Tao Teh King/Bab 6

VI.
ATSAL MOELAHNJA SEGALA BENDA.

1. Sabagi djoega mengalirnja soengei di tanah lembah, itoe Soemanget Alam blon perna djadi kering.
2. Akoe namaken ia sabagi Iboe jang Dalem.
3. Pergerakannja itoe Iboe jang Dalem akoe anggep ada djadi poke dari Langit dan Boemi.
4. la tinggal tetep selamanja dan bergerak dengen tida mengandoeng maskoed jang tentoe.

⁂

Dalem ini fatsal Lao Tze ada loekisken Tao dengen Iaen nama, jaitoe „Soemanget Alam" dan „Iboe jang Dalem". Sabagi „Iboe" lantaran ia melahirken segala benda dan machloek. Dinamaken „dalem" — disini dimaksoedken dalemnja aer — lantaran disamaken seperti soengei jang mengalir tida brentinja dan blon perna kering.

Sari dari penghidoepan jang mendjadi pokok pertama memang dalem kitab-kitab agama sring diandehin sabagi satoe laoetan dalem, jang tida bisa didjadjakin, seperti oepamanja daiem kitab Genesis ada dibilang; „Itoe Soemanget dari Toehan bergerak di atas moeka aer." (Ajat 1 dan 2).

Jang pergerakannja ini „Iboe jang Dalem" ada djadi poko dari Langit dan Boemi itoelah soedah sring dibitjaraken dalem bangsa Tionghoa poenja katerangan tentang kadjadiannja ini alam, jaitoe dari Thay-kek telah moentjoel Yang dan Yin jang pergerakannja menimboel menimboelken segala machloek dan benda. Djadinja Tao, dalem roepa sabagi „Soemanget Alam" atawa „Iboe jang Dalem," boleh disamaken sabagi Atma dari Philosofie Hindoe jang dipandang djoega sabagi sarinja-akar dari segala apa jang ada. Sifatnja jang kekel bisa diketaoei dari oetjapan „Ia tinggal tetep selamanja." Hal ia bergerak dengen tida mengandoeng maksoed jang tentoe itoelah boekan berarti pergerakannja itoe ada satjara bodo. Sasoeatoe orang bisa insjaf bahoea bekerdjanja Natuur ada teratoer beres dan rapih, tetapi toedjoean atawa maksoednja boekan meroepaken perge­rakan dan kagiatan, hanja dari kapandean boeat menganter pada segala machloek dan benda aken sampe ka itoe tempat jang ditoedjoe zonder desekan atawa paksa'an. Katerangan lebih djelas ada begini : Natuur adaken itoe aer boeat diminoem oleh manoesia atawa binatang dan menjegerin tetaneman. Orang tani jang hendak menjawab moesti berichtiar sendiri aken bikin itoe aer mengalir ka dalem sawah-sawahnja. Satoe ingenier moesti atoer sendiri pekakas jang bisa bikin oewap dari itoe aer bisa digoenaken aken djalanken locomotief dan laen-laen pesawat. Orang moesti oesoet sendiri resianja natuur boeat dapetken roepa-roepa kafaedahan dari itoe barang-barang bahan jang tersedia. Soepaja manoesia bisa goenaken otak dan kapan­dean memikir, Natuur bri kasempetan aken manoesia tambah lama mendapet toeboeh jang semingkin baek dan mempoenjai alat pemikir serba lengkep, dan lama-lama manoesia nanti bisa mendoesin sendiri toedjoeannja hidoep dan bagimana moesti dapetken kasampöernaän. menimboelken Ini tjara bekerdja dari Natuur oleh Lao Tze ada didjadiken model dari atoeran pemerentahan negri. Satoe Radja Boediman tida oesah bekerdja ripoeh aken pimpin raliajatnja soepaja djadi madjoe dan pande. Soedah tjoekoep kaloe sediakan makanan soepaja peroetnja kenjang dan badannja sehat. Jang paling perloe itoe Radja kasih toeladan baek soepaja bisa mendjadi tjonto pada sekalian pembesar dan rahajatnja. Inilah jang dibilang „Bergerak zonder mengandoeng maksoed jang tentoe," tapi segala apa teratoer dengen beres dan rapih.