Tao Teh King/Bab 23

XXIII.

TIDA KAKENALAN.

1. Berlakoelah biar saderhana dalem omongan, dan segala apa nanti djadi betoel dengen sendirinja.
2. Satoe angin riboet tida bisa lebih lama dari sapagian, dan oedjan lebet tida bisa lebih lama dari saharian.
3. Siapatah mempoenjai kakwasaän aken tjiptaken ini semoea, katjoeali Langit dan Boemi?
4. Dan djikaloe Langit dan Boemi tida bisa teroesken itoe angin riboet dan oedjan dalem jang tempo lama, bagimanatah manoesia bisa berboeat begitoe?
5. Djikaloe satoe orang bisa tjotjok sama Tao dalem segala hal, ia aken bersatoe dengen Tao atas dasar dari itoe katjotjokan.
6. Saorang jang indjek djalanan dari Kabedjikan ia aken mendjadi satoe dengen itoe Kabedjikan.
7. Siapa mengikoetin djalanan dari Kaboesoekan ia aken bersatoe dengen itoe Kaboesoekan.
8. Orang jang bisa bersatoe dengen Tao, oleh Tao ia nanti ditrima dengen kagirangan.
9. Orang jang bisa bersatoe dengen Kabedjikan oleh orang-orang boediman ia aken ditrima dengen girang.
10. Orang jang bersatoe dengen Kaboesoekan, oleh golongan orang boesoek poen ia aken ditrima dengen girang boeat disoegoehin apa-apa jang bersifat boesoek.
11. Dimana sadja kapertjaja'an ada koerang, orang tida bisa disamboet dengen pengandelan jang sapenoeh-penoehnja.

⁂

Ada banjak orang-orang pande jang kapan dapetken ka'ada'an tida memoeasken, oepama negri sedeng kaloet, kabangsa'an moendoer dan koerang rempoek, pergerakan jang berfaedah gagal, economie djelek, dan laen-laen tjatjat lagi, lantes sadja lahirken roepa-roepa pikiran boeat mengadjar dan membri nasehat soepaja masing-masing orang mengenal kawadjibannja dan soeka bekerdja boeat adaken pembèrèsan. Lao Tze mengadjar soepaja orang berlakoe saderhana dalem omongan jang berisi nasehat dan pengadjaran pada manoesia, sebab segala, apa moesti toenggoe temponja jang betoel, dan itoe kakaloetan jang diterbitken oleh kabodoan atawa kaserakahan manoesia, tida aken berdjalan selamanja, kerna seperti djoega angin riboet kabanjakan tida menioep sampe sapagian teroes meneroes, dan itoe oedjan tida toeroen dengen lebet sa'antero hari, begitoe poen pakerdja'an manoesia tida nanti bisa timboelken kakaloetan jang berdjalan boeat selamanja. Djikaloe pakerdja'an jang tertjipta oleh Langit dan Boemi (Natuur) seperti itoe angin riboet dan oedjan lebet, tjoemah oendjoek kaheibatannja boeat saliwatan, orang poen haroes pertjaja jang kakaloetan doenia, baek dalem hal apa sadja, tida nanti bardjalati teroes selamanja. (Ajat I-4). Boeat terbebas dari gontjangannja kakaloetan doenia orang moesti tjotjokin diri dengen Tao, seopaja bisa dapet persatoean dengen itoe kakwasa'an jang paling tinggi. Sabagi djoega saorang jang menoentoet Kabedjikan atawapoen Kaboesoekan masing-masing nanti bersatoe dengen itoe sifat jang ia oetamaken, begitoe poen siapa jang rapet hati dengen Tao aken ditrima oleh kaoem jang memoedja kabesarannja Tao (Taoist), sedeng jang mentjari Kabedjikan aken disamboet dengen girang oleh golongan Bedjik, dan jang bersatoe dengen Kaboesoekan aken disamboet dengen kagirangan oleh golongan orang boesoek jang bersedia aken kasih apa-apa padanja jang bersifat boesoek djoega.

Dengen ini katerangan Lao Tze maoe bilang, manoesia poenja sifat diri ada bergantoeng pada apa jang ia paling oetamaken, jang nanti timboelken kakoeatan saling menarik antara sifat-sifat jang sama, atas dasar „bangsa mentjari bangsa". Apa ia aken naek ka poentjak kasoetjian paling tinggi atawa terdjeroemoes ka dalem loempoer patjombèran paling mesoem, itoe ada bergantoeng pada iapoenja toedjoean sendiri. Kapan ada orang jang ingin bersatoe pada Tao tapi selaloe gagal, itoelah boekan Tao jang djaoeken diri, hanja kerna kapertjaja'annja masih koerang tegoeh, atawa djalannja masih koerang tetep dan banjak menjimpang, hingga tida bisa dapetken penjamboetan jang sapenoeh-penoehnja. (Ajat 5-11).