Pembalesannja Kawanan Liangsan/Bagian kadoea/Bab 1

by Tong Th. Fuctriorider

BAGIAN KADOEA.
I
Meliwatken, tempo, doedoek minoem sambil menjanji.—Goeroe dan moerid berlaloe dari Djisiangsan.

Djisiangsan ada satoe goenoeng jang bagoes dan bertana gemoek. Poehoen-poehoen jang toemboe di sitoe ada idoep dengen soeboer, teroetama poehoen-poehoen bamboe jang berdaon idjo, di waktoe pagi ada memberi pemandangan jang indah sekali.

Di itoe goenoeng ada satoe gredja jang di seboet Tjihikiong, dan tida djaoe dari gredja terseboet, ada berdiri satoe goeboek, jang maski tida sabrapa besar, tapi ada dirawat dengen resik dan membri pemandangan jang melegahken hati.

Njatalah goeboek itoe ada tempat kadiamannja orang pertapahan.

Kaloe orang mendoega begitoe; doegahan ini poen tida terlaloe sala. Kerna goeboek itoe poen boekan laen dari tempatnja Kong Soen-sin.

Siapa adanja itoe Kong Soen-sin?

Sabelonnja madjoe lebi djaoe dalem tjerita, ada perloe aken ditoetoerken dengen ringkes keadahannja ini orang, mengambil bagian besar dari kawa jang dalem ini hikajat ada mengambil bagian besar dari kawan-kawannja jang laen.

Kong Soen-sin ada satoe iman, jang ada mendjadi djadi djoega Song Kang poenja sala satoe dari soedara angkat.

Salaennja gaga, Kong Soen-sin ada mempoenjai kasaktian dan ilmoe- ilmoe jang tinggi, hingga di antara 108 soedara di Liangsan, ia ada sala satoe dari orang-orang jang dimaloein dan terpandang. Tapi kendati ada mempoenjai kapandean gaib, toch Kong Soen-sin tida angkoe, malah menjinta pada itoe sakalian soedara-soedara, sebagai soedara poetoesan peroet.

Lantaran ini djoega, maka dirinja djadi terpandang dan dihormat.

Sadari berpisa pada Song Kang di kota Piankeng, sampe sekarang soeda berselang brapa taon lamanja. Saban-saban kaloe menginget keadahannja, itoe Twako, hatinja merasa piloe dan mata djadi mengembeng aer.

Tatkala itoe Tjoe Boe angkat ia mendjadi goeroe. Maka bersama-sama ini moerid, Kong Soen-sin berlaloe dari kota Piankeng dan balik ka Djisiangsan, di ini tempat ia berdiam boeat tapaken ilmoe dan soetjiken badan, dengen toeroenken djoega banjak peladjaran-peladjaran pada moeridnja itoe.

Sasoedanja berdiam di sini sedikit waktoe iboenja jang soeda toea menoetoep mata, sedeng Lo Tyindjin jang mendjadi goeroenja. djoega dalem itoe taon telah poelang ka tempat jang bakah.

Brapa sedi dan doeka hatinja Kong Soen-sin di itoe waktoe, inilah dengen kalam tida bisa ditoetoerken.

Banjak aer mata telah ditoempaken, kaloe ia inget bagimana besar boedinja. itoe orang toea dan goeroe. Tapi sekarang apa mace dikata, makan maoe atawa tida ia hiboeri sadja hati sendiri dengen berkata: bahoewa manoesia memang di satoe tempo moesti meninggal doenia, hingga perkara mati itoe tida boleh diseseli.

Dengen menginget begitoe, hatinja jang pepatioe djadi terhiboer djoega.

Sasoeda mengoeroes: iajonnie itoe goeroe on iboenda. pada soeatoe hari jang baek ia tjari satoe tana boeat tempatnja mengoeboer. Kamoedian, sasoedanja selesih mengoeroes perkara kamatian, ia balik kombali ka. Djisiangsan dan diriken satoe goeboek di blakang gredja Tjihikiong, sabagaimana di sebla atas pembatja telah liat.

Goeboek itoe tida besar, tapi djoega tida terlaloe ketjil. Tjoe Boe. merawati goeroenja ini dengen radjin dan soenggoe hati, hingga itoe goeboek jang kaliatannja amat saderhana, ada mendjadi. satoe tempat kadiaman jang enak boeat orang jang soetjiken diri.

Pada waktoe menganggoer Kong Soen-sin soeka djalan-djalan dan liat di sekiternja itoe tempat. Di pinggirnja pekarangan atawa pelataran ia tanemi poehoen-Poehoen Siong dan bamboe koening, hingga pemandangan di sitoe djadi bagoes sekali.

Deket itoe goeboek ada satoe kali dimana aernja jang djerni ada mengalir deres, dan kaloe aer itoe berdjalan di batoe-batoe ketjil, soearanja djadi mengerotjok seperti orang menjanji.

