Pembalesannja Kawanan Liangsan/Bagian katiga/Bab 22
XXII
Houw-jan Tjiak dengen kadoea poetranja
tjari perlindoengan, katemoe Tjioe
Thong membri toeloengan.
Soepaja bisa lekas-lekas sampe ka dalem kota, maka katiganja itoe lantas petjoet koedanja, hingga binatang itoe lantas lari lebi kentjang.
Koetika sampe di bawah kota, kaliatan roema-roemanja anak negri pada tertoetoep, tida kaliatan orang djalan atawa berdagang, hingga Houw-jan Tjiak djadi bingoeng, kerna tida taoe kenapa boleh djadi begini.
Houw-jan Tjiak laloe kaokin pendjaga kota, boeat minta itoe pengawal kasi taoe pada Tothongtjhie. Tapi pengawal pintoe membri taoe, bahoewa Tjoetjiangnja ada di Hoeihojok, mendjaga pasoekan Kim jang maoe menjerang kamari.
Mendenger itoe djawaban Houw-jan Tjiak memandang pada kadoea poetranja, dengen sorot mata menanja: ka mana sekarang iaorang moeati tjari tempat perlindoengan.
Kadoea anak itoe tida bisa djawab apa-apa. Sabelonnja sang ajah dapet satoe pikiran ka mana sekarang moesti menoedjoe, koenjoeng- koenjoeng terdenger soeara letoesan bom, jang herbareng itoe lantas kaliatan banjak bendera jang meloekisken Radja Boeroeng Wali.
„Oh, itoelah balatentara Kim,” kata Houw-jan Tjiak, jang lantas adjak kadoea anaknja lari ka dalem oetan, kerna boeat melawan, itoelah tida bisa, sebab marika tida ada poenja satoe soldadoe.
Itoe barisan memboeroe dengen tjepet, tapi Houw-jan Tjiak bertiga lari lebi tjepet lagi. Maka sabentaran sadja marika telah mengilang di rimba-rimba dan moesoe jang menjoesoel tida dapet tjari padanja.
Tatkala matahari telah moelai toeroen, hingga doenia djadi gelap goelita.
Kerna koeatir moesoe masi menjoesoel, maka tiga orang ini lantas masoek ka tempal jang lebi dalem, Rimba itoe ada banjak toemboe poehoen-poehoen Siong dan bamboe idjoe, sedeng soearanja boeroeng-hoeroeng ada kadengeran rame. Dengen tida taoe ka mana moesti menoedjoe, iaorang djalan sadja teroes-teroesan.
Sasoedanja berdjalan lagi kira-kira brapa ratoes tindak, dari kadjaoean ada kaliatan sinarnja api penerangan.
„Nah, achir-achir kita dapetken djoega roema orang,“ kata itoe ajah sambil menoendjoek ka depan. ,,Bener, hajoelah kita berdjalan lagi lebi tjepet," saoet poetranja.
Tida lama marika telah sampe. Kiranja sinar api itoe ada dari lenteranja satoe gredja.
Houw-jan Tjiak bersama anaknja lantas masoek dalem pekarangannja itoe roema soetji. Sambil memandang ka sana sini marika tjari pada padri jang mendjaga, dengen maksoed boeat minta noempang menginep.
Tapi salagi marika maoe toeroen dari koeda, kaliatan kaloear lima Hosiang lang di tangannja ada bersendjata golok, toeja. kauwliam, toembak bertjagak tiga dan sikoe-sikoe, sembari bertreak- treak memboeroe padanja.
,,Ho! kaoe ini pendjahat dari lemmatjwan, begitoe brani dateng ka mari!" kata itoe padri- padri sambil geraken sendjatanja.
,Tahan! djangan kaoe begerak doeloe, Soe- hoe!" treak Houw-jan Tjiak:,,kita orang boekan dari lemmatjwan, hanja dari Potenghoe, Tjioe Tothong poenja sobat-sobat!"
,,Oh, kaloe begitoe kabetoelan sekali," kata sala satoe dari itoc Hosiang: " pendlahat dari lemmatjwan atawa panglima dari Potenghoe, moesti djoega akoe tangkep."
,,Tapi kita-orang toch tida ada bersala apa-apa saoet Houw-jan Giok:,,hanja dateng ka mari sakedar boeat minta toempangan tempat mengimenginep dan besok kita orang nanti berlaloe dari ini gredja.“
„Oh, kaloe begitoe njatalah kaoe tida taoe,“ kata itoe padri jang bergegaman toembak bertjaga tiga : “jang ini gredja soeda diserahken pada kakoeasahannja panglima Kimkok, dimana Kan Li-poet telah kaloearken prenta bagi siapa-siapa jang bisa dapet tangkep panglima Song-tiauw, nanti dikoerniaken gandjaran besar, sedeng kaoe bertiga kaliatannja ada panglima Taysong!”
