Pembalesannja Kawanan Liangsan/Bagian katiga/Bab 9
XI
Menoempang di roemanja sobat lama. An
To-tjwan semboehken satoe gadis
jang terserang penjakit heibat.
Sekarang marilah kita ikoeti djalannja An To-tjwan, ka tempat mana jang hendak dipergiken, sakaloearnja dari kota Radja.
Dengen toendoeki kapala dan poendak memanggoel boengkoesan, thabib ini berdjalan teroes sendiri-diri sambil berpikir. Apatah pergi ka Kimgo atawa ka Tenghoensan, demikianlah bebrapa kali ia menanja pada hati sendiri, dan achirnja berkata:
„Ka Kimgo?, oh, gila! Kimgo toch boekan deket dari ini tempat, hanja ada lebi baek kaloe akoe pergi sadja ka Tenghoensan, kerna kadatengankoe ka sana, pasti nanti menggirangken hatinja marika itoe.“
Tatkala itoe hari telah moelai sore.
„Tapi, Tenghoensan djoega boekannja deket.“ kata poela ia sendiri-diri: „boeat pergi ka itoe goenoeng tida bisa dipergiken dengen sedikit hari.“
Liwat satoe djam, sampelah di satoe kampoeng, tapi lantaran itoe waktoe soeda sore dan matahari poen telah silem ka Barat, maka To-tjwan laloe pergi ka satoes waroeng aken bermalem. Dan kadatengannja ini disamboet oleh satoe djongos jang menanjaken, hendak makan makanan apa
„Sembarangan, asal sadja jang enak,“ kata thabib itoe sambil lepas badannja di satoe korsi jang ada di samping kamar: „dan sadiaken djoega akoe satoe kamar jang baek boeat bermalem, kerna akoe poen maoe menginep.“
Si djongos manggoet dan lantas berlaloe.
Tida lama makanan telah sadia dan si djongos dateng membri taoe.
To-tjwan laloe doedoek bersantap, tapi sebab hati merasa koeatir, tambahan badan merasa tjape, membikin napsoenja makan djadi tida ada.
Sasoedanja makan-makan sedikit, ia laloe haekka tempat tidoer dan lantas rebahken badan sambil berpikir lebi djaoe.
Tapi dalem samaleman itoe, pikirannja kalang-kaboet betoel, sebab tempat jang moesti dipergiken itoe boekannja deket, dan ia koeatif, di perdjalanan nanti ada orang kenalin dan tangkep, tentoe tjilakalah djiwanja.
Sampe fadjar baroe ia bisa dapet sedikit meremken mata. Tapi dalem tidoer tjoema lajap- lajap begitoe sadja dan tida lama lantas terseda kombali. Itoe waktoe hari telah djadi pagi.
Sebab koeatir di itoe waroeng nanti dateng banjak orang jang kenalin padanja, maka An To-tjwan lantas minta disadiaken sedikit makanan, jang sasoedanja santap dan bajar oewang menginep, lantas sadja ia kaloear kombali dan teroesken perdjalanannja, maski djoega lelahnja jang kamaren belon ilang betoel.
Tida lama kamoedian ia sampe di sȧtoe kampoeng, dan itoe waktoe hari telah moelai terang.
Dengen meliat jang tempat ini ada soenji, maka ia berdjalan sadja dengen pelahan. Tapi koenjoeng-koenjoeng dari blakang kadengeran soearanja orang memanggil, jang katanja:
„An Sianseng! An Sianseng!! Ka manatah kaoe maoe pergi di waktoe pagi hari begini?!“
Itoe pertanjahan tentoe sadja membikin An To-tjwan djadi amat terkedjoet, sebab dengen itoe pertanjahan djadi ternjata, bahoewa sampe di ini tempat poen, dirinja masi ada orang kenalin. Dan bagimanatah nanti kaloe dateng orang politie jang serep-serepin kabar, tidakah ia boleh djadi tjilaka.
An To-tjwan brentiken tindakannja dan mengawasi pada itoe orang jang tida dikenal, dan itoe doea orang oelangken poela pertanjahannja jang tadi.
„Oh, akoe rasa sobat kliroe liat,“ kata itoe thabib dengen braniken hati dan tjoba paksa bersenjoem: „akoe boekannja she An. hanja she Lie.“
„Hola, boeat apatah An Sianseng berdjoesta,“ kata itoe orang jang djoega lantas tertawa: „kita berdoea toch ada hambanja Sioe Thay-wie, jang ada taoe sampe baek Sianseng poenja hal.“
Mendenger begitoe dan rasa jang sekarang tida bisa mendjoesta lebi lama, An To-tjwan terpaksa angkat tangannja membri hormat, aken minta dimaäfken, kamoedian tanja, ka mana ini doea orang hendak pergi.
