Pembalesannja Kawanan Liangsan/Bagian katiga/Bab 20
XX
Lantaran oeber pentjoeri, Tjhie Seng da-
Petken soedara. Berangkat perang
Houw-jan Tjiak kirim fami-
lienja ka Lilam.
Dengen tinggalken doeloe apa jang bakal terdjadi lebi djaoe dengen oeroesannja pamerenta baroe, mari sekarang kita balik kombali ka desa Anloktjoen. Kerna berhoeboeng dengen binasanja Tjiauw Bin-koei jang telah diboenoe oleh Bok Tjoen, iboenja itoe anak bangor soeda djadi-terperandjat, waktoe denger tetangga-tetangganja tjerita, jang di soemoernja satoe gredja orang dapetken satoe mait jang soeda boesoek, tapi dari pakeannja masi bisa dikenalin seperti jang di itoe hari orang pernah liat ada dipake oleh Tjiauw Bin-koei.
Ouw Si satelah denger itoe kabar laloe boeroe-boeroe pergi ka gredja terseboet, satelah sampe, betoel sadja ia kenalin bahoewa mait itoe ada mait anaknja. Maski anak ini ada djahat dan kamatiannja membikin banjak orang djadi girang, tapi sang iboe telah tangisi begitoe sedi dan laloe bawa poelang mait itoe, aken dikoeboer baek-baek. Atas kamatiannja sang anak jang bangor itoe, Ouw Si doega ada perboeatannja Boen Hwan-tjiang, tapi lantaran sendiri tida bisa bikin pengadoean dan maoe minta pertoeloengannja laen orang, tida ada saorang jang soeka toeloeng bikini rekest dakwahan, maka orang toea itoe djadi bermasgoel dan achirnja toeroet sang anak berangkat ka lobang koeboer, lantaran mereras hati.
Atas kamatiannja itoe anak dan iboe, Boen Hwan-tjiang tida sekali dapet taoe. Maka orang toea ini djadi merasa heran sekali, bagimana sampe begitoe lama itoe orang jang maoe mendakwa padanja belon djoega dateng. Sedeng kantoor Kay Hong Hoe Ie jang soeda trima kisikannja Sioe Thay-wie, poen tida openi lagi itoe perkara.
Kerna kira Tjiauw Bin-koei ada halangan di djalan, maka boeat liwati temponja satiap hari Boen Hwan-tjiang dan Tjinkong Siansoe roendingken roepa-roepa ilmoe kasoetjian.
Pada soeatoe hari waktoe doea orang itoe ada di dalem, dari satoe djoeroesan kaliatan saorang jang berpakean seperti panglima perang kasi lari koedanja dengen kentjang dan sasampenja depan itoe gredja, orang itoe lantas toeroen dan kasiken kaartjisnja pada padri ketjil, boeat minta toeloeng disampeken pada goeroenja. Tjinkong Siansoe satelah trima itoe tiap, lantas silaken tetamoenja masoek. Sedeng itoe panglima sasampenja di roewangan terseboet laloe membri hormat pada padri toea, sedeng Boen Hwan-tjiang lantas kenalin, bahoewa orang ini ada Houw-jan Tjiak.
Kadoea orang ini jang memang soeda berkenalan lama, laloe menanjaken satoe pada laen. Kamoedian sasoedanja berdoedoek, Hwan-tjiang tjeritaken, jang datengnja di kota Radja kerna terkena perkara.
Sasoeda mendenger itoe semoea toedoehan jang Tjiauw Bin-koei hendak timpaken pada ini sastrawan toea, Houw-jan Tjiak berkata:
„Ah, itoelah perkara ketjil. Itoe semoea toedoehan toch tida ada boektinja, maka kaloe seande orang itoe dateng mendakwa, tentoe pengadilan bakal bebasken dari toentoetan. ― Lagi kaloe sampe sekarang ia belon dateng, boleh djadi Tjiauw Bin-koei telah oeroengken niatnja jang boesoek itoe. Sebab kaloe tida, manatah sampe sekarang ia belon djoega sampe ?“
Tjinkong Siansoe poen ada kata begitoe, maka hatinja Boen Hwan-tjiang djadi merasa senang Apapoela dari Thay-wie ia soeda dapet djandjian boeat ditoeloeng, maka perkara jang tersangkoe itoe terlepas dari pikirannja.