Ini kali ketjil ada berlegot-legot saperti oeler naga jang lagi memaen. di atas boekit. Dan kaloe orang maoe dateng ka itoe goeboek, moesti lintasi satoe djembatan ketjil jang ada di depan goeboeknija Kong Soen-sin. Pada sakiternja pejataran ada toemboe banjak roempoet-roempoet idjo, jang di waktoe pagi ada membri hawa amat njaman.

Soenggoe keadahan tempat itoe tida bedah seperti tempatnja dewa-dewa. Begitoe soetji dan permei.

Kaloe orang doedoek di gubuk bagian sebla loear, ia nanti bisa memandang ka tempat-tempat djaoe dengen merasa. legah di hati. Sedeng bagian jang sebla dalem, oleh Kong Soe-sin dibikin sabagi tempat membatja kitab. Kong Soen-sin dan moeridnja sahari-hari tida bekerdja laen dari pada menjakinken ilmoenja.

Tjoe Boe pada sahabisnja menerima peladjaran, lantas tjari kajoe boeat masak thee dan nasi, atawa tanem sajoer-sajoeran boeat djadi temennja barang hidangan.

Binatang-binatang jang soeka kaliatan di sitoe, jaitoe boeroeng-boeroeng jang berterbangan ka sana sini, dan di waktoe sore binatang bersajap itoe tidoer di poehoen-poehoen Siong dan bangoen di esok pagi sambil menjanji-njanji.

Pendengeran itoe ada menjenangken sekali bagi telinga, kerna njanjiannja itoe machloek-machloek jang tida mengenal dosa, ada soetji sekali.

Demikianlah sahari-hari Kong Soen-sin berdoea moeridnja toentoet pengidoepan sabagi dewa-dewa.

Sadari marika tinggal di sini, brapa taon telah berlaloe.

Dalem sakean waktoe jang liwat, ilmoenja jang ditapaken samingkin lama djadi samingkin tinggi.

Sedeng Tjoe Boe ada jakini betoel apa jang goeroenja adjari, dan lantaran radjinnja beladjar, maka ia poen ada banjak mempoenjai ilmoe-ilmoe jang gaib dan moedjidjat.

Pada soeatoe hari di moesin Tjhioe, lantaran tida ada pakerdjahan apa-apa jang moesti dioeroes, Kong Soen-sin laloe djalan-djalan ka kebon kembang seroeni. Dan waktoe meliat jang itoe semoea poehoen-poehoen soeda mengaloearken boenga, hatinja djadi merasa girang dan lantas prenta Tjoe Boe bikin sedia sedikit barang makanan dari sasajoeran boeat djadi temennja minoem, sedeng boeat djadi. gantinja arak ada diambil aer kalapa.

Makanan ini ada dirasaken enak sekali oleh Kong Soen-sin dan moeridnja, jang memang sakean lama telah toentoet sabagi orang-orang pertapahan. Djoega dalem sabagitoe lama marika tinggal di sini, iaorang tida dahar lagi nasi, hanja boeat gantinja itoe barang makanan jang bisa mengenjangken peroet, dimasak sadja kembang Siong, jang poehoennja sabagimama di atas pembatja telah liat, ada banjak di sitoe.

Sembari dahar Kong Soen-sin memandang di sakoeliling tempat dengen hati legah, dan dengen tida merasa lagi ia bérkata pada sang moerid jang ada di dampingnja

„Liatlah, apa tida. senang kita poenja pengipan di tempat jang soetji begini?, jang maski ada di tempat soenji, tapi ada bersi dan djaoe dari napsoe-napsoe temaha jang biasa berada dalem pikirannja sasoeatoe manoesia.”

Tjoe Boe memanggoet, menjataken benernja sang goeroe poenja perkatahan.

„sabetoelnja memang soeda lama akae niat oendoerken diri dari pergaoelan manoesia di doenia,” kata poela Kong Soen-sin: „tapi roepanja kahendak Allah soeker dilawan, kerna sabelomnja niatankoe itoe terkaboel, akoe soeda terseret oleh soedara-soedara, jang achirnja terpaksa akoe tjeboerken diri ka dalem boesanja paperangan dan lakoeken pemboenoehan jang begitoe heibat.

„Tapi beroentoenglah pada sasoedanja merasaken banjak perkara-perkara jang menarik hati, akoe poenja pikiran tida djadi mabok kaägoengan dan kamoeliahan di doenia, hingga tindakan jang. soeda madjoe begitoe djaoe, akoe bisa oendoerken kombali dengen tida melangka ka loear wates dari pergaoelan jang begitoe berbahaja.

