Mahabhiniskramana
Mahabhiniskramana
Tooneelstuk dalem
ampat bagian.
MELOEKISKEN KOETIKA PRINS SIDDHARTHA, JANG
BELAKANGAN MENDJADI BUDDHA, TINGGAL-
KEN ASTANANJA AKEN MENTJARI IL-
MOE BOEAT MENOELOENG
KASANGSARA'AN
MANOESIA.
Oleh
Kwee Tek Hoaij.
(Ini Tooneelstuk diperlindoengin oleh Auteursrecht,
menoeroet artikel 11 dari boekoe Wet Stbl. 1912
No. 600).
tjitakan pertama
1937.
Typ. Drukkerij „Moestika”
Tjitjoeroeg, (Preanger).
Siapa hendak maenken ini tjerita haroes minta idzin pada pengarangnja atawa, kaloe Toean Kwee Tek Hoaij tida ada, pada Boekhandel Moestika jang pegang hak auteursrecht dari ini lelakon. Pakoempoelan-pakoempoelan haroes madjoeken soerat permintaän officieel atas nama bestuurnja, dengen disertaken djoega postzegel boeat balesannja.
| Pagina: | Garis: | Perkata’an: | Moestinja: |
| 25 | 24 | ampirte ngah | ampir tengah |
| 26 | 12 | goendi | goendil |
| 30 | 32 | seka ian | sekalian |
Beberapa katerangan dan Pengoendjoekan.
Dengen terbitnja ini tooneelstuk Mahab hiniskramana kita seleseken lelakon kabatinan jang kadoea, didasarken atas penghidoepannja Buddha Gautama.
Ini tjerita-tooneel ada lebih soeker dan roewet daripada jang pertama, Bidji Lada, hing ga pengharepan boeat diwoedjoetken di atas tooneel boeat di ini tempo ada ketjil sekalih. Tetapi dari sehab kita poenja toedjoean boekan tjoemah boeat memenoehken perminta'an dari tempo sekarang, hanja sabagi persediaan boeat djeman jang masih djaoe di moeka jang kita sendiri brangkalih tida bisa ala mken dalem ini kahidoepan, maka dengen goembirah kita soedah toelis dan tjitak ini boekoe, sebab dengen begitoe kita bisa penoehin satoe kakoerangan dalem tjerita tooneel Melajoe, maskipoen itoe kakoerangan boeat di ini masa masih belon dirasa.
Boeat maenken ini tjerita boekan sadja moesti ada terdapet orang-orang jang hargain pada Buddhisme, tapi djoega jang mengenal kunst tooneel tjoekoep tinggi aken bisa djalanken itoe berbagi-bagi rol penting jang boekan enteng, teroetama rol dari Prins Siddhartha. Laen dari itoe kapan ini lelakon maoe diperto endjoekken dengen rapih dan zonder ketjiwa, orang haroes mempoenjai kapandean dan katerlitian aken mengatoer decoratie atawa perhiasan jang sa timpal sama taman dan astana radja radja Hindoe, begitoe poen pakean dari Prins, Poetri dan dajang-dajang, jang saboleh-boleh moesti menjotjoki sama ka'ada'an di djeman doeloe.
Tetapi kasoesahan dari decoratie kita anggep tida begitoe besar seperti boeat mentjari satoe tooneelspeller jang tjoekoep pande aken djalanken itoe rol dari Prins Siddhartha, kerna boekan tjoemah ia moesti inget sasoeatoe roentoenan dari oetjap-oetjapannja jang pandjang, tapi djoega haroes bisa mengarti dan tangkep soemanget dari itoe oedjar-oedjar. Kapan orang tjoemah bisa oelangin sasoeatoe perkata'an zonder ada soemangetnja, lantaran tida bisa hargain maksoed dan kafaedahannja, nistjaja bagian jang paling indah dan penting dari ini tooneelstuk djadi ilang penariknja, dan itoe pertoendjoekan aken alamken kagagalan.
