Zonder Lentera/Bab IX
IX
PENGAKOEAN PALSOE.
Sasoedahnja poeas banggain kapandeannja dalem hal tangkep orang-orang bersalah, Tan Tjo Lat lantes poelang dan prentah Kauw Bin panggil pada Gouw Soewing dan anaknja, Gouw Ke Eng, jang moesti mengadep sekarang djoega. Selagi menoenggoe datengnja itoe doea orang, Tan Tjo Lat rebahken diri di satoe korsi males rotan boeat tidoer sedikit, kerna matanja merasa amat sepet, moeloetnja sabentar-bentar mengoeap, badannja lesoe serta kepalanja dirasaken poesing. Laen-laen orang, kaloe sedeng hadepken hal-hal soeker dan penting, bisa loepa makan dan tidoer kerna hati dan pikirannja ketarik pada itoe oeroesan: tapi Tan Tjo Lat, lantaran soedah toeman tidoer di waktoe lohor, tida bisa robah iapoenja kabiasaän: maski boeat sabentaran ia moesti dapet tidoer, tida perdoeli pakerdjaän djadi terlantar.
Ini kabiasaän teroetama lantaran iapoenja tabeat males, sebab maskipoen di waktoe malem sring mengider aken meronda dan preksa soember-soember kahatsilan dan kasenangan, tapi radjinnja Tan Tjo Lat ada banjak mirip seperti kagiatan dan kagoembiraännja binatang. Andjing-andjing pemboeroe bisa berlari lari dan menggonggong sampe satenga harian waktoe lagi kedjer binatang oetan di dalem pemboeroean; matjan dan singa biasa berglandangan saäntero malem boeat tjari korbannja; koetjing-koetjing bisa berdiam di depan lobang tikoes bebrapa djam, pasang mata dan koeping dengen terliti boeat intip itoe makanan; tapi ini semoea kagoembiraän dan kagiatan tjoemah boeat saliwatan sadja, koetika itoe binatang-binatang sedeng terganggoe lapar atawa itoe andjing andjing diandjoerken oleh pemboeroe pemboeroe, hingga lantaran ingin dapet poedjian dan oempakan dari toeannja, marika oendjoek kagiatan. Begitoe lekas pemboeroean berachir, itoe andjing lantes rebah meringkoek, dan di laen-laen harinja poen tida nanti dapet pikiran aken kedjer sendiri binatang-binatang oetan. Itoe matjan dan koetjing, kapan peroetnja soedah padet dengen makanan, bisa tidoer teroes meneroes zonder perdoeliken apa-apa lagi.
Tan Tjo Lat poenja karadjinan, jang ia begitoe banggaken, sabetoelnja boekan karadjinan toelen, kerna sifatnja tjoemah sagebrakan atawa saliwatan sadja; ia tjoemah radjin dan giat boeat kedjer poedjian, oempakan dan kaoentoengan. Saorang jang sasoenggoehnja radjin, biar poen boeat pakerdjaän jang tida mendatengken hatsil atawa kaoentoengan apa-apa, dan malah jang moesti menanggoeng karoegian, kaloe itoe ada djadi kawadjibannja, ia nanti bekerdja teroes seperti biasa. Tapi Tan Tjo Lat tida ada poenja itoe kanekatan bekerdja, maka djoega ia tida bisa singkirken kabiasaännja aken meringkoek di waktoe lohor, kerna tabeatnja jang males bikin ia pernahken kasenangan badan lebih di atas dari pakerdjaän dan kawadjiban.
Sekarang poen ia anggep bahaja jang mengantjem padanja soedah ampir liwat, kerna Commissaris roepanja moelai mendoesin jang perboeatannja itoe doea anak nakal boekan atas iapoenja soeroean; maski djoega Ang Hie Seng keras poengkir itoe toedoean, tapi ia pandang enteng kerna anggep itoe anak bitjara djoesta dan tentoe nanti mengakoe kaloe soedah diantjem oleh Commissaris dan dikasih geboekan. Itoelah sebabnja maka ia bisa rebah mengaso atas korsi males dengen pikiran lapang, dan blon ada lima minuut ia lantes poeles dan mengorok dengen santer hingga kadengeran ampir saäntero roemah, moeloetnja tjelangap dan mengoetjoerken iler jang toeroen ka djanggoet dan lehernja.
