Pembalesannja Kawanan Liangsan/Bagian katiga/Bab 10
X
Boen Hwan-tjiang merasa soekoer pada
penoeloengnja. Sedeng An To-tjwani
teroesken perdjalanannja lebi djaoe.
Selang ampat-lima hari dari apa jang terdjadi di atas, Boen Hwan-tjiang laloe kasi taoe niatnja pada An To-tjwan, bahoewa ia maoe pergi ka kota Radja boeat ambil koelawarganja Siauw Djian bersama Kim Thay-kian, sabagimana jang baroe ini telah didjandji. Mendenger begitoe An To-tjwan lantas menanja apa Boen Hwan-tjiang sendiri jang maoe pergi, atawa hendak soeroehan orang.
„Oh, ini perkara tida boleh disoeroe orang, kata Hwan-tjiang: sebab kaloe tida beres, bisa mendatengken kagagalan.“
„Tapi Thayheng toch soeda beroemoer banjak?“ kata itoe thabib jang merasa tida tega boeat itoe orang toea berdjalan djaoe, tjoema lantaran boeat kaperloean sobatnja, jang soeda djadi tjilaka lantaran perboeatannja.
„Ah, itoelah tida apa,“ kata Boen Hwan-tjiang sambil tertawa: „maka Anheng troesa koeatir.“
Meliat niatanja ini sobat ada begitoe tetep, An To-tjwan poen tida menahan lebi djaoe. Maka malemnja dari itoe hari ia laloe toelis satoe soerat boeat Sioe Thay-wie, dalem mana ada dikabarken, bahoewa sekarang ia ada di ini tempat. Dan minta djoega itoe ambtenaar toeloeng bantoe apa jang perloe berhoeboeng dengen kapindahannja itoe doea familie poenja koelawarga.
Sasoedanja toelis selesih, sigra ia kasiken itoe pada Boen Hwan-tjiang, jang lantas trima dan masoeki ka dalem sakoe.
Esoknja pagi, dengen mengadjak doea pengikoet Boen Hwan-tjiang laloe berangkat ka kota Radja, jang satelah sampe ia laloe sampeken soeratnja An To-tjwan pada itoe ambtenaar besar, kamoedian pergi ka roemanja Siauw Djian dan Kim Thay-kian, boeat kasi taoe pada familie itoe doea orang, soepaja pinda dari kota Radja.
Masing-masing poenja kapala familie, sasoedanja liat itoe soerat, djadi amat girang dan itoe hari djoega marika laloe benah-benahken barang jang perloe moesti dibawa, dan sasoedanja selesih, marika laloe ikoet Boen Hwan-tjiang balik ka kampoeng sendiri.
Di waktoe pergi dan poelang, perdjalanannja ini orang toea tida mendapet halangan apa-apa, maka belon liwat doea minggoe, sigra djoega itoe oeroesan pinda soeda mendjadi beres hingga An To-tjwaa djadi amat girang, sedeng Boen Siotjia samboet marika dengen manis, seperti familie sendiri. Apapoela waktoe gadis ini moelai berkenalan pada anaknja Siauw Djian, jang di itoe taon ada sapantaran oemoer padanja.
Siauw Siotjia ada satoe gadis jang tjakep, sedeng pakerdjahan prampoean soeda boleh diandelin betoel. Dalem ilmoe soerat dan sairan, nona itoe ada paham djoega, kerna ia ada dapet peladjaran dari ajahanda sendiri jang pande dalem ilmoe soerat menjoerat, maka dalem sedikit tempo sadja kadoea nona itoe soeda menjinta seperti soedara poetoesan peroet.
Pada sorenja dari waktoe Boen Hwan-tjiang sampe di roema, An To-tjwan ada menanjaken tentang keadahan di Kota Radja.
„Apa Thayheng ada denger djoega tentang keadahan politiek atawa laen-laen oeroesan jang berhoeboeng dengen paperangan pada negri Liauw?“ tanja An To-tjwan.
„Ja, akoe denger djoega,“ saoet Hwan-tjiang, jang lantas tjeritaken, bahoewa Thay-wie ada tjerita padanja, tida lama bakal ada paperangan besar, hingga Tjoa Thaysoe sahari dengen sahari tida merepotin laen dari pada itoe oeroesan sadja. Djoestroe lantaran moesti oeroes pengadjaran baris dan persiapan sendjata, maka Thay-wie bisa loepoetin Siauw Djian dan Kim Thay-kian dari hoekoeman mati. „Ah, baek djoega kadoea sobatkoe bisa tertoeloeng,“ kata An To-tjwan: „tjoba kaloe tida, brapa besar akoe poenja rasa menjesel.“
Kamoedian ia bitjara-bitjara lebi djaoe, hingga sampe malem baroe pada masoek di kamar sendiri.
