Tao Teh King/Bab 62

LXII.

TAO JANG GAMPANG DIGOENAKEN.

1. Tao ada djadi peliidoeng resia dari segala benda.
2. la menambahi kabaekannja orang-orang jang berhati baek dan menghalangin perboeatannja orang-orang djahat.
3. Dalem sembarang waktoe ia bersedia aken memberi nasehat jang baek; kamoerahannja selaloe ada diminta.
4. Malah pada marika jang tida baek ia tida tinggalken sendirian.
5. Oleh kerna itoe kapan satoe Keizer naek di atas karadja'an dan mengangkat tiga Hertog boeat mendjadi minister jang paling tinggi, biarpoen ada orang-orang jang memberi bingkisan batoe giok jang berharga mahal dan berkandaran kreta-kreta jang ditarik oleh ampat ekor koeda, itoe samoea tida begitoe baek seperti saorang jang berdoedoek diam dan tawarken bingkisan jang beroepa Tao.
6. Apakah sebabnja orang-orang di djeman koeno hargaken pada Tao begitoe tinggi ?
7. Boekankah lantaran Tao bisa didapet dengen gampang satiap hari dan dengen perantara'annja orang bisa terlolos dari kadosa'an ?
8. Lantaran inilah maka ia dihargain seperti barang jang paling besar di kolong Langit.

⁂

Dalem ini fatsal kombali Lao Tze beber sifatnja Tao, dan seperti biasa dalem penoetoeran samatjem ini, loekis loekisannja ada samar hing­ga soesah dimengarti maksoednja djikaloe tida diterangin lebih loeas.

Disini kaliatan itoe Tao boekan tjoemah bersifat seperti Natuur atawa iboe dari segala ben­da, hanja ada djadi djoega Wet Kabeneran jang paling tinggi, seperti Sri Krishna, Kwan Im ata­wa Roh Soetji jang bertempat dalem samoea machloek dan segala apa, jang bersedia aken menoeloeng dan melindoengken pada siapa jang perloe dan ingin dapet pertoeloengannja.

Sabagi sari dari kabaekan, katjinta’an dan ka­beneran, dengen semboeni ia ada djadi pelindoeng jang tida kataoean atas segala benda, ser­ta selaloe menambahi kabaekannja orang-orang jang baek dan menghalangin atawa menjegah pada orang-orang djahat aken lakoeken teroes-meneroes kadjahatannja. Pada orang-orang jang betoel-betoel baek — jang lakoeken kabaekan dengen tida harep poedjian, gandjaran atawa pembalesan — ia bikin marika bisa berboeat le­bih banjak dan lebih bener lagi dengen dikasih pengartian, ka’awasan, kasedaran dan katentreman, samentara pada golongan pendjahat ia kasih gandoelan beroepa karma djelek, pengalaman pait dan getir, jang membikin boekan sadja ia tida selamanja leloeasa mendjalanken kadjahatan teroes-meneroes, hanja nanti menganter pada kasedaran jang achirnja membikin ia insjaf atas kafaedahannja berlakoe baek. Dan lagi pada marika jang perloe pertoeloengan, jang hendak mentjari djalan kasoetjian, Tao senantiasa bersedia aken djadi penganter, lantes moentjoel kapan dipanggil, sedeng pada marika jang bersedih atawa bersangsara, Tao bersedia aken mendjadi djoeroe penghiboer, kaloe sadja Itoe orang maoe goenaken pikirannja boeat mentjari dan bermoesjawarat pada Tao jang ada bertempat dalem dirinja sasoeatoe orang jang, baek atawa poen djahat, tida ada satoe poen jang diasingin atawa ditinggalin sendirian. Dengen begitoe kita bisa liat ini loekisan tentang Tao ada sama betoel dengen apa jang Sri Krishna, dalem Bhagawad Gita, ada toetoerken tentang sifat dirinja. (Ajat 1-4).

Maka itoe segala kamoelia‘an doenia dan bingkisan jang paling mahal tida begitoe besar harganja seperti djikaloe dengen diam-diam orang bantoe menjiarken Tao dalem doenia sabagi hadia atawa bingkisan pada Keizer jang baroe naek di atas tachta, sebab kapan itoe Keizer bisa memerentah menoeroet Tao, atawa rahajatnja mengenal dan berlakoe jang menjotjoki dengen itoe Sari Kabeneran jang paling tinggi, nistjaja pamerentahannja mendjadi mamoer dan tentrem. (Ajat 5).

Keizer-keizer boediman di djeman koeno menaro harga pada Tao begitoe tinggi, lantaran sifatnja amat saderhana, hingga gampang didapetken satiap hari, dan dengen berlakoe menoe­roet Tao orang bisa terlolos dari kadosa’an, jaitoe lantaran tida kerdjakén poelah perboeatan jang berdosa. Tao poenja sifat saderhana, jang gampang dipeladjarin satiap hari, itoelah jang membikin ia dapet pengharga’an tinggi dan oleh orang-orang boediman dipandang sabagi barang jang paling besar di kolong langit. (Ajat 6-8).