Kamoedian Houw-jan Tjiak omong-omong leb djaoe tentang poetranja jang bernama Houw-jan Giok; katanja anak itoe ada gaga, sedeng ilmoe silat poen ada mengartt sampe baek, tjoema belon dapet peladjaran soerat. Maka ia minta Boen Hwan-tjiang soedi toeloeng membri peladjaran pada anaknja itoe.
Sasoedanja bitjara-bitjara lagi sediki, permintahannja Houw-jan Tjiak itoe ditrima baek, sebab Boen Hwan-tjiang pikir: gadisnja toch soeda katentoean tempatnja dengen troesa koeatir dapet bahaja apa-apa; sedeng perkara jang menjangkoet padanja, brangkali betoel soeda dibikin abis sadja tjara begitoe; sedeng oeroesan roema tangga soeda diserahken pada boedjang jang boleh dipertjaja, hingga tida halangan boeat ia trima itoe oendangan.
Sasoedanja beromong - omong sedikit lama, Houw-jan Tjiak lantas berlaloe dan sorenja dari itoe hari orangnja dateng ka itoe gredja membawa koeda. Boen Hwan-tjiang laloe membri slamat tinggal pada Tjinkong Siansoe dengen oetjapken banjak trima kasi atas boedinja ini kapala padri jang soeda membri toempangan boeat itoe sakean hari. Kamoedian dengen menoenggang koeda ia lantas berangkat ka roemanja Houw-jan Tjiak.
Toean roema bersma anaknja laloe kaloear menjamboet, jang sasoedanja berdoedoek, Houw-jan Giok laloe membri hormat pada itoe bakal goeroe dengen berloetoet ampat kali. Roepanja itoe orang moeda jang gaga dan tjakep, membikin Hwan-tjiang dapet rasa soeka di hati.
Itoe malem Houw-jan Tjiak laloe adaken satoe perdjamoean ketjil, dimana marika laloe doedoek minoem sambil beromong-omong. Kerna esok ada djato di hari jang baek, maka itoe hari peladjaran boeat Kongtjoe lantas moelai dibriken.
Pada soeatoe hari salagi Houw-jan Tjiak poelang dari lapangan tempat mengadjar soldadoe maen perang-perangan, ia dapet liat ada saorang lelaki jang lari terbirit-birit sembari membawa, satoe peti ketjil jang terbikin dari koelit, sedeng di blakangnja orang itoe ada kaliatan satoe anak moeda jang beroemoer kira-kira sapoeloe taon lebi, lagi mengedjar.
Waktoe kira-kira doeapoeloe langka lagi ampir katjandek, ada kaliatan tiga orang jang mengandang di tenga djalan sambil berkata:
„He, ada apa, maka kaoe lari begitoe kentjang?“
„Oh, kaoe ini tentoe ada kawannja itoe bangsat, jang maoe halangin akoe maoe mengedjar padanja,“ kata orang moeda itoe dengen goesar: „hajoe, lepas tangankoe, kaloe tida maoe makan akoe poenja kepelan.“
Itoe tiga orang jang menghalang-halangin masi teroes pegangin tangannja itoe orang moeda sembari tertawa-tertawa. Orang jang dipegang itoe dengen goesar lantas berontak, sekali sadja tangannja terlepas dan kepelannja lantas melajang ka moekanja itoe orang jang pertama, jang sigra djoega djadi terpoeter.
Temennja jang doea, satelah liat begitoe djadi mara dan maoe pegang kombali. Tapi itoe anak moeda lantas mendjotos, sedeng sebla kakinja menendang orang jang katiga, hingga sabentar sadja itoe orang-orang jang menghalangi lantas megglepak di tana. Sasoeda itoe ia mengedjar lagi pada orang jang membawa peti, jang maski soeda katingalan djaoe, tapi dengen lari jang pesat ia soeda bisa dapet tjandak itoe orang dan rampas kombali petinja.
Tapi ini orang jang keampat tjoema dapet satoe geboekan. Begitoe petinja terlepas bangsat itoe lantas melariken diri, sedeng orang moeda jang poenja itoe barang, satelah dapet kombali petinja soeda merasa poewas dan tida maoe kedjar kombali.
Houw-jan Tjiak jang liat begitoe, merasa kagoem dengen anak moeda itoe poenja kagagahan. Maka ia laloe menghamperi dan tanja, siapa adanja itoe orang jang dikedjer dan barang apa adanja ini di peti.
