Pembalesannja Kawanan Liangsan/Bagian kadoea/Bab 2
II
Kong Soen-sin bersama moeridnja tinggal
di Pekhoenbouw. ― Lie Eng
dengen sadereknja moendoerin
tentara negri.
„Atoeran itoe boekan laen," kata Lie Eng sambil tertawa: „hanja pertama akoe maoe oendjoeki satoe tempat jang baek boeat djadi tempat tinggal; kaloe Djinheng rasa satoedjoe, harep tida menampik boeat tinggal di sitoe, dengen berdeketan pada kita-orang."
„Tapi tempat itoe di manatah?" tanja Kong Soen-sin.
Lie Eng laloe kasi taoe, bahoewa di bagian sebla blakang dari lemmatjwan, di bawah dari satoe tandjakan jang tinggi, ada terdapet satoe tempat rata jang loewas djoega, dan tempat itoe dinamaken Pekhoenbouw.
Di depan ada mengalir doea djalanan aer jang dateng dari atas tebingan, dan itoe aer jang djato mengerotjok ka bawah, berkoempoel sabagi rawa jang lebar. Aernja poen bening.
Di sapoeternja itoe Pekhoenbouw ada banjak poenhoen-poehoen Siong, batoe-batoe besar jang bagoes ada berdiri begitoe rapi seperti diatoer. Tegesnja tempat itoe ada bagoes sekali boeat djadi kadiamannja Kong Soen-sin.
Maski Pekhoenbouw kaliatan soenji, pemandangan alam ada bagoes sekali. Di waktoe sore banjak kadengeran soearanja boeroeng-boeroeng jang poelang ka sarangnja sambil menjanji. Hawanja poen amat sedjoek.
„Nah, kaloe Djinheng soeda liat dan merasa satoedjoe. di itoe tempat kita boleh diriken gredja ketjil boeat djadi Djinheng berdoea poenja tempat mejakinken ilmoe dewa," kata Lie Eng lebi djaoe: „,sedeng barang-barang kaperloean sahari-hari, kita di sini nanti adaken satjoekoepnja, inilah ada atoeran pertama"
„Dan kadoea," begitoe Lie Eng samboeng bitjaranja: „seande besok atawa noesa kita ada menampak perkara-perkara jang soeker, akoe harep nanti bisa dapet Djinheng poenja nasehat dan pikiran-pikiran jang berfaedah."
Semoea Hohan jang ada di sitoe djadi girang dan bantoe memboedjoek, soepaja Kong Soen-sin soeka loeloesken permintahannja Pokthiantiauw jang begitoe saderhana. Sedeng boeat Kong Soen-sin poenja penoelakan aken tampik djadi pemimpin dari lemmatjwan, tida dioelangken lagi.
Satelah denger perkatahannja itoe semoea orangorang gaga, ini iman berdiam sasaat aken berpikir. Achirnja ia rasa, pada sabelonnja dapet tempat jang katentoean, baeklah ini tawaran tida ditampik. Tapi lebi doeloe ia ingin menjaksiken bagimana keadahannja itoe tempat jang ini Twako dari lemmatjwan poedjiken.
Kamoedian orang-orang gaga itoe bangoen dari tempatnja doedoek, boeat anter Kong Soen-sin pergi liat itoe tempat jang baroesan diseboet.
Sigra djoega iaorang telah. sampe di Pekhoenbouw, dan Lie Eng laloe oendjoeki sambil membri katerangan apa-apa jang perloe.
Kong Soen-sin mamereksa dengen hati-hati. la pandang dari sagala djoeroesan dan menengok koeliling pada sagala keadahan jang ada di sakiternja meliat sakoetika lama, betoel sadja ia dapetken tempat itoe mengalir aer idoep, dengen bisa dapet djoega sarinja boelan dan matahari.
Papoehoenan dan batoe-batoe jang berdiri di tana datar, tida kala bagoesnja dari di Djisiangsan Dan sasoedanja memereksa selesih, sigra djoega ia njataken moefakat dengen itoe atoeran dan soeka boeat tinggal di sitoe.
