Pembalesannja Kawanan Liangsan/Bagian katiga/Bab 21
XXI
Kerna peroesoehan Boen Hwan-tjiang ambil laen haloean. —Ong Pah berhianat dari kawadjiban panglima.
Pada besok paginja Kiongdjin bersama Siotjia soeda berpake-pake, dengen teriring oleh ampat hamba prampoean, njonja bangsawan itoe naek ka atas kreta bersama gadisnja. Boen Hwan-tjiang saaoedanja membri slamet tinggal pada Houw-jan Tjiak dan anaknja, laloe naek ka kreta jang ada moeat barang-barang.
Kandaran ini menoedjoe ka Lilam, tempat di mana doeloe familie Houw-jan ada tinggal.
Selang tiga hari sampelah marika di aatoe tempat, di sini Boen Hwan-tjiang dapet liat ada banjak anak negri jang berlari-lari sambil menggendong apak, memimpin iboe dan bawa istri, dengen mengendong djoega boengkoesan-boengkoesan, seperti orang jang maoe pinda dari satoe ka laen tempat.
Roepanja orang-orang jang dikatemoeken itoe ada seperti lagi katakoetan dan bersedi, hingga Boen Hwan-tjiang jang tida taoe doedoeknja perkara djadi bertjekat, dan laloe menanja pada itoe orang-orang, marika ada berasal dari mana dan maoe ka mana,
Bebrapa orang-orang jang ditanja itoe menjaoet, bahoewa marika dari Lilam dan Kiong-hong, jang soeda pinda ka laen tempat boeat tjari perlindoengan, kerna di itoe doea tempat jang terseboet sekarang ada timboel. peroesoehan jang digeraki oleh Ong Sian, jang satiap hari lakoeken pemboenoehan dan perampasan. Perboeatannja Ong Sian itoe tida bedah sebagi rampok, dari pada lakoenja satoe Enghiong jang sadjati. Kawan-kawannja jang terdiri dari laksahan orang, djoega lakoeken pakerdjahan merampas barang, oewang dan orang poenja anak istri.
Mendenger ini, perkatahan, boekan maen Boen Hwan-tjiang poenja terkedjoet, maka ia laloe bikin poela bebrapa pertanjahan pada itoe orang-orang, jang sasoedanja dapet katerangan tjoekoep, ia lantas kasi taoe pada Kiongdjin apa jang itoe anak negri baroesan telah tjerita.
Kiongdjin djoega djadi kaget dan tida taoe bagimana moesti berboeat.
„Kaloe sekarang kita paksa pergi djoega ka Lilam“ kata Boen Hwan-tjiang:„dalem sapooeloe. sembilan bagian banjakan tjilakanja; tapi kaloe balik lagi ka kota Radja, itoe poen tida baek, maka menoeroet pikirankoe, apatah tida lebi baek kaloe sekarang kita poeter haloean aken perg sadja ka Tengtjioe, tempat di mana Siauwli ada berdiam ?“
„Atas ini perkara, kita-orang tentoe aken menoeroet sadja,“ kaja Kiongdjin: „maka hal itoe bagimana sadja jang Sianseng rasa baek.“
Bagitoelah dengen tida banjak rewel, Boen Hwan-tjiang laloe prenta koesir ambil djalan jang menoedjoe ka Tengtjioe.
Liwat brapa hari kamoedian marika itoe telah sampe di Tenghoensan, maka Boen Hwan-tjiang lantas minta itoe liauwlo-liauwlo jang lagi meronda djalan, toeloeng kasi taoe pada An To-tiwan.
Rahajat goenoeng, itoe lantas naek membri taoe, jang satelah denger Boen Hwan-tjiang dateng, An To-tjwan, Siauw Djian, Kiem Thay-kian dan Bok Tjoen lantas boeroe-boeroe kaloear manjamboet dan silaken marika itoe masoek dalem roewangan Tjhigiethia.
Semoea Hohan jang ada disitoe laloe membri hormat dan silaken doedoek, kamoedian An To-tjwan menjataken perkara-perkara di kota Radja, bagimana keadahannja sekarang ini.
Boen Hwan-tjiang tjeritaken satoe persatoe bagimana jang pembatja telah taoe. Bahoewa perkaranja sendiri soeda djadi abis dengen begitoe sadja, kerna orang jang mengadoe tida dateng. Kamoedian toetoerken tentang pertemoeannja pada Houw jan-tjiak, waktoe ia berdiam dalem gredja aken menoenggoe papreksahannja itoe perkara. Tapi kerna tida ada panggilan apa-apa. Houw-jan Tjiak oendang boeat mengadjar poetranja.
