Pembalesannja Kawanan Liangsan/Bagian katiga/Bab 3
III
Sekali menjerang, Kimgo djato ka laen
tangan. Hoenkangliong doedoek
mamerenta dengen atoeran
jang menjenangken.
Samingkin maleni menioepnja angin djadi bertamba kentjeng, hingga Tong Wie dan Tong Beng, jang maski bertoeboe kekar dan biasa tahan serangannja hawa dingin, tida oeroeng djadi goemeter.
Meliat jang berdjam-djam keadahan di sitoe masi tinggal begitoe djoega, tida ada soeatoe apa jang mengoendjoek maksoednja bisa didjalanken, Tong Wie laloe berbisik pada soedaranja, menjataken: bahoewa ia koeatir kaloe-kaloe ini kawadjiban tida bisa dipenoehken.
Tong Beng berpaling dan mengawasi itoe Koko dengen merasa heran.
„Bagimana Koko bisa doega begitoe?“ tanja ia achir-achir.
„Liat sadja,“ saoet Tong Wie: „dari satadi tida ada perobahan apa-apa. Bagimana kita bisa madjoe lebi djaoe?“ „Ja,“ saoet itoe soedara moeda, jang merasa ada betoel djoega. Tapi terpaksa ia soeroe Kokonja bersabar sadja doeloe.
Selang sedikit waktoe sadari itoe perkatahan dioetjapken, Tong Beng menoendjoek ka satoe djoeroesan sambil berbisik, di mana Tong Wie laloe berpaling dengen tjepet.
Itoe tempat jang dioendjoek adalah satoe pintoe besi jang dibikin dengen amat kekar dan tegoe. Marika tida bisa masoek ka sitoe, kerna dari satadi pintoe itoe tertoetoep sadja.
Mendadak itoe waktoe djadi terboeka, dimana ada kaliatan ampat soldadoe jang membawa goetji dan jang laen membawa rantang besar, kaloear dari itoe pintoe menoedjoe ka pantei laoet, sedeng di blakang dari itoe ampat soldadoe jang membawa barang-barang, ada berdjalan doea prampoean moeda jang berparas eilok, sambil betjanda dan tertawa berkikikan.
Dengen meliat parasnja si eilok bersama itoe goetji, orang bisa lantas mendoega: bahoewa itoe soldadoe ada membawa arak bersama makanan boeat Swa Liong minoem-minoem di tempat djagahannja. Dan itoe doea prampoean eilok, tentoelah ada nona-nona toekang menari jang bakal melajani itoe pembesar.
Roepanja, soepaja tida merasa isang„ Swa Liong maoe senangken hati sambil mendjaga datengnja moesoe. Apapoela itoe waktoe ada amat dingin, maka senanglah kaloe orang hadepi arak bersama barang-barang jang masi panas dan lesat.
Demikianlah, satelah itoe doea soedara meliat begitoe, dengen merasa girang marika boeroe-boeroe berbangkit menghamperi itoe pintoe, kamoedian masoek dengen tida dikatahoei oleh si pendjaga, jang lagi sedeng asik kaloearken omong-omong memaen pada itoe toekang menari.
Sasoedanja orang-orang itoe berdjalan djaoe, si pendjaga laloe toetoep kombali pintoenja, sedeng Tong Wie dan Tong Beng soeda ada di dalem, dimana marika sigra kaloearken oempan api aken bakar roemanja pendoedoek negri.
Tida lama keadahan itoe tempat djadi kaloet dan di dalem itoe kariboetan Tong Wie berdoea soedara telah boenoe pendoedoek jang lagi maoe toeloengi api dan ambil pakeannja boeat menjamar sabagi pendoedoek di Kimgo,
Sebab angin ada kentjang, maka sabentaran sadja oedara jang tadinja gelap djadi bersorot mera terang, hingga Hoenkangliong dengen sadereknja jang memang soeda bersiap, satelah liat sinarnja api, lantas madjoeken sakalian pasoekannja dateng menjerang ka tempat di mana Swa Liong ada mendjaga.