Semoea Hohan djadi amat girang, kerna dengen berdiamnja Kong Soen-sin di Pekhoenbouw, jang maski tida bersama-sama di lemmatjwan, toeh. ada teritoeng orang dari kaoemnja djoega, jang di satoe waktoe bisa membantoe apa-apa goena marika poenja kaperloean dan kapentingan besar. Teroetama Lie Eng jang memang telah mengenal baek kesaktiannja ini iman. diadi girang dan itoe hari pada sasoedanja poelang ka tempat sendiri, ia prenta orang sadiaken barang-barang kaperloean boeat diriken gredja ketjil.
Kerna pakerdjahan boeat mendiriken itoe ada dilakoeken dengen radjin dan banjak orang, maka dalem bebrapa hari sadja telah rampoeng dan Kong Soen-sin bersama moeridnja laloe pergi tinggal di sitoe, dengen dilajani oleh satoe Siauwtong.
Tapi barang santapan Kang Soen-sin bilang troesa dianteri dari lemmatjwan, kerna ia tida perloe dengen barang-barang hidangan jang lesat, sabagimana itoe soedara-soedara jang laen.
Kahendak ini poen ditoeroet.
Demikianlah moelai dari itoe hari, Kong Soensin bersama moerid, Tjoe Boe, telah tinggal di Pekhoenbouw dengen senang. Di sitoe iaorang moelai jakinken kombali peladjaran jang sakean lama telah tertoenda.
Lima hari telah berlaloe.
Pada soeatoe hari, salagi Pokhiantiauw Lie Eng doedoek berhimpoen di Tjigiethia bersama sakalian soedara-soedaranja, satoe thaubak dateng melapoer: bahoewa tida djaoe dari ini tempat, ada kaliatan satoe angkatan perang jang terdiri dari sariboe atawa doeariboe balatentara, dengen terpimpin oleh doea panglima jang mengibarken benderanja Djoebit Tong Koan.
Angkatan perang itoe ada berdjalan dengen tjepet, jang tida boleh sala lagi, tentoe ada menoedjoe ka lemmatjwan.
Mendenger ini warta, Lie Eng lantas prenta Jo Liem berdoea Touw Hin atoer pendjagahan di tempat-tempat jang perloe. Tapi sabelonnja dapet prenta jang laen, djangan sekali kaloear perang.
Doea Hohan itoe trima prenta, lantas berlaloe.
Sabelonnja angkatan perang itoe sampe di ini tempat, baek kita moendoer bebrapa hari dalem ini tjerita, jaitoe di waktoe Kwe Keng berdoea Thio Hiong berlaloe dari Djisiangsan.
Sasoedanja toeroen dari itoe goenoeng dengen tida beroentoeng dapet tangkep Kong Soen-sin, doea panglima itoe laloe balik kombali ka Pakkeng sambil iringken itoe sakalian barang-barang rampasan dari gredja Tjihikiong, pada Tong Koan.
Kamoedian baroe ia hadepken itoe sakalian Totong-totong jang tertawan. Kwe Keng tjeritaken djoega, bahoewa Kong Soen-sin soeda melariken diri, dengen tida taoe ka mana perginja. Katjoeali moerid-moeridnja jang masi tinggal di sitoe, jang dapet ditawan.
Tong Koan laloe panggil itoe semoea Totong dan tanja padanja, ka mana ia orang poenja Soehe. Tapi itoe Totong-totong jang ditanja, tinggal tetep dalem penjaoetannja seperti jang marika soeda kasi djawaban pada Kwe Keng dan Thio Hiong.
Tong Koan tida maoe mengarti dengen ini katerangan, hanja tanja beroelang-oelang. dari soeara aloes sampe djadi kasar. Tapi sebab itoe sakalian Totong memang tida taoe dimana adanja marika poenja goeroe, bagimanatah iaorang bisa bilang?
Tapi blakangan, satelah liat Tong Djoebit djadi goesar dan maoe kasi rangketan, sala satoe dari itoe Totong jang paling besar dapet pikir: lebi baek kasi sadja katerangan sembarang-barang, dan katerangan itoe adalah, jang goeroenja brangkali soeda pergi ka lemmatjwan.
