Zonder Lentera/Bab V
V.
TOEDOEAN JANG TIDA ENAK.
Sasoedahnja kenjang mengobrol. Tan Tjo Lat poelang ka roemahnja aken dahar, dan saäbisnja dahar, pada waktoe mana ia tenggak bebrapa glas arak obat, lantes ia masoek ka kamar dalem kaädaän satenga sinting aken rebahken diri sabagimana soedah djadi kabisaännja satiap hari, kaloe ia lagi karipoehan oleh pakerdjaän dienst.
Seperti biasanja orang jang sring bergadang malem, Tan Tjo Lat tida tahan kaloe tida tidoer lohor, maski djoega lantaran itoe pakerdjaännja di waktoe siang banjak terlantar. Ia tida perdoeli ambtenaar-ambtenaar besar banjak jang bekerdja teroes dari pagi sampe djam 3 atawa 4 sore, dan President kari Java Bank, Directeur-directeur Escompto, Pakketvaart dan laen-laen peroesahaän dan firma-firma besar jang bergadji riboean roepia, semoea moesti bekerdja keras satiap hari delapan djam dan tida bisa poelang di roemah sablon djam 5 sore. Ini semoea Tan Tjo Lat sampe taoe, tapi dasar tabeatnja males dan selaloe pake maoe dan atoerannja sendiri, maka ia tida perdoeli dan poera-poera tiada taoe pada itoe tjonto-tjonto jang bagoes dari orang-orang besar dan ternama poenja tjara bekerdja, hingga kaloe soedah liwat djam 1 lohor, ia mengoeap dan melenggoet seperti orang jang sinhoennja terbang.
Sabetoelnja pakerdjaän wijkmeester tida terlaloe ripoeh, hingga kaloe maoe Tan Tjo Lat masih ada poenja koetika tjoekoep boeat berdagang aken tambahken hatsilnja dengen satjara pantes. Tapi Tan Tjo Lat bentji pada pakerdjaän dagang ketjil-ketjil jang ia pandang hina dan „menoeroenken deradjat.“ hingga lebih soeka tambahken hatsilnja dengen tjampoer pada segala perboeatan jang tida halal. Di depan chefnja, dan di hadepan orang banjak, ia selaloe oendjoek bagimana itoe pakerdjaän wijkmeester telah rampas iapoenja antero tempo dan pikiran, sedeng sabetoelnja siapa perna intip perdjalanannja satiap hari — dari pagi sampe tengahari dan dari sore sampe malam — lantes bisa taoe, tjoemah lima procent dari temponja digoenaken boeat oeroesan dienst, sedeng jang 95% ada boeat pasang omong, mengobrol di roemah-roemah dari kenalannja, di restaurant atawa di koffie-huis, rondain hotel-hotel boeat bertjanda sama boenga-boenga raja, tengok roemah-roemah hina dan tempat perdjoedian gelap, dan laen-laen lagi jang membri hatsil dan kasenangan padanja. Dan ini semoea oleh Tan Tjo Lat dianggep ada „pakerdjaän dienst“ jang bikin ia djadi sanget ripoeh satenga mati, hingga orang-orang jang tida taoe bisa merasa kagoem atas iapoenja kaoeletan bekerdja dan karadjinan, sedeng orang jang kenal baek kwaliteitnja djadi tersenjoem dan merasa djemoe.
Betoel sekali nasehatnja orang-orang berboedi, aken berhati-hati pada siapa jang gemer gemborin kapandean, kabaekan hati dan djasa-djasa, kerna dari 100 orang-orang begitoe, ada 99 jang „kosong“ dan bermoraal berdjad. Saorang jang sasoenggoehnja pande, dermawan dan bikin banjak pahala, tida oesah iboek aken siarken itoe pada orang banjak, kerna segala kabaekan dan perboeatannja jang terpoedji, publiek moesti taoe. Tjoemah orang-orang tida bergoena, jang tabeat dan penghidoepannja berwarna item, moesti goenaken itoe daja aken agoelin dan reclamein dirinja sendiri, soepaja orang-orang bodo atawa jang blon kenal iapoenja kwaliteit, djadi taro endah padanja. Orang begitoe, jang tjatjat, dosa dan kasalaharnja soedah tida teritoeng, antero doenia dapet taoe kaloe ia kabetoelan ada lakoeken satoe kabaekan atawa pahala; dan sabaliknja tida sia-siaken koetika aken beber dan bongkar kasalahan dari orang-orang jang djaoe lebih baek dari dirinja. Memang soedah loemrahnja manoesia, tida ada jang perboeatannja semoea baek dan betoel, atawa semoea salah dan djahat; maka apabila dengen sengadja dibébér saorang poenja satoe kasalahan dan diloepaken iapoenja saratoes djasa dan kabaekan, atawa tondjolken saorang djahat poenja satoe kabaekan dan semboeniken iapoenja sariboe tjatjat dan kadosaän, nistjaja gampang sekali aken bikin saorang jang blon kenal kaädaän jang betoel djadi kliroe dan dapet salah anggepan. Tapi broentoeng kadjoestaän begitoe matjem tida bisa sesatken orang boeat selama-lamanja, kerna manoes a ada poenja sifat-sifat jang membikin ia gampang tersedar. Tjoemah boeat orang jang gegabah aken lantes mengandel segala matjem obrolan, sringkali mendoesin dirinja kena diroegiken sasoedahnja kasep. Maka djalan jang paling slamet tiada laen, hanja orang moesti berhati-hati pada siapa jang garang menjelah laen orang, dan gemer siarken pahala, kapandean dan kabaekan dirinja sendiri.
