Sam Bin Tjoe Gie/Pridato 1
MING CHU CHU I.
PRIDAT0 1.
Toean-tocan: Ini hari akoe dateng disini boeat bitjaraken tentang San Min Chu I. Apatah sebetoelnja jang dipanggil San Min Chu I? Dengen goenaken artian jang paling sederhana, itoelah ada chu-i boeat menoeloeng negri. Apatah artinja chu-i? Jaitoe ada samatjem pikiran jang dimengarti terang maksoednja, dipoedja kabaekannja, dan dirasaken pengaroenja. Kaloe menoesia tjoba petjaken sasocatoe soeal, terlebih doeloe marika dapet tangkep artinja, kamoedian memoedja; dan achirnja toendoek pada pengaroenja. Dari itoe sasoeatoe chu-i moesti lebih doeloe bisa bikin orang mengarti, kamoedian baroe orang bisa memoedja, dan achirnja menaloek, sebelonnja bisa djadi djedjek. Sebab apatah maka akoe bilang San Min Chu I bisa menoeloeng negri? Jalah kerna itoe chu-i aken mengasi Tiongkok kadoedoekan jang berendeng dengen laen-laen negri, baek dalem oeroesan loear, dalem oeroesan pemerenta'an, maoepoen dalem oeroesan penghidoepan economie, agar ia bisa selamanja tantjep kaki didoenia. San Min Chu I djoestroe ada itoe chu-i boeat menoeloeng kita poenja bangsa; akoe maoe tanja, boekantah kita poenja Tanah Aer ini waktoe sanget perloe sama pertoeloengan? Kaloe bagitoe marilah kita poedja San Min Chu I kerna dengen berbocat bagitoe kita aken tjiptaken satoe tenaga jang besar boeat bikin Tiongkok bisa bernapas lega.
Ini hari akoe aken moelahi bitjaraken tentang Principle of Nationalism (Ming Chu Chu I artinja Principe Kabangsa'an). Sesoedahnja organisatie Kuomintang diperbaeki, plan-plan boeat menoeloeng bangsa disiarken dengen propaganda. Propaganda jang loeas diantara rahajat negri teroetama moesti bisa siarken artian jang teges tentang itoe Chu I. Selamanja koerang-lebih sapoeloe taon jang laloe, rahajat soedah djadi biasa boeat denger itoe San Min Chu I, tapi sebagian besar dari marika tida mengarti maksoednja dengen baek. Maka akoe anggep perloe lebih doeloe akoe bitjaraken sedikit pandjang tentang itoe Ming Chu Chu I (Principe Kabangsa'an). — 6 —
Apatah jang dinamaken Ming Chu Chu I? Diliat dari hikajatnja pergaoelan hidoep dan adat-lembaganja orang Tionghoa, akoe maoe bilang sadja bahoea Ming Chu Chu I ada sama sadja artinja seperti „doctrine of the state” (Kuo Chu Chu I artinja Principenja Negri). Lantaran orang Tionghoa sanget oetamaken kaloearga dan kaoem satoe She (Tjinlang) hingga di Tiongkok tjoema hidoep familie-isme dan kaoem-isme dan nationalism jang sedjati tida ada sama sekali. Tida salah kaloe bangsa asing oepamaken orang Tionghoa sebagi satoe goendoekan pasir jang berarakan. Kenapa? Itoelah lantaran kitaorang tjoema hoendjoek kasetia'an pada kaloearga dan kaoem satoe She dan sekali-kali boekan pada bangsa. Kaloearga dan kaoem satoe She ada berarti tenaga jang saling mengiket jang koeat; dan boekan ada satoe kadjadian djarang jang orang Tionghoa korbanken kaloearga dan djiwanja tjoema boeat belahken marika poenja kaoem satoe She. Oepama, sasoeatoe pertjidra'an antara doea kaoem satoe She dari satoe pada laen berlaenan She di provincie Kwantoeng (Canton), marika satoe pada laen lebih soeka oetjoes berarakan dan harta banda moesna dari pada moesti menjera kalah, dan itoelah lantarannja itoe matjem akoer sama kaoem sendiri soedah berakar sanget dalem disanoebarinja orang Tionghoa. Tapi, kaloe boeat goenanja bangsa tida ada satoe tjonto pengorbanan setjara laki-laki. Soenggoe sajang jang orang Tionghoa tjoema maoe beragem boeat kaoem satoe She tapi boekan boeat bangsa.
Sebagimana akoe bilang tadi bahoea principe kabangsa'an dan principe negri tida berlaenan artinja, tapi ini tjoema bisa diartiken terhadep pada bangsa Tionghoa dan sama sekali tida kena kaloe kita maoe goenaken djoega boeat pendoedoek-pendoedoek negri Barat. Bangsa asing bikin garisan tedas boeat artian bangsa dan negri. Perkata'an Ming Chu dalem bahasa Inggris ada berarti „nation” (natie); dan itoe perkata'an „natie” ada mempoenjai doea artian lagi, jalah bangsa („ras”) dan negri. Sekalipoen ini perkata'an ada mempoenjai doea artian jang ampir bersama'an, tapi sesoenggoenja marika ada sanget berbeda satoe pada laen. Boekan itoe sadja malah perkata'an Tionghoa sendiri banjak sekali jang mempoenjai doea matjenm arti jang berbeda'an : oepama, she-hui (Shia-hwee atawa maatschappij) biasanja berarti satoe goendoekan orang tapi bisa djoega digoenaken boeat artiken satoe goendoekan menoesia jang mempoenjai organisatie. Bangsa dan negri soedah tentoe, mempoenjai per — 7 —
hoeboengan jang sanget rapet, dan ampir tida perloe orang bikin perbeda'an terlaloe tedas; tapi apa maoe memang sesoenggoenja itoe doea perkata'an masing-masing terpisa jang njata sekali dalem arti dan kita moesti bisa bedaken itoe. Tapi apa sebab maka akoe bilang jang itoe artian bangsa dan negri ada sama boeat Tiongkok? Itoelah lantaran, sedari ahalah Ch'in dan Han, Tiongkok telah hidoepken satoe negri dari satoe bangsa sementara negri-negri asing telah hidoepken berbagi-bagi negri dari satoe bangsa dan iket berbagi-bagi kabangsa'an dalem satoe negri. Oepama, Engeland, jang terhitoeng negri jang paling koeat didoenia, mempoenjai tjoklat, hitem, dan laen-laen bangsa jang djadi iketan dari Karadja'an Brittannie, diatas soesoenan iapoenja rahajat sendiri jang warnanja poeti; dari itoe kita tida bisa goenaken perkata'an ras atawa natie ada berarti negri terhadep pada itoe negri. Djoega, Hongkong, jang terhitoeng djadi djadja'an Inggris, kasi penghidoepan poeloean riboe bangsa Tionghoa diantara iapoenja pendoedoek; dan kaloe kita bilang bahoea Hongkong ada negri dan natie Inggris, kita djadi melantoer djaoe. Atawa, tjoba liat British India, jang sekarang djadi djadja'an Inggris: disini ada hidoep tigaratoes limapoeloe millioen pendoedoek aseli. Kaloe kita bilang bahoea British India ada negri dan natie Inggris, kombali kita meleset. Sebagimana kita taoe bahoea bangsa Inggris ada berasal dari bangsa Anglo-Saxon, tapi soedah tentoe itoe kita boekan maoe artiken jang itoe ada boeat Engeland sendiri; kerna Amerika djoega sebagian berasal dari itoe bangsa. Dari itoe boeat laen negri kita tida bisa bilang jang artian negri dan bangsa ada sama sadja.
