Zonder Lentera/Bab VI

VI
PERTEMPOERAN DI SOEDI MAMPIR.

Tjia Be Liauw, eigenaar dari Restaurant Soedi Mampir, ada teritoeng satoe dari sadjoemblah ketjil Tionghoa pranakan jang masi bisa lakoeken pentjarian jang sekarang oemoemnja soedah djato di tangan Tionghoa totok. Ia djoeal makanan soedah blasan taon, satoe waktoe dengen dipikoel koeliling, laen waktoe dengen sewa tempat di loods pasar, dan laen hari dengen sewa roemah sendiri jang sekalian didjadiken tempat tinggalnja.

Dimana sadja ia berdagang atawa boeka restaurant selaloe lakoe keras, kerna salaennja iapoenja masakan tjoekoep sedep dan makanannja banjak jang menarik hati, djoega harganja ada pantes, jang membikin golongan jang koerang mampoe bisa blandja dan sring dahar disitoe, hingga ia selaloe dapetken banjak langganan.

Ditilik dari madjoenja iapoenja restaurant, Tjia Be Liauw moestinja soedah broentoeng bagoes, tapi toch iapoenja kaädaän dari doeloe selaloe tinggal tida berobah, tida brentinja tenggelem timboel. Sabentar ia kaliatan moedjoer dan djaja, laen waktoe ia terpaksa „goeloeng tiker” dan idoep melarat. Orang bilang nasibnja Tjia Be Liauw ada tjotjok dengen anggepan dari orang Tionghoa, bahoea pakerdjaän boeka restaurant tjoemah bisa membri hatsil jang tiba tjoekoep boeat dimakan, tida ada kalebiannja aken disimpen.

Tapi siapa jaog kenal baek penghidoepannja Tjia Be Liauw, lantes bisa oendjoek jang iapoenja tenggelem timboel boekan berdasar dari pembawanja itoe pentjarian, hanja dari tabeatnja sendiri. Pada waktoe lagi melarat, ia sedia aken bekerdja berat dengen pikoel sendiri dapoer dagangannja, djalan koeliling di kampoeng Tionghoa aken djoeal soep, biefstiek dan laen-laen. Tapi begitoe lekas pakerdjaännja itoe moelai madjoe hingga bisa boeka restaurant sendiri di satoe tempat jang tetep dengen mempoenjai banjak langganan jang dateng bergroemoetan hingga makanan jang disedia sringkali tida tjoekoep, mendadak timboel malesnja. Itoe oewang jang dateng dengen deres ka dalem latjinja, boekan disimpen, dipake boeat loeasken pakerdjaännja, atawa laen-laen hal jang perloe, hanja dibawa ka tempat djoedi, sampe achir-achirnja ia tida bisa bajar oetang daging, beras, barang blik dan laen-laen, jang membikin ia terpaksa goeloeng tiker. Sasoedahnja. botauwlo dan menganggoer bebrapa boelan, hingga potol betoel-betoel, baroelah ia moelai berdagang kombali, dan begitoe sateroesnja, tida brentinja ia djato bangoen.

Salaennja dari soeka berdjoedi, Be Liauw ada poenja lagi laen kalemahan, jaitoe tida poeas dengen satoe bini atawa prampoean piaraän. Salaennja paling sedikit moesti poenja doea prampoean, ia poenja tabeat gampang sekali bosen, hingga piaraännja selaloe ditoeker-toeker. Ia boekan saorang jang lojaar pada prampoean satjara satoe „baron” atawa gongkongtjoe, kerna ia blon perna kedjer atawa tèmpèl boenga-boenga jang tjantik dan kasohor. Jang djadi „makanannja” tjoemah golongan baboe-baboe, jaitoe prampoean desa jang djadi boedjangnja orang-orang Tionghoa, jang satiap hari banjak jang dateng di restaurantnja kapan diprentah oleh marika poenja madjikan aken bli makanan. Saban kalih ada baboe moeda jang parasnja sedikit bersih, Be Liauw selaloe adjak bertjanda, kasih persen oewang atawa makanan dan laen-laen, dan kaloe kaliatan ia moelai djinek, lantes didongengin boeat pinda bekerdja padanja aken bantoein dalem restaurant sabagi „boedjang dalem”.