Itoe orang menjaoet, bahoewa marika telah diprenta pergi ka kota Kikoan boeat anterken soeratnja Thay-wie.
An To-tjwan memanggoet dan kamoedian: apatah ini doea orang ada taoe djoega apa jang terdjadi kamaren di pengadilan Khayhonghoe, berhoeboeng dengen penangkepan jang dilakoeken pada dirinja. Apa, kamoedian itoe orang-orang politie ada dateng djoega ka gedongnja Sioe Thay-wie.
„Ha, manatah itoe orang-orang politie ada mempoenjai hati begitoe besar, boeat dateng djoega ka gedongnja Thay-wie,“ kata itoe orang sambil berkata: „tjoema apa jang kita-orang taoe, jalah: Djiwi Kwijoe ada dapet kasoesahan lantaran Sianseng poenja merat.“ Itoe hamba tjeritaken lebi djaoe satoe persatoe apa jang marika telah denger, dan kabar ini tentoe sadja membikin itoe thabib djadi kesel dan berkata:
„Astaga, lantaran akoe, sampe akoe poenja doea sobat dapet tjilaka, itoelah kaliwat dari moesti!“
„Tapi itoe doea orang toch tida bersala apa-apa?“ kata poela An To-tjwan: „bagimana marika boleh ditangkep?“
„Kerna ditoedoe telah lepas pada Sianseng.“
„Ah itoe toch toedoehan tida betoel. -- Abis?“
„ Ditangkep, dan kabarnja bakal diserahken pada Thay Li-sie.“
„To-tjwan berdiam, hatinja berpikir apa-apa.
Kamoedian, sasoeda menanjaken kapan ini doea hamba balik lagi ka kota Radja, dan sasoeda didjawab besok, To-tjwan menanja: apa marika boleh toeloeng bawaken soeratnja pada Thay-wie.
„Oh, tentoe sekali,“ saoet itoe doea orang dengen girang.
„Kaloe begitoe, marilah,“ kata An To-tjwan sambil berdjalan teroes ka satoe waroeng arak, dan di sini ia adjak itoe doea orang mampir sabentaran boeat minoem-minoem, jang sahabisnja santap, itoe thabib laloe toelis satoe soerat disampeken pada Thay-wie, sasoedanja itoe, ia landjoetken lebi djaoe perdjalanannja.
Itoe doea orang pergi ka kota Kikoan dengen ambil laen djalanan, sedeng To-tjwan menoedjoe teroes ka satoe djoeroesan, dengen merasa sedi kaloe inget dirinja Siauw Djian dan Kim Thay kian, jang tida bersala dan tida taoe soeatoe apa, soeda moesti ditangkep.
Demikianlah moelai dari itoe hari, perdjalanan dilandjoetken teroes dengen tida brenti-brenti. Kaloe siang ia berdjalan dan malem mampir di waroeng boeat menginep. Selang sapoeloe hari thabib ini soeda djaoe dari Tongking, kerna itoe waktoe poen ia lelah sampe di Swatang.
Tapi itoe waktoe hari telah moelai malem. Kaki dirasaken teramat tjape, lagi di ini tempat tida ada kaliatan satoe waroeng jang djoeal makanan atawa boeka penginepan hingga kesel betoel hatinja Sekarang apa-boleh-boeat, maoe atawa tida, terpaksa ia moesti berdjalan kombali boeat dapetken satoe roema boeat noempang menginep.
Berdjalan lagi kira2 doea li, sampelah ia di satoe doesoen,, dimana ada kaliatan saboea roema jang di depan pelatarannja ada toemboe tiga poehoen toea, sedeng di blakangnja ada kaliatan seperti satoe goenoeng ketjil dan di sampingnja ada satoe djembatan satoe di bawah mana ada mengalir aer jang djerni.
An To-tjwan berdiri sabentaran aken mengawasi, dan dapet liat jang di sitoe ada berdiri satoe poehoen Bwe, jang tjabang-tjabangnja ada mendampiak sampe ka itoe kali. Tapi satelah ini thabib mendeketi, kaget boeroeng-boeroeng gredja jang tidoer di tjabangnja itoe poehoen djadi kaget dan lantas berterbangan ka sana sini.