Itoe waktoe ini pembesar jang gaga dan oelat, djoestroe lagi makan minoem dengen senang hati, maka boekan maen kagetnja, satelah orang kasi taoe, jang di dalem kota ada terbit bahaja kabakaran.
Salagi maoe menanja, lantaran apa terbitnja api, mendadak laen djoeroekabar dateng wartaken, bahoewa pasoekan moesoe dateng menjerang. Ini kabar jang dateng beroentoen-roentoen membikin ini pembesar djadi goegoep, dan lantas sadja ambil gegaman boeat menangkis datengnja moesoe.
Tapi baroe sadja ia kaloear, djoestroe Lie Tjhoen telah sampe, maka dengen tida banjak bitjara toembaknja Hoenkangliong lantas sampe di tenggorokannja, hingga Swa Liong tida kaboeroe kelip.
Berbareng itoe Lie Hoen batjok dengen pedangnja, hingga sasaät itoe kapalanja itoe pembesar jang kosen djadi berpisa dari badan.
Tentara Kimgo jang meliat datengnja moesoe begitoe koenjoeng-koenjoeng, tambahan kapala perangnja telah binasa dan di dalem kota lagi sedeng terbit kakaloetan, hatinja marika itoe djadi bingoeng, teroes lari sipat koeping dengen tida ada niatan boewat melawan.
Soldadnenja Hoenkangliong lantas memboeroe sambil bertreak: bahoewa orang-orang jang maoe menaloek tida nanti diboenoe, maka treakan ini membikin tentara Kimgo brentiken tindakannja, dan masing-masing lepasken sendjata sambil berloetoet, tandanja soeka menaloek pada moesoe.
Tong Wie dan Tong Beng di dalem kota ada bekerdja keras. Pendjaga-pendjaga jang maoe tjoba melawan, ia lantas boenoe, tapi jang soeka menaloek lantas dibebasken. Rahajat negri jang liat begitoe, tambahan denger pembesarnja soeda binasa, masing-masing lantas dateng menaloek dan bantoe ini orang gaga dengen sagenepnja hati.
Sasoedanja meliat jang rahajat Kimgo samoea ada di fihaknja, ini doea soedara laloe prenta itoe orang-orang taloekan bantoe pademken api, jang di waktoe fadjar baroelah itoe kabakaran djadi brenti.
Waktoe terang tana Lie Tjhoen bersama sekalian soedara-soedaranja telah sampe ka dalem kota, dan datengnja ini Twako laloe disamboet oleh itoe doea soedara, bersama sadjoembla orang jang mengikoet di blakangnja.
„Dengen tida memboewang tempo barang sakedjeb, Lie Tjoen laloe gerakin lagi tentaranja menoedjoe ka astanja Swa Liong, satelah sampe orang-orang gaga itoe laloe bikin pengepoengan dengen terbantoe oleh rahajat dan soldadoe Kimgo
Kerna Lie Tjhoen soeda denger, bagimana Swa Liong salaloe oendjoek kaboewasannja pada orang-orang partuculier, maka koelawarganja itoe pembesar semoea lantas diboenoe mati dengen tida dapet ampoen, dengen begitoe, soepaja itoe orang-orang jang bertaloek djadi merasa poewas hati. Tapi prampoean-prampoean eilok jang Swa Liong dapet rampas, semoea dikoempoelken ditanja di mana marika poenja roema, kamoedian Hoenkangliong prenta orang anterken kombali pada masing-masing poenja orang toea, soedara atawa familie.
Dengen begitoe, namanja Lie Tjhoen djadi terpoedji.
Antara itoe orang-orang prampoean moeda, banjak djoega jang berasal dari poelo Tjingsoei maka marika itoe lantas dibawa ka kapal, boeat dianteri ka itoe poelo.
