Pembalesannja Kawanan Liangsan/Bagian katiga/Bab 14
XIV
Di Simjangkang Tjio Keng katemoeken
bahaja, sedeng di sapandjang djalan
alamken kasoesahan.
Pada masa itoe harganja beras di kota Kian-kong ada amat mahal, sedeng di Ouwkong ada sabaliknja. Maka pada waktoe Tee Tjong soeda po elang, Tjio Keng poen laloe bikin poela penagian pada laen-laen orang jang masi ada beroetang padanja maka dalem hari itoe, ia bisa koempoel oewang kira-kira limaratoes tail perak.
Meliat keadahan moesin di ini waktoe, sabagi orang dagang jang soeka boeroe kaoetoengan, Tjio Keng poen maoe mengedjar itoe. Maka boeat dapet kaoentoengan jang bagoes, ia tida maoe djoeal lagi rempa-rempa atawa obat-obatan, hanja hendak pergi sadja ka Ouwkong aken membeli beras boeat didjoeal di ini kota.
Kaloe berlambat-lambat takoet harga itoe nanti kaboeroe toeroen, maka sasoedanja beresken barang-barang, ia laloe pergi ka Liongkangkoan, dan dari sini ia sewa satoe praoe boeat belajar ka Ouwkong ib side isb stod Toekang praoe itoe ada terdiri dari doea orang, jang samboet penoempangnja dengen kalakoean manis dan membri pelajan dengen satjoekoepnja, hingga Tjio Keng djadi merasa senang hati.
Sasoedanja praoe itoe moelai beladjar, Tjio Keng laloe menanja, katanja:
„Siapatah Lopeh ini ampoenja nama?"
„Oh, akoe ini ada orang dari kaoem Liok, saoetnja itoe toekang praoe, jang dari roepanja kaliatan amat tida mengasi, kerna badannja kate dan gemoek, soeatoe tanda tenaganja besar. Moekanja haroes dibilang djelek dari pada bagoes.
„Itoe jang satoe?" tanja poela Tjio Keng.
„la temenkoe ada saorang she Thio, tapi oleh orang banjak ia dapet gelaran Swatlitjia."
Sabelonnja Tjio Keng menjaoet, di kapala praoe ada kadengeran soeara orang berkata:
„Kenapa akoe poenja gelaran sadja kaoe bertaoeken pada itoe tetamoe, sedeng kaoe sendiri poenja nama panggilan, kaoe tida kasi taoe? Apa kaoe maloe, Laytauwwan ?, hahaha!"
Orang jang berkata itoe boekannja laen dari pada kawannja si toekang praoe. Jang kamoedian tiga orang itoe lantas tertawa bergelak-gelak.
Praoe berdjalan teroes, sedeng angin ada bagoes.
Selang sapoeloe hari kamoedian, sampelah marika di bilangan Kamtjioe. Tapi boeat sampeken itoe kota dari tempat di mana praoe berada, masi ada kira-kira tigapoeloe li djaoenja. Itoe waktoe koenjoeng-koenjoeng haloeannja angin djadi beroba, langit jang tadinja terang lantas kaliatan mendoeng, sedeng saldjoe toeroen begitoe deras hingga djalannja praoe terpaksa moesti ditoenda.
Toekang praoe poen laloe pinggirken kandarannja, kerna koeatir dapet bahaja di waktoe jang begitoe tida santausa.
Dari pinggir itoe soengei ada kaliatan satoe doesoen di kadjaoean, dimana ada bebrapa petak roema jang berdiri mementjil satoe dari laen. Hawa itoe wakoe amat sedjoek, maka itoe toekang praoe jang bergelar Swatlitjia laloe berkata pada temennja:
„Ah mendadak-dadak boleh toeroen angin begini, hingga kita poenja perdjalanan djadi tertjegah."
„Di waktoe hawa begini dingin, kaloe ada arak si enak djoega," kata itoe kawan jang diseboet Laytauwwan, kita boleh angetin peroet sama sedikit makanan."
„Tapi di itoe doesoen masa ada arak. Pergilah kaoe tjari sedikit."
„Ah, sajoer si ada baek, tidalah-soeda. Asal ada arak soeda tjoekoep."
„Baeklah akoe nanti tjari, kaloe2 bisa dapet."
Sahabisnja kata begitoe, si kawan lantas naek, sedeng saldjoe masi toeroen seperti tepoeng.
Tjio Keng jang berada di dalem praoe poen merasa dingin. Selang tida lama itoe Laytauwwan jang pergi telah kombali. Dari djaoe kaliatan ia mendatengi sambil menenteng satoe ajam lelantjoer dan berapa bidji anak bebek. Di tangannja jang laen ada menenteng saekor ikan lehi, sedeng di kantongnja ada kaliatan satoe botol arak, hingga djalannja djadi berenggang-berenggong, lantaran itoe bebawahan jang banjak.
Sasoedanja deket ia berkaok-kaok minta kawan itoe dateng bantoein membawa. Dan itoe temen jang ada di praoe, satelah denger soearanja Lay tauwwan, lantas melongok, kamoedian berkata sambil tertawa:
„Hola! banjak amat! hahaha!......"
Kamoedian ia melompat ka darat dan samboeti itoe anak bebek bersama ikan. Dan sambil berdjalan marika beromong bisik-bisik.
Sasampenja di praoe, sigra djoega marika potong itoe ajam, bebek dan masak ikannja, jang sasoedanja mateng laloe dibawa ka pertengahan praoe boeat tetamoenja dahar sore.
„Ini hari dapet banjak makanan," kata itoe toekang praoe sambil tertawa: „soenggoe kabetoelan sekali di waktoe sedjoek begini, bisa dapet arak poeti jang baek. Hahaha!, marila kita-orang dahar dan minoem-minoem."
