ka ampat/Bab 7
VII
Dengen katjerdikannja Jan Tjeng bisa
menoeloeng soedara lama. Fihak
Iemmatjwan mengasi labrakan
pada moesoe.
Sasampenja di roewangan Siantong ada kaliatan satoe lentera, maka Jo Liem laloe ambil itoe gen bawa ka loear. Tapi koenjoeng-koenjoeng dari satoe tempat tidoer jang berada di itoe roewangan, kadengeran soeara bertreak:
„He! siapatah jang bawa itoe api! Boekantah Lotjeng lagi sakit, mengapatah ini tempat digelapken ?“
Jo Liem denger itoe pertanjahan, tapi ia tida ambil perdoeli, hanja bawa teroes itoe lentera ka tempat di mana familie prampoean ada berdiam. Samantara Jan Tjeng jang pergi mamereksa ka‘adahannja itoe gredja, telah dapet taoe jang di ini roema berhala ada bebrapa kamar kosong jang boleh ditempatken.
Sigra djoega boedjang-boedjang laloe kaloearken daon thee, beras, daging kering dan laen-laen, dengen terbantoe oleh Louw Seng tida lama kamoedian barang-barang hidangan telah sedia. Jan Tjeng si aken Andjin dan jang laen-lan moelai dahar, sedeng ia bersama Jo Liem laloe makan di laen medja. Sasoedanja bersantap semoea laloe masoek ka kamar jang soeda diberesken, sedeng itoe doea orang tinggal doedoek di sebla loear boeat mendjaga.
Waktoe samingkin malem djadi samingkin soenji, jang kadengeran di sakiter itoe gredja tjoema soearanja binatang binatang ketjil. Mega item jang menoetoepi langit pelahan-pelahan djadi boejar dan boelan moelai mendadari.
Di soeatoe tempat jang tida berdjaoean ada kadengeran soeara orang, hingga Jan Tjeng dan Jo Liem djadi kaget dan lantas sadja marika ambil golok dan menghamperi ka itoe tempat dengen djalan perlahan. Kerna menoeroet doegahannja, itoelah tentoe ada soearanja pendjahat jang maoe tjari korbannja di waktoe soenji.
Kerna tempat itoe tida ada api, dan penerangan tjoema dapet dari sinarnja boelan jang masoek di sela-sela djendela, maka kadoeanja itoe tjoema liat remang-remang, jang orang itoe ada berpakean seperti panglima, lagi berdiri di hadepannja patoeng sambil berkata dengen mengelah napas:
„Sekarang akoe tida ada moeka boeat ketemoeken lagi pada Lotjiang Tjiong Soe-touw. Ah, kaloe dari bermoela akoe toeroet sadja bitjaranja Jan Tjeng, tentoe tida menampak kabintjanahan begini roepa. Njatalah ia itoe ada saorang moeda jang mempoenjai pengartian dalem, hingga sala sekali akoe tida lantas toeroet nasehatnja.“
Jan Tjeng djadi kaget dan mengawasi lebi teliti.“
„Sekarang, djalan satoe satoenja tida laen dari pada abisken sadja djiwa, kerna dengen begitoe akoe troesa menanggoeng maloe," kata poela itoe orang jang tadi sambil meraba gagangnja pedang jang ada di pinggangnja. Tapi sabelonnja sendjata tadjem itoe ditjaboet, kadengeran satoe orang jang berada di sampingnja berkata sembari menjega:
„Kenapatah kita moesti begitoe pendek pikiran. Boekantah dari kepoengan moesoe jang berlapis-lapis kita soeda menjerang kaloear, dengen harep maoe idoep dan bikin poela pembalesan, tapi kaloe sekarang, sasoedanja terlolos maoe abisken djiwa, itoelah ada terlaloe kliroe."
„Maka lebi baek tidoer kombali,“ kata poela itoe orang: „soepaja bisa melepasken tjape lelah. Kaloe soeda baek baroe kita-orang berempoek kombali.“
Sekarang Jan Tjeng dapet kenalin, bahoewa orang itoe boekan laen dari Ong Tjin dan Leng Tjin, maka sigra djoega kadoeanja itoe kaloear dari tempatnja semboeni sambil berkata:
„Ah, kiranja Lotjiangkoen jang ada di sini. Soenggoe akoe tida doega sekali.“
Kamoedian ia menanja pada Leng Tjin, bagi-mana boleh ada di ini gredja.
Ong Tjin waktoe denger itoe soeara, djadi teramat kaget, begitoe djoega Leng Tjin. Tapi sigra djoega hatinja djadi girang, sasoedanja taoe siapa jang berada di hadepannja.
Jo Liem poen menjataken ia poenja menjesel, jang tadi waktoe ambil lantera ia tida kenalin soearanja ini soedara. Kerna ia poenja kira orang jang menanja itoe tentoe hweshio pendjaga.
Ampat orang itoe lantas doedoek dan jang satoe menanja pada jang laen. Dari itoe pembitjarahan, njatalah Ong Tjin poenja koeboeh soeda terampas oleh moesoe, hingga bersama itoe kawan ia melariken diri ka ini tempat.