Habis tjara bagimana kita moesti bedaken artinja itoe doea perkata'an tadi? Djalan jang paling back ialah kita haroes tjari taoe itoe berbagi-bagi tenaga jang paleh marika. Dengen perkata'an jang lebih gampang, kita maoe bilang bahoea itoe perkata'an ras dan nationaliteit beroba menoeroet tenaganja alam, sementara itoe perkata'an negri beroba menoeroet tenaganja sendjata. Tjoba kita ambil satoe tjonto dari hikajat jang berhoehoeng sama oeroesan politiek dari kita poenja Tanah Aer: orang Tionghoa bilang bahoea wang-tao tjara agoeng atawa tjara jang bener, mengikoeti djalannja alam; dengen laen perkata'an, tenaga alam ada wang-tao. Itoe goendoekan menoesia jang dipaleh oleh wang-tao adalah jang kita namaken bangsa. Tenaga sendjata — 8 —
dipanggil pa-tao, atawa tjara jang goenaken kakoeatan; itoe goendoekan menoesia jang dipaleh dengen ini tjara kita namaken negri. Oepama, Hongkong toch boekan dibikin madjoe oleh kerna itoe riboean pendoedoek Hongkong ingin bangsa Inggris berboeat itoe; tapi itoe djadja'an soedah didapetken dengen tenaga sendjata. Lantaran Tiongkok kalah perang dengen Brittannie maka Hongkong djadi terlepas dari tangan kita, dan Hongkong diroba djadi Hongkong jang modern. Riwajatnja British India dibikin baek oleh bangsa Inggris djoega sama sadja seperti Hongkong. Djadja'an Inggris meloelah dimoeka boemi; maka tida heran orang Inggris ada mempoenjai perkata'an jang berboenji : „Karadja'an Inggris belon perna liat mata hari toeroen”. Djadi, artinja bahoea dimana sadja ada sinar mata hari disitoe tentoe ada djadja'an Inggris. Kaloe kita pendoedoek Bagian Doenia Timoer tjoba ikoetken djalannja mata hari, bermoelah kita nanti liat jang ia itoe pentjarken sinarnja di New Zealand, Australia, Hongkong, dan Singapore; moeter kadjoeroesan barat ia sorotken Ceylon dan British India; djaoean sebla barat, Aden dan Malta; djaoean sedikit lagi, Engeland sendiri; kaloe ia moeter di Bagian Doenia Barat, ia nanti sampe di Canada dan rampoengken iapoenja oeteran di Hongkong dan Singapore. Bagitoelah, dimana sadja dalem tempo doeapoeloe ampat djem ada tjahajanja mata hari, disitoe nistjaja aken terdapet djadja'an Inggris. Karadja'an Inggris djadi besar dengen mengandel pada kakoeatan sendjata; tapi sedari djeman doeloe tida ada negri jang bisa djadi besar zonder menaloekken jang laen. Tapi djadi besarnja kabangsa'an atawa nationaliteit ada dari laen tjara: ia djadi besar atas kamaoeannja alam, dan sekali-kali boekan lantaran paksa'an. Itoe riboean pendoedoek Tionghoa di Hongkong djadi teriket satoe sama laen oleh kabangsa'an atas oesahanja alam; dan Engeland tida nanti mampoe roba kendati ia goenaken tjara bagimana poen.
Dari itoe, kapan satoe goendoekan menoesia jang tergaboeng dan membesarken dalem tjara jang bener atas soeroengannja tenaga alam, kita namaken ia itoe bangsa; sementara kapan satoe goendoekan menoesia jang tergaboeng dan membesarken dalem tjara jang menggoenaken kakoeatan atas desekannja itoe berbagi-bagi tenaga jang kaloear dari menoesia sendiri, itoelah kita namaken negri. —9—
Lebih djaoe, baek kita bitjaraken tentang asal-oesoelnja bangsa. Menoesia berasal dari binatang, tapi ia terpisa djaoe dari binatang bersajap dan binatang kaki doea; ia ada „soekmanja pekerdja'an Alam”. Bermoelah menoesia terbagi djadi lima bangsa jang besar, jaitoe poeti, item, merah, koening dan tjoklat. Kaloe kita bagi lebih djaoe, kita dapetken berbagi-bagi bangsa ketjilan, seperti itoe bangsa-bangsa jang tinggal dibinoea Asia, jaitoe bangsa Mongool, Melajoe, Japan, Boantjioe, dan Tionghoa. Itoe berbagi-bagi tenaga jang bikin marika hidoep dengen membesarken jalah tenaga alam, tapi kaloe kita tjoba-tjoba petjaken itoe berbagi-bagi tenaga kita aken dapetken jang itoe ada roewet. Tenaga jang paling besar artinja jalah persama'an darah. Bangsa Tionghoa terhitoeng bangsa koelit koening kerna marika poenja leloehoer ada bangsa jang berkoelit koening. Darahnja marika poenja leloehoer mengalir toeroen-menoeroen dan telah tjiptaken iketan jang koeat dari persama'an darah.
