Mohamed Ali Pacha/Bab 21

by Gouw Peng Liang

XXI.
G A N T I S U L T A N.

 Dengen heran dan soesa hati besoknja sobat-sobat dan kenalannja Mohamed Ali pacha mendenger kabar, anaknja ini pacha, Mrika, soeda diserang oleh orang djahat, tapi beroentoeng tiada sampe binasa djiwanja, tjoema mendapet loeka sadja. Sekarang dilarang orang dateng di gedongnja itoe pacha. Ini perkara soeda bikin sekalian pacha dan bei jang tinggal di tepi soengi Bosporus soeda djadi kwatir dan gedongnja Mohamed Ali Pacha atelah didjaga kras siang dan malem.

 Mohamed Ali pacha soeda toeroet maoenja Mri­ka, sebagimana dikasi nasehat oleh Chefket effendi. Ini pacha mendjadi soesa hati, sebab sekarang djadi njata ia masi dimoesoe kras oleh imam Reschid jang disangka telah mati.

 Sekarang Mohamed' Ali moesti djaga baek ia poenja diri dan moesti tjari djalan aken kasi bagian pada itoe imam jang kedjem pranginja. Diam-diam ia prenta hamba-hambanja tjari taoe di mana imam Reschid ada semboeni dan maoe tangkep ini orang doerhaka pada waktoenja dateng di mesdjid.

 Tetapi imam Reschid soeda melinjapken dirinja dan liwat bebrapa minggoe kamoedian baroelah Mohamed Ali dapet kabar itoe imam soeda lari ka Arnautlik, di mana ia berdjalan koeliling dengen == 174   Ganti sultan. ==

teroesken parkerdja'annja, aniaja pada orang-orang Christen.
 Djoega Mohamed Ali soeda preksa padaChefket, anaknja Soleiman pacha dan dapet ketrangan-ketrangan jang ia ingin taoe.
 Ini anak nioeda jang pande memborosken oewang, hingga dibentji oleh ajahnja, soeda di­ angkat mendiadi luitenant dari barisan bashi bozouk dan atas prentarja Sultan, ia dikirim ka wates negri Servie, di mana ampir petja prang. Njatalah imam Reschid ada mempoenjai banjak sobat di antara pembesar-pembesar di kraton karadja'an, hingga ia bisa.singkirken padaChefket, soepaja orang tiada tjoeriga ini effendi soeda serang pada Mrika. Tapi begimana ia soeda dibikin bodo oleh Chefket, inilah imam Reschid liada dapet taoe.
 Sebab keada'an di kota Stamboel ada sanget koesoet, Mohamed Ali pacha tiada ada banjak tempo aken membales sakit hatinja pada imam Reschid. Ia moesti lebi perloein oeroes perkara negri, seperti satoe generaal dan sebagi satoe anggota dari kaoem moeda.
 Soeda lama banjak pembesar di Konstantinopel tiada senang bati meliat kelakoeannja Sultan Abdoel Azis. Bermoela ini Sultan pegang prenta dengen adil dan tiada pake banjak oewang boeat blandja di astananja, tapi pelahan pelahan adatnja soeda beroba seperti orang jang koerang beres ingetannja. Baginda soeda borosken banjak oewang boeat onkost harimnja dan tiada open pada perkara negri, jang dioeroes sadja oleh Sultan Valide [iboenja Sultan] bersama Mohamed Domaud pacha, iparnja Sultan. Ini doea orang soeda trima banjak anteran dari oetoesan Rus, jang lantaran begitoe soeda bisa tjampoer dalem per­kara pamerentahan negri Toerki.

Pikirannja Sultan Azis betoel tiada beres dan boeang oewang dengen djalan tiada kroean. Satoe tempo Baginda soeka piara singa dan matjan jang disoeroe bli sampe bebrapa ratoes ekor dan dikasi makan di piring perak. Di laen hari Sultan maoe doedoek kreta, rodanja dari mas dan ditarik oleh koeda betina dari Nedjed jang harganja bebrapa riboe roepia tiap-tiap satoe ekor. Satoe tempo poela Baginda prenta adoe ajem dan kasi gelaran serta bintang-bintang kahormatan pada binatang-binatang ini jang paling kosen. Kamoedian ia prenta bebrapa toekang gambar dari Parijs dan Weenen aken bikin roepa-roepa gambar di tembok dan pintoe-pintoe kamarnja, sedeng onkostnja ini semoea ada bermillioen roepia.