Satelah liat dandananja Houw-jan Tjiak, anak moeda itoe lantes doega, bahoewa ia boekan berhadepanpada sembarang orang, maka ia laloe membri hormat dan kasi taoe, jang orang itoe ada pentjoeri, sedeng itoe tiga orang jang tadi menghalangi djalannja, tentoe ada kawannja si bangsat.
Houw-jan Tjiak mengalem kagagahannja ini anak jang beroemoer sapantaran dengen poetranja, sedeng parasnja poen tjakep sekali. Atas pertanjahannja Houw-jan Tjiak lebi djaoe, anak moeda itoe lantas kasi taoe, ia ada orang she Tjhie, nama Seng; ini peti ada berisi saroepa barang moestika jang di tangannja soeda tiga toeroenan.
„Moestika apa ?“ tanja Houw-jan Tjiak sambil memandang roepanja itoe anak moeda, sedeng hati ada berpikir apa-apa.
„Ini moestika diseboet Saytonggi,“ kata Tjhie Beng: „doeloe waktoe Sianhoe masi ada, poetranja Ong Thay-wie soeda pernah minta beli boeat harga saratoes riboe koan (1 koan ada berharga 1000 tjhi), tapi tida didjoeal. Blakangan waktoe Sian-hoe toeroet perang di Poeilap dan binasa di medan perang, sedeng Boetjin tida lama kamoedian menoetoep mata, moestika ini djato di tangan Siauwseng, jang sekarang ada idoep dengen sabatang karang dan dirawati sadja oleh satoe baboe jang doeloe mendjaga Siauwseng di waktoe ketjil.“
Lebi djaoe Tjhie Seng Kongtjoe kasi taoe, jang maski keadahannja soeda djadi begitoe soesa, tapi menginget jang moestika ini soeda tersimpen tiga toeroenan, maka ia sajang boeat djoeal. Pada tiga hari jang laloe itoe orang ada dateng padanja, dengen mengakoe ada dioetoes oleh Kenglok Siangkong boeat pindjem liat, tapi itoe permintahan telah ditoelak. Tapi tadi waktoe ia kaloear roema, itoe orang telah dateng kombali dan tjoeri ini peti, baek djoega ia kaboeroe poelang dan dapet pergoki. Njatalah marika itoe ada bangsat-bangsat jang memang maoein betoel ini barang toeroenan.
Satelah denger ini perkatahan, Houw-jan Tjiak djadi girang dan lantas berkata:
„Oh, kaloe begitoe njatalah ajahmoe boekan laen orang, dari akoe poenja Hengte Kimtjio-tjhioe Tjhie Leng, apatah boekan bener begitoe?”
„Ja, bener sekali,” kata Tjhie Sang dengen heran dan memandang panglima itoe dengen sorot mata menanja. Dan waktoe Houw-jan Tjiak seboet namanja, orang moeda ini lantes berloetoet dan membahasain Pehoe, dan minta orang toea ini maäfken, kerna ia tida kenalin ajahandanja poenja Koko angkat.
Houw-jan Tjiak dengen roepa soeka hati laloe angkat bangoenin.
Tjhie Seng sasoedanja bangoen laloe menjodja kombali.
„Hiantit, kaloe kaoe tjoema sendiri sadja dengen keadahan begini roepa, lebi baek kaoe tinggal sadja padakoe di roema, soepaja kaoe boleh beladjar bersama-sama kaoe poenja soedara Giok, jang kabetoelan akoe baroe oendang Boen sianseng jang sekarang ada tinggal di roemakoe aken membri peladjaran soerat .”
Tjhie Seng dengen girang mengoetjap trima kasi. Kamoedian Houw-jan Tjiak prenta pengikoetnja bawaken Tjhie Seng poenja peti dan marika laloe berangkat poelang.
Sasampenja di roema Houw-jan Tjiak lantas tjeritaken pada istrinja bagimana ia telah katemoeken Tjhie Seng jang lagi mengoeber satoe pentjoeri dengen poekoel ampat orang, jang kajoe diliat kagagahannja, boleh didoega besarnja anak itoe aken memangkoe djabatan jang tinggi Djoega tjeritaken siapa adanja Tjhie Seng, jang sabenernja ada Hengtenja poenja poetra; dan sekarang ia bawa dateng boeat tinggal di sini, soepaja boleh beladjar soerat bersama-sama anak sendiri.