Selang brapa hari kamoedian, An To-tjwan katemoeken Boen Hwan-tjiang dan kasi taoe niatnja boeat berpisa, dengen alesan: hatinja merasa legah dengen kapindahannja itoe doea sobat poenja familie, djadi maskipoen sobatnja terhoekoem, tapi ia soeda taoe hoekoeman apa jang marika dapet. Pendeknja perkara itoe tida mengoeatirken lagi hatinja seperti pada sabelonnja mendapet katerangan.
Laen dari begitoe, hawa oedarn poen soeda bagoes boeat ia landjoetken poela perdjalanannja.
„Tida lama hari taonnja Tonggak Sengkoen telah sampe,“ kata poela itoe thabib: „maka idjinkenlah akoe berangkat ka Thay-an-tjioe boeat pasang hio, sakalian menengoki itoe kadoea sobat jang ada dalem hoekoeman.“
Bermoela Hwan-tjiang hendak menahan poela, tapi lantaran An To-tjwan bermoehoen dengen memaksa, terpaksa permintahan itoe moesti diloeloesken, dengen adaken satoe perdjamoean boeat membri slamat djalan.
Esoknja pagi sasoeda membri slamat tinggal pada orang saisih roema, thabib itoe laloe berangkat dengen ambil djalanan jang menoedjoe ka Tay-an-tjioe. Selang doea hari, sampelah ia di satoe kampoeng dan sigra ia masoek ka dalem waraeng aken bersantap.
Tapi satelah sampe di pertegahan, ada kaliatan doea oppas jang doeloe menganter Siauw Djian dan Kim Thay-kian, djoega ada di sitoe. Dan satoe antaranja, satelah liat An To-tjwan, lantas bangoen dan barkata:
„He, Thio Hoangwe djoega ada di sini?„
„Ja, djoestroe baroe sampe,“ saoetnja An Totjwaan.
Itoe oppas jang satoe poen lantas bangoen dan silaken thabib itoe berdoedoek. Kamoedian marika menanja: ka mana ini Hoangwe maoe pergi.
Itoe doea orang palitie, sampe di ini waktoe poen belon taoe, kaloe orang jang sekarang ada di hadepannja, ada itoe orang boeron jang di kota Radja lagi sedeng di tjari. sebab pada waktoe bertemoe, Kim Thay-kian bilang pada itoe doea oppas, jang orang ini ada Thio, Hoangwe, maka sekarang poen ia kira, bener-bener An To-tjwan ada satoe Hoangwe.
Atas pertanjahannja itoe oppas, To-tjwan kata: bahoewa ia dateng boeat pasang hio di Tay-an-tjioe, kamoedian balik menanja, apa ini doea oppas soeda sampe di Swaboentoh, tempat di mana itoe doea pesakitan moesti djalanken hoekoemannja.
„Belon, kita-orang belon sampe di sana,“ saoetnja sala satoe dari itoe orang politie: „dan boleh djadi ini kali kaloe poelang kita bakal dipetjat.“
„He, mengapa?“ An To-tjwan dengen tjepet, jang kapingin lekas mendapet taoe apa telah terdjadi dengen itoe doea orang sobatnja.
„Oh, Hoangwe tida taoe, dengerlah akoe tjerita,“ kata itoe oppas, jang lantas toetoerken, bahoewa perdjalanan ka Swaboentoh moesti liwati goenoeng Tenghoensan, dan baroe sadja marika sampe di sitoe, dari atas. goenoeng lantas toeroen brapa blas rahajat begal jang minta oewang tjoeke djalan. Tapi sebab marika memang tida membawa oewang, maka iaorang berdjalan sadja. Tapi koenjoeng-koenjoeng dateng kapala brandal jang lantas menerdjang dan tangkep marika berampat.
An To-tjwan menapas legah, ia dengerken lebi djaoe, dengen kapingin taoe bagimana achirnja.
