Pembalesan Kedji/Bab 21
XXI.
10 DJIGWEE.
„Ko Hoei-djin engga taktje ini hari, tji Bong-loan."
„Apa ini hari soeda tjapgoh? Kapan rasanja belon lama tjee-it."
„Boekannja tjapgoh."
„Habis kanapa dia engga taktjee?"
„Nanti Nioe bilangin." Kamoedian anak prampoean itoe berbisik, katanja: „Ini hari dia poenja hari seedjit; baba engga kasi dia pergi taktje."
Sasoeda berdiam sabentaran, Bong-loan laloe berkata:
„Kaloe loe engga biangin, goewa engga taoe; habis loe toh misti semba sama dia; oeda?"
Orang Nioe maloe si," kata Sioe-kioe sembari tertawa. „Dari tadi djoega oeda disoeroein sadja, tapi Nioe engga bisa, tji Bong-loan; rasanja engga enak sadja; lagi taon baroe djoega Nioe engga semba sama dia."
„Pekara begitoe si maloein apa!. . . . . . . ."
Belon sampe Bong-loan bitjara lebi djaoe, Hoei-djin soeda kalitan dateng mengamperi. Sioe-kioe lantas berkata dengen bisik-bisik:
„Toepa dia. Kaloe entji Bong-loan maoe, Nioe djoega nanti semba sama dia. Kaloe engga, Nioe djoega maloe ah! Tapinja di sini enak engga ada orang liatin sama kita."
„Ada sadja; njemba la koedoe ada orang temanin," kata Bong-loan dengen bersenjoem.
„Kaloe tji engga maoe, Nioe engga maoe ah; biarin diomelin la omelin; orang Nioe rasanja engga enak si habis maoe diapain."
„Nah ja da, hajo sama-sama goea."
Samantara itoe Hoei-djin soeda dateng dekat sekali pada doewa anak prampoean itoe, dan laloe ia berkata:
„Apa?"
Bong-loan dan Sioe-kioe tida menjaoet, tapi lantas djongkok menjemba. Hoei-djin, jang tida imendoega orang nanti samboet tjara begitoe padanja, merasa amat tida laloewasa, tapi sigra ia saroeken itoe dengen berkata:
„Eh-eh, ada apa ni?"
Sioe-kioe lantas berlari pergi lantaran kamaloean. Bong-loan djoega ada djadi sedikit djengah, tapi sigra ia ini berkata:
„Katanja ko Hoei-djin poenja seedjit ini hari; si Sioe-kioe engga maoe njemba kaloe engga ditemanin."
Hoei-djin kaloearken tertawa tengal, dan boeat lindoengken soepaja djangan terlaloe njata jang ia ada merasa kikoek, laloe ia berkata dengen memaen:
„Kaloe loe soeda taoe goea poenja seedjit ini hari, goea engga maoe la tjoema disemba dowang. Sedikitnja loe misti kasi goea apa keh, namanja orang kasi selamat. Kaloe engga ia soeda, djangan tjoema djongkong sadja keh kilap."
Bong-loan berdiam sabentaran, kamoedian dia djoega lantas berlari-lari poelang ka roemahnja, hingga tinggal Hoei-djin sendirian di bawah poehoen mangga.
Djedjaka itoe sepak berapa batoe jang ada di hadepannja, kamoedian berkata pada disir sendiri:
„Dia semba lagi sama goea. . . . . ."
Satelah itoe laloe ia bersenjoem, dan bertindak plahan-plahan maoe balik ka roemahnja, tapi sabelon ia melangkah pintoe, dengen koenjoeng-koenjoeng ia denger orang berseroe:
„Ko Hoei-djin!"
Tatkalah ia berpaling, sigra ia dapet liat Bong-loan jang sedeng dateng mengamperi. Anak pram-poean itoe berlari-lari, kamoedian trimaken padanja satoe angkin dari benang sishoa, seraja berkata:
„Ni, ko Hoei-djin."
„Apa ini?"
„Saia kasi ko Hoei-djin."
Djedjaka itoe berdiam bebrapa saat, kamoedian laloe berkata dengen mesem:
„Goea tadi tjoema memaen sadja, Bong-loan, boekan betoel-betoel goea minta loe kasi apa-apa sama goea. Oedalah loe bawa poelang sadja ini angkin, sebab kaloe sampe loe poenja entjim dapet taoe, tentoe loe nanti dipoekoel lagi."
„Engga, ko Hoei-djin, ini angkin saia jang poenja."
„Betoel, tapi dia belihin boeat loe pakeh, boekan boeat kasi goea."
„Boekan dia jang belihin, ko Hoei-djin, saia sendiri jang bikin."
„Habis benangnja loe dapet dari mana kaloe boekan dari dia?"
„Engga, benangnja si Sioe-kioe jang kasi."
Tadinja Hoei-djin tjoema bitjara memaen, minta Bong-loan kasiken apa-apa boeat tanda selamat, tapi sasoeda itoe perkara djadi soenggoe-soenggoe, memang djoega djedjaka itoe nanti merasa girang sekali, kaloe ia boleh trima sadja itoe barang pembrian. Lantaran itoe, tatkalah mendenger si nona bitjara demikian, sigra ia masoekin angkin itoe dalem sakoe, dan berkata:
„Baeklah kaloe begitoe. Hajo sekarang pergi ka roemah goea, loe boleh memaen sama si Sioe-kioe, di sekarang lagi mengoempat di mana taoeh."
„Saia maoe poelang doeloe, ko Hoei-djin," kata Bong-loan, kamoedian lantas ia berlari-lari balik ka roemahnja.
