Sam Bin Tjoe Gie/Pridato 2

by Sun Yat Sen

— 23 —

PRIDATO 2.

Dari djeman doeloe kalah, djadi naek dan toeroennja kadoedoekan sasoeatoe bangsa ada bergantoeng banjak pada djadi besar dan djadi koerangnja djoemllah rahajat negri. Inilah jang dinamaken wet penjaring dari alam. Lantaran menoesia tida bisa kalahken itoe saroepa wet, banjak negri-negri toea dan sanget terkenal soedah moesti linjap dari ini doenia zonder tinggalken bekas-bekas. Dengen mempoenjai kasopanan jang toeanja ampat riboe taon, Tiongkok djoega bisa dinamaken satoc negri jang toeanja lima atawa anem riboe taon. Maski selamanja itoe waktoe kita-orang soedah moesti trima pengaroenja itoe wet, tapi sebaliknja dari linjap, Alam telah bikin kita djadi hidoep teroes dan tinggal moeda. Kita-orang telah bertamba djadi ampat ratoes millioen dan sampe ini sa'at masi teritoeng negri jang mempoenjai rahajat paling padet dan daerah paling loeas; kita- orang telah trima berkahnja Alam lebih banjak dari laen-laen negri, maka sesoedah berkerdja, bergerak, dan beroba lamanja ampat riboe taon, kita dapetken bahoea kita poenja kasopanan selaloe merajap madjoe dan kita poenja bangsa tinggal berdjiwa. Sesoedah djeman toetoep djeman, kita-orang toch tinggal djadi doenia poenja bangsa jang paling sopan. Dari itoe ada sebagian orang jang bilang bahoea bangsa Tionghoa tida aken djadi linjap maski begimana djoega lantaran kaoeletan menahan sengsara. Ini matjem obrolan akoe anggep kliroe. Kaloe tjoema wet penjaring dari alam jang paling berkwasa kita-orang poenja bangsa tida terlaloe soesa boeat hidoep; tapi peroba'an (evolutie) didoenia tida tjoema bergantoeng pada tenaga alam, kerna tenaga menoesia tida boleh tida ada disitoe. Tenaga menoesia bisa gantiken tenaga alam dan ,perkerdja'an menoesia alahken Alam". Jang paling berpengaroe antara berbagi-bagi tenaga menoesia adalah tenaga politiek dan economie. Marika poenja pengaroe atas berdiri dan djatonja sasoeatoe bangsa ada lebih besar dari tenaga Alam, dan kita poenja bangsa boekan sadja soedah moesti rasaken gentjetannja itoe doea matjem tenaga tapi soedah moesti djadi terbenem djoega dalem kadjahatan kadjahatan.

Tiongkok soedah doea kali diringkoes oleh pengaroe politiek bangsa Mongool dan bangsa Boantjioe. Tapi kita soedah beroentoeng bisa telen itoe doea bangsa dalem kabangsa'an Tiong

— 24 —

hoa, kerna marika ada negri-negri jang mempoenjai djoembla lebih ketjil dari kita-orang. Dari itoe bangsa Tionghoa djadi tida roegi apa-apa maski soedah doea kali dibelenggoe. Tapi kita poenja kadoedoekan terhadep pada Negri-negri Besar jang sekarang ada sanget berlaenan sekaU dari jang doeloe-doeloe. Dalem akoe poenja pridato jang doeloean, akoe telah bandingken djoembla pendoedoek jang bertamba diantara itoe Negri-negri Besar dalem tempo satoe abad jang laloe. Engeland dan Rusland beroleh 300 dan 400 percent; 1000 percent. Kaloe diliat dari bertambahnja kita poenja pendoedoek negri dalem tempo satoe abad jang laloe, kita poenja bangsa tida mampoe bertamba besarnja sama seperti jang terdjadi pada laen-laen negri dalem abad jang mendatengi, sekalipoen aken bantoe kita dengen tjara bagimana. Oepama pendoedoek Amerika Sariket satoe abad jang laloe berdjoembla tida melebihi sembilan millioen; aken tetapi sekarang soedah djadi naek sampe saratoes millioen lebih dan dalem tempo satoe abad bakal berobah djadi sariboe millioen. Pendoedoek Engeland, Duitschland, Rusland, dan Japan bakal naek djoemblanja dcngen berlipct ganda. Kaloe kita goenaken itoe matjem perbandingan, tida bisa disangkal bahoea kita-orang poenja bangsa bakal djadi lebih ketjil dan laen-laen bangsa djadi lebih besar dalem tempo satoe abad jang bakal dateng. Nah, sekalipoen kita tida dapet gentjetan politiek dan economie dan beroba tjoema menoeroet maoenja alam, bangsa Tionghoa toch bakal djadi moesna djoega, apa lagi kaloe kita inget jang kita moesti dipaleh oleh tenaga-tenaga politiek dan economie, jang bikin peroba'an sanget tjepet dan keras.

Maski tenaga alam berkerdja lambat, tapi sasoeatoe bangsa bisa djadi linjap lantaran itoe. Tjonto-tjonto jang menjolok mata bisa didapetken diantara bangsa-bangsa berwarna merah di Amerika Oetara dan Selatan pada kira-kira saratoes taon jang laloe. Doea atawa tiga ratoes taon jang laloe, Amerika tjoema djadi tempat tinggalnja bangsa-bangsa priboemi jang berwarna merah. Marika hidoep terpentjar di'itoe negri jang loeas, tapi sesoedahnja bangsa koelit poeti menerobos masoek, marika plahan-plahan djadi linjap dengen lambat dan achirnja djadi habis sama sekali. Disini kita liat bahoea djalannja natuur ada bikin moesna bangsa besar.