„Tapi njatalah itoe doea pesakitan jang kita kira ada Sioetjay-sioetjay, hanja ada sobatnja itoe kapala brandal,“ kata poela si oppas jang melandjoetken tjeritanja: „satelah penjamoen itoe kenalin, sigra djoega itoe doea orang dilepas dan diadjak naek ka atas goenoeng, sedeng akoe berdoea ampir sadja dipanggal, kaloe tida dapet pertoeloengannja itoe doea orang. Kamoedian dengen dibriken oewang akoe disoeroe poelang kombali, sedeng itoe doea pesakitan, sampe sekarang ada di itoe goenoeng.“
An To-tjwan merasa girang betoel denger ini tjerita. Tjoba kaloe ia tida takoet nanti kataoean, tentoelah ia soeda berdjingkrak-djingkrak lantaran kagirangan.
Kamoedian itoe oppas jang satoe mamesen, baeklah An To-tjwan berhati-hati kaloe maoe liwat di itoe goenoeng.
An To-tjwan memanggoet, kamoedian sasoedanja bersantap, ia teroesken poela perdjalanannja.
Hatinja merasa girang mendenger tjeritanja itoe doea oppas, maka sigra djoega ia angkat kakinja bertindak dengen tjepet boeat pergi ka goenoeng Tenghoensan. Tapi baroe sadja berdjalan kira-kira satenga li, ia lantas dapet laen pikiran dan lantas marendak, sambil mengawasi ka depan.
„Boeat apa akoe pergi ka Tenghoensan,“ kata ia dengen soeara menggerendang: „sebab marika toch soeda katentoean tempatnja. Maka apa tida baek kaloe sekarang akoe pergi sadja ka Gakbio, tempat di mana Sinheng Thaypo ada berdiam ?“
„Ja, ja, betoellah, lebi baek akoe pergi ka itoe gredja,“ kata poela ia: „kaloe ternjata itoe kaba jang akoe denger tida betoel dan Tee Tjong tida ada di Gakbio, baroelah akoe pergi ka itoe goenoeng.“ Sabetoelnja memang soeda lama An To-tjwan denger orang kata, jang Tee Tjong ada berdiam di itoe gredja boeat soetjiken diri. Dan sekarang, lantaran inget itoe tjerita, maka niat pergi ka Thay-an-tjioe, dilandjoetken teroes.
Doea hari kamoedian sampelah ia di itoe kota.
Sigra djoega ia tanja-tanja orang di mana adanja itoe gredja, jang dengen tida banjak soesa, soeda lantas bisa dikatemoeken. Dan waktoe An To-tjwan sampe, djoestroe Sinheng Thaypo Tee Tiong ada di depan pinto e, maka tentoe sadja itoe orang gaga djadi amat girang, satelah meliat kadatengannja itoe sobat la ma.
„He, Anheng, angin apatah jang membawa kaoe ka mari ?“ kata Tee Tjong sambil boeroe-boeroe menjamboet, sedeng dari parasnja ada kaliatan amat girang.
To-tjwan saoeti satoe-doea perkatahan sambil bales hormatnja itoe sobat. Kamoedian dengen berpimpinan tangan, Tee Tjong adjak thabib itoe masoek ka dalem.
Satoe pada laen lantas berdoedoek, sasoedanja minoem thee jang baroe disadiaken, Tee Tjong lantas menanja tentang keadahannja ini thabib, jang kabarnja ada memangkoe djabatan dokter besar di kamar obat Thay-ie-wan, hingga dapet itoe kamoeliahan dan keagoengan.
„Sedeng di kota Radja kaoe ada begitoe senang, belon faoe kabar apa maka dateng ka mari,“ kata Tee Tjong.
„Akoe poenja perdjalanan jang sekarang, tida bisa ditoetoerken dengen ringkes,“ saoet An To tjwan.
Kamoedian ia lantas tjeritaken satoe persatoe apa jang di sabla atas pembatja telah taoe. Sasoeda mendenger itoe semoea, Tee Tjong laloe berkata:
„Kaloe begitoe, njatalah seperti Allah tida soeka hoeat kita-orang berdiam sadja dengen doedoek anteng, kerna mendadak boleh terbit perkara-perkara jang begitoe roepa. Tjoba liat, kaoe jang soeda mendjabat pangkat dokter besar, masi bisa kena perkara samatjem itoe.“
„Ja, sasoenggoenja ada bener sabagimana jang kaoe bilang, bahoewa Allah tida soeka liat kita berdiam sadja dengen anteng. Tapi kaoe ada lebi senang, kerna lebi siang kaoe soeda singkiri diri dari pergaoelan jang menjapeken hati dan terantjem bahaja, boeat soetjiken batin di tempat soenji.“
Sasoenggoenja djoega akoe niat begitoe. ― Tapi, tadi kaoe bilang maoe pasang hio? ― Oh, kabetoelan noesa ada hari lahirnja Sengkoen.