Lebi djaoe ia jeritaken djoega bagimana soeda serahken tachtanja pada Thay joe dan nama taon diroba djadi Tjengkong Gwanlian, dan lantaran Tong Koan trima menaloeknja moesoe di kota Pengtjioe, hingga perdamian antara Songliauw dan Kimkok djadi poetoes. Sempe achirnja itoe negri kirim tentara, dimana Houw-jan Tjiak dengen doea poetranja toeroet pergi perang boeat mendjaga soengei Hongho.
„Oleh kerna Houw-jan Tjiangkoen merasa koeatir jang moesoe nanti masoek ka Tongkeng,“ kata poola Boen Hwan-tjiang: “maka ia minta akoe anteri anak istrinja poelang ka Lilam; tapi waktoe di tenga djalan akoe dapet kabar, jang Ong Siang di Lilam dan Konghong telah terbitken peroesoehan, maka akoe bawa Kiongdjin bersama Siotjia balik ka Tengtjioe, kerna akoe rasa ada lebi baek marika berlindoeng di sini, dari pada di laen-laen tempat.“
„Itoelah ada dengen sapantesnja,“ kata semoea Thaunia-thaunia dengen soeara berbareng:“ di ini tempat ada lebi santausa dari di kota-kota jang tida terdjaga betoel.“
„Kamoedian Khouw Thaij-so silaken Houw-jan Kiongdjin bersama Siotjia masoek ka dalem, dimana marika laloe bertemoe pada Boen Siotjia dan jang laen-laen, kerna di sitoe poen memang banjak orang-orang prampoean.
Ampat hambanja Siotjia jang ikoet bersama-sama, djoega tinggal di satoe tempat jang memang disediaken. Kamoedian, sasoedanja itoe Boen Siotjia kaloear katemoeken ajahnja.
Bagimana girang hatinja Boen Hwan-tjiang di itoe waktoe, koetika bertemoe pada gadisnja, itoelah tida perloe ditjeritaken. Nona itoe lantas menanjaken pada sang ajah, bagimana keadahan dalem roemanja di desa Anloktjoen, salama ia tinggal ka mari.
Hwan-tjiang tjeritaken satoe persatoe, bagimana perkaranja soeda djadi abis dengen begitoe sadja Kamoedian ia mengadjar soerat di roemanja Houw-jan Tjiak sampe achirnja, lantaran ini waktoe uegri ada terbit paperangan, maka Houw-jan Tjiak telah kirim familienja ka Lilam, tapi sebab di itoe tǝmpat ada peroesoehan, maka Kiongdjin bersama Siotjia ia bawa ka mari.
Sasoedanja ajah dan anak beromong-omong Hwan-tjinng berdoedoek kombali di Tjhigiethia, dan sabagi membri slamet dateng, Thaunia-thaunia laloe adaken satoe perdjamoean besar.
Sambil minoem erang moelai beromong-omong kombali. Di sini Bok Tjoen membri taoe, bagimana waktoe ia bawa Siotjia ka mari, di tenga djalan ia telah bertemoe pada Tjiauw Bin-koei jang djoestroe ada menginep dalem hotel bersama-sama padanja. Kamoedran orang doerdjana itoe ia telah boenoə mati dan maitnja diboewang di pinggir soemoer deket gredja.
Mendenger ini tjerita, baroelah Boen Hwan-tjiang mengarti, mengapa itoe anak nakal tida kaliatan mata idoengnja kaloe begitoe kiranja ia maupoes. ― Boeat pertoeloengan Bok Tjoen itoe. Hwan-tjiang hatoerken trima kasi.
Begitoelah iaorang beromong-omong lebi djaoet tapi hal-hal jang sekarang dibitjaraken ada oeroesan jang berhoeboeng dengen politiek negri dan pamerentahan.
Sasoedanja djaoe malem baroelah perdjamoean itoe ditoetoep, sedeng Boen Hwan-tjiang lantas dianterken ka kamar jang memang telah disadiaken.
Dengen meninggalken itoe sastrawan toea di Tenghoensan, jang sasoeda toempangken Houw-jan Kiongdjin berdoea Siotjia, sekarang marilah kita liat kombali pada Houw-jan Tjiak dengen poetranja.