„Lebi baek bertiga lekas menjerah, soepaja tida oesah rasaken kita poenja poekoelan,“ menjamboeng padri jang mamegang sikoe-sikoe.
Mendenger ini perkatahan-perkatahan jang dioetjapken oleh itoe bebrapa Hosiang, Houw-jan Tjiak dan kadoea poetranja lantas dapet taoe, kombali marika hadepi bahaja jang boekannja ketjil. Maka dengen tida banjak bitjara marika laloe angkat gegamannja laloe menjerang pada itoe padri jang paling deket.
Itoe Hosiang menangkis, sedeng temennja menoesoek, Tapi itoe tikeman dilakoeken dengen tida menoeroet atoeran gisiauw. Dari sitoe itoe tiga panglima lantas dapet taoe, bahoewa ini lima kapala goendoel semoea tida ada peladjaran boege, hanja tjoema pegang sadja itoe sendjata boeat mengantjem. Belon berantem brapa gebrak itoe Hosiang-hosiang lantas melariken diri.
Kerna koeatir nanti kena tipoenja itoe hwesio-hwesio, maka Houw-jan Tjiak laloe adjak kadoea poetranja pergi ka laen tempat.
Begitoelah ia orang berdjalan lebi djaoe boeat tjari tempat perlindoengan.
Liwat satoe paal marika katemoeken lagi satoe gredja, tapi di depan dan di blakang tida ada orang. Maka Houw-jan Tjiak bertiga laloe toeroen dari koeda, preksa di sana sini, dan sasoedanja ternjata tida ada moesoe jang semboeni, baroelah iatjari satoe tempat boeat rebahken badan.
Remboelan ada pentjarken sinarnja. Di pekarangannja itoe roema berhala tida kadengeran laen dari soearanja djangkrik dan kodok. Angin jang menioep ada dirasaken amat dingin, ditamba dengen rasa lapar, hingga toeboeh jang bagimana gaga djoega djadi lelah.
Houw-jan Tjiak dan Houw-jan Giok lantas rebahken diri, tapi Tjhie Seng lantas poengoetin daon-daon kering, patain tjabang-tjabang kajoe dan koempoelken itoe djadi satoe, jang kamoedian dengen pertoeloengannja batoe api, sigra djoega djadi satoe taboenan boeat angetin badan.
Tjhie Seng membri taoe pada ajahnja, soepaja itoe ajah angkat dan Koko boleh angetin badan di hawahnja api.
Meliat begitoe Houw-jan Tjiak djadi soeka hati. Maski peroet lapar kaloe badan anget, masi mending djoega.
Waktoe itoe doea soedara mendeketi taboenan, Tjhie Seng menggeraktak di seantero gredja, dengen pengharepan kaLoe-kaloe bisa dapet apa-apa jang boleh didahar. Tapi kendati bagimana djoega, tida ada barang jang dikatemoeken.
Salagi ia maoe kaloear kombali, matanja dapet liat apa-apa jang lari berklebat, maka orang moeda ini lantas lari masoek dan ambil toembaknja dengen tida kaloearken sapata perkatahan, hingga membikin Houw-jan Tjiak dan Houw-jan Giok jang meliat kalakoeannja djadi kaget dan tida taoe ada apa.
Tjhie Seng dengen pegang itoe sendjata soeda berada di loear pekarangan. Houw-jan Giok tida taoe ada apa, koetika ia kaloear, ia liat Tjhie Seng taro satoe djeridji di pinggir bibir, sedeng tangan jang sebla menggape-gape.
Ini Koko lantas mengarti jang soedara itoe soeroe ia berdiam djangan bersoeara. Dengen tindakan pelahan panglima moeda dateng menghamperi pada soedaranja, dan waktoe marika soeda ada di satoe tempat jang teraling, Tjhie Seng menoendjoek ka pinggir rawa ketjil.
Di sitoe ada kaliatan anak kidang jang lagi minoem aer.
Tjhie Seng pegang itoe toembak dan djoedjoe dengen hati-hati, jang sasoeda rasa tida sala, ia lantas lepas dan toembak itoe melanggar peroetnja kidang tadi.
Satoe soeara ngeri dari itoe binatang ada kadengeran. sigra djoega kidang itoe tergoeling dan djato di pinggir rawa.