„Oh, soenggoe ngeri!, ngeri sekali kaloe sampe moesti terdjeroemoes sampe begitoe dalem. Boektinja: liatlah Song Kong -beng, jang lantaran seantero otaknja ada penoeli dengen rasa Tionggi, jang seantero pikirannja ada katarik dengen kabesaran, kasenangan dan kamoeliahan doenia, toch achirnja tida oeroeng ia moesti beigoelet teroes antara mati dan idoep, terlibet dengen perkara-perkara jang soeker dan mendoekaken hati."

„Apa goenanja itoe?, apatah goenanja itoe semoea?!

„Orang idoep di doenia tida lebi sabagi mengimpi. Kebesaran kasenangan dan kamoeliahan doenia tida bisa kekal. Betoel seperti orang mengimpi, jang begitoe tersedar, semoea lantas djadi linjap, djadi abis, seperti awan jang tersapoe angin.

„Dan kaloe soeda begitoe, ja, tida laen dari pada tinggalken sadja inget-ingetan di dalem pikiran, jang berachir aken meloekaken hati.

Djadi njatalah itoe segala kamoeliahan dan pangkat besar, kaägoengan dan sabaginja, semoea itoe ada kosong belakah. Sapoeloe kali kita poenja keadahan ada lebi senang di sini, jang tida memikiri perkara doenia, tida tjapeken hati dan mempoesingken otak, sabagimana orang-orang di doenia salaloe ada teroeroek dengen itoe roepa-roepa perasahan dan pikiran.

„,Di ini tempat pagoenoengan, sagala kasenangan jang kita dapet kekal adanja. Pemandangan alam jang bagoes kita bisa meliat saban hari. Hawanja jang njaman ada membikin segar kita poenja otak, angin jang aloes ada menioep satiap hari. Dan ini semoea, sabegitoe masi ada doenia, sabegitoe lama djoega kita nanti menampak dengen, tida poetoes-poetoesnja. Baoenja kembang-kembang jang wangi salalve ada berkesioer dengen tida ada abisnja."

Begitoelah Kong Soen-sin berkata-kata, sedeng Tjoe Boe tinggal mendengeri. Dalem sapandjang waktoe salagi goeroe itoe memoedji-moedji kasenangannja marika poenja pengidoepan, kaloe ada perkatahan-perkatahan jang dioetjapken seperti soeara menanja, si moerid memanggoet menjataken benernja.

Sahabisnja berkata begitoe Kong Soen-sin tertawa sambil menepok-nepok tangan, hingga Tjoe Boe jang ada di sitoe, djoega toeroet tertawa dan tepok tangan menjataken kagirangan.

Gelas jang berisi aer kalapa laloe diminoem kering, dan Tjoe Boe laloe toewangken poela. Sasoedanja gelas jang paling blakang djoega diminoem isinja, sembari menepok tangan goeroe itoe menjanji-njanji aken menjataken kasenangan- nja, jang maksoednja ada seperti berikoet:

,,Saban waktoe dan saät. perkara doenia ada terpoeter, Beroba-roba begitoe tjepet, laksana roda jang santer, Perboeatannja orang-orang pande, gaga dan pinter, Bisa membikin hati jang tetep djadi merasa tergeter!"

.,Oh, doenia! doenia jang besar dan loewas!... Dimana banjak orang memboeka mata, memandang dengen awas, Siapa jang koerang tjeli, djiwanja nanti tiwas, Orang jang bodo nanti djato sendiri, seperti boewa jang lowas."

,,Kabesaran dan kamoeliahan djadi soeatoe barang reboetan, Kaägoengan jang teroetama ada di dalem sasoeatoe ingetan, Ampat pendjoeroe boemi, Kidoel-kaler-Koelon dan Wetan, Ingin berpangkat besar, ingin memangkoe soeatoe djabatan."

,,Ketemahaan dan karakoesan ada penoeh di dalem pikiran, Hingga satiap waktoe oenoes sendjata, tempoer-tempoeran, Menang dan kala, dateng berganti bergilir-giliran, Achirnja,.. ja, achirnja; marika masoek ka dalem koeboeran.

,,Oh, apatah itoe jang di seboet kamoeliahan dan kaagoengan? Itoe semoea tida lebi dari kosong angin dowangan! Tida ada satoe kaperloean, traada satoe kapentingan! Manatah ada lebi senang dari kita, orang di pagoenoengan ?" Njanjian itoe disamboet oleh Tjoe Boe seperti berikoet:

„Baek djoega kita-orang tramempoenjai pikiran begitoe.
Orang pagoenoengan seperti kita, bisa liat gelagat dan waktoe.
Kita-orang soeda memboewang sendjata dan tinggalin sepatoe, Oendoerken diri, lari ka loear-ka laen pintoe.“

„Dari doenia kita-orang telah tinggalken kawan dan sobat,
Dengen maksoed djaoeken diri, dari pergoeletan jang heibat,
Doedoek bertapa, soetjiken diri boeat bertobat,
Asah pikiran di tempat soetji, boeat naeki martabat.“

„Ini pagoenoengan ada tempat jang soetji dan sepi,
Tapi lebi menang dari apa jang doeloe kita hadepi,
Tempat jang njaman begini, memademken panasnja hati jang berapi,“

Kaserakahan dan katemahaan, tida nanti dateng menghinggapi.