Ini panglima koetika istrinja soeda berangkat; ia poen laloe bersedia-sadia boeat pergi di lapangan. Waktoe Houw-jan Tjiak sampe, laen-laen panglima poen telah dateng beroentoen-roentoen dan berdiri di kiri kanan. Meriam laloe dipasang dan berbareng itoe samoea barisan jang soeda bersadia laloe bergerak.
Baroe sadja angkatan perang ini maoe berdjalan, satoe djoeroekabar dengen sengal-sengal telah sampe di itoe tempat aken membri taoe, jang pasoekan moesoe telah sampe di deket soengei Hongho.
Nio Hong-peng jang denger ini kabar djadi terkedjoet dan lantas siapken pasoekan itoe dengen satjenet-tjepetnja, jang satelah sampe laloe prenta itoe sapoeloe panglima boeat mendjaga di lima tempat jang penting penting. Sedeng Houw-jan Tjiak diprenta mendjaga di deket doesoen Yang-lotjoen bersama Ong Pah ean terbantoe dengen Houw-jau Giok dan Tjhie Seng.
Ini doesoen letaknja deket soengei Hongho poenja bagian tempat jang paling penting, djadi satoe pangkalan jang teroetama boeat berhoeboengan di darat dan aer. Satelah sampe di itoe tempat Houw- jan Tjiak atoer pendjagahan dengen hati-hati, siang dan malem sakiternja sitoe dipreksa, soepaja tida ada moesoe jang masoek dengen diam-diam.
Tapi, sedeng Houw-jan Tjiak dengen kadoea poetranja ada berkerdja dengen radjin, sabaliknja Ong Pah tjoema berdiam sadja dalem pasanggrahannja, kerna ia koeatir kaloe djalan mamereksa nanti katemoe moesoe. Kerna Ong Pah itoe sabenernja boekan saorang jang haroes djabat pangkat panglima, sebab boekan sadja tida mempoenjai kapandean, malah hatinja poen ketjil sekali. Tapi kaloe ia telah beroentoeng pangkoe djoega itoe pangkat Tjihoeisoe. adalah kerna dapet pertoeloengannja Thaysoe Tjoa Keng, jang memang ada besar sekali kakoeasahannja.
Selang brapa hari kamoedian, sasoedanja Ong Pah dapet taoe jang kakoeatannja moesoe ada sapoeloe kali lipat dari pasoekan sendiri, ini panglima pengetjoet djadi goemeter seantero badan. Kerna rasa takoet. achir-achir pikirannja djadi berbalik boeat berhianat.
Begitoelah dengen diam-diam ia toelis satoe soerat dan prenta orang bawa ka tempat moesoe dalem mana ia hendak serahken tempat djagahannja menaloek pada Kimkok. Sasoeda orang soeroehan itoe pergi, hatinja djadi koeatir pada Houw-jan Tjiak kerna bila ini Tjoetjiang jang mendjadi kawannja tida satoedjoe, pasti perboeatannja djadi gagal.
Zonder pikir pandjang lagi ia prenta orang panggil Houw-jan Tjiak, dengen bilang boeat damiken atoeran pendjagahan. Waktoe ini panglima dateng, Ong Pah laloe samboet dan silaken minoem-minoem sambil berkata:
„Njatalah Tiauwteng poenja tjara atoer pamerentahan di ini waktoe, ada teramat kaloet, dan boeat bikin baek itoe karoewetan boekannja gampang. Diliat begini, soenggoe boleh dibilang bajangan roeboe soeda ternjata sekali, hingga boeat menoendjang itoe tida bisa digoenaken dengen sabatang bamboe.“
„Sekarang keadahan ada begini roepa,“ kata poela itoe penghianat „kendati kita orang abisken tenaga dan toempaken dara, toch djasanja jang dapet ada pembesar-pembesar di sebla atas, sabaliknja kaloe ada apa-apa, kita jang di sebla bawah jang menanggoeng dosa. Maka itoe, dalem sagala perkara kita haroes meliat gelagat boeat moendoer atawa madjoe“
„Akoe rasa Tjiangkoen kliroe“, kata Houw-jan Tjiak: „kita-orang jang telah menerima boedinja negri, haroeslah membela soenggoe-soenggoe hati, maski djoega badan boleh djadi antjoer toch tida haroes moesti moendoer, maka gelagat apatah lagi jang maoe diliat?“