Tenaga kadoea jalah penghidoepan; dan kapan tjara hidoep berlaenan, djadinja besarnja berbagi-bagi bangsa djoega hoendjoek berbagi-bagi perbeda'an. Bangsa Mongool beroemah selaloe dideket soengei dan lapangan jang toemboe roempoet; marika toentoet penghidoepan mengoembara, dan dari itoe matjem kabiasa'an pinda-pinda tempat jang djadi sanget oemoem telah terlahir satoe bangsa, jang djadi pokonja dari itoe kakwasa'an Mongool jang moentjoel dengen sekoenjoeng-koenjoeng. Dalem marika poenja djeman-djeman jang makmoer, balatentara Goan Tiauw (bangsa Mongool) telah taloekken Asia Tenga, Arabia, disebla barat satoe bagian dari Europa dan di sebla timoer, dan ampir taloekken Japan. Bandingkenlah marika dengen laen-laen bangsa seperti bangsa Tionghoa didjeman Han dan Tang, jang maski itoe waktoe sedeng djajanja tapi tapel wates sebla barat dari itoe karadja'an tjoema sampe di Laoetan Caspian; atawa bangsa Romein tjoema bisa loeasken marika poenja tapel wates disebla timoer tida lebih djaoe dari Laoetan Hitem marika poenja pengaroe militair itoe djeman ada dirasaken betoel-betoel. Belon perna ada satoe bangsa jang bisa pentang kakinja di Europa dan Asia, selaennja bangsa Mongool jalah Goan Tiauw. Resia dari itoe tenaga jang loear biasa jalah kernaitoe bangsa ada bangsa jang tida takoet djalan millioenan pal djaoenja lantaran marika soedah djadi biasa dalem marika poenja penghidoepan hari-hari. — 10 —
Tenaga katiga jalah bahasa. Kaloe laen bangsa pladjarken kita poenja bahasa, marika bisa djadi terleboer dan teriket oleh kita dalem kabangsa'an. Sebaliknja bagitoe djoega boeat kita. Kaloe doea bangsa mempoenjai saroepa darah dan bahasa, peleboeran ada lebih gampang lagi. Dari itoe bahasa terhitoeng salah-satoe tenaga jang berpengaroe boeat hidoepnja satoe bangsa.
Jang ka'ampat jalah ada agama. Rahajat jang poedja satoe matjem Allah dan satoe matjem leloehoer bisa teriket djadi satoe bangsa. Agama ada satoe factor jang djoega ada mempoenjai pengaroe besar dalem hidoepnja bangsa-bangsa. Liat sadja pada karadja'an Arab dan Judea jang soedah lama moesna, tapi toch bangsa Arab dan Judea tinggal hidoep sampe di'ini sa'at. Sebabnja maka marika tinggal oetoe, maski marika poenja negri soedah loedes, jalah lantaran agama. Sebagimana kitaorang kataoei bangsa Jahoedi hidoep terpentjar diantero doenia. Bebrapa orang terpladjar jang di'ini djeman sanget terkenal, seperti Marx dan Einstein, ada bangsa Jahoedi. Di Engeland, Amerika, dan laen-laen negri, oeroesan-oeroesan jang berhoeboeng sama oewang sebagian besar berada dalem tangannja bangsa Jahoedi. Dengen mempoenjai katjerdikan loear-biasa ditamba poelah dengen adanja itoe kasoedjoetan pada marika poenja agama, bangsa Jahoedi tinggal djadi satoe bangsa djoega. Bagitoe djoega agama Islam telah kasi kakoeatan pada bangsa Arab boeat berdiri djedjek. Laen tjonto jalah bangsa British India, siapa poenja negri maski ini waktoe ada mendjadi negri taloekan, tapi lantaran marika poenja kasoedjoetan pada agama ada begitoe roepa hingga marika poenja bangsa tida bisa djadi loedes
Tenaga kalima jalah adat-lembaga dan kabiasa'an-kabiasa'an. Kaloe pendoedoek negri mempoenjai persama'an adat-lembaga dan kabiasa'an marika bisa djadi lengket dan tergaboeng djadi satoe bangsa. Dari itoe kaloe kita dapetken berbagi-bagi matjem pendoedoek negri sampe bisa teriket djadi satoe bangsa, kita moesti tjari taoe sebabnja pada itoe lima roepa tenaga, jalah persama'an darah, bahasa, tjara hidoep, agama, dan adat lembaga, jang sebagi boeanja peroba'an alam. Itoe perbandingan antara itoe lima matjem tenaga alam dan tenaga sendjata kasi kita satoe pemandangan jang teges tentang perbeda'an artian dari ras atawa nationaliteit dan negri. —11—
Berhoeboeng dengen djalannja wet alam jang menetepken hidoepnja bangsa-bangsa didjeman doeloe dan sekarang, kita orang perloe sekali hidoepken Nationalisme boeat djaga baek kita poenja bangsa dari bahaja loedes. Boeat bikin ini matjem chu-i digoenaken menoeloeng negri, terlebih doeloe kita haroes mengarti maksoednja dengen baek. Bangsa Tionghoa ada berdjoembla ampatratoes millioen djiwa; dan antara bangsa-bangsa tjampoeran bangsa Mongool berdjoembla tida lebih dari bebrapa millioen, bangsa Boantjioe koerang-lebih satoe millioen, bangsa Tibet bebrapa millioen, dan bangsa Turkistan jang memeloek agama Islam satoe millioen bangsa semoea tida melebihi sapoeloe millioen, djadinja; boeat sebagian besar, bangsa Tionghoa ada bangsa Han jang mempoenjai persama'an darah, bahasa, agama, adat-lembaga - satoe bangsa jang moeloes dan mentjil sendirian.
