Tao Teh King/Bab 25

XXV.

MENGARTIKEN ITOE KAKOSONGAN.

1. Sabelonnja moentjoel Langit dan Boemi soedah ada di dalem Natuur satoe sari dari poko pertama jang paling koeno sendiri.
2. Ia ada amat tentrem dan tida bisa didjadjakin.
3. Ia berdiri sendiri, kekel dan tida bisa berobah.
4. Ia berada di mana-mana, tida bisa terganggoe dan kena diwatesin.
5. la moesti dipandang sabagi Iboe dari ini Alam.
6. Akoe tida taoe iapoenja nama, boeat bisa dikenalin akoe panggil padanja Tao.
7. Djikaloe terpaksa moesti loekisken sifatnja, akoe namaken ia si Maha Besar jang tida berwates.
8. Lantaran besarnja tida berwates, ia tida bisa dipikirken.
9. Lantaran tida bisa dipikirken, ia tida dapet dideketin atawa dipoenjain.
10. Lantaran tida dapet dipoenjain, ia berada dimana-mana.
11. Itoe Tao ada jang maha besar; langit ada maha besar ; boemi ada maha besar ; dan Radja djoega maha besar.
12. Dalem ini Alam ada ampat matjem kabesaran, jang kakwasaännja tjoemah satoe.
13. Manoesia diprentah menoeroet wet dari Boemi; itoe Boemi diprentah oleh wet dari Langit; Langit diprentah oleh Tao. dan Tao poenja atoeran moentjoel dari dirinja sendiri-

⁂

Dalem ini fatsal Lao Tze ada beber satoe dari iapoenja peladjaran-peladjaran paling besar dan loeas, jang kapan hendak dipetjahken sadjelas-djelasnja, moesti goenaken toelisan jang tjoekoep boeat didjadiken seboeah djilid tebel.

Maski apa jang dibitjaraken kaliatan begitoe gaib dan samar, tapi dalem agama-agama jang besar dari djeman koeno sekalih ada diseboet tentang saroepa kakwasa'an dalem ini alam jang lebih atas dari segala apa jang ada, jang dalem agama Egypte koeno dinamain/sis dalem agama Hindoe diseboet Muluprakriti jang berarti „Akar dari Natuur," dan brangkalih ada sama dengen apa jang orang Tionghoa poedja sabagi Thian Sian Seng Bo atawa Matjopo, dan oleh bangsa Jahoedi dinamaken Ath-Ain-Suph.

Dan ini anggepan boekan omong kosong jang terlahir dari kabodoan manoesia, kerna achli-achli ilmoe bintang di djeman sekarang soedah moelai insjaf, bahoea itoe tjakrawala atawa zonnestelsel, dalem mana kita poenja boemi ada termasoek, dan tjoemah teritoeng satoe dari bebrapa millioen zonnestelsels jang ter­tampak di seloeroeh djagad, di satoe tempo bakal antjoer dan moesna, aken terganti poelah oleh tjakrawala baroe. Dalem kaloeasan dari ini Djagad jang tida berwates dan tida bisa didjadjakin, ada terdapet itoe kakosongan jang toch berisi penoeh dengen bibit atawa sari kahidoepan. Djoestroe antara achli-achli pemikir di Barat poen, dari djeman doeloe sampe sekarang, ini soeal, tentang adanja satoe benda jang djadi poko-permoelahan, soedah banjak dipikirin moelai dari Plato dan Ptolemy, sampe pada Bruno, Kepler dan Newton. Malah kapan orang soedah mengarti maksoed jang bener dari fatsal I ajat 1 dan 2 dari Bybel Genesis, nistjaja ia akan insjaf atas adanja saroepa katjotjokan dengen apa jang diloekisken oleh Lao Tze. Dengen begitoe orang bisa liat bagimana ini soeal, jang diperhatiken oleh achli-achli pemikir dari djeman koeno sekalih, sabenernja soedah dipetjahken oleh Lao Tze dengen satjara jang membikin philosoofie-philosoof Barat di djeman sekarang me­rasa kaget dan kagoem dan, jang paling menarik, katerangannja Lao Tze dalem ini soeal tida bertentangan boekan sadja sama anggepan jang terdapet dalem bebrapa agama laen, tapi djoega sama pendapetan wetenschap modern (Ajat 1-10),

Lao Tze malah madjoe lebih djaoe dengen oendjoek, bahoea itoe ampat matjem kabesaran Tao, Langit, Boemi dan Radja di doenia—kakwasaännja tjoemah satoe, kerna boeat pe­gang prentah dengen beres pada manoesia, satoe Radja moesti bertaloek pada wet natuur jang tertampak di moeka boemi, jang dateng gilirannja bertaloek pada wet dari Langit, dan itoe Langit bertaloek pada Tao, jang segala atoerannja telah moentjoel dari sifatnja sendiri.

Hal boemi moesti bertaloek pada Langit, itoelah orang bisa mengarti kapan menginget, zon­der Matahari — itoe benda jang ada di Langit— ini boemi tida bisa ditempatin oleh manoe­sia dan laen-laen machloek jang hidoep. Sabaliknja, itoe Matahari poen ada di pengaroehin djoega oleh laen-laen binatang jang djaoe dan deket, seperti djoega itoe berbagi-bagi planeet Sda pengaroehken pada boemi. Bagi siapa jang soedah mengenal dan bisa mengikoeti pada ini berbagi-bagi wet jang pokonja satoe, ia bisa atoer penghidoepan atawa pakerdjaännja dengen beres hingga tida oesah alamken pertentangan dan kakaloetan jang menimboelken kasoekeran, jang tjoemah moentjoel kapan orang tida perdoeliken atawa berlakoe tida menoeroet Tao. (Ajat 11 — 13).

Tao Teh King (page 124 crop)