Ini katerangan jang dibriken dengen ngatjo-ngatjo, djadi kabeneran. Dan sebab Tong Koan memang niat basmi seantero kawanan Liang-san jang mengoembara ka sana sini, maka sigra ia prenta Kwe Keng berdoea Thio Hiong kapalaken lagi itoe barisan dan pergi ka tempat terseboet, jang ini kali terpimpin oleh Ma Tjhoen jang berpangkat Tothongtjhie, sabagi panglima besar.
Angkatan perang ini berdjalan teroes dengen tjepet, satelah ampir sampe di lemmatjwan, ia liat itoe goenoeng tempat di mana Lie Eng dan kawan-kawannja berkoempoel, ada tinggi. Sagala pendjagahan poen telah diatoer beres, bendera dan sendjata ada kaliatan seperti pager. Njatalah tida gampang boeat orang menjerang ka atas.
Itoe tiga panglima tida brani boeat menjerang sembarangan, maka sigra prenta soldadoenja koeroeng itoe tempat sambil gojangken bendera dan bersoerak-soerak.
Pada hari jang pertama dari atas itoe goenoeng tida ada jang toeroen, maka Matjhoen jang ada sabagi pemimpin, djoega tida menatangi. Di hari kadoea poen ia tinggal berdiam sadja sabagi di hari kamaren. Tapi pada waktoe lohor, pintoenja benteng lemmatjwan kaliatan terboeka dimana ada kaliatan tiga panglima jang amat gaga ka loear dengen menoenggang koeda.
Marika itoe lariken koedanja dengen kentjeng menoedjoe ka pasanggrahannja Kwe Keng; orang jang di tenga ada memake pakean perang dengen toembak Thiamtangtjio, di poendaknja ada tergantoeng lima popwe Hoeito dan kiri kanannja ada terapit oleh doea panglima jang gaga perkasa.
Orang itoe boekan laen dari Pokthiantiauw Lie Eng, Twako dari lemmatjwan, jang toeroen bersama-sama Oan Swie dan Jo Liem.
Soldadoe negri jang dapet taoe moesoe lagi mendatengi, laloe kasi taoe pada Tjoetjiangnja, dan Kwe Keng jang dapet itoe kabar, laloe siapken balatentara aken kaloear perang. Djaoe-djaoe satelah ia meliat pada Oan Swie, hatinja djadi amat panas dan laloe menoeding sambil berkata-kata.
Tapi Oan Swie tinggal katawain dan bales itoe hinaan, hingga, Kwe Keng djadi amat goesar dan salagi ia maoe memboeroe, Thio Hiong jang ada di sampingnja laloe doeloein menjerang, hingga Kwe Keng oeroengken niatnja dan tinggal mengawasi.
Thio Hiong ini ada satoe panglima jang gaga silatnja poen pande. Satelali soeda berhadepan, ia laloe angkat sendjatanja dan toesoek itoe dengen tjepet ka moekanja Lie Eng. Tapi ini Twako dari lemmatjwan, jang sadari doeloe ada terkenal gagah perkasa, lantas tangkis dan bales toesoek dengen toembaknja.
Kadoeanja itoe lantas berperang sengit.
Lie Eng poeter toembaknja begitoe siam, seperti djoega titiran, hingga Thio Hiong tida dapetken tempat jang kosong boeat menikem.
Sasoedanja berperang sapoeloe djoeroes, dan liat moesoenja masi tinggal gaga, Lie Eng lantas petjoet koedanja dan lari ka satoe, djoeroesan, hingga Thio Hiong jang tida taoe kaloe dirinja maoe tertipoe laloe mengoebar dengen tjepet.
Tapi di waktoe melariken diri, diam-diam Lie Eng soada tjaboet ia poenja golok wasiat dan lepas itoe ka oedara. Tida lama golok itoe toeroen dan mengenaken poendaknja, hingga Thio Hiong bertreak lantaran kasakitan dan kamoedian baliki kombali koedanja aken lari poelang.
Tapi Kwe Keng bersama Ma Tjhoen, jang liat kawannja dapet kakalahan, iantas dateng boeat menoeloeng, tapi telah dipegat oleh Oan Swie dan Jo Liem.
Tentara negri tida brani madjoe mendesak, koetika liat panglimanja melariken diri, marika poen lantas tertjere dan lari toempang sioer.
