Zonder Lentera/Bab X
X.
TERDJIRET OLEH AKALNJA SENDIRI.
Commissaris de Stijf merasa heran, Hie Seng jang tadi moengkir keras, dan jang ia sendiri pertjaja boekan satoe anak nakal, sekarang mengakoe kasalahannja. Ia tanja pada Tan Tjo Lat, apa itoe wijkmeester tida goenaken antjeman atawa paksaän.
„Tida sama sekali, toean,” saoet Tan Tjo Lat, „di hadepan saja poen ia poengkir keras, tapi achirnja ia terpaksa mengakoe koetika saja padoe dengen kawannja, Ke Eng, jang tjeritaken teroes terang segala perboeatannja. Sabetoelnja itoe kenakalan boekan dari maoenja Hie Seng, jang terlaloe penakoet boeat langgar atoeran atawa djoestain politie; itoe semoea ada dari nakalnja Ke Eng jang kasihken adres palsoe pada itoe doea politie agent.“
— „Maski begitoe saja masih tida bisa mengarti, kenapa Misleid dan Kabalerang bisa tetepken Hie Seng boekan ada salah satoe dari itoe doea anak jang naek fiets.”
— „Brangkali sebab itoe malem ada gelap dan toeroen oedjan, hingga roepanja tida bisa dikenalin oleh orang-orang jang baroe ketemoe satoe kalih dengen saliwatan sadja. Laen dari itoe, jang djawab segala pertanjaän ada Ke Eng, boekannja Hie Seng.”
Pepreksaän atas itoe doea anak lantes dimoelai, dan Tan Tjo Lat poen toeroet hadlir. Ke Eng mengakoe teroes terang jang ia soedah djoestaken itoe doea politie agent lantaran takoet.
„Apakah tida ada orang jang soeroe loe kasih itoe adres dan nama palsoe pada itoe doea politie agent?“ tanja Tan Tjo Lat dengen roepa bengis, poera-poera goesar pada itoe anak.
„Kaga ada jang soeroe,” saoet Ke Eng, menoeroet adjaran jang soedah diatoer dan diapalin lebih doeloe dalem roemahnja Tan Tjo Lat.
„Loe kerdja apa pergi ka station?” tanja poela Tan Tjo Lat.
„Saban hari owe bantoein di buffet,“ Ke Eng menjaoet.
Misleid dan Kabalerang lantes dipanggil boeat kenalin itoe anak. Sekarang itoe doea opas dengen tida sangsi lagi lantas bilang, betoel Ke Eng jang soedah kasih penjaoetan koetika ditanja nama dan adresnja.
„Apakah kaoe inget dan kenalin betoel?“ tanja de Stijf.
„Betoel, tida bisa salah lagi,” saoet itoe doea politie agent.
De Stijf srahken itoe doea anak pada Goedkoop aken tjatet pengakoeannja dan bikin proces verbal, kerna anggep ini oeroesan soedah beres, tjoemah tinggal dihadepken sadja pada Landgerecht. Itoe koetika hari soeda moelai gelap, dan de Stijf, jang bekerdja teroes antero hari, sekarang maoe poelang ka roemahnja.
„Kapan soedah dibikinken proces verbal, ini doea anak soeroe poelang sadja, tapi wijkmeester moesti tilik soepaja besok pagi iaorang mengadep di moeka Landrechter,“ kata de Stijf pada Tan Tjo Lat.
„Saja poenja pikiran lebih baek toean tahan disini sampe besok pagi, soepaja iaorang tida pergi ka laen tempat, bikin saja djadi poesing boeat tjari,” saoet Tjo Lat, jang sabenernja koeatir kaloe itoe doea anak tarik lagi pengakoeannja kapan diasoet oleh orang loear. „Oleh landrechter paling banjak dihoekoem denda, terlaloe èntèng boeat iaorang poenja perboeatan nakal dan koerang adjar, maka sabagi hoekoeman extra saja ingin toean tahan disini boeat satoe malem, soepaja laen kalih iaorang tida brani berboeat begitoe lagi.“
„Baeklah, saja toeroet wijkmeester poenja pikiran,“ kata de Stijf, jang lantes panggil Goedkoop aken bri taoe, kaloe soedah beres bikin procesverbal itoe doea anak moesti ditahan boeat satoe malem, dan besok pagi dikirim ka hadepan landgerecht.