Bagimanatah adanja sekarang kadoedoekannja kitaorang poenja bangsa didoenia? Djika dibandingken dengen laen-laen bangsa kitaorang poenja djoembla ada jang paling besar dan kasopanan jang paling toea, jang sampe ini waktoe telah liwatken ampatriboe taon. Seharoesnja kitaorang soedah moesti madjoe seperti laen-laen bangsa dibinoea Europa dan Amerika. Tapi apa maoe bangsa Tionghoa tjoema mempoenjai goendoekan familie dan kaoem satoe She; kitaorang tida ada mempoenjai soemanget kabangsa'an. Achirnja maski ampatratoes millioen djiwa berkoempoel disatoe Tiongkok, sebetoelnja kitaorang tida lebih sebagi satoe goendoekan pasir jang berarakan. Kita poenja negri ada negri jang paling miskin dan lemah didoenia, dengen mempoenjai kadoedoekan jang paling renda dalem kalangan internationaal; sementara laen-laen menoesia ada sebagi piso sajoer dan piring makan, adalah kita jang djadi ikan dan dagingnja. Kitaorang poenja kadoedoekan ini waktoe ada sanget berbahaja; kaloe kita tida bekerdja dengen soenggoe-soenggoe boeat hidoepken Nationalisme dan gaboengken kita poenja ampatratoes millioen rahajat boeat tjiptaken satoe bangsa jang tegoe, kita aken alamken satoe bintjana negri bakal moesna dan kita poenja bangsa aken djadi loedes. Boeat tjega ini bahaja, kita moesti bikin itoe Nationalisme djadi dipoedja dan goenaken soemanget kabangsa'an boeat menoeloeng negri —12—
Kapan kita maoe berboeat bagini, pertama ada sanget penting boeat kita tjari taoe dimana itoe bahaja mengerem, dan djalan jang paling baek boeat bikin ini bahaja djadi kaliatan teges adalah kita moesti bandingken rahajat Tionghoa sama rahajat dari Negri-negri Besar. Sebelonnja petja perang doenia ada toedjoe atawa delapan negri sebagi negri-negri jang koeat: jang paling besar ada Groot Brittannie; jang paling koeat Duitschland, Oostenrijk, dan Rusland; jang paling kaja, Amerika Sariket; dan jang paling moeda, Japan dan Italie. Sesoedahnja petja itoe perang doenia tiga bangsa djato, dan negri-negri jang terhitoeng klas satoe tjoema Groot Brittannie, Amerika Sariket, Frankrijk, Japan dan Italie jang katinggalan. Groot Brittaunie, Frankrijk, Rusland, dan Amerika Sariket telah hidoepken marika poenja staat-staat dari satoe bangsa. Bangsa Inggris berasal dari bangsa Anglo-Saxon; dan negri asalnja jalah Engeland dan Wales jang mempoenjai tjatja djiwa besarnja tigapoeloe delapan millioen jang bisa dinamaken toeroenan Anglo-Saxon toelen. Tapi ini bangsa telah djadi satoe bangsa jang paling koeat dan negrinja ada negri jang paling tegoe didoenia. Saratoes taon doeloe pendoedoeknja tjoema berdjoembla doeablas millioen; tapi sekarang soedah djadi tigapoeloe delapan millioen, jaitoe telah tamba tigaratoes percent dalem satoe abad.
Di Timoer ada terdapet satoe negri poelo jang bisa dinamaken Groot Brittannie. Itoelah boekan laen dari Japan adanja. Bangsa Japan djoega moentjoel dari satoe matjem bangsa, jang biasa dipanggil bangsa Yamato (artinja Perdamian). Sedari mendjelma di'ini djem, negri Japan belon perna direboet oleh laen bangsa. Sekalipoen Goan Tiauw sendiri tida bisa lakoeken itoe. Dengen katjoealiken bangsa Korea dan Formosa, djoemblanja bangsa Japan ada limapoeloe anem millioen. Saratoes taon jang laloe itoe djoembla soesa sekali boeat ditaksir dengen betoel, tapi dengen mengambil itoe hitoengan bahoea penamba'an 300 percent terdjadi dalem saban saratoes taon, kita djadi bisa bilang jang pendoedoek itoe bangsa didjeman doeloe tentoe tida melebihi doeapoeloe millioen. Kapinterannja bangsa Yamato selaloe tinggal bertjaja; dan dengen mengikoeti kamadjoeannja kasopanan Europa, dan tjotjokken diri dengen cultuur Barat, marika telah goenaken tjara-tjara wetenschap boeat besarken marika poenja negri, dan telah mendjadi bagitoe modern dalem tempo setenga abad hingga marika djadi satoe bangsa jang —13—
paling koeat di Timoer, dan berada ditingkatan jang sama dengen bangsa Europa dan Amerika. Bangsa Barat dan Amerika tida brani pandang enteng pada marika. Bangsa Tionghoa ada berdjoembla lebih besar tapi toch orang brani hinaken pada kitaorang. Apatah sebabnja? Jalah jang satoe mempoenjai soemanget kabangsa'an; dan jang laennja tida. Sebelonnja marika roba diri boeat tjotjokken dengen aliran djeman baroe, Japan djoega ada sanget lemah. Dengen daerah jang tida ada bagitoe besar seperti Provincie Szechwan, bangsa Japan maoe tida maoe tida moestri trima perlakoean jang tida enak dari bangsa Barat. Tapi oleh kerna alam koerniaken pada marika itoe soemanget kabangsa'an jang lahirken berbagi-bagi perboeatan enghiong, tida sampe limapoeloe taon, marika soedah bisa roba Japan dari satoe negri jang lemah mendjadi satoe negri jang koeat. Kaloe kita maoe liat Tiongkok djadi koeat, kita moesti ambil Japan sebagi tjonto jang paling tjotjok.
Tjoba sekarang kita bikin perbandingan antara bangsa Asia dan Europa. Doeloe bangsa koelit poeti anggep tjoema marika sadja jang mempoenjai kapinteran dan kamampoean boeat lakoeken segala apa. Kita bangsa Timoer, lantaran tida mengataoei bagian-bagian jang penting dari bangsa Barat dan resia boeat bikin tegoe negri, djadi hilang harepan. Tapi dalem tempo blakangan Japan dengen sekoenjoeng-koenjoeng telah toekar boeloe djadi negri klas satoe, dan ini matjem hasil telah kasi pengharepan jang besar pada bangsa-bangsa jang hidoep dibinoea Asia. Marika taoe bahoea Japan jang doeloe ada sama sadja lemahnja seperti Annam dan Burma jang sekarang; tapi sekarang ini negri-negri jang terseboet blakangan soedah katinggalan djaoe sekali, Japan bladjar sama Barat tapi sekarang marika soedah soesoel Barat. Di Versailles Peace Conference (Conferentie Perdamian di Versailles) jang dibikin di Versailles sehabisnja Perang Doenia, Japan doedoek sebagi salah-satoe dari Lima Djago. Boeat soeal-soeal jang mengenai pada bangsa Asia jalah ada negri satoe-satoenja jang swara-swaranja ditoeroet dan jang dipandang sebagi, koeda jang madjoe paling depan". Dari itoe disini djadi njata bahoea bangsa Japan telah bisa berboeat apa-apa jang orang Barat telah lakoeken; dan kendati berbagi-bagi bangsa bisa mempoenjai berbagi-bagi matjem warna koelit tapi katjerdikan dan kamampoean ampir tida ada bedanja sama sekali. Sekarang Barat tida brani kwabo pada — 14 —
Timoer, kerna Japan ada satoe tjonto jang telah kasi merdika satoe pemandangan lebih loeas. Berdirinja Japan boekan sadja bangsa Yamato djadi terinda tapi deradjatnja semoea bangsa Asia djadi naek dimatanja bangsa koelit poeti. Doeloe kita soedah dapet itoe pengrasa'an bahoea kita tida bisa toeroet bangsa Europa; tapi sekarang seharoesnja itoe pikiran tjoepet moesti dibikin linjap sama sekali, kerna Japan ada tjonto didepan mata.