„Soenggoe akoe menjesel sekali tida lebi siang denger Tjiokhe poenja perkatahan,“ kata Ong Tjin dengen roepa seperti orang maloe: „kaloe akoe toeroet bitjaramoe dan pindaken itoe pasanggrahan dari Jahouwpoh, brangkali tida menampak ini katjilakahan.“
„Perkara jang soeda terdjadi, apatah maoe di kata,“ saoet Jan Tjeng: „tapi siapatah jang menjerang Lotjiangkoen poenja pasanggrahan?“
Ong Tjin laloe tjeritaken, bahoewa jang menjerang pasanggrahannja boekan orang Kim, hanja Lauw le poenja poetra jang bernama Lauw Gie, dengen terbantoe oleh Pit Hong dan Thio Sien, pendjahat di goenoeng Kokepoh, jang membawa lima riboe soldadoe dengen djalan menggelap Kerna balatentaranja itoe penghianat ada lebi besar sapoeloe kali lipat, hingga soldadoenja tida bisa tahan. Inilah jang membikin ia dapet itoe karoesakan.
Jan Tjeng laloe menghiboer dengen roepa-roepa perkatahan. Kamoedian tjeritaken jang Khong Ong sekarang telah doedoeki kota Lamkeng dan siarken soerat plekat di sakoeliling kota boeat tjari orang-orang pande dan kosen, djoega koempoelin soldadoe dan ramsoem boeat mereboet kombali sabagian dari tana-tana jang dirampas orang Kim. Achirnja ia tjeritaken bagimana Lie Eng dengen sakalian Hengtenja di lemmatjwan ada bikin pergerakan dengen mengandoeng maksoed jang soetji, maka ia minta Ong Tjin bersama Leng Tjin soeka toeroet padanja ka itoe goenoeng boeat bantoe sampeken itoe tjita-tjita jang terkandoeng oleh kawanan Liangsan.
Lebi djaoe Jan Tjeng toetoerken bagimana ia telah menoeloeng Kwan Siang dan sekarang itoe soedara soeda berangkat ka goenoeng terseboet, dan ini orang-orang prempoean jang sekarang dianter olehnja, salaennja Andjin dan Siotjia, ada berikoet djoega familienja itoe Tjongkoan jang berhati keras.
Leng Tjin jang denger itoe penoetoeran, djadi amat kagoem atas perboeatannja Jan Tjeng jang begitoe loear biasa. Berkali-kali ia memoedji tida abisnja.
Salagi beromong-omong, Louw Seng bawaken daging bakar bersama nasi jang memang masi ada dan Jo Liem silaken itoe doea panglima bersantap. Kerna marika tentoe belon makan.
Sahabisnja dahar Ong Tjin dan Leng Tjin doedoek bitjara-bitjara lagi sampe pagi.
Hamba-hamba prampoean lantas sedoe thee dan sasoedanja masing-masing minoem itoe, perdjalanan ini diteroesken lebi djaoe.
Sasoedanja berdjalan satenga hari, dari blakang kaliatan deboe mengeboel dan tigaratoes soldadoe ada mendatengi ka djoeroesannja.
Jan Tjeng jang liat begitoe lantas prenta koesir jang mengandaraken kreta, menjimpang ka satoe rimba, samantara ia bersama jang laen-laen lantas bersadia boeat samboet datengnja moesoe.
Sasoedanja ampir berhadepan, orang jang mengapalaken itoe soldadoe lantas bertreak aken minta itoe pelantjong serahken barang-barang moeatannja, beserta orang-orang prampoeannja sakalian. Seroehan ini membikin Jo Liem dan jang laen-laen djadi amat goesar, dengen tida saoeti itoe perkatahan koerang adjar, masing-masing laloe angkat sendjatanja aken menjerang.
Satoe pertempoeran jang sengit lantas terdjadi.
Soldadoe di fihag moesoe bersoerak-soerak. Tapi Jan Tjeng dengen kawannja, maski tida mempoenja balatentara, sedikit poen tida merasa keder, hanja mengantem dengen seroeh dan siapa jang deket tentoe tida oetoeh.
Achir-achir Jan Tjeng bisa roeboeken sala satoe lawanannja, jang satelah djato dari koeda, Jo Liem laloe menghamperi dan koetoengken lehernja. Leng Tjin poenja sendjata poen telah boenoe ia poenja tandingan, hingga kawannja itoe brandal jang liat temen-temennja soeda binasa, lantas prenta rahajatnja mengoeroeng rapet.
Orang itoe boekan laen dari kawanan brandal di Kokepoh, jang soeka pegat djalannja pelantjong-pelantjong.
Salagi marika terkoeroeng begitoe, beroentoeng Houw-jan Tjiak bersama Tee Tjong dan Oan Swie telah sampe, maka itoe pendjahat-pendjahat bisa dimoendoerken dengen karoesakan amat besar.
Satoe pada laen djadi amat girang, satelah meliat Ong Tjin dan Leng Tjin djoega ada toeroet dateng ka tempatnja. Tee Tjong dan jang laen-laen laloe menanjaken halnja itoe doea panglima, kamoedian perdjalanan diteroesken lebi djaoe.
Sasoedanja mengaso sabentaran, perdjalanan diteroesken lebi djaoe ka lemmatjwan.
Satelah ampir sampe sala satoe dari rahajatnja diprenta pergi boeroe-boeroe membri taoe pada Lie Eng, jang satelah denger itoe kabar, laloe adjak kawan-kawannja kaloear menjamboet dan pertemoean itoe ada menggirangken sekali hatinja masing-masing.
Lie Eng poenja istri laloe samboet datengnja Andjin dan jang laen-laen dengen kalakoean hormat
Boeat membri slamat atas kadatengannja ini orang-orang gaga, Lie Eng laloe prenta adaken perdjamoean, dan sambil minoem masing-masing laloe tjeritaken perdjalanannja dari moela sampe di achir.