„Djoega kaloe meliat keadahan di ini tempat jang amat soeker, „kata poelah Houw-jan Tjiak jang samboeng bitjaranja, „moesoe tida gampang nanti bisa masoek, kendati djoega kakoeatannja ada berdloembia lebi besar. Boeat sekarang biarlah kita mendjaga sadja dengen hati-hati, kerna tida lama poela balatentara bantoean jang besarnja tigapoeloe laksa bakal sampe. Djoega boekantah Taysong poénja kabedjiken soeda tersiar lama di antara rahajat, maka dalem keadahan negri lagi soesa begini, akoe kira nanti kaloear orang-orang gaga jang dateng membantoe Maka djanganlah Tjiangkoen kaloearken perkatahan-perkatahan jang membikin hatinja soldadoe djadi ketjil.“
Mendenger ini perkatahan Ong Pah djadi kamekmak, parasnja djadi mera lantaran kamaloean. Ia taoe jang ini kawan tida satoedjoe pada pikirannja, maka maksoed boeat berhianat ia tida pethken lebi djaoe. Satoe niatan djahat, boeat boenoe pada Houw-jan Tjiak, djadi tetep dalem hatinja. Maka dengen poera-poera tertawa ia berkata:
„Tjiangkoen poenja perkatahan ada bener, sedeng apa jang akoe kata tadi, itoelah tjoema memaen sadja. Memang sasoenggoenja kita haroes membela soenggoe hati pada negri koeat diriken satoe gandjaran jang mengheranken.“
Sahabisnja berkata ia laloe toewangken poela tjangkirnja Houw-jan Tjiak, dengen maksoed, kaloe Tjoetjiang itoe soeda mabok baroe ia maoe toeroen tangan Tapi niat itoe tida kasampean, kerna Houw-jan Tjiak soeda lantas bangoen dengen mengasi alesan hendak lakoeken poela kawadjibannja.
Waktoe sampe di tempat sendiri Houw-jan Tjiak laloe tjeritaken pada kadoea poetrnnja apa jang baroesan Ong Pah kata padanja. Dari itoe omongan jang baroe dipetah-petahken, njatalah Ong Pah ada niatan boeat berhianat. Mendenger begitoe Houw-jan Giok kata: baek ini perkara dibertaoeken pada Nio Thaykam, soepaja kaloe ada apa-apa, fihaknja tida karembet dapet sala. Tapi Houw-jan Tjiak gojang kapala dan berkata:
„Kerna perkatahan itoe tida ada boektinja dan djoega waktoe bitjara tjoema berdoea-doea, maka kaloe akoe bertaoeken pada Nio Thaykam tentoe Ong Pah masi bisa moengkir, hingga djadi pertjoema sadja.“
„Kaloe menoeroet anak poenja pikiran“, kata Tjhie Seng; „lantaran Tiatia soeda njataken begitoe terang boeat tida maoe toeroet kahendaknja, pastilah Ong Pah itoe aken mendendam hati. Maka sekarang apa tida baek kaloe anak bersama Koko berdiriken satoe tenda di atas goenoeng, boeat djaga kaloe-kaloe ada bahaja jang tida terdoega?“
„Soedara Tjhie Seng poenja perkatahan ada bener sekali,“ menjamboeng Houw-jan Giok' „dan ada lebi baek lagi kaloe kita atoer begini: dalem itoe pendjagahan anak nanti bergiliran, soepaja sala satoe dari kita berdoea bisa berada djoega di damping Tiatia.“
Houw-jan Tjiak merasa satoedjoe dan laloe bagiken limaratoes soldadoe, dimana Siauwtjiang itoe laloe lakoeken kawadjibannja sabagimana jang telah diniat. Ong Pah jang liat begitoe djadi lebi koeatir. la poen taoe, bahoewa dirinja ada ditjoerigain. Maka boeat tetepken maksoednja berhianat, ia lantas prenta lagi orang bawa soerat kapasanggrahan moesoe, dalem mana ada ditetepken hari dan waktoenja boeat Kan Li-poet kirim barisan jang hoeat menjerang, soepaja dari dalem poekoel kaloear dan dari loear menjerang kadalem.