Tapi kakoeatan politiek dan economie berkerdja lebih tjepet dari pada kakoeatan alam dan bisa dengen gampang habisken

— 25 —

satoe bangsa besar. Tiongkok, kaloe tjoema dipengaroeken oleh kakoeatan alam, bisa teroes berdiri boeat laen abad; tapi ia sekarang ada dipentjet oleh kakoeatan politiek dan economie, hingga ia melarat sekali bilah bisa hidoep sapoeloe taon lagi. Dari itoe laen sapoeloe taon ada waktoe crisis boeat Tiongkok. Kaloe dalem itoe periode kita bisa tjari djalan boeat merdikaken. Tiongkok dari pemboedakan politiek dan economie, baroelah kita poenja bangsa ada poenja djoega kans boeat hidoep bersama-sama laen bangsa; kaloe tida, kita ada ditakdirken boeat dimoesnaken oleh orang-orang dari mogenheden. Dan kaloe semoeanja tida habis dengen ini djalan, disitoe masi ada kakoeatan natuur jang aken sapoe kita kaloear dari penghidoepan. Dari sekarang kita orang Tionghoa aken rasaken itoe gentjetan dengen berbareng dari kakoeatan natuur, politiek dan economie. Kaoe bisa liat ini waktoe betoel-betoel ada waktoe crisis dari kita poenja kabangsa'an!

Tiongkok soedah satoe abad berada dibawa kakoeasa'annja bangsa barat; sebelonnja ini sa'at, kapan bangsa Boan sedeng tjekel kita dalem tangannja, negri kita sedeng koeatnja. Engeland itoe masa sedeng taloekken India dan tida brani boeat tjoba taloekken Tiongkok sebab takoet jang Tiongkok aken tjoba boeat adoek-adoek India. Tapi dalem abad jang laloe Tiongkok telah kahilangan djadja'an jang boekan ketjil. Moelahi sadja dengen hikajat jang baroe liwat: kita telah kahilangan Weihaiwei, Port Arthur, Dairen, Tsingtau, Kowloon, Kwangchowwan. Sesoedahnja Perang Doenia, mogenheden pikir boeat poelangken berapa concessie dan kasi balik Tsingtau dan paling blakang Weihaiwei. Tapi ini tjoema bagian jang ketjil. Mogenheden poenja halocan docloean ada koerang lebih begini: sebab

Tiongkok tida aken tersedar dari tidoernja jang njenjak dan tida betjoes boeat kendaliken dirinja, iaorang ingin doedoeken poesat-poesat disepandjang pasisir seperti Dairen, Weihaiwei, dan Kowloon sebagi teki boeat ,belah" Tiongkok. Kemoedian revolutie petja di Tiongkok, mogenheden mendapet taoe bahoea Tiongkok masi ada napasnja, dan oeroengken, djoega achirnja, itoe ingetan boeat poekang Tiongkok. Kapan mogenheden sedang intjerken matanja jang temaha atas Tiongkok, ada berapa kaoemjang anti revolutic kata bahoea revolutie tjoema mengoendang pemetja'an belah; tapi hasilnja ada sebaliknja, revolutie telah hindarken daja boesoek dari bangsa asing atas dirinja Tiongkok.

— 26 —

Kapan kita preksa hikajat terlebih djaoe, kita poenja kahilangan djadja'an ada termasoek Korea, Taiwan (Formosa), poelo-poelo Percadores, dan tempat bagitoean, jang, sebagi achirnja dari Perang Tiongkok-Japan, telah diserahken pada Japan. Adalah ini peperangan jang mendjadi pembitjara'an permoelahan dari „pemoekangan Tiongkok” diantara mogenheden.

Bilah kita berpaling ka'abad itoe terlebih djaoe, kita telah kahilangan Burma dan Annam. Tiongkok sebetoelnja ada bikin sedikit oppositie pada waktoe Annam diserahken. Dalem pe­perangan di Chen-nan-kuan Tiongkok sebetoelnja berada dâlem kamenangan tapi soedah digertak oleh Frankrijk begitoe roepa hingga ia adaken perdamian dan soedah kepaksa serahken Annam pada Frankrijk. Tjoema brapa hari sebelonnja itoe per­damian balatentara Tiongkok telah dapet kamenangan di Liangshan dan ampir basmiken seanteronja balatentara dari Frankrijk. Kapan Tiongkok ikoetken ini kamenangan dengen meminta dami, bangsa Fransch soedah djadi sanget kaget, dan ada jang kata; „Sesoenggoenja tida bisa ditebak apa jang kaoe-orang Tionghoa bisa berboeat. Soedah djadi kabiasa'an dari dahoeloe kalah bangsa jang menang aken sombongken kamenangannja dan meminta djadja'an dan oewang karoegian dari itoe bangsa jang dialahken; kaoe dalem sa'at kamenangan telah serahken dja­dja'an, mëminta dami, telah kasi Annam pada Frankrijk, dan trima segala roepa-roepa djenis conditie-conditie jang pintjang!” Alesan boeat ini pemetja'an dari kabiasa'an oemoem dalem hi­kajat jang diperboeat oleh satoe bangsa jang menang perang sesoenggoenja ada kagoblokannja pemerenta Boan. Annam dan Burma doeloenja doea-doea ada djadja'an Tiongkok; sebegitoe lekas Annam telah diserahken pada Frankrijk, Engeland doedoekken Burma, dan Tiongkok tida brani boeat protest. Ka­hilangan djadja'an jang lebih doeloe lagi ada itoe tanah-tanah jang dialirken oleh soengei Amir dan Ussuri dan sebelonnja itoe bagian-bagian disebla oetara dari soengei Ili, Khokand, dan Amur — itoe djadja'an dari Far Eastern Republic jang baroe berdiri — semoeanja Tiongkok telah serahken dengen mendakop tangan pada bangsa asing dengen zonder satoe oetjapan boeat menegor. Lebih djaoe ada brapa negri ketjil jang sawaktoe ada bajar oepeti pada Tiongkok — Poelo Loochoo, Siam, Borneo,

Sulu Archipel, Java, Ceylon, Nepal, Bhutan.

