Pembalesannja Kawanan Liangsan/Bagian katiga/Bab 13
XIII
Waktoe tidoer Tee Tjong dapet impian aneh. Di kota Kiankong dapet pertemoean djadi menoeloengi sobat.
Sasoedanja koerniaken pangkat pada sakalian mantri-mantri jang. dianggap berdjasa, baginda laloe kaloearken firman soeroe Tong Koan lekas balik ka kota Radja, maka datengnja itoe oetoesan ada menggirangken sekali hatinja balatentara, jang memang soeda lama ingin poelang ka masing-masing poenja roema.
Itoe waktoe Tee Tjong djoega lantas megadep, aken minta permisi boeat balik sadja ka goenoeng.
Dengen tertawa Tong Koan berkata:
„Ja, akoe poen tida loepa atas itoe perdjandjian jang doeloe. Tapi lantaran dalem ini paperangan kaoe ada berdjasa besar, maka pada brapa hari jang laloe akoe soeda rapport pahalamoe pada baginda, dengen minta soepaja baginda bikin baek kaoe poenja gredja di Thayanhoe, sebab kaoe tida maoe trima pangkat, maka tjoema itoe sadja jang akoe bisa berboeat aken goenamoe.” Tee Tjong manggoeti skapala sambil membri trima kasi,
„Permoehoenankoe itoe telah ditrima baek," kata poela Tong Koan lebi djaoe: Maka baginda soeda kaloearken firman prenta pembesar di sana lantas diriken itoe gredja. Maka biarlah kaoe bersabar sedikit waktne sampe pakerdjahan itoe mendjadi rampoeng, soepaja begitoe kaoe poelang, gredja itoe soeda berdiri. Laen dari itoe, akoe masi ada satoe apa jang hendak minta kaoe toeloeng lakoeken."
„Maski ada lagi satoe pakerdjahan?" kata Tee Tjong dalem hati, dengen merasa amat tida enak. Tapi ia tida njataken itoe, hanja lantas menanja: pakerdjahan apatah adanja itoe jang moesti dilakoeken.
„Pergi di Kanglam," kata Tong Koan sembari tarik latjinja medja toelis dan kaloearken satoe soerat.
Ini soerat kaoe moesti serahken pada pembesar di kota Kiankong," kata poela itoe pembesar sambil kasiken soerat itoe.
Tee Tjong tida berkata apa-apa, hanja lantas trima dan masoeki ka dalem sakoe. Sasoedanja beres, itoe hari djoega ia lantas berangkat djalar
Kerna kapingin boeroe-boeroe selesihken pakerdjahannja, maka ini kali Tee Tjong djalar seperti terbang. Tee Tjong laloe tjari satoe waroeng jang deket, kamoedian minta disadiaken makanan dan satoetempat tidoer boeat bermalem, kerna itoe waktoe soeda menggerib
Sahabisnja santap, Tee Tjong laloe masoek ka dalem kamar dan taro kapalanja di atas bantal
Lantaran amat tjape, maka sigra djoega ia telah djadi poeles.
Tapi liwat tida antara lama di kamarnja dateng saorang moeka itam, jang lantas bangoenken padanja, hingga ia djadi tersedar dan mengawasi itoe orang dengen heran.
Sabelonnja Tee Tjong sempet menanja, itöe orang soeda berkata:
„Atas titanja Song Twako akoe disoeroe bangoenin, maka lekaslah sekarang ikoet padakoe ka..... — ja, ka mana, akoe loepa lagi.“
Sigra djoega ia kenalin bahoewa orang itoe boekan laen dari Lie Kwie, Maka dengen merasa heran ia berkata:
„Titah apatah ?“
„Hajoe bangoen sadja lekasan,“ kata Lie Kwie dengen lakoe terboeroe-boeroe; kita berangkat tjari Kongsoen Sin, boeat lakoeken poela pakerdjahan seperti doeloe. Troesa koeatir, bahoewa sekarang akoe soeda tida makan lagi daging, ja, soeda lama akoė tida dahar itoe barang, djadi akoe troesa djengkel dan bikin akoedjadi katakoetan lagi." Tee Tjong tida menjaoet, hanja lantas sadja mengikoet itoe soedara angkat. Di sapandjang djalan ia tida menanja ka mana ini soedara maoe adjak, hanja berdjalan teroes dengen tjepet dan tida lama telah sampe di pinggirnja satoe laoet.