Sadari wates itoe sampe bebrapa hari jang berikoet tida terdjadi pertempoeran apa-apa. Di sebrangnja itoe soengei tida kaliatan sabidji manoesia atawa koeda. Dan maski begitue, di fihaknja Houw-jan Tjiak tida brentinja meronda dan mendjaga, kerna ia poen koeatir kaloe diam- diam moesoe meuoenggoe waktoe jang baek.
Pada soeatoe malem waktoe toeroen oedjan besar, dimana angin ada menderoe-deroe dan geloedoek saban-sahan berhoenji galoegoeran, Houw jan Tjiak merasa tjoeriga dan laloe adjak doea poetranja djalan meronda, dengen tida perdoeliken oedjan dan angin jang dingin.
Di sapandjang djalan ini Tjoetjiang goembiraken tentaranja, maka soldadoe-soldadoe itoe djadi getap kombali, Begitoelah sasoedanja berdjalan sedikit djaoe, dari satoe djoeroesan kaliatan sorot api, hingga Houw-jan Tjiak djadi kaget dan bersama sakalian tentaranja marika laloe menoedjoe ka itoe tempat. Satelah sampe marika liat sadjoembla besar soldadoe Kimkok lagi mengamoek kalangkaboet dengen boenoe-boenoein soldadoe Song jang lari tjari perlindoengan. Ong Pah ada kaliatan di antara orang-orang Kim, hingga membikin Houw-jan Tjiak djadi goesar sekali.
Njatalah dalem itoe bebrapa hari jang laloe, dengen diam-diam Ong Pah soeda kasi masoek soldadoe moesoe, boewat toenggoe waktoe jang baek aken menjerang barisan sendiri.
Dengen sanget moerka Houw-jan Tjiak la'oe menjerang, tapi sendjatanja bisa ditangkis oleh itoe penghianat. Houw-jan Tjiak mendesak madjoe dengen terbantoe oleh Tjhie Seng, hingga Ong Pah jang merasa keder, laloe kedoet koedanja dan lari ka fihaknja barisan Kimkok.
Dari blakang Houw-jan Tjiak mengedjer teroes. Tapi waktoe ampir katjandak, barisannja terpegat oleh moesoe jang njata soeda mendarat i aek dan djoemblanja ada lebi besar dari sabaginiana jang bermoela dikatemoeken.
Houw-jan Giok jang ada di atas goenoeng ketjil laloe bawa sakalian tentaranja dan memboeroe ka tempat dimana ajahnja lagi mengedjer Ong Pah, tapi sabelonnja sampe ia telah berpapasan pada Kan Li-poet. hingga orang moeda ini lantas bertaroeng pada kapala perang moesoe jang gaga perkasa. Houw-jan Tjiak bersama Tjhie Seng jang dapet taoe poetranja lagi bertempoer pada Kan Li-poet lantas balikin barisannja pergi membantoe itoe Siauw-tjiang. Begitoelah dengen oedjan-oedjanan iaorang berantem sengit, tapi sampe matahari terbit tida ada jang menang atawa kala.
Kerna balatentara moesoe samingkin lama ada bertamba samingkin banjak. tiga panglima Song telah dikoeroeng oleh moesoe. Dengen boeka satoe djalanan dara marika bisa djoega terlolos dan naek poela ka goenoeng ketjil tempat dimana Houw-jan Giok berdiriken tenda.
Doeariboe tentara jang ada di bawah prentanja, sekarang tjoema tinggal sadja brapa ratoes orang. Tapi maski begitoe, itoe ajah dan kadoea. anak, tida sekali djadi keder atawa djeri.
Dengen perboeatannja Ong Pah jang berhianat, Kan Li-poet dengen gampang hisa doedoeki Yanglotjoen dan sapoeloe laksa balatentaranja tida banjak soesa bisa menjebrang itoe bengawan.
Djatonja Yanglótjoen membikin saloeroeh tempat di Leeyang djadi terantjem bahaja Semoea panglima bersama anambelas riboe balatentara jang ada di bawa prentanja Nio Hong-peng, djadi barantakan. Sedeng itoe Thaykam jang pimpin ini pasoekan, satelah denger kabar moesoe soeda menjebrang soengei Hongho, laloe merat ka kota Radja. (Sasoenggoenja kita tida mengarti, bagimana satoe Thaykam diprenta pimpim tentara. Apatah dalem karadjahan Songtiauw itoe waktoe soeda tida ada kapala perang jang gaga dan tjakep, boeat diserahken itoe djabatan besar? Maka sampe orang kebiri dari kraton disoeroe madjoe sabagi djendraal? P.)
