Pembalesan Kedji/Bab 20
XX.
KOEI-TJOAN DAN BOK-HIANG
Berselang kira-kira satoe boelan dari apa jang ditjeritaken dalem fatsal sabelah atas ini, di Kampoeng Opak soeda terdjadi satoe perobahan jang boleh dibilang ada sanget pesat.
Baleh bamboe di dapan roemahnja Boen-san telah terganti dengen papan dari kajoe djadi, begitoe poen lampoe kelak-kelik jang biasa ditempatken di atas medja dari ia poenja aboe leloehoer, soeda tertoekar dengen laen matjem api penerangan jang ada banjak lebi indah. Laen dari itoe, kaloe orang masoek dalem kamar tidoernja, nis-tjaja orang nanti djadi melengak, apabila orang soeda taoe lebi doeloe bagimana matjemnja itoe tempat di harian Tjhiagwe tjee-it.
Dalem roemahnja njonja Boen-hoei, jang pernahnja sebrang-menjebrang dengen tempat tinggalnja Boen-san, djoega soeda djadi berobah. Tjoema perobahan disitoe boekan bisa dinjataken dari barang-barang perabotannja, hanja orang misti menilitikin dari kabiasahannja itoe njonja djanda dan anaknja.
Dalem tempo jang telah laloe, kaloe sadja lontjeng soeda mengoetaraken poekoel sembilan, lantas djoega semaoe pintoe dan djendelah dari itoe roemah terkoentji rapet-rapet, dan teroes tinggal begitoe sampe hari esoknja. Tapi dalem hari-hari sasoedanja habis tahon baroe, bebrapa kali pintoe blakangnja soeda diboeka kombali di waktoe kaadahan soeda djadi soenji.
Pada malem dari 8 Djigwee, roemahnja Boen-san soeda tinggal terpentang sampe poekoel doewa belas, dan adalah kira-kira poekoel satoe koetika Djambroet soeda poeles betoel-betoel dengen berbaring di samping babanja: tapi di itoe masa di blakang roemahnja njonja Boen-hoei masi ada doewa anak moeda jang sedeng omong-omong asik sekali. Marika itoe ada mengglėpok di djoe-bin, samantara pintoe di blakangnja ia orang ada dirapetken dari loear:
„Engga keh loe, engga laen maen ketakoetan sadja. Begini waktoe siapa nanti bisa taoe kita ada berdoewa-doewa di sini?"
„Eh eh, boleh kata engga katakoetan! Baek orang engga taoe, kaloe sampe orang dapet taoe, masa oeroengan engga tjilaka. Ini perkara boekan maen-maen."
„Betoel begitoe, tapi siapa jang nanti bisa dapet taoe kaloe boekan loe atawa goea jang kasi taoe. Saban-saban sampe di waktoe tengah malem baroe loe boekah pintoe; djangan kata malem, biar siang djoega siapa si orangnja jang maoe liwat di sini? Kaloe loe maen katakoetan sadja pengabisannja bikin goea dioega djadi endoet-endoetan."
„Loe kata engga ada jang taoe kita poenja perkara? Itoe bi Djambroet sama enko Boen-san apa boekannja orang?"
„Ah, dia berdoewa sampe boleh dipertjaja: goea brani tanggoeng jang dia engga nanti ngomong sama satoe orang."
„Taroh begitoe, tapi kaloe tjilaka maoe dateng ada sadja djalannja."
„Ja, kaloe loe maoe ngomong sadja memang gampang, tapi bilang toh : bagimana? Sampe sekarang soeda ampat kali goea dateng ka mari: engga laen jang goea dapet denger dari loe poenja moeloet: boleh tjilaka, tapi engga toh djadi apa-apa. Oeda, pendeknja djangan takoet, Bok-hiang: taroh lagi orang dapet taoe, masa boleh djadi kanapa? Loe toh memangnja soeda tentoe bakal djadi goea poenja bini."
„Oeda, pendeknja habis ini malem kita djangan bikin-bikin lagi ini perboeatan. Betoel, Koei-tjoan, goea poenja hati salamanja katakoetan sadja."
„Kaloe begini djadi pendeknja loe oesir sama goea?"
„Boekan si oesir; habis bagimana kaloe goea rasanja endoet-endoetan sadja! Kaloe goea poenja neh satoe kali djadi mendoesin dari tidoernja, habis dia tjari'in goea engga ada, kan samoea boleh djadi tjilaka?"
Koei-tjoan berdiam sabentaran, kamoedian dengen koenjoeng-koenjoeng ia pegang tangannja Bok-hiang, dan berkata dengen soeara membangkit:
„Kliwat njata sekali jang loe engga soeka goea dateng ka mari, kaloe engga tentoe loe engga kata begitoe. Taroh lagi loe poenja mah bangoen dan kaok-kaokin sama loe, djoega kita poenja resia engga nanti boleh djadi kataoehan. Goea boleh lantas menjingkir, dan loe boleh kata kapanasan atawa begini-begitoe, maka djadi loe kaloear."