Hoedjin denger soeaminja poenja tjerita, djadi girang dan tida lama waktoe. Houw-jan Tjiak panggil masoek, Tjhie Seng laloe berloetoet membri hormat. Hoedjin kaliatan girang liat roepanja itoe anak moeda jang tjakep. Atas pertanjahannja, Tjhie Seng kasi taoe, bahoewa ia baroe beroesia anembelas taon, djadi lebi moeda satoe taon dari Houw-jan Giok.
Tida lama atas prentanja Hoedjin, Houw-jan Giok djoega dateng katemoe dan satoe pada laen loloe membri hormat, dengen berbahasa soedara.
Hoedjn lantas kaloearken pakean baroe bebrapa stel dan briken itoe pada Tjhie Seng. Meliat doea anak moeda itoe masing-masing tida memdoenjai soedara, Houw-jan Tjiak soeroe marika angkat soedara dan sigra djoega barang-barang jang perloe boeat dipake sembajang laloe disadiaken
Kerna Tjhie Seng ada lebi moeda satoe taon maka Houw-jan Giok djadi pernah Koko dan sahabisnja pasang hio, Tjhie Seng laloe beloetoet di hadepannja Houw-jan Tjiak dan Hoedjin, dengen mengakoe ajah dan iboe.
Atas prentanja Hoedjin, semoea boedjang dan lem itoe gedong bahasain Tjhie Seng dengepanggilan Dji Kongtjoe.
Tjhie Seng mengadep pada Boen Hwan-tjiang dan berloetoet boeat angkat djadi goeroe. Di sitoe marika beladjar bersama-sama dengen roekoen sekali.
Satoe, kamar jang bagoes disadiaken boeat Dji Kongtjoe, sasoeda itoe, dengen minta permisi pada Houw-jan Tjiak dan Hoedjin, Tjhie Seng prenta satoe boedjang pergi ka roemanja boeat panggil ia poenja baboe tete jang satia, boeat tinggal bersama-sama dalem ini gedong, dengen bawa djoega sakalian barang miliknja jang masi ada di roema lama.
Kadoea Kongtjoe itoe ada sapasang sekali, kerna boekan sadja sama-sama tjakep, hanja kagagahannja poen ada saroepa. Otaknja poen sama-sama ada terang, apa jang diadjarin, gampang sekali ia mengarti, hingga Boen Hwan-tjiang jang mengadjar djadi girang dan soeka hati. Seringkali ia memoedji pada kadoea moeridnja itoe.
Di waktoe senggang doea soedara ini soeka pergi ka kebon, dimana marika jakini ilmoe silat, maen pana dan toenggang koeda. Houw-jan Giok soeka goenaken sapasang Pian, samantara Tjhie Seng ada mamegang toembak Kimtjio, dan sendjata ini poen memang jang doeloe biasa digoenaken oleh ajahandanja.
Dalem ilmoe gisiauw kadoea soedara ini ada dipimpin oleh Houw-jan Tjiak. Orang toea itoe merasa senang hati liat karoekoenannja itoe doea orang moeda jang ada lebi-lebi dari soedara poetoesan peroet.
Di waktoe doedoek seringkali Houw-jan Tjiak bitjara pada istrinja dan kata: jang ini kadoea anak bisa diharep nanti kaloe soeda besar bisa djadi Tiauwteng poenja tiang negri dan membikin terang namanja orang toea.
Hoedjin djadi girang. Maka sigra djoega kadoea laki istri itoe berdami boeat perdjodo ken Tjhie Seng pada Giok-eng, anaknja jang prampoean dan sekarang telah beroesia limabelas taon. Houw-jan Tjiak jang memang soeka pada itoe anak angkat, laloe menjataken satoedjoe.
Pada soeatoe hari waktoe Houw-jan Tjiak poelang dari kantoornja ia poenja Tjoeswe, roepanja ada kaliatan seperti orang koerang senang. Atas pertanjahan sang istri, ia laloe tjeritaken bagimana Tong Koan dengen gegaba soeda trima menaloeknja Thio Gak di Pengtjioe, dan lantaran itoe membikin Songtiauw poenja perdamian pada negri Kimkok djadi terpoetoes.