Soldadoe Kimkok soeda kiterin itoe boekit tempat di mana Houw-jan Tjiak bersama doea poetranja ada berdiam. Doea hari anak dan ajah itoe telah terkoeroeng, sedeng ramsoem ampir abis,
Meliat keadahannja soeda djadi berbahaja, Tjhie Seng laloe berkata:
„Kaloe kita berdiam sadja, achir-achir toch moesti binasa, sebab kaloe ramsoem abis, tentoe semoea soldadoe boleh mati kalaparan. Maka menoeroet anak poenja pikiran, sabelonnja kita poenja tentara djadi lemas lantaran tida makan, apa tida baek kaloe sabentar malem dari átas kita menjerang ka bawah? Dengen begitoe djadi masi ada harepan boeat lolosken diri dari bahaja kamatian?”
Houw-jan Tjiak njataken moefakat. Maka begitoelah di waktoe malem katiga panglima itoe lantas bersiap boeat menjerang toeroen. Tatkala itoe soeda djato di moesin Tjhioe, oedjan telah brenti dan langit ada kaliatan terang. Di salebar goenoeng ada tertoetoep dengen halimoen; sedeng bintang-bintang ada berkredep. Tatkala itoe soeda soenji, apa jang bisa kadengeran itoe malem, tjoema soearanja boeroeng- boeroeng gan piatoe jang meratap-ratap dengen sedi, hingga orang-orang jang denger bisa djadi mengenas hati.
Di djoeroesan tenda moesoe masi kaliatan sinar terang. Maka Houw-jan Tjiak laloe adjak anaknja menjerang di ini waktoe, djangan toenggoe sampe fadjar.
Poetra itoe manggoetken kapalanja dan bersadia boeat toeroet sang ajah poenja prenta.
Tida lama kamoedian marika itoe soeda toeroen dan mengadoek di tempat moesoe. Satoe panglima jang denger soeara riboet-riboet lantas kaloear dan waktoe berhadepan, Houw-jan Tjiak laloe bertreak:
„Oh, djahanam, penghianat!”
Sambil kata begitoe ia menjerang dengen sengit.
Orang itoe boekan laen dari Ong Pah.
Houw-jan Giok dan Tjhie Seng satelah denger treakannja sang ajah, lantas madjoe memboeroe. Tapi sabelonnja dapet roeboeken itoe panglima penghianat, panglima Kim jang denger moesoe lagi mengamoek, lantas dateng membantoe, hingga tiga panglima Song itoe tida dapet djalan boeat tabas lehernja Ong Pah, hanja marika tjari sadja djalanan lolos.
Begitoelah satelah liat satoe djalanan terboeka, ajah dan kadoea anak itoe laloe kaboerken toenggangannja, maka sabentaran sadja marika soeda berada di loear kalangan moesoe.
Tapi Ong Pah jang maoe poera-pcera gaga di hadepannja panglima Kimkok, boekan merasa soekoer jang Houw-jan Tjiak soeda lari, hanja lantas mengedjer sambil bertreak-treak.
Houw-jan Tjiak taoe dirinja dikedjer, maka ia prenta anaknja djalan sadja doeloean, sedeng ia sendiri laloe lariken sadja koedanja dengen pelahan, sembari ditahan-tahan, boeat menoenggoe datengnja itoe penghianat. Satelah bebrapa tindak lagi ampir sampe, Houw-jan Tjiak angkat Piannja dan hantem itoe, dimana Ong Pah lantas roeboeh, tapi tida sampe binasa djiwanja.
Panglima-panglima Kim jang djoega ada toeroet dalem itoe pengedjeran, satelah liat Ong Pah djato, marika laloe brenti mengoedak dan toeloeng ini kawan aken dibawa poelang ka tangsi sendiri, hingga Houw-jan Tjiak bisa lari kombali, dengen tinggalken itoe orang jang telah dibikin djato.
Tida lama Tjoetjiang ini telah sampe di satoe tempat, dimana doea poetranja ada menoenggoe.
Katiga ini laloe djalanken poela koedanja.
Tapi itoe waktoe, soeda tida katinggalan lagi satoe soldadoe, semoea telah binasa dalem paperangan. Dalem sapandjang djalan itoe ada gelap goelita. Itoe tiga orang tida taoe ka mana marika menoedjoe, hanja djalan sadjalan-djalannja sadja. Dan waktoe matahari pentjarken sinarnja, baroelah kataoean jang marika telah berada djaoe dari desa Yanglotjoen.
