Tao Teh King/Bab 44

XLIV.

BERDIRI DIAM.

1. Manatah jang lebih deket dengen kaoe : kamashoeranmoe atawa kahidoepanmoe ?
2. Manatah jang lebih berharga : kahidoepanmoe atawa kakaja'anmoe ?
3. Manatah jang lebih menjilakaken : kaoentoengan atawa karoegian ?
4. Nafsoe kainginan jang besar meminta pengorbanan besar.
5. Kakaja'an besar ada mengandoeng karoe­gian besar.
6. Siapa merasa poeas tida bisa kena tanggoeng kahina'an.
7. Siapa taoe dimana haroes brenti tida nanti hadepken bahaja.
8. Inilah ada orang-orang jang bisa hidoep kekel.

⁂

Itoe bebrapa pertanja'an, dengen ajat-ajat pen­dek berikoetnja jang terdapet dalem ini fatsal, kapan orang soeka perhatiken dan pikir sadalem-dalemnja, ada menggenggem antero soeal dalem manoesia poenja kahidoepan, dan malah ampir sasoeatoe ajat bisa dipetjahken begitoe loeas hingga mendjadi sadjilid boekoe.

Boeat mendjawab pertanja'an jang pertama, soedah tentoe orang nanti bilang kahidoepan ada lebih deket dari-pada kamashoeran jang gampang linjap dan moesna kombali, sedeng boeat pertanja'an kadoea, tentoe kabanjakan nanti bilang kahidoepan ada lebih berharga daripada kakaja'an, maski djoega ada bebrapa orang jang lebih soeka mati dari-pada hidoep miskin atawa kamashoerannja moesna. Tetapi kapan sampe pada pertanja'an katiga, pastilah kabanjakan jang nanti pikir, kaoentoengan — biar poen tjoemah dalem oeroesan doenia — ada lebih baek dari-pada karoegian, kerna orang jang ilang kakajaan, kamashoeran atawa kakoeasa'annja, oemoemnja dianggep bernasif tjilaka. Tapi, seperti kabanjakan pembatja jang soedah kenal philosofie dalem Tao Teh King tentoe bisa mendoega, anggepan begitoe ada bertentangan dengen toedjoeannja Lao Tze, jang pandang kaoentoengan doenia ada lebih menjilakaken dari-pada karoegian. Ini philosofie ada berdasar atas itoe boekti, bahoea boeat dapetken kamashoeran dan kakaja'an besar, atawa laen-laen kaoentoengan doenia goena poeasken hawa nafsoenja, orang poen moesti lakoeken pengorbanan besar. Dan siapatah jang ia korbanken? Jaitoe diri atawa rohnja sendiri. Itoe kamashoeran dan kakaja'an, lantaran sifatnja tida kekel, membikin di saban waktoe terantjem oleh kamoesna'an, maka orang jang terlaloe toeroetin nafsoe kainginannja aken poenjaken itoe, terpaksa moesti goenaken antero tempo, pikiran, perhatian dan kahidoepannja, aken mendjaga dan melindoengken soepaja kakaja'annja tida soesoet, dan pengaroeh, kakoeasa'an atawa kabesarannja tida djadi terdjoengkel atawa merosot toeroen dari kadoedoekannja jang agoeng. Dalem ini pergoeletan, aken mendjaga dan me­megang tegoeh itoe segala milik dan kapoenja'an jang tida kekel, itoe orang djadi loepa boeat perbaeki iapoenja batin, jang mendjadi kedjem, keras, kakoe dan tida kenal kasian ; hati dan pikirannja tida kenal katentreman lagi. hanja penoeh dengen rasa djengkel, iboek dan koeatir, malah djoega sering merasa goesar dan membentji mati-matian pada segala apa jang mengantjem atawa menjaingin kaiiatsilan dan kadaedoekannja. Begitoelah ia djadi loepa pada toedjoean hidoep, tida pikir sama sekalih aken mentjari kamadjoean rohani dan kaselametan diri, hingga dari satoe ka laen kahidoepan doenia ia telah liwatken dengen sia-sia, tida bisa petik apa-apa jang bersifat kekel dan berharga boeat dipoenjaken. Maka kapan orang mendoesin jang iapoenja kahidoepan ada lebih dekel dari-pada nama termashoer, dan ada lebih ber­harga dari-pada kakaja'an doenia, maka Saharoesnja wadjiblah ia mendjaga soepaja djangan katjiwaken kahidoepannja itoe dengen mengedjer barang jang sia sia. Salandjoetnja, kapan ia kailangan itoe segala milik, nama termashoer, kabesaran dan kakoeasa'an doenia, inilah tida haroes dianggep sebagi katjilaka'an, hanja malah satoe kaoentoengan, sebab bikin ia terbebas dari segala iketan jang menghalangin kamadjoeannja, hingga dirinja traoesah moesti dikorbanken lagi boeat toeroetin kainginan dan hawa nafsoenja jang menjasar. (Ajat 1-4)

Satoe pepatah ada bilang ; „Siapa naek tinggi, djatohnja poen dalem." Saorang dagang tida bisa dapet „roegi besar" kapan ia tida berda­gang satjara besar. Maka begitoe lekas satoe orang koempoel kakaja'an besar, ia poen soedah tanem bibit boeat dapetken karoegian besar, jang kapan katerdjang crisis atawa tergoeling, menimboelken kagemperan, dan membikin ia merasa sanget maloe dan tertindes oleh itoe nasif malang. Maka boeat terbebas dari ini matjem ka'ada'an jang tida enak, haroeslah orang beladjar boeat merasa poeas pada sasoeatoe ka'ada'an jang ia hadepken, dan dalem segala pakerdja'an haroes taoe dimana moesti breiiti, jaitoe jang dibilang „mengenal wates", kertia siapa hendak madjoe dan njereedoek teroes, satoe waktoe ia moesti kena aiamken halangan atawa perlawanan tida enak, jang bi­kin ia terdorong moendoer atawa terdjoengkel sama sekalih. Djalan boeat dapet kahidoepan kekel jaitoelah dengen beladjar lepasken segala apa jang bersifat fana, kerna begitoe lekas orang tida ketarik lagi pada segala barang doenia, ia poen tida bisa teriket pada ini kahidoepan, hing­ga itoe segala pasangan jang bertentangan, seperti kakaja'an dan kamiskinan, kamoelia'an dan kahina'an, kaoentoengan dan karoegian, tida bisa pengaroehken pada dirinja, jang pandang segala apa saroepa sadja. Disinilah ada poko dari katentreman, jang bikin orang bisa bersatoe pada Tao. (Ajat 5-8).

Tao Teh King (page 208 crop)