—27—

Waktoe Tiongkok sedeng berkwasa, djadja'an dari Karadja'an Tiongkok ada sänget loewas, kaoetara sampe pada sebla oetaranja dari Soengei Amur, kaselatan sampe pada sebla selatannja goenoeng Himalaja, katimoer sampe pada Laoetan Tiongkok, kabarat sampe pada rerotan goenoeng T'sung Lin. Nepal dalem taon pertama dari Republic Tiongkok masi soeka bawaken oepeti ka Szech-wan, dan kamoedian brenti sebab tida bisa liwatken djalanan-djalanan jang mendjoeroes ka Tibet. Kapan Tiongkok sedeng koeat, iapoenja kakoewasa'an politiek membikin keder pada semoea fihak, dan tida ada satoe bangsa disebla selatan dan barat dari binoea Tiongkok jang tida pikir bahoea itoe ada satoe kahormatan boeat beriken oepeti padanja. Itoe waktoe imperialisme dari bangsa barat belon masoek ka binoea Asia, dan negri satoe-satoenja jang haroes diseboet imperialistic ada Tiongkok. Bangsa-bangsa jang lema'an dan lebih ketjil ada takoet sama Tiongkok dan iapoenja taloekan politiek dan sehingga ini hari masi teroes tjoerigaken padanja. Kapan kita adaken Conferentie Kuomintang baroe ini di Canton, Mongolia telah kirim delegatie boeat intip apa Canton Govern ment masi teroesken itoe tradie imperialistic terhadep pada laen-Iaen negri. Kapan marika soedah liat bahoea principe politiek jang digoenaken oleh itoe conferentie boekannja berhaloean imperialistic, tapi berfihak pada bangsa jang lebih ketjil dan lemah marikà dengen segala senang hati teeken akoer dan voorstel pada semoea jang bergandeng tangan boeat diriken satoe bangsa jang besar di Timoer djaoe. Tapi boekan Mongolia sadja, tapi semoea bangsa ketjil-ketjil di Timoer ada setoedjoe betoel pada kita poenja haloean. Sekarang negri-negri barat sedeng iles-ilesin. Tiongkok dengen marika poenja imperialisme dan kakoeatan economie, hingga Tiongkok poenja tanah dja­dja'an dengen plahan djadi semingkin ketjil, dan biarpoen dalem itoe delapan blas provincie ia telah serahken brapa tempat-tempat.

Sesoedahnja Revolutie, mogenheden baroe taoe bahoea sebetoelnja ada sanget soeker aken bikin petja belah Tiongkok dengen kakoeatan politiek. Satoe Tiongkok jang telah jakinken dengen tjara bagimana boeat berontak dari kakwasa'annja bangsa Boan aken satoe hari tegen kakwasa'an politiek dari marika. Kerna ini aken taro marika kadalem ka'ada'an jang

soeker, marika sekarang tjoba boeat ringanken marika poenja

— 28 —

pergerakan politiek terhadep pada Tiongkok dan sekarang sedeng goenaken gentjetan economie sebagi gantinja boeat taloekken kita. Marika pikir bahoea dengen tida goenaken politiek dalem pemoekangan, Tiongkok aken laloeken saling tjeker diantara mogenheden, tapi biarpoen saling boenoe di Tiongkok bisa dilaloeken di Tiongkok tapi tida bagitoe di Europa. Soeal Balkan telah djadi lelatoenja dari api peperangan Doenia, dan biarpoen bangsa-bangsa barat telah kahilangan kasoekeran jang heibat, dan negri-negri seperti Duitschland dan Oostenrijk telah bisa dikalahken, tapi dalem haloean imperialistic tida ada peroba'an apa-apa. Engeland, dan Italie masi sadja landjoetken imperialisme, sementara U. S. A. dengen boeang kasamping Monroe Doctrine tjoba boeat djalan berendeng sama marika. Dan maskipoen, sesoedahnja pengalaman dari pepe­rangan, marika boleh djadi toenda marika poenja haloean imperialistic boeat sementara waktoe di Europa, terhadep Tiong­kok, sabagimana orang bisa saksikan dari itoe demonstratie di Canton dari brapa poeloe kapal-kapal perang dari berbagi-bagi negri asing, belon ada peroba'an dalem marika poenja hati. Marika masi sadja goenaken imperialisme goena kamoekaken marika poenja daja economie, dan gentjetan economie ada lebih heibat dari pada imperialisme atawa gentjetan politiek. Gentjetan politiek ada hal jang kaliatan; kapan itoe brapa poeloe kapal perang asing bikin demonstratie disini, orang-orang di Canton boekan maen goesarnja, ja semoea bangsa Tionghoa merasa goesar. Rahajat negri dengen gampang dibikin panas oleh gen­tjetan politiek tapi marika ampir tida mendoesin gentjetannja economie. Tiongkok telah rasaken poeloean taon dari taloekannja economie dari bangsa-bangsa asing dan tida ada satoe manoesia jang rasaken goesar sama sekali.

Hasilnja jaitoe Tiongkok dimana-mana orang dapetken satoe djadja'an dari bangsa asing. Rahajat negri masi sadja pikir bahoea kita-orang tjoema ada negri „separo djadja'an" dan me­rasa tjoekoep dengen itoe gelaran, tapi sesoenggoenja kita ada digentjet oleh kakoeatan dari economie dari bangsa asing lebih besar dan heibat dari pada bilah kita poenja negri ada satoe tanah djadja'an sedjati. Ibarat, Annam dan Korea ada negri taloekan dari Frankrijk dan Japan dan marika poenja rahajat ada boedak-boedak. Kita djengekken bangsa Korea dan Annam