Ada orang bilang Be Liauw berlakoe tjerdik, kerna selaloe piara njaie jang bisa dipake tenaganja, boeat djadi koki, bantoein masak, tjoetji piring, lajanin orang blandja dan sabaginja. Tapi orang jang bilang begitoe tjoemah liat saklèbatan dari loear sadja. Di sablah dalem Be Liauw tida brentinja dirongrong, kerna ongkos makan dan pakenja itoe „boedjang-boedjang dalem” ada lebih mahal djaoe dari pada kaloe ia pake knecht biasa.

Koetika terdjadi hal jang ditoetoerken dalem ini tjerita, roda-roda dari proentoengannja Be Liauw lagi moeloek ka atas: restaurantnja sedeng madjoe, hingga bisa sewa roemah sendiri di Toapekongstraat; tapi berbareng dengen itoe, iapoenja penjakit soeka berdjoedi poen telah kamboe kombali: boekan sadja dalem roemah orang tjohosoe atawa songsoe ia sring mendekoel dari sore sampe pagi dengen terlantarken pakerdjaännja, tapi djoega ampir satiap sore, maski masih banjak orang jang hendak blandja, ia toetoep restaurantnja siang-siang aken koendjoengin roemah-roemah djoedi gelap. Laen dari itoe, dalem ini bebrapa minggoe iapoenja „oeroesan dalem” lagi sedeng loet, kerna lia hendak adaken „perobahan Kabinet", lantaran merasa bosen pada iapoenja „Premier“ jang terlaloe galak tjerèwèt, bawèl, dan tjemboeroean, hingga blon bisa kasampean maksoednja aken ambil lagi satoe baboe moeda jang berbadan langsing boeat djadi iapoenja salah satoe „minister". Ia lagi tjari djalan aken bikin abis ini cri­sis dengen boebarken itoe „Kabinet" dan angkat si berbadan langsing aken djadi „Premier".

Koetika Politie Opziener Goedkoop da­teng di Soedi Mampir, Be Liauw lagi bertjektjok dengen iapoenja „Premier,“ njaie Sarnah namanja, jang soedah djadi „baboe dalem" tiga taon lebih, hingga soedah sedengnja di pekir. Be Liauw memang selaloe tjari djaian aken bikin Sarnah lekas djingdjing koffernja boeat poelang ka kampoeng. Pertaroengan terpaksa ditoenda koetika Be Liauw liat itoe politie opziener, jang ia lantes hampirken dan berkata: „Doedoek, toean, apa toean maoe minoem bier atawa pait?"

„Tida," saoet Goedkoop jang memang soedah bebrapa kalih dateng minoem di itoe restaurant, „Saja diprentah oleh toean commissaris aken minta baba lekas dateng di commissariaat sekarang djoega." ~ „Ada perkara apa, toean?"

~ „Saja tida taoe, nanti disana baba bisa dapet katerangan."

~ „Saja tida merasa berboeat kasalahan apa-apa, kata Be Liauw dengen roepa koeatir.“

~ „Commissaris tida tjoemah panggil orang bersalah; brangkali ada apa-apa jang ia maoe tanja sedikit."

~ „Baek, toean, saja permisi berpakean doeloe.“

~ „Boleh, tapi inget, ja, djangan lama. moesti brangkat sekarang djoega. Saja maoe pergi panggil laen orang lagi, sabentar saja kombali.“

Sasoedahnja Goedkoep berlaloe, Be Liauw masoek ka dalem aken toeker pakean, dan dari sebab ia djarang sekali beroeroesan dengen politie, hatinja merasa koerang enak, dan tida brentinja pikirin dan mendoegaoega, lantaran apa Commissaris panggil padanja.

Dalem restaurantnja kabetoelan ada doedoek bebrapa orang moeda, jang satoe antaranja djoestroe lagi tjerita, apa jang ia baroe denger tadi siang dari moeloetnja Tan TjO Lat sendiri bahoea itoe commissaris jang baroe ada djadi sobat baeknja itoe wijkmeester, dan malah tadi tengahari minta dikirimken barang makanan.

„Itoe makanan," saoet Be Liauw, „ia pe­san dari sini, dan tadi tengahari baroe dibawain oleh sereannja Bek Tjo Lat”

„Kaloe begîtoe," saoet itoe pamoeda, „Tentoelah ini panggilan ada berhoeboeng dengen itoe makanan. Brangkali commissa­ris maoe pesan lagi lebih banjak."