Laoetan itoe ada besar, tapi tida ada satoe praoe jang kaliatan di sitoe. Sasoeda mengawasi itoe aer jang berombak sedikit-sedikit, Tee Tjong berkata:
„Bagimana sekarang? Satoe praoe tida ada, sedeng akoe poenja djimat djalan tida bisa dipake boeat menjebrang laoetan?“
„Troesa koeatir,“ saoet Lie Kwie: „hajoe ikoet sadja, akoe bisa berdjalan di atas aer dengen zonder påke praoe."
Tee Tjong tida berkata soeatoe apa, djoega ia tida merasa heran mendenger itoe perkätahan, hanja lantas sadja berdjalan dengen dipimpin oleh Lie Kwie. Tida lama kadoeanja itoe toeroen ka aer, dan djalan dengen tjepet, hingga tida bedah seperti orang djalan di tana datar.
Tee Tjong merasa amat heran atas ini soedara moeka itam poenja kapandean, ia tida taoe Lie Kwie dapet peladjaran dari mana, hingga bisa berdjalan di aer begitoe tjepet dan gampang.
Sabelonnja ia bisa menanja apa-apa, sigra djoega marika telah sampe ka pinggir tepi laoet jang di sebrang, dimana Lie Kwie laloe adjak soedarani naek ka darat. Tee Tjong menoeroet sadja.
Itoe tempat ada satoe negri. Tapi di mana dan negri apa, itoelah ia belon kenal, sedeng Lie Kwie jang mengadjak, djoega tida tjeritaken apa-apa. Tjoema dalem hatinja ada memoedji kabagoesannja ini negri jang baroe pernah diliat dan disampeken.
Marika berdjalan teroes dengen tida berkata-kata. Kamoedian dari kadjaoean kaliatan saboea roema besar jang bangoennja seperti astana Dengen berpimpinan tangan Lie Kwie adjak soedara ini masoek, dimana kaliatan ada berkoempoel banjak orang jang roepanja seperti mantri-mantri civiel dan militair
„He, di manatah ini?“ menanja Tee Tjong dalem hati sendiri.
Kamoedian di tenga-tenga ada berdoedoek saorang jang roepanja seperti radja hingga maoe atawa tida, Tee Tjong djadi berkata:
„Ini toch tempat....... Kita tida boleh gegaba masoek?“
„Kenapa tida?“ saoet Lie Kwie sambil tertawa dan toendjoek ka tempat dimana itoe orang-orang berkoempoel: „kaoe djoega moesti doedoek di sana, tida boleh tida, kaoe moesti masoek.“
Tee Tjong gojang kapala dan dan mengawasi lebi teliti.
Di antara itoe orang-orang ada djoega jang roepanja seperti dikenal. Tapi siapa, itoelah ia loepa.
Lie Kwie paksa mengadjak masoek, Tee Tjong gojang poela kapalanja dan tinggal berdiam di sebla loear.
„Hajoelah!“ kata Lie Kwie dengen soeara keras: „boekan kita soeda sampe.“
„Tapi ini di mana, akoe tida taoe?" kata Tee Tjong, jang tida djoega maoe toeroet diadjak kadalem, hingga ini perkatahan dan lakoe bentahan telah membikin Lie Kwie jang memang ia kenal adatnja ada angin-angin, djadi moerka.