dengen djeloesken marika „wang-kou-nu" (boedak jang negrinja

— 29 —

soedah moesna), tapi kaloe meliat ka'ada'annja sendiri kita roepanja tida merasa bahoea ka'ada'an kita ada lebih bawa daripada marika. „Separo-djadja'an" siapa adanja Tiongkok? Tiong­kok ada djadja'annja dari saban natie jang telah bikin tractaat sama ia, dan itoe negri-negri sama siapa Tiongkok ada bikin tractaat ada Tiongkok poenja Jang Dipertoean. Tiongkok boekannja ada djadja'an dari satoe natie tapi dari semoea, dan kita boekan boedaknja satoe natie tapi dari semoea. Mana lebih baek, djadi boedak dari satoe natie atawa dari banjak natie­ natie? Kaloe kita ada boedak dari satoe natie, dan kaloe ada bahaja natuur, seperti bahaja bandjir atawa moesin kering, djato pada Tiongkok, itoe natie jang dipertoean aken tjoba dapetken fonds boeat ringanken itoe kasoesa'an sebagi satoe kawadjiban dan bagi-bagi itoe fonds diantara kita, sementara bangsa jang ditaloekken aken harep-harep ini pertoeloengan dari marika poenja Toean. Kapan, brapa taon berselang, Tiongkok oetara telah alamken satoe bahaja natuur jang bangsa-bangsa asing tida merasa jang marika ada kawadjiban apa-apa boeat kirim pertoeloengan, dan tjoema itoe brapa bangsa asing jang perna tinggal di Tiongkok jang poengoet derma'an goena ringanken itoe orang-orang jang menanggoeng kasengsara'an, dan orang Tionghoa jang meliat begitoe kata bahoea bangsa asing betoel dermawan sementara sebetoelnja marika poenja perlakoean pada kita masi terlaloe djaoe bilah dibandingken dengen apa jang negri jang dipertoean aken perlakoeken negri taloekan dalem itoe soeal! Ini ada mengoendjoeki bahoea kita masi tida bisa brendeng sama bangsa Annam dan Korea dan menaloek pada satoe mogenheid kadoedoekannja ada djaoe lebih tinggi dan lebih berfaeda dari pada menaloek pada banjak-banjak bangsa. Dari itoe „Separo-djadja'an" boekan panggilan jang betoel boeat Tiongkok; saja pikir kita haroes panggil Tiongkok satoe „hypocolony". Itoe perkata'an „hypo" ada diambil dari ilmoe pisa, seperti perkata'an „hypophosphite". Satoe chemical jang poenja clement phosporic compound ada dipanggil phosphorous com­pound. Jang lebih bawa dari compound ada dipanggil satoe hypophosphorous compound, seperti djoega satoe organisatie ada poenjaken djoega tingkatan jang kedoea. Moelah-moelah kita pikir Tiongkok ada satoe negri semicolony, separo djadja'an dan

itoe soedah tjoekoep bikin kita maloe. Helas, kita tida taoe

— 30 —

bahoca kita poenja kadoedoekan ada lebih renda dari Annam dan Korea. Kita boekannja semicolony tapi hypo-colony.

Ada satoe pergoeletan di Kwangtung dengen bangsa asing berhoeboeng dengen oewang kalebihan bea. Oewang kalebihan bea sebetoelnja ada banda kita jang sedjati, kenapa kita moestiriboetken? Kerna Tiongkok poenja customs telah diambil over oleh laen-laen bangsa. Ada satoe koetika kapan kita tida taoe apa-apa tentang mäksoednja customs; kita tjoema toetoep plaboean-plaboean kita dan hidoep sendiri. Kamoedian Engeland dateng ka Tiongkok dan tjoba masoek berdagang; Tiongkok toetoepken pintoe dan tolak kadatengannja. Dengen kakoeatan imperialisme dan economie tergaboeng Engeland tjoba boeka dengen paksa itoe halangan-halangan dan pentang Tiongkok poenja pintoe-pintoe jang beroepa plaboean. Di'itoe sa'at djoega balatentara Inggris doedoekken Canton, tapi dapetken Canton tida gampang dibelahken, marika oendoerken diri dan ambil poelo Hongkong. Marika djoega minta oewang karoegian, tapi sebab Tiongkok tida ada poenja oewang sedia boeat bajar, ia kasi sadja maritime customs pada Engeland sebagi satoe tanggoengan dan idjinken Engeland boeat trimaken bea-beanja, pemerenta Boan soedah hitoeng bahoea boeat bisa bajar penoe aken mengambil terlaloe banjak tempo, tapi bangsa Inggris, sesoedahnja dapetken control atas Tiongkok poenja customs, telah bikin terprandjat bangsa Boan dengen bajarken pada dirinja dalem brapa taon itoe oewang karoegian dari oewang bea; pemerenta Boan baroe taoe brapa boesoek marika poenja amb­tenaar. Kalema'an jang paling besar dari penerima'an bea doeloe-doeloe adalah kabanjakan ditjapplok oleh ambtenaar-ambtenaar sendiri. Dari itoe maritime customs dari saloeroe negri diserahken boeat bangsa Inggris oeroes dan bangsa Inggris jang dipili boeat djadi commissioner dari customs. Kamoedian, laen-laen bangsa jang berniaga sama Tiongkok tida tjotjok pikiran sama Engeland berhoeboeng dengen controlan dari customs, dan Enge­land compromis dengen bagiken marika sebagian dalem kaangkatan menoeroet besar ketjilnja marika poenja perdagangan. Hasilnja, Tiongkok poenja maritime customs sekarang semoeanja berada dalem tangannja bangsa asing. Saban tractaat baroe jang Tiongkok bikin dengen satoe bangsa asing bermaksoed kahilangan dari satoe roepa dan itoe hal jang dikasiken dalem

itoe tractaat ada selamanja memberat sebelah. Tarief bea ada

— 31 —

ditetepken oleh bangsa asing dan Tiongkok tida merdika boeat toekar marika; Tiongkok tida bisa trimaken dan goenaken ia sendiri poenja bea— inilah ada sebab-sebabnja boeat itoe pergoeletan atas customs.

Nou, bagimanatah lacn negri laloeken gentjetan economie asing dan tjoba halangken pemasoekan kakoeatan economie dariloear? — kabanjakan dengen perantara'an dari tarief bea jang lindoengken kamadjoean economie dalem itoe negri-negri. Sebagimana djoega itoe bentengan dibikin dimoeloetnja satoe plaboean goena djaga masoeknja balatentara bangsa asing, bagitoelah tarief bea goenaken boeat tentangken barang-barang asing goena lindoengken revenuenja satoe bangsa dan kasiken koetika boeat industries dari priboemi boeat djadi madjoe. Ambil satoe peroepama'an, U. S. A., sesoedahnja basmiken bangsa Indian merah, moelahi boeka perniaga'an dengen negri-negri di Europa. Itoe waktoe U.S.A. ada satoe bangsa agricultural, sementara bangsa Europa ada bangsa industrialized. Kerna dalem international trade satoe industrial nation ada poenja kaoentoengan atas satoe natie jang agricultural, U.S.A. pasang satoe tarief pelindoeng boeat lindoengken iapoenja industrie dan trade priboemi. Maksoednja satoe tarief bea pelindoeng adalah aken kenaken bea jang berat atas barang-barang import : kaloe satoe artikel import ada berharga saratoes dollar, doaune aken kenakken, taro kata delapan atawa saratoes dollar. Poekoel rata tarief bea dari berbagi-bagi negri ada lima atawa anem poeloe percent dari harganja barang. Bea tinggi aken bikin barang asing mendjadi berharga mahal hingga itoe barang tida gampang boeat meradjelelah, sementara barang priboemi jang tida dikenaken apa-apa harganja ada sanget pantes dan tersebar dengen loeas.