Houw-jang Giok lantas tjaboet goloknja dan tabas kapalanja itoe binatang jang masi melompat-lompat, kamoedian kadoea soedara itoe keset koelitnja, tjoetji di itoe rawa. Dagingnja dipotong-potong di terangnja remboelan.
Kamoedian marika balik kombali ka itoe gredja, Houw-jan Tjiak jang tida taoe ka mana itoe anak-anak telah pergi, laloe menanja, apa itoe jang marika bawa.
Tjhie Seng kasi tane, jang marika abis toembak kidang dan sekarang dagingnja maoe dimatengin boeat menahan lapar.
Kadoea soedara itoe lantas tjari koeali, njalaken api lebi besar dan waktoe daging itoe lagi direboes, Houw-jan Giok tjoba menggeraktak di sana sini, dan ini Koko ada lebi beroentoeng dari adenja, kerna baroe mamereksa sedikit lama di satoe tempat jang seperti peti, ada terdapet sabotol arak!
„Aha, bagoes sekali“ kata Houw-jan Giok dengen soeara girang: „ada arak boeat kita orang angetin peroet.“
Tida lama waktoe daging itoe mateng marika laloe dahar dengen enak, maski djoega reboesan itoe, zonder dipakein lagi garem, hanja dimakan begitoe sadja tawar-tawar.
„Orang paperangan moesti bisa tahan melarat,“ kata sang ajah: „ini makanan toch soeda bagoes, dari pada tida dapet daging dan arak sekali.“
Tapi itoe daging belon empoek betoel, hingga marika makan dengen dikerokoti. Tapi beroentoeng kidang itoe ada moeda, hingga bisa dimamah dengen gampang djoega.
Koenjoeng-koenjoeng dari kadjaoean ada kadengeran soearanja orang bertreak.
Anak dan ajah djadi terkesiap dan marika laloe pasang koeping. Bener sadja ada terdenger soearanja orang prampoean jang lagi bertreak: toeloeng-toeloeng!“
Soeara itoe beroeLang-oelang, jang samingkin lama ada samingkin njata. Orang jang lagi minoem itoe lantas abisin araknja boeroe-boeroe, kamoedian pegang sendjatanja sedia boeat menoeloengi.
Katiga orang ini lantas kaloear dan memboeroeka itoe tempat di mana soeara tadi dateng. Njatalah tida djaoe dari itoe gredja ada bediri satoe roema, maka Houw-jan Tjiak berdoea poetranja laloe hamperi ka itoe tempat dan di sini soeara itoe terdenger lebi njata.
Sigra djoega marika itoe soeda berada di samping roema. Menoeroet doegahannja sang ajah, orang prampoean jang bertreak itoe lagi teraniaja.
Marika liat pintoenja roema itoe dan daon djendelanja semoea tertoetoep.
Dengen tida sabaran, Houw-jan Giok laloe tendang pintoenja roemit itoe, jang sekali sadja lantas menggedoebrak dan Tjhie Seng mengikoeti soedaranja. Sedeng Houw jan 1jiak dengen pègang sendjata toenggoe di loear.
Di dalem kamar ada kaliatan doea Hosiang jang lagi redjang satoe njonja moeda. Njatalah itoe padri kaparat lagi maoe perkosa itoe njonja jang tida ada orang lelakinja. Satoe dari itoe hweshio pegang badannja itoe prampoean, sedeng jang laen berkoetet-koetetan tarik orang poenja tali pengiket pinggang. Tapi itoe njonja sambil menangis tida brentinja bertreak-treak.
„Oh, djahanam!“ bertreak Houw-jan Giok sambil angkat toembaknja dan toesoek itoe di moekanja itoe padri jang lagi memegangi orang poenja toeboeh.
Itoe doea Hosiang waktoe denger soeara pintoe ditendang djadi amat kaget, tapi lantaran bandelnja masi sadja ia redjeng itoe njonja. Koetika itoe doea orang moeda soeda berada di hadepannja, baroelah marika kaliatan kaget, tapi toembaknja Houw-jan Giok soeda kaboeroe sampe.
Itoe padri lantas djato, tapi kawannja berlompat dengen tjepet dengen dioeber oleh Tjhie Seng.
Itoe Hosiang jang djato, oleh Houw-jan Giok lantas dibarengin lagi, hingga sebentaran sadja hweshio kaparat itoe djedjoengkingan sambil merinti- rinti uinta ampoen.