Oan Swie dan Jo Liem membri tanda pada sakalian liauwlo, jang lantas madjoe menjerang di waktoe kakaloetan begitoe. Kwe Keng dan Ma Tjhoen tida brani melawan, hanja lantas moendoerken barisannja dan baroe berdiriken kombali pasanggrahan kira-kira sapoeloe li djaoenja dari tempat jang bermoela.
Sasoedanja berkoempoel, Ma Tjhoen laloe preksa soldadoenja, ternjata dalem ini paperangan ada tigaratoes balatentara jang terboenoe, sedeng restannja banjak jang dapet loeka dan tida bisa madjoe kombali. Sedeng Thio Hiong jang kena djimat Hoeito, tinggal merinti lantaran kasakitan.
Kwe Keng kasi pikiran boeat samantara waktoe baek ditoenda sadja doeloe ini paperangan, dan boeat menambaken djoemblanja balatentara jang koerang, baek ini Tjioetjiang kirim soerat ka Pakkeng boeat kasi taoe pada Tong Koan, soepaja minta ditamba lagi soldadoe. Pikiran ini ditoeroet oleh Ma Tjhoen, jang lantas toelis soerat dan prenta satoe soldadoe pergi bawa itoe. Sedeng Kwe Keng sahabisnja membri advies, laloe pergi ka kamarnja Thio boeat membri obat.
Sedeng Ma Tjhoen dan kawannja lagi iboek dan doeka, sabaliknja Hohan-hohan di fihak lemmatjwan ada bergirang. Poelangnja Lie Eng di samboet oleh sakalian soedara-soedaranja, jang kamoedian masoek di Tjigithia aken berhimpoen.
Kong Soen-sin jang denger itoe kabar, laloe adjak moeridnja dateng menengoki dan tanja ten- tang itoe paperangan, jang lantas ditoetoerken satoe persatoe, bagimana moesoe soeda moendoer sapoeloe li djaoenja, lantaran dapet labrakan jang pertama.
„Kaloe liat angkatan perang negri jang dateng ka mari, jang terpimpin oleh Ma Tjhoen sabagi Tjioetjiang dan Kwe Keng berdoea Thio Hiong seperti pembantoe, itoelah sekali-kali tida mem- bikin kita-orang djadi koeatir," kata Lie Eng lebi djaoe: „kerna marika itoe boekannja orang-orang jang pande dalem ilmoe paperangan, dan tida mengarti tjara bagimana moesti atoer balatentara. Djoega ada lebi baek kaloe Tong Koan sendiri maoe dateng ka mari, soepaja kita basmi soldadoenja sampe bersi." „Tong Koan maski ada berpangkat besar dan mamegang kakoeasahan dalem balatentara, tapi dorna itoe tida sekali mempoenjai oeroesan perang," kata Kong Soen-sin: „hanja dalem djabatan itoe ia tjoema mengandeli sadja pada orang-orang sabawahannja. Maka kaloe ia dapet taoe jang angkatan perangnja Ma Tjhoen kita-orang soeda oebrak-abrik, pastilah hatinja mendjadi keder."
„Itoelah bener," saoet jang laen:,,tapi kerna di bawah prentanja ada mempoenjaji banjak balatentara maka lebi doeloe bisa didoega, jang boeat ini kakalahan ia tida tinggal diam dan tida lama aken kirim kombali satoe angkatan perang jang lebi besar boeat bertanding pada kita."
„Tapi, apatah tida lebi baek," berkata Tjoe Boe, jang djonga ada berdoedoek sama-sama di itoe roewangan:,,di waktoe moesoe lagi sedeng kaloet begini, kita menjerang kombali padanja dari ampat pendjoeroe, soepaja ia dapet karoesakan betoel-betoel? — Dan kaloe boeat kadoea kalinja poen iaorang dapet kakalahan besar, brangkali bisa membikin jang laen-laen djadi djeri sedeng Tong Koan sendiri boleh merasa katakoetan dan tida brani boeat mengganggoe lagi pada kita."