Tjio Keng tida menampik, satelah disoegoeken lantas makan minoem dengen senang. Apapoela hawa ada begitoe dingin, hingga toeroennja arak dirasaken enak sekali. Sedeng si toekang praoe sabentar-bentar tambaken arak dengen kalakoean manis, hingga achir-achir meliat parasnja Lay tauwwan berdoea Swatlitjia jang djelek dan tida mengasi, hatinja djadi berpikir:
„Mengapatah ia berlakoe begini manis? Apa boleh djadi lantaran liat akoe ada banjak barang dan oewang, hingga hatinja djadi dapet niatan djahat dan maoe loloh akoe sampe mabok, soepaja marika gampang rampas barang-barangkoe?
― Ja, boleh djadi hatinja ada mempoenjai itoe niatan, atawa memang marika soeda berdami pada itoe kawan boeat menjilakai dirikoe jang tjoema sendirian."
Menginget ini, Tjio Keng lantas tampik pada waktoe itoe toekang praoe maoe toewangken lagi tjawannja, dengen bilang soeda tjoekoep.
„Ah, masalahi baroe sabegitoe sadja soeda tjoekoep," kata si toekang praoe jang berbadan gemoek sambil paksa toewangken djoega: „minoem lagi bebrapa gelas poen tida kenapa, kerna sekarang praoe poen tida belajar."
„Ja, benerlali," kata toekang praoe jang satoe aken menjamboeng bitjara kawannja: „ini hari kabetoelan kita dapetken banjak makanan, maka amat sajang kaloe tida diabisin. Djoega ini arak rasanja sampe bagoes, boekan ?" Tjio Keng tida menjaoet, tapi hatinja berpikir lagi mengapatah ia moesti tjoeriga dan takoet, seperti satoe pengetjoet. Boekantah ia ada bernama Tjio Keng, jang doeloe hari pernah tinggal di Liangsan. Dan masatah orang-orang gaga dari Liangsan moesti takoet pada ini doea toekang praoe?
Berpikir sampe di sini, ia lantas berdiam sadja waktoe meliat tjawannja ditoewangken kombali.
Arak itoe lantas diminoem kering.
„He, mengapa kaoe tida minoem ?" tanja ia kamoedian, waktoe liat itoe toekang praoe tjoema dahar sadja barang-barang hidangan.
„Sebab kita-orang tida bisa minoem banjak-banjak," menjaoet itoe Swatlitjia: „djoega kaloe kita minoem sampe mabok, praoe djadi tida bisa didjalanken."
Mendenger itoe perkatahan, Tjio Keng poenja katjoerigahan timboel kombali dan sekarang ia inget apa jang doeloe telah terdjadi pada Thio Soen, jang waktoe menjebrang di soengei Jangtjioe moesti alamken perkara tida enak, djoega lantaran perkara arak.
Ini ingetan jang paling blakang membikin ia ambil poetoesan boeat tida maoe minoem lebi banjak dari apa jang soeda.
Maski tjawan jang blakangan telah ditoewangken kombali, toch Tjio Keng tida maoe minoem, hanja lantas sadja masoek ka dalem kamar, dengen bilang kapalanja telah poesing. Kerna merasa koeatir orang nanti berboeat djahat, maka waktoe tidoer ia tida boeka lagi badjoe loewar, sedeng golok pendeknja ia taro di bantal, soepaja begitoe terdjadi perkara apa-apa, sendjata itoe bisa lantas diambil boeat digoenaken.
Sakean lama telah berlaloe, tapi belon djoega bisa poeles, kerna hatinja ada banjak berpikir. Itoe waktoe hawa djadi samingkin dingin, maka ia ambil selimoet dan toetoepi badannja dengen itoe kaen panas, sedeng soearanja angin jang kentjang ada kadengeran menderoe-deroe.
Achir-achir ia poeles djoega. Maski bagimana djoega, toch achirnja Tjio Keng telah poeles dengen lelap, hingga dalem tidoer ia mengimpi-ngimpi.
Tapi kira-kira djam tiga ia mendoesin dan denger soeara orang ngomong dengen berbisik. Dan maski tida kadengeran njata apa jang dikata, toch hatinja djadi kaget dan lantas sadja meraba ka bawa bantal.
Bagimana terkedjoet rasa hatinja, waktoe golok jang ditaro di sitoe, tida ada. Sigra ia meleki mata dan memandang di sakiternja itoe roewangan tempat tidoer.
Itoe tempat tida dipasangi api, hingga sana sini tjoema kaliatan gelap sadja. Tapi sasoedanja mendelang sakoetika lama, dan dari sinarnja saldjoe jang toeroen, ia liat bajangan orang jang lagi memboeka pintoe pelahan-pelahan.
„Ah, njatalah doegahankoe tida sala," kata Tjio Keng dalem hati: „ini toekang praoe ada berniat djahat."
Sambil berpikir matanja mengawasi teroes, Dimana achirnja ia kenalin bahoewa orang jang memboeka pintoe Laytauwwan, sedeng tangan memegang satoe golok pendek.
Berbareng itoe, dari blakang praoe kaliatan Swatlitjia jang masoek dengen berdjingke-djingke, sedeng tangannja, ada memegang satoe kampak.
Di itoe waktoe Tjio Keng masi belon taoe bagimana moesti berboeat. Maski hati sampe taba tapi lantaran di dampingnja tida ada sapotong sendjata, tida oeroeng membikin ia merasa koeatir.