„Oh, tana pagoenoengan! jang sedjoek dan soenji!...
Kita oendoerken diri boekannja kenji,
Tapi maoe bersenang-senang, makan minoem sambil menjanji,
Atawa mendengeri soearanja boeroeng-boeroeng jang lagi berboenji“

„Kasenangan begini, adalah sabagi kasenangannja dewa-dewa,
Maski bertempat di goeboek toch tida mendjadi ketjiwa,
Goeroe bersama moerid, kita-orang tinggal berdoewa,
Kita-orang teroes tinggal begini sampe di hari toewa“.

Begitoelah iaorang berpantoen saling saoetan, boeat menjataken bagimana senang hatinja marika itoe ada.
Tjoe Boe toewangken lagi itoe aer kalapa di gelas goeroenja.
Tapi baroe sadja iaorang bersenang-senang sampe di sitoe, dari djaoe kaliatan satoe Totong berlari-lari menoedjoe ka itoe tempat. Totong itoe ada satoe moerid ketji! jang biasa mengoeroes goeroenja poenja kaperloean sahari-hari. Maka waktoe meliat datengnja itoe moerid ketjil, Kong Soen-sin laloe mengawasi dengen heran.

„Soehoe!, Soehoe!, tjilaka ini sekali!" kata itoe Totong dengen napas tersengal-sengal, pada waktoe ampir sampe di hadepaunja Kong Soen-sin: „di sakiternja gredja Tjihikiong telah dikoeroeng oleh barisan soldadoe, dan doea panglima jang kapalaken itoe barisan ada berkata: atas prentanja Tong Djoebit marika dateng ka mari boeat tangkep pada Soehoe. Dan kaloe marika taoe Soehoe ada di sini, pasti tida lama lagi iaorang aken dateng.”

Kong Soen-sin djadi terkedjoet, kerna tida taoe lantaran apa tentara negri telah dateng ka ini tempat. Tjoe Boe mengawasi goeroenja dengen tida berkata-kata. Tapi itoe goeroe sigra soeda bisa tetepken hati dan laloe kaloearken saroepa ilmoe soepaja orang-orang jang nanti dateng tida dapet liat padanja.

Kaloe Kong Soen-sin soeda kaloearken ini ilmoe boeat semboeni di blakang poehoen Siong bersama kadoea moeridnja, itoelah boekan dari lantaran ia merasa takoet pada itoe tentara negri, hanja ia maoe liat doeloe apa jang aken terdjadi. Lantaran maoe dapet katerangan lebi doeloe, maka ia tida maoe lantas toeroen tangan.

Sasaät telah berlaloe.

Bener sadja tida lama kamoedian kaliatan Thio Hiong bersama Kwe Keng telah sampe di itoe tempat bersama sarombongan soldadoe, lagi tjari pada Kong Soen-sin.

Tapi pertjoema. Di bebrapa tempat jang soeda dipreksa, orang jang ditjari itoe tida katemoe. Oleh kerna tida maoe pertjaja Kong Soen-sin tida ada di sitoe, maka Thio Hiong laloe hamperi pada itoe bebrapa Totong-totong jang soeda ditangkep, boeat ditanja dan dikompes, ka mana perginja marika poenja goeroe.

„Hajoe bilang lekas, kaloe kaoe tida maoe djadi binasa,“ kata Thio Hiong dengen soeara mengantjem:,,kaloe kaoe tida maoe bilang di mana goeroemoe ada, tentoe akoe bawa kaoe berame boeat dikasi hoekoeman.“

„Sasoenggoenja kita-orang tida taoe ka mana Soehoe telah pergi,“ saoet sala satoe dari itoe Totong-totong jang paling gede: „sabagimana jang akoe taoe, baroesan Soehoe ada di kebon seroeni, lagi makan minoem. Djoega Soehoe boekan tinggal di gredja Tjihikiong, hanja di itoe goeboek jang kaliatan dari sini, jang ada di blakang dari ini klenteng, dan itoelah ada tempat kadiamannja.“

„Djoega, sabagimana jang kita-orang berame ada taoe,“ kata poela itoe moerid ketjil: „soeda bebrapa taon lamanja kamariken, Soehoe tida ada pergi ka mana-mana. Boekan sadja melantjong, hanja toeroen dari goenoeng poen tida. Maka heran sekali bagimana Tjiangkoen boleh sangka akoe poenja Soehoe jang soeda bikin riboet di Pakkeng?”