Bagimana dengen ka'ada'an jang sekarang dari Tiongkok? Sebelonnja Tiongkok berdagang dengen bangsa asing, barang jang digoenakén oleh orang Tionghoa ada dikerdjaken dengen tangan. Itoe perkata'an koeno „lelaki meloekoe dan prempoean menenoen" ada hoendjoekken bahoea agriculture dan pembikinan kaen ada industrie toea dari Tiongkok. Barang-barang asing moelahi masoek. Kerna tarief bea ada bagitoe renda, kaen asing

ada lebih moerah dari kaen Tiongkok. Terlebih poelah sebagian dari rahajat lebih soeka pada kaen asing dari pada kaen bikinan sendiri, industrie anak negri djadi loedes. Dengen loedesnja in­dustrie priboemi dengen tangan, banjak orang djadi bo-tauw-lo

— 32 —

dan glandangan. Ini ada hasilnja dari gentjetan economie asing. Sekarang biarpoen Tiongkok masi lakoeken tenoenan tangan, materiaal jang digoenaken ada katoen asing. Tjoema dalem taontaon jang blakangan katoen Tiongkok digoenaken dalem pem­bikinan kaen. Di Shanghai ada brapa banjak fabriek kaen dan katoen jang bisa bikin kita dengen plahan saingken barang-barang jang di import, kaloe sadja tarief bea tida lagi didalem tangannja orang asing. Boekan sadja kaen bikinan priboemi ada dikenahken dengen bea export jang tinggi, tapi kapan diselebarken didalem negri sendiri ia dikenahken bea likin jang berat. Dus Tiongkok boekan sadja tida poenja tarief jang melindoengin, tapi ia sama djoega naekkin tarief bea atas barang-barang boeatan sendiri sebagi lindoengin pada barang-barang asing! Diwaktoe Perang Doenia, kapan negri asing tida bisa bikin barang-barang boeat di export ka Tiongkok, fabriek katoen dan kaen di Shanghai ada rasaken kamadjoean boeat sementara waktoe. Kaoentoengan besar telah dibikin, dan dividend dari 100 percent telah dibagi, dan kapitalist djadi bertamba. Tapi sesoedahnja perang barang-barang asing kombali bandjirken pasar di Tiongkok dan fabriek di Shanghai jang soedah bagitoe madjoe telah djadi djato hoetang. Selagi barang-barang priboemi ada sedeng bergoelet dengen barang-barang asing, Tiongkok poenja customs boekan sadja tida beri pertoéloengan tapi melindoengi pedagang asing! Ini sama djoega kita gali trench dan boekan sadja tida bisa goenaken itoe boeat tolak moesoe poenja madjoe tapi dapetken moesoe goenaken itoe boeat kasi labrakan pada kita. Dari itoe, akoe brani kata, gentjetan politiek gampang diliat dengen njata oleh goendoekan jang paling goblok, tapi gentjetan economie ada satoe hal jang soelit jang tida ada satoe hari kita bisa dengen gampang liat itoe. Orang bisa djoega kasiken moeatan jang berat pada diri sendiri.

Sedari Tiongkok boeka perniaga'an dengen bangsa asing, itoe perdagangan telah menoemboe bagitoe besar ibarat toeroennja aliran dikali sa'abisnja hoedjan. Sapoeloe taon doeloe, pemereksa'an ada hoendjoek bahoea itoe balans ada berdjoembla $ 200,000,000. Dari rapport customs baroe kita dapetken bahoea dalem taon 1921 import telah melebihi export dengen sadjoembla dari $ 500,000,000, 250 percent, lebih tinggi dalem tempo sapoeloe taon. Dengen ini rekenan, sesoedahnja liwat sapoeloe taon lagi djoemblanja aken bertamba djadi $ 1,250,000,000. Dengen laen perkata'an, sapoeloe taon lagi Tiongkok aken membajar satoe djoembla dari $ 1,250,000,000 pada bangsa asing dalem perdagangan sadja. Soenggoe satoe djoembla jang boekan ketjil lelah molos dari tangan kita!

Kamoedian itoe gentjetan economie dari bank asing. Orang Tionghoa poenja psychologie sekarang adalah tida maoe pertjaja pada bank Tionghoa aseli dan sanget pertjaja pada bank asing. Di Kwangtung, saoepama, bank asing ada sanget boleh dipertjaja, sementara bank Tionghoa tida sama sekali bangoenken kapertjaja'an. Doeloean oewang kertas jang dikaloearken oleh kita poenja Kwangtung Provincial Bank bisa djoega diselebarken dan digoenaken, tapi sekarang tida ada berharga sama sekali dan sekarang kita tjoema goenaken oewang perak. Bank­ biljet Tionghoa selamanja ditaro lebih renda dari pada Bank­ biljet asing, tapi sekarang biarpoen oewang perak Tionghoa ber­harga lebih renda dari pada oewang kertas asing. Ini hari djoembla dari bankbiljet asing jang diselebarken di Kwangtung koerang-lebih ada sapoeloe millioen. Ada lagi orang jang sanget ingin poenjaken oewang kertas asing dari pada oewang perak Tionghoa. Di Shanghai, Tientsin, Hankow, dan laen-laen plaboean kita dapetken conditie jang bersama'an. Dan kapan kita jakinken alesannja kita nanti dapetken bahoea rahajat negri telah diratjoenken dengen tjekelan economie asing atas diri marika. Kita soedah djadi biasa pikir bahoea bangsa asing ada kaja dan kita tida pikir bahoea ia sedang lakoeken kertas boeat kita poenja barang-barang. Bangsa asing tida poenjaken banjak oewang moelah-moelah ; semoea dari kakaja'annja teroetama telah dikasiken padanja oleh kita orang. Marika tjoema perloe boeat tjitak dan kaloearken brapa millioen bankbiljet jang kita lakoeken dan kamoedian marika poenja millioenan dollar boeat goenaken. Sala-satoe bankbiljet jang ditjitak dan dikaloearken oleh bangsa asing berharga tida lebih brapa cent boeat menjitaknja, tapi itoe selembar kertas ada distempel dengen harga dari satoe, sapoeloe, atawa saratoes dollar. Dus bangsa asing dengen ongkost jang paling ringan bisa tjitak millioen-millioenan dollar kertas dan bisa toekarken ini kertas dengen millioen-millioenan dollar poenja harga dari kita poenja barang-barang. Toean-toean, tidakah ini ada satoe kahilangan jang sanget menakoeti ?