Kerna koeatir nanti diserang pada sabelonnja, bangoen, maka dengen tjepet Tjio Keng berlompat dan sembat kaen lajar jang menoetoepi dingdingnja praoe. Tapi berbareng itoe Swatlitjia berdoea kawannja soeda menjerang. Dengen kasebetan jang loear biasa orang moeda ini laloe kelip dan egosin badan moesoenja, hingga Swalitjia poenja kamtpak lantes terdjato di tempat kosong.
Tapi Laytauwwan lantas membatjok. Tjio Keng kelip lagi sakali dan tendang iganja ini orang doerhaka jang blakangan, hingga si gemoek itoe djadi sempojongan. Tapi berbareng itoe Tjio Keng melompat lagi, dengen maksoed boeat pasang koeda-koeda; tapi ia loepa jang tempat itoe boekan lapangan, hanja tempat jang dilompati itoe, ada moeka aer.
Bagimana terkedjoet Tjio Keng poenja hati, itoelah pembatja bisa doegas sendiri. Tapi bagi itoe doea bangsat ada dirasaken girang sekali, marikastidasoesah kaloearken lagi banjak tenaga.
„Itoelah ada lebi baek boeat kita,“ kata Swatlitjia dengen soeara menggerendang, sambil mengawasi ka moeka aer, kerna koeatir kaloe-kaloe Tjio Keng ada mempoenjai kapandean saloeloep dan nanti enjerang padanja dari blakang.
„Tapi boeat apa kita perdoeliken lagi padanja,“ kata Laytauwwan: hanja marilah kita preksa barang-barangnja.
„Ja, benerlah,“ sapet itoe kawan: „boeat apatah kita perdoeliken lagi padanja, kerna maski ia ada mempoenjai kapandean dapa djoega, masatah ia bisa tahan melawan hawa jang begini dingin?
―Hahahaha!“
Kadoea bangsat Itoe laloe masoek ka dalem kamar tempat di mana baroesan Tjio Keng tidoer, sasoedanja memereksa dan dapet kanjatahan, jang dalem kantong-kantong idjo ada berisi perak-perak potongan, jang sama sekali ada berharga kira-kira limaratoes tail, hatinja djadi amat girang dan ampir sadja marika berdjingkrak-djingkrak.
„Bener-bener ini sekali kita dapetin kakap, hahaha!„ kata Swatlitjia sembari tertawa bergelak-gelak: „nah sekarang ambillah itoe jang saparo, sedeng ini jang saparonja ada boeat akoe.“
Masing-masing laloe ambil bagiannja dan laloe tjeritaken perkara-perkara jang menjenangken hati. Bangsat itoe kata pada kawannja, sekarang sasoeda mempoenjai harta begini banjak, ada lebi baek kaloe marika tjari saorang prampoean goena temen tidoer. Kerna sekarang toch marika mampee boeat pelihara orang.
Sahabisnja beromong-omong marika laloe tertawa.
„Dengen ada poenja ratoesan tail perak, tida nanti kakoerangan prampoean jang maoe ikoet pada kita,“ kata Laytauwwan: „tapi sekarang hajoelah kita teelak ini praoe aken peelang ka tempat sendiri, di sana kita nanti berichtiar lebi djaoe.“
Kawan itoe moefakat dan begitoelah praoe laloe ditoelak kombali menoedjoe ka tempat sendiri.
Sekarang marilah kita liat Tjio, Keng apa soeda terdjadi waktoe ia terdjeboer ka dalem aer.
Aer di itoe soengei ada dalem, sedeng hawa peen ada teramat dingin. Tapi beroentoenglah ini orang moeda soeda biasa maen di aer. Kerna doeloe soengei Siangkang memang ada mendjadi tempatnja bernang dan silem.
Koetika badannja kena aer, hatinja boekan maen poenja kaget. Tapi sigra djoega ia dapet taoe jang baroesan ia soeda sala melontjat. Menginget soeda katelandjoeran djato ka dalem kali, lantas sadja ia saloeloep lebi dalem dan waktoe kakinja mengindjak tana, lantas sadja ia menendang sakoeat-koeatnja tenaga, hingga badannja dengen pesat mendjimboel naek.
Bagi orang jang tida biasa maen di aer, memang boleh djadi mati. Tapi boeat Tjio Keng tida begitoe, hanja ia bisa entengken toeboehnja hingga dalem sasaät kamoedian ia soeda menimboel di moeka aer.
Tapi sekarang dirinja boekan lagi berada di Lokoantji, hanja di satoe tempat jang ia tida taoe apa namanja.
„Inilah boekannja di tempat tadi,“ kata ia dengen soeara menggerendang, sambil bernang kapinggir.
Sigra djoega ia soeda ada di darat.
la menengok di sakoeliling tempat, dimana ada kaliatan oetan alang-alang, tapi tida dapetken djalanan.
Dengen tangan ia toelak itoe poehoen alang- alang ka kiri dan ka kanan, dan djalan di sitoe dengen asroek-asroekan, sedeng hati merasa koeatir, lantaran tida taoe bakal teroes ka mana.
„Kaloe ini oetan lebarnja doea-tiga li, tjilakalah akoe poenja diri. pikir ia dalem hati: hingga sampe pagi, sampe besok, belon tentoe akoe bisa dapetin djalanan jang bener, kaloe begitoe akoe boleh djadi mati lemas dis ini tempat.“
Tapi beroentoenglah stida sabagimana jang dikoeatirken. Kerna berdjalan belon sabrapa lama, sigra ia dapetken satoe tana tinggi dan di sitoe ia lantas naek, dengen toeboeh goemeter lantaran kadinginan.
Sasoeda peres pakeannja jang tjiproek, badanja djadi samingkin goemeter lantaran tertioep angin. Tapi itoe waktoe soeda ampir pagi, hingga lapat-lapat dari kadjaoean ada kaliatan sinarnja api.