Bermoela Kwe Keng berdoewa Thio Hiong tida maoe pertjaja bitjaranja itoe sakalian moerid ketjii, kerna doega sedikitnja marika maoe lindoengken Kong Soen-sin, hingga iaorang tida maoe kasi katerangan ka mana Soehoenja telah lari. Tapi satelah semoea Totong ditanja dan djawabannja ada saroepa sadja, maoe atawa tida, terpaksa itoe doea pemimpin balatentara djadi pertjaja.

Tapi marika belon merasa poewas kaloe belon dapet Kong Soen-sin. Kwe Keng mengawasi pada Thio Hiong, seperti maoe tanja, bagimana kawan sadjabat itoe poenja pikiran dalem ini perkara.

„Bagimana sekarang?” tanja ia.

„Ja, bagimana,” saoet Thio Hiong; „kita soeda tjari di sakoeliling ini tempat, tapi itoe orang tida ada. Boleh djadi ia soeda lari, waktoe denger kita poenja balatentara maoe dateng ka mari.”

„Apa Tong Djoebit tida nanti djadi koerang senang, kaloe kita poelang dengen tangan kosong sadja?”

„Itoelah boleh didoega. Tapi soepaja tida menerbitken sangkahan apa-apa, atawa didoega kita tida bekerdja dengen soenggoe hati, apa tida lebi baek, kaloe ini semoea Totong jang tertawan, kita bawa poelang sadja, dan serahken pada Tong Djoebit?"

„Ja, begitoelah betoel."

„Laen dari begitoe, kita boleh prenta soldadoe

angkoet djoega itoe sakalian barang-barang jang ada di gredja Tjihikiong, dengen ramsoemnja djoega sakalian, soepaja kaloe Kong Soen-sin balik kombali, ia soeda tida mempoenjai barang makanan."

Kwe Keng memanggoet.

Sahabisnja berdami, Thio Hiong laloe prenta soldadoe oebrak-abrik itoe gredja dan angkoet sakalian barang-barangnja, jang lantas djoega dilakoeken oleh soldadoe-soldadoe dengen girang.

Dalem sedikit tempo sadja, itoe gredja koeno jang tadi ada penoeh dengen barang perabot, sekarang telah mendjadi kosong, katjoeali sebrapa roepa barang jang tida berharga, ada menggeletak malang melintang.

Sasoedanja itoe semoea djadi beres, Kwe Keng jang ada mendjadi kapala dari itoe barisan, lantas komendir soldadoenja toeroen goenoeng, aken berangkat poelang.

Waktoe soeda moelai sepi, Kong Soen-sin laloe pergi ka gredja Tjihikiong dan satelah ia dapet liat itoe keadahan, hatinja djadi merasa piloe dan mengelah napas beroelang-oelang sambil gojang kapala. Tjoe Boe tida bisa berkata soeatoe apa.

Kong Soen-sin laloe djalan lagi sedikit djaoe, dan dapetken satoe Totong jang bisa semboenikea diri dengen tida katangkep, dari dia ini Kong Soen-sin laloe menjataken katerangan.

Itoe Totong laloe kasi tjerita apa jang baroesan ia telah denger.

„He, heran sekali ?!" kata Kong Soen-sin dengen melengak: „dari manatah datengnja ini omongan?"

Sadari kita-orang dateng ka ini tempat, dalem bebrapa taon lamanja boekan sadja tida pergi ka kota-kota, hanja melantjong poen tida," kata poela ia: „bagimana dikata akoe terbitken kaonaran di Pakkeng? Ah. ini semoea tentoe soeda terdjadi lantaran sala mata, atawa ada orang jang pake akoe poenja nama."

Tjoe Boe mengelah napas, roepanja kaliatan amat doeka.

Kong Soen-sin berkata poela:

„Tjoema kasian kita poenja Totong-totong jang tida bersala, soeda moesti ditangkep dengen zonder rasa oleh itoe soldadoe-soldadoe. - Ah, siapatah sabenernja jang poenja perboeatan, hingga kita moesti alamken ini kabintjanahan ?"

„Oh, ja, sekarang akoe baroe inget, Soehoe," kata Tjoe Boe jang sasoedanja berdiam sedikit lama: „pada bebrapa hari jang laloe, waktoe akoe toeroen goenoeng membeli hio, dari bebrapa orang akoe ada denger, katanja sekarang di lemmatjwan ada berkoempoel banjak brandal jang amat brani lakoeken perampasan dan boenoe djoega pembesar negri. Apa tida boleh djadi jang dalem ini perkara ada tersangkoet sama itoe kawan begal di tempat terseboet, iang brangkali soeda lakoeken kadjahatan ini atawa itoe, kamoedian telah pake Soeloe poenja nama?"

Kong Soen-sin tida menjaoet, hanja toendoeki kapala salakoe orang berpikir dan inget-inget, siapa adanja begal di itoe tempat.