Dengen mata melotot ini soedara moeka itam lantas berkata:
„Bagoes betoel kaoe poenja kalakoean, jang sekarang soeda meloepaken soewal Tionggie, hingga tida maoe lakoeken Koko poerja titah dan bebalik toendoeki kapala pada sagala dorna, sampe begitoe ichlas hati maoe toeroet prentanja Tong Koan.“
Sembari oetjapken itoe perkatahan, Lie Kwie lantas kaloearken ia poenja sapasang kampak dan dengen ini sendjata jang terkenal, ia hantem kapalanja Tee Tjong, hingga ini soedara jang memang tida bergagaman, djadi amat goegoed dan laloe......
Tee Tjong meleki matanja dan liat dirinja ada di atas randjang. Keringet ada mengoetjoer di seantero toeboehnja, sedeng hati merasa berdebar-debar.
„Akoe mengimpi? Akoe mengimpi ?“ tanja ia dalem hati sendiri.
„Ja, benerlah akoe mengimpi,“ kata poela ia sambil berbangkit, sedeng hatinja masi memoekoel teroes.
la laloe ambil handoek dan gosok keringet jang megoetjoer di seantero badan.
Itoe waktoe soeda tengamalem.
Tee Tjong gedeken itoe api jang terpasang dalem kamar. la meliat di sakoeliling kamar dan berkata dengen pelahan:
„Mengapatah itoe si moeka itam boleh djadi moerka pada akoe, lantaran akoe lakoeken prentanja Tong Koan?“
„Bener Tithiatgoe itoe ada saorang kasar, tapi hatinja amat djoedjoer dan keras,“ kata poela Tee Tjong dalem hati, sarajah memoedji pada itoe soedara angkat jang telah lama soeda tinggal namanja sadja: „tjobalah liat, maski poen soeda lama meninggal doenia, toch hatinja masi tinggal begitoe roepa dengen tida beroba. la tida soeka akoe berhamba pada Tong Koan dan djalanken prentanja.“
„Tapi, tapi ia tida taoe,“ kata poela ia: „bahoewa kaloe akoe soeda lakoeken djoega ini prenta inilah boekan laen, hanja ada dari sebab terpaksa, boekan sasoenggoenja ada soeka boeat djadi dorna itoe poenja hamba.“
Sasaät telah berlaloe.
Itoe impian jang tadi tjoekoep menggeterken hatinja, hingga sakoetika lama ia masi tinggal doedoek sambil memikiri lebi djaoe.
„Heran betoel itoe impian Ja, heran sekali,“ kata poela Tee Tjong sembari inget-inget: „Tapi, he, mengapatah ia bilang jang akoe djoega moesti berkoempoel di antara itoe orang-orang, moesti dan tida boleh tida?“
Menginget itoe, Tee Tjong djadi merasa berdebar lagi hatinja, kerna pikir: itoe orang-orang jang berkoempoel, tentoelah ada orang jang telah meninggal doenia. Boleh djadi di antara itoe orang-orang ada ia poenja soedara-soedara angkat jang soeda berada di tempat bakah. Kaloe boekannja itoe soedara-soedara, siapatah?
Betoel ia tida kenalin roepanja itoe sasoeatoe orang, tapi doegahannja tetep begitoe. Sebab Lie Kwie ada menoendjoek ka sitoe
Lebi djaoe jang masi kaingetan, bahoewa astana itoe ada indah sekali. Apa itoe brangkali sorga.
Begitoelah roepa-roepa pertanjahan ada timboel dalem hatinja, hingga sakoetika lama ia tinggal doedoek berpikir.
„Ai, heran bener!„ kata poela ia sambil mengelah napas. Achir-achir datengläh waktoefadjar. dimana soeda kadengeran soeara berkeroejoeknja ajam.
Sekarng Tee Tjong tida bisa tidoer kombali, kerna tida lama poela soeda siang. Maka ia lantes boeka pintoe dan teroes pergi mandi, sedeng djongos dari itoe roema menginep dateng bawaken thee.