Tempo Peperangan Doenia sedeng berkobar dengen heibat, karadja'an Rus dibikin tergoeling oleh rahajat jang berontak. Sekarang Rusland djadi satoe negri socialist jang baroe jang ada sanget berlaenan dari jang doeloe. Pendoedoek Rus berasal dari bangsa Slaven; dan saratoes taon jang laloe marika poenja djoembla ada ampat poeloe millioen, tapi sekarang soedah beroba djadi saratoes anempoeloe millioen, hal mana berarti kanaekan dari 400 percent. Kakoeatannja marika poenja negri djoega djadi bertamba ampat kali lipet, dan pada saratoes taon jang laloe, Rusland ada djadi salah-satoe negri jang paling koeat didoenia, jang dimaloein boekan sadja oleh bangsa Japan dan Tionghoa tapi djoega oleh bangsa Inggris dan Duitschland. Waktoe marika sedeng mendjagoin, Rusland telah besarken daerahnja dengen djalan taloekken bangsa-bangsa laen, hingga tida heran sekarang ia bisa poenjaken saparo Europa dan saparo Asia. Didjeman Peperangan Rus-Japan, seloeroe doenia kwatir kaloe-kaloe Rusland nanti terkem Tiongkok, kerna kaloe ini sampe kadjadian nistjaja laen-laen negri didoenia aken alamken saroepa bintjana. Memang soedah dikataoei bahoea bangsa Rus satoe kali soedah perna tjoba boeat taloekken seloeroe doenia, maka laen-laen negri laloe berichtiar boeat halangken itoe maksoed. Persariketan Inggris-Japan ada satoe poekoelan boeat Rusland. Koetika Japan beroentoeng bisa kalahken Rusland dalem api peperangan dan oesir kaloear bangsa Rus dari daerah Korea dan Provincie Manchuria selatan, bangsa Rus poenja impian-impian boeat taloekken doenia djadi loedes sama sekali. Koetika Rusland leboer negrinja dari satoe negri jang maoe
menaloeki laen negri djadi satoe negri jang maoe tjoba lindoengken perdamian doenia sesoedahnja Perang Doenia, kombali kita dikasi liat satoe peroba'an jang lebih loeas lagi diantara itoe bangsa. Pembrontakan rahajat sampe di'ini waktoe soedah berdjalan anem taon, tapi dalem tempo jang bagitoe pendek Rus— 15 —
land soedah beroentoeng bisa roba iapoenja tjita-tjita. Itoe tjita-tjita jang baroe boekan sadja tida mengandoeng artian ingin kangkangin doenia, tapi bermaksoed gentjet sikoeat dan taeloeng silemah, dan hidoepken ka'adilan. Tapi sekarang doenia poenja katakoetan pada Rusland ada melebihi dari doeloean, kerna itoe tjita-tjita jang baroe boekan sadja bermaksoed boeat roeboeken imperialisme (Karadja'an) di Rusland, tapi semoea imperialisme di doenia. Lebih djaoe, ia bermaksoed boeat koeboer kapitalisme (Kaoem Tauwkeh). Kerna, disemoea negri maski kakwasa'an jang kaliatan berada ditangannja pemerenta, tapi kakoeatan jang aseli berada dalem genggemannja kaoem tauwkeh, dan itoe tjita-tjita baroe dari Rusland niat bikin habis itoe kakoeatan kapitalist, makanja kaoem oewang djadi bagitoe goemeteran. Inilah sebabnja maka dalem oeroesan doenia telah terlahir satoe peroba'an jang makannja sanget dalem jang soedah tentoe dikamoedian hari aken pengaroeken kadjadian-kadjadian didoenia.
Dalem hikajat Europa, peperangan internationaal ada sanget oemoem: antaranja jang paling blakang kadjadian adalah itoe peperangan antara Negri-negri Sariket jang terdiri dari Duitschland, Oostenrijk, Turkey, Bulgarij, dan Negri-negri Entente jang terdiri dari Engeland, Frankrijk, Rusland, Japan, Italie, dan Amerika Sariket. Sesoedahnja rasaken sengsara boeat lamanja ampat taon, baroelah doea fihak berentiken peperangan. Bebrapa orang pinter ramalken bahoea itoe matjem peperangan tida nanti aken berkobar poelah, tapi peperangan antara bangsa melawan bangsa (interracial) seperti bangsa-bangsa koelit poeti jang bersariket melawan bangsa-bangsa koelit koening jang sebaliknja djoega bersariket, tida nanti bisa ditjega. Menoeroet akoe poenja perjakinan pada djalannja 'hikajat, akoe merasa pasti bahoea peperangan internationaal bakal kadjadian lebih banjak lagi. Tapi ini boekan kadjadian antara doea bangsa jang berlaenan; tapi diantara sesama bangsa sendiri. Bangsa-bangsa koelit poeti bagitoe djoega bangsa-bangsa koelit koening masing-masing aken lakoeken peperangan klas (tingkatan) diantara sesamanja, jalah peperangan antara golongan jang tergentjet melawan golongan jang menggentjet, dan golongan jang oetamaken kabeneran melawan jang oetamaken kakoeatan. Sedari petja pembrontakan rahajat di Rusland, bangsa Slaven selaloe impiken boeat tindes jang koeat bangoenin jang lemah, roeboeken jang kaja dan toeloeng simiskin, toendjang kaadilan dan adaken per—16—
sama'an. Ini matjem tjita-tjita disamboet dengen goembira oleh bangsa-bangsa jang lemah dan ketjil, teroetama oleh bangsa Turkey. Sebelonnja petja Perang Doenia, Turkey ada sanget miskin dan lemah dan orang ampir tida mempoenjai harepan sama sekali ia itoe nanti bisa djadi koeat; bangsa-bangsa Barat namaken Turkey ,,si sakit dari Timoer", dan bilang djoega bahoea itoe ada lebih baek ia lekas-lekas mampoes. Koetika ia kalah perang sebagi kawan sariketnja Duitschland dalem itoe Peperangan Doenia, bangsa-bangsa laen niat poekang padanja, dan ia poenja djiwa ada terantjem. Baeknja ada Rusland jang maoe hidoepken persama'an bantoe padanja boeat oesir boeat selamanja pada bangsa Griek pergi dan roba iapoenja verdrag-verdrag pintjang sama laen-laen negri. Sekarang, maski boekan terhitoeng negri klas satoe Turkey soedah bisa tempatken kadoedoekannja sebagi negri klas doea atawa tiga di Europa. Kaloe diliat dari sini, berbagi-bagi bangsa dan negri jang digentjet dan diperlakoeken setjara soeka-soeka aken bersariket boeat melawan.
