Tao Teh King/Bab 22

XXII.

MENAMBAHIN PADA JANG KETJIL.

1. Siapa pernahken diri di tempat jang bener aken terlindoeng sampe di achir kahidoepannja.
2. Siapa membongkokin badannja aken di bikin lêmpêng.
3. Siapa mengosongin dirinja aken dibikin penoeh.
4. Siapa lelah aken dikasih tenaga baroe,
5. Siapa jang merendahken diri aken diagoengken.
6. Siapa mengägoengken diri aken direndahken.
7. Maka orang boediman memelok keras pada kasaderhanaän dan mendjadi toeladan bagi semoea manoesia.
8. Ia terbebas dari kabiasaän aken tondjolin diri ka depan, lantaran mana ia bisa djadi bertjaja.
9. la tida soeka banggain atawa oendjoek kapandean sendiri, lantaran mana ia dapet poedjian.
10. la tida soeka memoeljaken diri, lantaran mana ia dapet perèndahan.
11. Ia tida soeka berlakoe sombong dan angkoe, maka ia dapet kahormatan.
12. Dan sebab ia tida soeka bersaingan dengen laen-laen orang, maka tida satoe manoesia dalem doenia jang moesoehin padanja.
13. Itoe pepatah koeno, „Siapa bisa pernaken diri di tempat jang benar aken terlindoeng sampe di achir kahidoepannja," sasoenggoehnja boekan oetjapan kosong.
14. Tida oesah disangsiken lagi jang ia aken balik ka iapoenja roemah di dalem katentreman

⁂

Apa jang Lao Tze roendingken dalem ini fatsal ada satoe peladjaran dari kabeneran jang soedah disiarken djoega oleh Buddha dan Jesus. Dalem peladjaran tentang merendahkan diri, Jesus ada bilang : „Sasoeatoe orang jang agoengken dirinja aken dibikin rendah, dan siapa rendahin dirinja aken diagoengken." (Luk. 14 : 11). Djadinja, limaratoes taon di moeka Jesus ter­lahir, itoe Goeroe Toea Tionghoa soedah siarken itoe saroepa peladjaran jang bersamaän. Poko dasar dari ini matjem peladjaran ada dari Wet Alam (Natuurwet) dan Wet dari Karma. Menoeroet peladjaran tentang Karma, sasoea­toe perboeatan jang orang lakoeken aken membri boeah jang tjotjok atawa satimpal dengen maksoed atawa toedjoeannja itoe perboeatan, boekan dari apa jang kaliatan di loear. Siapa lakoeken saroepa perboeatan dengen maksoed baek, biarpoen tida berhatsil dan orang pandang djahat, kasoedahannja aken membri boeah jang baek; sabaliknja perboeatan jang mengandoeng maksoed djahat, kouwkati, ingin dapet poedjian atawa agoengken diri sendiri, maski bermoelah dipoedji tinggi oleh orang sadoenia, nistjaja aken berachir djelek, kerna sasoeatoe per­boeatan jang orang lakoeken lantes mengasih kerdja satoe tenaga jang membri imbangan satimpal. Inilah ada wet jang tida bisa dirobah lagi.