Tao Teh King/Bab 5

1. Baek Langit maoe poen Boemi tida perna mengelonin atawa menaro kasihan, hanja pandang semoea manoesia dan segala benda sabagi djoega petaän binatang jang biasa digoenaken dalem sembahjangan.
2. Orang boediman tida soeka mengèlonin atawa membèda-bèdaken, hanja pandang semoea manoesia sabagi prabotan jang dibikin boeat disadjiken di atas medja sembahjang jang soetji.
3. Itoe kakosongan antara Langit dan Boemi ada seperti oeboeban atawa kantong angin jang digoenaken oleh toekang besi boeat menjalahken api; biar poen tida berisi apa-apa, kakoeatannja menioep tida bisa abis; semingkin keras digojang semingkin santer, ia menioep. Sabaliknja manoesia jang gampang melemboeng, lekas sekalih abis tenaganja; maka tida ada satoe apa jang lebih baek dari pada mengendaliken diri sendiri.

⁂

Natuur poenja kakedjeraan soedah banjak diroendingken dan dibitjaraken oleh achli-achli pemikir. Sair-sairannja Omar Khayyam ada penoeh dengen keloehan, tjomelan dan bangkitan atas tida adilnja Roda Langit atawa Toehan jang tida kenai kasihan. Sabaliknja orangorang jang tinggi kabatinannja tida menjomel, hanja tjoba tjari taoe boeat mengarti djalannja itoe Wet Alam jang memang djoega tida perna menjeblah dan mengambil fihak, tida ada jang dielonin dan tida perna memoesoehin siapa djoega. Itoe Matahari briken sinar terang pada sekalian machloek, tida perdoeli apa baek atawa djahat, apa soedjoet pada Toehan atawa kafir. Segala hatsil dan kakajaän dari ini boemi tida disertaken tanda atawa merk aken djadi miliknja siapa, kerna ditoedjoeken sama-rata bagi semoea manoesia. Kaloe ada orang jang ingin dapet paling banjak boeat dirinja sendiri dan familienja, dan ingin kangkangin itoe segala makanan, emas, perak dan batoe permata oentoek kasenangannja sendiri dengan meroegiken pada jang laen-laen, boeat ini sifat kouwkati ia haroes membajar mahal. Ia aken tjiptaken Karma Djelek jang membikin dalem laen penghidoepan ia alamken kamiskinan dan kakoerangan. Segala apa orang merdika aken lakoeken, tapi sasoeatoe perboeatannja ada sabagi menanem bibit jang boeahnja, manis atawa pait, ia nanti rasaken sendiri. Maka saorang jang boediman pandang manoesia sabagi barang prabotan jang dibikin oentoek sembahjangan soetji, sebab kapan rohnja soedah mateng dan mengenal kabeneran, marika tida maoe pikir lagi kapentingan atawa kaoentoengan doenia, hanja srahken dirinja aken mendjadi korban goena laen orang dan segala pakerdja'annja tida sedikit poen mengandoeng sifat kouwkati, hanja djadi sabagi barang sembahjangan jang disadjiken aken goena jang Maha Tinggi—ja, marika bikin dirinja sabagi „pekakas" oentoek menjiarken pri kabeneran. Maka itoe sedeng Natuur berlakoe dengen tida kenal kasihan dan tida mengelonin siapa djoega, saorang Boediman jang soedah taoe toedjoean jang achir dari ini kahidoepan, ada pandang manoesia seperti barang prabotan jang dibikin goena maksoed soetji, dan boeat ini ia tida pandang deradjat, golongan atawa kapertjaja'an jang berlaenan, djahat dan baek, moelja atawa hina, kerna ia taoe, seperti djoega semoea beboeahan dari satoe poehoen aken dateng temponja boeat djadi mateng, begitoe poen sekalian manoesia aken dateng temponja boeat sedar dan mengenal kabeneran. (Ajat 1 dan 2).

Boeat dapetken itoe kasampoerna'an tida ada tjonto jang lebih njata dari-pada sifatnja natuur jang berätsal dari kakosongan. Maskipoen itoe kaloeasan alam jang ada antara Langit dan Boemi tida berisi satoe apa, tetapi disitoe ada terdapet tenaga jang melahirken penjipta'an, seperti djoega itoe kantong oeboeban dari toekang besi jang djoestroe dari kakosongannja maka djadi bergoena besar boeat dipake menjalahin itoe api jang bikin loemèr besi dan laen-laen logam. Semingkin keras itoe oeboeban digontjang-gontjangken semingkin santer ia menioep. Tetapi manoesia jang dibikin melemboeng dadanja oleh kasombongan, ka'angkoean dan kabangga'an, boekandja djadi semingkin bergoena besar, hanja malah gampang meledak dan ilang tenaganja. Maka ada perloe sekalih orang bikin ketjil, bikin kosong dirinja dengen djalan kendaliken dan tindes hawa nafsoenja.