„Kaoe ini satoe padri kaparat!“ menjentak Houw-jan Giok sambil menoeding: „hajoe lekas bilang dengen sabenernja, kaoe ini di gredja mana poenja padri, maka begitoe koerang adjar brani permaenken kahormatannja orang prampoean?“
„Siauwtjeng poenja gredja di Bankengsih,“ saoet itoe padri sambil memanggoet-manggoet: tapi sebab belon lama ada kadatengan saorang. jang bernama Tam Hoa, jang ada begitoe pande maen poekoelan dan telah menaloek pada Kan Li-poet, maka Siauwtjeng bersama Soehoe laloe berdiriken ini roema di tempat soenji
„Siapa itoe Tam Hoa?“
„Saorang kaloearan dari gredja Siauw Lim S, Pit Hong di Liongkaksan poenja soedara toea.“
„Siapa itoe Pit Hong?“
„Penjamoen di goenoeng Liongkaksas, jang belon lama telah dapet labrakan dari orang-orang gaga di lemmatjwan?“
Salagi Houw-jan Giok bikin pertanjahan ini itoe, dan si padri poen meriti-rinti minta diampoenin, Tjhie Seng jang tadi mengedjar itoe hweshio, soeda kombali dan berkata dengen soeara goesar:
„Boeat apatah Koko kotor-kotorin moeloet omong pada manoesia matjem begini !“
Sembari kata begitoe, orang moeda ini laloe tabas batang lehernja itoe kaparat, jang sekali sadja kapalanja lantas terdjato di lantei.
Itoe njonja moeda jang maoe diperkosa ada berloetoet sambil oetjapken trima kasi atas pertoeloengannja itoe doea orang gaga.
Tapi sabelonnja menanja pada itoe orang prampoean, Houw-jan Giok tanja tentang itoe padri jang baroesan dikedjer. Tjhie Seng kasi taoe: bahoewa itoe kaparat soenggoe koeat larinja, hingga ia tida dapet soesoel. Beroentoeng waktoe hweshio itoe maoe lompat ka loear, ia kaboeroe tabas sebla tangannja hingga koetoeng.
„Tapi toch, maski tangannja soeda koetoeng, ia masi djoega bisa lari dengen kentjang,“ kata Tjhie Seng.
Sahabisnja berkata, Tjhie Seng menengok pada itoe prampoean, jang sekarang djadi goemeter meliat itoe mait. Kerna ia poen roepanja belon pernah liat oraeg diboenoe, maka kapalanja itoe padri jang koetoeng, soeda membikin hatinja njonja itoe djadi katakoetan.
Houw-jan Giok laloe menanja:
„Siauwli Nio, kaoe ini orang dari mana, dan mengapa boleh djato di tangannja itoe doea kaparat terkoetoek?“
Dengen sedi itoe njonja laloe toetoerken hikajatnja, bahoewa marika ada pendoedoek di doesoen jang tida berdjaoean dengen ini 1oema. Lantaran pasoekan Kim dateng menjerang dan bikin riboet, maka ia bersama soeami dan mertoeanja, laloe lari.
Marika kaloear bertiga dari roema di waktoe tengamalem, kata poela njonja itoe, tapi di djalanan telah berpentjar kerna gelapnja, tambahan di sana sini kadengeran soеaranja soldadoe jang bertreak-treak. Lantaran soeda tinggal sendirian dan tida brani berdjalan teroes, maka ia brenti di bawa poehoen jang ada di pekarangannja ini roema. Tapi tida kira doea hweshio jang meliat padanja, laloe tarik dan diseret ka dalem, maski ia soeda bertresk-treak, toch kaparat itoe memaksa teroes dengen tida merasa kasian.
„Beroentoeng Djiwi Hohan kaboeroe sampe aken membri toeloengan,“ kata poela njonja itoe: „boeat itoe boedi besar, tida taoe dengen apa bisa dibales.“
Houw-jan Tjiak poen itoe waktoe soeda ka dalem, dan liat itoe prampoean ada berloeloet di hadepan anaknja. Maka njonja itoe lantas dibangoenin dan sang anak laloe toetoerken siapa adanja ini prampoean, menoeroet sabagimana tjeritanja jang baroesan.
„Koko, di sini brangkali ada garem,“ kata Tjhie Seng jang masi inget sadja pada makanannja: „dan kaloe bener begitoe, kita boleh makan kombali itoe daging jang belon abis.“
„Ja ja benerlah!“ kata itoe soedara.