Tapi dasar Enko Bek di itoe hari lagi lam-dji-oen, baroe sadja tidoer saprapat djam, ia dibangoenin oleh istrinja jang membri taoe serean Kauw Bin soedah kombali bersama itoe doea orang jang disoeroe ia panggil. Sabetoelnja Tan Tjo Lat jang pesan, kaloe itoe orang-orang dateng, ia moesti dikasih taoe. Tapi sekarang ia lantes oering-oeringan kerna tidoernja diganggoe. Koetika istrinja bangoenin dan tarik tangannja, ia boeka mata dan lantes mengoetoek „yauwsioe!” tapi pada siapa dan boeat oeroesan apa ia oetjapken itoe koetoekan, boleh djadi ia sendiri tida bisa kasih katerangan. Tan Tjo Lat soedah terlaloe biasa aken mengoetoek dan terkadang memaki dengen perkataän mesoem saban kalih kasenangannja terganggoe, apalagi oleh istrinja, hingga moeloetnja djadi automatisch, oetjapken itoe perkataän-perkataän zonder dipikir dan diniat lagi.
„Soeroe toenggoe!“ kata Tan Tjo Lat sasoedah istrinja membri katerangan dengen maksoed apa ia dikasih bangoen. Komoedian, sambil mengoeap dan mengoelèt bebrapa kalih, Tan Tjo Lat tjoetji moeka, lantes ambil iapoenja karwats dari oerat kerbo, komoedian pergi ka loear di mana Kauw Bin bersama Gouw Soewing dan anaknja lagi menoenggoe.
Gouw Soewing ada teritoeng satoe dari orang-orang Tionghoa pranakan miskin jang idoepnja tida menjoesahken orang laen, kerna maskipoen tida terpladjar dan blon perna masoek sekola, serta otaknja poentoel, tapi tabeatnja saderhana, hatinja djoedjoer dan „taoe diri.” Pakerdjaännja jang tetep djadi toekang tjèt jang membri hatsil loemajan boeat dipake idoep saderhana. Di waktoe lagi tida ada pakerdjaän, ia biasa dagang tjintjauw jang ia pikoel sendiri koeliling, samatjem pentjarian jang orang-orang Tionghoa pranakan djeman sekarang, apalagi jang tinggal di kotaän, merasa djidji aken lakoeken, hingga lebih soeka djadi goendal, boeaja societeit atawa penoenggoe roemah djoedi gelap, dari pada tjari redjeki jang moesti kaloearken banjak tenaga dan kasabaran, seria koedoe ditoengkoelin saantero hari.
Gouw Soewing poenja nama betoel Thay Hok, jang berarti Redjeki Besar. Nama Soewing ada panggilan dari iapoenja kawan-kawan lantaran bibirnja di bagian atas ada sedikit petja dari satoe katjilakaän waktoe ia masih anak-anak. Ia soedah begitoe biasa dengen itoe panggilan Soewing hingga itoe nama Tionghoa jang dibri oleh ajahnja, ia tida perna goenaken, dan kaloe ada orang panggil padanja dengen itoe nama sedjati, nistjaja ia tida perdoeliken. Dalem soerat padjek dan begitoe poen dalem lijst kerdja, ia tida pake laen nama dari Gouw Soewing.
Maskipoen miskin, Gouw Soewing blon perna lakoeken kadjahatan, dan siapa kenal padanja djadi merasa soeka lantaran tabeatnja rendah, manis dan akoean. Hatinja jang tida temaha membikin ia terbebas dari kabanggaän dan karojalan, jang sring djadi lantaran saorang miskin idoep lebih besar dari kemampoeannja.
Itoe sedikit hatsil jang didapet dari koeli tjét atawa dagang tjintjauw, lantaran ia pake satjara himat, ada tjoekoep boeat liwatken hari, hingga ia traoesah moesti oetang pindjem pada orang, tjoba tjari hatsil di medja djoedi, atawa lakoeken perboeatan jang tida halal. Maka haroes dibilang Gouw Soewing ada satoe anggota jang bergoena boeat siahwe, sebab ia blon perna berboeat apa-apa jang menjoesahken atawa meroegiken pada orang laen.
Koetika wijkmeester Tan Tjo Lat dateng di pertengahan dan ambil tempat doedoek di hadepan iapoenja medja toelis dengen oendjoek sikep angker, itoe ajah dan anak soedah menoenggoe dan lagi doedoek di satoe bangkoe bersama Kauw Bin. Dengen Satoe treakan njaring Tan Tjo Lat panggil iaorang mengadep, dan sasoedahnja mengawasin Ke Eng dengen moeka asem, ia berkata:
„Goea panggil loe dateng disini boeat ditanja, apa sebabnja kemaren sore loe bersama si Hie Seng, anaknja sienshe Pauw Sian, brani naek speda zonder lentera?“
Itoe anak, jang kaliatan terkedjoet dan bingoeng, lantes mendjawab:
„Ih, engga, owe mah kaga naek spede.....”