Anak dan ajah merasa legah di hati, kerna sekarang marika telah terlepas dari bahaja jang mengantjem.
„Ah, beroentoenglah kita bisa terlepas djoega dari koeroengannja moesoe.” kata Houw-jan Tjak: „tjoema kita poenja soldadoe doeariboe orang, sekarang tida ada lagi barang satoe.”
„Ini kakalahan soeda terdjadi lantaran berhianatnja itoe djahanam Ong Pah,” kata Houw-jan Giok dengen sengit: „ah, kaloe taoe itoe manoesia bakal lakoeken ini penghianat, tentoelah siang-siang akoe soeda toeroenken tangan.”
Sembari djalan anak dan ajah beromong-omong. Houw-jan Tjiak tida taqe sekarang maoe balik ka mana. Maoe poelang ka kota Radja, pastilahboleh dapet hoekoeman, maski djoega kakalahan ini sabenernja ada dari Ong Pah poenja perboeatan.
Sasoedanja berdami pandjang pendek, achirnja kadoea poetra itoe kata: marika berdoea menoeroet sadja ka mana ajah maoe pergi.
„Akoe denger kabar Biedjiankong Tjoe Tong ada mendjabat pangkat Tothongtjhie di Potenghoe," kata Houw-jan Tjiak jang sasoedanja berpikir sakoetika lama: maka akoe rasa baek kıta pergi ka sana, boeat samantara waktoe dengerdenger kabar bagimana kadjadiannja perkara di kota Radja."
Doea Siauwtjiang itoe manggoetken kapala, satoe tanda menoeroet sadja.
Sigra djoega marika itoe kasi lari koedanja menoedjoe ka Potenghoe. Kira-kira berdjalan satenga harian poenja lama, katiga orang itoe rasaken peroetnja soeda lapar, maka Houw-jan Giok lantas tjari satoe waroeng dan di dalem desa ia katemoeken satoe roema makan jang baek djoega.
Sigra djoega ia balik kombali aken membri taoe pada ajahnja, bahoewa dalem itoe desa jang kaliatan ada roema makan. Maka Houw-jan Tjiak bertiga lantas menoedjoe ka itoe tempat, satelah sampe marika laloe toeroen dari koeda dan minta disadiaken makanan dengen arak.
Satoe djongos laloe lajanin sabagimana pantes.
Bebrapa roepa makanan lantas tersadia di atas medja, dimana marika jang memang soeda lapar, lantas sadja makan dengen enak.
Tida lama kamoedian, sasoeda ampir abisan santap, Houw-jan Tjiak djadi sedikit kaget, kernä menginget jang dalem sakoenja tida ada oewang.
Sambil berpaling pada Tjhie Seng, ajah ini berkata: „Doeloe koetika akoe poenja barisan Lian-hoanma dialahken oleh ajahmoe poenja pasoekan Kouwlamtjio, akoe lantas pergi ka Tjengtjioe boeat minta pindjem soldadoe dengen djalan di sini, djoega mampir di ini waroeng. Apa tjilaka sahabisnja santap, lantaran tida ada sadia oewang, terpaksa akoe boeka ban mas jang akoe pake boeat beresken itoe peritoengan makan. Apa jang terdjadi sekarang ada seperti djoega pada dahoeloe hari, dan heran sekali bagimana hal begitoe bisa terdjadi poela? Tjoema bedanja se karang ada kaoe berdoea. Dan sala satoe di antara kaoe berdoea, apa ada jang bawa oewang boeat bajar harganja ini makanan?”
Tjhie Seng raba-raba pinggangnja, ternjata tida ada oewang. Tapi Houw-jan Giok ada bawa sedikit, jang menoeroet katanja, brangkali sampe boeat membajar ini makanan.
„Soekoerlah kaloe begitoe,” kata sang ajah dengen hati legah.
Waktoe toekang roema makan kasi taoe harganja, njatalah oewang itoe ada tjoekoep, hingga iaorang tida oesah tinggalken lagi barang ini atawa itoe boeat tandon.
Kamoedian tiga orang itoe landjoetken poela perdjalanannja, di waktoe ampir sore temboknja kota Potenghoe soeda kaliatan dari djaoe.