Berbareng itoe, pintoenja roema terseboet lantas terboeka dan sinarnja lampoe jang terang lantas kaliatan. Ampat anak ketjil jang masing-masing ada mengempit boekoe kaloear dari itoe roema, aken pergi ka laen roema jang berdeket di sitoe, sedeng saorang toea ada mengikoėti di blakangnja marika itoe. Dari parasnja itoe orang toea An To-tjwan bisa dapet kenjatahan, bahoewa toean roema itoe saorang jang berderadjat tinggi, ada sedikitnja satoe sastrawan jang bidjaksana.
Itoe orang toea menganterken sampe di pintoe, kamoedian maoe toetoep kombali. Tapi ini thabib lantas boeroe-boeroe dateng menghamperi dan membri hormat sambil kasi taoe, bahoewa ia ada saorang pelantjongan jang kamaleman di djalan. Tapi lantaran badan soeda merasa amat lelah dan tida sanggoep boeat meneroesken lebi djaoe, djadi braniken hati dateng ka mari, dengen harep dapet menoempang nginep boeat samaleman dan besok hendak teroesken poela perdjalanannja.
„Oh, boleh sekali,“ kata itoe orang toea sambil sila ken tetamoenja masoek dengan kalakoean manis:
„kaloe begitoe, marilah kita-orang ka dalem.“ An To-jwan manggoetken kapala dan ikoet di blakangaja itoe toean roema, jang sekarang bawa itoe lampoe dan djalan doeloean. Satelah sampe di roewangan sebla dalem, ia taro lampoe itoe dan silaken tetamoenja doedoek.
Sekarang satoe pada laen bisa memandang dengen njata parasnja masing-masing. An To-tjwan liat orang toea ini ada berparas moelia, jang menjataken ada saorang berboedi dan bidjaksana. Sabaliknja itoe toean roema poen bisa dapet liat, jang tetamoenja ini boekan sembarang orang, kerna parasnja ada berbeda dari laen-laen orang jang kabanjakan.
Dengen lakoe hormat "o-tjwan moelai menanja, katanja:
„Bolehtah akoe jang renda dapet taoe, siapa adanja toean roema poenja nama jang terhormat?“
„Akoe ini ada Boen Hwan-tjiang,“ saoet itoe orang toea.
Mendenger ini djawaban, An To-tjwan djadi kaget jang tertjampoer girang, maka sigra djoega ia bangoen dari tempatnja doedoek dan berkata:
„Ah, soenggoe akoe tida bisa kenalin pada Tjhambouw, maäflah jang An To-tjwan soeda t'da berlakoe hormat.“
„An To-tjwan?“ demikianlah toean roema oelangken namanja itoe tetamoe, sambil memandang dengen teliti, dimana achirnja ia dapet kanjatahan, bahoewa benerlah tetamoenja ini An To-tjwan adanja.
Boen Hwan-tjiang poen memang doeloe ada mendjadi Tjhambouw dari Liangsan, maka ini pertemoean, tentoe sadja ada menggirangken hatinja marika itoe, jang sakean lama telah berpisa. Maka sigra djoega ini orang toea prenta boedak ketjil pergi ambil thee wangi, dan waktoe soeda doedoek minoem thee, Hwan-tjiang laloe moelai menanja:
„Kaoe dari manatah, Anheng, maka malem-malem djalan sendirian dengen zonder bawa pengikoet? Sedeng pakeanmoe ada laen dari biasa, hingga membikin akoe djadi tida kenalin. Ah beroentoeng kaoe bisa sampe di ini tempat?“
„Ja, soenggoe beroentoenglah,“ saoet An To-tjwan: „tapi akoe poenja hikajat ada terlaloe pandjang, baek akoe nanti toetoerken itoe”
Kamoedian ia tjeritaken bagimana baginda telah oetoes ia ka negri Kole boeat obatin sakitnja itoe radja taloekan, hingga poelangnja dapet katjilakahan di laoetan dan telah ditoeloeng oleh Lie Tjhoen, dan kamoedian Gak Ho kirim satoe soerat boeat Soen Liep di goenoeng Tenghoensan, dan sasampenja di kota Radja, ia dapet itoe katjilakahan sabagimana jang kita telah taoe.
Dan lantaran diri maoe ditangkep atas toedoehan jang berat, maka ia melariken diri dengen maksoed maoe poelang ka kampoeng sendiri. Sabagi orang boeron, maka dalem perdjalanannja ia moesti menjamar, dan inilah sebabnja maka ia pake pakean jang begini.
Boen Hwan-tjiang dengerken itoe sambil mengelah napas. Tapi ia girang djoega jang itoe sakalian Hengte soeda ada mempoenjai tempat jang tentoe dan peroesahan pakerdjahan besar.
