Penghidoepan Radja Belgie/Bab 3

by Tjoe Bou San

Satoe tjerita jang betoel
telah kadjadian di
Europa.

PENGHIDOEPAN RADJA BELGIE I.

Ditjeritaken
oleh :
TJOE BOU SAN.
_BATAVIA
DRUKKERIJ SIN PO
¹⁹¹³

Pembagian Buku Penghidoepan Radja Belgie Berdasarkan bab

Bab 1 | Bab 2 | Bab 3 | Bab 4 | Bab 5 | Bab 6 | Bab 7 | Bab 8 | Bab 9 | Bab 10 | Bab 11 | Bab 12 | Bab 13 | Bab 14 | Bab 15 | Bab 16 | Bab 17 | Bab 18 | Bab 19 | Bab 20 | Bab 21 | Bab 22 | Bab 23 | Bab 24 | Bab 25 | Bab 26 | Bab 27 | Bab 28 | Bab 29 | Bab 30

III. ————

 Radja Belgie ada sendirian dalem kamarnja. Tangannja jang kanan ia senderken di pegangan korsi, dan tjara begitoe ia berdiri dengen melajangken pikiran, sembari matanja mengawasi pada satoe bola doenia jang berada diatas ia poenja medja toelis.

 Itoelah ada petah boemi di doenia ini jang loewas sekali. Laoetan besar, berbagi-bagi karadjahan jang berkwasa, samoewa djadjahan jang kaloearken banjak hasil, dan djoega negri Belgie jang teramat ketjil, ada terloekis di sitoe dengen terang.  Samantara itoe timboellah napsoenja, ingin berkwasa, satoe kainginan jang soeda berada dalem pikirannja, sadari ia masi djadi anak-anak.

 Ia ada mendjadi radja dari satoe negri ketjil, tapi hatinja tida menjingkir aken beringin, djadi satoe djoengdjoengan dari soeatoe tanah jang loewas dan berharta.

 Napoleon telah membikin lebar watas negrinja dengen goenaken kakoewatannja tenaga, tapi ia merasaken pasti sekali, tida boleh berboeat dengen menoeroet itoe toeladan, dan pikirannja jang tjerdik poen sanantiasa ada membri inget, jang klakoean samatjem itoe, bilah dibandingken dengen ka'adahan negrinja adalah teritoeng dalem golongan hal jang moestahil.

 Tapi, ia poen tida sekali ada berharep aken bisa berlakoe satjara demikian. Apa jang ia hendak berboeat, adalah hal jang ia misti lakoeken dalem negri bilangannja, maka baroelah boleh dibilang, ada soeatoe perkara jang boleh mèndjadi. Kerna ne­grinja poen ada banjak mempoenja soember pengharepan.

 Antwerpen ada satoe plaboean jang besar dan bagoes letaknja, dimana paroesahan dan perlajaran bisa saling bertemoe dengen gampang. Orang jang pandei, dalem negrinja tida kakoerangan, sedeng ia sendiri poen ada poenja pengartihan tjoekoep dalem hal berniaga besar, dan idoengnja boleh sekali dibandingken dengen idoengnja satoe antara soedagar-soedagar jang paling tjerdik, dalem melakoeken perkerdjahan di doenia. Dan djoega ia ada poenja pengrasahan hati keras sekali, hingga pasti ia nanti bisa menoedjoe sabagimana adanja ia poenja niat, dengen tida sedikit menjingkir, maski poen misti hadepken halangan jang bagimana berat dan haibat.

Ia ada berpikir djoega sedikit boeat kaoentoengan rahajat negrinja, kerna memang poen sanantiasa ada dalem ingetannja, aken mendapet oentoeng dan kakwasahan.

Dengen oendang-oendang dari negrinja, dengen itoe wet jang menetapken djoega kamistihannja radja, ia tida sekali bisa merasa satoedjoe. Ia lebi soeka berada dalem koetika sabagi Lodewijk XIV, jang boleh berkata: „Karadjahan Prasman jalah akoe sendiri”.

Aken tetapi waktoe soeda djadi berobah. Malaenken katinggalan bebrapa radja, jang boleh berkata demikian, sedeng di Belgie tida sekali satoe radja boleh berlakoe gitoe, kerna rahajat negri ada terlaloe menjinta ia poenja kamerdikahan, dan tida nanti maoe soeda, bilah ada jang maoe tjoba, melanggar oendang-oendang dalem negrinja.

 Dari sebab itoe maka ia goenaken matanja ka laen bilangan. Doenia ada sampe loewas, hingga tentoe misti terdapet djoega soeatoe tempat, dimana ia boleh diriken soeatoe karadjahan baroe, dengen adaken pamarentahan, jang memaksa rahajat toeroet kahendaknja. Tapi itoe, barangkali berada di tempat jang djaoe sekali!

