Mahabhiniskramana/Bagian 3
Bagian III.
Pemandangan: Seperti Bagian I Itoe taman sekarang diterangin oleh sinarnja remboelan.
Tjanna lagi bersila di tanah dengen mata merem dan melenggoet-lenggoet.
Prins Siddhartha berdjalan masoek ka dalem itoe taman dengen tindakan tjepet dan memandang koelillng seperti koeatir. la tida dapet liat pada Tjanna jang berdoedoek di belakang satoe pot kembang.
Siddhartha (berkata sendirian): — He, aneh, Tjanna tida kaliatan. . . . Tjanna! Tjanna!
Tjanna (terkedjoet, lompat berdiri, menghamperi pada Siddhartha, laloe menjembah sambil bongkokin badan)- Toeankoe !
Siddhartha (dengen soeara perlahan): — Mana Kantaka ?
Tjanna : — Ada di istal, toeankoe !
Siddhrt : — Mengapatah tida dibawa dateng disini ? Apakah kaoe soedah loepa pesenankoe tadi siang? Lekas ambil !
Tjanna : — Itoe koeda soedah siap, soedah dipasangin sèla dan badannja patik soedah gosok sampe bersih dan berkilap. Tetapi, toeankoe, sabelonnja kita-orang berangkat, patik moehoen lebih doeloe — toeankoe, ma'afkenlah ! — patik ingin dapet taoe, apakah hadjat toeankoe jang sabenernja, maka hendak ka loear di waktoe tengah malam begini ? Ka manakah kita aken pergi?
Siddhartha : — Bitjara perlahan sedikit, Tjanna, djangan riboet. Tadi siang akoe toch soedah bilang, maksoedkoe tida laen, hanja aken menoeloeng sekalian manoesia. Ini kalih akoe aken bikin perdjalanan djaoe — amat djaoe !
Tjanna : — Kapan begitoe, toeankoe tida aken kombali dalem tempo jang lekas. . . .
Siddhartha : — Akoe tida bisa bilang boeat berapa lama, sebab akoe tida nanti kombali kapan maksoedkoe belon kasampean, Tjanna !
Tjanna : — Riboe ma'af, toeankoe ! Kapan begitoe patik rasa perloe sekalih toeankoe meminta idzin terlebih dahoeloe pada Sri Baginda. . . .
Siddhartha : — Tida bergoena, Tjanna, kerna ajahkoe soedah pasti tida nanti mengidzinken. Akoe hendak bikin ini perdjalanan dengen tida satoe orang jang taoe, salaennja kaoe sendiri.
Tjanna : — Tapi, toeankoe, kapan maksoed toeankoe sakedar hendak menoeloeng manoesia, di ini negri poen ada sampe banjak orang jang toeankoe bisa toeloeng, traoesah moesti bikin perdjalanan begitoe lama dan djaoe. . . . Disini poen banjak orang sakit, jang miskin, jang kakoerangan makan. . . .
Siddhartha (tersenjoem) : — Itoe pertoeloengan jang akoe niat beriken pada manoesia, Tjanna, boekan beroepa oewang, makanan atawa obat-obatan. Pertoeloengan begitoe matjem ada banjak orang jang bisa kasih. Niatankoe aken menoeloeng dengen beriken pengartian atas djalannja Wet Kabeneran, soepaja marika djadi insjaf apa artinja hidoep, bagimana toedjoeannja, dan sampe di mana achirnja, hingga tida oesah alamken kasangsara'an dan kasedihan teroes-meneroes. Kapan akoe beriken oewang pada orang miskin, itoe oewang sabentaran aken terpake abis, kerna harta doenia tida kekel. Kapan akoe kasih barang makanan pada orang-orang jang lapar, ini hari marika merasa kenjang, laen hari aken lapar kombali. Begitoe poen pertoeloengan pada toeboeh jang sakit, ini hari semboeh dan sehat, besok marika bisa sakit dan merintih-rintih poelah. Itoe samoea pertoeloengan, maski poen baek, sifatnja tjoemah saliwatan dan tida kekel. Tjoemah dengen beriken pengartian, tjara bagimana orang bisa mentjari katentreman dan kabebasan dari segala ganggoean doenia, baroelah bisa dibilang pertoeloengan jang sasoenggoenja berfaedah.
Tjanna : — Kaloe begitoe, boekankah lebih baek toeankoe siarken sadja sekarang itoe peladjaran jang memberi pengartian dan penerangan ? Patik poen ingin aken dapetken itoe, toeankoe ! (menjembah).
Siddhartha (tersenjoem) : — Tapi, Tjanna, boeat sekarang akoe tida bisa memberi peladjaran apa-apa, sebab akoe sendiri poen masih merampa-rimpi dalem kagelapan. Djikaloe akoe memberi pengadjaran sekarang, itoe pakerdja'an pasti aken gagal, seperti saorang boeta hendak toentoen kawan-kawannja jang pitjak. Maka itoe akoe moesti pesgi bikin perdjalanan ka tempat-tempat jang djaoe, aken mentjari goeroe-goeroe jang pande, achli-achli pemikir jang bidjaksana,orang-orang pertapa'an jang soetji, aken beladjar dan minta katerangan tentang soeal-soeal kahidoepan jang soelit, soepaja pengartiankoe sendiri bisa bertambah, bisa dapetken penerangan. Kapan soedah begitoe, baroelah akoe kombali ka ini negri aken menjiarken itoe Dharma, itoe Kabeneran, pada sekalian manoesia.
