Zonder Lentera/Penoetoep
PENOETOEP.
Eerste wijkmeester Tan Tjo Lat dilepas dari djabatannja, lantaran sengadja membri katerangan palsoe pada commissaris.
Kabalerang, itoe politie agent klas satoe jang gegabah kenalin orang jang tida berdosa, ditoeroenken ka klas doea; Misleid poenja hak aken dapet promotie, dimoendoerken satoe taon.
Willem Tan dan Johan Liem, lantaran mengadep dan bri katerangan dengen soeka sendiri, hingga membikin politie dapet taoe satoe perboeatan jang menjesatken, dibebasken dari kasalahannja, tida ditoentoet lebih djaoe, malah dengen diam-diam, satjara prive, Willem dikasih tangan dan dapet oetjapan „goed zoo, jonge,” sambil ditepok poendaknja oleh de Stijf.
Ang Pauw Sian terbebas dari kawadjiban tjinkong arak obat prodeo pada Tan Tjo Lat. Tjia Be Liauw, sadari ditinggalken pergi oleh Sarnah, kaädaännja tjotjok dengen iapoenja nama, kerna sringkali ia tida bisa dahar abis nasinja, kerna pikirannja sanget kesel dan djengkel. Itoe Moerni jang berbadan langsing telah diambil oleh ajahnja dan diadjak poelang ka kampoeng, dimana ia dinikahken dengen satoe chauffeur, hingga Be Liauw poenja candidaat „premier” sekarang lowong. Dengen linjapnja Sarnah, Be Liauw djadi kailangan iapoenja „tangan kanan,” maka ia tjoba berdaja aken tjari taoe dimana itoe njaie telah mengoempet. Liwat bebrapa boelan kamoedian baroelah ia dapetken Sarnah, jang tida soesah diboedjoek aken toeroet lagi padanja.
Pengharepannja Ouw Tjhoet tida kasampean, kerna Sarnah terlaloe „litjin” boeat bisa kena dililit oleh itoe badjingan. Sablonnja toeroet Ouw Tjhoet menjingkir ka tempat djaoe, ia pergi doeloe pada soedaranja di kampoeng, pada siapa ia titipken oewang dan perhiasannja, di loear taoenja Ouw Tjhoet, hingga koetika itoe pamoeda bo-pèng bawa ia menjebrang ka Zuid Sumatra, tida ada apa-apa miliknja Sarnah jang bisa didjadiken oewang. Itoe badjingan merasa kadoehoeng boekan maen kena digandoelin oleh itoe prampoean toea jang pantes djadi iboenja. Achir-achir, sasoedah berpoeloean kalih bertjektjok dengen Sarnah Ouw Tjhoet lantes mengilang, dan Sarnah poelang ka Java, dan achirnja balik kombali pada Tjia Be Liauw.
Sakoetika lamanja orang tida denger lagi tentang Ouw Tjhoet, jang tida brani oendjoek roepanja di X, sampe satoe hari orang-orang jang kenal padanja merasa kaget koetika namanja ada tertjatet dalem lijst dari pamoeda-pamoeda jang dikirim oleh Yi Yung Thoan aken pergi ka Canton, boeat masoek bladjar djadi officier pada Whampoa Militair Academie, aken bantoe pada Generaal Chiang Kai Shik basmi pengchianat-pengchianat dan angkat deradjatnja Tiongkok dan bangsa Tionghoa soepaja lekas djadi satoe negri dan bangsa jang paling terindah di kolong langit.
Njatalah Ouw Tjhoet, lantaran kena soemanget jang agoeng, soetji dan moelja dari Yu Yung Thoan, soedah robah angen-angennja, hingga sekarang ia mendadak djadi satoe patriot boeat angkat deradjat negri dan bangsa, dan brangkali ia ingin bisa djoega djadi Chiang Kai Shik jang kadoea!
Helaas!
Baroe diam di Whampoa doea minggoe, Ouw Tjhoet dan bebrapa kawannja soedah maboer, dan sampe sekarang tida kataoean ka mana perginja!
Brangkali ia mati kelaparan di Tiongkok.
T A M A T.