„Tapi, soenggoe akoe tida mengarti, kenapa Thayheng boleh berdiam di sini?“ kata poela An To-tjwan, sasoedanja menoetoerken riwajatnja sendiri: „boekantah dengen tinggal di desa jang begini soenji, tida beda sabagi djoega orang jang semboeniken diri di mata doenia?“
„Lantaran merasa djemoe boeat tjampoer lebi djaoe pakerdjahan negri, dimana kawanan dorna ada dapet kakoeasahan besar, maka akoe tinggal sadja di sini aken mengadjar anak-anak. Maski berada di tempat soenji, tapi ada merasa senang dengen pamandangan alam jang saban hari bisa tertampak.“
„Soenggoe akoe merasa girang sekali jang Thayheng soeda bisa singkiri diri dari tempat jang kotor. Sedeng akoe, jang tida bisa meliat gelagat, sekarang dapetken ini bahaja jang boekannja ketjil.“
„Tapi dalem ini kaberoentoengan masi ada apa-apa jang membikin hatikoe merasa tida bisa senang, hingga satiap hari akoe moesti berdoeka hati.“
„Begitoe? Dan masi ada djoega kadoekahan?“
„Ja, tapi dengen datengnja Anheng, akoe kira kadoekahan itoe bakal terlinjap.“
„Ah, kaloe akoe bisa menoeloeng, tentoe akoe girang sekali.
„Tapi, tjeritakenlah apa adanja itoe kadoekahan jang menggandjel hatimoe. Thayheng,“ kata poela itoe thabib: „tjobalah tjeritaken kasi akoe denger.“
„Baek, akoe nanti tjeritaken itoe,“ kata Boen Hwan-tjiang, jang lantas tjeritaken: bahoewa dirinja tida beroentoeng mempoenjai anak lelaki, dan sekarang jang ada tjoema semengga-mengganja anak prampoean.
Ini nona soeda lama dapet sakit jang bersifat aneh, kerna di waktoe siang gadis itoe djarang taoe bangoen dari pembaringan, hanja tidoer teroe meneroes dari pagi sampe sore baroe tersedar. Tapi di waktoe malem ia soeka mengomong sendirian dan tempo-tempo soeka katawa. Banjak thabib soeda dioendang, tapi tida ada satoejang bisa menoeloeng. Dan sampe sekarang poen penjakitnja masi begitoe djoega.
Oeroesan roema tangga memang ada terserah dalem tengennja itoe nona, dan lantaran sakitnja itoe, maka banjak oeroesan soeda djadi telantar. Lantaran itoe, boekan sedikit kadoekahannja.
Bener tempo-tempo ia soeka inget pada ini sobat jang mendjadi thabib dan pertjaja kaloe dengen pertoeloengannja An To-tjwan, penjakitnja itoe gadis bisa tersemboeh. Tapi menginget djaoenja perdjalanan, maka ia tidak bisa tjari ini sobat. Tapi sekarang, dengen merasa amat girang ia harep ini sobat nanti toeloeng samboehken.
„Nah, apatah datengmoe ini boekan seperti kahendaknja Allah, jang membri pertoeloengan padakoe?“ kata poela Hwan-tjiang sabagi penoetoepnja: memang sakean lama akoe mengharep-harep, dan djoestroe dengen tida didoega, kaoe dateng. Hahaha, inilah bener-bener sanget menggirangken akoe poenja hati, Anheng!“
„Oh„ kaloe begitoe, dengen seantero kapandean, akoe nanti goenaken boeat kabaekannja Lengay,“ kata An To-tjwan, jang sasoedanja denger itoe tjerita: „tapi biarlah besok akoe nanti moelai preksa bagimana sakitnja, soepaja tida mendjadi kliroe.“
Salagi beromong-omong dateng poela itoe djongos ketjil jang tadi, membri taoe, bahoewa barang santapan telah sadia.
Boen Hwan-tjiang laloe pimpin tangannja An To-tjwan diadjak masoek ka dalem, dimana sasoedanja tjoetji badan dengen aer anget jang si djongos sadiaken dalem kamar, baroelah ini thabib doedoek bersantap, dengen ditemeni oleh itoe toean roema sambil minoem arak. Sahabisnja dahar, marika pergi ka kamar boekoe dan di sini Boen Hwan-tjiang doedoek mongomong kombali dan tjeritaken tentang impiannja jang samalem.