„Sekarang, toean commissaris, saja permisie poelang,“ kata Tan Tjo Lat sambil angsoerken tangannja; „saja merasa senang ini perkara soedah beres dan itoe doea anak nakal, jang bikin kita-orang dapet begitoe banjak poesing, sekarang soedah kena dibekoek. Kaloe ada lagi laen-laen perkara soeker, baek di dalem kampoeng Tjina atawa poen diloear, jang toean rasa soesah boeat terangken, toean djangan sangsi aken panggil saja, dan saja selamanja ada sedia, siang atawa malem, boeat membantoe dengen segala senang hati.“
„Baek, trima kasih,“ saoet de Stijf dengen pendek. Itoe commissaris politie sabetoelnja tida senang pada itoe omongan dari Tan Tjo Lat jang bersifat sombong, sabagi djoega ia maoe oendjoek dalem antero kota X tida ada orang politie lebih pande dari ia sendiri.
Dengen angkat kepala dan klemboengin dada Tan Tjo Lat brangkat poelang. Ia poedji dirinja sendiri jang soedah bisa djalanken itoe akal tjerdik, hingga boekan sadja soedah bisa linjapken itoe commissaris poenja tjoeriga, tapi djoega itoe kepala politie terpaksa taro perindahan tinggi dan oetjapken „trima kasih” jang ia soedah begitoe lekas bisa terangken ini perkara. Di spandjang djalan ia soedah pikirken satoe lelakon pandjang jang ia hendak beber pada antero pendoedoek di X jang soeka dengerken obrolannja, dengen didasarken pada de Stijf poenja oetjapan „trima kasih“, hal mana ia hendak goenaken sabagi safoe boekti bahoea itoe commissaris politie ada beroetang boedi padanja. Ia soedah pikir djoega aken tambain ini lelakon dengen satoe dongengan, bagimana de Stijf soedah lantes oendang ia dateng di roemahnja aken minoem bier, pada waktoe mana ia minoem djoega boeat kaslametannja wijkmeester Tan Tjo Lat jang soedah bisa beresken ini perkara jang itoe commissaris tida mampoe terangken.
Commissaris de Stijf soedah pake topinja dan soeroe ambil iapoenja fiets aken poelang ke roemah, koetika satoe opas membri taoe, ada doea anak Tinghoa dateng hendak bitjara.
„Seroe dateng besok pagi sadja,“ kata de Stijf.
„Iaorang bilang perloe sekali,“ kata itoe opas.
„Soeroe masoek,“ prentah de Stijf jang lantes doedoek lagi dalem kantoran.
Doea anak moeda jang pake kemedja poeti, tjelana blauw, raepanja seperti moerid sekola, kira-kira beroesia 17 taon, lantes masoek ka dalem. Jang satoe berkoelit item manis, matanja besar dan bersorot tjerdik, memanggoet dengen gagah dan roepanja brani; jang laen berkoelit poeti koening, matanja sipit dan roepanja pamaloean, memanggoet dengen takoet.
„Siapa kaoe dan ada perkara apa?“ tanja itoe commissaris politie.
„Saja bernama Willem Tan, dan ini saja poenja kawan nama Johan Liem,“ saoet itoe anak jang iteman; „kita-orang dateng disini boeat kasi taoe pada toean commissaris jang kemaren sore kita soedah berboeat kesalahan, langgar atoeran dan tipoe politie.“
— „Boeat perkara apa?“
Willem tjeritaken dengen terang, bagimana ia soedah tipoe doea politie agent koetika ditangkep naek fiets zonder lentera, dengen terangken djoega apa sebabnja iaorang lakoeken itoe pelanggaran,
„Kita pergi ka loear roemah, aken nonton voetbal, dari djam ampat sore, dan itoe oedjan toeroen teroes sampe djam delapan malem; kita poenja peroet merasa terlaloe lapar; sado jang kosong tida bisa diketemoeken, maka terpaksa kita naek itoe fiets maski tida ada lenterannja, sebab djalanan ada sepi. Kita poenja pikiran hendak naek deeleman begitoe lekas ketemoe jang kosong, tapi sablonnja itoe kandaran terdapet, kita ketemoe doea kalih pada politie-politie agent, jang satoe Inlander, jang laen orang Blanda, Saja sengadja kasih nama dan adres palsoe aken maen gila sedikit, dan saja soedah pikir memang maoe mengadep aken terangken nama jang betoel.“
Ini doea anak sabetoelnja masih bisa tambahken lagi sebab-sebabnja, kenapa iaorang mengadep pada commissaris di itoe waktoe. Inilah boekan dari lantaran laen, hanja kerna Johan Liem soedah denger tjeritanja Tan Tjo Lat pada ajahnja, bahoea Hie Seng dan Ke Eng soedah ditangkep. Dengen tergoepoeh-goepoeh ia pergi tjari Willem aken toetoerken apa jang ia denger, dan achirnja ia berdoea pergi ka roemahnja sienshe Ang Pauw Sian dimana kabetoelan istrinja itoe tabib Tionghoa lagi asik tjerita sambil menangis pada bebrapa tetangganja, begimana anak dan soeaminja soedah ditahan oleh politie lantaran ditoedoeh boeat satoe kasalahan jang Hie Seng tida lakoeken.
