IV.

DJALAN BAGOES BOEAT
ME­LEPAS BOEDI.

Itoe pertemoean dengen Commissaris Politie de Stijf pada kemaren sore, soedah tinggalken satoe peringetan jang sanget tida enak bagi Tan Tjo Lat, jang dapet kanjataän maskipoen itoe kepala politie ada saorang manis boedi dan soeka bitjara banjak satjara sobat, tapi dalem oeroesan dienst ada keras sekali, dan jang paling tjilaka, tida gampang ditèmpèl dan didjinekin. Kaloe sadja ia soeka trima pembrian apa-apa, seperti ambtenaar-ambtenaar politie jang laen, Tan Tjo Lat tida begitoe koeatir. Tapi de Stijf dengen begitoe tandes dan teroes terang telah menjataken, ia tida soeka trima pembrian, dan djoega telah menampik dengen getas pertoeloengan obat dari itoe wijkmeester Tionghoa, hanja segala apa jang ia ingin, ia nanti soeroe bli sendiri. Segala oempan jang Tan Tjo Lat sodorken, tida satoe jang ditjaplok, berbeda djaoe dengen commissaris politie jang doeloean, jang moeloetnja selaloe tjelangap lebar, dan laqtes telen apa sadja jang ia lemparken. Jang paling tida enak boeat si Engko Bek ada itoe perkataän jang de Stijf oetjapken waktoe hendak berpisah, jaitoe: „Wijkmeester moesti mengarti sendiri jang di dalem dienst tida ada sobat atawa moesoeh.“ Ini perkataän jang pasti aken diakoe kabenerannja oleh semoea orang, bagi Tan Tjo Lat ada sabagi satoe tikeman jang bisa membawa kematian, kerna menoendjoekken dengen njata sekali, kaloe sampe terboekti kasalahannja, itoe kepala politie nanti djalanken teroes kamoestiannja dengen tida kenal kasian.

Sabetoelnja gampang sekali boeat Tan Tjo Lat terbebas dari itoe bahaja jang mengantjem, kerna kaloe sadja ia lantes poetoesken segala perhoeboengannja dengen roemah-roemah djoedi gelap dan laen-laen jang melanggar wet, serta robah djoega sikepnja terhadep pada publiek, nistjaja tida ada djalan boeat orang tangkep kasalahannja. Tapi Tan Tjo Lat, jang soedah lama dapet hatsil dari sampingan jang begitoe sedep, merasa sanget kabratan aken lepasken itoe. Ia tida taksiran bisa idoep senang kaloe tjoemah moesti toenggoein itoe delapan percent dari oewang poengoetan padjek. Sabrapa boleh ia maoe tjoba berdaja aken dapet teroes itoe segala hatsil jang tida halal zonder dirinja moesti terlibit oleh kasoesahan. Tapi dengen akal bagimana? Inilah ia tida taoe dan blon sanggoep atoer. Itoe alkohol jang ia tenggak satjara liwat wates membikin pikirannja djadi boetek, hingga ia tjoemah bisa oering-oeringan pada segala orang jang ada di bawah kwasanja.

Sasoedah mandi dan toeker pakean serta iroep sedikit kopi, jang sabagian ia siremken ka badan istrinja jang ditoedoeh sedoeh itoe kopi terlaloe èntjèr, ini Nero tetiron laloe bawa toengketnja aken pergi ka kantoor Kapitein Tionghoa, jang lantaran lagi bepergian ka laen tempat Tan Tjo Lat moesti preksa dan oeroesin segala apa jang dirasa ia boleh lantes kerdjaken zonder menoenggoe sampe itoe chef dateng. Antara soerat-soerat jang ditrima di kantoor kapitein, ada djoega satoe dari kantoor commissasir politie, jang boenjinja ada begitoe roepa hingga djoeroetoelis kapitein, waktoe srahken itoe soerat padanja, telah berkata: „Tjoba toean preksa apa ada orang nama begini?”

Tan Tjo Lat ambil dan batja itoe soerat jang boenjinja, sabagimana biasanja soerat-soerat dienst, ada ringkes dan saderhana sekali, maksoednja boeat minta kapitein kirim ka kantoornja commissaris:

„Doea anak moeda nama Tjoe Pek San dan Hong Hiang Tjioe, tinggal di Passerstraat dalem roemah obat Gwa Po Tong dari sienshe Ang Pauw Sian:

„Lagi doea anak moeda, nama He Wan Tja dan Fu Yong Hay, tinggal di Restaurant Soedi Mampir jang eigenaarnja nama Tjia Be Liauw“.

Itoe soerat ada dipertandaken oleh salah satoe politie opziener.

Tan Tjo Lat tertawa berkakakan sasoedahnja abis membatja.

