Mahabhiniskramana/Bagian 4
Bagian IV.
Pemandangan: Tanah pagoenoengan pada tepi soengei Anoma. Di kadjaoean ada kaliatan Himalaya jang poentjak-poentjaknja tertoetoep saldjoe dan pada lampingnja ada penoeh oetan, sedeng di sabelah depan ada boekit-boekit karang dari mana kaliatan aer djatoh jang matjemnja seperti perak. Di sapoeter itoe tempat ada terdapet poehoen-poehoen dan gombolan, di tengah mana ada tertampak djoega boenga-boenga oetan roepa-roepa matjem dan warna. Sinar matahari pagi memaloet itoe tanah pagoenoengan dengen warna koening emas.
Prins Siddhartha lompat toeroen dari koedanja jang tali-moeloetnja ada dipegangin oleh Tjanna. Ia tjioem kepalanja itoe koeda dan tepok-tepok lehernja. Komoedian berdiri memandang ka sapoeter itoe tempat dengen roepa girang dan goembirah.
Siddhartha : — Apakah itoe soengei (mengoendjoek sama tangannja) betoel ada soengei Anoma, Tjanna ?
Tjanna: — Tida salah, toeankoe.
Siddhartha : — Dan ia ada djadi wates dari karadja'annja ajahkoe?
Tjanna : — Dengen sabenernja, toeankoe ; dan sekarang toeankoe bisa menjaksiken bahoea daerah karadja'an dari ajah toeankoe sabenernja boekan ketjil adanja. Maka patik moehoen toeankoe pikir lagi sekalih : apakah tida sajang satoe warisan jang demikian besar dan berharga, toeankoe hendak lepasken?
Siddhartha : — Kapan maksoedkoe telah berhatsil, Tjanna, seloeroeli ini doenia aken mendjadi kapoenja'ankoe.
Tjanna (dengen roepa girang): — Oh, kapan begitoe toeankoe nanti bertachta sabagi radja, satoe maharadja jang paling besar, jang memerentah sekalian radja-radja dalem doenia !
Siddhartha : — Boekan begitoe, Tjanna, Akoe poenja tachta ada berbeda dari kadoedoekannja radja-radja, kerna beräda dalem hatinja manoesia.
Tjanna : — Bertachta dalem hali manoesia . . . . ! (tjelangap seperti bingoeng).
Siddhartha : — Ini soeal boleh djadi tida gampang aken kaoe mengarti, Tjanna, maka akoe rasa lebih baek kita djangan bitjaraken lebih djaoe. Sekarang ada lagi satoe pakerdja'an jang akoe minta kaoe toeloeng oeroesken. Kaoe toenggoe sabentar disini, akoe maoe salin pakean. (Berdjalan masoek dan mengilang diantara poehoen-poehoen dan gombolan.
Tjanna sangkoetin tali kendalinja Kantaka di tjabang satoe poehoen, laloe berdjongkok londjorin kaki seperti orang jang lelah dan tjape. Beberapa kalih ia mengoelèt dan mengoewap.
Siddhartha kaloear dari tengah poepoehoean, dengen pake djoebah koening seperti pendita, kepalanja tida tertoetoep sorban lagi, dan kadoea kakinja terlandjang. Pada tangannja ada sasoesoen pakean karadjaan jang baroesan diboeka, dengen pedang, perhiasan kapala, sorban, iket pinggang, rante-rante leher dan laen-laen perhiasan. Di paling atas dari itoe soesoenan pakean ada terletak iapoenja ramboet jang baroe dipotong, hingga tjoemah katinggalan ramboet pendek di kepalanja.
Tjanna terkedjoet dan ampir terdjengkang ka belakang.
Tjanna (tinggal berdjongkok teroes dengen roepa bingoeng): — Toe-toe-toe-an-koe ! . . . . . toe-toe-toeankoe ! . . . . . . . ah ! oh ! oeh ! . . . . . . ah ! oh ! oeh !