Dan sebabnja marika bisa kaloearken oewang kertas dengen ini djalan dan kita tida bisa ada disebabken jang rahajat Tiongkok

— 34 —

telah diratjoenken dengan pangaroe dari gentjetan economie asing boeat pertjajaken bangsa asing dan tida pertjaja diri sendiri, dengen hasilnja jang oewang kertas sendiri tida bisa diselebarken.

Selaennja dari pada bankbiljet asing, adalah lagi bank exchange. Kita orang Tionghoa jang tinggal diplaboean pertjaja bank asing djoega dalem penoekaran dari kita poenja oewang. Tapi, dengen bikin exchange goena orang Tionghoa, bangsa asing boekan sadja kenaken commissie biasa dari bank dari satenga percent tapi djoega dapetken kaoentoengan dengen laen djalan. Kapan kita beli satoe bankwissel, ia kenaken disconto atas exchange dari tael kadollar dan itoe kahilangan dari dis­conto ditempat sipengirim dan ditempat sipenerima ada berdjoembla doea atawa tiga percent paling sedikitnja. Saoepama, kaloe satoe bank asing di Kwangtung bikin satoe bankwissel atas Shanghai boeat $ 10.000 ia kenaken $ 500; salaennja ini dalem penoekaran oewang perak ketjil djadi Shanghai tael ia selamanja taro harga boeat Kwangtung poenja oewang perak ketjil lebih renda dan Shanghai tael lebih tinggi dan dapetken oentoeng, menoeroet marika sendiri poenja hitoengan, paling sedikit saratoes sampe doea ratoes dollars. Dengen mengirim $ 10.000 poelang-pegi diantara Canton dan Shanghai karoegian boeat sakali kirim ada doea atawa tiga ratoes dollar; dalem tida lebih tiga poeloe penarikan wissel itoe djoembla soedah ketelen semoeanja oleh bank itoe! Sebabnja kenapa orang Tiong­hoa masi soeka biarken ini kahilangan adalah kerna marika soedah diratjoenken dengen gentjetan economie bangsa asing.

Kakwasa'annja bank asing di Tiongkok bisa diliat njata dari marika poenja bank deposito. Kaloe satoe orang Tionghoa ada poenja oewang dan ingin taro disatoe bank, ia tida maoe taoe apa bank Tionghoa ada poenja kapitaal besar atawa ketjil ada kasi renten tinggi atawa renda. Bagitoe lekas ia taoe bahoea itoe bank ada dikendaliken oleh orang Tionghoa, ia lantes rasahken jang taro oewang disitoe tida bagitoe safe, dan kerna itoe ia tida maoe taro oewang disitoe. Ia tida maoe taoe apa bank asing boleh diandelken atawa tida, apa ia bajar renten tinggi atawa renda; bagitoe ia denger bahoea itoe bank ada bank asing dan ada gatoeng merk asing, ia lantes rasa taro oewang disitoe ada slamat, dan betoel-betoel ia taro oewang disitoe. Biarpoen rentennja ada sanget ketjil, ia merasa tjoekoep.

— 35 —

Satoe kadjadian jang loear biasa tertampak dalem taon 1911. Sasoedahnja gerakan Revolution dimoelahi di Wuchang, ampir samoea anggota dari kaoem kaloearga bangsawan dari bangsa Boan dan ambtenaarnja, merasa djeri jang itoe Revolution aken bermaksoed merampas harta bandanja, taro semoea barang mas, perak dan laen-laen barang berharga dalem berbagi-bagi bank asing. Marika ada sanget senang boeat tida dapet renten apa-apa sabagitoe djaoe bangsa asing trima marika poenja deposito. Koetika balatentara Boan telah dikalahken oleh balatentara Revolution di Wu-han, bank asing dan Legation Quarter di Peking trima deposito dari mas, perak dan laen-laen barang berharga dalem djoembla jang tida kahitoeng dari bangsa Boan sahingga marika djadi kabandjiran dengen oewang dan tida ada poenja tempat lagi boeat taro. Boekan sadja bank asing tida bajar deposito renten tapi djoega kenaken marika ongkos simpennja itoe oewang di marika poenja bank. Apa jang depositor ingin adalah bank asing boeat trima sadja apa jang dititipken, dan marika bajar apa jang bank asing minta. Bank asing di itoe koetika ada trima deposito bangsa Tionghoa satoe djoembla dari doea belas billion dollar. Biarpoen ada sekian dari ini soedah ditarik poelang, tapi dalem tempo sapoeloe atawa lebih taon satoe goendoekan dari kaoem military dan ambtenaar, seperti Feng Kuo-Chang, Wang Chan-yuan, Li Shun, dan Tsao Kun, telah pentjet dari kas negri dan masing-masing telah dapetken satoe kakaja'an jang tida halal dari barangkali sapoeloe millioen. Sebab marika ingin jang itoe harta jang tida halal bisa djadi poenjanja boeat selamanja, marika, poen, taro oewangnja di Bank asing. Dari itoe sedari taon 1911 boleh dikata tida ada penamba'an atawa pengoerangan dari itoe djoembla jang bangsa Tionghoa ada taro deposito di bank asing. Rentennja jang bank asing bajar boeat ini doea belas billion deposito ada sanget ketjil sekali, boleh dikata tida dari ampat atawa lima percent, semen­ tara itoe bank kapan kasi pindjem oewang dari itoe djoembla pada handelaar ketjil di Tiongkok dengen renten sataon, dari toedjoe sampe lebih dari sapoeloe percent. Dus bank asing, dengen zonder soesa lagi selaennja poeterkcn itoe oewang, telah ambil kapitaal Tionghoa dan dapetken renten dari sitoe.