„Oh itoelah roema orang tentoe,“ kata Tjio Keng dengen dapet harepan: „tapi di mana djalannja boeat pergi ka itoe roema jang kaliatan?“
Sambil kata begitoe ia berdjalan teroes menoedjoe ka itoe tempat di mana api ada kaliatan. Djalanan jang penoeh dengen saldjoe ada amat litjin, hingga bebrapa kali ia maoe djato.
Sasoeda dengen banjak soesa, achirnja ia sampe djoėga dan liat tempat itoe ada gredja ketjil.
Dengen merasa amat lelah ia berdjalan lagi boeat menghamperi, dengen tida taoe kaloe kakinja ada berdjalan di batoe, kerna di salebar itoe jang kaliatan tjoema saldjoe meloeloe. Sasampenja di depan itoes gredja ia lantas djato terpleset, hingga badannja terbanting dan berboenji menggabroek.
Djoestroe itoe waktoe satoe padri toea jang abis membatja kitab dnpet denger soeara menggedoebraknja Tjio Keng, hingga ia boeroe-boeroe boeka pintoe aken meliat. Satelah liat ada orang djato di atas saldjoe, ia lantas toeloengi dan bawa ka dalem gredja.
Tjio Keng soeda djadi pangsan lantaran lelah dan lemas.
Itoe padri toea laloe menoeloeng sabrapa bisa. Masakin aer dan ambil sedikit obat jang memang ada sedia. Kamoedian bersama sedikit djahe jang ditoemboek, bia lantas tjekoki orang jang pangsan itoe.
Sabelon Tjio Keng inget dirinja, ini Lotiang prenta moeridnja toenggoein, sedeng ia sendiri masoek ka dalem kamar dan ambil pakean kering boeat ditoekari, kerna dengen tjelana badjoe jang basa begitoe, orang jang pangsan boleh djadi mati kadinginan.
Sasoedanja orang jang bertjilaka itoe inget orang itoe padri toea laloe djak ka deket perapian boeat angeti badan, dan bagi djoega satoe mangkok boeboer entjer boeat angeti peroet.
Atas ini pertoeloengan, Tjio Keng mengoetjap riboe-riboe trima kasi. Kerna kaloe tida ada ini Lotiang, pasti djiwanja bakal binasa.
Itoe padri laloe menanjaken Tjio Keng poenja asal, orang dari mana dan maoe ka mana dalem pagi hari begitoe. Atas ini pertanjahan, Tjio Keng tjeritaken satoe persatoe lantarannja, jang boleh dikata: doea kali ia maoe mati, tapi tida djadi. Pertama di dalem praoe, kadoea di saldjoe jang baroesan.
Padri toea itoe merasa kasian, satelah denger itoe bahaja jang menimpa atas dirinja ini orang moeda. Sedeng Tjio Keng sasoeda tjeritaken riwajatnja laloe tanja: apa ini tempat masi teritoeng bilangan Lokoantji.
Inilah soeda boekan termasoek dalem bilangan Lokoantji lagi,“ saoet itoe padri: „dari sini pergi ka sana masi ada sapoeloe li poenja djaoe”
Sapoeloe li?“ begitoe Tjio Keng oelangi perkatahannja itoe hweshio dengen heran: „he, inilah bener-bener tida didoega.“
Kamoedian ia berdiam sabentaran dan doega, ¡toe doea bangsat jang menjamar djadi toekang praoe, sekarang tentoe soeda balik ka tempatnja, dengen doega jang dirinja soeda mati di dalem aer.
„Tapi, ja, djagalah baek-baek dirimoe, toekang praoe bangsat,“ kata Tjio Keng dalem hati: „akoe nanti bikin peritoengan dan kasi balesan jang satimpal atas kadjahatanmoe berdoea.“
Kamoedian Tjio Keng landjoetken lebi djaoe pembitjarahannja pada itoe Lotiang, ia tanja: hweshio ini poenja asal dan brapa lama soeda tinggal di ini gredja, siapa namanja jang terhormat dan laen-laen poela.
Itoe Lotiang kata: ia ada berasal dari Soetjoan, namanja diseboet Tam Djian dan djadi padri di ini gredja soeda sapoeloe taon labi.
Sasoeda badan meras anget betoel, itoe padri laloe adjak doedoek di pertengahan loear, dimana sahabisnja pasang hio, lantas diadjak makan, kerna soeda waktoenja orang dabar pagi.
Kerna badan masi merasa lemas, maka itoe hari ia tida lantas berangkat. Sedeng besoknja poen iamasi teroes menoempang dalem itoe gredja, kerna badjoenja jang ditjoetji masi basa. Dan dalem itoe doea hari beroentoen, lantaran langit salaloe mendoeng, pakeannja tida bisa didjemoer.
Selang tiga hari sasoeda badjoe itoe kering, Tjio Keng lantas berpamitan pada itoe padri toea, boeat teroesken perdjalanannja lebi djaoe.
„Ini kali poenja berpisa, belon taoe sampe kapan bisa katemoe lagi pada Losoehoe,“ kata Tjio Keng sambil takoepken kadoea tanganja, di hadepan itoe padri toea: „Tapi Losoehoe poenja pertoeloengan dan boedi besar, jang telah menoeloeg djiwakoe dari kamatian, tinggal teroekir dalem hati dengen tida nanti diloepaken.“
„Tjoema sajang sekali,“ kata poela ia: „jang di badankoe tida ada laen barang dari ini pakean, hingga tida bisa tinggalken apa-apa boeat didjadiken tanda mata.“
„Oh, boeat menerima bingkisan, itoelah Pintjeng sendiri tida brani harep," kata itoe padri toean dengen soeara soenggoe: „apa jang telah dilakoeken pada litoespagi, itoelah tida lebi dari kawadjiban.