Kamoedian ia prenta itoe djongos bikin sedia makanan, kerna matahari terbit ija maoe berdjalan kombali.
Ini prenta dilakoeken dengen tjepet. Tida lama makanan jang terdiri dari satoe doea roepa sajoer, soeda dibawa kadalam kamar, dimana sasoedanja dahar Tee Tjong laloe bajar oewang menginep dan makanan, kamoedian landjoetken poela perdjalanannja ka tempat jang di toedjoe.
Dalem ini perdjalanan tida mendapet soeatoe halangan apa-apa, maka liwat ampat hari kamoedian, sampelah ia di kota Kiankong. Ini tempat ada rame, maka Tee Tjong laloe pergi ka satoe roema penginepan dan lebi doeloe minta disadiaken makanan, kamoedian toekar pakean saperti orang militair, jang sasoedanja tioe ia lantas bawa soeratnja Tong Koan boeat pembesar dari ini kota.
Pembesar di sitoe, satelah denger Tong Koan prenta orang dateng bawa soerat, sedeng jang dioetoes itoe ada berpangkat Thotongtjhie, boeroe boeroe ia kaloear samboet dengen kalakoean hormat.
Tee Tjong bales itoe satjara militair di itoe djaman.
„Tongtjhie soeda berdjalan djaoe,“ kata itoe Thaysioe: „maka biarlah bernanti sadja doeloe boeat trima balesannja“
„Baeklah,“ saoet Tee Tjong.
„Bagimana tentang Tong Djoebit di sana?“
„Banjak baek.“
„Soekoerlah.“
Begitoelah itoe Thaysioe menanjak en ini itoe jang koerang perloe. Tapi Tee Tjong tida kata apa-apa, kaloe tida ditanja
Achirnja itoe pembesar kata, tempo lima hari nanti kasi balesan, maka sekarang Thotongtjhie boleh balik sadja doeloe.
Tee Tjong manggoet dan lantas berlaloe.
Sakaloearnja dari itoe kantoor, Tee Tjong lantas djalan-djalan di dalem kota, ia liat kota Kiankong rame djoega, orang dagang poen banjak, hingga ini tempat boleh dibilang sampe bagoes
Selang tiga hari, salagi berdoedoek di roema penginepan, Tee Tjong telah kadatengan doea orang jang berpangkat Gongbak, dan doea orang ini doeloean waktoe Thaysoe prenta anterin ramsoen, soeda katemoe pada Tee Tjong, hingga iaorang djadi berkenalan djoega. Dan menginget itoe Tjho tongtjhie poenjaboedi bahasa ang manis, maka itoe Gongbak lantas pergi kasi taoe pada kawannja, bahoewa Thotongtjhie jang doeloe ada di tempat paperangan, sekarang dateng ka mari.
„Maka boeat kabaekannja jang doeloe hari itoe, akoe rasa wadjib kaloe sekarang kita dateng katemoein," kata itoe Gongbak jang satoe: „kerna di sini ia tentoe tida ada poenja kenalan."
„Itoelah pantes sekali," saoet si kawan.
Begitoe iaorang lantas dateng dan katemoe Tee Tjong dalem itoe roema makan. Kamoedian adjak djalan-djalan boewat liwatken tempo, tentoe sadja ini oendangan ditrima, kerna Tee Tjong poen tida ada kerdjahan apa-apa.
„Sekarang marilah kita pergi liat wajang,“ kata itoe Gongbak jang satoe: ini hari dateng saperangkat wajang dari kota Kouwsoh, maka pertoendjoekannja itoe tentoe bagoes. Apa Thotong tjhie soeka meliat?“
„Boleh djoega,“ saoet Tee Tjong.
Kamoedian katiga orang itoe lantas berdjalan.