Aken tetapi maskipoen kita mengakkoe jang ini tooneelstuk ada „berat" dan tida gampang boeat dipertoendjoekken, kita poen tida ilang harepan atas bisanja diwoedjoetken di atas tooneel, sebab kita taoe itoe rol dari Prins Siddhartha masih belon berarti kapan dibandingin dengen rol-nja Prins Hamlet dari Shakespeare. Malah kita maoe bilang, kapan dioekoer sama rol dari Kioe Gie dalem Allah jang Palsoe tida saberapa djaoe bedanja. Dan itoe tooneelstuk Allah jang Palsoe soedah dipertoendjoekkeu poeloehan kalih. Maka kita pertjaja kapan bisa dapet satoe speller amateur atawa professional jang pande dengen mempoenjai aanleg atawa bakat boeat bermaen tooneel, serta mengarti betoel maksoed dan toedjoeannja Prins Siddhartha pada itoe sa'at koetika hendak lakoeken itoe Pengorbanan Besar aken menoeloeng manoesia jang bersangsara, nistjaja ini lelakon bisa dipertoendjoekken dengen satjara memoeasken, boekan tjoemah sabagi satoe tjerita, tapi djoega oentoek propaganda aken bikin orang banjak lebih kenal pada Buddhisme poenja azas-azas dan toedjoean jang tinggi.
Pengoendjoekan boeat jang hendak maenken ini lelakon.
PAKEAN. Pengoendjoekan tentang pakean jang terdapet dalem tooneelstuk Bidji Lada bisa djoega digoenaken boeat ini lelakon, tetapi disini Prins Siddhartha belon mendjadi Buddha atawa pendita, hingga itoe djoebah koening tjoemah tertampak dalem Bagian Ka'ampat koetika itoe Prins soedah lepasken pakean kabesarannja. Patoeng-patoeng dari Buddha kabanjakan dalem pakean seperti pendita, dan tjoemah atas tooneel saekor koeda besar, maka djikaloe tida bisa dapet pindjem koeda jang bagoes dan djinek, boleh djoega diganti dengen bikin koeda-koeda'an sawates kepala, dada dan doea kaki depan. Kapan diatoer begitoe itoe koeda tjoemah ditondjolin badannja sabagian sadja, pada samping tooneel, dan Prins Siddhartha, waktoe maoe naek atawa toeroen dari itoe koeda, haroes masoek ka dalem, dengen bikin sikep seperti hendak memandjat atawa baroe melompat toeroen.
OETAN DAN GOENOENG. Itoe samoea boleh dikerdjaken dengen pake kaen lajar di-tjet, tapi satoe toekang merias tooneel jang pande nanti bisa atoer sendiri sabagimana pantesnja. Boeat aer mantjoer jang kaliatan toeroen dari goenoeng bisa digoenaken kertas perak dengen diseling sama carton di-tjet jang meroepaken batoe-batoe karang dan sabaginja.
Apa jang kita oendjoek disini ada serba ringkes dan sakedar jang perloe sadja. Dengen minta adviesnja orang-orang jang achli dalem hal meriasin tooneel dan mengenal kasenian, nistjaja bisa didapet pengoendjoekan-pengoendjoekan jang berfaedah.
Djoemblahnja itoe dajang dajang tida ditentoeken, bergantoeng pada banjaknja anak-anak prampoean jang aken toeroet, tapi paling sedikit moesti ada anem, dan oesianja antara 15 — 20 taon. Lantaran prampoean Hindoe biasa pake kaen jang menoetoepi kepala (saree) maka anak-anak prampoean jang ramboetnja pendek poen boleh toeroet.
Kapan ada orang-orang jang bisa djalanken itoe berbagi-bagi rol dengen rapih, dan ditambah sama decoratie jang satimpal, kita pertjaja ini Mahabhiniskramana nanti mendjadi satoe pertoendjoekan jang dapet pengharga'an penoeh dari orang-orang jang mengarti kunst tooneel jang aloes, dan brangkalih bisa memberi djoega pengaroeh aken orang mengenal lebih dalem pada arti dan djalannja kahidoepan.
| Tjitjoeroeg, 4 Aug. 1937. | K. T. H. |
Karya ini berada pada domain publik di Indonesia karena penciptanya telah meninggal dunia lebih dari 70 tahun yang lalu atau dipublikasikan pertama kali lebih dari 50 tahun yang lalu. Masa berlaku hak cipta atas karya ini telah berakhir. (Bab IX UU No. 28 Tahun 2014)