„Toeroet owe poenja rasa," kata poela satoe pamoeda, „ada laen oeroesan jang lebih penting, sebab tadi owe denger si Kauw Bin ada omong. Bèk Tjo Lat bakal riboet sama commissaris jang merasa koe­rang senang sama itoe makanan, dan seka­rang itoe bek lagi dipanggil ka sana."

„Kenapa djadl riboet?" tanja Be Liauw dengen kaget.

„Djangan-djangan dalem itoe makanan ada ketjampoeran kotoran, atawa jang makan djadi sakit, maka commissaris begitoe marah, dan lantes panggil pada enko bek jang kirim itoe padanja."

Ini katerangan Be Liauw anggep ada masoek di akal. Kaloe tida ada satoe oeroesan heibat dan penting, tentoe commissaris tida nanti panggil orang di waktoe lohor, kerna biasanja saban bikin pepreksaän selamanja pagi. Tapi sebab itoe makanan Sarnah jang masak ~ kerna Be Liauw blon bangoen tidoer lantaran semalem ia berdjoedi sampe pagi ~ maka ia lantes panggil itoe „koki dalem" boeat ditanja kaloe-kaloe ia ada tjampoerin apa-apa jang koerang baek.

„Ih, kaga, saja mah kaga tjampoerin apaapa, tjoemah njang biasa sadja," saoet Sarnah dengen keroetken djidat.

„Apa loe ada tjampoerin djoega ini ke­piring ? tanja Be Liauw sambil tekoek moeka asem dan pandang satoe piring berisi kepiting direboes jang digroemoetin banjak laler.

~ „Kepiting ditjampoerin djoega sedikit."

„Ai, dasar prampoean sial, loe boleh bikin goea tjilaka ! Ini kepiting soedah tiga hari, sedengnja moesti diboeang, kenapa loe tjam­poerin ! Orang jang makan bisa dapet sakit !" treak Be Liauw sambil tarik napas.

„Kaloe maoe diboeang kenapa dibiarin sadja disitoe sampe sekarang !" saoet Sarnah.

„Kenapa kaga lantes dilèmpar ka krandjang roempoet !"

„Loe toch taoe goea baroe bangoen tidoer, apa loe sendiri kaga mendoesin barang jang soedah boesoek?"

— „Siapa soeroe saban malem ngelajap, pergi tjari soendel, poelang-poelang pagi, dagangan kaga dioeroes, saja sadja jang ketjapean!“

„Loe troesah banjak moeloet! memang loe prampoean males! kaloe rasa tjape, boleh pergi dari sini sekarang djoega!“ sambil bilang begitoe, Be Liauw kasih satoe tempiling pada Sarnah jang lantes hendak bales menerdjang, tapi doea-doea kaboeroe dipegang dan dipisain oleh itoe orang-orang moeda jang semoea memboedjoek soepaja djangan riboet.

Samentara itoe Goedkoop soedah dateng kombali dengen di ikoetin oleh Ang Pauw Sian jang soedah berdandan rapih. Ini sienshe, jang masih inget perkataännja Tan Tjo Lat bahoea boleh djadi commissaris nanti panggil padanja aken toeloeng kasih obat pada istri dan anaknja jang sakit, soedah lantes anggep jang itoe panggilan tjoemah meloeloe boeat mengobatin maski djoega Goedkoop tida terangken apa maksoednja iapoenja chef. Maka ia ikoet ini politie opziener dengen hati girang, tertjampoer djoega pengrasaän sedikit bangga, jang itoe commissaris, saorang Blanda, ada taro harga atas kapandeannja. Maski djoega ia tida harep bisa trima persenan besar, tapi itoe nama baek, itoe hal loear biasa jang saorang ambtenaar politie Blanda soedah minta pertoeloengannja, soedah tjoekoep aken bikin orang dapet anggepan jang kapandeannja ada lebih menang dari tabib-tabib Tionghoa jang laen.

Orang-orang di restaurant Soedi Mampir djadi sedikit heran meliat Ang Pauw Sian mengikoet sama-sama dengen itoe politie opziener. Tjia Be Liauw lantes menanja: „Eh, sienshe djoega dipanggil?“

„Ho,“ saoet Ang Pauw Sian sambil tersenjoem, „ton koemitalik poe-nia an-lak sa-kiet-poeloet, nio-nia ijoe-ga sa-kiet, pang-git mintah oe-bwat.“

Maski itoe tabib tida taoe boeat maksoed apa ia dipanggil, tapi dengen menginget tjeritanja Tan Tjo Lat, ia tida doega laen dari pada boeat obatin anak dan njonjanja commissaris jang katanja dapet sakit peroet dan berbadan lemah.