Houw-jan Giok laloe pergi kombali ka itoe gredja jang tadi, boeat ambil ia poenja barang reboesan. Waktoe Kokonja ka loear, Tjhie Seng laloe pergi ka dapoer dan menggeratak di sana sini, dimana ia dapetken boekan sadja ada garem, hanja ada djoega tjoeka, ketjap dan lada.
Orang moeda ini djadi amat girang dan liat di dapoer masi ada api, maka sigra djoega ia tjokolin satoe koeali, dengen maksoed boeat panasin kombali itoe daging jang tentoe soeda dingin lantaran ditinggal begitoe lama.
„He, ini ada koeali, tentoe djoega ada beras,“ kata poela ia.
Betoel sadja waktoe ia tjari-tjari, di satoe petiman besar kadapetan beras, hingga orang moeda ini djadi girang dan lantas masak nasi.
Tida lama Houw-jan Giok telah balik sembari bawa itoe barang. Marika laloe bekerdja kombali, jang selang sedikit waktoe, nasi telah mateng dan daging poen telah empoek, hingga katiga orang jang memangnja lapar, laloe dahar dengen enak.
Sahabisnja santap marika laloe rebahken diri boeat ilangin tjape.
Katiga-tiganja itoe poeles dan baroe tersedar kira-kira terang tana.
Waktoe baegoen, itoe njonja jang samalem ditoeloengin soeda sediaken thee dan nasi, njatelah itoe orang prampoean ada perhatiken djoega pada penoeloengnja, kerna maski boekan roemanja, toch ia bisa djoega tjari tempatnja daon thee, dan sedoe itoe boeat disoegoeken pada itoe Samwie Indjin.
Houw-jan Tjiak, anak dan ajah merasa soeka hati. Sembari minoem thee tiga orang itoe berdami boeat pergi ka lemmatjwan.
„Akoe rasa lebi baek kita pergi ka lemmatjwan sadja,“ kata Houw-jan Tjiak: „di sitoe tentoe kita bisa dapet tempat berlindoeng,“
„Anak toeroet aadja di mana jang ajahkoe rasa baek,“ saoetnja itoe, doea soedara. Atas katerangannja itoe orang prampoean, lemmatjwan letaknja di djoeroesan Selatan dari ini tempat, jang djaoenja dari sini ada kira-kira sepoeloe li.
„Kaloe begitoe tida sabrapa djaoe,“ kata itoe ajah: „maka baeklah sekarang kita berangkat sadja, poengpoeng hari masi pagi.“
Kamoedian ia pesen pada itoe njonja, soepaja orang prampoean ini pergi tjari soeami dan mertoeanja jang soeda terpentjar. Dengen bilang, jang itoe padri kaparat tentoe tida brani mengganggoe lagi, kerna jang satoe soeda binasa dan jang laen sebla tangannja telah koetoeng.
Itoe njonja berloetoet, sambil hatoerken trima kasi. Houw-jan Tjiak bertiga, sasoedanja dahar laloe toenggang kombali koedanja dan brangkat ka itoe goenoeng jang dioendjoek.
Baroe sadja ia orang berdjalan bebrapa li daoenja, dari depan ada kaliatan satoe panglima jang toenggang koeda, dengen dikedjer oleh sarombongan soldadoe, lagi melariken diri. Dari benderanja itoe soldadoe-soldadoe jang mengedjer ada diloekisken Radja Boeroeng Wali Itam, njatalah itoe ada barisan Kimkok. Tapi siapatah orang jang dikedjer itoe.
Hou-jan Tjiak mengawasi dan achirnja ia kenalin, kiranja dia itoe ada Bitjiankong Tjioe Thong.
Meliat begitoe, ini ajah laloe prenta poetranja madjoe menoeloeng, dengen membri taoe, siapa adanja itoe orang.
Kadoea poetra itoe lantas madjoe ka depan dan pegat djalannja moesoe. Satelah soldadoe-soldadoe Kim itoe sampe, Tjie Seng dengen toembaknja laloe hantem kalangkaboet. hingga sabentaran sadja bebrapa laskar pada djoempalitan dari koeda dengen tida bernjawa Sedeng Houw-jan Giok poeter gegamannja dan moesoe tida brani mengedjer teroes.
Itoe panglima jang diboeroe, satelah liat ada tiga orang gaga jang membantoe, djadi girang dan lantas balikin koedanja, dengen tida kenal siapa adanja itoe doea Siauwtjiang jang gaga perkasa.
Tapi waktoe liat pada Houw-jan Tjiak, sigra djoega ia kenalin dan berseroeh:
„Oh, kiranja kaoe, Hengtiang !"
