Tao Teh King/Bab 63

LXIII.

MENDJAGA LEBIH SIANG.

1. Bekerdja dengen tida mengandoeng maksoed, berboeat apa-apa dengen tida harepken hatsil atawa kaoentoengan, mentjari jang besar dari apa jang ketjil, jang banjak dari jang sedikit, membales kadjahatan dengen kabaekan, mendjaga karoewetan dan kasoekeran salagi masih gampang, dan oeroes pakerdja'an jang besar koetika baroe sadja dimoelai,— inilah ada tjara bekerdja dari Tao.
2. Segala apa jang soeker moelainja serba gampang, dan barang jang besar dimoelai dari jang ketjil.
3. Maka itoe orang-orang boediman bisa lakoeken segala pakerdja'an besar dengen zonder menjoba boeat bikin marika mendjadi besar.
4. Siapa jang gampang menjataken setoedjoe djarang bisa pegang djandjinja.
5. Siapa jang pandang segala apa dengen gampang sadja, aken dapetken banjak kasoekeran.
6. Maka itoe saorang Boediman memandang besar pada apa jang ketjil, dan dengen tjara begitoe belon perna dapetken kasoesahan.

⁂

Dalem ini fatsal ada terdapet bibit-bibit pikiran jang satoe-satoenja ada mengandoeng sari kabeneran begitoe loeas hingga kapan moesti dibentangken sa'anteronja, bisa mendjadi satoe boekoe tebel. Seperti dalem fatsal jang laloe soedah dibilang, sifatnja Tao ada begitoe saderhana hingga bisa didapet satiap hari, jaitoe gampang sekalih dipeladjarin, lantaran mana barang siapa soedah mengarti baek maksoed dan toedjoeannja aken terbebas dari kasoekeran dan terlolos dari kadosa'an.

Sekarang dalem ini fatsal Lao Tze memberi katerangan Tao poenja tjara bekerdja, jang kapan orang bisa tiroe pastilah aken bikin ia terbebas dari segala karoewetan doenia dan dapetken katentreman.

Sabagian besar, kaloe tida boleh dibilang samoea, pakerdja'an jang manoesia lakoeken selaloe ada disertaken salah-satoe toedjoean atawa maksoed, jang kabanjakan ada boeat kaoentoengan atawa kabaekan diri sendiri. Biar poen pakerdja'an amal jang toedjoeannja goena kabaekan laen orang, oentoek kabangsa'an atawa negri, masih orang maoe liat hatsilnja. Ini kainginan boeat tarik kaoentoengan, kapoedjian atawa pengharga'an, atawa boeat meliat hatsil jang bagoes, selaloe ada disertaken djoega bahaja boeatalamken rasa kadoehoeng (disappointed), ketjiwa, mendongkol, djengkel, goesar, sedih, dan malah poetoes harepan, djikaloe itoe pakerdja'an memberi hatsil sabaliknja dari apa jang diharepken. Siapa mengira bisa mendapet oentoeng tapi berbalik kena roegi; bakal terima poedjian tetapi kasoedahannja kena didamprat dan ditjelah; harep negri atawa bangsa djadi moelia dan madjoe, tetapi malah semingkin terhina atawa kaloet,— pastilah aken terganggoe katentremannja. Maka tjoemah dengen melakoeken kawadjiban zonder harepken apa-apa, tida perdoeli oentoene atawa roegi, berhatsil atawa gagal, tida ambil poesing pada poedjian atawa tjelahan, baroelah orang bisa terlolos dari itoe segala perasa'an tida enak, kerna itoe sikep ada tjotjok sama tjara bekerdjanja Tao.

Begitoepoen kapan orang hendak lakoeken satoe pakerdja'an besar, jang membawa kafaedahan bagi orang banjak, tida perloe ia koedoe riboet poekoel gembrèng aken gemborin maksoednja jang besar itoe, hanja ia haroes moelai dari jang ketjil dan sedikit lebih doeloe, seperti oepamanja, ia moesti biasaken dirinja boeat bekerdja diam-diam dengen tida lekas bosen, tida hargaken poedjian dan tida perdoeli tjelahan, berlakoe dengen soenggoe hati dan djoedjoer, mempoenjai toedjoean tetep, dan tida pandang rendah boeat moelai satjara ketjil bersama sedikit kawan lebih doeloe, dengen dipilih jang tjotjok dan bisa saling mengarti atawa bersatoe haloean, kerna djikaloe dalem kalangan ketjil dan gampang dioeroes orang tida mampoeh bekerdja baek dan rapih, bagimanatah bisa diharep ia nanti sanggoep lakoeken gerakan besar dengen berhatsil? Kapan si paman tani tida mendjaga dengen terliti iapoenja bibit, bagimanatah ia bisa dapetken panen jang bagoes? Djikaloe soedah ada bibit jang baek dan tanah jang gemoek, dengen sendirinja itoe tetan eman nanti toemboe soeboer. Sabaliknja kaloe itoe bibit djelek dan disebar atas tanah koeroes dan kering, maski orang bekerdja bagimana radjin dan giat, tjape lelahnja aken tersia-sia atawa tjoemah memberi hatsil jang tida satimpal. Maka itoe saorang boediman bisa melakoeken pakerdja'an besar zonder riboet dan tida pernah tjoba aken bikin apa jang ia lakoeken kaliatan bersifat besar. Inilah lantaran barang jang besar ada dimoelai dari jang ketjil, dan apa jang soeker berätsal dari jang gampang lebih doeloe Lantaran kabanjakan orang berälpa aken atoer pendjaga'an dari bermoelah, maka bisa timboel segala matjem karoewetan jang soeker diberesin. Djikaloe api soedah berkobar dan merèmbèt pada woewoengan roemah, beberapa slang pompa tida bisa loepoetken antero roemah itoe mendjadi aboe, sedeng djikaloe orang lantes ambil tindakan koetika itoe api di dapoer kaliatan mendjilat dingding, dengen sagajoeng aer itoe bahaja bisa di- tjegah.