Tjio Keng merasa terharoe atas kabaekanja ini Lotiang, maka kombali ia mengoetjap banjak trima kasi.
„Harep sadja jang di blakang hari Tetjoe nanti bisa membales Losoehoe poenja boedi,“ kata Tjio Keng: „maka boeat sekarang, Tee Tjoe tida bisa berboeat laen dari hatoerken sadja trima kasi.“
Tam Djian Hosiang menjeboet berapa perkatahan soetji jang ada terdapet di dalem kitab. kamoedian, atas pertanjahannja Tjio Keng, ka mana djalanan jang paling deket boeat sampeken djalan besar, hweshio toea itoe laloe terangken dengen petah-petah, jang achirnja ia berkata:
„Dengen toeroeti itoe djalanan, sigra djoega kaoe bisa lekas sampe di djalanan rajah jang paling deket.
Tjio Keng memanggoet dan hatverken djoega slamat tinggal pada laen hweshio ketjil jang ada di sitoe, kamoedian lantas berlaloe dari itoe gredja.
Dengen menoeroet djalanan jang Tam Djian Hosiang oendjoeki baroesan, betoel sadja sahelonnja melaloei satenga li, Tjio Keng soeda ada di djalanan besar. Tapi, dalem hati ada bingoeng, kerna tida taoe ka mana sekarang moesti pergi
Boeat balik kombali ka kota Kiankong, boekan sadja amat djaoe, hanja teroetama tida mempoenja ongkos; sedeng boeat pergi ka Ouwkong, sekarang soeda tida bergoena. Djadi ada lebi baek pergi ka Kangtjiee, jang dari sini ada lebi deket dan brangkali sadja di sana bisa katemoe sala satoe kenalan.
Sasoedanja tetepken pikiran ia lantas berdjalan dan sore baroe sampe dalem itoe kota.
Kerna peroet merasa lapar dan kaki poen soeda lemas, ia boeroe-boeroe menghamperi satoe roema penginepan, dengen minta disadiaken kamar dar barang santapan.
Tapi itoe toean roema makan jang liat padanja, lantas bertjoeriga, kerna doega Tjio Keng tentoe boekan orang baek-baek, kerna kaloe betoel orang pelantjongan, tentoe ada bawa boengkoesan. Tapi ini tetamoe boekan sadja ada membawa apa-apa, malah pakeannja poen ada kaliatan tida mengasi.
Begitoelah dengen membri alesan jang semoea kamar-kamar soeda penoeh makanan poen telah abis, ia minta Tjio Keng tjari sadja laen roema menginep.
Tjio Keng apa-boleh-boeat dan lantas berlaloe ka laen tempat. Di sapandjang djalan ia toendoeki kapala sambil berpikir dengen sedi. Tapi achir-achir ia berkata pada hati sendiri:
"Ah, mengapatah akoe moesti berdoeka dan poetoes harepan, kaloe baroe katimpa kasoesahan sabagini sadja? Satoe laki-laki toch djamak meampak kamalaratan.....”
Sabelon perkatahannja dioetjapken abis, dari blakang ada kadengeran soeara orang memanggil, ang satelah ia menoleh, sigra ia kenalin bahoewa orang itoe ada sala satoe dari langanannja.
„Hola, sobat! Kaoe dari manatah ?" kata itoe orang sambil tertawa, teroes menghaperi padanja.
„Bagimana, apa sakean waktoe ada baek dan mana dsganganmoe?" tanja poela itoe orang sempari djalan sama-sama. Sedeng Tjio Keng laloe jeritaken bahoewa sekarang ia tida berdagang lagi, kerna seantero kapitaalnja telah moesna dirampas badjak.
Itoe langganan jang mendenger djadi tertjenggang. Bermoela ia tida maoe pertjaja, tapi lantaran Tjio Keng itoe bitjara dengen soenggoe-soenggoe, ia laloe mengelah napas dan berkata:
„Soenggoe akoe tida doega sekali. Dan sekarang ka manakah kaoe maoe pergi?"
„Belon taoe," saoet Tjio Keng lantas tjeritaken bagimana baroesan toean roema makan telah toelak kadatengannja, dengen alesan semoea kamar-kamar soeda penoeh dan makanan tida ada lagi. Dan itoe penoelakan ia taoe borkar ada dengen sabenernja, hanja lantaran liat dirinja seperti satoe pendjahat.
Itoe langganan jang satelah denger semoea tjeritanja, laloe adjak orang jang lagi katimpa kasoesahan mampir di roemanja, adjakan mana lantas sadja ditrima dengen senang hati.
Demikianlah itoe satoe malem Tjio Keng bermalem di roemanja itoe orang. Besokannja pada waktoe maoe berangkat oleh toean roema dibekelin sedikit ongkos, dimana sasoe lanja hatoerken trima kasi, Tjio Keng laloe berlalee.
Orang moeda ini teroesken poela perdjalanannja lebi djaoe. Tida lama kamoedian ia sampe di tepi kali Simyangkang.
Di itoe tempat Tjio Keng liat ada banjak berdiri roema-roema orang, djoega roema-roema penginepan dan roema makan ada berbaris-baris dan jang satoe ada lebi bagoes dari jang laen
Satoe roema makan jang besar dan pake merk Simyanglauw, ada teratoer dengen netjis. Sasoeda memandang sakoetika lama Tjio Keng laloe masoek dan ambil tempat doedoek di deket djendela, dimana ia bisa memandang ka tempat jang djaoe dengen hati terboeka.