Kwan Siang mengoetjap trima kasi atas pertoeloengannja Jan Tjeng, dan hingga semoea Thaunia jang denger, toeroet poedji tida soedanja.
Lie Eng, sabagi Twakonja lemmatjwan menjataken kagirangan besar datengnja Ong Tjin dengen sakalian soedara-soedara, jang dikata menambaken pamoernja ini goenoeng. Sedeng itoe orang-orang jang baroe dateng, menjataken sadia boeat korbanken tenaga.
Tiga hari beroentoen diadaken perdjamoean teroes meneroes, tjoekoep membikin senangnja hati.
Salagi semoea Hohan bersoeka-soeka hati, di kantoor Thongsoehoe terbit kariboetan lataran linjapnja Kwan Siang, jang sekarang marika taoe, bahoewa itoe tiga orang jang jang mengakoe djadi roesoehan dan oppasnja That Lay, meloeoe ada penipoe.
Sigra djoega ditjari katerangan siapa jang soeda mengasiken itoe papan pertandahan. Sedeng pada Lauw le lantas dikirim lapoeran.
Lauw le djadi amat goesar satelah dapet taoe itoe perkara. Maka pembesar dari itoe kantoor perhoeboengan lantas ditoeroenkan pangkatnja sedeng panglima jang memegang papan Bokkiap, lantaran tida hati-hati, dihoekoem rangket saratoes rotan dan petjat pangkatnja.
Kamoedian diprenta tjari taoe ka mana larinja Kwan Siang.
Satela djoeroekabar membri taoe, jang Kwan Siang dengen sakalian familienja telah merat ka lemmatjwan, Lauw le lantas kasi taoe pada That Lay tentang itoe perkara dan minta ini genaraal Kim kasi bala bantoean boeat serang itoe goenoeng,
„Akoe soeda selidiki itoe orang-orang jang berkoempoel di lemmatjwan, ada berasal dari koempoelan Liangsa jang gaga perkasa,“ kata That Lay: „marika itoe semoea ada orang-orang jang bergoena. Maka akoe ingin sekali dapetken padanja.“ Sahabisnja berkata ini generaal Kim laloe kaloearken sariboe balatentara, prenta Tok Louw kapalaken itoe barisan bersama-sama Lauw Gie, tapi dipesen: kaloe bisa lebi baek taloeki padanja, soepaja tenaganja bisa terpake dalem pasoekan Kim.
„Tapi akoe kira tida gampang boeat taloeki marika dengen djalan begitoe,“ kata itoe panglima.
„Baleh tjoba,“ kata That Lay: „kaloe bisa dapet padanja, inilah boekan satoe gandjaran ketjil.“
Tok Louw sadiaken itoe pasoekan bersama-sama Lauw Gie, tapi Pit Hong jang denger itoe kabar, laloe mengadep pada Lauw Gie, minta soepaja ia djoega boleh mengikoet dalem ini barisan.
„Soenggoe akoe merasa sakit hati betoel pada itoe orang-orang di lemmatjwan,“ kata Pit Hong: „kerna salaennja soeda perna dikalaken, djoega Koko Tam Hoa poen telah binasa di tangannja itoe brandal.“
Lauw Gie berdiam sabentaran, kamoedian berkata:
„Kaoe maoe toeroet, itoelah boleh sekali. Tapi That Lay kapingin soepaja itoe orang-orang bisa ditaloekin sadja dengen zonder berperang.“
„Akoe nanti tjoba boeat taloeki padanja,“ saoet Pit Hong, maski moeloet kata begitoe, tapi hatinja ada berpikir laen. Lauw Gie lantas serahken barisannja pada Pit-Hong, jang diprenta berangkat doeloean bersama-sama Thio Sien, kamoedian ia bersama Tok Louw nanti dateng menjoesoel. Kamoedian pesen lagi bebrapa perkatahan.
Sigra djoega barisan ini berangkat dengen kibarken bendera Radja Wali Itam. Di sapandjang djalan hatinja berpikir:
„Kaloe sampe akoe boleh lantas bertempoer, soepaja itoe sakit hati bisa lekas terbales. Ha, akoe perdoeli apa ia poenja pesenan!“
Kerna kapingin bisa lekas-lekas membales sakit hati, maka perdjalanannja itoe barisan dilekasken sabrapa bisa. Satelah sampe di soeatoe tempat jang berdeketan pada Iemmatjwan satoe djoeroe kabar lantas boeroe-boeroe membri taoe.
Tatkala itoe Lie Eng bersama jang laen-laen djoestroe lagi doedoek minoem-minoem.
Satelah denger Pit Hong bersama kapala koeboeh di Kokepoh dateng bawa limariboe djoega oleh Lauw Gie bersama Tok Louw dengen kibarken bendera Radja Wali Itam. ― ini Twako lantas berempoek pada laen-laen Thaunia.
„Itoe Pit Hong dan Thio Sien aken menjerang kita poenja tempat, bagimana sakalian Hengtiang poenja pikiran, boeat menangkis datengnja moesoe?“ „Kokepoh ada satoe tempat teroetama, jang waktoe di djaman Soeitiauw, Lie Bit dan Teng Kauwkim poenja tempat berhimpoen. Menoeroe kabar itoe Thio Sieh ada gaga perkasa, terlebi poela mendapet bantoeanja Soldadoe Kim, tentoe kakoeatanja aken djadi bertamba lipat-lipat, hingga djangan kita berlakoe gegaba,“ berkata Tjoe Boe: „Sekarang sabelonnja moesoe sampe, haroeslah kita diriken koeboe-koeboe di samping goenoeng, adaken barisan ronda di ampat pendjoeroe, soepaja satoe pada laen bisa saling menoeloeng kaloe ada kaperloeanja.“
„Itoelah ada satoe pikiran bagoes.“ kata Lie Eng jang menjataken satoedjoenja. Dan sigra di pili orang-orang jang boeat mendjaga dan samboet datengnja moesoe.
