Tao Teh King/Bab 61

LXI.

KABEDJIKANNJA MERENDAHKEN DIRI.

1. Satoe karadja'an mendjadi besar lantaran sifatnja sabagi soengei jang terletak di tempat rendah, hingga ia mendjadi poesat ka mana segala soengei-soengei dalem doenia di sapoeternja ada menoedjoe.
2. Ka'ada'annja seperti sifat prampoean, jang bisa taloekin lelaki gagah dengen prilakoe lemah lemboet dan menoeroet. Itoe sifat menoeroet ada woedjoet dari merendahken diri.
3. Maka djikaloe saboeah karadja'an besar merendahken diri di hadepan karadja'an ketjii, ia bisa bikin si ketjil tadi mendjadi kapoenja'annja.
4. Demikian poen djikaloe satoe negri ketjil toendoekin kepala di hadepan negri jang besar, ia bisa dapet perlindoengan dengen santosa.
5. Demikianlah jang satoe djadi dapet tambah kawan pengikoet dan jang laen dapet toendjangan jang berharga.
6. Djikaloe itoe karadja'an besar tida kandoeng laen kainginan dari-pada bikin manoesia berkoempoel djadi satoe dan pelihara pada marika, karadja'an jang ketjil poen tida kandoeng laen kainginan dari-pada bersariket dan bekerdja di bawah prentahnja itoe karadja'an besar.
7. Demikianlah kadoea fihak djadi dapet kapoeasan, tapi boeat woedjoetken itoe, fihak jang besar haroes beladjar merendahken diri

⁂

Lao Tze, sabagi djoega Khong Tjoe, ada hidoep dalem satoe djeman jang sanget kaloet, koetika dijnastie Tjhioe soedah ampir berächir, maka tiada heran kaloe dalem peladjarannja ia ada bitjaraken djoega soeal menentremken negri jang djadi toedjoeannja kabanjakan orang boediman dan poedjonggo-poedjonggo di itoe djeman.

Disini Lao Tze tjoba petjahken itoe soeal jang sanget roewet dengen satjara saderhana, jaitoe negri jang besar atawa koeat haroes beladjar aken berlakoe rendah dan lemah-lemboet pada negri negri tetangga jang ketjilan, sabagi daja boeat dapetken persatoean jang didasarken atas kaädilan, boekan dengen goenaken paksa'an jang bersifat menjarang dan menaloekin. Itoe tjonto dari sifatnja soengei ada terang sekalih. Satoe soengei mendjadi besar lantaran banjak laen-laen soengei ketjil jang toempahken aernja. Aer dari itoe soengei-soengei ketjil tida nanti mengalir pada itoe soengei besar djikaloe ia tida terletak lebih rendah dari jang laen-laen. Begitoelah dari karendahannja maka itoe satoe soe­ngei bisa mendjadi besar, seperti djoega saorang prampoean jang lemah-lemboet bisa perboedakin satoe lelaki jang gagah dan berkoeasa.

Lao Tze tida soeka pada peperangan dan tentangin segala kakerasan sebab, dengen perhatikan sifatnja Natuur, ia dapet liat dengen terang jang orang bisa sampeken maksoednja dengen lebih gampang kapan berlakoe rendah dan saderhana, zonder timboelken bentrokan dan kakaloetan. Satoe negri besar dan tegoeh jang dengen singkirken sifat angkoeh dan bangga bisa berlakoe rendah pada tetangganja jang ketjil dan lemah, tida nanti terpandang hina, hanja malah kabesarannja djadi tambah goemilang lantaran negri-negri ketjilan merasa ketarik dan berlindoeng padanja dengen soeka sendiri.

Kakaloetan doenia di djeman sekarang ini sabagian ada dari lantaran orang soedah lempar ka samping itoe sifat merendah dan tjoba sampeken maksoednja dengen goenaken kakerasan dan ka'angkoehan, hingga boekan sadja oeroesan jang berhoeboeng dengen politiek doenia, malah kalangan pergaoelan hidoep poen mendjadi kaloet. Oepamanja, itoe sifat lemah-lemboet dan menoeroet dari prampoean, tambah lama semingkin linjap, lantaran timboelnja angen angen aken reboet kadoedoekan jang sama seperti orang lelaki. Tetapi berbareng dengen itoe marika poen kailangan haknja boeat dapet perlindoengan dan pembela'an dari fihak lelaki atawa poen dari familienja. Dan itoe pertjoba'an aken reboet pakerdja'an jang tadinja dipegang oleh lelaki membikin banjak ajah djadi werkloos hing­ga roemah tangganja tanggoeng melarat, dan sabaliknja ada banjak iboe jang terlaloe ketarik sama kainginan boeat tinggalken pakerdja'an orang prampoean soedah loepaken kawadjiban aken mengoeroes roemah tangga dan rawat familie, hingga anak-anaknja djadi terlantar. Ba­njak orang prampoean jang pinter tida maoe menika, atawa soesah dapet soeami, lantaran banjak lelaki takoet menika kerna koeatir diperboedakin oleh istrinja jang terlaloe pinter dan berkepala batoe. Maskipoen antara bangsa Timoer ini gerakan dari fihak prampoean belon begitoe menjolok seperti di negri-negri Parat, tetapi soedah bisa dirasain djoega pengaroehnja jang meroesak katentreman. Maka biarpoen bagimana adil dan pantes kainginan fihak prampoean aken dapet hak sama rata sabagi lelaki, tetapi lantaran bertentangan sama wet-nja Natuur jang selaloe adaken perbeda'an atas pakerdja'an dan kawadjiban dari itoe doea golongan, maka kasoedahannja tida bisa laen dari kakaloetan. Maka dengen menggoenaken Lao Tze poenja philosofie sabagi poko-dasar, ada banjak soeal dari kakaloetannja doenia bisa dioesoet sebab dan lantarannja, jang kapan soedah dimengarti tiada soesah didapet pametjahannja. (Ajat 2-7).

Tao Teh King (page 282 crop)