„Soenggoe, kaloe di-inget, itoe impian heran betoel,“ demikianlah Boen Hwan-tjiangmoelai tjerita: „lantaran soeda keabisan daja, dan tida ada satoe thabib jang bisa toeloeng semboehken anakkoe, maka saban malem akoe pasang hio di palataran, bermoehoen pada Toehan Jang MahaKoeasa, soepaja penjakit itoe bisa lekas tersemboeh.“
„Sasoedanja liwat brapa hari, samelem akoe dapet satoe impian, ja impian jang terang dan njata sekali,“ kata poela ini orang toea:,bahoewa satoe Sianli toeroen membri taoe, katanja: tentang sakitnja Lengay akoe troesa berkoeatir, kerna esok malem Thian-ie-tjhe nanti dateng ka mari boeat obatken anakkoe. Lebi djaoe Sianli itoe pesen, bahoewa sasoedanja semboeh, djangan akoe terlaloe gegaba boeat pertoenangken Lengay pada sembarangan orang, kerna anak ini ada mempoenjai peroentoengan bakal djadi seantero negri poenja iboe, dan sahabisnja berkata itoe Sianli lantas berlaloe, sedeng akoe djadi tersedar dan merasa amat heran dengen itoe impian.“
An To-tjwan mendengeri dengen sabar, sedeng Boen Hwat-tjiang berkata poela: „Dengen perkatahannja itoe Sianli, sekarang akoe dapet kanjatahan, bahoewa Anheng ada bintang Thian-ie jang mendjelema, maka boeat kasemboehannja Lengay, itoelah akoe maoe pertjaja betoel. Tapi boeat dapetken itoe keagoengan, sabagimana jang Sianli telah pesen, inilah akoe belon bisa pertjaja.“
„Apa jang dibilang oleh itoe Sianli dalem impian, sekarang poen telah ternjata sabagian,“ kata An To-tjwan: „tentang bener tidanja akoe ini ada berasal dari bintang Thian-ie, itoelah akoe tida bisa bilang. Tapi menginget jang ini malem tida ada laen orang dateng ka mari, maka bolon djadi bener begitoe. Maka sabagi ajahanda, panteslah kaloe kaoe berharep jang Lengay bisa dapet itoe keagoengan."
Demikianlah sahabisnja beromong-omong tentang berpisahannja jang sakean lama, den menanjaken tentang Hengte-hengtenja jang laen, baroe Boen Hwan-tjiang masoek ka dalem kamar anaknja, sedeng An To-tjwan poen rebahken badan di tempat tidoer.
Lantaran terlaloe tjape, maka begitoe taro kapala, itoe thabib lantas djadi poeles dengen njenjak.
Esoknja pagi waktoe tersedar An To-tjwan rasaken badannja banjak segar, tjoema kaki masi merasa sedikit kakoe. Tida lama dateng Boen Hwan-tjiang jang menengokin tanja, apa ini sobat dapet tidoer enak.
Bebareng itoe dateng djongos ketjil jang membawa aer anget boeat tjoetji moeka dan badan, kamoedian sadiaken thee wangi, dimana marika laloe doedoek minoem thee sambil beromong-omong.
To-tjwan tanja, apa itoe gadis jang sakit soeda bangoen, dan kaloe soeda, sekarang ia hendak moelai preksa.
Toean roema laloe adjak ka dalem dan pergi ka kamarnja sang anak, dimana lebi doeloe ia tanja pada djoeroe lajan, bagimana dengen sakitnja Siotjia.
Itoe djoeroe lajan merawati laloe kasi taoe, bahoewa masi begitoe djoega. Kamoedian marika masoek dan itoe gadis lagi sedeng rebah dengen kapala tersoendang bantal tinggi.
An To-tjwan laloe moelai preksa sakitnja itoe nona, sedeng hati memoedji katjantikannja itoe gadis, jang maski lagi berada dalem sakit, toch roepanja tinggal tjakep. Moekanja jang boender kaliatan twapan, alisnja kereng dan tjoema moekanja ada poetjet.
Ini thabib jang memang ada poenja pengartian dalem hal meliat orang poenja roman, lantas dapet kanjatahan, bahoewa gadisnja Boen Hwan-tjiang Pembalesan Kawanan Liangsan. ada poenja redjeki besar, hingga apa jang samalem itoe orang toea tjeritaken tentang impiannja, To-tjwan djadi banjak perljaja, kaloe ini nona ada mempoenjai peroentoengan djadi permisoeri.
Sasoeda papreksahan dilakoeken selesih, kadoeanja itoe laloe balik kombali ka kamar boekoe dan To-tjwan laloe toetoerken tentang papreksahannja, bahoewa penjakit itoe soeda terbit Jantaran terganggoenja asabat, teroetama terbentroknja ia poenja toedjoe perasahan jang beradoek satoe pada laen, dan inilah jang mendjadiken pikirannja koerang beres, hingga soemangetnja tida bisa koempoel betoel.