Perkatahannja Tjoe Boe lantas dibenerken oleh laen-laen Hohan jang ada di sitoe, sedeng Lie Eng poen ada merasa satoedjoe, maka sigra djoega ia menjataken girangnja hati dan lantas prenta siapken barisan boeat menjerang moesoe di waktoe malem.
Sorenja semoea liauwlo siang-siang soeda dibagi ramsoem, maka waktoe moelai liwat menggerib, ampat barisan soeda tersadia dan Lie Eng sendiri ada mengapalaken barisan Tiongkoen,
marika toeroen goenoeng dengen diam-diam menghamperi ka pasanggrahannja Kwe Keng.
Itoe waktoe ada sepi, dan barisan ini baroe sampe sasoedanja hari mendjadi malem waktoe mana soldadoe-soldadoe di pasanggrahannja Ma Tjhoen semoea soeda pada poeles, sedeng pemimpinnja tida ada satoe jang inget boeat atoer pendjagahan, maka iaorang baroe djadi tersedar waktoe denger di loear ada soeara riboet-riboet.
Ma Tjhoen berdoea Kwe Keng djadi amat gelagapan, maka kadoeanja laloe kaloear dari kamar, tapi sabelon sempet ambil gegaman, ia katemoe pada Lie Eng jang lagi mengamoek dan waktoe liat Ma Tjhoen jang belon bersadia, lantas sadja ia boeroe dan toesoek dengen toembaknja, sampe oedjoengnja toembak itoe menemboesi ka bla- kang.
Ma Tjhoen tida mengaloearken lagi freakan, hanja lantas djato dan abis napasnja. Sedeng Kwe Keng, satelah liat moesoe mendatengi, lantas boeboe-boeroe masoek kombali, koetika itoe ia katemoe pada Thio Hiong jang lagi selain koeda, kerna ini panglima jang dapet loeka poen ada denger jang moesoe dateng menjerang.
Kadoea orang ini tida niatan boeat melawan, hanja masing-masing lantas toenggang itoe koeda dan lariken dengen tjepet dan tida perdoeli lagi pada soldadoenja jang lagi dibasmi moesoe.
Tatkala itoe soldadoe negri jang di waktoe siangnja telah dapet kakalahan, soeda tida ada ingetan boeat melawan, hanja begitoe moesoe sampe, kaloe iaorang ttda kaboeroe diboenoe, masing-masing lantas melariken diri dengen tinggal ken barang-barang jang ada dalem itoe pasanggrahan, tapi jang terboenoe poen tida sedikit djoemblanja.
Lie Eng lantas prenta rahajatnja angkoet moesoe poenja koeda-koeda toenggang, ramsoem dan alat sendjata bawa ka lemmatjwan dan besoknja lantas dibikin pesta boeat membri slamat menang perang.
„Dengen ini kamenangan jang kita dapet," kata Jo Liem di waktoe berdjamoe:,,di fihak moesoe ada sabagi orang jang rontok djantjoengnja, kerna angkatan perangnja jang dateng pertama, semoea soeda tersapoe bersi; dan kaloe sisanja itoe balatentara dateng mengadep pada Tong Koan. tjeritaken apa jang soeda terdjadi. pastilah itoe dorna djadi amat katakoetan."
„Tapi kaloe kakalahan ini tida membikin hatinja djadi tjioet," kata Tjoa leng:,,sabaliknja tentoe ia geraken angkatan perang jang lebi besar boeat bertempoer pada kita, boeat membales sakit hatinja jang pertama."
„Ja, ini semoea poen boleh djadi," saoet Lie Eng: „tapi dari sekarang, sabelonnja negri poenja angkatan perang besar dateng, kita moesti bersa- dia, soepaja begitoe moesoe sampe, kita bisa lantas, samboet kadatengannja. Dan di sitoe iaorang liat, bagimana kita poenja koempoelan di lemmatjwan ada tjoekoep tegoe dan gaga."
Semoea Hohan benerken bitjaranja itoe Twako Perdjamoean itoe dilandjoetken sampe sore, dan sasoedanja itoe Lie Eng laloe atoer apa jang perloe Sekarang baeklah kita tinggalken doeloe pada ini Hohan-hohan di lemmatjwan. dan mari kita liat di fihak Tong Koan.
———