Willem dan Johan, jang tadinja tida kira marika poenja perboeatan bisa datengken kasoesahan besar pada orang-orang jang tida berdosa, sekarang merasa tida enak sekali. Willem pikir, ia briken nama dan adres palsoe tjoemah boeat bodoin politie, boekan boeat tjilakaken pada Sienshe Ang Pauw Sian dan anaknja, Hie Seng, jang ia kenal baek. Itoe anak dan Ke Eng soedah mengakoe salah tentoelah lantaran dipaksa, dipoekoel atawa dilabrak oleh Tan Tjo Lat jang kasohor èntèng tangannja, maka iaorang bajangken sendiri bagimana sangsaranja itoe doea anak moeda jang moesti terpaksa akoein kasalahan jang marika tida berboeat.
— „Kita moesti mengadep pada commissaris aken terangken doedoeknja hal jang betoel,” kata Willem, sasoedahnja bengong berpikir sakoetika lamanja.
— „Nanti kita jang ditangkep dan dihoekoem,” saoet Johan.
— „Tida perdoeli, sebab itoe ada lebih baek dari pada biarken laen orang dapet soesah dari kita poenja perboeatan, sebab ini kalakoean ada sanget hina dan pengetjoet.”
— „Ach, nanti sadja, kita pikir-pikir doeloe, liatin sampe besok,” kata Johan dengen katakoetan.
Ini doea sobat poenja tabeat ada berlaenan djaoe. Johan tida nakal, tida soeka lakoeken apa-apa dengen memboeta, selamanja berhati-hati, satoe type dari anak moeda jang paling dipoedji dan dikagoemken oleh bangsa Tionghoa; tapi berbareng dengen itoe, tabeat jang kouwkati dan ingin djaga kaslametan sendiri ada bersarang djoega pada batinnja, hingga kaloe moesti diloekisken dengen kasar, Johan ada saorang pengetjoet, jang kabanjakan terdapet pada manoesia jang terlaloe hati-hatii dan inget sadja kapentingan sendiri.
Willem, jang orang toeanja tida terlaloe keras empos „Kasopanan Tionghoa” pada batinnja, hanja biarken itoe anak berlakoe dengen merdika, tida terlaloe tindes iapoenja kalantjangan dan kanakalan, (samatjem didiken jang didapet oleh Benjamin Franklin dan banjak laen-laen orang ternama besar), tabeatnja ada brani, teroes terang dan djoedjoer, serta tida takoet hadepken bahaja. Pamoeda jang bersikep begini memang bisa gampang terbitken onar dan hal-hal tida enak, tapi berbareng dengen itoe ia bisa djoega bikin dirinja djadi bergoena bagi siahwe, kerna ia brani soesah, tjape dan tida djarih terdjang bahaja kaloe ia rasa itoe ada djadi kawadjibannja. Ini matjem tabeatlah jang bisa angkat manoesia ka tingkatan tinggi, aken djadi pemimpin atawa pembela goena orang banjak.
Sikep membêlér dari Johan membikin Willem djadi goesar.
„Kaloe kaoe takoet,” ia mengantjem, “nanti akoe pergi mengadep sendiri. Tapi inget, akoe moesti seboet djoega kaoe poenja nama, hingga sabentar politie nanti dateng aken ambil padamoe. Pikir sekarang, mana lebih baek, mengadep dengen soeka sendiri, atawa diambil dan digoesoer oleh politie.”
— „Apakah tida bisa besok pagi sadja?”
— „Moesti sekarang djoega, sebab Hie Seng dan Ke Eng sekarang ada di kantoor politie. Lekas ambil kaoe poenja fiets, atawa akoe nanti brangkat sendirian.“
Maoe atawa tida, Johan sambil menggroetoe terpaksa moesti mengikoet. Dengen naek fiets jang kemaren, jang sekarang Johan soedah pasangin lentara, iaorang brangkat ka commissariaat dengen Willem membontjang di blakangnja.