Oetjapannja sienshe Ang Pauw Sian membikin Tjia Be Liauw djadi poetjet. Apa jang tadi tjoemah baroe doegaän sadja, sekarang kaliatannja soedah djadi tetep sekali, jang itoe panggilan ada dari lantaran njonja dan anaknja Commissaris politie soedah dapet sakit peroet saäbisnja dahar itoe makanan jang kena djampoerin kepiting boesoek oleh Sarnah. Lantaran itoe makanan ada makanan Tionghoa, boleh djadi dari ini sebab djoega maka itoe commissaris minta pertoeloengan satoe tabib Tionghoa boeat bantoe obatin, atawa brangkali doktor-doktor soedah poetoes akal akan menoeloeng.

Dalem pjkirannja Tjio Be Liauw sekarang terpeta satoe kaädaän senget heibat dan menakoetken, jang membikin di itoe waktoe, kaloe tida ada itoe politie opziener Goed­koop, nistjaja ia soedah samperin Sarnah aken kasih labrakan keras sampe satenga mampoes. Be Liauw soedah petaken jang ia bakal ditahan di Commissariaat atawa teroes didjebloesken ka dalem pendjara lan­taran djoeal makanan jang mengandoeng ratjoen kepiting boesoek. Boleh djadi djoe­ga ia dihadepken di pengadilan dan dapet hoekoeman badan. Laen dari itoe, restaurantnja nanti ditoetoep oleh politie, hingga pentjariannja bakal mati dan ia djadi roedin atawa bangkroet, sedeng boeat kadepanin, kapan ia hendak boeka restaurant lagi, orang nanti takoet blandja lantaran koeatir dapet sakit sabagimana soedah terdjadi dengen familienja commissaris. Dan ini semoea katjilakaan, jang bisa bikin proentoengannja roesak saoemoer idoep, ada dari salahnja Sarnah, itoe prampoean sial jang memang soedah lama ia kapengen singkirken.

Salagi Tjio Be Liauw oering-oeringan kapengen labrak padak Sarnah, mendadak Goedkoop pergi ka satoe toko di sebrang aken bli sigaret. Berlaloenja ini politie opziener boeat sabentaran, digoenaken oleh Be Liauw aken lampiasken mendongkolnja. Ia masoek ka dalem, hampirken Sarnah jang lagi bersisir, djambak ramboetnja aken gentoerken kepalanja ka tembok, tapi itoe prampoean jang pesat dan galak keboeroe tangkep lèhèrnja, teroes gigit idoengnja, hingga djadi bergoeletan, sedeng orang-orang di loear memboeroe ka dalem dan laloe pisahken kombali.

„Soedahlah, djangan riboet! boeat apa! kenapa begitoe!” memboedjoek itoe orang-orang moeda jang dateng pisahken.

„Brangkali dia soedah djadi gila lantaran kaèdanan sama si Moerni boedjangnja baba Sioe,” bertreak Sarnah sambil menangis.

„Memang goea bisa djadi gila lantaran djengkel sama loe poenja perboeatan gegabah,“ djawab Be Liauw sambil napas sengal-sengal dan gosok-gosok idoengnja jang lètjèt dan berlepotan loedah sirih bekas digigit. „Lantaran loe tjampoerin itoe kepi­ting boesoek di itoe makanan, njonja dan anaknja toean commissaris politie sekarang dapet sakit pajah, sampe moesti panggil sienShe dan doktor, dan blon tentoe djiwanja bisa ketoeloengan. Kaloe sampe djadi apa-apa, goea bisa dihoekoem gantoeng, loe taoe ? kaloe kaga digantoeng, dihoekoem boeang soedah tentoe. Biar poen ketoeloe­ngan djiwanja, ini restaurant moesti ditoetoep oleh politie, goea kaga bisa dagang lagi, loe mengarti ?"

„Kaloe begitoe," kata salah satoe pamoeda. „lebih baek sisanja itoe kepiting boe­soek lekas disingkirin, boeang sadja ka da­lem koja."