Sasampenja di satoe tikoengan, di sitoe ada kaliatan saorang moeda jang lagi dikeroeboeti oleh lima orang. Apa jang mendjadi lantaran, itoelah tida saorang dari marika bertiga ada taoe.
Itoe orang moeda dimaki-maki, disoeroe berdjalan dengen lekas, sataoe maoe diadjak kamana.
Tapi waktoe orang itoe tida maoe toeroet, sala satoe dari itoe lima orang djadi goesar dan lantas angkat tangannja dihantemin ka kapalanja itoe orang jang tjoema sendirian, sedeng ampat kawannja jang laen, tida menjega.
Itoe orang jang dipoekoel, bermoela tida brani melaawan, hanja menangkis sadja. Tapi satelah kapalanja kena dipoekoel dengen keras. djadi amat sengit dan lantas melawan sabisa-bisanja sambil mendjerit.
Itoe perkalaian Tee Tjong dapet liat, maka ia lantas memboeroe boeat pisaken. Tapi itoe orang jang memoekoel tida maoe taoe soeatoe apa, hanja lantas mengangsak teroes sambil menondjok.
„Tahan!“ kata Tee Tjong sambil memboeroe.
„Lepas ini orang,“ kata poela ia dengen soeara keras: „akoe maoe kaoe lepasken ini orang, ha-joe lekas!“
Ampat dari kawannja itoe orang jang memoekoel pada menengok, tapi roepanja kaliatan goesar pada ini orang jang dateng misaken.
„Apa kaoe kata, lepas?“ begitoelah ia balik menanja dengen soeara kasar: „hm, bagoes betoel. ―Apa kaoe djadi?“
Sabelonnja Tee Tjong menjaoet, itoe doea Gongbok djoega lantas memboeroe dan soeroe itoe kawanan pemoekoel lepasken ini orang moeda.
Tatkala itoe Tee Tjong soeda berhadepan pada itoe orang jang dipoekoel, maka waktoe dapet kenalin siapa adanja, ia djadi terkedjoet dan berkata: „He, kaoe, Tjio Keng Hengte?“
„Oh, kiranja Tee Tjong Koko ?“ kata itoe orang dengen soeara girang, jang djoega lantas kenalin siapa penoeloengnja.
„Megapa kaoe boleh dipoekoel?“ tanja poela Tee Tjong.
„Marika itoe maoe menipoe padakoe,“ saoet Tjio Keng:,,tapi waktoe akoe dapet taoe perboeatannja, ia belaga mara dan lantas poekoel padakoe dengen karoeboetin. Ah, baek djoega ada Tee Koko.“
„Merika maoe menipoe?“
„Betoel! Marika itoe semoea penipoe.“
„Marika maoe adjak kaoe ka manatah?“
„Sekarang ia toedoe dirikoe jang maoe menipoe padanja, dan maoe bawa akoe mengadep pada pembesar di sini.“
„Marika maoe menipoe?“
„Ah, koerang adjar betoel,“ kata Tee Tjong sambil mengawasi pada lima orang dengen roepa goesar.
„He, lebi baek kaoe lantas lepas,“ kata Tee Tjong pada marika itoe dengen soeara saparo mengamtjem: „kaloe tida, tentoe dirimoe boleh tjilaka.“
Itoe lima orang boeaja-boeaja, lantas kaloearken gertakannja dan belaga mara la menjentak pada Tee Tjong dan bikin dirinja seperti betoel-betoel orang jang maoe ditipoe oleh Tjio Keng. Tapi itoe doea Gongbok satelah liat kalakoeannja itoe orang, lantas berkata dengen soeara keras:
„He, kaoe barame djangan begitoe koerang adjar, apa kaoe tida taoe bahoewa dirimoe boleh djadi tjilaka? Sama siapa kaoe lagi beroeroesan, ini ada Tong Djoebit poenja Thotongtjhie, sedeng akoe berdoea ada sampe tjoekoep boeat bekoek kapalamoe, kaloe kaoe masi bentahan."