„Loe djangan djoesta!” membentak Tjo Lat dengen kadoea matanja melotot seperti hendak lompat kaloear. Komoedian, sambil angkat iapoenja karwats, ia berkata: „Loe liat ini apa?”
„Owe kaga djoesta,” saoet Ke Eng dengen roepa katakoetan.
— „Memang loe djoesta, sebab si Hie Seng soedah mengakoe, bilang dia naek spede kemaren sore, tempo abis oedjan, bersama loe berdoea.”
— „Kaloe begitoe dia jang djoesta, sebab owe tjoemah naek deeleman sama-sama dia dan itoe spede dia naekin ka dalem deeleman.”
„Betoel, enko Bek,” kata Gouw Soewing, „owe sendiri ada di pinggir djalan tempo ini anak poelang; owe liat ia toeroen dari deeleman, dan itoe toekang deeleman, si Adoel dari Babakan, tentoe bisa saksiken apa jang dibilang oleh si Ke Eng. Kaloe enko Bek koerang pertjaja, nanti owe panggil itoe koetsier sebab owe kenal sama dia.”
Ini katerangan dan kasaksian membikin Tan Tjo Lat djadi bingoeng, kerna menoendjoekken betoel Hie Seng dan Ke Eng tida berdosa, dan berbareng dengen itoe, pastilah Commissaris de Stijf aken balik kombali pada sangkaännja jang doeloe, bahoea itoe doea anak sengadja mendjoestain atas iapoenja soeroean.
Apakah akal sekarang?
Mendadak Tan Tjo Lat dapet satoe pikiran jang, menoeroet anggepannja sendiri, ada bagoes sekali. Ia lantes adjak Gouw Soewing dan anaknja masoek ka dalem roemah, soepaja tida ada orang bisa denger pembitjaraännja, komoedian ia toetoerken paka Gouw Soewing apa jang kadjadian tadi malem, dan achirnja ia berkata:
”Toean Commissaris penasaran sekali kaloe tida bisa terangken siapa adanja itoe doea anak jang menipoe politie, boekan boeat dihoekoem, tjoemah boeat di-ingetin djangan berboeat begitoe lagi. Jang disangka keras ada loe poenja anak berdoea dengen anaknja sienshe Pauw Sian jang sekarang soedah ditahan di kantoor commissaris. Ini perkara sabetoelnja tida apa-apa, paling banjak didenda satoe ringgit saorangnja, kaloe sadja iaorang mengakoe, tapi kaloe ia berdoea moengkir, tentoe djadi pandjang, sebab politie ada hak boeat masoekin dalem boewi sampe bebrapa minggoe, dan jang djadi orang toea poen bisa toeroet dapet soesah. Senshe Pauw Sian dari tengahari sampe sekarang masih ditahan teroes.”
„Kaloe barang jang kaga betoel bagimana ini anak moesti disoeroe mengakoe,” saoet Gouw Soewing dengen djengkel.
— “Goea sendiri pertjaja loe poenja katerangan, tapi kaloe commissaris tinggal tetep dalem sangkaännja, tida satoe orang bisa tjega loe berdoea ditahan selama dilakoeken onderzoek. Sabaliknja kaloe si Ke Eng akoein sadja dan bilang betoel naek spede berdoea zonder lentera, dan ia kasih nama palsoe lantaran takoet ditangkep dari sebab bodonja, ini perkara goea tanggoeng tida djadi apa-apa, paling banjak tjoemah didenda. Sekarang loe pikir sendiri, mana lebih baek, didenda sedikit atawa dimasoekin dalem boewi bebrapa minggoe, dan boleh djadi kenjang digeboekin djoega.”
— “Kaloe didenda berat owe toch kaga bisa bajarin, pengabisannja moesti masoek diboewi djoega,“ kata Gouw Soewing sambil gojang kepala.
— „Itoe perkara loe djangan takoet, kaloe didenda nanti goea jang bajar. Laen dari itoe, kapan soedah beres, goea nanti kasih loe doeit, sebab goea kasian pada sienshe Pauw Sian, jang bakal toeroet masoek boewi lantaran anaknja kaga maoe mengakoe. Dari bermoela goea soedah kasih inget, lebih baek akoe sadja, sebab ini oeroesan ketjil, tapi sebab si Hie Seng keras maoe bawa betoelnja sendiri, sekarang dia bakal masoek di dalem boewi bersama bapanja.“
— „Kaloe begitoe itoe commissaris kaga adil, maoe paksa orang mengakoe barang jang kaga ada,” kata Gouw Soewing.