Djedjaka kita poen sigra berdjalan masoek, teroes pergi ka kamar tidoernja, dan simpan angkin itoe di antara ia poenja pakean, seraja berkata de-ngen menggrendeng pada diri sendiri:
„Ini angkin ada seperti satoe tanda mata boeat goea dari si. . . . .Bong-loan. Habis apa ha jang paling baek goea kasi sama dia?"
Hoei-djin doedoek di pembaringan, dan toendjang, ia poenja djanggoet dengen kadoewa tangan, matanja kalitan seperti orang lagi mengimpi.
Bebrapa saat kamoedian dengen koenjoeng-koenjoeng ia berbangkit, ambil soeatoe apa dari latji, masoekin itoe dalem kantongnja, kamoedian sigra ia pergi lagi ka blakang roemah.
Sasampenja di kebon ia tida dapet liat ada satoe orang. Ia pergi ka bawah poehoen mangga, dan bersender di sitoe sembari koerak-koerak tanah dengen ia poenja djempol kaki. Matanja mengintjer ka roemahnja Bong-loan, samantara dalem hati ia berkata:
Kaloe sampe sabentar ada si Sioe-kioe, engga enak betoel, djoega ada koerang baek boeat goea. . . . . .}"
Ia berdjalan moendar-mandir dengen koerang sabar,
„Dia kerdja apa djoega si dari satadian! Kaloe goea samperin sadja ada lebi baek, tapi engga enak sama entjimnja kaloe masi ada di roema. . . ."
Hoei-djin djongkong sembari geret-geret tanah, tapi matanja tinggal mengintjer teroes ka roemah-nja Bong-loan.
Tida berselang sabrapa lama kaliatan anak prampoean itoe kaloear, tapi ia ini roepanja tida dapet liat pada Hoei-djin, kerna teroes sadja ia djalan menoedjoe ka roema besar.
Djedjaka kita sigra berbangkit, dan berseroe:
„Bong-loan!"
Nona ketjil itoe menengok, kamoedian dateng mengamperi.
Hoei-djin djoega djalan mendekatin. Satelah soeda ada berhadepan, laloe ia salesapken soeatoe apa dalem tangannja itoe anak prampoean, kamoedian lantas maoe berlaloe.
„Ko Hoei-djin!"
Djedjaka itoe balik kombali, an menanja:
„Kanapa ?"
Bong-loan tida berkata soeatoe apa, tapi matanja mengawasken pada djedjaka itoe seperti orang menanja banjak sekali.
„Itoe boeat loe," kata Hoei-djin dengen soeara tida lampias kaloearnja.
„Ini tjintjin?"
„Ja, loe simpan baek-baek djangan sampe ilang, jangan kasi satoe orang dapet taoe, djoega sama si Sioe-kioe loe djangan bilang apa-apa.“
„Ini tjintjin saia liat ko Hoei-djin pakeh lagi tahon baroe, saia kenalin betoel."
„Sekarang goea kasi loe, simpan djangan kasi orang taoe."
„Habis kaloe ko Hoei-djin poenja mboe tanja?"
„Goea nanti kata soeda ilang. „Abis kaloe kadapetan ada sama saia, orang nati kata. . . . ."
„Oeda, Bong-loan, pendeknja loe simpan baek-baek. Kaloe loe enga maoe la oeda, mari!-goea mara sama loe."
Ana prampoean itoe awasken pada Hoei-djin, kamoedian ia mengamat-ngamati tjintjin itoe sampe sakean lama.
Djedjak itoe lantas berlaloe, tampi ampir di itoe waktoe djoega Sioe-kioe dateng di kebon. Ia ber-laga tida liat pada ekonja, dan dari djaoe-djaoe soeda berseroe:
„Bioe maoe maen masak-masakan!Tadi Nioe soeda soereo si Mili beli apa-apanja! Samentaran lagi dia dateng!"
„Tadi loe ka mana?" tanja Bong-loan, dan sigra ia boental-boental di pinggangnja itoe tjintjin dari Hoei-djin.
Sioe-kioe tjoebit tangannja ia poenja teman, seraja gigit bibirnja.
Bong-loan lantas mengarti, jang orang tida maoe itoe perkara dioelangin lagi. Laloe ia berkata:
„Gi da loe pergi ambil barang-barangnja, enakan kita maen masak-masakan di sini. Kaloe di roemah loe si Mili nanti ngomel lagi kaloe djadi betjek atawa apa, mana boleh enak!"
Sioe-kioe lantas poelang dengen berlari-lari. Di itoe samantara waktoe Bong-loan poen pergi balik ka roemahnja, dan sasoeda simpan itoe tjintjin di dalem latji, laloe ia dateng lagi ka dalem kebon, menoenggoeken datengnja Sioe-kioe.
Tida berselang lama lagi samoea perabot memaen soeda diangkoet ka bawah poehoen mangga, dan salagi doewa anak prampoean itoe sedeng asik berladjar mendjadi kokki, Hoei-djin laloe berpakeh pakehan, kamoedian lantas pergi kaloear, djalan-djalan di panas meletak, kerna itoe waktoe adalah kira-kira poekoel sabelas tengahari.
Djedjaka itoe merasa tida enak tinggal diam di roemah, kerna hatinja di itoe waktoe adalah dikoendjoengin oleh soeatoe pengrasahan, jang saban-saban ada bikin orang merasa perloe boeat tetapken samangetnja dengen berdjalan-djalan di loear roemah aken bingoengken sang mata dengen laen-laen pemandangan.