 Ia poeter itoe bola doenia.

 Amerika! Amerika-Salatan!

 Samoewa soeda masoek dalem miliknja laen orang, atawa maski poen ada, tentoe djoega tjoema bebrapa poelo ketjil, jang dalem saban waktoe, boleh tenggelam dalem laoetan. Salaennja itoe, adalah lagi Amerika-Sarikat, jang telah mementjarken tangannja jang berkwasa atas samoewa tanah tanah di Amerika, dari Oetara teroes sampe di Salatan. Itoe djoega ada satoe hal moestahil, aken Belgie boleh mengharep kaoentoengan!

 Azië! Djoega tida boleh mendjadi, sedeng Australië, sama sekali soeda masoek dalem miliknja karadjahan Inggris.  Habis, ada apatah lagi laen katinggalan boeat Belgie? Malaenken Afrika! Di sitoe tjoema masi terboeka, aken baginda sarapeken niatnja, di sitoe masi ada kating­galan tanah, jang belon mendjadi kapoenjahannja laen orang, dan malaenkan tanah di sitoe djoega, jang masi banjak menjimpen harta . . , mas, gading, intan . . . . .

 Ia poeter itoe bola doenia ka kiri.

 Nah, betoel sadja! Masi ada!

 Aken tetapi boeat bikin permoelahan disitoe, ia perloe sekali misti banjak mempoenja oewang, dan djoestroe itoe moestika jang paling bergoena, tida ada pada dirinja.

 Samantara itoe pintoe kamar ada terketok dengen plahan sekali.

 Bebrapa sa'at ia tinggal berdiri dengen pikiran melajang, kamoedian laloe berseroe:

 „Masoek!”

 „Padoeka toewan Prins van SaksenCoburg ingin bitjara, Sri baginda.”

 „Kaloe akoe ada begitoe hartawan seperti ia, nistjaja samoewa nanti terdjadi dengen gampang sekali,” berpikir baginda. Tapi boeat harep pertoeloengannja, itoelah ada hal jang sama sekali tida boleh mendjadi, kerna itoe prins ada saorang jang malaenkan berpikir boeat kasenangannja diri sendiri.

 „Minta padoeka toewan masoek!”

 Sasa'at kamoedian laloe dateng dalem itoe kamar, saorang lelaki jang beroesia tiga poeloe tahon. Singkapnja ada gaga perkasa, tapi kaloe diliat dengen terliti, nyatalah tjoema djenggotnja, jang paling menjataken ia poenja laki-laki, dari sakoedjoer badannja, jang sanantiasa ada dihiasi satjara begitoe perlente. Ia ada memake katja mata jang mendjepit idoengnja, dan dari sitoe ada kaliatan njata sekali, matanja jang sanantiasa bergirang, tapi salaloe ada kaloearken sorot, aken menimboelken orang poenja rasa tjoeriga.

 Dengen gerak-gerakan jang menandaken senang, laloe prins itoe mengamperken pada baginda. Iaorang berdoewa ada bersobat baek satoe sama laen, hingga masing-masing boleh troesa goenaken peradatan, sabagimana jang biasa digoenaken oleh orang besar, bilah bertemoe moeka.

 „Bagimana dengen minggoe jang laloe?” tanja Leopold. „Masi sakit kapala?”

 „Masa sakit kapala sampe begitoe lama?” saoet Padoeka toewan Prins. „Tapi sasoenggoenja akoe merasa poewas sekali dengen ka'adahan di itoe malem.”  „Pada Maxim akoe sanantiasa ada dapet rasa mabok, dan djoega tetamoenja ada tertjampoer dengen sembarang orang. Di fihak njonja-njonja, sabegitoe djaoe akoe taoe, ada tinggal manis sabagimana biasa, tapi di golongan toewan-toewan . . . ba­rangkali tida moestahil, kaloe maoe dibi­lang, orang nanti djalan mendesak-desak dengen koesirnja sendiri . . . . .”

 „Bagoes! Dan akoe hari kamaren telah memperoleh oentoeng, bitjara pada La Rose.”

 „Ha, lebi bagoes lagi.”

 „Ia ada bersama-sama dengen Graaf De Villeneuve. Soenggoe bertjaja sekali, dandanannja jang begitoe perlente!”

 „Tapi akoe tida soeka dengen tingkanja satjara koepoe-koepoe.”

 „Hei, kaoe toch tida ingin . . . . .”