— „Memang, itoe commissaris tjintjia bogauw-koen, adatnja keras, tabeatnja kliwat bengis dan djahat, kaloe satoe kalih soedah sangka orang, tida gampang dia maoe lepas, dan kaloe kaga lantes ngakoe, dia geboekin satenga mati, tapi kaloe orang kaga banta toedoeannja, bilang sadja betoel dan trima salah, boeat kesalahan ketjil-ketjil dia soeka toeloeng dan sringkali lantes dilepas zonder diperkarain lagi. Maka itoe, kaloe kapengen slamet, goea kasih inget boeat si Ke Eng mengakoe sadja, dan goea tanggoeng kaga djadi apa-apa, dan disini goea kasih loe doeit tjaptoen boeat loe poenja oewang soesah.“
Abis bilang begitoe, Tan Tjo Lat boeka dompetnja, sodorken salembar oewang kertas dari sepoeloe roepia, jang oleh Couw Soewing ditampik, tapi achiraja ia trima djoega lantaran Tan Tjo Lat memaksa keras,
„Kaloe enko Bek maoe tanggoeng kaga djadi apa-apa, goea rasa, Ke Eng, lebih baek loe mengakoe sadja,” kata Gouw Soewing.
„Tapi bagimana owe moesti mengakoe, apa owe moesti bilang?” tanja Ke Eng.
„Itoe oeroesan nanti dirempoekin sama si Hie Seng,” saoet Tjo Lat; „sekarang loe toenggoe disini, goea maoe pergi sama toean commissaris boeat ambil si Hie Seng. Lantes kita berdami bagimana moesti atoer itoe pengakoean.”
„Kaloe begitoe, owe permisi poelang doeloe, sebab owe blon makan,“ kata Gouw Soewing.
„Djangang poelang, sebab goea maoe pergi kaga lama,“ saoet Tan Tjo Lat jang koeatir kaloe poelang ka roemah, itoe ajah dan anak berobah pikirannja lantaran denger asoetan orang. „Kauw Bin! pergi ka blakang, soeroe ensoh sadia nasi, boeat Soewing dan Ke Eng! . . . Loe boleh makan disini, goea pergi kaga lama, lantas balik lagi.“
Abis bilang begitoe, Tan Tjo Lat ambil topinja, teroes naek deelman pergi ka commissariata.
Koetika sampe disana, ia dapetken Hie Seng dan ajahnja djoestroe baroe kaloear dari kamarnja commissaris abis dipreksa. Ia teroes ketemoeken de Stijf jang, sasoedahnja kasih tangan, lantes menanja:
„Apakah wijkmeester soedah dapet tjari itoe anak jang satoenja lagi?“
„Blon, toean, sebab kabetoelan tadi pagi ia baroe pergi ka desa Tjiloetoeng, ka roemah familienja, jang djaoenja lima pal dari sini, tapi saja soedah soeroe orang soesoel, lagi satoe doea djam tentoe bisa dibawa dateng. Bagimana hatsilnja toean poenja pepreksaän pada anaknia ini sienshe?“
— „Ia moengkir ada naek fiets zonder lentera. Saja soedah sanggil Misleid dan Kabalerang, tapi doea-doeanja tida kenalin, dan mala Kabalerang pastiken itoe anak jang samalem ada laen orang, boekan Hie Seng, jang roepanja kaliatan tida nakal, hingga saia moesti pertjaja iapoenja keterangan, tapi saja kapengen denger pengakoean itoe anak jang satoenja lagi,“
— „Kaloe toean rasa ia tida bersalah, apakah boleh ia dikasih poelang ka roemahnja sekarang djoega? kasian itoe sinshe, sebab ia poenja roemah obat tida ada jang oeroes. Kaloe anak jang satoenja soedah dapet, gampang saja kirim kombali ka sini doea-doeanja.“ — „Tida halangan boeat soeroe iaorang poelang sekarang, tjoeman wijkmeester moesti djaga soepaja kapan dipanggil itoe anak lantes mengadep.“
Tan Tjo Lat pergi kaloear, samperin Ang Pauw Sian dengen anaknja jang lagi doedoek di bangkoe dengen roepa kesel.