Mendenger begitoe, baroelah hatinja itoe orang-orang djadi merasa keder. Dan sekarang poen marika telah kenalin, bahoewa doea orang itoe ada Gongbok. Maka dengen kalakoean hormat lima orang itoe meminta maaf atas kalakoeannja jang tida mengenalin pada Thotongtjhie, kamoedian ia prenta kawannja lepasken itoe orang moeda.
Sasoedanja marika berlaloe, itoe Gongbok lantas berkata pada Tee Tjong: bahoewa itoe lima orang jang tadi, semoea ia telah kenal, maka boeat kalakoean bangsat jang marika lakoeken pada Tjio Keng, besok ia hendak toentoet.
Tee Tjong berdoea Tjio Keng mengoetjap trima kasi.
Kamoedian anam orang itoe lantas pergi ka waroeng arak, dengen oeroengken maksoed boeat nonton wajang. Di sini marika makan minoem dengen sagala soeka hati dan Tee Tjong laloe menanja pada Tjio Keng: „Sadari kapantah Hengte ada di sini? Dan bagimanatah maka boleh berselisihan pada itoe lima orang?"
„Kaloe Koko maoe dapet taoe, baeklah akoe nanti toetoerken satoe persatoe tentang hal itoe dan hal dirikoe poenja berdiam di sini," saoet Tjio Keng, jang lantas tjeritaken dari hal moelanja.
la kata: lantaran tida betah berdiam di kampoeng sendiri dengen tida bekerdja apa-apa, maka dengen sedikit kapitaal ia lantas beli rempa-rempa dan laen-laen obat jang dirasa boleh lakoe. Begitoelah ia beli dan kamoedian djoeal kombali di sini.
Sakean lama ia berdagang dengen tida dapet satori. Tapi sadari brapa boelan yang laloe ia moelai berkenalan pada Tiong San-long berdoea Kam Mo, jang soeda beroetang djoega padanja saratoes tail perak dan berdjandji aken dibajar dalem tempo sapoeloe hari. Tapi sasoedanja liwat doea-tiga boelan, oetang itoe belon djoega dibajar.
Begitoelah tadi pagi, ia soeda pergi tagi dengen maksoed boeat dibeliken beras di Ouwkong. Tapi itoe orang lantas bebalik mara dan kata, waktoe doeloe salagi ia masi ada di Liangsan soeda perna rampok miliknja jang berdjoembla besar, kamoedian bersama kawan-kawannja marika maoe bawa ka hadepan pembesar dengen toedoehan jang tida-tida.
„Baek djoega di djalan akoe katemoe Tee Koko berdoea Gongbok,“ kata poela Tjio Keng jang teroesken bitjaranja: „tjoba kaloe tida, belon taoe apa djadinja. Marika itoe memang ada orang-oraag jang tida ternama baek, soeka menipoe, menggelapken orang poenja barang dan kaloe mengoetang tida maoe membajar.“
„Itoelah bener-bener bangsat,“ kata Tee Tjong dengen seara menggerendang. Kamoedian ia berpaling pada itoe doea Gongbok dan minta ini orang politie poenja pertoeloengan, soepaja itoe perkara jang baroesan terdjadi, biar diatoer sampe beres di hadepan Thaysioe.
Itoe doea Gongbok berdjandji nanti oeroes sampe beres, apapoela orang jang diperlakoeken tida patoet, ada ini Thotongtjhie poenja sobat baek.
Begitoelah sasoedanja minoem-minoem lagi sabentaran, masing-masing lantas berpisa. Itoe doea Gongbok balik poela ka tempatnja, sedeng Tee Tjong bersama itoe sobat, poelang ka hotel tempatnja menginep.
Sasampenja di itoe roema menginep, Tjio Keng berkata:
„Akoe dengen Hengtiang ada berdiam di Gak-bio, mengapatah sekarang ada di sini ?“ „Ja, kerna kabetoelan akoe lagi membawa soerat,“ saoet Tee Tjong.
