Tao Teh King/Bab 35

XXXV.

TAO POENJA KEBESARAN.

1. Siapa soedah bisa poenjaken itoe Pikiran Agoeng, woedjoet dari Tao, antero doenia nanti dateng padanja.
2. Marika nanti dateng dengen tida alamken apa-apa jang tida enak, hanja dapet mengaso, slamat dan tentrem.
3. Dengen pengaroehnja muziek dan makanan sedep orang-orang jang liwat bisa ketarik boeat mampir dan berdiam antara kita.
4. Tapi boeat sang lidah Tao ada serba tawar dan tida rasanja apa-apa.
5. Di pemandangan mata ia tida menarik.
6. Di pendengeran koeping ia tida memoeasken.
7. Tetapi di dalem kagoena'an ia tida bisa ada abisnja.

⁂

Lantaran saorang jang soedah bersatoe atawa mengenal pada Tao tida ingin mempoenjai apa-apa, baek harta doenia maoe poen kamashoeran, kabesaran atawa kapoedjian; lantaran ia selaloe maoe mengasih atawa menoeloeng tapi tida perna minta pengasihan atawa pertoeloengan; bekerdja teroes dengen giat dan pande tapi tida perna banggain djasanja, tondjolin diri kamoeka atawa minta orang poenja pengharga'an dan trima kasih, — maka orang jang begitoe soedah tentoe tida aken mempoenjai moesoeh, dan semoea orang soeka deketin hingga manoesia di seloeroeh doenia — ini biasanja dimaksoedken antero karadja'an Tiongkok — djadi ketarik aken dateng padanja, kerna dalem itoe perhoeboengan marika tida nanti alamken apa-apa jang tida enak — tida dikritiek, ditjelah atawa ditjomelin kasalahan atawa tjatjat-tjatjatnja, tida oesah merasa maloe, rendah dan hina, hanja aken fapetken sadja pikiran tenang dan tentrem, jang marika petik dari toeladannja itoe orang soetji, dan jang pengaroehnja membikin si pendenger djadi bisa dapet mengaso dari kaheibatannja pergoeletan doenia. (Ajat 1 dan 2). Boeat bikin orang ketarik ada gampang sekalih. Adakenlah muziek dan makanan sedep, sasoeatoe orang jang liwat aken merandek dan bergoempoel groemoetan, seperti bisa disaksikan di tempat-tempat pesta. Tapi sabaliknja kapan Tao disoegoehin pada orang banjak, belon tentoe aken dapet perhatian besar, kerna boeat lidah ia tida ada rasanja, hanja serba tawar ; boeat mata, koeping, idoeng dan sabaginja poen ia tida bisa memberi kasedepan dan kapoeasan, kerna Tao boekan barang jang bisa dimengarti oleh perasa'an djasmani, hingga orang jang belon tjoekoep tinggi karohaniannja tida nanti bisa menaro harga, maskipoen kagoena'an dan kafaedahannja tida berwates, dan kapan dipake selama-lamanja tida bisa abis. (Ajat 3-7).

Tao Teh King (page 163 crop)