Boekan maen terkedjoetnja de Stijf koetika mendenger pengakoeannja itoe doea pamoeda. Tida boleh djadi boeat satoe pelanggaran ada ampat anak jang mengakoe salah. Tjepet sabagi kilap dalem pikirannja ada berklebat perboeatan boesoek dari Tan Tjo Lat jang paksa Hie Seng dan Ke Eng akoein apa jang iaorang tida berboeat. Aken dapet kapastian, ia lantes panggil Misleid dan Kabalerang bersama bebrapa opas laen jang berada di Commissariaat, jang semoea disoeroe berdiri berbaris, lantes ia bawa Willem dan Johan, boeat oendjoek opas mana jang soedah tahan padanja kemaren sore.
„Itoe agent Blanda saja tida kenal roepanja, sebab ia ada pake toetoep kepala,” kata Willem; „tapi agent Boemipoetra saja kenalin, itoe dia,” sambil tangannja mengoendjoek pada Kabalerang, jang lantes dipanggil Las oleh de Stijf.
„Kaoe kenal ini anak?” menanja commissaris.
Kabalerang bingoeng. Sasoedahnja mengawasin sabentaran, ia berkata:
„Saja rasa betoel ini doea jang kemaren naek fiets zonder lentera.”
Misleid poen sekarang tetepken, ia kenalin pada Willem.
„Semoea kerbo!” menjomel de Stijf dengen goesar; „bagimanakah tadi kaoe bisa toedoeh itoe anak jang laen?”
„Sebab wijkmeester, waktoe baroe dateng dengen bawa itoe doea anak, lantes bilang iaorang soedah mengakoe, hingga saja lantes pertjaja iaorang betoel ada itoe anak-anak jang kemaren, maski saja liat roepanja ada laen,” saoet Kabalerang.
Willem dan Johan disoeroe toenggoe, sedeng Ke Eng dan Hie Seng dipreksa lagi.
„Kaoe berdoea bakal di masoekken dalem pendjara sebab soedah bikin pengakoean palsoe,“ kata de Stijf. „Kita-orang taoe kaoe berdoea tida naek fiets zonder lentera dan tida tipoe politie; tapi kaoe sengadja mengakoe begitoe boeat bikin politie bingoeng. Kaloe kaoe tjerita teroes terang boleh lantes poelang sekarang, tapi sebab kaoe brani berdjoesta, bilang barang jang tida ada, kaoe moesti masoek dalem boewi. Kaoe bodo sekali, maoe tjari tjilaka sendiri!“ abis bilang begitoe, Stijf gebrak medja dengen tangannja dan oendjoek roepa sanget goesar.
„Tjerita sadja teroes terang, Eng,“ kata Hie Seng pada kawannja, dengen roepa katakoetan.
„Ja, toean, saja boekan sengadja maoe tipoe, saja disoeroe mengakoe begitoe oleh wijkmeester, jang bilang kaloe tetep moengkir saja berdoea dan saja poenja papa djoega nanti masoek boewi. Kaloe saja mengakoe, nanti dapet persent oewang dari wijkmeester.“
Atas permintaän de Stijf, itoe doea anak tjeritaken semoea itoe permoefakatan di roemahnja Tan Tjo Lat.
Dengen tida ilangken tempo lagi, de Stijf prentah Goedkoop panggil Ang Pauw Sian dan Gouw Soewing, sedeng ia sendiri lantes mengadep pada assistent resident aken toetoerken perboeatannja Tan Tjo Lat. Oleh itoe kepala negri ini hal lantes disrahken pada patih boeat oesoet lebih djaoe, hingga koetika Ang Pauw Sian dan Gouw Soewing soedah dateng, itoe doea ajah dengen itoe ampat anak, bersama-sama de Stijf, lantes brangkat ka kantoornja patih boeat dipadoe dan ditjatet pengakoeannja. Dari sebab itoe pengakoean semoea ada tjotjok, hingga djadi terang sekali antero kasalahannja Tan Tjo Lat, maka pada besok paginja assistent resident panggil itoe wijkmeester jang mengira bakal dapet oetjapan trima kasih boeat katjakepannja, maka boekan maen iapoenja terkedjoet, dan soemangetnja dirasa seperti terbang koetika dibri taoe, ia di-schorst dari djabatannja aken menoenggoe slesenja pepreksaän atas iapoenja segala kasalahan.