Kaloe Tan Tjo Lat soedah masoek tidoer di waktoe lohor, tida satoe orang dalem roemahnja brani tinaboelken soeara brisik, seperti bitjara keras, djalan dengen pake bakiak (teroempah kajoe) dan laen-laen sabaginja, kerna ada banjak kans aken ditjoetji maki atawa dilabrak. Boeat kasih bangoen poen orang tida brani, katjoeali kaloe ada oeroesan dienst jang sanget penting, seperti roemah angoes dan sabaginja, kerna Tan Tjo Lat jang saban kalih tidoer lohor kaädaännja satenga sinting, sikepnja amat bringas pada orang jang brani ganggoein iapoenja mengaso.
Dalem kaädaän begitoe orang bisa doega sendiri bagimana Tan Tjo Lat poenja mendongkol koetika ia baroe sadja rebah lajap-lajap, mendadak istrinja masoek ka dalem kamar, jang pintoenja tida terkoentji, berdiri di samping pembaringan dan berkata:
„‘Ko, ‘ko, bangoen!“
„Loe maoe apa?“ membentak Tan Tjo Lat sambil boeka matanja. „koerang-adjar! goea baroe maoe poeles loe ganggoenin!“
— „Si Kauw Bin soedah poelang....“
— „Biarin dia poelang! kenapa moesti bangoenin goea?“
— „Dia bawa kombali itoe rantang ....“
— „Perkara begitoean loe moesti bilangin goea?— ach, dasar prampoean yauwsioe! apa loe kapengen goea tempiling? apa loe kaga bisa trima itoe rantang dan tjoetji sendiri? apa moesti goea njang samboetin dan benain? koerang adjar betoel!“
Tan Tjo Lat lantes doedoek di atas pembaringan, angkat tangannja aken tempiling istrinja, tapi itoe njonja kaboeroe njingkir sambil berkata: „Itoe rantang toean commissaris kaga maoe trima....“
„Soedah tentoe!“ treak Tan Tjo Lat, dengen sikep semingkin goesar; „jang ia pesan makanannja, boekan rantangnja! itoe rantang ia moesti kombaliken, sebab kita jang poenja. Ach, koerang adjar betoel! perkara begitoe loe moesti bangoenin goea? apa moeloet loe soedah gatel kapengen ditampar sama kasoet?”
Tan Tjo Lat toeroen dari pembaringan aken ambil iapoenja slof, koetika istrinja, jang soedah moendoer sampe ka pintoe kamar, lantes berkata:
Denger doeloe toch saja bitjara, djangan marah-marah seperti orang hoan-hing. Toean commissaris tida maoe trima itoe kiriman, dan malah ia djadi goesar pada enko!“
Tan Tjo Lat terkedjoet. Itoe slof jang ia baroe poengoet, djato terlepas dari tangannja, sedeng moekanja berobah poetjet.
„Mana si Kauw Bin? soeroe ia dateng disini!“ bertreak Tan Tjo Lat sambil koetjek-koetjek matanja dan teroes kaloear dari kamar dengen djalan sempojongan dan banting dirinja di satoe korsi males rotan.