„Soerat? Soerat apatah?“ tanja Tjio Keng dengen heran.
Di sitoe Tee Tjong lantes toetoerken satoe persatoe, bagimana dengen firmannja baginda, ia diprenta membantoe dalem oeroesan perang. Dan sekarang oleh Tong Djoebit ia disoeroe bawa soerat pada pembesar di ini kota, dan laen-laen poela jang pembatja telah taoe.
Tjio Keng manggoet-manggoet. Kamoedian Tee Tjong menanja: apa ini soedara soeda denger bagimana Hengtenja di bebrapa tempat soeda bergerak aken menjataken berdiri sendiri.
„Ja, ada djoega,“ saoet Tjio Keng: “tapi tida banjak; apa Koko ada taoe banjak tentang gerakannja kita poenja soedara-soedara itoe ?“
„Akoe djoega tida taoe terang, kata Tee Tjong, „tapi akoe taoe, jang Lie Eng ada berdiam di lemmatjwan dengen satoeroe orang-orang gaga: sedeng Wie Siauw-tjhit, Soen Liep dan sadereknja ada di Tenghoensan,“
„Bagimana Koko pikir tentang itoe ?“
„Bagimana?, akoe tida pikir apa-apa.“
Lebi djaoe Tee Tjong kata, kaloe Tjio Keng poenja perkara soeda djadi selesih dan oewangnja jang saratoes tail soeda dibajar poelang, baek ini soedara balik sadja ka doesoen sendiri aken peroesahaken sawa; kerna bertani ada lebi enak dari pada berdagang koelilingan. Sedeng ia poen, kaloe soeda trima soerat pembalesan, maoe balik kombali ka gredja tempat di mana ia lagi soetjiken diri.
Tjio Keng memanggoet, menjataken soeka toeroet itoe nasehat. Sahabisnja bersantap sore, doea orang ini lantas masoek tidoer.
Esok paginja sasoeda toekar pakean Tee Tjong laloe adjak Tjio Keng pergi ka kantoornja Thaysioe, pada siapa ia toetoerken perboeatannja Kam Mo dengen kambratnja. jang kamaren soeda redjang Tjio Keng di tenga djalan, lantaran perkara oetang jang itoe orang-orang kaparat tida maoe bajar.
„Kam Mo?, apa ia bikin lagi perkara jang tida patoet?" menanja itoe pembesar, jang memang soeda kenal lama namanja itoe orang-orang djahat.
„Bener," kata Tee Tjong: „hal itoe ada disaksiken djoega oleh Djiwie Gongbok.
„Bener, tadi poen Gongbok soeda rapport itoe perkara," kata Thaysioe jang lantas prenta doea oppas pergi ka roema Kam Mo, aken tangkep itoe lima orang bawa ka mari.
Tida lama itoe orang-orang telah dibawa dateng. Kerna marika memang ada terkenal djahat, maka sasoedanja ditanja dan ternjata kasalahannja, Thaysioe lantas prenta rangket saorang tigapoeloe rotan, dengen moesti bajar djoega oewangnja Tjio Keng jang dipindjem. Kaloe tida, nanti dimasoeki teroes ka dalem pendjara.
Mendenger itoe antjeman, Kam Mo djadi amat katakoetan, hingga maoe atawa tida, terpaksa ia bajar djoega oewang itoe, dengen berdjandji tida brani berboeat lagi perkara-perkara jang tida patoet.
Sasoedanja ini perkara selesih, Tee Tjong hatoerken trima kasi pada itoe pembesar dan kadoea Gongbok, jang soeda membikin beres ini perkara.
Pada hari jang kalima, Tee Tjong poen dapet trima soerat balesan. Maka sasoeda membri slamat berpisa pada itoe doea Gongbok dan Tjio Keng, ia lantas berangkat ka kota Radja.