Tao Teh King/Artiannja Tao Teh King

ARTIANNJA „TAO TEH KING.”

Itoe kitab jang terkenal sabagi „Tao Teh King” brangkalih doeloenja ada berbeda dari sekarang. Menoeroet achli-hikajat Ssu-ma Chien, itoe kitab tjoemah dipetjah mendjadi doea bagian; jang pertama membitjaraken Tao dan jang kadoea Teh. Ini doea peladjaran, begitoe poen isi dari itoe boekoe dan orang jang dianggep sabagi pengarangnja, ada djadi bahan dari pertentangan pikiran jang tida bisa abis antara orang-orang asing jang djadi penjalin dan jang toekang bikin kritiek.

Itoe kitab pertama kalih terkenal dengen nama „Kitab dari Lao Tze” dan blakangan dinamaken „Kitab Bagian Tao Teh”, hal mana menoendjoekken ia tjoemah ada satoe atawa doea bagian dari sakoempoelan kitab-kitab kabatinan koeno, jang membri katerangan tentang Taoisme, jaitoe satoe peladjaran jang soedah tersiar di Tiongkok sadari djeman doeloe sekalih, dan biasa dinamaken sabagi „Ilmoenja Keizer Oeij Tee dan Loo Tjoe (Lao Tze)”. Itoe panggilan „Too Kauw” atawa „Taoisme” baroe moelai dipake pada djemannja Huai Nan Tze jang meninggal di taon 122 sablonnja Kristus. Djadinja sampe sedikitnja tiga satengah abad sasoedah Lao Tze brangkat dan teroes mengilang ka Barat, pendoedoek di Tiongkok pandang Taoisme sabagi peladjaran jang beratsal dari Keizer Oeij Tee jang komoedian ditoeroenken oleh Lao Tze sabagi rasoelnja Oeij Tee. Dalem kaädaän begitoe maka boekan tida boleh djadi kaloe di djemannja Lao Tze ada tersiar djoega laen-laen kitab peladjaran tentang Tao jang blakangan telah mendjadi linjap, sebab — seperti diterangken dalem boekoe Lao Tze dan Peladjarannja — lebih doeloe dari Lao Tze soedah ada bebrapa penoelis laen jang karang boekoe-boekoe tentang Taoisme. Maka dengen sapantesnja kaloe orang merasa sangsi apa betoel Lao Tze ada pengarang dari „Tao Teh King.”

Laen hal lagi jang menarik orang poenja perhatian adalah sifatnja itoe kitab, jang sekarang terbagi mendjadi 81 fatsal. Di dalemnja boekan sadja tida ada diseboet Lao Tze poenja nama, hanja sama sekalih tida terdapet nama orang atawa nama tempat, maski djoega banjak dibitjaraken tentang nabi-nabi atawa radja-radja boediman di djeman koeno jang memerentah doenia dengen tentrem dan slamet lantaran mendjalanken Tao. Maka boleh dipastiken apa jang dimoeat dalem „Tao Teh King” boekan ada boeah pikiran dari satoe orang, hanja sakoempoelan oedjar-oedjar dari itoe nabi-nabi dan radja-radja boediman pada djeman koeno sekalih, riboean taon di moeka Lao Tze, jang diwarisken toeroen-menoeroen. Itoelah sebabnja maka sabagian dari itoe oedjar-oedjar ada bersifat amat samar dan tida bisa dimengarti terang maksoednja dan lebih soeker lagi kapan moesti disalin ka dalem laen bahasa.

Jang pada koetika djemannja Khong Tjoe di Tiongkok ada hidoep djoega satoe philosoof atawa Goeroe Toea jang digelar Loo Tjoe atawa Lao Tze, ito lah tida bisa disangkal kerna ada bebrapa kitab koeno jang menetepken. Tetapi itoe katerangan dari Ssu-ma Chien bahoea Lao Tze telah mengarang satoe kitab jang berisi 5000 hoeroef lebih masih haroes disangsiken, kerna Ssu-ma Chien soedah hidoep lima abad di blakang dari Lao Tze, dan kaloe itoe kitab jang Lao Tze karang ada tjotjok dengen „Tao Teh King” jang berisi lima riboe hoeroef lebih, boleh djadi lantaran Ssu-ma Chien soedah dapet liat itoe kitab dalem ka'ada'an seperti sekarang ini. Lebih doeloe dari Ssu-ma Chien tida ada ka­terangan bahoea Lao Tze telah karang itoe kitab „Tao Teh King”.