Sabagi barisan ronda laloe diangkat Tjioe Thong Oan Swie, Houw jan Giok dan Tjhie Seng, jang kaloe ada apa apa diwadjibken barisan ini dateng menoeloeng. Marika itoe trima prenta lantas berlaloe.
Sedeng Tee Tjong berdoea Jan Tjeng dititaken mendjadi perantarahan goena perhoeboengan kasana kamari. Marika itoe trima prenta, lantas lakoeken kawadjibannja.
Boeat samboet datengnja moesoe jalah: Lie Eng, Ong Tjin, Kwan Siang bersama Houw-jan-Tjiak. Kamoedian diatoer koeboeh-koeboeh, menoeroet sabagimana voorstelnja Tjoe Boe.
Baroe sadja pengatoeran itoe slesih, balatentaranja Pit Hong jang berdjalan dengen tjepet, telah sampe ka itoe tempat dan lantas diriken pasanggrahan di bawa goenoeng.
Kerna napsoenja membales ada begitoe keras, maka baroe sadja sampe Pit Hong dan Thio Sien lantas madjoeken tentaranja, sambil boenjiken tamboer perang aken menangtang pada moesoe.
Pit Hong dan Thio Sien dengen poeter sendjata laloe memaki kalangkaboet. Tapi ini doea orang jang soeda ingin berantem, tida oesah menoenggoe terlaloe lama, sebab itoe waktoe djoega dari fihak moesoe soeda kaloear tandingannja.
Dari itoe barisan jang dateng ada kaliatan ampat orang, jaitoe Lie Eng dengen sadereknja, sabagimana baroesan telah terseboet.
„He, Lie Eng! sisa kawanan Liangsan jang terkoetoek! Pemboenoe dari akoe poenja soedara, sekarang akoe dateng bikin pembalesan!“ treak Pit Hong dengen soeara keras
„He, petjoendang jang tida poenja maloe, madjoelah!“ berkata Lie Eng sambil poeter toembaknja.
Pit Hong dengen amat goesar laloe kis, dan kamoedian bales menjerang.
Di sitoe lantas terbit satoe pertempoeran jang sengit. Doeapoeloe djoeroes telah berlaloe, tapi belon ada kaliatan jang menang atawa kala.
Thio Sien jang ada di samping merasa tida tahan boeat tinggal liatken sadja, maka ia petjoet koedanja aken madjoe membantoe.
Dengen golok Samtjiangliangdjinto ia madjoe menjerang, tapi Kwan Siang jang liat begitoe laloe madjoeken toenggangannja dan angkat ia poenja golok Tjengliongyangwatto boeat tahan madjoenja moesoe.
Begitoelah Thio Sien djadi bertaroeng pada Kwan Siang dan doea pasang moesoe ada sama oeletnja.
Itoe waktoe Lie Eng jang soeda berperang sakean lama lantas berpikir: lebi baek lepasken Hoeijto, dari berperang lama-lama. Begitoelah dengen sampok goloknja Pit Hong, ia lantas lariken koedanja.
Ini moesoe jang sombong dan kira Lie Eng sabenernja telah kala, dengen tida pikir lebi djaoe lantas memboeroe. Tapi sasoedanja deket satoe golok melajang toeroen dan hantem tanganja, jang satelah kena, lantas bertreak lantaran kasakitan.
Sekarang Pit Hong jang dikedjer oleh moesoe dan Lie Eng jang ada di fihak menang, lantas memboeroe teroes.
Thio Sien jang lagi berantem pada Kwan Siang, satelah dapet taoe jang kawannja dapet karoesakan, djadi kaget. Itoe waktoe jang baek Kwan Siang lantas menjerang teroes dan kasi satoe poekoelan jang heibat, hingga membikin Thio Sien jang gaga perkasa djadi amat ripoe.
Leng Tjin jang berdiri di poentjak goenoeng dan liat keadahan moesoe soeda djadi kaloet tantas boenjiken meriam pertandahan, jang itoe waktoe lantas kaloear ampat barisan bantoe menerdjang di kiri kanan.
Houw-jan Giok dengen sendjata laloe masoek dari depan, menjerang ka dalem. Tjhie Seng dengen barisannja poekoel dari sebla kiri. Tjioe Thong dan Oan Swie djoega madjoe merapet, hingga moesoe terkoeroeng di tenga-tenga.
Thio Sien dan Pit Hong jang liat datengnja moesoe begitoe santer, lantas tjari djalanan merat. Dengen sendjatanja ia melawan sabisa-bisa boeat kaloear dari kepoengan, dan baek djoega kadoeanja ini ada orang-orang gaga, hingga bisa djoega marika lolosken diri.
Tapi soldadoenja jang berdjoembla sariboe orang, tjoema katinggalan brapa poeloe sadja. Kadoeanja itoe lari teroes sampe di gredja Bankengsi, di sitoe marika berpapasan pada Lauw Gie dan Tok Louw jang baroe dateng.
