Zonder Lentera/Bab II
ZONDER LENTERA
Koetika referee tioep abis fluitnja aken menandaken pertandingan berachir, langit ada gelap dan grimis kasar-kasar moelai toeroen ka boemi. Itoe ratoesan orang jang berkoempoel di sapoeter lapangan Tegalsawa, aken saksiken pakoempoelan voetbal Tionghoa „Sie Djin Koei” bertanding dengen club Indonesier „Ardjoena”, dengen terboeroe-boeroe telah menjingkir aken tjari perlindoengan. Liwat bebrapa minuut komoedian, aer langit soedah toeroen ka boemi seperti ditoeang, dan dari sebab tjoemah sedikit sadja kandaran jang terdapet di pinggir djalan, maka sabagian besar dari penonton terpaksa mampir di roemah-roemah orang Boemipoetra di deket sitoe aken menoenggoe soeroetnja oendjan.
Tapi itoe oedjan melit sekali; satoe djam lamanja ia toeroen dengen lebet, terbantoe oleh tioepannja angin kidoel jang santer, hingga antero straat seperti tertoetoep oleh daon-daon jang rontok dan tjabang-tjabang aloes dan kering jang patah dari poehoen-poehoen jang toemboe di pinggir djalan. Sampe djam 7 malem baroelah itoe angin brenti dan itoe oedjan sedikit soeroet, koetika mana digoenaken oleh itoe orang-orang jang abis menonton aken poelang ka roemahnja.
Antara penonton-penonton Tionghoa jang kena terpegat oleh itoe oedjan angin, ada djoega Willem Tan dan Johan Liem, jang doedoek di tepas roemahnja saorang kampoeng dengen roepa kesel, apalagi sebab marika soedah merasa lapar. Koetika meliat itoe oedjan moelai soeroet, Tan berkata pada sobatnja:
„Johan, sekarang kita boleh tjoba brangkat, sebab kaloe maoe toenggoein sampe ini oedjan brenti betoel, brangkali tenga malem kita baroe bisa poelang ka roemah; tida kenapa pakean kita basa”.
„Akoe boekan toenggoein oedjan, hanja maoe toenggoe sampe kita dapet satoe deeleman atawa sado”, saoet Johan Liem.
— „Kaoe toch ada bawa fiets, dan akoe boleh membontjang di blakangmoe”. — „Tapi akoe loepa bawa lentera, kerna tida kira bakal moesti poelang sampe malem”.
— „Tida perdoeli, kita boleh djalan teroes sebab di waktoe begini oedjan di straat tentoe tida ada orang politie. Brangkali kaloe kita soeda sampe di djalanan jang rame, nanti bisa dapetken kandaran jang kita boleh toempangken”.
— „Itoe betoel, akoe tida pikir sampe begitoe djaoe”, kata Johan jang lantes sèrét fietsnja menoedjoe ka straat dan lantes dinaekken bersama Willem jang membontjang di blakangnja.
Di straat kaliatan soenji, tjoemah sedikit orang sadja jang liwat dengen pake pajoeng atawa mantel. Satoe doea kandaran jang diketemoeken semoea ada poenja moeatan, hingga itoe doea pamoeda, jang naek fiets zonder lentera, terpaksa berkandaran teroes.
Koetika sampe di Stationsweg, jang pernanja sedikit rame, oedjan masih meritjik teroes, dan tida satoe kandaran kosong jang diketemoeken. Willem dan Johan, jang dapetken djalanan ada soenji dan politie jang djaga straat tida kaliatan mata idoengnja, tida koeatir satoe apa lagi aken landjoetken itoe perdjalanan dengen fiets zonder lentera sampe di roemah. Tapi koetika marika liwat di deket satoe gardoe, dimana ada bebrapa orang sedeng berlindoeng, mendadak lompat ka straat satoe politie agent Boemipoetra jang, sambil angkat roejoengnja ka atas, laloe bertreak: „Stop! kenapa tida pake lentera!”