Itoe toedjoe perasahan adalah diseboet Tjittjeng, jang terdiri dari: girang, kesel, tjinta, bentji, mara, soeka dan katakoetan. Dengen tertjampoer sama bekerdjanja Imyang jang begitoe keras, hingga djalannja dara poen tida betoel. Boeat semboehken ini penjakit, sedikitnja moesti digoenaken tempo satoe boelan.
„Maka dalem tempo satoe boelan, akoe tangoeng Lengay nanti djadi semboeh kombali sabagimana biasa,“ kata itoe thabib jang pande, sabagi penoetoep dari. bitjaranja.
„Kaloe begitoe, benerlah sabagimana katamoe,” kata Boen Hwan-tjiang: kerna sasoenggoenja djoega Lengay dapet ini penjakit sadari iboenja meninggal doenia, jaitoe sasoedanja koetjoerken banjak ear mata dan menanggoeng doeka tida brentinja. Ah!, boekan si akoe memoedji, An-heng, sasoenggoenja kapandeanmoe dalem hal thabib, ada seperti dewa dan apa jang kaoe oendjoek itoe, ada bener sekali. Laen-laen thabib jang soeda preksa, tida ada jang bilang begitoe tjotjok seperti kaoe.“
An To-tjwan tida perdoeliken itoe poedjian hanja lantas ambil perabot toelis dan toelis satoe recept, ambil berkata:
„Tapi di manatah orang bisa dapet beli obat, sedeng akoe tida ada bawa itoe?“
„Oh, itoelah gampang,“ saoet Boen - tjiang: „akoe nanti prenta orang beli itoe di roema obat di kota Tongtjiang sadja.“
Sigra djoega ia panggil satoe boedjang boeat membeli obat di kota terseboet. Dan sasoeda boedak itoe berlaloe, Boen Hwan-tjiang berkata kombali:
Tjoema akoe harep, boeat sabegitoe lama sabelon gadiskoe mendjadi semboeh, Anheng soeka tinggal teroes di sini boeat toeloeng membri obat.“
„Oh, itoelah tentoe,“ kata An To-tjwan: „maski tida diminta poen, tentoe tida tinggal satenga djalan. Kerna Thayheng poenja Lengay poen ada seperti anakkoe sendiri.
Boen Hwan-tjiang merasa amat girang dan mengoetjap banjak trima kasi.
Tida lama itoe boedak jang pergi ka kota soeda kombali, An To-tjwan trima itoe obat dan preksa dengen teliti satoe persatoenja. Sasoeda betoel, ia sendiri jang masak itoe, kamoedian kasiken pada Boen Hwan - tjiang boeat dibriken pada Siotjia.
Begitoelah sahari dengen sahari To-tjwan berd'am di roemanja ini orang toea, kerna koeatir ada orang kenalin, maka sadari tinggal di sini, djarang sekali ia taoe kaloear hanja berdiam sadja di kamar boeat meliwati tempo, sampe achirnja ia djadi betah berdiam tjara begitoe.
Selang doeapoeloe hari lebi, dalem sapoeloe, penjakitnja itoe gadis soeda koerang delapan bagian, hingga boekan sadja Boen Hwan-tjiang, hanja sekalian boedjang-boedjang dan djoeroelajannja Siotjia, rata-rata djadi girang dan bersoekoer pada An To-tjwan. Satoe pada laen pada memoedji kapandeannja ini thabib.
To-tjwan merasa amat girang meliat jang kapandeannja bisa digoenaken pada sobatnja poenja anak, kerna dengen begitoe, ia bisa djoega membales sobat itoe poenja boedi, jang telah kasi penoempangan dalem sakoetika lama.
Selang brapa hari kamoedian. Siotjia itoe poenja sakit telah semboeh betoel-betoel. Meliat begitoe An To tjwan laloe kasi taoe pada sobatnja, bahoewa di hari esok ia hendak berangkat kombali sadja.
„Sekarang Lengay soeda djadi semboeh, maka akoe poen maoe berangkat kombali sadja, kata itoe thabib: „kerna sekarang boeat keadahannja Lengay troesa dikoeatirken lagi.“
Tapi Boen Hwan-tjiang lantas menjegah, dengen alesan: jang ini waktoe ada moesin Tang, dimana oedara ada amat djelek bagi orang jang bikin perdjalanan djaoe. Laen dari begitoe, ia koeatir spion-spion nanti dapet pergoki salagi sobat ini ada di tenga djalan.