Aer soengei Simyangkang jang megalir ada kaliatan bagoes sekali. Sedeng poentjaknja goenoeng-goenoeng jang dipandang dari kadjaoean ada terliat indah. Dan sala satoe dari poentjaknja itoe goenoeng, kaloe dipandang betoel-betoel ada meroepaken seperti kapalanja orang toea.
Salagi bengong memandang itoe, djongos daeng bawaken arak dan barang makanan, dimana Tjio Keng lantas minoem sambil berpikir.
Achir-achir ia djadi inget perkara-perkara jang soeda selang belasan taon, dimana doeloe wakoe Song Kang minoem arak di ini loteng roema makan, lantaran mabek Song Kong-beng soeda oelis satoe sairan di atas tembok, dan ampir sadja membahajaken dirinja. Beroentoeng dengen pertoeloengannja sakalian soedara-soedara, itoe Twako tida koerang satoe apa.
„Ja, di ini loteng! Benerlah di ini loteng!" kata ia sambil menjelingoekan kasana kamari:
„Tapi sekarang manatah itoe sakalian kawan-kawan jang doeloe, jang begitoe baek dan satia hati?"
Menginget itoe perkara jang doeloe, dengen tida terasa ia poen soeda njanjiken itoe sairan jang doeloe telah ditoelis oleh Song Kang. Kamoedian waktoe Tjioepo dateng bawaken lagi barang hidangan, ia minta djongos itoe ambilin peraboet toelis.
Waktoe barang-barang itoe telah sadia, sigra djoega ia angkat kalam dan laloe toelis satoe sairan di pinggir tembok, dengen zonder berpikir banjak, kerna ia poen ada teritoeng satoe sastrawan jang ternama djoega.
Sair jang ditoelis itoe begini boenjinja:
„Berlaksa perkara soeda tertjipta,
Jang semoea ada mengheranken pemandangan
mata,
Perobahan nasib satiap hari soeker dikata,
Tapi berobanja soeda tentoe dan njata."
„Seperti terpoeternja roda, begitoelah adanja
perobahan,
Kamaren bergirang, ini hari bisa menampak
kadoekahan,
Begitoelah memang maoenja alam poenja keadahan,
Jang terlebi doeloe soesa dibikin doega-doegahan."
Baroe sadja doea sair itoe ditoelis abis dan taro penanja di atas medja, blakangnja merasa ada jang tepok dan orang itoe berkata dengen soeara keras:
„Hm! kaoe djoega menoelis itoe sairan seperti jang doeloe ditoelis oleh Song Kong Beng di ini loteng?" Tjio Keng menengok dengen terkedjoet, dan sigra djoega ia kenalin orang itoe
„Oh!.... akoe kira siapa?" kata Tjio Keng dengen roepa girang, kerna orang itoe boekan laen dari Bok Tjoen alias Siauwtjialan, sala satoe ia poenja sobat baek pada doeloe hari, jang baroe sekarang bertemoe kombali.
Tjio Keng laloe silaken sobatnja itoe berdoedoek dan tanja apa-apa.
"Wah, akoe poenja hikajat ada pandjang sekali," kata Bok Tjoen sambil hadepken gelas jang si djongos roema makan baroe tamba lagi satoe.
Kamoedian ia lantas tjeritaken, bagimana sakombalinja di Kiatyangtin bersama-sama ia poenja soedara toea, marika toentoet pengidoepan tida tentoe. Tapi marika berdoea dipandang sabagi djago oleh kerna kagagahan dan kabraniannja, hingga tida begitoe soesa boeat sakedar dapetken makan.
Tapi blakangan, lantaran itoe Koko meninggal doenia, ia merasa tida betah boeat berdiam lebi lama di itoe tempat dan lantas djalan mengoembara lagi ka sana sini seperti boeaja. Di mana ada orang berdjoedi di sitoe ia menimbroeng, boeat dapetken sedikit oewang goena meliwatken hari.
Sasoeda menoetoerken itoe, baroe ia menanja tentang keadahannja Tjio Keng. Ini sobat poen laloe tjeritaken, bagimana doeloe ia ada berdagang dan dapet djoega sedikit oentoeng. Tapi belon. brapa lama, salagi maoe pergi membeli beras boeat didjoeal, oewangnja telah dirampas oleh doea badjak, jang ampir sadja djiwanja toeroet binasa.
„He, bagimana boleh begitoe ?" tanja Bok Tjoen dengen heran.
„Kerna akoe sendiri jang beralpa," saoet Tjio Keng: „kaloe akoe bertjoeriga dan bersadia lebi doeloe, belon tentoe sampe kadjadian begitoe roepa.“
Atas pertanjahannja Bok Tjoen, Tjio Keng laloe tjeritaken lebi terang, bahoewa praoe jang disewa itoe dari Liongkangkoan. Bermoela memang ia ada sedikit tjoeriga, tapi blakangan, kerna pikir tida baek terlaloe mendoega djahat pada orang jang belon tentoe bersala, maka ia beralpa boeat hati-hati, Dan djoestroe lantaran itoe, maka pada sorenja dari harian si pembadjak maoe ngerampok bararg bawahannja, ia soeda minoem lebi banjak dari biasa.
„Djoeroemoedi dari itoe praoe akoe kenalin roepanja, kaloe akoe katemoe," kata poela Tjio Keng: jang satoe diseboet Swatlitjia dan kawannja Laytauwwan."
„Soenggoe koerang adjar sekali itoe bangsat-bangsat," kata Bok Tjoen: „brapa djoemblanja itoe oewang jang dirampas dan di mana roemanja itoe doea pembadjak?"
