Tao Teh King/Bab 24
KAHORMATAN JANG TIDA DI-INGIN.
- Saorang jang berdjingke tida bisa berdiri tetep.
- Siapa pentang lebar atawa djègangin kadoea kakinja tida bisa berdjalan.
- Dengen tondjolin ka moeka iapoenja diri orang tida bisa djadi mentèrèng.
- Dengen membenerken perbotatan sendiri orang, tida bisa dihargain.
- Dengen memoedji diri sendiri orang tida bisa dapet pahala.
- Siapa agoengin dirinja tida bisa naek tinggi.
- Sikep begitoe terhadep pada Tao ada seperti nadjis dan sabaginja pada toeboeh manoesia.
- Di mana-mana orang merasa djidji pada marika.
- Dari sebab itoe saorang jang telah bersatoe pada Tao tida maoe deket dengen iaorang.
⁂
Ini fatsal ampir sama boenjinja dengen fatsal XXII, dan toedjoeannja ada boeat peringetken, siapa oendjoek sikep dan kalakoean jang berbeda dari Tao poenja watek saderhana, ia pasti aken alamken kasoesahan.
Orang jang berdjingkè, aken bikin dirinja djadi lebih tinggi dari jang sabenernja, pastilah tida bisa berdiri tetep. Begitoe poen orang jang mendjègangin kadoea kakinja soepaja bisa mengindjek lebih djaoe dari tempat dimana ia berdiri — symbool dari kaserakahan atawa tjoba lakoeken perboeatan jang melebihi dari kamanpoeannja — pasti ia tida bisa bertindak. Inilah ada Lao Tze poen ja loekisan satjara saderhana tentang perboeatan jang berlawanan dengen sifat jang sawadjarnja menoeroet natuur. (Ajat 1-2).
Salandjoetnja ada dioendjoek bagimana dengen tóndjolin diri ka moeka, memoedji dan mengägoengken diri sendiri, orang aken dapet perlakoean jang sabaliknja, kerna sikep begitoeada bertentangan dengen Tao, hingga dibentji dan didjaoein seperti manoesia merasa djidji dengen nadjis, lantaran mana orang jang soedah bersatoe dengen Tao tida soeka berdeketan pada marika. (Ajat 3-9).
Dari sebab Tao atawa poen Natuur sifatnja saderhana dan tida soeka berlakoe bangga, agoengin dari atawa oendjoek kasombongan, maka barang siapa bersikep begitoe pastilah achirnja aken datengken kasoedahan jang tida enak dan tida aken alamken katentreman, kerna apa jang bertentangan dengen sifatnja Tao moesti timboelken katjilaka'an.
Brangkalih ada orang nanti bilang, di doenia ada banjak orang jang bertabeat sombong, bangga, angkoeh dan soeka agoelin diri enz. enz. jang toch bisa hidoep beroentoeng dan slamet. Tapi ini anggepan tjoemah berdasar atas pemandangan dari sabelah loear, sedeng kapan dipreksa itoe orang poenja penghidoepan dari sabelah dalem — iapoenja kadjengkelan, kakoeatiran, kagoesaran dan kaiboekan jang tida abisnja — orang poen nanti moesti akoe jang Lao Tze poenja peladjaran ada berdasar atas kabeneran sedjati.