Sabelonnja Houw-jan Tjiak sempet nenjaoet, dari satoe djoeroesan ada kadengeran soearanja tamboer dan gembreng, hingga itoe ampat orang jang lagi maoe toeroen dari koeda, lantas bersiap kombali boeat lawan datengnja moesoe.
Tapi itoe soldadoe-saldadoe kaliatannja boekan seperti barisan Kimkok, tapi kendati begitoe tida oeroeng ampat orang ini djadi koeatir dan lantas madjoe dengen lintangin gegamannja.
Tida lama saorang jang bertoenggang koeda telah sampe di depannja, sedeng di blakangnja ada kaliatan sarombongan liouwlo jang lagi mengiringken saorang tawanan.
Itoe orang gaga njatalah ada satoe Thaunia, satelah dapet liat pada Houw-jan Tjiak dan Tjioe Thong, boeroe-boeroe madjoein koedanja dan sasoedanja deket ia berlompat sambil mendjoera.
„Hola! kiranja kaoe, Kimpahtjoe!" berseroeh Houw-jan Tjiak dengen soeara girang: akoe kira barisan Kimkok jang masi mengedjer!"
„Hahaha! Soenggoe beroentoenglah jang kita orang bisa bertemoe di sini," kata itoe orang, jang boekan laen dari Jo Liem,
Sigra djoega marika laloe toeroen dari koedanja, satoe pada laen laloe membri hormat dan menanjaken ini itoe.
Di sitoe Jo Liem laloe menanja:
„Akoe denger kaoe ada pangkoe djabatan di kota Radja, Houw-jan Heng, bagimanatah sekarang boleh ada di sini?"
„Dan kaoe djoega, Tjioeheng," kata poela Kimpahtjoe itoe.
„Ha, boeat akoe poenja riwajat ada terlaloe pandjang boeat ditoetoerken," kata Houw-jan Tjiak jang lantas kenalken sobat lama itoe pada kadoea poetranja. Sedeng Houw-jan Giok dan Tjhie Seng dateng membri hormat
Di sitoe Tjioe Thong laloe tjeritaken, bagimana tempat djagahannja telah dipoekoel petja di bawa pimpinannja, abis moesna.
Satoe persatoe ia tjeritaken terang tentang keadahannja itoe peperangan.
Lima orang itoe beromong-omong dan Jo Liem kata: dari sini ka Iemmatjwan soeda tida sabrapa djaoe lagi, maka salagi tida ada mempoenjai tempat tentoe, boekan ada lebi baek kaloe marika berkoempoel sadja di lemmatjwan.
Houw-jan Tjiak manggoetken kapalanja dan kata: memang djoega ia ada niat maoe pergi berlindoeng ka itoe goenoeng bersama sekalian soedara-soedaranja jang doelde. Mendenger ini perkatahan, Jo Liem djadi sanget girang dan marika itoe lantas djalanken koedanja menoedjoe ka itoe tempat, sedeng satoe liauwlo diprenta djalan doeloean boeat membri taoe pada Lie Eng.
Sambil berdjalan marika itoe beromong-omong. Dengen tida terasa soeda ampir sampe.
Lie Eng satelah denger liauwlo itoe kasi taoe jang Jo Liem soeda katemoe ampat orang gaga, dan sekarang lagi dateng ka mari, djadi amat girang. Sigra djoega ini Twako laloe kasi taoe pada sakalian soedara-soedaranja, aken kaloear menjamboet.
Lima orang itoe laloe toeroen dari koeda, satoe pada laen laloe membri hormat. Lie Eng dengen girang dan oendjoek moeka manis persilaken orang-orang itoe naek ka atas goenoeng, dimana iaorang laloe berkoempoel di Tjhigiethia.
„Di gredja Bankengsi poenja Tam Hoa Hosiang baroe ini telah menjerang lemmatjwan," kata itoe Twako: „tapi kerna padri itoe sendiri tida sanggoep tempoer kita orang jang ada di sini, maka pada bebrapa hari jang laloe ia minta bantoeannja orang-orang Kim; — dan beroentoeng ini hari Liatwie Hengtiang telah sampe, maka akoe tida oesah merasa koeatir lagi".
„Akoe djoega, kaloe tida dapet bantoeannja, kata Tjioe Thong sambil menoendjoek pada Houw-jan Giok dan Tjhie Seng: „pastilah dapet tjilaka di tangan moesoe, pada waktoe orang Kim jang mengedjer ampir sampe. Ini doea tjoetjoe kendati masi beroemoer moeda, tapi kagagahannja ada sampe tjoekoep".