Itoe waktoe, negri manatah jang diperes? Koetika Engeland dan Frankrijk toeroen tangan dalem itoe Peperangan Doenia boeat basmi Duitschland poenja imperialisme, Rusland telah tjeboerken dirinja dalem marika poenja fihak dan telah boeang banjak djiwa dan harta banda. Tapi sampe ditenga djalan ia telah oendoerken diri dan terbitken pemberontakan. Apatah sebabnja? Itoelah boekan laen hanja lantaran rahajat Rus soedah diperlakoeken dengen tjara jang bagitoe kedjem hingga tida djalan jang lebih baek dari pada berontak, agar tjita-tjita perdamian bisa gantiken tjita-tjita kakoeatan, Negri-negri besar di Europa moesoeken itoe tjita-tjita dan kirim tentara boeat perangken Rusland. Beroentoeng bangsa Rus dengen marika poenja soemanget Slaven jang toea telah bisa tolak itoe ganggoean dari loear. Negri-negri laen sekarang tida mampoe bikin toendoek Rusland dengen sendjata, dari itoe marika telah ambil laen djalan jaitoe marika sengadja tida maoe akoeh sah itoe pemerenta. (Engeland sekarang soedah akoeh sah Sovjet Rusland dengen officieel). Apatah sebabnja maka laen-laen negri di Europa moesoeken Rusland poenja tjita-tjita negri jang baroe? Itoelah lantaran marika blakangken ka'adilan, sementara Rusland djoestroe sanget moesoeken itoe tjara-tjara pemerenta'an jang selaloe maoe mengandel pada sendjata dan seboleh-boleh ingin laloeken perboeatan-perboeatan jang gandjil; dari itoe tida heran kaloe sekarang Negri-negri Besar berichtiar boeat sapoe bersi itoe matjem tjita-tjita jang sanget bertentangan dengen poenjanja marika! Sebelonnja terdjadi pemberontakan dalem negri, Rusland djoega ada satoe negri jang poedia kakoeatan dari pada kabeneran; tapi sekarang lantaran ia balikken blakang pada itoe matjem tjara memerenta negri, negri-negri laen bergerak maoe ringkoes padanja. Itoelah sebabnja maka akoe bilang bahoea peperangan dikamoedian hari bakal ada peperangan kakoeatan melawan kabeneran. Sekarang Duitschland ada negri jang tergentjet. Di Europa: negri-negri jang ketjil dan jang lemah di binoea Asia (katjoeali Japan) djoega soedah moesti rasaken pait-getirnja perlakoean menggentjet dan djalanken roepa-roepa nasib jang sengsara. Marika bakal gaboengken diri aken lepasken diri dari tjengkremannja negri-negri jang menggentjet. Negri-negri jang maoe lindoengken kabeneran, tida perdoeli marika ada negri koelit poeti atawa koening, bakal hidoepken satoe iketan sama-sama antaranja boeat bantras pada itoe negri-negri koelit poeti dan koening jang poedja kakoeatan sendjata. Dengen adanja itoe poko perkara, doenia bakal lagi sekali saksiken satoe peperangan jang sama besarnja seperti jang baroe ini meletoes.
Saratoes taon jang soedah Duitschland poenja pendoedoek ada berdjoembla doeapoeloe ampat millioen djiwa. Maski Perang Doenia telah banjak bikin koerang itoe djoembla, tapi toch ini waktoe ada berdjoembla anempoeloe millioen, djadi, dalem saratoes taon telah dapet kanaekan 250 percent. Bangsa Duitsch ada berasal dari bangsa Teutonic, jang mempoenjai tali persoedara'an rapet dengen bangsa Inggris. Marika ada bangsa jang pinter dan negrinja ada sanget koeat. Sesoedahnja dikalaken dalem Perang Doenia, marika djadi berbalik lindoengken kabeneran dari pada kakoeatan.
Saratoes taon jang laloe pendoedoek Amerika Sariket ada berdjoembla tida lebih dari sembilan millioen djiwa; tapi sekarang soedah djadi lebih saratoes millioen. Angka kanaekan ada sanget tinggi, jalah 1000 percent dalem satoe abad, berhoeboeng dengen banjaknja immigrant jang dateng dari Europa dan bertambanja pendoedoek aseli. Berbagi-bagi matjem pendoedoek dibinoea Europa jang soedah merasa terlaloe sesek dibinoea sendiri telah kaloear boeat tjari penghidoepan di Amerika. —18—
Kasoedahannja, pendoedoek ,Amerika Sariket djadi bertamba dengen tjepet sekali; dan laen-laen negri poenja pendoedoek djadi bertamba dengen tentoe dari kalahiran-kalahiran, adalah pendoedoek Amerika Sariket djadi bertamba dengen persama'an. Bangsa Amerika ada terdiri dari lebih banjak matjem kabangsa'an dari laen-laen bangsa didoenia, berhoeboeng dengen djadi terleboernja laen-laen bangsa jang tinggal di'itoe binoea. Satoe bangsa jang djadi terlahir dengen tjara bagitoe matjem soedah tentoe bakal djadi berlaenan sifatnja sama bangsa Inggris, Fransch, Duitsch, Italie, dan pada laen-laen negri di Europa Selatan. Ia djadi satoe bangsa baroe sendirinja, jang bisa dinamaken bangsa Amerika. Dengen mempoenjai ini matjem bangsa jang terlepas sendiri sifatnja telah bisa djadi satoe negri jang berdiri sendirian.