Meliat isinja „Tao Teh King” jang tida teratoer hanja lompat kalang-kaboet dan berbagi-bagi soeal jang berbeda'an teradoek mendjadi satoe, banjak orang sangka itoe kitab, maskipoen betoel berisi peladjaran jang ditoeroenken oleh Lao Tze, boekan ditoelis oleh itoe goeroe sendiri, hanja dikoempoel oleh moerid-moeridnja dari apa jang itoe goeroe oetjapken atawa toelis, seperti telah terdjadi dengen „Loen Gie” dan laen-laen kitab dari Khong Tjoe. Tapi kaloe betoel itoe kitab ada ditoelis atawa isinja dikoempoel oleh orang-orang blakangan, ada amat aneh si penerbit tida membri katerangan apa-apa dan malah tida seboet goeroenja poenja nama atawa nama laen orang dan tempat-tempat, satoe kagandjilan jang blon perna tertampak dalem laen-laen kitab peladjaran di Tiongkok jang terpandang penting. Maka itoe ada banjak achli-achli asing dan sastrawan-sastrawan Tionghoa jang pertjaja bahoea apa jang terdapet da­lem „Tao Teh King” betoel ada boeah kalamnja Lao Tze dan tida katjampoeran boeah pikiran orang-orang blakangan, maski djoega amat boleh djadi sabagian dari itoe oedjar-oedjar Lao Tze te­lah toeroenken saingetnja sendiri dari peladjaran nabi-nabi dan radja-radja boediman di djeman koeno.

Soeal kenapa isinja „Tao Teh King” ada begitoe banjak jang gelap dan samar, serta hal-hal jang dibitjaraken tida teratoer beres, menoeroet katanja Njonja Blavatsky (batja Lao Tze dan Peladjarannja pagina 66) ada dari lantaran sengadja digelapin soepaja itoe peladjaran occult dari Lao Tze tida diketaoei oleh sembarang orang katjoeali pendita-pendita jang soedah tinggi betoel peladjarannja. Tetapi kita masih sangsiken atas kabenerannja ini katerangan, sebab pe­ladjaran dari Lao Tze, seperti djoega Bhagawad Gita dan laen-laen kitab philosofie jang tinggi, tida berisi apa-apa jang membahajaken kapan orang bisa mengarti betoel maksoednja. Tjoemah kitab-kitab jang menggenggem resia boeat bikin orang berkwasa atas wet natuur atawa bisa berhoeboeng dengen lelemboet dan setan-setan, biasa dioempetken soepaja tida terdjato di tangannja sembarang orang jang goenaken itoe pengartian dengen tjara kliroe.

Tentang „Tao Teh King”, Professor Lionel Giles ada bilang begini :

Maskipoen isinja „Tao Teh King” ada kaloet dan tertjampoer adoek, tapi kapan difahamken sa'anteronja bisa kaliatan djoega samatjem pikiran jang menoedjoe dengen tetep ka satoe djoeroesan. Sabenernja „Tao Teh King” boekan tjoemah berisi sakoempoelan oetjapan seperti bade-badean jang mengandoeng artian loeas, hanja ada satoe peta'an, maskipoen sifatnja serba kasar, jang teratoer rapih dari satoe philosofie agoeng jang bisa dirasain tapi soeker diloekisken, serta berisi djoega peladjaran moraal jang amat moelja. Kaloe itoe peta'an pikiran jang begitoe indah tida bisa dibeber sapenoeh-penoehnja oleh Lao Tze poenja tjara menoelis, inilah lantaran teroetama ia moesti bergoelet dengan amat soesah aken lahirken pikirannja dengen perantara'an dari satoe bahasa jang masih blon sampoerna betoel hingga djadi satoe alat jang tida menjoekoepi aken petaken dengen djelas samatjem philosofie jang roewet dan soeker dimengarti. Ini ka'ada'an, bersama lagi tjaranja itoe pikiran ditoelis dengen begitoe loear biasa ringkes dan pendek, ada mendjadi sebab dari moentjoelnja itoe kasamaran jang melipoeti pada sabagian besar dari itoe oedjar-oedjar, hingga maskipoen banjak achli-achli Tionghoa dari djeman koeno dan achli-achli asing di djeman sekarang telah bekerdja keras boeat tjoba terangken, tapi sabagitoe djaoe tjoemah sedikit sekalih hatsilnja.