Itoe hari Lie Tjhoen laloe tetepken hatinja rahajat. Dan prenta orang betoelken roemanja pendoedoek jang samalem terbakar, boeat ongkos ongkos itoe diambil dari kas Kimgo.
Kamoedian, sasoedanja dibikin papreksahan, njatalah Kimgo ini ada satoe negri jang mahmoer dan djaja betoel. Kerna semoea goedang-goedang ada barisi penoeh dengen oewang, padi, barang-barang soetra dan sabaginja.
Boeat ambil-ambil hatinja pendoedoek itoe tempat, Lie Tjhoen laloe kasi taoe pada rahajat: siapa-siapa jang roemanja terbakar, hingga miliknja toeroet djadi korban api, lekas madjoeken lapoeran dengen terangken djoemblanja, boeat diganti. Sedeng orang-orang miskin dan orang orang toea jang tida mempoenjai familie, boleh dateng trima persenan oewang, padi dan pakean.
Bagimana girang hatinja itoe rahajat di poelo terseboet, inilah tida oesah di terangken lagi. Sedeng barang-barangnja Swa Liong jang terdapet dari astananja, laloe dibagi-bagi pada itoe sakalian orang-orang prampoean jang doeloe diambil oleh Swa Liong dengen paksa. Dan kaloe orang itoe soeda poelang, barang persenannja disoeroe anterin.
Dalem itoe bebrapa hari beroentoen Lie Tjhoen dengen satoeroenja bikin pengatoeran dalem negri.
Soldadoe-soldadoe jang menaloek djoemblanja ada sariboe lebi. Semoea diganti pakeannja menoeroet sabagimana soldadoe di poelo Tjingsoei.
Dengen bantoeannja Gak Ho sigra djoega oeroesan negri bisa dibikin beres dengen tjepat. Banjak djoega orang-orang jang djadi pendoedoek aseli dari itoe poelo, diangkat ka dalem djabatan ini atawa itoe boeat bantoe oeroesannja negri.
Sasoeda itoe semoea oeroesan-oeroesan diatoer beres, atas moefakatnja sakalian Hohan jang mendjadi soedaranja, Hoenkangliong Lie Tjhoen laloe diangkat djadi Tjengtang Taygwanswe, daranja ditoelisken hoeroef Tay Song dan merk taon ditoekar Swanho kasatoe.
Kamoedian samoea rahajat di itoe poelo dateng membri slamat pada marika poenja pembesar atawa kapala, atawa boleh dianggap djoega sabagi radjanja.
Sasoedanja itoe, sakalian orang-orang gaga lantas dipakerdjaken dengen masing-masing ada mempoenjai kawadjiban sendiri, jaitoe:
- Gak Ho djadi penilik dari antero pasoekan darat dan laoet;
- Tong Wie berdoea Tong Beng djadi pemimpin atoer pendjagahan di moeloet moeara;
- Hoei Po dan Lie Hoen djadi pelindoeng barisan sajap kanan dan kiri;
- Ko Tjeng djadi pengoeroes kapal-kapal dan alat sendjata boeat paperangan;
- Tek Seng djadi pendjaga di poelo Tjingsoei;
- Khouw Gie pembantoe boeat segala oeroesan jang perloe.
Sasoedanja tetepken masing-masing poenja kawadjiban, Lie Hoen lantas dititah balik ka poelo Tjingsoei, boeat ambil Hoenkangliong dan Hoei Po poenja sakalian anak istri, bersama koelawarga Hwa dan laen-laen orang prampoean, boedjang-boedjang dan samoeanja, aken pinda ka poelo Kimgo.
Astananja Swa Liong lantas diperbaki dan tamba banjak barang-barang perabot boeat itoe sakalian koelawarga jang aken dateng tida lama kamoedian.
Begitoelah Kimgo djato ka dalem tangannja Hoenkanglioeg Lie Tjhoen.