Bangsa Fransch ada berasal dari bangsa Latin. Bangsa Latin telah terpentjar di Spanje, Portugal, Italie, dan, dengen djalan pinda'an, di Mexico, Peru, Chili, Colombia, Brazil, Argentina, dan laen-laen negri republiek ketjilan di Amerika Tenga. Lantaran adanja pendoedoek jang berasal dari bangsa Latin maka Amerika Selatan seringkali dipanggil Amerika Latin. Djadi bertambanja pendoedoek negri Frankrijk ada sanget lambat. Saratoes taon jang laloe djoemblanja iapoenja pendoedoek ada tigapoeloe millioen; dan sekarang tjoema ada tigapoeloe sembilan millioen, atawa satoe kanaekan dari tjoema 25 percent dalem satoe abad.
Sekarang tjoba kita bandingken kanaekan djoembla pendoedoek doenia dalem tempo saratoes taon jang blakangan: Amerika Sariket, 1000 percent; Engeland, 300 percent; Japan, djoega 300 percent; Rusland, 400 percent; Duitschland, 250 percent; Frankrijk, 25 percent. Ini penamba'an ada bergantoeng banjak pada kamadjoean wetenschap, semingkin djadi sampoernanja obat-obatan, platoeran-platoeran karesikan jang saban taon djadi semingkin baek, dan inilah ada itoe berbagi-bagi resia jang membikin koerang angka kamatian dan membikin bertamba angka kalahiran. Ada hoeboengan apatah ini kanaekan pendoedoek doenia pada Tiongkok? Kaloe akoe bandingken ini kanaekan djoembla pendoedoek dengen kanaekan djoembla pendoedoek Tiongkok sendiri, akoe djadi goemeter. Tjoba liatlah Amerika Sariket: Pada saratoes taon jang laloe ia tjoema mempoenjai djoembla pendoedoek sembilan millioen, tapi sekarang —19—
soedah djadi lebih dari saratoes millioen; dan kaloe itoe djoembla aken naek dengen katjepatan seperti jang soedah-soedah, nistjaja dalem tempo saratoes taon jang aken mendatengin, Amerika Sariket bakal mempoenjai sariboe millioen pendoedoek. Kita, bangsa Tionghoa, selaloe merasa bangga dengen kita poenja djoembla jang besar, jang tida gampang djadi loedes. Koetika bangsa Mongool berdiriken karadja'an Goan Tiauw di Tiongkok boekan sadja marika tida mampoe bikin loedes bangsa Tionghoa malah sebaliknja marika sendiri djadi ditelen oleh kitaorang. Bangsa Tionghoa boekan sadja tida djadi moesna, tapi soedah bisa leboer itoe bangsa jang itoe waktoe djadi marika poenja toean. Bangsa Boantjioe telah memerenta di Tiongkok boeat lamanja doearatoes anempoeloe taon lebih; tapi sebaliknja dari leboer bangsa Tionghoa, bangsa Tionghoa telah leboer padanja djadi Tionghoa toelen. Sekarang bangsa Boantjioe jang pake She Tionghoa. Dari itoe, bebrapa achli hikajat sampe brani kloear kata, bahoea maski bangsa Japan atawa bangsa koelit poeti jang memerenta di Tiongkok, orang Tionghoa poenja kabangsa'an tida aken bisa linjap, dan sama sekali tida ada alesan jang tegoe boeat orang merasa banjak sekali pendoedoek kwatir, bangsa Tionghoa ampir tida taro perhatian sama sekali bahoea dalem tempo saratoes taon lagi, Amerika Sariket bakal mempoenjai pendoedoek sariboe millioen, atawa doea setenga kali lebih banjak dari djoembla kita-orang. Sebab jang teroetama makanja bangsa Boantjioe tida bisa telen kita poenja kabangsa'an, itoelah lantaran marika poenja djoembla tjoema satoe millioen lebih. Tapi kaloe itoe djoembla jang bagitoe besar, dalem tempo saratoes taon jang mendatengi, dari pendoedoek Amerika Sariket aken tjoba memerenta di Tiongkok, soedah tentoe itoe waktoe djadi ada sapoeloe orang Amerika boeat saban ampat orang Tionghoa, dan achirnja kabangsa'an Tionghoa kena ditjaplok.
Toean-toean sekalian, apatah kaoe-orang taoe kapan itoe tjatja djiwa dari bangsa Tionghoa jang menetepi ampatratoes millioen dilakoeken? Jalah dimasa Baginda Ch'ien Lung (Kian Lioeng, 1734-1795) memerenta di Tiongkok. Sedari itoe waktoe tida dilakoeken penjatetan officieel poelah. Sampe ini waktoe soedah berdjalan ampir doearatoes taon, dan kita poenja djoembla tinggal ampat ratoes millioen, ampatratoes millioen djoega. –20–
Kaloe saratoes taon doeloe berdjoembla ampat ratoes millioen, nistjaja saratoes taon kamoedian bakal sebagitoe djoega.