„Ja, noesa ada tanggal 28 dari boelan Shagwe. Kamoedian doea sobat itoe beromong-omong lebi djaoe, tapi sekarang boek an bitjaraken hal ang penting, hanja An To-tjwan kata: soeda lama ja denger orang tjerita, di ini tempat orang bisa iliat pemandangan bagoes dari terbitnja matahari di pinggir laoet. Dan kaloe bener ada begitoe, ia kapingin sekali aken meliat
Tee Tjong bilang, baeklah besok pagi ia nanti adjak An To-tjwan pergi saksiken sendiri itoe pemandangan alam jang bagoes, jang ada lebi bagoes dari sabagimana orang telah kata.
Soepaja bisa ilangken tjape lelahnja bekas berdjalan, maka siang-siang sasoedanja bersantap Tee Tjong anterken itoe thabib ka kamar, soepaja esok pagi-pagi bisa bangoen An To-tjwan jang jang memang masi merasa tjape tida membanta, dan sigra djoega ia masoek ka dalem kamar aken tidoer.
Satoe malem telah berla loe.
Esoknja di waktoe hari baroe moelai fadjar, itoe thabib soeda bangoen dan sigra djo ega ia kaloear. dimana katemoeken Tee Tjong jang lagi minoem thee.
„Hola, kaoe soeda bangoen, kata Tee Tjong sambil tertawa.
„Ja, sebab maoe tidoer lagi akoe koeatir kasiangan,“ saoetnja.
„Memang baek kita djalan di waktoe masi gelap,“ kata Tee Tjong: soepaja sabelonnja matahari terbit, kita soeda sampe di sana.“ Sahabisnja minoem thee, kadoea sobat ini laloe ber djalan kaloear. Tida lama marika telah sampe di atas poentjak Djitkoanhong, jang kaliatannja di waktoe begitoe tempat terseboet ada amat seram. Dari sini An To-tjwan memandang aer laoet jang itam dan menggebiar-gebiar lantaran tertioep angin pagi.
Sasoedanja bernanti tida antara lama, di langit sebla Wetan kaliatan sinar terang. An To-tjwan berdoea Tee Tjong mengawasken ka itoe tempat dimana sigra djoega matahari telah terbit, jang kaliatannja seperti kaloear dari dasar laoetan. An To-tjwan bersoerak kagirangan lantaran itoe pemandangan jang bagoes.
Itoe bola-bola api jang menggeboer-geboer ada menjinarken warna mas, hingga aer laoet di itoe bagian djadi kaliatan terang. Waktoe matahari itoe moelai naek, bajangannja ada kaliatan di dalem aer seperti moestika jang lagi bermaen-maen.
„Ah, soenggoe bagoes bener,“ kata An To-tjwan jang sakoetika lama memandang itoe dengen tida merasa bosen.
Waktoe moelai terang tana baroelah marika balik kombali ka dalem gredja. Di sapandjang djalan thabib itoe memoedji tida brentinja. la kata: benerlah ada bagoes dari'sabagimana katanja orang.
Sahabisnja santap pagi, An To-tjwan djalan-djalan di sapoeternja itoe gredja aken memandang kabagoesannja tempat di sakiter sitoe, dan lohor baroe ia balik kombali.
Esoknja pagi kira-kira djam tiga soeda kadengeran rioeh soearanja lotjeng dan laen-laen tetaboehan "jang diboenjiken boeat memoeliaken hari lahirnja datoek toeapekong, kerna itoe pagi soeda termasoek tanggal doeapoeloe delapan.
An To-tjwan berdoea Tee Tjong di itoe waktoe soeda bangoen. Ini thabib ada memake pakeannja jang paling bagoes, jang waktoe maoe berangkat memang ada dibekelin bebrapa stel oleh Boen Hwan-tjiang. Kamoedian marika kaloear dari dalem bio dan berdiri di pintoe Kehwetian, aken meliat datengnja orang jang maoe pasang hio.