Kerna dianggap pamerenta Songtiauw tida pegang betoel perdjandjiannja, negri Kim telah kirim angkatan perangnja menjerang Pengtjioe, jang sekali gebrak itoe kota taloekan telah djato di tangan moesoe
Begitoe sadja Kimkok belon merasa senang, hanja telah kirim lebi banjak tentaranja aken menjerang Tionggoan, hingga semoea mantri-mantri besar djadi kalangkaboet dan brapa antaranja telah voorstel baginda lepasken tachta kerdjahnn. dengen angkat Taysioe aabagi gantinja.
Taon negri sekarang telah ditoekar djadi Tjeng- kong Gwanlian dan pamerentahan jang moelai beres telah djadi koesoet kombali.
Lebi djaoe Houw-jan Tjiak tjeritaken, berhoeboeng seranganuja moesoe, baginda jang baroe telah kaloearken prenta boeat kirim pasoekan mendjaga di soengei Hong-ho. Besok Lwesi Nio |Penghong maoe koempoelken orang-orang gaga di ta- nalapang boeat dipili djadi panglima perang.
„Ini semoea ada gara-garanja Tong Koan," kata Houw-jan Tjiak jang toetoep bitjara: "kaloe ia tida trima taloeknja Thio Gak, tentoe keadahan negri tida djadi begini roepa. Sekarang oeroesan djadi kaloet dan negri kombali hadepi paperangan jang boekannja ketjil."
„Tatkala itoe Houw-jan Giok dan Tjhie Seng djoega ada toeroet bersama-sama di sitoe, satelah denger jang Lwesi maoe pili orang-orang gaga, doea orang moeda ini djadi tergerak hati.
Houw-jan Giok laloe menanja kombali apa jang baroesan ia denger.
Sang ajah membri katerangan lebi loewas, bahoewa pemilihan itoe ada boeat dikirim ka soengei Hongho aken mendjaga madjoenja moesoe.
Kadoea anak itoe lantas njataken. bahoewa ia kapingin aken toeroet dalem itoe pemilihan kaloe kaloe bisa mendapet satoe pangkat boeat membela negri. Houw-jan Tijak tida ada kaberatan dan prenta marika itoe berangkat besok pagi.
Esoknja pagi, sasoedanja berdandan Houw-jan Tjiak laloe adjak kadoea anakaja itoe, jang djoega soeda berpake-pake dan bawa sendjata hingga roepnja jang tjakep djadi kaliatan angker. Di bawah saloe pangoeng besar soeda kaliatan beriboe orang jang berkoempoel, Panglima soldadoe ada teratoer di kiri kanan dengen pakean keren. Tida lama kamoedian kaliatan Nio Hong-peng dengen teriring olehnja banjak panglima, telah sampe di itoe tempat pemilihan dan doedoek di atas panggoeng Tjiangtaij jang memang telah disadiaken.
Di atas itoe panggoeng ada kaliatan satoe bendera jang tertoelis dengen hoeroef besar dan boenjinja: „Swe", di kiri dan kanan ada berdiri bebrapa pahlawan jang mamegang golok telandjang.
Meriam poen toeroet diboenjiken, sabagi tanda pemboekahan dari itoe pemilihan. Ampir di saat itoe djoega, satoe orang dari anggota laloe berdiri di depan panggoeng dan dengen soeara njaring laloe berkata pada orang banjak jang berkoempoel di bawah:
„Dengen firmannja Sri Baginda telah dikaloearken titah adaken ini pemilihan, boeat tjari orang orang gaga aken goena membela negri, dengen tida perdoeli orang-orang particulier atawa orang berpangkat, toea moeda, ketjil dan besar siapa jang ada mempoenjai kagagahan dan kapandean tjoekoep dalem ilmoe silat, boleh madjoe boeat dipili.
„Dalem pemilihan ini pertama nanti dioedji Tentang tanaga, dengen angkat sapasang bola besi dengen djalan tiga kali kiteran. Kadoea nanti ditjoba memana boelan-boelan dari satoe tempat jang djaoenja kira-kira doearatoes tindak dan pana itoe moesti dilepas sembari berkoeda, sampe tiga kali. Katiga baroe pertoendjoeken kapandean gisiauw dengen pegang sendjata.