Lantaran iapoenja djoembla pendoedoek jang ketjil, Frankrijk kaloearken atoeran boeat kasi persenan oewang kapan ada kalahiran: oepama erang lelaki jang mempoenjai tiga anak dikasi satoe persenan; ampat atawa lima anak, speciaal persenan; anak kembar, extra persenan. Sasoeatoe orang lelaki jang beroemoer tigapoeloe atawa orang prempoean jang beroemoer doeapoeloe belon djoega maoe menika aken didenda. Bagitoelah Frankrijk berichtiar seboleh-boleh boeat naekken angka kalahiran. Sebetoelnja djoembla dari pendoedoek Frankrijk tida djadi semingkin merosot; tjoema kaloe dihitoeng menoeroet hitoengan persen, itoe kanackan djadi katjek djaoe sekali djika dibandingken pada kanaekan djoembla pendoedoek dari laen-laen negri. Didjeman doeloe Frankrijk djoega ada satoe negri jang oetamaken pertanian; pemerenta dan rahajat ada sanget djaja. Saratoes taon jang laloe saorang terpladjar bangsa Inggris jang bernama Malthus andjoerken orang watesken kalahiran dengen madjoeken alesan bahoea doenia soedah padet dan soember makanan ada berwates, dan kaloearken theorie jang oetamaken „djoemblanja pendoedoek dan banjaknja barang makanan dalem imbangan jang tentoe". Malthus poenja theorie hoendjoek sifatnja batin dari rahajat Frankrijk jang soeka kasenangan lahir. Iaorang andjoerken anak-anak moeda tida moestinja kasi marika poenja diri diretjokken oleh oeroesan-oeroesan roemah tangga dan orang prempoean diganggoe oleh anak-anak; dan tjara-tjara jang marika goenaken boeat tjega bertamba kalahiran ada bersifat jang sebenernja atawa jang bikinan. Saratoes taon jang laloe djoemblanja pendoedoek Frankrijk ada lebih besar dari pendoedoek dari laen-laen negri di Europa jang mana sadja, tapi lantaran theorie Malthus telah tersiar loeas dan dipoedja, pendoedoek Frankrijk laloe moelahi godot bangsanja sendiri, dan hasilnja dari itoe ratjoen jang digoenaken oleh itoe orang terpladjar telah membikin Frankrijk kakoerangan dengen djiwa menoesia. Anak-anak moeda Tionghoa jang koerang pikir banjak sekali jang kena langgar bisanja itoe ratjoen, dan marika djadi loepa pada itoe kasengsara'an jang ditanggoeng oleh Frankrijk di'ini waktoe, Kita-orang poenja tjita-tjita djoestroe ada boeat tamba djoemblanja pendoedoek negri dan bikin koeat sifat — 21 —
bangsa'an, agar bangsa Tionghoa bisa bernapas teroes sebagi satoe bangsa bersama Frankrijk dan laen-laen bangsa didoenia.
Tapi brapatah ada djoembla jang betoel dari pendoedock Tionghoa sekarang? Maski kita-orang poenja kanaekan angka pendoedoek dalem hitoengan persent kîrtah djaoe sama laen-laen negri, seperti Engeland dan Japan, tapi boleh djadi ini waktoe kita-orang poenja djoembla ada limaratoes millioen, kaloe di taksir dari tjatetan jang dibikin didjeman Ch'ien Lung (Kian Liong). Tapi menoeroet taksirannja Rockhill, minister Amerika Sariket jang doeloe, jang telah lakoeken penjelidikan diseloeroe Tiongkok, bahoea kita-orang poenja djoembla tida melebihi tigaratoes millioen. Itoe minister hoendjoek bahoea kaloe didjeman Ch'ien Lung kita poenja djoembla ada ampatratoes millioen, nistjaja sampe di'ini waktoe kita soedah kahilangan kira-kira satoe-perampat dari itoe djoembla. Biarlah kita bilang sadja bahoea pada saratocs taon jang aken mendatengi kita poenja djoembla teroes tinggal tetep ampatratoes millioen!
Pendoedoek Japan ini waktoe ada berdjoembla anempoeloe millioen; dan pada saratoes taon jang aken mendatengi itoe djoembla bakal djadi naek sampe doearatoes ampat poeloe millioen. Japan selaloe mengomel bahoea ada perloe sekali boeat ia pindaken pendoedoeknja dilaen-laen negri dengen alesan jang iapoenja daerah soedah tida bisa kasi tempat lagi pada itoe pendoedoek jang berdjoembla besar. Japan djoeroesken tindakannjaka Amerika Sariket, tapi Californie tida maoe boekaken pintoe boeat ia; ia menoedjoe kaselatan, tapi orang Inggris kasi taoe padanja bahoea „Australie Poeti" tida terboeka boeat laen-laen bangsa. Lantaran ditolak pergi-dateng, bangsa Japan djadi rnenipoenjai alesan tegoe boeat masoek dan loeasken pengaroenja di Manchurie selatan dan Korea. Laen-laen bangsa tida mempoenjai alesan boeat tjega itoe. Boeat marika, pergerakan bangsa Japan didaerah Tiongkok memang tida nanti membikin marika djadi roegi!
Soedah tentoe dilaen abad djoembla pendoedoek doenia bakal djadi bertamba berlipet ganda. Duitschland dan Frankrijk soedah tida bisa disangkal lagi bakal berkerdja keras boeat bikin djoembla marika poenja pendoedoek, jang djadi banjak koerang lantaran peperangan, djadi bertambah doea atawa tiga kali lebih banjak. Tapi kaloe kita bandingken loeasnja tempat jang doenia bisa kasiken pada menoesia dengen besarnja marika poenja — 22 —
djoembla, kita liat doenia sekarang ampir soesa bernapas lantaran terlaloe padet dengen pendoedoek. Toedjoean itoe Perang Doenia jang barocrbaroe ini dilakoeken adalah boeat reboet „daerah-daerah dibawa sinarnja mata hari". Daerah Europa sebagian besar terlaloe 'Jeket pada bagian doenia jang dingin, itoe negri-negri jang teriket disitoe moesti bergoelet boeat dapetken bagian-bagian jang lebi njaman hawanja, dalem pergoeletan mana djadi kaliatan teges itoe kainginan boeat dapetken lebih banjak sinarnja mata hari.
Tiongkok ada mempoenjai hawa oedara jang lebih baek dan hasil boemi jang lebih banjak dari negri-negri laen didoenia. Sebabnja maka sampe ini djem tida ada satoe orang asing jang mampoe poenjaken Tiongkok, jalah lantaran djoemblanja masingmasing negri asing poenja rahajat kalah besarnja pada Tiongkok poenja pendoedoek. Kaloe dalem tempo saratoes taon jang mendatengin, itoe negri-negri asing poenja pendoedoek djadi bertamba, sementara kita poenja djoembla tinggal sebagitoe-sebagitoe djoega, nistjaja kita poenja bangsa kena ditelen djoega. Dalem itoe hal, Tiongkok boekan sadja bakal hilang iapoenja bak dipertoean, malah ia bakal moesna, dan bangsa Tionghoa bersama marika poenja kabangsa'an aken djadi Hnjap sama sekali. Bangsa Mongool dan bangsa Boantjioe telah goenaken djoembla jang sedikit boeat taloekkcn djoembla jang banjak. Tapi kaloe sampe kadjadian negri-negri asing bertjokol di Tiongkok, itoe waktoe djoembla besar jang menelen djoembla ketjil. Malah itoe waktoe boekan sadja marika merasa tida perloe sama kita-orang, tapi boleh djadi djoega marika anggep kita-orang tida tjoekoep baek boeat djadi marika poenja boedak-boedak.
27 Januari 1924.