Itoe kaoentoengan taonan jang bermillioenan dari orang Tionghoa poenja deposito dalem bank asing ada satoe kahilangan

jang tida kaliatan. Alesannja penaroan oewang dari orang biasa

— 36 —

dalem bank asing adalah iapoenja pengrasa'an bahoea bank Tionghoa tida sentaosa, sementara bank asing ada sebaliknja. Ia tida takoet bahoea bank asing bisa bankroet tapi, tjoba bilang, boekankah Banque Industrille de Chine, jang telah anglap depositonja bangsa Tionghoa jang ditaro disitoe, ada bank asing of tida? Apa bank asing semoeanja boleh dipertjaja? Kaloe tida, kenapa kita orang Tionghoa niasi sadja berlangganan sama iaorang bagitoe soenggoe-soenggoe dan bernapsoe? Alesan boeat itoe kahilangan renten pada bangsa asing djoega ada pengaroe jang beratjoen dari gentjetan economie bangsa asing. Kaoentoengan dari bank asing semoeanja sadja, dalem pengeloearan oewang kertas, dalem penoekaran oewang dan deposito, moesti ada koerang-lebih $ 100.000.000 sataonnja.

Selaennja bagitoe bank asing, ada lagi tarief vracht. Barang Tiongkok jang dikirim kaloear negri moesti bergantoeng pada kapal asing, dan biarpoen barang jang dikirim kadalem negri sendiri, seperti Hankow, Changsha, dan Canton, ada diangkoet kabanjakan oleh kapal asing. Peroesa'an kapal Japan telah bisa hidoep soeboer dalem sedikit taon. Japan pada bermoelah tjoema ada poenja semengga-mengganja satoe kongsie, jaitoe Nippon Yusen Kaisha (Japan Mail Steamship Company); kamoedian berdiri Toyo Kisen Kaisha, Osaka Shosen Kaisha, dan Nisshin Kisen Kaisha (sino-Japan Steamship Company) dan moelahi kasiken perhoeboengan pada Tiongkok dalem dan pada semoea poesat dalem ini doenia. Madjoenja ini peroesa'an Japan adalah kerna governmentnja ada kasi subsidie dan perlindoengan special. Dari standpuntnja orang Tionghoa tida ada goenanja boeat satoe government kasi subsidie pada kongsie kapal, tapi Japan ingin boeat saingken kekwasa'an economie dari laen bangsa. Dari itoe dalem soeal transportatie laoet ia soedah bikin matjem tractaat sama laen negri, dengen tentoeken tarief vracht boeat sebagitoe banjak satoe ton-nja. Vracht jang dikirim dari Europa ka Asia pergi doeloe ka Shanghai kamoedian ka Naga­saki dan Yokohama, Shanghai ada lebih deket dari Europa dari pada semoea plaboean Japan. Tapi taroef vracht satoe tonnja dari Europa ka Nagasaki dan Yokohama ada sanget pantes, tapi tarief ka Shanghai, sebab belon ada peroesa'an kapal Tionghoa jang bisa saingken marika, ada sanget tinggi, jang membikin lebih moerah boeat kirim barang dari Europa ka Japan dari

pada ka Shanghai. Hasilnja adalah barang Europa ada didjoeal

— 37 —

lebih pantes di Japan dari pada di Shanghai. Bagitoe djoega kaloe barang Tiongkok dikirim dari Shanghai ka Europa, tarief vrachtnja ada lebih mahal dari pada bilah itoe dikirim dari Nagasaki dan Yokohama. Kaloe Tiongkok export $ 100,000,000 poenja harga barang ka Europa, ia moesti bajar $10,000,000 boeat vracht sadja. Dari sini, sebab harganja export dan impori dari dan ka Tiongkok ada lebih $ 1,000,000,000 saban taon, karoegian (dengen perantara'an vracht sadja jang dibajar pada kongsie kapal asing) ada tida koerang dari pada $ 100,000,000.

Di concessie asing ada lagi tiga roepa padjek, sewa'an tanah dan harganja tanah jang moesti dibajar, jang berdjoembla boekan ketjil. Saoepama, orang Tionghoa jang tinggal di Hong­ kong, Formosa, Shanghai, Tientsin, Dalny, Hankow dan laenlaen concessie asing bajar pada bangsa asing saban taon dalem roepa-roepa padjek lebih dari $ 200,000,000. Doeloe Formosa bajar pada Japan tjoema $ 20,000,000; sekarang djoemblanja padjek soedah bertamba djadi $ 100,000,000. Padjek di Hongkong ada kasi pada bangsa Inggris sadjocmbla brapa millioeu ton sataonnja dahoeloe kalah sekarang djoemblanja soedah naek djadi $ 30,000,000 dan aken djadi bertamba dengen berimbang saban taon.

Oewang sewa ada diambil oleh doea-doea bangsa asing dan bangsa Tionghoa, dan kerna tida ada pepreksa'an jang teliti, djoembla jang betoel dari masing-masing goendoekan poenja penerima'an oewang tida kataoean brapa, tapi tida bisa disang­kal bahoea bangsa asing dapetken lebih banjak oewang dari bangsa Tionghoa. Pembajaran penjewa'an tentoe sadja ada sapoeloe kali lebih banjak dari pada padjek. Harga-harga tanah semingkin taon djadi semingkin tinggi; kerna bangsa asing ada kendaliken kadoedoekan economie di Tiongkok, toeroet kapatoetan jajig seperti katanja pepata koeno bahoea „ kekajahan aken tjiptaken soedagar jang pande" dan itoe tanah dalem itoe concessie ada dibelih dengen moerah dan didjoeal dengen mahal. Dalem ini tiga djalan di concessie asing orang Tionghoa hamboerken saban taon tida koerang dari ampat atawa lima ratoes millioen dollar.

Lebih djaoe, kita moesti hitoeng djoega itoe kongsie asing dan individu asing jang tida terhitoeng banjaknja jang berniaga dalem ini negri jang, kerna ada mempoenjai hak-hak jang special dari tractaat, telah rampas hak kita jang dipertoean. Ada lebih soesa lagi boeat taksir itoe karoegian-karoegian dari ini conditie, tapi bilah ditimbang dari apa jang South Manchuria Railway Company sadja jang ada membikin kaoentoengan bersi dari lebih $ 50,000,000 satoe taonnja, kaoentoengannja dari berbagi-bagi perniaga'an moesti ada berdjoembla ratoesan millioen.