Tapi hal itoe ia tida dapet inget soeatoe apa.

„Siapa kapalanja begal itoe?" tanja Kong Soensin kamoedian: „apa kaoe tida denger jang namanja itoe kapala begal diseboet?"

„Menoeroet katanja orang-orang jang taoe, kapala dari itoe kawanan begal ada bernama Lie Eng," saoet Tjoe Boe: „dengen bebrapa kawannja jang gaga perkasa, ia soeda boenoe pembesar negri jang lagi lakoeken kawadjibannja. Tapi, maski bagimana djoega, toch boekan sapantesnja, kaloe kita di sini jang tida ada baoe-baoenja pada itoe kawanan brandal, sampe moesti terembet-rembet."

„Apa boleh djadi, waktoe melakoeken kadjahatannja itoe kawan begal telah pake atawa seboet-seboet akoe poenja nama?" kata Kong Soensin: „itoelah sekali-kali akoe tida bisa pertjaja. Tapi, kaloe tida begitoe, kenapa itoe tentara negri boleh dateng ka mari. Ini soenggoe akoe tida mengarti?"

„Kaloe menoeroet akoe poenja pikiran," kata Tjoe Boe! „sekarang baek kita berlaloe sadja dari ini goenoeng dan tjari laen goenoeng boeat djadi kita-orang poenja tempat tinggal. Dan dalem sapandjang djalan itoe kita boleh pergi djoega kalemmatjwan boeat serep-serepin ini perkara. Belon taoe bagimana Soehoe poenja pikiran, satoedjoe atawa tida?"

Kong Soen-sin |manggoetken kapala, njataken moefakat dengen pikirannja itoe moerid.

Kadoeanja itoe laloe berangkat djalan menoedjoe ka goeboeknja. Kerna Thio Hiong dan Kwe Keng tida dateng ka ini tempat, barang-barang di itoe goeboek tida ada jang terganggoe.

Goeroe bersama moerid laloe masoek ka dalem dan boengkoes bebrapa roepa barang jang berharga dan perloe dibawa.

Sasoedanja selesih memboengkoes itoe, Kong Soen-sin laloe adjak Tjoe Boe djalan ka blakang goenoeng dan liwat di sapandjang djalanan jang sepi, dengen ambil djalan jang menoedjoe kalemmatjwan.

Waktoe maoe tinggalken Djisiangsan. Kong Soen-sin poenja hati ada merasa amat berat, sedeng Tjoe Boe jang soeda toeroet Soehoenja tinggal di sitoe sakean taon lamanja dengen tida koerang soeatoe apa, merasa sedi di hati.

Tapi apatah marika bisa berboeat?

Dengen tegoeken hati orang tinggalken djoega itoe tempat jang tertjinta, dan berdjalan teroes dengen tida berkata-kata.

Di perdjalanan tida ada apa-apa jang penting boeat ditjeritaken. Maka liwat doea hari marika telah sampe di bilangan lemmatjwan.

Dari kadjaoean Kong Soen-sin dan Tjoe Boe dapet liat bendera-bendera jang berkibar dan alat sendjata jang teratoer, seperti orang jang bersedia boeat lawan kadatengan moesoe. Pengatoeran itoe ada rapi, bebrapa thaubak ada berdjalan moendar mandir sambil memegang sendjata.

Satelah ampir sampe di itoe tempat, brandal pada mengawasi, sabagimana biasanja orang jang, toedjoeken matanja pada korban.

Tapi sabelonnja rahajat itoe bergerak tangan Tjoe Boe laloe hamperi marika itoe dan berkata dengen soeara keras:

„He, lekas kasi taoe pada kaoe poenja kapala, bahoewa di loear ada Kong Soen-sin dan Tjoe Boe maoe minta katemoe pada kaoe poenja kapala-kapala dari ini perkoempoelan!"

Mendenger begitoe, itoe bebrapa rahajat lantas berlari-lari aken kasi taoe pada Lie Eng, bahoewa di loear ada doea orang maoe minta ketemoe, dengen seboetken djoega namanja itoe kadoea tetamoe.

Tatkala itoe dalem ini roewangan djoestroe ada berkoempoel Lie Eng dengen sadereknja jang lagi berdami oeroesan perang. Antara mana ada teritoeng djoega Oan Swie dan Tjoa leng, jang selang bebrapa hari telah sampe di ini tempat.

Sabagimana pembatja taoe, bermoela Tjoa leng memang niat boeat mengoembara teroes ka laen-laen tempat, tapi berhoeboeng dengen perkara jang kadjadian di atas, itoe orang gaga djadi oeroengken niatnja dan bersama-sama Oan Swie ia laloe balik kombali ka lemmatjwan, dan lantaran itoe djoega, maka sekarang Tjoa leng berada kombali di sini.

Lie Eng bersama kawan-kawanja satelah denger itoe lapoeran, djadi amat girang dan lantas kaloear menjamboet.