„Sienshe,“ ia berkata dengen berbisik, „toean commissaris maoe tahan sienshe dan sinnshe poenja hauwshe ka dalem boewi, sebab ini anak tida maoe mnngakoe; tapi owe lantes omongin dan tanggoengin jang sienshe berdoea tida nanti nanti lari, maka sekarang commissaris kasih permisih boleh poelang.“
„Ho, ho, kamsia, ban-ban kamsia!“ berbangkit Ang Pauw Sian sambil rangkep kadoea tangannja dan menjodja bebrapa kalih. „Inko Bjik poenja djintjeng boelat boetoet, owe kaka wisa pikoet. Haja, ini hali swesiauw boetoet, kana ini palakala!“
„Soedah, djangan banjak omong disini,“ kata poela Tan Tjo Lat, „paling baek Sienshe lekas poelang, sampe di roemah kita nanti tjamsiang bagimana baeknja, sebab ini perkara blon abis, kaloe Hie Seng blon mengakoe masih bisa dapet soesah besar. Lekas kita naek deeleman.“
Abis bilang begitoe, Tan Tjo Lat berpamitan pada de Stijf, dengen berdjandji ia sendiri nanti tjoba boedjoek dengen manis pada Hie Seng, soepaja kaloe ia betoel lakoeken itoe perboeatan, ia soeka mengakoe teroes terang.
Deeleman jang tarik Tan Tjo Lat dengen Sienshe Ang Pauw Sian dan anaknja, tida mampir di roemah obat Gwa Po Tong, hanja diteroesken ka roemahnja itoe wijkmeester, jang lantes adjak itoe ajah dan anak masoek ka dalem aken berempoek sama Gouw Soewing dan anaknja. Dengen goenaken antjeman dan gertakan dengen lekas Tan Tjo Lat bisa bikin Ang Pauw Sian setoedjoe soepaja itoe anak jang tida berdosa lantes mengakoe sadja jang ia soedah naek fiets zonder lentera bersama Ke Eng, jang nanti akoe bahoea boekan Hie Seng, hanja ia sendiri jang soedah kasih itoe katerangan djoesta pada itoe doea politie agent lantaran koeatir ditangkep. Sasoedahnja beres diatoer itoe pengakoean, Tan Tjo Lat lantes pergi ka satoe toko beras di deket roemahnja, poenjanja toean Liem Bie Tauw, aken pindjem telefoon boeat bitjara pada commissaris, pada siapa ia terangken, itoe anak jang satoe soedah dapet ditangkep dan lantes mengakoe kasalahannja, dan achirnja anak dari itoe sienshe jang tadi moengkir keras, koetika dipadoe, telah toeroet mengakoe djoega, dan sekarang ia menanja pada commissaris apa itoe doea anak haroes dikirim sekarang atawa toenggoe sampe besok pagi sadja, sedeng Tan Tjo Lat sendiri soeka tanggoeng iaorang tida nanti lari. Oleh de Stijf dibri penjaoetan, itoe doea anak moesti dikirim lantes sekarang djoega, dan wijkmeester poen moesti dateng sama sama aken saksiken waktoe ditjatet pengakoeannja.
Sasoedahnja abis bitjara pada commissaris, Tan Tjo Lat mengobrol sabentaran pada Liem Bie Tauw, itoe soedagar beras, jang tanjaken ada perkara apa. Sigrah djoega Tan Tjo Lat tjeritaken pandjang lebar atas apa jang kadjadian samalem, dan terangken bagimana di hadepan commissaris Hie Seng soedah poengkir keras kasalahannja, tapi koetika ia bawa ka roemahnja, aken preksa sendiri, itoe anak nakal lantes sadja mengakoe, dan sekarang Hie Seng dan Ke Eng bakal dibawa ka kantoor commissaris aken diverbal dan boleh djadi bakal ditahan djoega.
„Commissaris de Stijf tjoemah pande djoeal laga sadja,“ kata Tan Tjo Lat sambil djebiken bibir. „tapi ia tida betjoes preksa perkara. Oeroesan tektekbengek jang begini ketjil ia tida mampoe terangken, moesti owe jang bantoe oesoet dan bikin beres!“
„Abis bagimana dengen itoe doea anak,“ tanja Bie Tauw; „apakah ia bisa dapet hoekoeman berat?“
„Owe blon bisa bilang,“ saoet Tan Tjo Lat jang lantes kaloear aken poelang ka roemahnja, dan tida antara lama kaliatan ia naek deeleman bersam Hie Seng dan Ke Eng.
Tan Tjo Lat tida mendoesin koetika ia omong telefoon pada commissaris dan bitjara pada Bie Tauw, itoe soedagar beras poenja anak, Johan Liem, asik mendengerin dengen roepa koeatir dan katakoetan.