Siddhartha (dengen sabar) : — Disini ada itoe pakerdja'an jang kaoe haroes oeroes. Inilah ada titahkoe jang pengabisan sabagi kaoe poênja toean. Boeat kadepanin antara kaoe dan akoe tida ada perbeda'an apa-apa, katjoeali sabagi goeroe dengen moerid atawa soedara toea dengen soedara moeda.
Tjanna : — Biarpoen toeankoe pandang Tjanna sabagi moerid atawa soedara moeda, patik sendiri ingin tinggal tetep mendjadi toeankoe poenja hamba, jang selamanja bersedia aken mendjoengdjoeng dan mendjalanken segala titah toeankoe.
Siddhartha : — Akoe selaloe hargaken tinggi atas kesetia'anmoe, Tjanna ; tetapi moelai dari ini saät akoe soedah berenti mendjadi satoe poetra makota, dan aken menoentoet kahidoepan sabagi saorang pertapa'an dan penjari kabeneran, jang telah lepasken diri dari segala iketannja kadoenia'an. Maka itoe ini segala pakean indah, sendjata dan barang perhiasan, akoe tida perloe lagi. Akoe poenja ramboet jang pandjang poen akoe soedah potong pendek. Maka pergilah sekarang, Tjanna, bawa pada Kantaka dan ini barang-barang balik ka Kapilawastoe, serahken samoea pada Baginda Radja ajahkoe. Sampeken djoega perkata'ankoe, jang memoehoen agar ajahkoe soeka loepaken pada poetranja ini sampe maksoedkoe telah terkaboel.
Tjanna (menjembah): — Ma'afkenlah, toeankoe. Patik boekan hendak membantah titah toeankoe. Dengen sabener-benernja patik merasa kaberatan sanget aken sampeken ini kabaran pada Sri Baginda ajah toeankoe.
Siddhartha : — Djangan koeatir, Tjanna ; ajahkoe ada satoe radja jang baek dan adil: ia tida nanti hoekoem padamoe.
Tjanna : — Kapan patik moesti dihoekoem, biar poen diboenoeh mati, dengen ichlas hati patik terima. Tetapi jang patik menaro kaberatan adalah boeat menjaksiken besarnja terkedjoet dan doeka tjita jang aken ditanggoeng oleh Sri Baginda djoengdjoengan kita di sa'at patik dateng menjampeken ini kabaran dan pesenan dari toeankoe, jang pastilah aken memoesnaken seloeroeh pengharepan dan kasenangannja, dan brangkalih djoega kasehatannja, Adoeh, toeankoe ! Kapan toeankoe taoe bagimana besar kagirangannja Sri Baginda ajah toeankoe koetika beroleh saorang poetra jang aken mendjadi ahliwaris tachta karadja'an, toeankoe nanti bisa bajangken djoega bagimana heibat itoe poekoelan jang membikin tjita-tjita dan angen-angennja mendjadi antjoer-leboer dan linjap sama sekalih. Inilah, toeankoe, dengen sabener-benernja patik tida tèga hati aken menjaksiken.