Maka siapa djoega, dengen tida dikatjoealiken, kaloe ada mempoenjai itoe tiga kapandean, nanti dibri pangkat. Maka madjoelah orang-orang jang mempoenja itoe kapandean tjoekoep, soepaja pangkat itoe bisa lantas dikoerniaken."
Perkatahan ini disamboet dengen soearanja tampik soerak.
Tamboer poen diboenjiken, sabagi tanda boeat itoe orang-orang jang maoe ditjoba kapandeannja, boleh madjoe.
Satoe persatoe orang jang maoe ditjoba itoe, lantas madjoe. Tapi dari pagi sampe ampir siang, belon djoega terdapet orang jang mempoenjai itoe tiga kapandean. Kerna ada jang gaga dan bisa angkat itoe bola-bola besi sampe tiga kali kiteran, tapi koerang pande dalem ilmoe memana.
Ada jang bisa silat, tapi dalem tenaga tida tjoekoep sabagimana jang baroesan telah diseboet. Ada jang bisa memana dengen djitoe, tapi dalem hal tenaga masi koerang dan memana koerang pande.
Djadi pemilihan itoe masi teroes sadja!
Achir-achir sampelah gilirannja Houw-jan Giok dan Tjhie Seng, jang lantas madjoe ka depan. Ini doea djedjaka laloe dioedji kagagahanja. Bermoela Oouw-jan Giok disoeroe angkat itoe bola besi. Prenta ini ditoeroet dan orang moeda itoe laloe goeloeng tangan badjoenja, sakali angkat bola besi itoe lantas bergerak dan ia laloe bawa tiga kali kiteri panggoeng, jang sasoeda itoe lantas ditaro kumbali, sedeng parasnja sedikitpoen tida beroba
Begitoe djoega dengen Tjhie Seng, jang lantas angkat bola itoe dan berdjalan tiga kali sabagimana kokonja, hingga semoea orang jang menonton pada bersoerak, sabagi tanda kapoedjian.
Kamoedian anggota Tiongkoen prenta memana sambil berkoeda, jang sigra djoega doea soedara naek masing-masing poenja koeda jang satoe soldadoe bawaken. Kadoeanja itoe lantas lariken koedanja seperti terbang sambil memegang boesoer, dan sasampenja di satoe tempat jang djaoenja kira-kira doearatoes tindak, marika laloe lepasken itoe anak pana, jang begitoe doea gendewa mendjeprat, doea boesoer melajang dan menantjep dengen berbareng di itoe boelan-boelan mera jang sabesar doewit gobang.
Kombali lantas terdenger soeara soerakan jang rioeh. Kamoedian ditjoba dalem ilmoe boege. Tjhie-Seng laloe goenaken toembaknja dan Houw-jan Giok bergegaman Pian. Masing-masing kaloearken gisiauwnja sampe delapan belas djoeroes, jang kaloe dipoeter Pian itoe sampe djadi boender seperti titiran. Sedeng toembaknja Tjhie Seng kaliatan berlegot seperti oeler naga jang lagi menangkep moestika.
Kombali semoea orang memoedji sambil bersoerak, hingga soearanja seperti goenoeng roeboe.
Boekan sadja penonton, hanja panglima-panglima jang berkoempoel di sitoe, semoea pada memoedji kapandeannja itoe doea soedara, hingga Houw-jan Tjiak jang menjaksiken itoe djadi amat girang.
Nio Hong-peng jang liat kapandeannja itoe doea orang moeda, djadi kagoem dan girang dan lantas panggil mengadep, boeat ditanja Siapa namanja.
Houw-jan Tjiak jang memang ada di sitoe, lantas kasi taoe, bahoewa itoe ada ia poenja anak dan poetra angkat. Dengen terangken djoega namanja masing-masing.
Ambtenaar jang memboeka pengoedjian djadi amat girang dan membri slamet pada Houw-jan Tjiak sambil memoedji jang kamoedian doea Kong-tjoe itoe dibriken pangkat Kiauwki-Kauwwie. dengen toeroet pergi perang, jang kaloe dapet gandjaran aken ditamba poela pangkat itoe djadi terlebi tinggi. Houw-jan Tjiak bersama doea anaknja laloe mengoetjap trima kasi dan lantas moendoer, sedeng Nio Hong-peng laloe prenta orang siapkan doea riboe balatentara boeat dimadjoeken ka soengei Hongho aken mendjaga serangannja moesoe.