Lie Eng laloe prenta sediaken makanan dan arak, bikin satoe perdjamoean boeat membri slamat dateng.
Itoe orang tawanan jang Jo Liem bawa, laloe dihadepken ka roewangan Tjhigiethia, dan Houw-jan Giok jang dapet liat, lantas kenalin, bahoewa hweshio itoe jang samalem telah melariken diri.
Di sitoe Houw-jan Giok laloe tjeritaken, bagimana samalem kapala goendoel itoe telah lakoeken perboeatan kedji pada satoe njonja moeda, tapi maksoednja tida kasampean. Dan itoe sebla tangannja jang koetoeng, kerna tertabas oleh Tjhie Seng poenja golok, pada waktoe si kaparat ini maoe lari kaloear dari itoe roema.
Lie Eng denger begitoe, lantas berkata:
„Kaloe begitoe, tabas sadja kapalanja, boeat apa kasi ia tinggal idoep lebi lama, manoesia jang kedji begini".
Prenta ini lantas dilakoeken dengen tjepet. Tida lama kapalanja itoe kaparat telah poetoes.
Sasoeda itoe Lie Eng prenta orang oendang Kong-soen Sin, dan sabelonnja imam itoe dateng marika tjerita-tjerita dari keadahannja.
Houw-jan Tjiak tjeritaken lantaran Ong Pah berhianat pada moesoe, hingga ia dapet karoesakan besar. Bagimana sasampenja di Potenghoe pintoe kota tertoetoep, kerna dapet kabar jang Tjioe Thong tida ada di dalem kota. Begitoelah achirnja masoek di oetan, katemoe gredja dan sampe menoeloeng itoe njonja jang hendak diperkosa oleh doea hweshio, achirnja beroentoeng katemoe Tjioe Thong dan Jo Liem.
Sedeng Tjioe Thong poen toetoerken tentang keadahannja, bagimana pasoekannja djadi moesna sama sekali. Dan beroentoeng waktoe moesoe mengedjer ada Houw-jan Tjiak bersama doea poetranja jang menoeloeng, sampe achirnja bertemoe pada Jo Liem dan dateng ka mari.
Baroe sadja iaorang beromong-omong sampe di sitoe, Kong-soen Sin bersama Tjioe Boe, moeridnja, telah sampe. Maka Houw-jan Tjiak dengen anaknja dan jang laen-laen laloe bangoen membri hormat, sambil menanjaken ini itoe.
Ini pertemoean ada menggirangken sekali masing-masing poenja hati. Kerna sabegitoe lama baroe sekarang iaorang berkoempoel lagi.
Kong-soen Sin laloe menanjaken tentang itoe doea soedara angka jang baroe dateng. Houw jan Tjiak dan Tjioe Thong laloe tjeritaken apa jang baroesan telah ditoetoerken, kamoedian doea orang itoe balik menanja: bagimana Kong-soen Sin boleh dateng di ini tempat, sedeng doeloe terkabar ia berdiam di Djisiangsan.
Ini imam laloe tjeritaken apa jang telah terdjadi atas dirinja doeloe hari.
„Ah, njatalah sabagi djoega Thian poenja maoe, maka boleh terbit perkara-perkara begitoe roepa,“ kata Kong-soen Sin achirnja: sebab kaloe tida begitoe, masatah kita poenja Hengtiang jang ada di mana-mana, jang soeda pangkoe djabatan negri dengen kamoeliahan, bisa dateng kamari”.
Tjioe Thong dan Houw-jan Tjiak benerken itoe omongan.
Kerna Kong-soen Sin soeda lama tida dahar barang berdjiwa, maka boeat ia bersama Tjioe Boe dipisaken laen medja, jang terbikin dari sajoer-sajoer.
Semoea Thaunia ada kaliatan girang, saban-saban gelas mendjadi kosong dan ditamba lagi.
Begitoelah, sasoedanja djaoe malem baroe perdjamoean itoe ditoetoep. Houw-jan Tjiak bersama doea poetranja dikasi satoe tempat, begitoe djoega Tjioe Thong.
Sekarang itoe ajah dan anak djadi berlindoeng di lemmatjwan Dan dengen datengnja itoe bebrapa orang-orang gaga, keadahannja lemmatjwan. djadi bertamba-tamba tegoeh.
Lie Eng satiap hari bikin perhimpoenan pada itoe sakalian soedara-soedara, toetoerken bagimana keadahannja temmatjwan jang dalem waktoe blakangan telah diserang oleh Tam Hoa Ho-siang, jang dateng dari gredja Bankengsi.