„Djangan, biarin sadja soepaja politie bisa boektiken ini soendel poenja perboeatan gegabah !" saoet Be Liauw sambil gosok-gosok moekanja sama sapoetangan "Dasar owe jang lagi swe-siauw dapetin ini prampoean sial ! soedah lama owe kapengen oesir dari sini, tapi hati masih kaga tega sadja."

„Apa loe bilang ?" menjander Sarnah ; "goea njang sial ? loe njang doearaka ! Tem­po goea baroe ikoetin, loe masih djadi boeaja, goea poenja saroeng tiga potong loe gade boeat modal dagang sampe goea ampir telandjang. Goea njang kerdja tjape siang maletn bantoein tjari doeit Sekarang loe ada sabegini roepa, lantes loe gila prampoean dan oendjoek kepala besar. Dasar lelaki booo-tjèèèng !" Sambil bilang begitoe, Sarnah menjander aken terdjang pada Be Liauw, tapi sebab tangannja di­ pegang oleh orang-orang jang memisain, hingga tida bisa berapet, maka ia semboer sadja moekanja Be Liauw dengen loedah sirih hingga iapoenja badjoe jas poetih jang baroe ditoeker djadi berlèpotan.

„Ach, bibi djangan begitoe !" kata satoe pamoeda djangkoéng dan bopeng nama Ouw Tjhoet jang lantes pelok dan sèrèt Sarnah lebih djaoe.

Be Liauw djadi seperti kalap. Ia tjoba brontak dari pegangannja bebrapa pamoeda, aken terdjang pada Sarnah, tapi tida bisa terlepas.

„Soedahlah djangan riboet ! . . . sabar ! . . . .ini perkara toch blon tentoe !" memboedjoek bebrapa orang.

„Ijang-an mang-ka-la-ie. tiam-tiam soetah !" bantoe memboedjoek sienshe Ang Pauw Sian sambil pegang poendaknja Be Liauw dengen djeridjinja jang berkoekoe pandjang-pandjang.

„Mana bisa soedah !" treak Be Liauw dengen napas sengal-sengal ; „Awewe haramdjadah !

„Tangkoerak sija !" membalas Sarnah dari djaoe.

— „Nanti owe bikin dia masoek di boei, biar dia rasain. . . .koerang adjar ! . . .itoe makanan dia njang bikin. . . . .owe kaga taoe apa-apa. . . . .owe masih tidoer tempo dateng orangnja Bek. . . . .itoe sereaa bisa saksi-in, dan Liatwiesianseng jang ada disini semoea soedah denger sendiri — dia soe­dah mengakoe dia njang tjampoerin itoe kepiting boesoek — owe maoe tjoetji tangan dalem ini perkara, sebab owe masih ti­doer. . . . ."

— „Soedahlah ! liat itoe toean politie opziener soedah dateng ; djangan riboet, lekas toeker pakean."

— „Apa soedah klaar? hajo lekasan !" kadengeran Goedkoop memanggil dari loear sambil masoek ka dalem.

— „Toenggoe doeloe sabentar, toean !. . . saja maoe toeker badjoe doeloe. . . .ini prampoean soendel bikin saja tjilaka. . . toean moesti bawa dia djoega. . . . iket tangannja dan masoekin dalem boei sekarang djoega! dia njang koerangadjar brani tjampoerin kepiting boesoek dalem itoe makanan . . . .”

— „Kenapa? makanan apa?”

— „Itoe makanan jang tadi wijkmeester bli boeat toean commissaris . . .”

— „Itoe boekan saja poenja perkara, saja tjoemah diprentah ambil baba dan adjak mengadep pada toean commissaris sekarang djoega.”

— „Ja‘ tapi ini prampoean gladak jang djadi lantaran! . . . toean moesti bawa djoega sama dia, sebab dia jang paling berdosa! . . . saja sih tida taoe apa-apa, toean. tadi saja masih tidoer!”

Goedkoop djadi bengong dan garoek-garoek kepala.

— „Ben je bedonderd!” ia menjomel: „kowe boleh bitjara sebentar sama toean commissaris; hajo lekas toeroet!”

Ouw Tjhoet kaloear dari kamarnja Be Liauw sambil bawain satoe jas jang ia ambil dari gantoengan. Sasoedahnja toeker badjoenja jang penoeh loedah sirih dan gosok idoengnja jang lètjèt dengen minjak kajoe poetih, Be Liauw dan Sienshe Ang Pauw Sian naek di satoe deeleman bersama-sama itoe opziener aken pergi pada commissaris.