„Ah, tjilaka betoel itoe kawanan brandal ada terlaloe, gaga!“ kata Pit Hong sambil gojang-gojang kapala: „sariboe soldadoe soeda djadi abis, hinggga tjoema brapa orang sadja jang masi katinggalan.“
Mendenger begitoe Lauw Gie gojang kapala dan berkata:
„Apa, dari bermoela djoega akoe telah bilang, kaoe berdoea moesti hati-hati dan djangan andelken sadja kagagahan sendiri. Sekarang njata di fihak moesoe ada lebi gaga dan pande, maka baeklah di laen kali berhati-hati.“
Kamoedian Lauw Gie toelis satoe soerat, menoeroet sabagimana kahendaknja That Lay, boeat bitjara lebi doeloe dengen baek, kaloe betoel dari fihak lemmatjwan tida maoe taloek, baroelah madjoe menjerang.
Tatkala itoe Lie Eng soeda balik kombali ka tempatnja berhimpoen, jang katanja, maski soeda kalaken Thio Sien dan Pit Hong, tapi Lauw Gie bersama Tok Louw aken dateng, maka haroeslah semoea soedara-soedara bersadia.
„Ja, itoelah ada dengen sapantesnja,“ kata jang laen-laen.
Salagi marika beromong-omong, satoe pengawal dateng membri taoe, bahoewa di loear ada dateng orang soeroehannja Lauw Gie jang minta katemoe. Lie Eng jang tida mengarti maksoednja moesoe, laloe berkata:
„He, apatah maksoednja Lauw Gie kirim oetoesan ka mari?“
„Masa apa lagi, tentoe hendak adoe lida,“ kata Tjoe Boe: „boleh djadi djoega ia maoe dateng memboedjoek. Tapi baeklah soeroe masoek, soepaja kita bisa taoe apa maksoednja jang betoel.“„“
Lie Eng lantas soeroe pengawal pintoe silaken masoek.
Orang jang dioetoes ini ada bernama Thio Po, berasal dari Souw Tjioe. Satelah mendenger dititahken ka dalem, lantas sadja ia masoek dengen kalakoean gaga, kerna ia poen anggap jang dirinja ada oetoesan, tentoelah orang-orang di lemmatjwan bakal mengindaken.
Lie Eng samboet dengen hormat dan silaken doedoek.
„Tjiokhe poenja kadatengan tentoe ada membawa kabar baek. Maka silakenlah toetoerken maksoed itoe.“
„Kita-orang ada trima prentanja Tjee Thaytjoe dateng di sini, aken mengoendang kaoe sakalian dateng bekerdja di bawah prentanja, jang tentoe bakal dapet kasenangan dan kamoeliahan, Inilah maksoednja akoe poenja kadatengan.“
Perkatahan ini dikaloearken dengen soeara kakoe Seperti djoega ia anggap jang Lauw le bener-bener ada Keizer jang mamerenta, hingga Lauw Gie dipandang sabagi Thay joe
„Minta kita-orang bekerdja pada Tjeekok?“ membales Lie Eng dengen soeara njaring: „Kita ini semoea ada ponggawe dari Taysongtiauw, jang belon sekali pernah bikin perhoeboengan pada pamerenta mana djoega, mergapatah diminta kita bekerdja padanja ?“
„Apatah Tjiangkoen tida taoe, jang Taykimkok soeda berlakoe menoeroet betoel sabagimana kahendaknja Thian,“ kata Thio Po dengen membikin soearanja djadi keren: „dan begitoelah dengen kainginannja orang banjak, telah diriken Tjeekok jang diprenta oleh Tjee Ong. Samantara lemmatjwan jang termasoek dalem bilangan Hopak dan jang ada termasoek djoega dalem daerahnja Tjee, maka orang-orang di sini ada teritoeng rahajatnja. Tje Thaytjoe soeda denger Liatwi poenja nama, maka titah akoe sabagi oetoesan dateng mengoendang soepaja kaoe berame bisa diriken pahala. Tapi kaloe kaoe masi bentahan dan maoe oendjoek kagagahan sendiri, pastilah bahaja dateng soeker tertjega.“
„Sebab ini perkara moesti didamiken doeloe pada jang laen-laen, harep Tjiokhe soeka bernanti boeat samantara waktoe, sampe akde bikin permoefakatan pada jang laen-laen,“ kata Lie Eng, jang kamoedian prenta tentaranja bawa oetoesan itoe ka atas goenoeng, aken ditahan sabagi tawanan.