Kadang-kadang Sultan minta bebrapa karoeng berisi oewang mas, jang lantes dilempar di atas permadani, kamoedian Baginda poengoet ini oewang dengen soeka hati. Laen dari begitoe Abdoel Azis sringkali bli boedak boedak prempoean jang kamoedian dinikaken pada hambahamba astana, officier dan soldadoe soldadoe serta dikasi mas kawin bebrapa banjak. Ini semoea ada besar sekali onkostnja dan membikin kas negri mendjadi kosong, hingga boleh djadi karadja'an Toerki tiada nanti bisa bajar oelangnja dan achirnja nanti djadi failliet.
 Segala mantri oewang, jang saben-saben diganti, soeda kasi nasehat baek, tapi pertjoerna sadja. Padisha jang gampang mara, sebagi djoega ia poenja singa-singa, senantiasa minta banjak oewang pada mantrinja, jang diantjem aken diboenoe djika tiada ditoeruet ini perminta'an.
 Sedang begitoe tiada ada satpe djoeroe astana soeka memboedjoek pada Abdoel Azis, soepaja ia djangan landjoetken itoe perboeatan-perboeatan sesat. Djika Sultan koerang oewang djoeroedjoeroe astana kasi pikiran aken minta pertoeloengan pada oetoesan Rus, generaal Ignatief.
 Demikianlah negri Toerki djadi bertamba soesa.
 Lantaran begitoe, di dalern negri soeda terbit roepa-roepa tjidra. Lebi satoe taon lamanja rahajat Christen di Bosnie dan Herzegowina jang diasoet oleh djoeroe-djoeroe indjii Rus, telah berbanta pada pamarenta Toerki. Rahajat negri di Bulgarije

maoe bikin hoeroe hara aken boenoe sekalian orang Moslim. Beroentoeng ini bahaja bisa lekas ditjega, tapi samentara itoe ada banjak orang Bulgaar soeda diseksa hingga ampir semoea Radja besar di Europa soeda djadi mara pada Toerki. Selaennja ini, roepa-roepanja rahajat Servie dan Montenegro maoe bergerak aken melawan pada Toerki, jang moesti kirim balatentara ka sana sini.

Ganti Sultan.

177

---

 Dalem keadaän begini pembesar-pembesar Toerki soeda toedoe Sultan Abdoel Azis berboeat chianat pada negri, kerna Baginda bersobat sama oetoesan Rus, moesoe besar dari orang Toerki, maka rahajat negri dan pembesar-pembesar soeda bermoefaket boeat kasi toeroen Abdoel Azis dari tachta karadja'annja.

 Di tanggal 29 Mei 1876 malem bebrapa banjak softa dan imam-imam, dibantoe oleh satoe barisan balatentara, jang dikapalaken oleh generaal-generaal, pacha-pacha dan bei-bei dan dianter oleh bebrapa banjak rahajat Moslim, telah dateng di astana Sultan, di mana Abdoel Azis ada menjenangken dirinja dengen memborosken oewang bermillioen-millioen. Sambil bersoerak marika minta Sultan toe­roen dari tachta karadja'an, sebab soeda bikin banjak soesa pada negri. Hamba-hamba astana telah boeka pintoe kraton, boeat itoe orang-orang masoek. Bebrapa banjak softa, imam-imam dan officier­-officier telah masoek ka dalem. Dengen seboet nama Allah, Scheik el Islam menjataken Sultan Abdoel Azis dipetjatken dari segala kabesaran serta kekwasaännja dan tiada boleh pegang prenta lagi. Bebrapa orang dateng tangkep pada Sultan jang dikasi masoek dalem pendjara di satoe astana dalem kratonnja sendiri, aken menoenggoe poetoesan lebi djaoe.

 Kamoedian orang angkat Moerad effendi, poetranja Sultan Abdoel Medjid, mendjadi Sultan dari sekalian kaoem Moslim dan Sultan dari kaoem Ottomanie.