Tjio Keng lantas tjeritaken lebi djaoe, bahoewa sabelonnja itoe bangsat lakoeken kadjahatannja, marika satoe pada laen sering omong maen-maen. Dan dari pembitjarahannja itoe, ia doega tempat tinggalnja itoe doea orang tentoe dalem kota Kangtjioe djoega. Tentang roepa dan sikepnja itoe orang, ia petahken sanpe terang dan praoe jang disewa itoe ada praoe sampan.
„Praoe-praoe begitoe di Kangtjioe tempatnja di Lioetongwan," kata Bok Tjoen: „akoe taoe tempatnja, jang dari sini tida sabrapa djaoe. Baek sabentar kita nanti paranin dan tjari itoe orang, kaloe-kaloe sadja bisa bertemoe."
Sahabisnja beromong-omong Tjio Keng laloe panggil itoe djongos dan prenta itoeng semoea harganja barang makanan jang telah didahar Sosoedanja itoe marika laloe kaloear dan berdjalan di sapandjang tepi soengei.
Sasoeda melaloei kira-kira doeapoeloe li lebi, sampelah di satoe tempat jang diseboet Lioetongwan.
Kadoea orang itoe berdjalan pelahan-pelahan di satoe keben jang di kiterin dengen pager bamboe, dalem mana ada kaliatan saorang toea jang lagi patjoelin tana boeat ditanemin apa-apa. Itoe orang toea ada bernama Ouw Pit-koh, jang tida sekali ambil perdoeli pada itoe doea orang dan teroes sadja mematjoel.
Bok Tjoen laloe menghamperi dan tanja padanja satjara satoe kenalan, kerna pada Ouw Pitkoh memang ia ada kenal.
„Hola, kaoe ini radjin betoel," kata Bok Tjoen pada waktoe soeda mendeketi.
„Oh, kiranja Bok Siauw Long," kata itoe orang toea sambil menengok: kaoe dari manatah?"
„Akoe maoe pergi ka Lioetongwan," saoetnja:
„dan ini tempat boekan jang diseboet Lioetongwan ?"
„Benerlah Dan siapatah kaoe maoe tjari ?"
„Akoe maoe tjari Laylauwwan."
„Oh, kaoe tentoe maoe sewa ia poenja praoe, boekan?"
„Bener. Tapi mengapa kaoe tida oeroes lagi kerdjahan menjewaken praoe, hanja lakoeken ini kerdjahan matjoel jang ada lebi berat dan tjape?"
„Kerdjahan tjape sedikit tida apa, asal sadja djangan dapet tjilaka," kata Ouw Pit-koh sambil mengelah napas: „bekerdja enteng tapi kaloe moesti tjape hati dan karembet-rembet dalem perkara, apa enak kaoe kira?"
„Itoe bener," kata Bok Tjoen: sabenernja akoe soeka sekali bitjara padamoe, tapi ini hari tida ada tempo boeat omong banjak-banjak dan di manatah letaknja roema Laytauwwan? Apa masi djaoe ?"
„Oh, kaoe maoe tjari itoe manoesia?" tanja itoe orang toea dengen roepa djemoe, waktoe denger namanja Laytauwwan diseboet.
„Kenapa?" tanja Bok Tjoen dengen merasa heran.
„Dia itoe sabenernja boekan bernama Laytauwwan, hanja namanja jang betoel jalah Liok Siang. Dengen berkawan sama Thio Tek, jang pake nama Swatlitjia, marika lakoeken pakerdjahan menjewaken praoe seperti paseroh Belon lama marika balik dari kota Kiankong, tapi kawannja soeda doea hari akoe tida liat, sataoe kamana ia pergi. Baroesan Liok Siang ada liwat di sini dengen tangan membawa rantang, brangkali maoe belandja."
„Kenapa kaoe roepanja seperti merasa djemoe pada itoe doea orang?" werdem media Sebabnja..... Ah, boeat apatah akoe tjeritaken."
„Tapi di mana roemanja?“
„Itoe jang kaliatan dari sini," sambil kata begitoe Ouw Pit-koh menoendjoek pada sala satoe roema jang kaliatan dari itoe tempat.
Bok Tjoen tida menanjaken lebi djaoe, hanja lantas oetjapken trima kasi dan laloe pergi ka itoe tempat jang dioendjoek bersama-sama Tjio Keng Di djalanan jang menoedjoe ka itoe tempat marika katemoe satoe prampoean moeda jang moekanja ada dipoepoeri begitoe medok, sedeng lenggangnja dibikin djadi begitoe lemas, sambil membawa ember djalan menoedjoe ka pinggir rawa.
Doea sobat ini tida perdoeliken itoe prampoean, hanja lantas minggir sedikit soepaja djalanan dimana si njonja maoe liwat, djadi lebi terboeka. Kamoedian dengen tindakan tjepet marika telah sampe di itoe roema, jang kabetoelan tida terkoentji.
Kadoeanja itoe lantas masoek dan doedoek dengen zonder diprenta.
Tida lama itoe njonja jang baroesan dikatemoeken di djalanan, telah kombali sambil menengteng ember jang berisi aer. Satelah liat dalem roemanja ada itoe doea tetamoe, ia djadi kaget dan berkata:
„Apa kabar? Siapatah kaoe ini ?"
„Akoe maoe katemoe pada Thio Twako," saoet Bok Tjoen: di manatah ia ada sekarang?"
„la baroe kaloear. Brangkali pergi belandja“
„Kaloe begitoe, akoe maoe bitjara pada Liok Siang sadja."
„la poen baroe pergi. Tapi apa kabar?„
„Akoe maoe bitjara oeroesan sewa praoe," saoet Bok Tjoen sembari menoendjoek pada sobatnja ini tetamoe dari kota Kiankong dan kamari maoe oeroes dari oewangnja jang katinggalan di dalem praoe."