Sabagi tanda soeka hati boeat itoe kamenangan, kaberoentoengan dan keangkatannja sabagi kapala jang mamerenta poelo Kimgo, Lie Tjhoen laloe bikin pesta besar, potong kerbo, kambing, babi ajam bebek dan ikan-ikan jang besar poen tida katinggalan.
Boekan sadja boeat orang-orang gaga, hanja soldadoe poen ada toeroet dalem itoe plesiran, jang speciaal disadiaken boeat marika dengen satoeroenja.
Pesta itoe soenggoe rame sekali. Orang makan minoem dengen sagala soeka hati dan girang, Tapi sabelonnja perdjamoean itoe sampe di achir, koenjoeng-koenjoeng dateng soldadoe pengawal jang dateng mengadep pada Hoenkangliong, dengen membawa doea orang prampoean jang berparas tjantik.
Atas pertanjahannja Lie Tjhoen, dari mana datengnja ini doea prampoean, itoe soldadoe kasi taoe: bahoewa tadi salagi marika djalan ronda, ini prampoean ada mengoempet di gegombolan jang lebat, di blakang benteng.
Itoe doea prampoean kaliatan berdiri dengen roepa katakoetan. Tapi Tong Wie dan Tong Beng jang satelah meliat padanja, lantas kenalin dan berkata:
„Oh, marika ini tida bersala, hanja haroes dibilang iaorang ada mempoenjai pahala besar pada kita."
Lie Tjhoen dan jang laen-laen djadi memandang itoe doea soedara dengen sorot matanja: Dan atas pertanjahannja Hoenkanglion, Tong Wie laloe tjeritaken, bagimana pada maleman ia mentjoeri masoek, kaloe tida ada ini doea prampoean jang kaloear, maski bagimana pinter djoega marika tentoe tida bisa masoek.
Lebi djaoe Tong Beng toetoerken bagimana lantaran ini prampoean, hingga pendjaga kota djadi alpa dalem kawadjibannja, kerna diadjak betjanda pada ini nona.
Sasoeda denger itoe katerangan, Lie Tjhoen bikin bebrapa pertanjahan pada itoe doea prampoean, jang djawabannja adalah sabagi berikoet:
Marika berdoea ada berasal dari Tiongkok, jang pada soeatoe hari, waktoe mengikoet familienja koendjoengi satoe koelawarga di laen tempat, kabetoelan katemoe Swa Liong, jang itoe waktoe djoestroe ada dateng ka negri Tjina.
Apa perloenja Swa Liong dateng ka Tiongkok itoelah marika tida taoe. Tapi Satelah katemoe, Swa Liong lantas prenta orang-orangnja reboet dan bawa marika berdoea ka kapal, jang memang ada menoenggoe di pinggir laoet. Sasampenja di ini negri. Swa Liong djadiken toekang menari boeat lajanin makan minoem. Dengen paras maloe-maloe nona itoe mengakoe, bahoewa kahormatannja telah dibikin roesak oleh itoe pembesar kaparat.
Marika soeda tinggal di ini poelo brapa taon lamanja.
Pada maleman dimana ini tempat diserang, Swa Liong panggil ia berdoea boeat melajani toewang arak dan menjanji. Kamoedian sasampenja di pintoe kota, orang pendjaga jang memang ada kenal padanja, loeloe adjak maen-maen moeloet.
— Dalem ini perkara, kata ia dengen soeara katakoetan, marika tida bersala.
Sahabisnja berkata-kata doea nona itoe berloetoet di hadepannja Hoenkangliong, minta ini pembesar baroe jang memerenta Kimgo, membri ampoen segala kadosalannja soepaja dirinja tida diboenoe.
„Kaoe tida ada berdosa," kata Lie Tjhoen dengen penoeh rasa kasian: „troesa koeatir jang dirimoe nanti terhoekoem."