Tjanna : — Kapan begitoe, toeankoe moesti hidoep dan berlakoe sabagi satoe pendita, boekan sabagi satoe poetra radja.
Siddhartha : — Ja, akoe hendak lepasken akoe poenja hak sabagi achli waris dari ini karadja'an.
Tjanna (terkedjoet dan tepok-tepok dadanja sendiri) : — Helaas, toeankoe jang tertjinta ! Kaloe begitoe, apakah tida bener katerangannja itoe achli-achli noedjoem jang meramalken toeankoe bakal memerentah atas banjak negri-negri besar dalem doenia dan bakal djadi radja dari sekalian radja ? Mengapatah toeankoe bikin terlépas ini doenia, jang penoeh kakaja'an, dari toeankoe poenja genggeman, dan aken gantinja toeankoe hendak ambil mangkoknja satoe pengemis? Bagimanakah toeankoe bisa singkirken diri ka dalem rimba balantara jang sêrêm, sedeng satoe firdaoes jang penoeh kasenangan ada tersedia disini ?
Siddhartha : — Ach, Tjanna, itoe karadja'an jang akoe tjari ada lebih besar dan moelia dari samoea karadja'an doenia. Karadja'an jang akoe bakal berdiriken ada lebih koeat, lebih kekel dan lebih mamoer dari-pada jang diperentah oleh samoea radja-radja, kerna sifatnja tida bisa berobah, tida terganggoe oleh bahaja kabinasa'an dan kamatian. Maka lekaslah kaoe ambil Kantaka !
Tjanna (berloetoet, pelok kakinja Prins) : — Riboe maäf, toeankoe jang termoelia ! Patik moehoen biar apalah kiranja toeankoe pikir dan timbang lagi sampe mateng betoel sabelonnja mengambil ini tindakan. Ingetlah, oh toeankoe! bagimana besarnja kadoeka'an jang aken ditanggoeng oleh ajah toeankoe ! Pikirlah djoega, bagimana heibat kasedihannja banjak orang-orang laen jang pandang pada toeankoe sabagi poesat dari kagirangannja. Kaloe sasoenggoenja maksoed toeankoe dengen ini perdjalanan ada boeat memberi kabaekan bagi manoesia, bagimanakah toeankoe ada tèga hati aken bikin ajah, istri dan sobat-sobat, merasa sanget tjilaka dengen ditinggalken pergi begitoe mendadak ?
Siddhartha (boeka dengen perlahan tangannja Tjanna jang memelok): — Bangoenlah, sobatkoe jang setia, dan dengerlah akoe poenja katerangan. Katjinta'an jang didasarkan boeat goena kasenangan diri sendiri, itoelah ada katjinta'an jang palsoe. Dari sebab akoe poenja katjintaan pada marika boekan berwates atas kasenangan dirikoe sendiri — djoega tida tjoemah berwates boeat kasenangan marika jang bersifat tjoepet — maka akoe moesti berangkat aken mentjari kaselametan goena iaorang dan oentoek samoea manoesia, soepaja akoe bisa oendjoek katjinta'ankoe dengen sapenoeh penoehnja ! Maka djanganlah kaoe bikin terlambat ini perdjalanan penting dengen madjoeken nasehat dan kaberatan, kerna akoe soedah pikir sampe mateng segala apa jang akoe niat lakoeken, dan ini poetoesan tida bisa dirobah lagi !
Tjanna (berbangkit) : — Kaloe begitoe, baeklah, toeankoe !
Tjanna berlaloe, dan tida antara lama soedah kombali lagi sambil toentoen Kantaka jang soedah disélain. Siddhartha samperin itoe koeda, pegang kendalinja dan oesap-oesap kepalanja.
Siddhartha (oesapin djidatnja itoe koeda): — Kantaka! kaoe moesti anterin akoe dalem satoe perdjalanan paling djaoe jang akoe perna lakoeken. lni malem akoe hendak berangkat aken mentjari ilmoe sedjati, dengen tida taoe sampe kapan ini perdjalanan aken berächir, sebab akoe tida aken berenti kapan maksoedkoe belon berhatsil. Berlakoelah dengen gagah dan tida mengenal tjape, Kantaka, soepaja kaoe poen bisa toeroet ambil bagian dalem ini pakerdja'an besar boeat menoeloeng pada doenia. Perdjalanankoe ini boekan boeat manoesia sadja, hanja djoega goena kaselametannja segala machloek sabangsa kaoe jang lantaran tida bisa bitjara, telah tanggoeng segala kasangsara'an dengen tida ada harepan satoe apa. Kaoe tida bisa mengeloeh atawa mengadoe, tida poenja kapinteran aken mentjari pertoeloengan sendiri. Nasifmoe ada bergantoeng sama pri-boedinja manoesia. Kapan banjak orang bertabeat kedjem pada binatang, kaoe aken dipersakiti dengen tida bisa berdaja atawa melawan. Maka kaoe poenja kaberoentoengan ada bergantoeng sama hatsilnja pertjoba'ankoe ini, boeat bikin manoesia mengenal boedi dan kabeneran, serta menaro tjinta kasian pada sekalian machloek berdjiwa. Maka itoe, Kantaka, bawalah toeanmoe ini dengen gagah ka tempat jang hendak ditoedjoe!
Siddhartha laloe naek ka atas belakangnja Kantaka, dan teroes berangkat dengen diikoetin oleh Tjanna.
LAJAR TOEROEN.
Bagian III berachir.