„Biar mati boekan begitoe, Koei-tjoan," kata Bok-hiang, samantara ia tinggalken tangannja dioesoet-oesoet oleh itoe djedjaka. „Kaloe betoel goea engga soeka loe dateng ka mari, maoe apa goea ladenin boekah ini pintoe di waktoe tengah malem? Biar engga selamat, goea poenja hati saban-saban rasanja engga enak sadja, goea takoet betoel ini perkara nanti djadi kataoehan."
„Goea oeda kata loe djangan takoet. Tjoba loe pikir: taroh lagi loe poenja mah dapet taoe ini resia, djoega masi engga kanapa. Malahan kaloe goea poenja mah lamar dia boleh lantas kasi lagi."
„Begitoenja si betoel, tapi goea tentoe nanti kenah dilabrak satengah mati, apa loe kira engga maloe kaloe sampe djadi begitoe?"
„Goea nanti toeloengin, itoe loe djangan takoet."
Bok-hiang djadi tertawa tatkalah denger itoe bitjara. Koetika itoe Koei-tjoan poen toeroet berkloekoekan, kerna ia lantas soeda bisa merasa sendiri, jang ia poenja omongan ada terlaloe gila.
Kamoedian doewa anak moeda itoe tinggal berdiam sampe sakean 'lama. Samantara itoe Koei-tjoan soeda sangkoelin ia poenja tangan kiri di lehernja Bok-hiang, sedeng gadis itoe poenja kaki jang kanan ia toempangken di pahanja.
Koetika itoe ampat pendjoeroe ada gelap-goelita. Langit kaliatannja seperti beloedroe biroe jang tertaboer dengen permata moeliah. Malem ada mengoetaraken betoel-betoel kasoenjiannja. Dengen sawat-sawat malaenkan bisa terdenger soera menjeringsing dari binatang-binatang ketjil.
Hawa oedara ada amat dingin, tapi itoe sama-sekali soeda tida dirasaken oleh itoe doewa kekasih, kerna di itoe waktoe, tida ada laen perkara jang di-iboekin oleh marika dari masing-masing poenja katjintahan satoe pada laen.
Soaetoe boewah pikiran ada berkata: dalem penghidoepan manoesia adalah jang paling broentoeng di waktoe orang saling menjinta.
Sekali poen oedjar itoe ada menggenggam arti jang amat dalem, tra oeroeng sigra orang nanti bisa dapetken betoel-betoel sari kabenaranja, apabilah orang maoe perhatiken, mengapa doewa kekasih itoe ada begitoe betah boeat tinggal dalem gelap-gelapan.
Tjoema sajang sariboe sajang jang anak-anak moeda itoe poenja katjintahan boekan ada berdiam di satoe dasar, jaitoe: sedeng Bok-hiang ada menjinta satjara satoe gadis jang masi soetji, Koei-tjoan sabaliknja soeda ambil sadja gadis itoe poenja paras jang tjantik dan potongan badan jang ramping aken didjadik poenja pokoh katjintahan. Oleh kerna itoe, samantara Bok-hiang—salagi disangkoelin lehernja—ada mengimpi dari kabedjikan dan kasoetjian, Koei-tjoan plahan-plahan soeda djadi berkobar ia poenja napsoe birahi.
Bok-hiang merasa poendaknja djadi pegal lantaran digelendotin, Laloe ia kiserken sedikit badannja dari peloekan. Koetika itoe Koei-tjoan laloe berkata:
„Kaloe begini goea rasanja engga kapingin tidoer teroes sampe pagi."
„Eh-ja, sekarang ini soeda poekoel brapa ? Besok goea boleh nanti ngelentak-ngelentoek dan salah-salah engga bisa bangoen pagi-pagi."
„Loe si poenja pikiran engga laen bertjabang sadja. Belon apa-apanja soeda inget perkara besok."
„Boekan begitoe, Koei-tjoan, Soenggoe mati; kaloe bisa goea djoega kapinginnja bisa salamanja seperti sekarang, tapi loe toh misti pikir: kaloe ini perkara sampe kataoehan, kan nanti djadi lebi tjilaka lagi?"
„Hala kata adja dasaran loe engga soeka ada berdoewa-doewa sama goea. Goea djoega toh belon taoe barang satoe kali inget begitoe. Kaloe lagi ada sama-sama loe, goea rasanja oga-ogahan boeat poelang lagi ka roema."