Harganja „Tao Teh King” boekan dari lantaran iapoenja oedjar-oedjar jang samar dan soaker dimengarti, hanja dari itoe peladjaran poenja maksoed jang loeas dan dalem, jang penoeh mengandoeng boeah-boeah pikiran jang begitoe agoeng hingga dari sedikit perkata'an bisa dibèbèr mendjadi bebrapa boekoe. Apa itoe bibit-bibit-pikiran jang Lao Tze lempar satjara begitoe lojar dalem „Tao Teh King” ada beratsal dari oesahanja sendiri, kita tida bisa dapet taoe, kerna tida ada kadapetan tjatetan jang membitjaraken ini hal. Dan djikaloe Lao Tze telah gagal boeat djalanken itoe pikiran sampe berwoedjoet atawa terangken sampe bisa dimengarti betoel oleh orang banjak, itoe pakerdja'an poen blon perna dilakoeken dengen satjara jang memoeasken oleh orang-orang jang dateng blakangan. Memang betoel satoe pendirian besar dari kitab-kitab peladjaran tentang Taoisme soedah bisa dibangoenken di atas dasar jang begitoe ketjil dari kitab „Tao Teh King”, tetapi itoe pamoeka-pamoeka Taoist jang menoelis itoe kitab-kitab, dengen lekas telah menjimpang dari Lao Tze poenja peladjaran jang keras dan bersih, hanja lebih soeka taro perhatiannja pada oepatjara-oepatjara jang berhoeboeng dengen segala pri moedjidjat. Maka Lao Tze ada satoe Socrates jang tida bisa dapetken satoe Plato atawa satoe Aristotle, jang poengoetin itoe panen bagoes dari bibit jang ia soedah sebar; sekalih poen Chwang Tze, penganoetnja jang terbesar sendiri, jang kapandeannja menoelis ada berbeda djaoe dengen oedjar-oedjar pendek dan kakoe dari „Tao Teh King”, masih blon bisa tangkep dengen sapenoehnja itoe soemanget dari sang Goeroe poenja peladjaran, hanja kasih dirinja terbawa anjoet ka dalem kalangan doega-doega'an jang samar dari impian dalem daerah gaib atawa mystiek.

Maski begitoe kitabnja Lao Tze, dengen berdasar meloeloe atas apa jang ada tertampak di dalemnja, soedah bisa memaksa aken orang taro perhatian. Pertama kalih ia soedah diakoe dengen officieel sabagi Kitab Soetji atawa King di djeman pamerentahannja Keizer Ching Ti (156-140 sablonnja Kristus) dari dijnastie Han. Komoedian „Tao Teh King” telah dapetken roepa-roepa matjem perlakoean: satoe waktoe tida diperdoeliken, laen waktoe dihargaken tinggi oleh keizer-keizer. Salah-satoe keizer, jang sanget djoengdjoeng tinggi „Tao Teh King”, biasa berchotbah tentang peladjarannja Lao Tze di hadepan mantri-mantrinja, dan kapan di antara itoe pembesar-pembesar ada jang brani mengoeap atawa boeang loedah salagi itoe keizer bikin yan-swat, dengen lantes ia dipetjat dari djabatannja.