Willem kisikin Johan jang pegang stuur „Lariken teroes!” tapi soedah telaat, kerna itoe hamba wet soedah berdiri di depan sekali dari itoe kandaran sambil pentang kadoea tangannja seperti orang jang hendak menangkap ajam. Maoe atawa tida itoe fiets terpaksa dibrentiken dan itoe doea pamoeda toeroen dari itoe kandaran.
„Kenapa zonder lentera?” tanja itoe politie agent.
Johan seperti kamekmek, tida bisa mendjawab, tapi Willem laloe berkata: „Kita tida bawa lentara, sebab kita tida niat kaloear malem. Ini oedjan soedah halangin kita brangkat poelang di waktoe masih siang”.
„Tida perdoeli, orang tida boleh naek fiets di waktoe malem zonder lentera”, kata itoe politie agent sambil kaloearken iapoenja boekoe notitie dan potlood.
— „Siapa nama?”
Johan glagapan, tapi Willem jang gagah laloe mendjawab: „Hong Hiang Tjioe!” — „Dan ini jang satoe lagi?”
— „Tjoe Pek San”, saoet Willem.
Sasoedahnja menjatet itoe doea nama, itoe politie agent menanja lagi: „Tinggal di mana?”
— „Patjinan”, saoet Willem.
— „Straat apa?”
— „Passerstraat”.
— „Roemah nommer brapa?”
— „Tida taoe, akoe tida inget nommernja”.
— „Roemahnja siapa?”
— „Roemah obat Tjina, merk Gwa Po Tong, eigenaârnja sienshe Ang Pauw Sian”.
— „Doea-doea tinggal disitoe?”
— „Ja,”.
Sasoedahnja menjatet beres, itoe politie agént berkata: „Soedah, boleh poelang, toenggoe sadja panggilan dari commissaris. Djangan naek lagi itoe fiets kaloe tida ada lentera”.
Willem dan Johan landjoetken perdjalanannja sambil sèrèt itoe fiets.
„Ach, Willem, akoe tida mengarti kaoe brani djoestain politie dengen kasih nama dan adres palsoe”, kata Johan dengen roepa koeatir.
„Tida perdoeli, besok iaorang boleh tjari itoe Tjoe Pek San, obat boeat anak ketjil jang peroetnja masoek angin, dan itoe Hong Hiang Tjioe, arak obat boeat orang jang badannja kepoekoel. Ini doea matjem obat memang ada sedia pada sienshe Ang Pauw Sian di roemah obat Gwa Po Tong, jang advertentienja orang bisa batja djoega dalem soerat-soerat kabar”, saoet Willem sambil tertawa-tawa.
— „Tapi bagimanakah kaloe kataoean tida ada orang bernama begitoe di roemah obat? apakah kita tida bisa dapet soesah soedah djoestaken pada politie?“
— „Memang, kaloe ia kenalin. Tapi di waktoe oedjan dan gelap itoe agent tida bisa kenalin kita poenja roepa, dan kaloe blakang kalih ia ketemoe, kita boleh poengkir, dan ia tida bikin apa-apa kerna zonder ada saksi“.
— „Ach, akoe merasa tida enak; akoe tida soeka perkara“.
— „Djangan pengetjoet, kita moesti brani norèk, kaloe saändenja ini akal kataoean toch kita, anak-anak sekola, tida bisa dihoekoem badan, paling banjak tjoemah didenda saorangnja satoe ringgit, jang kita boleh pandeng sadja seperti kalah bertaro voetbal”.
— „Perkara zonder lentera akoe tida koeatir, tjoemah akoe takoet kapan kita tipoe politie dengen kasih nama dan adres palsoe, kita bisa dapet soesah”.
— „Kaloe sampe kataoean, kaoe boleh lemparken semoea kasalahan padakoe, sebab boekannja kaoe, hanja tadi akoe sendiri jang djawab segala pertanjaännja itoe politie agent. Akoe malah merasa girang soedah bisa goenaken ini tipoe, sebab itoe agent poenja karadjinan ada meliwatin wates. Waktoe straat kosong dan toeroen oedjan, tida perloe ia moesti riboetin apa fiets ada lentera atawa tida. Kaloe besok Tjoe Pek San dan Hong Hiang Tjioe ditjari tida kadapetan, hingga ternjata ia kena ditipoe, pastilah ia bakal dapet idoeng pandjang”.