Sabagimana biasanja saban taon, saban tanggal dari boelan Shagwee, semoea pendoedoek di sakiter sitoe, baek jang deket atawa djaoe, pagi-pagi soeda dateng. Begitoe poen di ini pagi, kaliatan orang jang dateng itoe bererot-rerot, hingga dari kadjaoean apinja obor jang dibawa oleh itoe orang-orang, ada seperti naga api jang berlegot-legot.
Kombali An To-tjwan dapetken satoe pemandangan jang mengagoemken. Tida lama orang-orang jang dateng itoe telah sampe di moeka gredja dan lantas moelai pasang hio, dimana An To-tjwan djoega ada toeroet bersama-sama. Oepatjara sembajangan dilakoeken sampe ampir waktoe moelai terang tana, baroe selesih, tapi tetaboean masi berboenji teroes.
Sakaloearnja dari gredja, An To-tjwan dapetken di sampingnja itoe roema berhala ada berdiri satoe panggoeng loeithay, di atas mana ada berdoedoek saorang gaga jang lagi menantiken datengnja orang jang maoe bertanding padanja. Tapi di antara itoe orang-orang banjak, tida ada satoe jang brani atawa maoe naek ka atas panggoeng boeat bertempoer.
Meliat begitoe, An To-tjwan djadi inget perkara jang doeloe, waktoe Jan Tjeng bertanding pada Tjim Gwan.
Dengen tida berkata apa-apa, ini thabib laloe masoek kombali ka dalem gredja dan dapetken Tee Tjong lagi berdoedoek.
An To-tjwan laloe hamperi dan doedoek sama-sama di itoe roewangan jang tida ada orang, sambil minoem thee thabib ini berkata:
„Wantiang, kaoe soeda taoe seanteronja akoe poenja perkara, boekan ?“
„Ja, kerna kaoe poen soeda tjeritaken itoe, saoet Tee Tjong: „tapi mengapatah ?“
„Dari perkatahanmoe jang membilang: bahoewa kasenangan atawa kaberoentoengannja manoesia, tida kekel adanja, soenggoe akoe merasa moefakat sekali,“ „Ja, memang! Kaloe sadja orang jang batinnja masi bisa terganggoe dengen tjittjeng, pasti tida bisa merasaken kasenangan jang kekal.“
„Akoe soeda pikir tetep hendak toen toet pengidoepan seperti kaoe. Kerna pangidoepanmoe ini ada soetji dan moelia.“
„Itoe poen baek sekali“
„Begitoe lekas akoe balik dari Tenghoensan, akoe nanti dateng ka mari aken temeni padamoe, soepaja kita-orang bisa merasaken kasenangan jang kekal bersama-sama oendoerken diri dari pergaoelan doenia boeat selama-lamanja.“
„Sabaliknja dari Tenghoensan ? ―Kaoe hendak bikin apatah ka sana ?“
„Boeat kasi taoe pada Siauw Djin dan Kim Thay-kian, bahoewa marika poenja familie sekarang soeda ada di roemanja Boen Hwan-tjiang, dengen bagitoe soepaja marika tida oesah berkoeatir boeat memikiri lebi djaoe.“
„Ah, kaloe kaoe moesti pergi doeloe ka Tenghoensan, akoe kira soesa boeat kaoe balik kombali ka mari. Sebab kaoe poenja kepandean jang tinggi ada perloe bagi gerakannja kita poenja Hengte di itoe goenoeng, maka kaloe kaoe sampe ka sana, pasti marika bakal menjega dengen keras boeat kaoe balik kombali. Tapi menoeroet akoe poenja rasa, ada lebi baek boeat samantara waktoe............“
Tee Tjong tida teroes ken perkata hannja, kerna itoe waktoe ada kaliatan satoe Todjin jang lagi mendatangi ka itoe roewangan, sambil berkata, bahoewa di loear ada dateng pembesar kota jang minta katemoe.
An To-tjwan jang ada di sitoe djadi merasa koerang enak hati, sebab koeatir hal itoe ada berhoeboeng dengen keadahan dirinja.
„Djangan-djangan datengnja itoe pembesar ada berhoeboeng akoe poenja boeron,“ kata itoe thabib dengen merasa koeatir.
„Itoelah belon boleh taoe,“ kata Tee Tjong dengen soeara menghiboer: „tapi baek kaoe masoek doeloe sabentaran, akoe nanti liat apa jang itoe pembesar maoe bitjaraken.“
An To-tjwan toeroet itoe prenta dan lantas berlaloe dari roewangan terseboet, sedeng Tee Tjong lantas kaloear aken samboet datengnja itoe pembesar,