„Dasar itoe djoeroe toelis dan itoe politie opziener semoea kerbo, goblok seperti kalde”! ia bertreak sambil tertawa. „Toean commissaris politie maoe minta dibliken obat dan makanan jang kemaren sore akoe oendjoekin padanja, tapi roepanja iapoenja djoeroetoelis tida mengarti dan kira ia maoe tjari orang-orang moeda jang bernama begitoe! . . . he-he-he-he! . . . betoel koekway! . . . . ada orang sampe begitoe goblok! . . . he-he-he! . . . itoe opziener djoega kerbo, maen teeken sadja zonder preksa dan tanja lagi biar terang. Soedah! biar ini soerat goea bawa, nanti goea oeroesin sampe beres!“ Abis bilang begitoe, Tan Tjo Lat lekas pake topi dan sèmbat toengketnja, teroes tjongklang menoedjoe ka roemahnja. Iapoenja aer moeka bersri, hatinja merasa girang boekan maen, kerna sekarang ternjata itoe commissaris politie tida ada begitoe zuiver atawa bersih sabagimana jang ia tadinja kira, kerna itoe oempan-oempan jang kemaren sore ia asongin, achirnja hendak ditjaplok djoega, tjoemah roepanja ia ada sedikit maloe maloe koetjing, hingga di depan Tan Tjo Lat ia poera-poera menampik, maoe bli sendiri, tida soeka bikin orang soesah, enz-enz. tapi diam-diam toelis soerat pada kapitein aken minta dikirim itoe makanan dan obat-obat. Sebab kapitein lagi tida ada, ada kawadjiban dari Tan Tjo Lat aken oeroes dan kirim itoe semoea, hingga dengen ini djalan, itoe commissaris politie moesti trima iapoenja boedi, kerna itoe barang-barang ada ia sendiri poenja anteran dan pembrian sedeng kapitein tida taoe apa-apa.

Begitoe sampe di roemah, ia sabet dengen toengketnja iapoenja serean jang lagi doedoek melenggoet di satoe korsi, hingga itoe orang berlompat klodjotan, dan ia lantes membentak: „Kaga laen kerdja loe, tjoemah tidoer seperti andjing! Marih sini! ada oeroesan perloe sekali! Loe lekas ambil rantang makanan, pergi ka Soedi Mampir pada si Be Liauw, minta ia lantes bikinin sekarang djoega satoe portie Fu Yong Hay, satoe portie He Wan Tja, dan boleh tambain lagi satoe portie Mi Shoa Thung“.

Itoe serean masoek ka dalem aken ambil rantang sedeng Tan Tjo Lat menoelis di sapotong kertas nama-namanja itoe makanan jang dipesan.

„Saban roepanja harga brapa, ‘ko?“ tanja itoe serean, sambil pegang itoe rantang.

— „Satoe portie biasanja lima poeloe cent, tapi soeroe bikin jang satoe roepia, soepaja banjakan“.

— „Apakah traoesah bawa doeit, ‘ko?“

— „Kaga perloe! saban goea maoe makanan dari Soedi Mampir, zonder pake doeit, brapa banjak goea minta si Be Liauw tentoe kasih pertjoema. Kaloe soedah sedia, loe mampir di yothiam Gwa Po Tong, nanti disediain disana satoe flesch arak obat dan satoe boengkoes tjoe-pek-san jang loe moesti anterin bersama itoe makanan di roemahnja toean commissaris politie, loe mengarti?“

— „Owe, ‘ko“.

— „Nah, ini ada satenga perak boeat loe sewa deeleman. Moesti lekasan, djangan ajal dan memaen.”

— „Apa zender bawa soerat, ’ko?“

— „Kaga perloe, kaloe ditanja, bilang sadja sabentar sore goea nanti dateng sendiri di roemahnja toean commissaris. Bilang biar terang, ini makanan dan obat boekannja kapitein, tapi Eerste Wijkmeester Tan Tjo Lat jang kirim, sebab kapitein lagi tida ada. Kaloe toean commissaris atawa njonjanja maoe kasih doeit boeat gantiken harganja, loe djangan trima, bilang oeroesannja nanti sama wijkmeester sadja, loe mengarti?”

— „Owe, ’ko.“

Soesoedahnja itoe serean berlaloe Tan Tjo Lat lantes brangkat ka roemah obat Gwa Pa Tong, dimana sienshe Ang Pauw Sian lagi doedoek isep hoentjwe sambil batja satoe kitab hoeroef Tionghoa.

„An-tjhoa sienshe, hosengli, kina-djit eesay?” menegor Tan Tjo Lat sambil bertindak menghamperi.