„Tapi dengen datengnja Djiwi Heng tiang dan kadoea Hiantit," kata itoe Twako dengen moeka terang: lagi sakali akoe moesti bilang: akoe tida djadi koeatir pada itoe kapala goendoel, maski djoega marika dapet bantoean dari orang orang Kimkok".
Hauw-jan Tjiak dan Tjioe Thong menjataken bahoewa ia ada sedia boeat membantoe dengen sagenapnja tenaga. Sasoedanja berkata-kata Houw jan Tjiak dapet inget, bagimana pada sabelonnja sampe ka mari, lebi doeloe bersama doea poetranja ia telah tertoenta-loenta di dalem petan dan pada soeatoe hari sampe di depan satoe greja, dimana kadatengannja soeda disamboet oleh lima padri dengen sendjata, jang kira marika ada orang-orang dari lemmatjwan.
Satoe persatoe Houw-jan Tjiak tjeritaken, dan tjerita itoe tida perloe dioelangken kombali.
Sabenernja, apatah padri itoe poenja maoe, maka iaorang boleh menjerang kita poenja tempat?“ berkata Tjioe Thong: apatah Hengtiang di sini, memang ada bermoesoe padanja?“
„Soenggoe akoe djoega tida taoe, apa maoenja itoe si kapala goendoel menjerang lemmatjwan,“ saoet Lie Eng: „boleh djadi iaorang liat tempat ini bagoes dan kapingin rampas, maka dengen zonder sebab ia pergi bersariket pada orang-orang Kim aken bersatroe pada kita“.
Berhoeboeng datengnja ini ampat orang gaga, Lie Eng lantas njataken niatnja, boeat bikin penjerangan ka gredja Bankengsi. Tapi bagimana pikirannja itoe sakalian soedara-soedara, inilah marika belon taoe.
Tjioe Boe jang masi ada di sitoe kasi pikiran, lebi baek tida oesah. Sebab kaloe dari sini pergi ka gredja Bankengsi, di lemmatjwan djadi kosong, hingga moesoe gampang menjerang, kaloe marika dapet taoe.
„Kaloe pada itoe padri-padri kaparat sadja, memang betoel kita-orang boleh troesa taro koeatir begitoe besar,“ kata poela moeridnja Kong-soen Sin jang loewas pikiran itoe: ,tapi dalem ini perkara kita boekan tjoema bersatroe pada Tam Hoa sendiri, hanja pada orang-orang Kim, jang banjak mempoenjai soldadoe“.
Semoea orang benerken perkatahannja Tjioe Boe, dengen begitoe penjerangan jang diniat laloe dioeroengken.
Tapi kendati begitoe, pendjagahan dan pengatoeran, satiap hari dilakoeken dengen giat. Satoe pada laen diwadjibken mendjaga, sedeng liauwlo poen tida brentinja meronda di sakiternja goenoeng.
Pada soeatoe hari, jaitoe selang anam atawa toedjoe hari sadari Houw-jan Tjiak dateng ka itoe tempat, salagi Lie Eng bermoefakatan dalem roewangan Tjhiegiethia, satoe liauwlo dateng membri taoe, bahoewa satoe pasoekan jang dikapalaken oleh Tam Ho Hosiang lagi mendatengi ka mari.
Mendenger begitoe ini Twako laloe prenta orang preksa lebi djaoe, jang tida lama kamoedian djoeroekabar itoe dateng mewartaken: bahoewa kawanan padri itoe ada dateng bersama- sama soldadoe Kimkok. Dari djaoe kaliatan benderanja pasoekan itoe ada terloekis Radja Boeroeng Wali Itam.
„Hm, inilah kabetoelan sekali,“ kata Lie Eng sambil bersenjoem: „memang kita maoe serang padanja, tapi sabelonnja kita bergerak, marika telah dateng sendiri anterin djiwa“
Ini Twako laloe prenta soedara-soedaranja bersiap boeat tangkis datengnja moesoe, tapi Tjioe Boe lantas njataken poela pikirannja, ada lebi baek biarken sadja datengnja moesoe sampe bebrapa hari, sampe soldadoe-soldadoe Kim linjap goembiranja, baroelah dari atas toeroen menjerang. „Dengen begitoe, sakali melabrak kita bisa kasi hadjaran keras padanja," begitoe Tjioe Boe toetoep bitjaranja.
Semoea orang menjataken moefakat. Maka itoe hari orang tjoema. atoer sadja persadiahan boeat menoenggoe sampe dateng waktoenja melabrak.