Itoe nona mengoetjap banjak trima kasi.
Kamoedian Lie Tjhoen kata: lantaran Kimgo dan Tiongkok, pernahnja djaoe, sedeng sekarang tida ada orang jang bakal pergi ka itoe negri, maka ia menjesel tida bisa toeloeng anteri ini doea nona poelang ka negri sendiri, boeat katemoe kombali pada marika poenja orang toea. Maski semoea selir-selirnja Swa Liong jang itoe pembesar dapet dengen djalan merampas, telah dianterken kombali ka masing-masing poenja roema, tapi iaorang tida bisa dilakoeken begitoe.
Sekarang, maka lebi baek ini doea nona tinggal sadja di sini boeat djadi pelajannja Hwa Kiongdjin dan Tjin Kiongdjin, jang kaloe brangkali kamoedian ada jang balik ka Tiongkok, marika nanti dianterken sakalian.
„Bagimana pikiranmoe, kaloe begitoe?" tanja Hoenkangliong kamoedian.
„Hamba berdoea tida bisa berboeat laen, dari pada hatoerken banjak-banjak trima kasi atas Tjoeswe poenja boedi jang besar," saoet itoe doea orang dengen soeara berbareng.
Kamoedian Lie Tjhoen prenta Hwa Hong-tjoen anterin marika itoe pada Hwa Hoedjin ka dalem astana.
Sasoedanja itoe, perdjamoean dilandjoetken sampe hari mendjadi malem.
Orang-orang gaga jang berpahala, sambil minoem tjerita-tjerita jang menggirangken hati antara mana ada djoega jang tjeritaken Swa Liong poenja perboeatan djahat dan kadojanannja plesir pada prampoean. Maka kabinasahannja itoe pembesar kedjem, boleh terbilang ada lantaran dari ini prampoean djoega. Maka marika moesti liat itoe sabagi katja, bahoewa bagimana orang-orang paperangan, tida baek sekali kaloe tjoema inget plesir sadja.
Kamoedian perdjamoean ditoetoep, dan masing-masing poelang ka tempatnja sendiri.
Esokannja, itoe sakalian Holian jang dikaplaken oleh Lie Tjhoen, lantas berkoempoel boeat bitjaraken lebi djaoe hal-hal jang berhoeboeng dengen oeroesan negri. Soepaja bisa imbangi keadahannja pamerentahan jang doeloe didjalanken oleh Swa Liong, bebrapa orang laloe madjoeken voorstel, ada lebi baek kaloe Lie Tjhoen tanja itoe pada pendoedoek di sini. Soepaja apa jang djelek dan terlaloe keras, hingga menggantjet pada rahajat, boleh diboewang dan ganti dengen wet jang adil.
Djoega perloe ditanja bagimana tjaranja Swa Liong soeda bisa koempoelken ramsoem begitoe banjak, dan apa itoe kakajahan jang ada di goedang negri, boleh dapet dengen djalan merampas atawa boekan.
Lie Tjhoen moefakat dengen ini pikiran, maka sigra djoega dipanggil bebrapa orang jang tinggal di sini, boeat ditanja dalem itoe hal.
Itoe pendoedoek laloe tjeritaken satoe persatoe, bahoewa Swa Liong memerenta dengen zonder goenaken wet hanja djatoken sadja hoekoeman menoeroet soeka sendiri Kaloe orang-orang jang mendjadi sobat atawa familienja, maski bersala, terbebas dari hoekoeman Tapi kaloe sasamanja pendoedoek ada beriboetan, atawa terbit laen-laen perkara jang moesti dimadjoeken pada pengadilan dipoetoesken menoeroet soekanja hati. Ada jang dihoekoem mati dengen tikeman toembak, ada djoega jang tjoema didenda dengen oewang, barang permata atawa heiwan. Sedeng orang-orang jang tida mempoenjai itoe, boleh djoega membajar dengen padi atawa beras
Laen pendoedoek poen membri katerangan begitoe djoega.