„Haja, inko Bjik! . . . . tjè, tjè lah!-tjia-hoen! tjia-tèh! soeta lama kaka mampit sini. — Haja, tjia-koe be-say, yo-thiam bosiauw, owe mauw mintah inko Bijk tolong ini tauwhoen padjiak tolon silikit.”

„Brapa sienshe kena?” tanja Tjo Lat. — „Pe-tjap gwa toen-oh, tjia-lat oh, kaka wisa Wajat!“

— „Itoe toch èntèng! yo-thiam jang disebrang padjeknja ampir tje pé.“

— „Ja, owe halap inko Bijk tolong, jangan na-hiak laijgi.“

— „Djangan takoet, nanti owe omongin soepaja sienshe poenja padjek tide naek. Boeat minta toeroen ada soesah. Tapi, sinshe, owe maoe ada minta toeloeng sedikit. Apa sienshe ada poenja tjoe-pek-san jang paling baek?“

— „Oe-oe-oe!“ berbangkit Ang Pauw Sian sambil menghamperi iapoenja rak obat: „ata,ata,ata!“

— „Toeloeng kasih boeat harga tje-toengin, tapi jang paling bagoes, sienshe, jang mandjoer boeat anak ketjil oemoer satoe taon jang peroetnja sring pong-hong, masoek angin dan tjia-be-siauw“.

— „Toentoe-toentoe, poeloet ponghong lantat wisa tolong”, saoet itoe tabib sambil angkat satoe flesch jang berisi obat boeboek merah laloe ditoeang atas salembar kertas poetih,

Sasoedahnja itoe poeder tjoe-pek-san slese diboengkoes, Tan Tjo Lat berkata lagi: „Owe minta djoega satoe flesch Hong Hiang Tjioe jang sienshe biasa kirim sama owe, jang fleschnja besar, tjap matjan“.

Ang Pauw Sian lantes ambil itoe arak obat dari satoe rak. Salagi ia boengkoes itoe botol arak, Tan Tjo Lat kaloearken dari sakoenja salembar oewang kertas dari lima roepia, dan sodorken pada itoe sienshe sambil berkata:

„Ini yo-tjioe apa boekan harganja satoe flesch tje-kouw-gin? sama itoe tjoe-pek-san djadi sha-toen phoa.“

Ang Pauw Sian kaliatan seperti terkedjoet, dan sambil angkat kadoea tangannja jang djeridjinja dipentang dan digojang-gojang seperti orang menandak, ia berkata: „M'say! m'say! inko Bjik toeloesa wajat. Bo-kwe-loei, owe kaka walani tilima!“

Sambil bilang begitoe, ia dorong itoe tangan jang menjodorken itoe oewang, jang oleh Tjo Lat lantes dimasoekken kombali ka dalem sakoenja sambil membilang:

„Kams a, sienshe! sabetoelnja owe moesti bajar, sebab ini arak dan obat boekan boeat owe pake sendiri, tapi boeat toean commissaris politie, jang minta toeloeng bliken. Itoe commissaris ada owe poenja hoping keras, kemaren selagi kongkouw di roemahnja, ia ada tjerita anaknja sring sakit, dan hoedjinlangnja ada lamsiem, lantes owe poedjiken sienshe poenja obat. Nanti kaloe ini arak diminoem bae, dan anaknja makan tjoe-pek-san bisa semboeh, owe nanti mintain biar ia kasih soerat poedjian, jang sienshe poenja obat betoel mandjoer, boleh taro di soerat kabar, sienshe poenja yo-thiam djadi tjhoet-mia!“

— „Ho, ho, ho, kamsia! kamsia!‘

— „Hoedjinlangnja toean Commissaris ada Thunglangnio, boekan Holan-nio, kaloe ada apa-apa boleh djadi dia nanti tjhia sienshe dateng sana boeat bong-mè dan kasih obat“.

— „Ho, ho, ho, èsay!“

— „Nah, sekarang ini yo tjioe dan tjoe-pek-san tinggal sadja disini, nanti sabentar gwan hoe-bek dateng ambil boeat dianterin ka roemah toean Commissaris“.

Abis bilang begitoe, Tan Tjo Lat memanggoet, teroes pergi ka straat, dan mampir aken mengobrol pada bebrapa orang dagang kenalannja, tjeritain hal commissaris politie jang baroe ada djadi iapoenja sobat rapet, soedah perna oendang makan padanja, dan baroesan minta toeloeng dibliken obat dan makanan Tionghoa, sedeng njonjanja itoe commissaris dengen iapoenja hoedjinlang poen ada djadi sobat kentel, sring dateng di roemahnja aken minta diadjarin bikin koewe, dan laen-laen lagi, jang Tan Tjo Lat sengadja karang dan isep dari djempol sendiri, soepaja jang mana denger djadi kagoem hal ia pande sekali bersobat dengen pembesar-pembesar saätasan.