Kauw Bin, itoe serean, masoek ka dalem sambil tengteng itoe rantang makanan dan pegang itoe botol arak obat, dan laloe tjerita pada Tan Tjo Lat, bagimana koetika ia dateng di roemahnja commissaris, itoe toean blon poelang dan njonjanja tida brani trima, kerna soedah dapet pesenan, kaloe Wijkmeester kirim anteran apa-apa djangan diambil. Koetika Kauw Bin bri taoe itoe barang-barang toean commissaris jang pesan sendiri, itoe njonja bilang toenggoe sampe toean poelang. Ampir djam 2 itoe commissaris balik di roemah dan poengkir jang ia ada pesan obat dan makanan pada Wijkmeester atawa kapitein, dan dengen roepa goesar ia berkata: „Lekas kowe angkat bawa pigi ini barang-barang atawa saja nanti soeroe jongos lempar ka djalan besar. Bilang sama Wijkmeester, ia djangan bikin maen gila sama saja!“
„Ach, dasar hollan yauwsoe!“ menggrendeng Tan Tjo Lat sambil tekoek moeka asem. „Dia sendiri jang toelis soerat minta dikirim, sekarang dia poengkir dan marah-marah. Koerang adjar! nanti sabentar goea pergi damprat sama dia, dan djedjelin itoe soerat di matanja!“
Tan Tjo Lat jang sembrono dan segala apa maen menggampangin sadja, soedak loepa sama sekali pada boenjinja itoe soerat jang ia anggep pasti soedah kliroe ditoelis. Pada istrinja dan pada itoe serean ia lantes tjerita hal ia ada trima soerat dari commissaris aken minta dikirim itoe makanan, tjoe-pek-san dan arak obat jang ia soedah omongken kemaren sore, maka sekarang ia merasa heran sekali kenapa ia ambil sikep begitoe roepa, „Brangkali dia lagi mabok“, kata istrinja jang pertjaja segala katerangan dari soeaminja, dan anggep laen-laen orang politie poen ada pemabokan seperti djoega Tan Tjo Lat.
„Atawa dia gila“, tambain serean Kauw Bin.
„Boleh djadi otaknja itoe commissaris rada-rada miring, menetepken Tan Tjo Lat; „omongannja sabentar manis, sabentar kasar. Tapi kaloe dia brani koerang adjar sama goea, nanti goea bikin sampe dia diontslag atawa dipindain dari sini. Disitoe dia baroe kenal siapa Eerste Wijkmeester Tan Tjo Lat!“
Tan Tjo Lat poenja tabeat sombong soeka djoeal laga dan poedji diri sendiri, tida djadi berobah sekalipoen dalem roemah tangganja. Apa jang kadjadian dengan commissaris ia merasa maloe pada istri dan sereannja, maka soepaja ini doea orang djangan pandang rendah pada dirinja, ia kaloearken itoe antjeman tekeboer tjoemah boeat bikin iapoenja prestige tida kaliatan merosot toeroen. Ia poeter dan oempetken doedoeknja hal jang bener soepaja istri dan sereannja jang bodo dapet anggepan Tan Tjo Lat selamanja betoel dan laen orang semoea salah. Salagi Tan Tjo Lat menjomel pandjang pendek dengen soempain dan koetoekin pada de Stijf, mendadak dateng satoe politie agent jang membawa sapotong soerat dari itoe commissaris, jang boenjinja minta itoe Wijkmeester dateng di kantoornja sekarang djoega.
Ini panggilan membikin Tan Tjo Lat merasa koerang enak, tapi ia masih teroes djoeal laga sombong di hadepan istri dan sereannja dengen berkata: „Roepanja sekarang si de Stijf mendoesin kakliroeannja dan maoe minta maaf!“
Abis bilang begitoe, ia teroes berpakean dan bawa djoega itoe soerat jang dikirim pada kapitein Tionghoa.
Koetika sampe di commissariaat, Tan Tjo Lat dapetken de Stijf, dengen berpakean dienst, lagi doedoek menoelis. Sasoedahnja berdjabat tangan, Tan Tjo Lat berkata:
„He, toean masih bekerdja teroes sampe begini waktoe? apakah toean tida mengaso atawa tidoer sedikit?“
„Saja tida perna tidoer di waktoe siang, apalagi sekarang ada banjak pakerdjaän“, saoet de Stijf. „Saja setoedjoe sama kabiasaännja kabanjakan orang Tionghoa jang amat radjin dan tida pandang tjape, dari pagi sampe sore iaorang bisa bekerdja zonder mengaso“.
„Saja poen begitoe“, saoet Tan Tjo Lat; „saja bentji sekali sama orang jang soeka tidoer di waktoe lohor seperti toean besar. Saja bekerdja teroes dari pagi sampe lat malem, sebab djikaloe tida, dalem kampoeng Tionghoa tida bisa beres betoel, apa lagi sekarang, kapitein sedeng bepergian hingga saja jang moesti atoer kapolisian dan laen-laen“.