Kamoedian itoe orang jang ditanja, disoeroe moendoer.
„En toeh, dengen pamerentahan jang begitoe matjem, Kimgo bisa djadi mahmoer?" kata Lie Tjhoen dengen heran.
„Itoelah salagi orang takoetin padanja," saoet Hoei Po,tapi begitoe bintangnja gelap, seande ia tida mati, rahajat boleh djadi berontak."
„Tapi kita moesti atoer pamerentahan dengen menggoenaken oendang-oendang," kata Gak Ho: „soeatoe oendang-oengang jang tida memandang sobat atawa moesoe, kaja atawa miskin, semoea moesti dihoekoem satoe roepa menoeroet boenjinja wet jang ditetepken."
„Begitoelah jang kita ingin," kata Hoenkangliong. Kamoedian Lie Tjhoen soeroe Gak Ho bikin oendang-oendang, dan ini orang gaga jang berakal boedi laloe karang boenjinja itoe wet, dari perkara-perkara jang ketjil sampe pada perkara jang besar, jang sasoeatoe roepa hoekoemannja ada ditetepken dalem boekoe wet.
Sasoedanja oendang-oendang itoe selesih dikarang, Gak Ho laloe serahken pada Lie Tjhoen, jang lantas samboeti boeat preksa.
Lie Tjhoen djadi girang meliat boenjinja itoe. Kerna boenjinja ada begitoe sampoerna, dan tentoe djoega bakal menggirangken hatinja rahajat Kimgo, kaloe ini oendang-oendang soeda moelai berlakoe.
„Sabelonnja ini wet berlakoe," kata Gak Ho: „lebi doeloe haroes disiarken, soepaja orang banjak mendapet taoe. Djoega sabagimana sakalian Hengte poenja pikiran? Tjobalah soedara-soedara oendjoek kaloe rasa ada jang terlaloe berat atawa terlaloe enteng, soepaja bisa lantas diroba?"
„Tapi ini soeda sampe baek," kata jang laen-laen: „kaloe dibandingken pada jang soeda, jang tida mempoenjai katentoean, ini toeh tjoekoep sampoerna."
Kerna semoea orang menjataken jang itoe karangan soeda baek, maka Gak Ho kata: ini wet moesti dibikinin boekoe dan djoega perloe siarken pada orang banjak, jang sekarang poenja pamerenta maoe djalanken wet bagi orang-orang jang bersala.
Lie Tjhoen toeroet itoe voorstel, jang lantas disiarken pemberian taoe tentang boenjinja itoe wet.
Salebaran itoe ringkesnja begini:
Pada sakalian pendoedoek atawa rahajat poelo Kimgo dibri taoe, bahoewa moelai pamerentahan jang baroe, diadaken wet boeat poelo Kim-go, maka orang-orang jang bersala nanti dihoekoem menoeroet boenjinja ini oendang-oendang jang telah ditetepken.
Kamoedian diseboetken sasoeatoe kasalahan atawa perboeatan jang dianggap kadjahatan, kaloe orang berboeat begini, boleh dihoekoem begini. Orang jang berboeat begitoe, aken dihoekoem begitoe. Dari perkara mentjoeri, menipoe sampe merampok. Dari perkara berklai meloekai orang, sampe pada dilakoeken pemboenoehan. Dari perkara merampas orang-orang prampoean enz. enz., semoea ada hoekoemannja. Orang jang brani lakoeken pemboenoehan, hoekoemannja poen diboenoe djoega.
Achirnja dibilang: jang ini wet didjalanken dengen tida memili orang itoe poenja kekajahan atawa kamiskinan. Orang hartawan poen kaloe brani boenoe orang jang miskin, aken dapet hoekoeman boenoe. Maski djoega pada satoe baji, hoekoemannja sama djoega. Sasoedanja plekat itoe tertempel di mana-mana tempat, rahajat negri djadi amat girang dan poedji jang Hoenkangliong ada berlakoe amat adil.