Orang jang diprenta itoe ada sapoeloe panglima, jaitoe: Ong Tjin, Lauw Kong-sih, Ong Pah, Gak Hwie, Yo Gin-tiong, Han Si-tiong, Houw-jan Tjiak, Thio Tjoen, Ma Kiat dan Ouw Teng-kok. - Masing-masing laloe atoer apa jang perloe, sasoedanja beres dateng kombali pada Nio Hong-peng boeat membri taoe.
Hong-peng memanggoe dan balik ka kraton, aken membri taoe pada baginda, jang pamilihan orang-orang gaga telah selesih dan terangken siapa-siapa jang telah dapet itoe djabatan Kiauwki Kauwwie.
Baginda jang denger itoe djadi girang, kamoedian titahken Hong-peng moendoer.
Lapangan jang tadi rame lantas mendjadi soenji, kerna semoea penonton dan orang-orang pada poelang ka masing-masing roemanja Sedeng Houw-jan Tjiak bersama doea anaknja laloe poelang ka roema sendiri, dan tjeritaken itoe pada istrinja, hingga Hoedjin djadi girang
Kamoedian ia masoek ka kamar tempat beladjar soerat, dimana la tjeritaken djoega pada Boen Hwan-tjiang, jang toeroet girang satelah denger doea moeridnja dapetkən itoe pangkat, kerna ini poen katanja ada permoelahan boeat djedjaka itoe naek ka tangga doenia.
„Atas titahnja Keizer, tadi di lapangan Janboe Nio Taykam soeda pranta sapoeloe panglima boeat mendjaga soengei Hongho,“ kata Houw-jan Tjiak lebi djaoe: “sedeng itoe doea anak poen aken toeroet madjoe bersama-sama.”
Lebi djaoe Houw-jan Tjiak tjeritaken, bagimana sasoeatoe panglima tjoema membawa soldadoe doeariboe banjaknja, sedeng pasoekan Kimkok jang dikapalaken oleh Kan Li-poet ada berdjoembla sapoeloe laksa, jang sekarang lagi menjerang Ho-pak. Sedeng pasoeken laen jang dipimpin oleh Nam Mo-wat ada menjerang Hotong. Meliat kakoeatannja moesoe jang begitoe, besar, soenggoe boekannja tandingan boeat itoe sapoeloe panglima. Hal ini betoel-betoel ada mengoeatirken, kerna kaloe moesoe bisa menjebrang soengei Hongho, Tongkeng djadi hadepi satoe bahaja, dan bahaja ini ada ternjata sakali.
Boeat diri sendiri bersama kadoea anaknja jang toeroet dalem ini paperangan, itoelah tida oesah terlaloe dipikiri, tjoema sadja boeat familie prampoean, bagimana djadinja, kaloe sampe kadjadian begitoe roepa. Maka sabelonnja bahaja itoe dateng, ia minta Boen Hwan-tjiang soeka toeloeng anterken familienja itoe ka Lilam, belon taoe bagimana pikirannja ini sastrawan toea,
Boen Hwan-tjiang menjataken soeka trima, kerna dengen berangkatnja Houw-jan Giok dan Tjhie Seng ka tempat paperangan, di sini ia djadi tida mempoenjai oeroesan apa-apa. Djoega ia ada pikiran boea tengoki Siauwli.
Houw-jan Tjiak djadi girang dan boeroe-boeroe ia bertaoeken itoe pada istrinja, soepaja Kiong Djin bersadia-sadia boeat berangkat, kerna dalem ini perkara ada terlaloe koesoet.
Houw-jan Siotjia jang denger begitoe, djadi ripoe. Samaleman anak dan iboe babenah, boengkoes barang-barang permata, oewang dan pakean. Sedeng boedjang-boedjang lantas dikasi taoe tentang itoe kapindahan jang koenjoeng-koenjoeng, siapa jang maoe ikoet boleh ikoet, kaloe jang tida maoe ikoet boleh poelang ka kampoengnja sendiri, dengen dibekelin oewang.
Sebab koeatir itoe ada satoe rasia dan tida baek dinjataken pada sembarang orang. tjoema Hoedjin sadja jang dikasi taoe, sedeng pada boedjang dan familie prampoean jang laen dikasi alesan: lantaran sekarang di roema tida ada orang lelakinja, maka familie semoea ada lebi baek pinda ka Lilam.