Sasoedanja bertemoe, satoe pada laen laloe djalanken peradatan dan kahormatan sabagimana pantesnja, kamoedian itoe Twako dari lemmatjwan oendang dengen hormat Kong Soen-sin sama moeridnja masoek ka roewang pertengahan.

Di sitoe memang telah disadiaken banjak korsi. Maka sasoedanja membri hormat, kadoea tetamoe itoe disilaken doedoek.

„Soenggoe kita-orang merasa girang sekali, jang ini hari bisa bertemoe kombali pada soedara," kata Lie Eng dengen paras berseri-seri: „sakean lama soedara soeda pisaken diri dan masoek di pergaoelannja Sinsian-sinsian, inilah kita berame telah denger; dan belon taoe angin apa ini hari jang membawa soedara berdoewa dateng kamari? Tapi maski bagimana djoega, haroes dibilang jang pertemoean ini ada membawa kita-orang poenja kagirangan dan kaberoentoengan."

„Ah, soenggoe akoe poen tida doega, kaloe ini hari poenja perdjalanan bisa bertemoe pada sakalian Hengte," saoet Kong Soen-sin:,,soeda lama djoega akoe telah denger orang bilang, jang di lemmatjwan ada koempoelan orang-orang gaga, tapi sekali-kali akoe tida doega, kaloe Enghiong itoe ada soedara berame."

„Akoe poenja dateng ka mari poen sabenernja," kata poela Kong Soen-sin: „boekan laen dari pada hendak serep-serepin keadalian di ini tempat."

„Ah, soenggoe?" menanja itoe sakalian Hohan dengen girang.

„Ja," djawabnja itoe iman sambil memanggoet.

Kamoedian ia tjeritaken apa lantarannja marika poenja kadatengan. Kerna Kong Soen-sin kata, ia tida mengarti begimana dirinja boleh disangka telah bikin riboet di kota Houwjokkwan dan ditoedoe djoega telah toeroet tjampoer dalem pemboenoehan Pang Pioe. Kerna kapingin tave siapa adanja orang-orang jang betoel telah lakoeken itoe pakerdjahan, maka ia bersama Tjoe Boe telah dateng di ini tempat.

Mendenger itoe perkatahan, semoga Hohan djadi tertawa dan kamoedian pada memandang pada Oan Swie.

Ini orang berilmoe poen toeroet tertawa dan berkata:

„Ah, soenggoe akoe menjesel sekali, jang lantaran perboeatankoe, sampe soedara merasaken itoe perkara jang tida enak. Dan soepaja kaoe berdoea bisa dapet taoe doedoeknja perkara, baeklah akoe toetoerken itoe semoea.”

Sahabisnja kata begitoe, Oan Swie laloe tjeri- taken bagimana pada sasoedanja berpisa dari Song Kong-beng, ia poen ada djalan mengoembara ka koeliling tempat. achirnja di soeatoe hari ia telah sampe di kota Houwjokkwan dan denger Kwe Keng menjombongken diri dari kapandeannja.

Blakangan, lantaran Kwe Keng jang mengakoe Todjin tangtangi ia mengadoe ilmoe, trima itoe tangtangan dan djatoken moesoenja, sampe ia dioendang oleh Lie Liang-sih aken mampir di roemanja.

Pada sabelonnja dateng ka roemanja itoe pembesar kota, Oan Swie kata, ia dapet liat Tjoa leng; dan bersama-sama ini sobat, ia laloe Liang sili poelang.

Lebi djaoe ia tjeritaken, bagimana pada itoe malem ada dateng Tong Koan poenja oetoesan jang hendak mengoendang Kwe Keng, tapi sala satoe dari itoe orang-orang soeda dapet liat Tjoa leng, jang lebi doeloe dari ini ada bantoe Jo Liem dan Touw Hian merampas Lie Eng, dan boenoe Pang Pioe. — Dan lantaran ini, maka Tjoa leng maoe ditangkep, lantaran Tjoa leng ada bersama-sama padanja, maka ia poen maoe ditangkep. Tapi ia soeda goenaken ilmoe djalan di dalem tana dan teroes lari.

Begitoelah Oan Swie tjeritaken doedoeknja perkara dengen terang.

Sedeng halnja Lie Eng jang ditangkep dan dirampas oleh Jo Liem, Touw Hian dan Tjoe leng, ada ditoetoerken oleh kawan-kawannja jang laen, dengen begitoe, baroe Kong Soen-sin mengarti doedoeknja perkara.

„Ini penangkepan jang dilakoeken dengen kliroe, sampe membikin Hengtiang djadi disangka dan tempat kadiaman dioebrak-abrik oleh Tong Kwan poenja tentara," kata Lie Eng: "seperti djoega ada dengen kahendaknja Allah; kerna lantaran itoe hingga membikin Djiwi Soetiang bisa dateng ka mari."