Siddhartha : — Tjanna jang baek, perasa'an hatimoe itoe menoendjoekken kaoe poenja tjinta-setia pada ajahkoe, seperti djoega padakoe sendiri. Inilah ada sifat moelia jang satoe waktoe nanti menganter kaoe ka djalan dari kasoetjian, dan alamken djoega kaberkahan doenia. Tetapi, Tjanna, tjinta-setia sadja masih belon tjoekoep aken manoesia dapetken kasampoernaan batin dan kaberoentoengan kekel. Di sabelahnja itoe ia moesti poenjaken djoega kakerasan hati aken lakoeken apa jang bener, dengen tida oesah taro terlaloe banjak perhatian pada kadoeka'an dan kasedihannja orang-orang jang pemandangan dan pikirannja masih terlipoet oleh sang maya. Aken melinjapken itoe matjem kabodoan dari manoesia, aken beriken pada marika penerangan dan kasedaran, maka akoe sekarang lepasken kadoenia'an, tinggalken ajah dan anak-istrikoe, aken tjoba dapetken apa jang laen-laen orang belon pernah tjari atawa pikir, jaitoe ilmoe boeat melepasken manoesia dari segala kadoeka'annja. Tjanna (menjembah): — Baeklah, toeankoe, patik nanti tjoba sampeken ini oetjapan dari toeankoe pada Sri Baginda
Siddharta : — Dan sampèkenlah djoega pada ajahkoe, Tjanna, ini perkata'an : Akoe tida lepasken deradjatkoe sabagi satoe Prins, tapi akoe ingin mendjadi Prins dalem arti jang betoel, didasarken atas pengataoean jang bisa didapat dengen djalan mentjari sendirian di tempat soenji hingga bisa poenjaken itoe sinar penerangan dengen sapenoehnja. Kapan akoe soedah bisa poenjaken itoe, antero doenia aken djadi milikkoe, lantaran akoe soedah berboeat pahala paling besar oentoek sekalian machloek - bilanglah pada ajahkoe — ini doenia aken djadi kapoenja'ankoe dengen berdasar atas akoe poenja katjinta'an padanja. Dari sebab pengharepan manoesia ada bergantoeng pada pakerdja'an dari sasama manoesia djoega, maka akoe sekarang ambil ini tindakan soepaja, dengen menjingkirken diri dari kasenangan doenia, akoe bisa toeloeng doenia poenja kaselametan.
Tjanna (menjembah laloe pelok dan tjioem kakinja Siddhartha) : Kahendak toeankoe patik aken djalanken.
Siddhartha serahken itoe barang-barang samoea di tangannja Tjanna jang menjamboetin sambil berloetoet. Komoedian ia angkat kasih bangoen pada itoe penganter, dan pegang poendaknja.
Siddhartha : — Moelai dari ini sa'at, sasoedah kaoe menjanggoepi aken djalanken titahkoe jang pengabisan, itoe kadoedoekan antara toean dengen hamba akoe hapoesken, dan salandjoetnja kita berdoea ada djadi sabagi soedara. Sekarang selamet tinggal, soedarakoe Tjanna. . . . .! sampe ketemoe lagi !
Siddhartha mendjoerah, balik badannja dan masoek ka dalem oetan, tinggalken Tjanna jang berdiri mengawasi dengen kasemsem seperti linjap akal boedinja.
Tjanna (goleng goleng kepala): — Akoe poenja djoengdjoengan poetra-makota, ada begitoe moelia, begitoe agoeng, begitoe dermawan, begitoe baek hati boedinja, begitoe tetep dan soedjoet toedjoeannja aken mentjari ilmoe sedjati oentoek menjelametken manoesia. Ja, akoe sekarang pertjaja, djikaloe ada orang jang bisa berhatsil dalem ini matjem pertjoba'an, itoe orang tida bisa laen dari akoe poenja djoengdjoengan ini. Ja, akoe pertjaja pasti ichtiarnja itoe aken berhatsil. . . Prins Siddhartha aken mendjadi satoe Buddha, satoe Goeroe Doenia jang aken bertachta dalem hatinja manoesia. (Berpaling dan ambil kendalinja Kantaka). Ach, Kantaka, kapan djoengdjoengan kita kasampean toedjoeannja dan mendjadi satoe Buddha, kaoe dan akoe tida sia-sia soedah menganter padanja dalem perdjalanan begini djaoe. Maski bagimana ketjil dan tida berärti, kita poen soedah toeroet djoega ambil bagian dalem ini pakerdja'an penting oentoek doenia. Maka bergiranglah, Kantaka, biarpoen kita moesti berpisah dari kita poenja djoengdjoengan boeat samentara waktoe. Oh, ja! tadi poetra-makota soedah pandang padakoe sabagi soedara. (Pegang poendaknja itoe koeda). Dan sekarang, Kantaka, akoe poen haroes pandang kaoe sabagi akoe poenja soedara, menoeroet toeladan jang moelia dari kita poenja djoengdjoengan. Marilah, soedarakoe, kita-orang sigrah berdjalan poelang ka iboekota. (Masoek sambil toentoen Kantaka).
LAJAR TOEROEN.
Tamat.