 „St! Djangan begitoe keras. — Tembok djoega boleh djadi ada mempoenja koeping. Kaoe taoe sendiri, permeisoeri sanantiasa ada tjemboeroean. Pada de Meaublanc djoega akoe tida bisa pertjaja, kerna saban saban gerakannja, adalah sabagi memboetoeti akoe poenja perdjalanan. Minggoe jang laloe, tatkalah akoe baroe bebrapa hari balik dari kota Paris, poen telah ter djadi satoe hal jang sanget tida enak bagi kitaorang berdoewa.”

 „Apatah perkara begitoe nanti tinggal salamanja pada permeisoeri?”

 „Boleh djadi sekali. Kerna tjemboeroean memang ada satoe penjakit, dan djoega boleh dibilang, jang haibat sekali. Tjoba dari tadinja akoe tida ambil perdoeli padanja . . . tapi ia soeka padakoe, ja, barang­kali djoega ia tjinta dengen sagenap hati . . . dan itoelah jang membikin akoe . . .”

 „Mistinja djoega begitoe!” berkata prins dengen tertawa. „Saorang prampoean, memang patoet sekali menjinta pada soeaminja!”

 „Memang mistinja, atawa boekan, troesa kitaorang ambil perdoeli, hanja tinggali sadja itoe perkara . . . dan akoe maoe tanja kaoe dalem laen oeroesan: Akoe denger orang berkata, kaoe ada ingetan bernikah, apatah itoe ada hal jang benar?”

 „Niat bernikah . . . Ha, barangkali djoega ada lantaran . . . . .”

 „O, kaloe begitoe orang tida bitjara djoesta.”

 „Ja, akoe ada pesan, aken meliat ka sana-sini boeat akoe, tapi akoe tjoema bilang sadja demikian, sedeng sabenarnja. . . . . datengkoe kamari, adalah boeat bitjaraken itoe perkara.”

 Aer moeka baginda djadi berseri. Apa? Ia ingin . . . Tapi, barangkali itoe prins sendiri nanti memboeka djalan, boeat ia menoedjoe ka goenoeng pengharepannja dari itoe baeklah sedikit bersabar.

 „Hajo, kitaorang malaenkan ada berdoewa sadja, bitjaralah!” berkata baginda dengen menahan-nahan perkatahan, jang ada bersedia di oedjoeng bibirnja, kamoedian laloe ia silaken itoe prins doedoek.

 „Apatah tida ada soeatoe halangan, aken akoe berlakoe begitoe laloewasa, di sini, di astana radja?”

 „Halangan sanantiasa misti dilaloeken di samping boeat kitaorang berdoewa. Dan itoe, bitjaralah!”

 „Nah, apatah tida ada kaberatan, kaloe akoe sama Louise . . . .”

 „Louise?”

 Sembari kata demikian, roepanja baginda ada sabagi orang jang bangga. Ia poenja poetri baroe beroesia anam belas tahon, hingga masi masoek dalem golongan anak-anak, sedeng itoe prins soeda beroemoer tiga poeloe satoe, satoe orang dewasa jang telah kenal perdjalanan doenia. Tapi, apatah hal itoe boleh teritoeng seperti kaberatan? Tida, tida sama sekali! Dalem golongan orang-orang berpangkat besar, perkara bedanja oemoer antara laki dan istri, tida begitoe diperdoeliken, malahan ada djoega permeisoeri atawa prinses, jang mempoenja soeami sabagi tingkatan oesia ajahnja. Salaennja itoe, adalah lagi satoe hal jang paling bagoes . . . Itoe prins ada amat hartawan, dan satoe mantoe jang kajah . . .
 Baginda laloe menginget poelah niatnja jang begitoe besar, dan tida aken bisa sampe, bilah ia tida dapet pertoeloengan banjak oewang, hingga achir-achir hatinja djadi tetap, aken loeloesken kainginan itoe prins goena dapeti maksoednja sendiri.
 „Ja, Louise,” kata lagi Prins van SaksenCoburg. „Apa kaoe ada merasa begitoe heran? Ia soeda sampe dalem oemoer boeat menikah, dan dengen membilang teroes terang akoe misti mengakoe, ia ada tjantik dan elok sekali dalem akoe poenja pemandangan, hingga tentoe ia nanti mendjadi satoe istri jang manis, boeat hiasi akoe poenja astana, jang soeda sakean lama berada dalem kasoenjian.”
 „Dari fihak akoe tida sedikit ada kaberatan, tapi akoe kwatir iboenja, permeisoeri . . . .”