„Ja, sasoenggoenja hal ini ada seperti Allah poenja kamaoean," kata jang laen-laen dengen soeara berbareng.

Lie Eng berkata kombali:

„Ini waktoe poenja keadahan telah djadi beroba. Maski poen ada radja, tapi seperti tiada, kerna pamerentahan dan kakoeasahan ada di atas tangannja pembesar-pembesar dorna jang berpikiran gelap, jang salaloe menggoenaken kakedjemannja boeat menganiaja rahajat dan pendoedoek jang tida bersala.

„Oh brapa soesa adanja orang-orang ketjil di ini waktoe, itoelah dengen perkatahan tida bisa diterangken. Keadilan soeda tida ada lagi, lantaran itoe, hingga prikeamanan dan kasadjatrahan poen telah linjap bersama-sama. Seantero tempat tempat poenja anak negri pada bertreak dan sasambat jang sanget memiloeken hati.

„Meliat doenia soeda tida ada atoerannja, kerna dibikin tebalik-balik oleh kawanan dorna maka kita berame soedara lantas bermoefakat boeat gerakan ini peroesahan besar, dengen maksoed boeat landjoetken apa jang doeloe Song Kong-beng Koko di Liangsan telah djalanken, tapi dengen tida berhasil.

„Kita poenja gerakan ini belon sabrapa lama. Tapi toch tida brentinja kita-orang berichtiar boeat lengkepken alat sendjata dan balatentara, boeat membikin koeat kita poenja persadiahan aken laloeken itoe perniatan besar jang terkandoeng. Dan ini perniatan, roepanja ada disoeka oleh Allah, kerna kita poen hendak mendjalanken keadilan, maka djoega Allah membantoe dan bikin itoe penangkepan djadi kliroe, jang achirnja membikin Djiwi Soetiang bisa dateng ka ini tempat.

„Sekarang, sasoedanja Hengtiang sampe di sini, kita-orang harep dengen sanget soepaja Hengtiang soeka boeat tinggal teroes di sini salakoe pemimpin, sedeng kita-orang berame nanti mendjoengdjoeng sagala titah dan atoeran jang kaoe adaken. — Demikianlah kita-orang poenja niat, maka djoega akoe bilang, jang ini perkara bener ada sabagi kahendaknja Allah."

Apa jang dikata oleh Lie Eng, semoea Hohan benerken dan minta Kong Soen-sin soeka trima itoe tawaran.

Tapi Kong Soen-sin manampik sambil berkata:

„Soenggoe menjesel jang Liatwie Hengte poenja permintahan akoe tida bisa trima, kerna sakean lama akoe telah oendoerken diri dari oeroesan doenia, hingga hati poen telah merasa dingin.

Maka kaloe pakerdjahan besar jang dimaksoedken itoe, akoe jang pimpin, akoe koeatir nanti djadi kapiran."

„Laen dari begitoe," kata poela Kong Soensin: „datengkoe ka mari poen boekan maksoed laen dari pada serepin itoe kabar, jang sabagimana tadi akoe telah toetoerken, kerna akoe kira ada orang maen gila dengen akoe poenja nama. ―Tapi sekarang, sasoedanja dapet taoe doedoeknja perkara jang bener, poen soeda tjoekoep, maka akoe harep Tjiongwie Hengte soeka membri idjin boeat akoe berangkat kombali aken tjari tempat kadiaman."

„Kita poenja soedara-soedara, sabagimana Hengtiang taoe, ada banjak sekali," kata Lie Eng: „marika ada menerbitken perkara-perkara jang berbentoeran pada negri, dan kadjadian ini poen bisa ditentoeken sekali, Hengtiang tentoe bakal katarik-tarik lagi akén tjape hati. Maka itoe, dari pada Hengtiang berlaloe ka laen tempat jang belon ada katentoeannja dan djoega tida begitoe gampang bisa lantas terdapet, maka akoe rasa ada lebi baek kaloe Hengtiang denger doeloe akoe poenja doea atoeran, jang kaloe sampe tida bisa ditrima baek, ja, apa-boleh-boeat, kita-orang tentoe tida brani paksa boeat menahan. Tapi ini atoeran jang saderhana dan ringan, akoe pertjaja bisa menjenangken Hengtiang poenja hati."

„Doea atoeran itoe, apatah adanja?" menanja Kong Soen-sin: „ja, kaloe bener itoe ada bersatoedjoe dengen akoe poenja pikiran, tentoe dengen senang akoe nanti menoeroet."

Mendenger itoe djawaban, ini Twako dari lem- matjwan djadi amat girang, sedeng jang laen-laen masi belon taoe, atoeran apa adanja itoe jang Lie Eng bakal toetoerken, hanja menoenggoe sadja dengen hati berdebar.

———