„Oewangnja jang katinggalan di dalem praoe?" begitoe si njonja oelangi perkatahannja Bok Tjoen dengen roepa koerang senang, sedeng moekanja kaliatan poetjet: „itoelah akoeotida taoe.“
Bok Tjoen jang memang di djalanan soeda berdami pada Tjio Keng, bagimana moesti berlakoe sasampenja di ini roema, sigra membri tanda pada itoe sobat. — Tjio Keng liat itoe pertandahan, lantas sadja toeloep pintoe, sedeng Bok Tjoen tarik tangannja itoe njonja, jang lantas djato di lantei.
Itoe prampoean maoe bertreak, tapi, tapi Bok Tjoen soeda tjaboet goloknja dan berkata dengen soeara mengantjem:
„Kaoe liat ini di tangankoe?"
Si njonja djadi bergoemeter sakoedjoer badan.
Kaloe kaoe maoe idoep, lekaslah kaoe kasi taoe di mana adanja itoe oewang," kata poela Bok Tjoen sambil angkat katinggi sendjatanja: „djika kaoe masi bentahan dan maoe serakain orang poenja oewang jang Liok Siang berdoea Thio Tek dapet rampas di praoenja, nistjaja binasalah djiwamoe, sedeng itoe oewang poen akoe moesti dapet kombali. Sebab sahabisnja tikem kaoe poenja dada, akoe bisa tjari di mana adanja itoe kantong dan barang-barang."
„Ampoen! Ampoenilah akoe!" kata si njonja dengen soeara meratap: "akoe bilangin, itoe oewang ada di bawah tempat tidoer. Tapi akoe toch tida bersala, apa jang marika berdoea lakoeken, sekali-kali akoe tida taoe dan toeroet tjampoer."
„Kaloe kaoe berdjoesta, hati-hatilah!" kata Bok Tjoen jang lantas soeroe Tjio Keng lekas preksa ka itoe tempat jang dioendjoek, sedeng ia sendiri bikin poela bebrapa pertanjahan: Di antara itoe doea djahanam, siapatah antaranja soeamimee ?"
„Akoe poenja soeami jalah Thio Tek," saoetnja. Menoeroet sapandjang pertanjahan, prampoean itoe memang ada ternama tida bersi, kerna ia poen ada satoe goela-goela jang telah dipiara oleh Thio Tek. Sekarang jang djadi soeaminja boekan lagi orang jang doeloe, hanja Liok Siang.
Satoe persatoe ia tjeritaken sampe terang, bagimana pada sapoelangnja ka roema, Liok Siang soeda loloh sang soeami, jang kamoedian diboenoe dan maitnja ditanem di kolong tempat tidoer.
Itoe oewang poen ada bersama-sama terpendem di sitoe.
Sekarang Liok Siang kaloear boeat pergi beli apa-apa jang perloe, kerna koeatir ini perkara kadjahatan menerbitken bahaja ia telah diboedjoek boeat pinda ka laen tempat. Oleh kerna rasa takoet soeda membikin ia djadi menoeroet sadja.
Demikianlah kata itoe njonja.
„Ka tempat mana Liok Siang maoe adjak kaoe pinda?" tanja poela Bok Tjoen.
„Ka Tienkang," saoetnja.
Tatkala itoe Tjio Keng telah balik kombali dari kamar dan kata: bahoewa itoe oewang ia tjari tida katemoe. Brangkali ini prampoean soeda mendjoesta.
Bok Tjoen laloe kasi, taoe, bahoewa menoeroet pengakoeannja jang paling blakang, oewang itoe ada di dalem tempajan jang terpendem di kolong randjang. Tapi biarlah sabentar dipreksa lebi djaoe, bener atawa tida.
Kamoedian Bok Tjoen berkata pada itoe prampoean:
„Kaoe djoega ada satoe gladak, kerna masatah laki diboenoe, kaoe boleh tinggal diam sadja, dengen tida mengadoe pada politie, kamoedian dengen begitoe iklas hati lantas toeroet itoe manoesia jang telah boenoe soeamimoe Maka sekarang, dengen kahendaknja Allah jang adil, akoe boenoe pada kaoe."
Dengen abisnja itoe perkatahan jang paling blakang, Bok Tjoen laloe toeblesken oedjoeng golok di tenggorokannja itoe prampoean djahanam, jang lantas binasa tida lama kamoedian. Kamoedian bersama-sama Tjio Keng ia gali itoe kolong tempat tidoer, dan sabagimana katanja itoe njonja jang mati, benerlah dalem itoe tana ada terpendem doea tempajan, satoe berisi oewangnja Tjio Keng jang doeloe dirampas oleh Laytauwwan berdoea Swatlitjia, dan jang laen berisi mait manoesia.
Bok Tjoen lantas potong satoe sprei dan dengen ini kaen potongan ia boengkoes itoe oewang jang sekarang telah terdapet kombali.
„Ha, itoe bangsat-bangsat“ kata Tjio Keng sambil boentel itoe boengkoesan oewang: „marika bisa rampas, tapi tida bisa makan ini oewang. Dengen merampas ini, Thio Tek terbinasa dalem tangan kawannja sendiri.“
„Sataoe ka mana itoe bangsat pergi, kata Bok Tjoen: „kaloe ia djoega ada di sini, dia djoega tida boleh dikasi idoep, kerna manoesia jang begitoe amat berbahaja bagi prikeamanan.“
Sahabisnja berkata-kata, doea sobat ini lantas berdjalan ka loear.
Begitoelah sasoedanja mengalamken banjak soesa dalem sapandjang djalan, Tjio Keng dapetken kombali miliknja jang terampas oleh itoe pendjahat, tapi satoe antaranja telah binasa di tangan kawan sendiri