Tao Teh King/Bab 3

(Dialihkan dari Tao Teh King/III)
Tao Teh King
Membikin Tentremnja Rahajat

  1. Tida mengagoengken sifat dan kapandean jang berharga menjegah timboelnja manoesia poenja kadengkian dan nafsoe aken bersaing.
  2. Tida menghargain pada segala apa jang langka dan soeker didapet menjegah manoesia poenja nafsoe aken mentjoeri.
  3. Tida mentjari atawa mengasih liat apa-apa jang menarik hati membikin pikiran ma­noesia berada dalem katentreman.
  4. Demikianlah satoe Nabi, kapan memegang prentah, membikin kosong hati manoesia dari segala kainginan, penoehken marika poenja peroet soepaja kenjang, kasih mengaso itoe anggota badan, bikin keras dan koeat toelang-toelang. Toedjoeannja jang teroetama adalah tjegah manoesia mengenal pengataoean djahat jang menimboelken nafsoe kainginan, dan berdaja hingga marika jang berpengataoean tida brani goenaken itoe.
  5. la goenaken sikep tida-berboeat (inaction, wu-wei), dan dengen begitoe ia bisa pegang prentah atas semoea.

Dalem peroendingan di atas Lao Tze kasih oendjoek satoe poko dasar bagimana ini nia bisa dibikin tentrem. Itoe poko tiada laen, hanja manoesia poenja kadengkian dan nafsoe aken bersaing satoe pada laen haroes dilinjapken. Aken sampeken ini maksoed, paling perloe kita-orang djangan poedji, oempak, moeljaken atawa kagoemken pada orang-orang jang pande, terpeladjar, tjerdik, pinter, berdjasa, dermawan, gagah, berboedi, dan laen-laen sifat berharga, sebab itoe semoea poedjian, pemoedjaän dan pengharga'an pada jang satoe, soedah tentoe menimboelken kadengkian pada jang laen-laen, jang tjoba berdaja aken saingin dan dapetken djoega itoe kamoelja'an. Kasoedahannja ini matjem kadengkian dan per­saingan membikin timboel kalakoean palsoe dan poera-poera : orang berboeat baek boekan lantaran hargaken kabaekan, hanja kerna ingin trima poedjian dan didjoengdjoeng oleh pu­bliek; orang beladjar aken dapet ilmoe pengataoean boekan hargaken pada priboedi, hanja terdjoeroeng oleh kainginan soepaja dirinja terpandang tinggi dan dimoeljaken. Begitoelahachirnja doenia djadi, terlipoet oleh kapalsoean dan kaboeroekan : tida ada kadjoedjoeran, katoeloesan dan kasoenggoean hati: tida ada jang dengen diam-diam maoe berboeat baek, menoeloeng, menderma atawa pegang tegoeh pri kebeneran lantaran tjinta pada sesama manoesia, hanja semoea berdaja aken bikin reclame dan kedjer populariteit. Djikaloe boeat dapetken itoe pengharga'an dari orang banjak ia moesti lakoeken perboeatan jang tida djoedjoer, tjoerang, kedjem dan djahat, ia tida bersangsi aken djalanken itoe. Sikep begitoe dari orang-orang berpengaroeh, pemimpin rajat, journalist, politicus dan staatsman, membikin doenia djadi kaloet, dan itoe persaingan dan kadengkian mendjalar antara satoe party dengen laen party, satoe negri dengen laen negri dan satoe bangsa dengen laen bangsa. Ini semoea pokonja lantaran manoesia terlaloe gemer memoedja pada pemimpin-pemimpin besar, pendekar-pendekar kabangsa'an, dan sabaginja lagi, hingga bebrapa orang jang ingin bikin namanja termashoer, bisa pegang kakwasa'an dan kabesaran, selaloe poeter otak boeat sampeken marika poenja ambition dengen tida perdoeliken bagimana kasoedahannja. (Ajat 1).

Pergoeletan paling heibat dari manoesia di ini djeman teroetama ada boeat kedjer kakaja'an, sebab dengen pengaroehnja harta orang bisa lebih gampang dapetken segala barang doenia jang ia inginken. Dan itoe harta kakaja'an, diambil kasarnja, ada terdiri dari emas, perak dan batoe permata. Kapan orang sedia banjak ini tiga matjem benda, ia poen gampang bisa dapetken jang laen-laen. Maka boeat poenjaken itoe emas, perak dan batoe permata, banjak orang jang tida sangsi aken lakoeken segala matjem kadjahatan, seperti pentjoerian, penipoean, perampasan, pemboenoean dan sabaginja lagi. Manoesia begitoe hargaken pada emas, perak dan batoe permata, boekan dari sebab itoe barang-barang sifatnja memang sanget penting dan bergoena, hanja meloeloe lantaran soeker didapet atawa djarang ada. Dibandingken kagoena'annja, besi ada lebih berfaedah dari-pada emas, tapi sebab besi gampang didapet maka manoesia koerang hargaken. Kapan inten, moetiara dan batoe giok sama banjaknja seperti krikil atawa koraal, nistjaja tida ada saorang jang ambil poesing boeat pe-

reboetin. Djadi boekan kabagoesan dan kaindahannja, hanja lantaran djarangnja, soekernja didapet, membikin manoesia timboel nafsoe aken poenjaken. Kapan saorang jang kaäoesan di padang pasir disoeroe pilih antara sabotol minjak roos dan satoe tjangkir aer, tentoe ia lantes ambil jang blakangan. Begitoe poen saorang jang ampir mati dari kalaparan, lebih hargaken satoe gantang beras dari pada satoe karoeng moetiara.