„Apatah sasoenggoenja ia kira kita-orang nanti soeka berhamba pada satoe penghianat seperti Lauw le?“ kata Ong Tjin, Leng Tjin dan jang laenjaen: „kita berame ada Taysong poenja mantri, jang sampe mati djoega tida nanti maoe berhamba pada pembesar begitoe matjem. Apatah tida bener begitoe?“
„Itoelah bener sekali,“ saoet Kwan Siang dan Houw-jan Tjiak: „kerna dapet kakalahan di medan perang, maka beroentoeng kita-orang soeda bisa katemoe pada Tjiongwi Hengte di sini, jang ada mempoenjai itoe maksoed moelia. Maka kita berame dengen sapenoehnja hati soeka korbanken diri aken kapentingannja negri dan djoengdjoengan jang lama. Sekarang apa tida baek kaloe kita poekoel Taybenghoe, rampas bombali saloeroe Hopak dan binasaken itoe penghianat Lauwa le dengen satoeroenja?“
„Tjiongwi poenja perkatahan ada bener sekali,“ saoet Tjoe Boe: „tapi sekarang belon waktoenja boeat kita bergerak begitoe djaoe. Hanja sasoeda bisa binasaken pasoekannja Lauw Gie dan Pit Hong, kita haroes djaga baek tempat sendiri, aken bernanti kabar Lioe Sioe Tjong Tek, baroe bergerak lebi djaoe,“ „Tapi boeat mendjaga ini tempat poen boekan perkara terlaloe gampang,“ saoet Jan Tjeng: „samantara apa jang kita berlakoe pada Thio Po, tida bedah sabagi menawan padanja, maka Lanw Gie jang dapet ini kabar, tentoe lantas madjoeken pasoekannja boeat menjerang. Maka menoeroet pikirankoe baek digoenaken satoe tipoe boeat kalaken moesoe, soepaja kamoedian kita bisa mengadep ka Kidoel aken katemoeken Tjio Lioe Sioe, dan bangoenken poela karadjahan jang telah ilang pamoernja.“
„Itoe poen baek sekali,“ berkata jang laen: „tapi tipoe bagimana Janheng ada pikir?“
Jan Tjeng lantas njataken pikirannja tentang itoe tipoe.
Sasoeda ditoetoerken, semoea jang mendenger djadi girang. Lie Eng lantas sadiaken sagala kaperloean boeat bersiap.
Itoe waktoe Lauw Gie jang ada bernanti di Bankengsi, sasoeda menoenggoe tiga hari lamanja tida ada kabar dan tjerita tentang Thio Po, lantas djadi oering-oeringan.
„Kaloe diliat begini gelagatnja, pastilah kita poenja oetoesan telah dianiaja oleh itoe kawanan brandal,“ kata Lauw Gie: „sebab kaloe betoel tida begitoe, masatah sampe sekarang tida ada kabar dan tida ada tjerita?“
Laen-laen orang jang bekerdja di bawah prentanja poen pada mendoega begitoe, makan Lauw Gie djadi goesar dan laloe siapken balatentaranja, kerna merasa tida sabar boeat menoenggoe lebi lama.
Sigra djoega ia angkat Thio Sien dan Pit Hong mendjadi Sianhong, sedeng ia berdoea Tok Louw lantas kapalaken barisan Tiongkoen, berangkat ka lemmatjwan.
Satelah sampe, di tempatnja moesoe kaliatan soenji. Lauw Gie prenta Thio Sien kaloear menangtang, tapi tida ada saorang jang ladenin.
Sasoedanja bermaki-maki satenga hari, tapi tida djoega ada jang saoetin, panglima itoe balik kombali.
Besoknja, noesanja dan pada hari jang katiga, di waktoe sore kadengeran soeara meriam, berbareng itoe barisan lemmatjwan laloe kaloear.Tapi boekannja satoe, hanja banjak orang.
Orangnja Lauw Gie satelah liat begitoe, boeroeboeroe dateng melapoer. Maka Lauw Gie dangen tida bernanti lebi lama lantas siapken pasoekannja madjoe ka depan.
Lauw Gie dengen memake kopia jang ditantjepin boeloe ajam, pakean perang dari mas dan toenggang saekor koeda bagoes, sembari lintangken Hongtianhoakek, madjoe ka depan sambil menjatji tida brentinja.
Koenjoeng-koenjoeng kaliatan Kwan Siang, maka amaranja Lauw Gie djadi bertamba besar. Dengen tjepet ia menjerang. tapi kaboeroe ditangkis oleh itoe lawanan jang gaga. Sasoedanja bertempoer sakean djoeroes, Lauw Gie merasa tida tahan dan lantas melarikan diri.
Thio Sien bersama Pit Hong madjoe ka depan. Tapi sabelonnja apa-apa, Lie Eng telah sampe dan lantas samboet itoe moesoe, sedeng jang satoenja telah dilawan oleh Houw-jan Tjiak.
Sasoedanja berantam kira-kira doeapoeloe djoeToes, Pit Hong jang doeloe telah kena Lie Eng poenja Hoeito, loekanja djadi terboeka kombali dan tida sanggoep melawan lebi lama. Baroe sadja inget maoe lari, Houw-jan Tjiak poenja roejoeng telah sampe dan membikin dirinja terplanting dari atas koeda.
Thio Sien jang liat kawannja djato, lantas lepas pada Lie Eng dan menoeloengi kawan sendiri. Tapi baroe sadja ia sampe, Jan Tjeng jang berdiri di bawah bendera lantas lepasken satoe anak pana dan menantjep dengen djitoe di poendaknja, hingga djato dari koeda.
Kwan Siang bersama Tjioe Thong jang liat begitoe lantas memboeroe dan dengen golok ia tabasken lehernja itoe doea moesoe. Tapi apa tjilaka golok itoe beradoe, hingga Pit Hong dan Thio Sien kaboeroe kelip dan lantas melariken diri. Houw-jan Giok liat begitoe lantas membri tanda soepaja balatentaranja madjoe menjerang, hingga soldadoe Kim jang terboenoe boekannja sedikit dan Lauw Gie bersama Tok Louw laloe tarik pasoekannja sampe di gredja Bankergsi, dengen dapet karoesakan boekan sedikit.
Lauw Gie jang dipetjoendangken begitoe roepa, djadi amat gemas dan bersoempa maoe sapoe sampe bersi kawanannja Lie Eng, boeat ilangken rasa goesar dan penasaran. Kamoedian toelis soerat dan prenta soldadoenja bawa ka Taybenghoe, boeat minta bala bantoean.