Maka itoe orang-orang jang mengenal Tao selaloe djaoeken diri dari segala apa jang bisa menimboelken karoewetan, tida menoenggoe sampe terbit kaonaran jang soeker diberesin baroe ia hendak menjingkir. la fahamken dengen terliti pada itoe poko dasar jang mendjadi permoela'an dari segala apa jang aken timboel, kerna kapan soedah mengarti baek pokonja oeroesan, ia tida bisa terlibet dalem karoewetan jang dateng dari segala tjabang-tjabang jang mendjalar koelilingan.

Oepamanja, itoe beban sanget berat jang orang tanggoeng lantaran moesti rawat dan oeroes familie — istri dan sakean banjak anak, mantoe dan tjoetjoe-tjoetjoe — pokonja tjoemah lantaran di satoe sa'at ia merasa ketarik pada satoe prampoean hingga terbit pernikahan. Ada lebih gampang aken satoe lelaki tindes hawa nafsoe birahinja jang moentjoel saliwatan dari pada oeroesin makan pakenja, pendidikan dan pimpinan atas beberapa dozijn anak dan tjoetjoe jang sabagian tida poenja pakerdja'an, atawa berpenjakitan, atawa soeker dioeroes, atawa kalaparan.

Dalem kalangan philosofie jang tinggi, ada dioendjoek djoega bagimana sifatnja Toehan orang bisa kenalin dengen fahamken pada natuur dan kahidoepannja sasoeatoe machloek dan manoesia. Inilah jang dibilang „mengenalin jang besar dari jang ketjil.“ Dengen moelai mengatoer kaberesan batin sendiri, orang poen bisa taoe tjara bagimana moesti berlakoe dengen bener dalem soeal mengoeroes roemah tangga, pergaoelan hidoep, dan djoega membèrèsken doenia.

Poko dasar paling oetama boeat berlakoe pantes dalem segala hal, adalah kasih mendjalar pri katjinta'an pada segala apa jang ada zonder memilih antara djahat dan baek, atawa indah dan boesoek, kerna Tao melipoeti samoea benda dan machloek di ini alam zonder adaken katjoealian. Maka „membales kadjahatan dengen kabaekan“ ada perloe didjalanken oleh saorang jang hidoep menoeroet Tao, jang pandang segala apa saroepa sadja, dan tjoemah dengen menjinta dan berlakoe baek jang tida mengenal perbeda'an, baroelah bisa didapet itoe persatoean dengen Tao jang mendatengken kasampoerna'an. (A jat 1-3).

Ada banjak orang jang biasa membilang, „memang ini doenia ada tempat siksa'an“, atawa „kasoesahan di doenia tida ada abisnja.“ Menoeroet Lao Tze, itoe siksa'an atawa kasoekeran sabenernja orang tida oesah alamken, kalce sadja ia soedah fahamken betoel-betoel segala sebab dan lantarannja. Itoe kasoekeran dan kasedihan soedah moentjoel lantaran orang tida bisa atoer pendjaga'an terlebih doeloe, hanja pandang segala apa dari fihak gampangnja sadja. Tida nanti ada orang bisa ditoedoeh soedah moengkir djandji kapan ia tida terlaloe gampang menjataken „setoedjoe“. Maka dengen memandang besar pada apa jang ketjil, tida berlakoe sembarangan dan maen menggampangin sadja, orang nanti bisa terbebas dari kasoesahan. (Ajat 4-6).

Ada banjak orang jang bilang, Lao Tze poenja philosofie ada berisi banjak pikiran-pikiran origineel jang mengagoemken, tapi boeat memberesken kakaloetan doenia dari ini djeman soedah pasti tida bisa dipake. Orang jang bilang begitoe teranglah soedah keliroe fahamken maksoed dan toedjoeannja itoe Goeroe Toea jang, seperti dioendjoek dalem fatsal di atas, ada sampe mengarti bahoea kapan kakaloetan soedah meradjalela, tida gampang bisa dibikin beres oleh kapandean manoesia, maka ia poedjiken soepaja orang atoer pendjaga'an lebih siang, sebab apa jang soeker moelainja serba gampang, dan apa jang besar moelainja dari jang ketil. Djadinja toedjoean dari peladjarannja Lao Tze ada mirip dengen pepatah-pepatah, „sedia pajoeng sabelon toeroen oedjan,“ atawa „djaoeken penjakit ada lebih perloe dari pada meminoem obat.“ Dan ini matjem peladjaran, biarpoen tida bisa didjalanken dalem doenia sekarang jang kakaloetannja begitoe heibat, masih bisa digoenaken oleh manoesia di segala djeman jang hendak mentjari katentreman goena dirinja sendiri.