Sambil omong-omong begitoe itoe doea pamoeda soedah liwatken satoe tikoengan jang membikin itoe gardoe tempat berlindoengnja itoe politie agent tida kaliatan lagi. Mendadak oedjan toeroen kombali semingkin lebet, hingga iaorang poenja pakean djadi lèpèk sama sekali.
— „Hajo, Johan, kita naek lagi di ini fiets, tida enak moesti oedjan-oedjanan di sapandjang djalan begini roepa”, kata Willem.
— „Bagimanakah kaloe ketemoe politie lagi”?
— „Kasih lagi nama dan adres paisoe, abis perkara! tapi akoe rasa kasanain tida ada politie”.
Sigrah djoega itoe doea pamoeda berkandaran fiets lagi seperti tadi, dengen dilariken sakeras-kerasnja. Koetika iaorang sampe di Grootepostweg jang meneroes ka Kampoeng Tionghoa, jang djalannja lebar dan kanan kiri ditedoehi oleh poehoen-poehoen kenari, dari sablah depan kaliatan ada satoe orang naek fiets dengen berkrodong mantel item, jang koetika soedah ampir berpapasan, mendadak lompat toeroen dari fietsnja jang lantes diplintangin di tenga straat hingga ampir katoebroek oleh Johan.
„Stop!” treak itoe orang jang pake mantel item.
Johan terpaksa tahan fietsnja soepaja djangan bertoebroekan dan lantes lompat toeroen bersama Willem.
„Akoe politie agent!” kadengeran soeara saorang Blanda; „mana kowe poenja lentera, jongen?”
„Tida ada, meneer, kita kaoedjanan dari masih siang“, saoet Willem.
— „Tida boleh naek fiets zonder lentera. Kasih taoe kowe poenja nama dan adres“.
— „He Wan Tja dan Foe Yong Hay“, saoet Willem. — „Tempat tinggal“?
— „Toapekongstraat“.
— „Nummer roemah“?
— „Tida inget, ’neer, tapi gampang ditjari, ‘neer, kita tinggal di Restaurant Soedi Mampir, masa ‘neer tida taoe, kapan kita sring ketemoe ‘neer doedoek minoem dan makan disitoe“.
— „Ja, akoe kenal itoe restaurant. Tapi siapa nama eigenaarnja?“
— „Tjia Be Liauw“.
— „Ia ada djadi kowe poenja perna apa?“
— „Kita poenja oom“.
— „Nou soedah, kapan dapet panggilan dari kantoor commissaris politie, kowe berdoea moesti mengadep“, kata itoe politie agent Blanda sambil simpen boekoe notitie dan potloodnja. „Pas op, hoor! laen kalih tida boleh naek fiets zonder lentera“.
„Dank U, meneer“! djawab Willem sambil tertawa-tawa, sedeng Johan bengong dengen moeka poetjet.
„Hai, kaoe begitoe brani mendjoesta lagi“, kata Johan sambil tarik napas.
„Soedah kepalang!” saoet Willem. „Biar besok ia tjari itoe doea matjem makanan di restaurant Soedi Mampir, tentoe selamanja bisa dapet. Sekarang, Johan hajo naek lagi, soedah kepalang norèk, biar antero politie jang kita ketemoe di sapandjang straat kita djoestain.”
„Ach, akoe lebih soeka toenggoe sampe ada liwat deeleman jang kosong,” kata Johan.
„Kaloe begitoe kaoe boleh toenggoe disini,” kata Willem sambil pegang stuurstang dari itoe fiets. „Biarin akoe poelang doeloe sendirian dengan naek ini fiets zonder lentera.”
Abis bilang begitoe, ia moelai hendak pandjat itoe fiets tatkala Johan berkata: „Apa boleh boeat, biar akoe membonljang dari blakang.”
Begitoelah itoe doea pamoeda landjoetken perdjalanannja menoedjoe ka kampoeng Tionghoa di tenga oedjan lebet, dan achirnja sampe di marika poenja roemah dengen slamet tida terganggoe lagi oleh hamba-hamba wet.