Lie Eng sasoedanja poelang ka pasanggrahan lantas prenta orang kaloearken Thio Po dari tahanan dan panggal batang lehernja aken goena sembajangken bendera. Prenta mana dilakoeken dengen sigra.
Boeat mengedjer pada moesoe dibitjaraken lebi djaoe dan kamoedian barisan dipetja tiga, jaitoe Ong Tjin bersama Houw-jan Tjiak diprenta mendjaga pintoe blakang. Tjioe Thong bersama Tjhie Seng dan Houw-jan Giok mendjaga di samping kanan, sedeng Lie Eng bersama Kwan Siang dan Oan Swie menoenggoe di depan. Sasoeda pasoekan ini teratoer beres, itoe waktoe hari telah malem dan Kong-soen Sin laloe riap-riapken ramboetnja sembari batja dowa, jang tida lama kamoedian oedara mendjadi gelap dan geloedoek berboenji menggeloegoeran.
Berbareng itoe lantas toeroen angin besar hingga deboe dan pasir terbang berhamboeran.
Oedjan poen lantas toeroen seperti ditoewang-toewang.
Dengen pasang meriam barisan ini lantas madjoe ka Bankengsi dan menjerang tentara Kim jang ada di itoe tempat sambil bersoerak-soerak.
Itoe waktoe Lauw Gie bersama kawan-kawannja, lantaran pertempoeran jang dilakoeken waktoe siang, soeda djadi amat tjape dan tidoer mengeros-geros. Tapi satelah denger soeara riboet-riboet, marika djadi amat kaget dan lantas tersedar, di loear soeda kaliatan banjak api obor dan soldadoenja lagi belari-lari.
Lauw Gie, Thio Sien dan Pit Hong lantas boeroe boeroe ambil sendjata. Tapi sabelonnja ia bisa berboeat apa-apa, lantas terdenger letoesannja meriam dan temboknja gredja Bankengsi mendjadi roeboe dan menimpa pada Lauw Gie, hingga toeboenja djadi gepeng sabelonnja bisa melawan moesoe.
Thio Sien waktoe kaloear telah berpapasan pada Houw-jan Tjiak, jang lantas angkat roejoengnja dan timpaken dikapalanja itoe moesoe, jang sigra djadi antjoer dan otaknja belarakan ka aga.
Pit Hong dan Tok Louw jang meliat itoe kadjadian, soeda tida ingetan boeat melawan dan lantas melarikan diri ka djoeroesan Wetan, tapi baroe berdjalan belen sabrapa djaoe dapet diliat oleh Kwan Siang, jang lantas memboeroe bersama sama Lie Eng.
Sasoedanja berantem sakoetika lama, Pit Hong binasa di tangannja Oan Swie, jang diam-diam soeda hantem kapalanja dari samping. Sedeng Tok Louw denger soeara treaknja itoe kawan, djadi kaget dan menoleh, hingga Lie Eng poenja golok lantas sampe dan kapalanja itoe panglima terlempar dari poendak.
Dalem sedikit tempo sadja soldadoenja Radja Wali Itam ahis binasa. Kerna jang masi idoep jantas melariken diri
Itoe waktoe hari soeda ampir fadjar.
Di sana sini kaliatan bangke orang bertoempoek seperti goenoeng, dara jang mengalir ada seperti djalannja aer di solokan. Rahajat lemmatjwan dapet poenggoet banjak sendjata dan koeda, dan dalem ini paperangan Lie Eng dapet kamenangan besar.
Sigra djoega ini barisan ditarik poelang, jang sembari djalan bersoerak-soerak tida brentinja.
Sasampenja di atas goenoeng marika laloe berkoempoel di Tjigiethia dan Lie Eng poedji tipoenja Jan Tjeng, jang sasoenggoenja ada mendatengken hasil bagoes.
Tipoe itoe jalah: waktoe Lauw Gie menjerang lemmatjwan, diam-diam Jan Tjeng minta Lie Eng prenta Leng Tjin pergi ka sakiternja gredja Bankengsi pendem obat casang, dan waktoe Lauw Gie poenja barisan balik kombali, dynamiet itoe laloe disoeloet, dengen terbantoe oleh ilmoenja Kong soen Sin.
Satoe perdjamoean lantas diadaken dan itoe semoea Hohan laloe doedoek makan minoem dengen sagala soeka hati, sedeng rahajat goenoeng jang toeroet dalem itoe paperangan, semoea dapet persenan, jang membikin marika djadi girang.
Salagi doedoek minoem-minoem Lie Eng berkata:
„Maski sekarang kita dapet kamenangan, tapi kaloe itoe soldadoe-soldadoe jang melariken diri soeda katemoe pada That Lay dan kasi taoe atas kamatiannja Lauw Gie, Tok Louw, Thio Sien dan Pit Hong, pastilah itoe panglima Kim aken djadi goesar dan tida maoe soeda dengen begitoe sadja Kaloe kamoedian ia geraki pasoekan besar boeat poekoel kita poenja tempat, kita poenja keadahan jang begini roepa tentoe tida sanggoep bertading padanja.“
„Maka menoeroet pikirankoe,“ kata poela itoe Twako: „baek sekarang kita lantas berangkat ka Selatan aken dateng pada Tong Lioe Sioe, belon taoe bagimana Tjiongwie Hengte sakalian poenja pikiran?“ Semoea Hohan menjataken satoedjoe dengen itoe pikiran, maka Lie Eng laloe prenta bersiap boeat berangkat.