„Menoeroet pikirankoe,“ kata poela Hwan-tjiang: „biarlah kaoe berdiam sadja doeloe di sini, nanti kaloe akoe soeda serepin keadahan di kota Radja, dan ternjata jang penangkepan atas dirimoe soeda moelai sirep, baroe kaoe boleh teroesken perdjalanan ka kampoeng sendiri. Soenggoe akoe merasa koeatir boeat kaoe poenja perdjalanan jang begitoe djaoe, Anheng. Dan laen dari begitoe, kaoe poenja boedi jang besar biarlah dibales oleh anakkoe jang nanti membri rawatan sabagi ajahanda sendiri.“
Menginget jang ini desa ada satoe tempat soenji, dimana ia boleh semboeniken diri dengen tida kataoean, maka permintahannja itoe sobat, An To-tjwan trima dengen senang hati hingga Boen Hwan-tjiang poen djadi amat girang. Demikianlah An To-tjwan ajadi tinggal teroes dalem itoe desa, dimana toean roema dan itoe gadis, ada merawati dengen baek, dimana tjoekoeplah menjenangken hatinja itoe thabib.
Sasoedanja liwat moesin Tang, datenglah moesin Tjhoen.
Pada soeatoe hari, waktoe tjoewatja ada bagoes dan angin jang menioep ada dirasaken aloes, Boen Hwan-tjiang adjak sobatnja ini pergi ka samping roema, tempat di mana poehoen Bwe lagi berkembang.
Di atas itoe djembatan kadoewa orang ini berdiri sambil memandang koeliling tempat jang penoeh dengen saldjoe, hingga daonnja roempoet-roempoet ada kaliatan seperti perak. Apapoela baoenja itoe boenga Bwe jang haroem, membikin hatinja marika djadi girang dan berdiam di sitoe dengen senang.
Sambil memandang kebagoesannja tempat-tempat jang ada di sakiter sitoe, To tjwan djalan moendar mandir gendong tangan. Kamoedian dari kedjaoean ada kaliatan ampat orang jang lagi mendatengi.
Thadib ini berdiri mengawasi, dan sasoedanja deket, kaliatan njata bahoewa orang jang doea itoe tangannja terborgol, dengen teriring oleh doea orang jang bersendjata. roepanja orang jang mengiring itoe ada politie. Alangkah kagetnja thabib ini poenja hati, satelah kenalin orang jang terborgol itoe ada sobatnja, jaitoe Siauw Djian dan Thay-kian.
Itoe doea pesakitan, jang djoega satelah dapet kenalin pada An To-tjwan, lantas kaokin dengen girang, katanja:
„Oh, kaoe ada di sini An.........“
„Oh, kiranja Thio Hoangwe!“ demikianlah Siauw Djian poetoesken perkatahannja ia poenja kawan, soepaja Thay-kian tida seboet teroes namanja An To-tjwan, jang ampir diseboet lantaran kagirangan, hingga loepa jang marika lagi di-iringken oleh orang politie.
Siauw Djian lastas boeroe-boeroe hampirken itoe thabib dan berkata dengen soeara berbisik: bahoewa pengadilan Khayhonghoe soeda preksa perkaranja, jang maski marika tida taoe soeatoe apa, tapi toch tetep ditoedoe soeda lepasken ini kawan pergi merat. Kamoedian perkara ini lebi djaoe diserahken pada Thay Li-si, jang maoe djatoken hoekoeman mati, beroentoeng dengen pertoeloengannja Sioe Thay-wie, poetoesan itoe diroba djadi hoekoeman boewang ka poelo Swaboen, dimana sekarang marika lagi maoe pergi ka itoe tempat boeat mendjalanken hoekoemannja.
Lebi djaoe Siauw Djian kasi taoe, itoe doea oppas jang menganter padanja, di perdjalanan marika tida brani perlakoeken tida patoet, sebab telah diantjein oleh Sioe Thay-wie. Djoega dikasi taoe dengen pendek bebrapa hal jang koerang penting boeat ditoetoerken.
Waktoe Siauw Djian hamperi An To-tjwan, itoe doea oppas ada menoenggoe di soeatoe 'tempat jang sedikit djaoe, dan sekali-kali ia tida menjega itoe pasakitan mengomong pada orang.
An To-tjwan sasoedanja denger itoe tjerita, dan pikir jang katjilakahannja ini sobat ada gara-garanja, hingga hatinja djadi sedi dan lantas dapet ingetan hendak balik kombali ka kota Radja boeat serahken diri, soepaaja Siauw Djian dan Kim Thay-kian jang tida bersala soeatoe apa, bisa terlepas dari hoekoeman.