― „Itoe betoel, saja merasa girang kapan semoea orang politie berlakoe begitoe. Tapi sekarang saja minta Wijkmeester dateng boeat dapet sedikit katerangan, apakah betoel Wijkmeester tadi ada kirim makanan, arak dan obat pada saja?“
— „Betoel, toean“.
— „Kaloe begitoe apakah Wijkmeester soedah loepa pada saja poenja pesenan, aken djangan kirim apa-apa kaloe saja tida minta?“
— „Saja tida loepa; saja kirim itoe lantaran kapitein ada trima ini soerat, dan sebab kapitein tida ada, maka saja jang oeroes.“
Abis bilang begitoe, Tan Tjo Lat sodorken itoe soerat dari Commissariaat van Politie. Sasoedahnja membatja sabentaran, de Stijf taro itoe soerat di atas medja, laloe berkata dengen roepa heran: „Saja tida mengarti, ada hoeboengan apa antara ini soerat dengen itoe kiriman makanan dan laen-laen.“
Tan Tjo Lat menjengir.
— „Itoe toch ada atas toean poenja prentah?“ ia berkata.
— „Tida, saja tida taoe satoe apa dari ini soerat jang diteeken oleh Politie Opziener Goedkoep. Lagi sekali saja ingin dikasih katerangan, apa hoeboengannja antara ini soerat dengen itoe kiriman.“
— „Itoe ampat nama jang terseboet dalem ini soerat,“ saoet Tan Tjo Lat sambil bermesem, „tida ada orangnja. Jang doea ada nama obat, dan doea lagi ada nama makanan, seperti jang kemaren sore saja soedah oendjoekin pada toean.“
— „Apakah wijkmeester taoe betoel di kampoeng Tjina tida orang-orang moeda jang bernama begini?“
— „Tida ada sama sekali. Dan dari itoe sebab saja djadi menjangka toean poenja djoeroetoelis soedah salah denger toean poenja prentah, hingga ia kira toean maoe minta dikirim orang-orang, sedeng sabetoelnja toean maoe minta itoe obat-obat dan makanan jang kemaren saja oendjoekin. Tjobalah toean preksa tjatetan jang saja kasih kemaren, itoe nama makanan, nama obat, dan adresnja, semoea tjotjok.“
Itoe commissaris politie kaloearken iapoenja boekoe notitie, dimana ada terselit itoe lembaran kertas jang Tan Tjo Lat srahken kemaren sore, dan laloe tjotjokin dengen boenjinja itoe soerat. Kaliatan njata iapoenja kaheranan bertjampoer goesar; djidatnja ia kisoetken, dan laloe panggil Politie Opziener Goedkoop jang doedoek di laen kamar, laloe minta katerangan dari mana ia dapet itoe nama-nama dan adres, dan apa maksoednja ia panggil itoe orang-orang.
Goedkoop tida bisa kasih banjak katerangan, kerna ia tjoemah ikoetin tjatetan jang disrahken oleh politie agent Blanda nana Misleid dan agent Boegis nama Kabalerang, jang masing-masing bri rapport, soedah tangkep doea pamoeda Tionghoa jang kemaren sore kira djam delapan soedah naek fiets zonder lentera.
Itoe doea agent, jang masing-masing blon kaloear djaga, lantes dipanggil, dan doea-doea tetepken rapportnja, dengen terangken djoega oemoernja itoe doea pamoeda, kira-kira antara 15 dan 17 taon, pakeannja kemedja poeti, tjelana pendek blauw, matjemnja seperti anak-anak sekola, tjoemah ia tida bisa loekisken betoel-betoel roepanja, kerna itoe malem ada gelap dan toeroen oedjan besar; djoega iaorang tida bisa taoe fiets yang dipake ada merk apa; tapi dengen bandingan ini doea katerangan, de stijf lantes bisa doega itoe doea pamoeda, jang diketemoeken oleh Misleid di Grootepostweg, ada itoe orang-orang djoega jang soedah ditjatet namanja oleh Kabalerang di Stationsweg.