Laen keizer lagi telah soeroe tjitak „Tao Teh King” jang ia loekisken, dalem „Pendoeloean” jang ia toelis sendiri, sabagi „akar dari segala benda, djoeroe pengadjar dari radja-radja dan moestika jang paling berharga oentoek orang banjak.” Keizer pertama dari Dijnastie Tsin jang blakangan, soedah menanja apa Tao bisa digoenaken dalem pamerentahan negri. Chang Chien Ming lantes bilang padanja bahoea „dengen Tao maski satoe majit bisa memerentah atas satoe karadja'an besar.” Begitoeiah salandjoetnja, dengen firman-firman jang dikaloearken oleh berbagi-bagi keizer telah diwadjibken aken student-student jang hendak bikin examen Ki Djin moesti mengenal isinja „Tao Teh King,” dan sasoeatoe moerid sekola dan achli soerat diminta poenjaken satoe copie dari itoe kitab, jang oedjar-oedjarnja biasa dioekir di batoe dan dipernahken pada tempat jang rame dalem Tiongkok poenja doea iboekota. Blakangan, copie jang tertjitak telah dibagi-bagi pada semoea kepala pendidikan rahajat, dan djoega soedah disalin ka dalem bahasa dari kaoem Nu-chen Tartars.

Tentang artinja itoe titel „Tao Teh King” oleh Lionel Giles ada disalin ka dalem bahasa Inggris mendjadi „Treatise of the Way and of Virtue,” (Peroendingan tentang Djalanan dan tentang Kabedjikan) tapi ia hilang djoega, ini artian masih blon kena betoel pada maksoednja, kerna ia tida bisa dapet perkata'an dalem bahasa Inggris jang lebih tjotjok. Artian demikian poen ada digoenaken djoega oleh Stanislas Julien, samentara Gorn Old bilang, itoe „Tao Teh“ boleh djoega diartiken „Wet dari Kabedjikan“ „Djalanan dari Kabedjikan” atawa laen-laen oetjapan lagi jang meloekisken pikiran tentang Toehan dan Alam dan marika poenja pakerdjaan jang berhoeboeng dengen manoesia. Tetapi Gorn Old anggep kasampoerna'annja artian dari itoe titel tida sabrapa penting, dan kita-orang tida oesah terlaloe terliti pada nama seboetannja, djikaloe itoe barang sendiri kita masih blon bisa dapet poenjaken. Ia tida setoedjoe itoe Tao Teh orang artikan masingmasing dengen terpisah seperti djoega „Tao Teh King” ada mengandoeng doea matjem peladjaran, maka dalem iapoenja salinan dari itoe kitab Gorn Old briken artian „The Simple Way” atawa „Djalanan jang Saderhana”.

Ini artian dari Gorn Old, maskipoen bisa dipake, masih blon tjotjok betoel, kerna Tao jang direndengin dengen Teh memang ada mengandoeng djoega artian laen jang lebih loeas. Jang pertama (Tao) ada djadi Alam poenja tenaga menjipta, pada jang mana sifat manoesia haroes dibikin tjotjok, sedeng jang blakangan (Teh) ada tjara bekerdjanja itoe saroepa tenaga, pada jang mana manoesia poenja pergerakan haroes diakoerin. Djadi tegesnja Tao jang mengadaken, dan Teh jang menjampoernaken soepaja manoesia bisa balik kombali atawa bersatoe pada pokonja jang aseli. Zonder Teh (Kabedjikan, Dharma atawa Kabeneran) orang tida bisa sampe pada itoe Tao, jang dalem evolutie dari manoesia boleh djoega dinamaken „Kasampoerna'an,“ kerna siapa soedah bersatoe dengen Tao ia aken dapet katentreman sampoerna, jaitoe jang kaoem Buddhist bilang „Dapetken Nirwana“, atawa, satjara Kristen, „bersatoe dengen Roh Soetji“. Hal itoe kitab, koetika baroe terbit, ada terpetjah doea bagian, jang satoe membitjaraken Tao dan jang Iaen Teh, ada menoendjoekken Tao Teh tida bisa digaboeng mendjadi satoe roentoenan oedjar. Tetapi kita setoedjoe pada Gorn Old poenja perkata'an jang membilang, perhatian pada titel dari itoe boekoe tida terlaloe penting, maka kita tida maoe adaken salinan Melajoe dari itoe perkata'an „Tao Teh King“, hanja srahken sadja pada pembatja aken pilih sendiri jang mana di­rasa paling tjotjok antara itoe berbagi-bagi artian jang ditoetoerken di atas.

Tjitjoeroek, 5-5-'35.

K. T. H.