„Sekarang baroelah kita-orang poenja djiwa dan milik bisa terlindoeng betoel,“ kata itoe rahajat Kimgo pada kawan-kawannja: „begitoe orang atoer pamerentahan, baroelah boleh diseboet adil."
Begitoelah pada soeatoe hari sasoedanja itoe pembalesan taoe malakoeken, saorang hartawan jang doeloe méndjadi sobatnja Swa Liong, terbit tjidra pada satoe, toekang kajoe, lantaran pembelian kajoe.
Itoe orang hartawan jang doeloe amat galak, dan sedikit-sedikit maen poekoel sadja pada orang, itoe hari telah loepa sekarang Kimgo boekan lagi diprenta oleh sobatnja maka sasoedanja bertjektjok-tjektjok sedikit, itoe orang hartawan lantas poekoel si toekang kajoe, jang lantas djato. Kamoedian di-indjak kakempoengan, hingga binasa di sitoe djoega.
Waktoe itoe orang hartawan dihadepken pada Hoenkangliong, dengen tertawa-tertawa si persakitan akoeh teroes terang, bahoewa ia soeda abisin djiwanja itoe toekang kajoe lantaran gemas.
Sasoedanja perkara ini dipreksa, didapet kenjatahan jang pemboenoehan ini dilakoeken dengen sengadja, kerna sasoedanja orang djato, toch masi di-indjek djoega. Apapoela kataoean jang si hartawan memang pandang enteng sekali pada djiwa sasamaännja.
Sigra djoega itoe orang hartawan didjatoken hoekoeman mati, boeat ganti djiwanja si toekang kajoe.
Satelah denger itoe poetoesan, baroelah itoe orang hartawan merasa terkedjoet dan moekanja poen mendjadi poetjet, kerna lebi doeloe ia tida doega, bahoewa orang jang ada mempoenjai kakajahan sabagi dirinja, boleh dapet hoekoeman begitoe, tjoema lantaran memboenoe djiwanja orang miskin.
Soedaranja itoe orang hartawan, jang djoega biasa berlakoe sombong dan pandang renda pada rahajat jang tida mampoe, laloe dateng mintaken ampoen, soepaja itoe hoekoeman boleli diganti sadja dengen denda
Tapi Hoenkangliong tida maoe trima itoe permintahan, kerna dalem wet tida ada bilang jang hoekoeman boleh diganti dengen oewang.
Begitoelah hoekoeman didjalanken djoega.
Dengen itoe atoeran jang didjalanken tida pandang kaja atawa miskin, deradjat atawa pangkat, rahajat djadi takoet betoel, maka semoea orang boekan sadja pada girang jang itoe orang hartawan djahat dihoekoem mati, malah banjak jang poedji Lie Tjhoen telah berlakoe adil.
„Tjobalah kaloe ini negri masi ada di bawah pamerentahannja Swa Liong, tentoe itoe orang hartawan terbebas dari hoekoeman,” kata sala satoe rahajat, jang tadi telah menjaksiken itoe hoekoeman didjalanken.
„Ja, tentoe,” saoet temennja.
„Sekarang djiwanja orang kajah atawa miskin, ada sama sadja harganja,” kata poela orang jang pertama.
„Kajah atawa miskin ketjil atawa besar.”
„Inilah satoe pamerentahan jang adil”
„Inilah ada boeat kabaekan dan keslametan kita-orang, orang-orang miskin lemah dan tida berdaja.”
„Benerlah”.
Begitoelah dalem sedikit tempo sadja Hoenkangliong doedoek di itoe poelo, keadahannja Kimgo djadi banjak beroba. Prikeamanan lebi santausa dari pada jang doeloe-doeloe, hingga pendoedoek merasa girang betoel.