Soedah terang itoe emas, perak dan batoe permata tida ada kafaedahannja jang langsoeng bagi manoesia, baek boeat kapentingan rohani atawa poen doeniawi. Djikaloe sadari djeman koeno orang begitoe hargain, itoelah tjoemah lantaran ada bebrapa orang jang pande dan mengarti telah oendjoek dan toetoerken kamoelja'an dan kabagoesannja, hingga manoesia djadi tergerak hati aken poenjaken, maski sabenernja dengen langsoeng itoe benda-benda tida poenja kagoena'an satoe apa. Maka boeat tentremken manoesia poenja pikiran, jang kasoedahannja mendatengken djoega katentreman pada doenia, Lao Tze boekan tjoemah ingin kita-orang djangan hargaken pada sasoeatoe orang jang pande, pinter, baek, dermawan, boediman, enz. enz., tapi djoega ada perloe manoesia djangan dikasih liat atawa dikasih kenal pada barang-barang jang langka, jang kasoedahannja tjoemah menimboelken kaserakahan. Manoesia poenja batin mendjadi kaloet dan tida bisa tentrem lantaran hatinja ketarik dan selaloe pikirin pada segala apa jang indah dan langka. Kaloe matanja tida kapintjoek pada kabagoesan dan kaeilokan, lidahnja tida kemaroek pada kalezadan, koepingnja tida kasemsem pada soeara merdoeh dan lemah-lemboet jang berisi djoega oempakan dan poedjian, dan idoengnja tida kaelep dalem kaharoeman, pastilah banjak kabingoengan, kadjengkelan dan kasoekeran aken tersingkir, hingga hidoepnja manoesia mendjadi tentrem dan santosa. Maka siapa hendak slametken manoesia, teroetama haroes mendjaga soepaja marika djangan sampe bisa deket atawa kenal pada itoe segala matjem penggoda jang achirnja soedah pasti aken meroesakken batin (Ajat 2 dan 3).

Apa jang manoesia anggep sabagi „pengataoean" kabanjakan ada djadi bibit dari kaserakahan, jaitoe membangkitken kainginan boeat dapetken ini atawa itoe jang kasoedahannja tjoemah timboelken segala matjem kasoekeran. Kapinteran manoesia selaloe ditoedjoeken pada barang doenia jang tida kekel, maka satoe Nabi jang memerentah doenia selaloe mendjaga soepaja itoe orang-orang pinter dan pande tida brani siarken atawa djalanken kapinterannja, soepaja kaserakahan tida menoelar dan tersiar antara rahajat, jang soedah tjoekoep kaloe dikasih makan kenjang, traoesah moesti banting toelang satengah mati boeat dapetken sasoeap nasi, tetapi berbareng dengen itoe didjaga soepaja hatinja tinggal kosong, terdjaoe dari segala matjem kainginan jang membikin moesna katentreman, kerna kapan satoe kainginan kasampean, moesti lantes timboel poelah bebrapa poeloeh kainginan baroe, dan kapan itoe kainginan-kainginan tida kasampean, sang hati djadi brontak, kaloet dan tergontjang, hingga itoe orang djadi linjap kasenangan dan katentremannja.

Seperti orang soedah taoe, dalem segala agama jang besar ada dioendjoek, aken mentjari kaslametan manoesia haroes koerangken atawa tindes sama sekalih segala kainginannja. Tapi ada amat soeker bagi manoesia jang soedah terlibat oleh segala barang doenia, lepasken diri soepaja terbebas sama sekalih dari itoe tali-tali pengiket. Tapi Lao Tze poenja peladjaran boekan tjoemah menjoeroe orang lepasken kainginan jang soedah toemboe dalem hatinja dan berakar dalem, hanja hendak singkirken itoe bibit-bibit soepaja tida dapet kasempetan aken toemboe : manoesia haroes didjaga soepaja hatinja tinggal kosong, terdjaoe dari segala kainginan jang sia-sia. Tindakan jang pertama aken sampeken ini toedjoean, jaitoe menjegah orang-orang pande dan pinter soepaja djangan siarken pengataoeannja pada orang banjak. (Ajat 4).

Aken djalanken ini haloean, satoe Radja Nabi haroes mengambil sikep „tida berboeat," jaitoe tida menggretjok aken kasih oendjoek kapandean dan kakwasa'annja. Soedah tjoekoep djikaloe ia memerentah dengen toeladan, dengen kasih liat iapoenja kabedjikan sapenoeh-penoehnja pada iapoenja rahajat. Apa djoega jang ia lakoeken, tida sedikit poen ada melengket kapentingan oentoek dirinja sendiri, dan dengen begitoe rahajat djadi taro indah dan masing-masing djalanken kawadjibannja zonder diprentah lagi. (Ajat 5). Katerangan lebih djaoe dari Lao Tze poenja peladjaran „tida-berboeat" (wu-wei) aken ditoetoerken dalem laen fatsal, sebab oedjar dari ini ajat ada terlaloe ringkes.