Ada lagi satoe karoegian jang kita moesti pikirken itoe karoegian dari speculatie. Bangsa asing di concessie ambil kaoentoengan dari kelema'an kaseraka'an-dalem karakter dari bangsa Tionghoa dan beriken saban hari kans boeat speculatie ketjil, dan saban brapa taon ada kans besar jang bangoenken napsoe pentopan dari bangsa Tionghoa sampe dipunt jang paling atas. Pada saban kota boeat speculatie atas oewang mark atawa pasar karet, orang Tionghoa telah hilangken sapoeloe millioen. Dan itoe speculatie ketjil jang oemoem berdjoembla, achirnja, besar djoega.

Kita poenja oewang penggantian. peperangan roepa-roepa 250,000,000 tail pada Japan dalem taon 1894, 900,000,000, tail pada brapa negri-negri Protocol dalem taon 1900-ada sabagian dari kita-orang poenja gentjetan politiek dan military dan tida sakali-kali boleh direndengken dengen gentjetan economie. Oewang penggantian karoegian perang ada seliwatan dan tida begitoe berarti bilah dipadoe dengen gentjetan economie. Tjoba pikir itoe kahilangan jang boekan sadja di Tiongkok tapi djoega diwaktoe doeloe djaman tjoehauw-tjoehauw dan diantara Hoa-kiauw kalaen negri, dan djoemblanja aken djadi semingkin tida bisa dihitoeng banjaknja. Brapa berbahaja adanja ini gentjetan economie!

Dengen ringkes, dari harga oewang dari hak jang ditjoeri kita hilang saban taon: pertama, dengen pemasoekan barang asing, $ 500,000,000; kadoea dengen penjiaran dari oewang kertas asing kapasar oewang kita, berikoet disconto bank asing atas exchange dan renten atas deposito kita, kira-kira $ 100,000,000; katiga dengen perantara'an tarief vracht atas kita poenja barang export dan import, berdjoembla $ 100,000,000; ka'ampat, dengen perantara'an, padjek, sewa, dan pendjoealan tanah dikalangan concessie paling sedikitnja, $ 400,000,000 atawa $ 500,000,000; kalima, dengen perantara'an hak special dan perniaga'an sendiri dari bangsa asing $ 100,000,000; ka'anem, dengen perantara'an speculatie dan laen-laen permaenan hazard, $ 100,000,000. Ini anem roepa gentjetan economie boeat kita ada berharga satoe kahilangan sari tida koerang dari pada $ 1,200,000,00. Dan kaloe sadja kita tida bisa dapetken satoe obat, ini ka­hilangan tjoema aken djadi bertamba saban taon; tentoe sadja itoe tida bisa hilang sendirinja. Tiongkok soedah sampe dika'ada'an bankroet, dan kaloe sadja kita tida bisa toeloengken padanja gentjetan economie aken moesnaken kita poenja negri dan basmiken kita orang poenja bangsa.

Koetika Tiongkok sedeng makmoernja, iapoenja tetangga bawaken oepeti dan hadlirken astana radja Tionghoa; biarpoen oepeti saban taon tjoema berdjoembla sedikit lebih banjak dari satoe millioen dollar, kita pikir itoe ada kahormatan sataoe brapa besarnja. Koetika keradja'an Sung loedes dan kita moesti bajar oepeti pada bangsa Kin, djoenibla jang kita bajar tida lebih dari saratoes millioen, tapi kita soedah anggep satoe hina'an setaoe brapa besarnja. Sekarang kita poenja oepeti pada negri asing ada satoe billion, doea ratoes millioen sataonnja, atawa doea bias billion dalem sapoeloe taon. Ini gentjetan economie, jang bagitoe besar, djoemblanja, tida sekali tersanding dikita poenja pikiran dan biarpoen sekarang kita masi belon maoe sedar. Dari itoe kita tida rasaken itoe hina'an jang besar sekali. Kaloe kita ada trima oepeti dari $ 1.200,000,000 sebagi pemasoekao kadalem kas negri, apa jang kita tida nanti bikin dalem menggoenahi ini oewang? Kamadjoean apa kita-orang poenja siahwee aken bikin! Dan sebab adanja ini gentjetan economie dari-Tiongkok dan itoe karoegian saban taon sebagi hasilnja, kita poenja siahwee tida merdika boeat djadi madjoe dan rahajat tida poenja apa-apa boeat hidoep. Ini tjekekan economie sadja ada lebih boeroek dari pada millioenan soldadoe jang sedia boeat boenoe kita. Dan selagi imperialisme asing toendjang ini gentjetan economie, soeal-soeal penghidoepan dari orang Tionghoa bertamba hari ada bertamba pentingnja, jang botauwlo sahari-hari djadi semingkin bertamba, dan kakoeatan negri, dengen bagitoe, semingkin lemah.

Dalem saratoes taon jang baroe liwat, Tiongkok telah moelahi terserang oleh soeal rahajat: orang Tionghoa tida djadi semingkin bertamba, tapi rahajat laen negri semingkin banjak. Sekarang kita ada terserang dengen gentjetan politiek dan economie. Kaloe sadja kita tida bisa dapetken koentjinja dari ini tiga soeal jang penting, itoe sa'at, biarpoen tida perdoeli besar adanja daera Tiongkok atawa brapa banjak ada rahajatnja, laen abad aken saksiken kita poenja negri moesna dan bangsa Tionghoa terbasmi. Kita poenja Tungpauw dari ampat ratoes millioen boekan bisa hidoep selama-lamanja. Lihatlah itoe bangsa Indian merah, moelah-moelah eda di sekoeliling binoea Amerika, sekarang moesna sama sekali. Sekarang kita baroe taoe pentingnja dari gentjetan politiek dan kapentingan jang terlebih besar lagi dari gentjetan economie. Kita tida bisa agoengken jang Tiongkok poenja ampat ratoes millioen tida aken dengen gampang diabisken. Belon perna dalem abad-abad doeloe dari ia poenja hikajat telah Tiongkok rasaken itoe pikoelan dari tiga gentjetan disatoe sa'at. Boeat hari nanti bangsa Tionghoa kita moesti tjari djalan boeat petjaken pemboedakan!

_____

3 Februari 1923,

T a m a t