„Dan dari fihak orang prampoean, salamanja ada gampang diboedjoek. Kaloe sadja kaoe soeka sedikit memaksa . . . ”

Dari hal Louise sendiri tida dibitjaraken sama sekali. Orang tida sekali maoe menginget, jang ia djoega boleh djadi tida satoedjoe dengen itoe nikahan, dan merasa tida soeka, bersoeami dengen itoe prins.^[1]

„Aken tetapi, prins, kaloe akoe soeda berdaja boeat dapeti istrikoe poenja idjin, aken seraken Louise dalem tanganmoe, seperti kaoe poenja istri, patoetlah djoega, bilah kaoe pertoendjoekken satoe tanda persobatan padakoe.”^[2]  „Djika kainginanmoe ada hal jang akoe bisa berboeat, dengen segala senang hati akoe nanti lakoeken . . . kaoe tjoema perloe sadja mengoetaraken.”
 „Akoe ada poenja satoe niat, satoe kahendak jang besar sekali, tapi boeat sampeken itoe, akoe perloe dapet toeloengan oewang djoemblanja boekan sedikit!”
 „Dompetkoe ada tersedia boeat kaoe, sobat! Memang djoega satoe pertoeloengan misti dibales dengen menoeloeng Tapi apatah adanja kaoe poenja niat jang begitoe besar?”
 Baginda laloe berbangkit dari tempat doedoek, dan sembari hadepken itoe bola doenia pada sobatnja, ia berkata:
 „Liatlah, doenia ada loewas sekali. Di sini, di sana, ada teramat banjak tempat jang masi menjimpan harta. Jang mem­bikin moestahil aken dapeti itoe kaoentoengan, malaenken oewang, kakerasan hati dan katjerdikan . . . tapi kaloe kaoe menoeloeng akoe jang pertama, akoe nanti lakoeken sendiri boeat jang laen-laen.”

 „Kaloe baroe begitoe sadja, traoesa kaoe kwatir. Prins van Saksen-Coburg poenja soember oewang, sanantiasa nanti terboeka

Prins van Saksen Coburg.
(katja 42).

pintoenja, boeat kaoe goenaken sabagi pe­nawar.”

Kamoedian kadoewa orang itoe laloe berdjabat tangan satoe sama laen, dan dengen begitoe, poetoeslah perkara, aken seraken Prinses Louise mendjadi istrinja Prins van Saksen-Coburg.^[3]

Bebrapa hari kamoedian, satelah permeisoeri mendapet taoe, apa jang telah kadjadian antara soeaminja dan Pris van Saksen-Coburg, laloe ia bitjaraken pada baginda, tentang kaberatan anaknja dalem itoe nikahan. Aken tetapi baginda lantas menjaoet dengen pendek, satjara tida boleh dibantah:  „Akoe soeda poetoesken itoe perkara, Maria, dan biar poen bagimana, nanti tinggal tetap begitoe!”

Mendenger itoe, permeisoeri sabagi merasaken moeloetnja disoempal, hingga maski poen dalem hatinja ada bersoesoen tindi dengen berbagi-bagi pikiran, tapi tida satoe perkatahan bisa dikaloeari olehnja.

Di itoe malem, dalem satoe kamar jang soenji sekali di itoe astana, adalah berdoedoek diatas satoe divan, satoe prampoean toewa bersama satoe nona moeda. Masing-masing berpeloekan satoe sama laen, dan menangis teramat sedinja.

Aken tetapi samoea soeda kasep, soeda kadjadian . . . nasibnja iaorang berdoewa soeda ditetapken. O, asal sadja boekan itoe mega mendoeng, jang hendak kasi liat poelah roepanja jang bengis!

---

Catatan kaki

1. Dengen meliat ini ka'adahan, bagi pembatja poen tentoe mendjadi njata, penghidoepan satoe poetri, misti sanantiasa ada dibawa pengaroenja politiek, hingga maski orang kampoengan boleh membilang, bernikah ada hal jang paling penting dalem penghidoepan manoesia, boeat satoe poetri, misti anggap itoe seperti satoe djembatan, aken karadjahannja bisa menjebrang ka medan kamoeliahan.
2. Maski radia Belgie ada satoe radja, tapi klakoeannja dalem ini hal, adalah sabagi soedagar jang mendjoewal belih. O, manoesia, pembatja, biarpoen dalem bagian mana, ada sama sadja perboeatannja, melakoeken penghidoepan!
3. Benarlah kaloe Louise bilang, ia didjoewal boeat sampeken ajahnja poenja kainginan. Tapi djika orang maoe menginget, jang kamadjoean dengen kasenangan tida bisa berdjalan bersamasama, nistjaja orang tida nanti merasa terlaloe heran atas perboeatannja radja Belgie. Soenggoe sajang beriboe sajang, jang, aken menjampeken satoe niat, baginda misti bikin tjilaka nasib ia poe­nja poetri dalem saoemoer hidoepnja. Aken tetapi, bilah orang maoe hargaken, brapa mahal adanja satoe niat besar jang kadjadian, nistjaja orang nanti merasaken djoega, perboeatannja baginda dalem ini hal, boekan ada satoe perkara jang loewar biasa.