Orang-orang prampoean lantas dikoempoelken djadi bebrapa kreta, soepaja begitoe barisan ini soeda berdjalan, sagala pasanggrahan boleh dibakar.
Sigra djoega diatoer: Houw-jan Tjiak, Jo Liem Oan Swie, Houw-jan Giok dan Tjhie Seng djadi barisan depan. Lie Eng bersama Kong-soen Sin Tjioe Thong, Tja Tjin, Jan Tjeng dan Touw Hin djadi barisan tenga boeat melindoengken kaoem prampoean. Kwan Siang, Tjoe Boe, Pwe Soan Tjoa Ging dan Leng Tjin djadi barisan blakang, aken mamegat kedjerannja moesoe atawa orang djahat. Sedeng Tee Tjong jang ada mempoenjai ilmoe djalan tjepet, dititahken mendjadi penilik dan djoeroe kabar.
Sasoedanja mengatoer beres semoea barisan, mariam lantas dipasang dan pasoekan itoe berangkat ka djoeroesan Kidoel. Di sapandjang djalan tempat di mana pasoekan itoe liwat, tida soeatoe apa jang, menghalangi
Tida lama kamoedian telah sampe di deket soengei Hongho
Aer soengei jang besar ada kaliatan berombak-ombak, hingga membikin sasoeatoe orang jang liat djadi merasa seram Di pinggir itoe bengawan jang besar ada berdiri satoe pasanggrahan besar, jang di sakiternja ada terpager dengen golok dan toembak, sedeng bendera Radja Wali Itam ada kaliatan berkibar-kibar.
Djoeroe kabar jang baroesan pergi ka tepi kali dateng mengadep pada Lie Eng; bahoewa di itoe soengei tida ada kalialan şabidji praoe jang boleh digoenaken boeat menjebrang.
Mendenger begitoe Lie Eng lantas diriken pasanggrahan. Sekarang marika berdaja boeat menjebrangken itoe kali jang lagi pasang, soepaja perdjalanan bisa diteroesken lebi djaoe.
Itoe waktoe kali Hongho soeda djadi wates dari daerah Tjee dan Tjouw; samantara di tepi Oetara ada terdjaga oleh pasoekan Kim jang dikapalaken oleh panglima besar, nama Ouw Lok, dimana Ong Pah jang soeda berhianat djoega ada bersama sama mendjaga di sitoe.
Tatkala itoe lakoenja Ong Pah djadi samingkin sombong, kerna ia kira dirinja ada berpahala besar pada Kimkok; apapoela ia dipakerdjaken sama-sama itoe panglima Kim jang berkoeasa besar dalem oeroesan tentara.
Sasoedanja pasanggrahan berdiri rampoeng, Lie Eng laloe koempoelken sakalian soedara-soedara angkatnja, aken berdami lebi djaoe.
„Ini tempat didjaga dengen keras oleh balatentara Kim, jang dikapalaken aleh Ouw Lok dan Ong Pah“ kata Lie Eng: „sekarang di itoe soengei tida ada satoe praoe jang boleh dipake boeat menjebrang, maka kita poenja keadahan tentoe djadi soeker sekali. Soepaja bisa liwat dengen laloewasa, akoe rasa moesti petjaken doeloe pasanggrahan moesoe, soepaja tida mendjadi halangan boeat kita menjebrang.“
„Itoelah bener sekali,“ kata Ong Tjin: „kaloe moesoe jang mendjaga tida dikasi laloe lebi doeloe, kita poenja pasoekan tentoe tida bisa menjebrang dengen gampang, sebab sabrapa boleh marika tentoe maoe bikin halangan.“
Houw-jan Tjiak jang denger namanja Ong Pah ada toeroet mendjaga bersama-sama Ouw Lok di sitoe, djadi amat gemas. Sebab menginget, lantaran Ong Pah poenja berhianat, pasoekan Kim djadi bisa menjebrang dengen gampang, dimana kamoedian poekoel kota Piankeng sabagi orang membela bamboe, hingga achirnja kadoea Keizer sampe tertawan. Ini semoea ada Ong Pah poenja gara-gara
„Ah, itoe penghianat!“ kata Houw-jan Tjiak dengen sengit: „orang djahanam itoe maski dagingnja digerogot n, masi belon tjoekoep boeat djadi hoekoemannja.“
Kamoedian Og Tjin dan Houw-jan Tjiak minta permisi boeat poekoel pasanggrahan moesoe, permoehoenan mana lantas diloeloesken. ..Baeklah,“ kata Lie Eng: „tapi kaloe Djiwi maoe pergi, haroeslah berhati-hati. Boeat Ong Pah jang tida ada saloe goena, memang troesa diboeat koeatir, tapi Ouw Lok ada sanget gaga dan tida boleh diboeat gegabah.“
Ong Tjin berdoea trima itoe pesenan sambil memanggoet, kamoedian siapken limaratoes babatentara, menoedjoe ka pasanggrahan moesoe.
Ini doea panglima jang menginget keadahannja Ong Pah samingkin inget bertamba gemas. Kerna dirinja poenja tjilaka, semoea ada dari lantaran perboeatannja si penghianat. Hingga ia kapingin sekali bisa tangkep dan tjingtjang dagingnja, boeat membikin hatinja djadi poewas.
Sasoedanja marika berangkat, Lie Eng laloe siapken poela satoe pasoekan boeat membantoe, soepaja di waktoe perloe bisa dateng menoeloeng.