Tao Teh King/Bab 45

XLV.

KABEDJIKAN JANG TIDA KATENTOEAN.

1. Siapa jang merasa pakerdja'annja jang paling besar masih tida sampoerna, aken bekerdja teroes dengen tida ada achirnja.
2. Siapa jang merasa kapoenja'annja jang paling besar masih tida tjoekoep, aken teroes mentjari boeat selama-lamanja.
3. Sikepnja jang paling djoedjoer tjoemah meroepaken kabengkokan (katjoerangan).
4. Kabidjaksana'annja jang paling besar tjoemah djadi kagêndêngan.
5. Oetjapannja jang paling manis dan lantjaf tjoemah seperti omongan garap.
6. Pergerakan membikin hawa dingin ilang pengaroehnja; tida bergerak bikin kalah pada hawa panas.
7. Dengan kabedjikan dan katentreman orang bisa menaloekin doenia.

⁂

Titel dari ini fatsal, „Kabedjikan jang tida katentoean,” ada tjotjok sekalih, sebab apa jang terseboet dalem ajat 1 sampe 5 bisa diärtiken djadi doea matjem : baek dan tida baek.

Dalem artian jang baek ada begini :

Siapa merasa pakerdja'an atawa kapoenja'an­ nja jang paling besar masih tida sampoerna atawa belon tjoekoep, hingga ia bekerdja dan mentjari teroes, itoelah tandanja ia insjaf pada kakoerangan dan kabodoan dirinja, Pakerdja'an jang doenia anggep besar dan penting poen kabanjakan tida berärti, kerna kafaedahannja tjoemah saliwatan sadja. Kapoenja'an atawa pe­ngartian jang doenia pandang besar dan bergoemilang poen tjoemah samatjem barang permaesnan jang haroes didjadiken boeah tertawa'an. Buddha koetika beräda di satoe oetan perna bilang pada moerid-moeridnja, sambil tangannja pegangin sagenggem daon-daon : „Pengartian jang akkoe siarken tjoemah seperti ini daon-daon jang akoe pegang di tangan, dan apa jang akkoe taoe banjaknja ada seperti antero daon jang ada dalem ini oetan.”

Inilah boekan sebab Buddha berlakoe pelit dalem hal memberi pengadjaran, hanja kerna pengartian manoesia masih belon tjoekoep boeat trima ilmoe pengataoean jang terlaloe tinggi dan loeas. Maka kapan orang merasa tida poeas pada pakerdja'annja, maskipoen jang oleh doenia dianggep besar dan penting, baroelah ia bisa lakoeken apa-apa jang lebih baek dan sampoerna ; kaloe orang merasa tida tjoekoep dengen itoe segala peladjaran dan pengataoean jang ia soedah dapet, baroelah ia bisa tambahin pengartiannja dengen apa-apa jang lebih tinggi dan berharga.

Dalem artian jang djelek adalah begini :

Saorang jang tida poeas sama pakerdja'annja, seperti satoe radja jang maski daerah pamerentahannja soedah tjoekoep loeas masih ingin taloekin laen-laen negri, ia moesti tanggoeng banjak poesing dan tjape hati aken bergoelet teroes hingga tida bisa mengaso aken dapetken katentreman. Disini itoe „pakerdja'an” ada berhoeboeng sama gila kabesaran, kamoelja'an dan kamashoeran doenia jang sia-sia, dan berdasar atas kasombongan dan katemaha'an.

Begitoe poen saorang hartawan jang, maski mempoenjai kakaja'an besar, masih merasa belon tjoekoep, ia terpaksa moesti bekerdja keras sampe masoek ka lobang koeboer dengen tida kenal katentreman, dan apa jang ia kedjer ada barang sia-sia jang tida kekel, hingga liwatken kahidoepannja dengen tida dapet kamadjoean satoe apa dalem rohani.

Djadinja djikaloe itoe pakerdja'an dan kapoenja'an jang orang tida merasa poeas ada berhoeboeng dengen pengartian rohani, itoelah ada baek, kerna menganter pada kamadjoean lebih djaoe; kaloe tjoemah oeroesan doenia, ia aken mendjadi satoe palangan boeat dapetken kasampoerna'an batin. (Ajat 1,2).

Bagi saorang jang goenaken antero kapandeannja boeat poeasken kaserakahan pada barang doenia, iapoenja kadjoedjoeran, kabidjaksana'an dan oetjapan jang manis dan merdoe, tjoemah mendjadi satoe kaketjiwa'an, lantaran akibatnja tida baek atawa sia-sia dan berdasar atas kouwkati. (Ajat 3-5).

Dengen bikin gerakan badan, hawa dingin bisa ditolak, dan dengen berdiam, hawa panas bisa disingkirken. Tapi dengen menggoenaken kabedjikan dan katentreman orang bisa taloekin doenia, kerna wateknja manoesia selaloe tida bisa diam, toeroetin nafsoe dan pantjadrija jang membawa njasar. Maka saorang jang bisa tin­des nafsoe kainginannja, hingga bisa hidoep dalem katentreman, tida ada satoe manoesia bisa kalahken padanja, kerna ia soedah bersatoe pada jang maha besar, maha kekel dan tida ada bandingannja. (Ajat 6,7).