Moehamed Ali Pacha

12

Begitoelah soeda dipetjatken satoe Radja dan diganti oleh Radja laen jang diharep bisa membawa berkah keslametan bagi karadja'an Toerki.

Tiada lama lagi telah dikaloearken poetoesan atas halnja Sultan Abdoel Azis jang dilepas dari kabesarannja. Menoeroet titanja el Kor'an: „Djikaloe ada doea Khalief di dalem negri, maka jang satoe moesti diboenoe dan jang laen dimoeliaken." Roepa-roepanja segala softa dan imam soeda toeroet ini tita, kendati ini perkara masi tinggal glap.

Besoknja orang dapetken Abdoel Azis, jang sabenernja tiada dikasi pake sendjata dan didjaga kras oleh soldadoe, telah mati dalem kamar toetoepan, ia poenja nadi-nadi telah poetoes dipotong dan badannja penoe dengen dara. Tiada djaoe dari maitnja Sultan ada terletak satoe goenting ketjil jang Baginda biasa pake aken goenting ia poenja djenggot. Thabib-thabib jang diprenta preksa maitnja Sultan, telah menjataken, Abdoel Azis soeda mati memboenoe diri.

Tetapi bebrapa hamba jang setia dan tiada berpisa dari Baginda ada tjerita, bebrapa soldadoe Circassie jang maoe toeloeng pada Abdoel Azis, telah ditembak serta diboenoe oleh bebrapa pacha dan generaal-generaal jang bikin abis djiwanja Sultan.^[1]  Sultan Abdoel Moerad poen tiada bisa toeloeng kasoesahannja negri Toerki, jang perloe diprenta oleh satoe Radja jang tjakep, gaga serta bidjaksana. Sultan baroe tiada maoe mengadep di hadepan orang banjak, aken oeroes perkara negri dan tiada maoe tjaboet pedang karadja'an dalem mesdjid di Ejoub, seperti Radja-radja Europa trima makota karadja'annja.
 Di bawa prenta Sultan Abdoel Moerad moesoemoesoe dari Toerki soeda oendjoek kombali kebraniannja. Semingkin lama peroesoehan di antara rahajat Christen telah bertamba besar; orang-orang Moslim di Arabie dan di Syrië maoe angkat satoe Suitan sendiri; Servie dan Montenegro maoe berprang pada Toerki dan kirim balatentaranja aken bantoe pada orang Bulgaar dan pada rahajat Christen di Bosnie. Angkatan prang Toerki jang tiada mempoenjai alat prang tjoekoep, soeda kala prang dan moesti moendoer ka Adrianopel.
 Ini perkara membikin tiada senang hatinja rahajat Toerki. Pada tanggal 3 1 Augustus 1876 Sultan Abdoel Moerad ditoeroenken lagi dari tachta karadja annja, tapi tiada diboenoe seperti Suitan Abdoel Azis. Ia poenja soedara, Abdoel Hamid, saorang moeda jang tjakep, sopan, gaga dan brani, telah diangkat mendjadi Sultan dan Khalief. Baginda ini soeda pegang kendali pamerentaän dengen tjakep serta oeroes sendiri segala oeroesan negri. Angkatan prang telah ditamba serta dilengîepken dengen sendjata dan alat prang tjoekoep, sebagimana moesti, segala pacha jang bikin banjak soesa telah dikirim ka medan prang akenoesir moesoe.
 Angkatan prang Toerki sekarang, di bawa prentanja panglima prang Abdoel Karim pacha, telah lawan moesoenja dengen gaga perkasa. Orang Servie telah dipoekoel moendoer; di Alescinatz orang Toerki soeda dapet kamenangan besar dan tentoe djoega bisa madjoe teroes sampe di Belgrado, iboe kota dari negri Servie, djika tiada lekas Rusland dateng tjampoer tangan dan minta dibikin brenti ini peprangan. Poen laen laen karadja'an Europa jang doeloe tiada tjampoer dalem perkara ini prang koetika barisan Servie dan Montenegro masoek di tana Toerki, sekarang telah minta dibikin dami perkara prang.

---

1. Di blakangkali Midhat pacha dan bebrapa pembesar Toerki soeda ditarik di hadepan hakim dengen ditoedoe soeda boenoe pada Sultan Abdoel Azis. Marika itoe telah dihoekoem boeang ka laen negri.