„Kaloe begitoe,“ kata Tan Tjo Lat sambil tertawa, ”ini doea agent soedah kena ditipoe oleh doea anak nakal, jang kasihken adres-adres dan nama-nama djoesta dengen maksoed aken bikin politie djadi katjele . . . . . He-he-he-he! . . . . koerang adjar betoel! . . . . he-he-he-he!“
— „Tapi, wijkmeester, saja tida bisa mengarti, kenapa itoe doea anak djoestroe kasih nama-nama dan adres jang tjotjok dengen nama makanan dan obat-obat jang Wijkmeester kasih pada saja! Djam lima sore saja dapet itoe adres dan tjatetan dari wijkmeester, lantes djam delapan bisa timboel ini perkara. Djoega saja tida abis pikir, sedeng dalem ini soerat soedah ditoelis dengen terang minta dikirim „orang-orang moeda“ jang nama dan adresnja sampe teges, wijkmeerter lantes sadja kirim makanan dan obat obatan.“
— „Ja, sebab saja taoe betoel tida ada itoe nama, hingga saja doega toean poenja djoeroetoelis kliroe.“
— „Kaloe tida ada itoe nama, wadjibnja wijkmeester toelis sadja satoe soerat aken terangken, itoe nama-nama ada palsoe, boekan moestinja lantes kirimken itoe barang-barang jang dengen teges saja soedah terangken saja tida maoe trima.“
— „Soenggoeh mati, toean, saja kira toean soedah kliroe, sebab saja tida sangka bisa moentjoel perkara jang begitoe kabetoelan. . . .“
— „Tida! tida! saja sendiri tida anggep ini perkara ada kabetoelan!“ saoet de Stijf jang memandang pada Tan Tjo Lat dengen mata tadjem. “Saja pikir ini ada satoe akal jang soedah diatoer lebih doeloe boeat paksa saja trima barang jang saja ingin! Orang djangan maen gila sama saja, orang nanti adjar kenal siapa de Stijf!“
Tan Tjo Lat djadi klabakan, moekanja sabentar biroe sabentar merah, koetika mendenger ini oetjapan, jang terang sekali ada menoedoeh bahoea itoe doea pamoeda sengadja lakoeken pelanggaran dan kasih adres palsoe jang tjotjok dengen itoe nama makanan dan obat-obatan, atas ia poenja soeroean. Saorang djoedjoer dan blon perna lakoeken akal djahat, moesti djadi djengkel kaloe ditjoerigaken dalem hal jang ia tida berboeat. Bagi Tan Tjo Lat itoe kadjengkelan djadi tambah berpoeloean lipet, kerna saorang jang nakal dan soedah biasa menipoe atawa mendjoesta, kabanjakan pande sekali oendjoek tingka poera-poera goesar dan sakit hati koetika kadjahatannja kataoean atawa ditjoerigaken orang, hingga kaloe kabetoelan ditoedoe satoe kasalahan jang ia tida berboeat, seperti kedjadian sekarang dalem halnja Tan Tjo Lat, goesar dan sakit hatinja selaloe ada lebih heibat dari laen-laen orang jang alamken kena difitenah atawa tertoedoeh kliroe, dan treakannja lebih njaring aken oendjoek kakedjeman dan koerang adilnja manoesia jang menoedoeh dengen boeta toeli. Maka tiada heran Tan Tjo Lat poenja hati seperti hendak meletoes lantaran goesar dan djengkel, kaki tangannja bergoemter, dan dengen soesah ia tahan nafsoenja aken menerdjang atawa maki-maki pada itoe kepala politie jang menjangka djelek padanja dalem satoe perkara jang ia tida berboeat. Achirnja sambil tangannja menoendjoek ka atas, ia berbangkit dari korsinja dan berkata dengen soeara goemeter: „Toean, saja bersoempah pada Allah, itoe perboeatan saja tida taoe sama sekali! toean djangan menoedoeh pada saja dengen boeta-toeli, saja boekan satoe bangsat atawa orang boesoek. . . . .“
— „Siapa jang bersalah nanti pepreksaän jang kasih katerangan. Tida perloe Wijkmeester bersoempah, sebab satoe kalih soedah tjoekoep koetika Wijkmeester trima djabatan. Saja ada poenja alesan aken anggep, ini oeroesan boekan hal jang kabetoelan. Saja maoe tjari itoe doea orang moeda aken preksa apa ia kasih itoe nama dan adres palsoe dari pikirannja sendiri atawa atas soeroean orang“.
— „Ja, toean, saja djoega kapengen taoe. Koerang adjar betoel!“
„Kapan begitoe, wijkmeester djangan poelang, toenggoe disini sampe saja panggil orang-orang jang aken didenger katerangannja“.
Abis bilang begitoe de Stijf laloe prentah pada politie opziener Goedkoop aken pergi panggil pada Tjia Be Liauw dan sienshe Ang Pauw Sian jang diminta, zonder terangken apa perloenja, dateng di Commissariaat sekarang djoega, kerna ia pikir, itoe doea pamoeda moesti ada djadi kenalan atawa familienja salah satoe dari itoe doea orang jang namanja digoenaken sabagi adres, hingga tindakan pertama boeat dapet taoe siapa adanja itoe doea anak moeda, eigenaar-eigenaar dari Soedi Mampir dan dari roemah obat Gwa Po Tong moesti didenger katerangannja.