Tapi ini pikiran moelia telah ditjega oleh sobatnja itoe, dengen kata: apatah dengen serahken diri begitoe, ada pikiran bener.
„Tidal sitoelah tida boleh Anheng lakoeken,“ kata Siauw Djian kamoedian: „kaoe poenja kamoeliahan, tjoema-tjoema djadi anterken sadja djiwa dengen tida ada toewasnja. Djoega, maski akoe boleh terbebas, akoe tida maoe Anheng moesti trima hoekoeman.“
Selagi marika beromong-omong, itoe doea oppas bersama Kim Thay-kian, lantaran menoenggoeken Siauw Djian terlaloe lama, soeda lantas dateng menghamperi, hingga An To-tjwan tida bisa berkata-kata lebi djaoe.
Tapi broentoeng Boen Hwan-tjiang jang dari setadi ada mendengerken dan soeda berpikir djoega apa jang baek goena ini sobat-sobat, satelah itoe oppas dateng, ia lantas berkata:
„Sabagi sobat, masatah sasoedanja liwat di ini tempat, kaoe tida maoe mampir boeat minoem sedikit arak aken ilangken tjape, itoe toch terlaloe.“
Siauw Djian berdoea oetjapken trima kasi, sedeng matanja melirik pada penganternja. Dan si oppas jang denger disilaken minoem arak, tambahan liat itoe pesakitan kasi tanda dengen mata, lantas sadja soeka menoeroet.
Tida lama kamoedian marika soeda ada di depan roemanja Boen Hwan-tjiang, dan ini orang toea laloe prenta boedjangnja sadiaken makanan bersama arak jang baek, dimana marika laloe doedoek makan minoem dengen soeka hati.
laorang doedoek. makan sambil beromong-omong, tapi hal jang dibitjaraken tentoe sadja boekannja perkara-perkara jang berhoeboeng dengen oeroesan rasia.
An To-tjwan saban-saban tambaken lagi arak ka gelasnja itoe doea oppas, hingga marika merasa senang betoel. Dan waktoe meliat hari telah moelai sore, Boen Hwan-tjiang kata: sekarang matahari telah moelai dojong dan tida lama soeda sore, maka lebi baek nginep sadja di sini, besok pagi sahabisnja santap baroe berdjalan kombali.
Siauw Djian berdoea Kim Thay-kian menengok pada itoe doea oppas, seperti orang menanja: apa ini penganter soeka trima oendangannja ini toean roema.
Si oppas jang sekarang ada hadepken arak bersama makanan lesat, dan denger Boen Hwan-tjiang kata begitoe, lantas sadja menjataken tida kabaratan, kerna besok sahabisnja santap dan dapet sedikit arak, boleh berdjalan kombali.
An To-tjwan tida brentinja menjataken doeka lantaran ini doea sobat moesti menampak bintjana begini roepa. Tapi Siauw Djian berdoea kata, itoelah tida apa, tjoema hatinja merasa koeatir pada koelawarga sendiri jang di kota Radja tida ada perlindoengan, salagi marika mendjalanken hoekoeman.
Mendenger begitoe Boen Hwan-Tjiang lantas berkata:
Djiwi berdoea ada sobatnja Anheng sedeng akoe ada menanggoeng Anheng poenja boedi jang besar. Dan sekarang, boeat ilangken itoe rasa koeatir baeklah Djiwi berdoea toelis satoe soerat boeat masing-masing poenja koelawaraga, soepaja besok atawa noesa akoe nanti prenta pergi ka kota Radia boeat oendang djiwi berdoea poenja koelawarga aken pinda kemari, tinggal bersama-sama akoe di sini, dengen bagitoe troesa boeat koeatir lagi.“
Siauw Djian berdoea, begitoe poen An To-Tjwan hatoerken trima kasi atas boedinja ini sobat. Maka itoe doea orang laloe toelis soerat, jang sasoedanja selesih, laloe dikasiken pada Boen Hwan-Tjiang.
Kamoedian iaorang bitjara lagi laen-laen hal, sedeng toean roema prenta boedjangnja sediaken kamar boeat itoe ampat orang bermalem.
Esoknja pagi, sasoedanja abis bersantap dan minoem sedikit arak, dengen hatoerken banjak trima kasi, Siauw Djian berdoea Kim Thay-kian laloe teroesken perdjalanannja ka tempat hoekoeman, dengen dianter djoega oleh An To-tjwan sampe satoe li, baroe balik kombali.