Bok-hiang tinggal berdiam, hingga Koei-tjoan lantas berkata poelah :
„Betoel-betoel bagimana si loe poenja hati, goea soah djadi kapingin taoe lagi. Kaloe Ige engga soeka goea dateng lagi ka mari la biar karoeannja."
„Kaloe engga soeka masa goea maoe ladenin loe sampe ampat kali."
“Ja loe poenja moeloet adja kata begitoe."
„Soenggoe mati, Koei-tjoan."
„Teroes ka dalem hati ?"
„Ja."
„Tadi kanapa loe kata: lebi baek kita djangan katemoe-katemoe lagi ?"
Bok-hiang berdiam sabentaran, kamoedian laloe ia berkata poelah:
„Boekannja goea engga soeka loe dateng, tapi sebab salamanja goea pikirin sadja takoet ini perkara djadi kataoehan."
„Tapi sabetoel-betoelnja loe tjinta sama goea ?"
„Ja"
„Betoel-betoel, boekan di moeloet sadja ?"
„Engga pertjaja la soeda."
„Eh boekannja engga pertjaja, orang goea liat loe poenja tingka-lakoe si moendoer-madjoe begitoe." „Habis loe poenja maoe bagimana ?"
Koei-tjoan oesoet-oesoet tangannja Bok-hiang, kamoedian ia berkata lagi:
„Kan sama ini sakali soeda ampat kali goea dateng di sini?”
„Kanapa ?"
„Loe kata loe tjinta sama goea."
„Ja kanapa ?“
„Tapi loe belon taoe kasi goea tjioem. Baroe-baroe dateng belon apa-apanja loe soeda lantas emposin bikin goea djadi terkedjoet."
Bok-hiang tertawa, kamoedian laloe berkata:
„Loe malahan jang dateng-dateng bikin goea djadi terkesiap, sampe goea poenja hati rasanja deredekkan."
„Soenggoe mati, sadari itoe waktoe goea sampe djadi takoet-takoet.”
Bok-hiang tertawa lagi.
„Habis sekarang bagimana ?—boleh engga kasi goea tjioem ?"
Bok-hiang tida menjaoet, tapi njata dari laganja jang ia tida nanti membanta. Lantaran itoe lantas sadja Koei-tjoan tjioem pipinja gadis itoe kiri-kanan, seraja memeloek djoega sakentjang-kentjangnja. Kamoedian laloe ia bisikin apa-apa, jang sama sekali tida bisa dapet didenger oleh laen koeping.
Dengen koenjoeng-koenjoeng Bok-hiang djadi berobah tingkanja seperti ada koerang laloewasa dipeloek lebi lama oleh Koei-tjoan, dan laloe ia berkata:
„Hmmmm! djangan ah!"
. . . . . . . . . . . . . . . . . . .
Tida berselang lama lagi lantas kadengeran tong-tong berboenji tiga. Koetika itoe Bok-hiang laloe berkata:
„Ia, soeda begitoe malem, kaloe engga tidoerin sekarang, besok tentoe goea engga bisa bangoen."
„Djadi goea misti poelang sadja?“ tanja Koei-tjoan.
„Eit-eit, loe maoe katain goea kliwatan lagi!"
„Memang loe kliwatan."
„Dari sebab apa?"
„Brani kata sebab apa lagi! Tadi!"
„Soedalah djangan mara-mara sadja, mari da goea tjioem."
Koei-tjoan lantas sodorken pipinja, dan Bok-hiang lantas tempelken ia poenja idoeng pada jang di sabelah kiri.
„Sabelahnja lagi toh."
Bok-hiang toeroet itoe permintahan, kamoedian laloe ia berkata:
„Soedalah, sekarang lebi baek kita tidoerin, kaloe engga besok nanti engga bisa bangoen."
„Habis kapan goea boleh dateng lagi? Besok malem ja?"
„Djangan toh, masi djoega ngantoek. Soeda pendeknja seperti biasa sadja: kaloe maoe dateng kasi taoe sama bi Djambroet."
Koei-tjoan peloek-tjioem lagi pada Bok-hiang, kamoedian ia berlaloe.
Di tengah perdjalanan ia menggrendeng pada diri sendiri, katanja:
„Kaloe begini betoel boekannja maen-maen kajoe. Sama ini kali soeda ampat malem goea gadangin, tapi belon djoega goea bisa dapetin sama dia. Goea tadinja pikir di mana djoega baek, tapi sekarang njata engga begitoe gampang. Boelak-balik engga ada jang lebi baek dari goea minta pertoeloengannja si Djambroet, biar dia jang atoerin bagimana baeknja."
Kamoedian djedjaka itoe laloe tarik napas pandjang.
„Kaloe lagi saboelan misti begini, betoel-betoel kliwat tjilaka!" kata ia poelah kamoedian, seraja bertindik madjoe dalem gelap-goelita.